“Leksiyon 90—Doktrina ug mga Pakigsaad 79–80: Magpahayag og Maayo nga mga Balita sa Dako nga Kalipay,” Manwal sa Magtutudlo sa Seminary sa Doktrina ug mga Pakigsaad (2025)
“Doktrina ug mga Pakigsaad 79–80,” Manwal sa Magtutudlo sa Seminary sa Doktrina ug mga Pakigsaad
Leksiyon 90: Doktrina ug mga Pakigsaad 77–80
Doktrina ug mga Pakigsaad 79–80
Magpahayag og Maayo nga mga Balita sa Dako nga Kalipay
Samtang gihangop sa unang mga Santos ang mensahe sa Pagpahiuli, dako ang ilang tinguha sa pagpakigbahin sa ebanghelyo ni Jesukristo ngadto sa uban. Ang uban mipakigbahin sa ilang mga pagtuo ngadto sa mga sakop sa pamilya ug mga higala. Ang uban mitubag sa tawag gikan sa Manluluwas sa pagserbisyo og misyon. Kini nga leksiyon makatabang sa mga estudyante sa pagpakigbahin sa ebanghelyo sa Manluluwas sa tibuok nilang kinabuhi.
Mga Posibleng Kalihokan sa Pagkat-on
Mga kahigayonan sa pagpakigbahin sa ebanghelyo ni Jesukristo
Tabangi ang mga estudyante sa pag-ila sa mga kahigayonan sa pagpakigbahin sa ebanghelyo ni Jesukristo. Ikonsiderar ang pagdapit sa mga estudyante sa pagbasa niini nga pamahayag ug sa paghisgot sa mosunod nga mga pangutana nga magpares o diha sa gagmay nga mga grupo.
Si Elder Dieter F. Uchtdorf sa Korum sa Napulog Duha ka Apostoles mipakigbahin:
Bisan asa ka sa kalibotan, adunay daghang kahigayonan sa pagpaambit sa maayong balita sa ebanghelyo ni Jesukristo ngadto sa mga tawo nga imong mahimamat, ikauban sa pag-eskwela, ikauban sa pagpuyo, o katrabaho, o ikauban sa paglingawlingaw. (Dieter F. Uchtdorf, “Misyonaryo nga Buhat: Pagpakigbahin sa Unsay Anaa sa Inyong Kasingkasing,” Liahona, Mayo 2019, 15)
-
Unsa nga mga kasinatian ang imong nasinati sa pagpaambit sa ebanghelyo ni Jesukristo?
-
Unsa nga mga oportunidad ang paminaw nimo nga imong maangkon sa tibuok nimong kinabuhi sa pagpakigbahin sa ebanghelyo?
-
Unsa ka kamasaligon sa imong abilidad sa pagpakigbahin sa ebanghelyo ni Jesukristo? Unsa ang makapalisod sa pagpakigbahin sa ebanghelyo?
Dapita ang mga estudyante sa mainampoong pag-ila og usa ka tawo nga mahimo nilang mapakigbahin ang ebanghelyo ni Jesukristo. Kon gidapit ang mga estudyante sa pagkompleto sa kalihokan sa pagpangandam, tingali aduna na silay nahunahunaan. Awhaga ang mga estudyante sa pagsulat sa mga ngalan niini nga mga tawo diha sa ilang journal sa pagtuon. O, kon walay nahunahunaan, dapita sila sa pagpadayon sa pagpamalandong sa mga kahigayonan nga tingali maaduna sila sa pagpakigbahin sa ebanghelyo ngadto sa uban. Dasiga ang mga estudyante nga magtinguha og inspirasyon gikan sa Espiritu Santo sa tibuok niini nga kasinatian sa pagkat-on.
Maayo nga mga balita sa dako nga kalipay
Diha sa mga pagpadayag nga narekord sa Doktrina ug mga Pakigsaad 79–80, ang Manluluwas mitawag og tulo ka indibidwal sa pagserbisyo og mga misyon: Jared Carter, Stephen Burnett, ug Eden Smith.
Basaha ang Doktrina ug mga Pakigsaad 79:1. Pangitaa kon giunsa paghulagway sa Ginoo ang mensahe nga Iyang gihangyo kang Jared Carter nga ipakigbahin ngadto sa uban.
-
Unsa nga mga pulong ang nakadayeg nimo gikan niini nga bersikulo? Unsa ang gidapit sa Manluluwas nga atong buhaton?
Tabangi ang mga estudyante sa pag-ila nga si Jesukristo nagdapit kanato sa pagpakigbahin sa kalipay sa Iyang ebanghelyo ngadto sa tanan. Ikonsiderar ang pagsulat og Maayo nga mga balita sa dako nga kalipay diha sa pisara. Dapita ang mga estudyante sa paglista kon unsay ilang nahibaloan mahitungod kang Jesukristo ug sa Iyang walay kataposang ebanghelyo nga naghatag kanila og dako nga kalipay.
Hunahunaa ang mga kinabuhi sa mga tawo kansang mga ngalan imong gisulat sa sinugdanan sa leksiyon. Isulat sunod sa ilang mga ngalan kon paminaw nimo sa unsang paagi ang “maayo nga mga balita” sa ebanghelyo makahatag kanila og kalipay.
Ang Doktrina ug mga Pakigsaad 79–80 naglangkob sa mga pagtulun-an gikan sa Manluluwas nga makatabang sa mga estudyante sa ilang mga paningkamot sa pagpakigbahin sa ebanghelyo. Paghunahuna og mga paagi nga makatabang ka kanila sa pagdiskobre niini nga mga pagtulun-an. Ang mosunod nga kalihokan maoy usa ka paagi nga mahimo nimo kini. Kini mahimong mausab aron matubag ang mga panginahanglan sa imong mga estudyante.
Hatagi ang matag estudyante sa handout nga giulohan og “Isangyaw ang Akong Ebanghelyo.” O dapita ang mga estudyante sa paghimo og susama nga tsart diha sa blangko nga piraso sa papel ug hatagi sila og mga instruksiyon alang sa matag kahon.
Isangyaw ang akong ebanghelyo
Isangyaw ang Akong Ebanghelyo
Samtang nagbuhat ka niini nga kalihokan, pangitaa ang mga pagtulun-an gikan ni Jesukristo nga makatabang kanimo sa imong mga paningkamot sa pagpakigbahin sa kalipay sa Iyang ebanghelyo.
Basaha ang tudling sa kasulatan ug kompletoha ang mga instruksiyon sa matag kwadrado. Kon nagkinahanglan ka og dugang nga luna, mahimo nimong gamiton ang luyo nga bahin sa handout.
|
Doktrina ug mga Pakigsaad 79:2 Isulat pag-usab kini nga bersikulo sa imong kaugalingong mga pulong. |
Doktrina ug mga Pakigsaad 79:3 Pagdrowing og representasiyon niini nga bersikulo. (Ang mga binugkos mga pungpong sa lugas ug kini nagsimbolo sa mga tawo kinsa midawat sa ebanghelyo.) |
|
Doktrina ug mga Pakigsaad 79:4 Isulat kon unsay imong gituohan nga mao ang labing importante nga pulong o hugpong sa mga pulong niini nga bersikulo ug usa ka mubo nga pagpasabot kon nganong imong gibati nga kini importante sa pagpakigbahin sa ebanghelyo. |
Doktrina ug mga Pakigsaad 80:1 Pangita og usa ka tudling sa doktrinal nga kahanas o laing kasulatan nga may koneksiyon niini nga bersikulo. Isulat ang pakisayran dinhi niini nga kwadro. |
|
Doktrina ug mga Pakigsaad 80:2 Isulat ang usa ka rason nga imong nahunahunaan nga ang Ginoo mihatag og mga kompanyon sa mga misyonaryo. |
Doktrina ug mga Pakigsaad 80:3 Isulat kon sa unsang paagi imong gibati nga kini nga bersikulo mahimong may kalabotan sa atong kaugalingong mga paningkamot sa pagpakigbahin sa ebanghelyo ni Jesukristo. |
|
Doktrina ug mga Pakigsaad 80:4 Isulat ang usa ka butang nga imong nadungog, gituohan, o nahibaloan nga tinuod mahitungod ni Jesukristo o sa Iyang ebanghelyo. Ilakip kon nganong kana nga kamatuoran mahimong bililhon alang sa uban nga madunggan. |
Doktrina ug mga Pakigsaad 80:5 Basaha kini nga bersikulo ingon og kini gipamulong direkta nganha kanimo. Isulat kon sa unsang paagi nga ang pagkahibalo nga ang Manluluwas nagtawag kanimo sa pagpakigbahin sa ebanghelyo makahatag kanimo og pagsalig sa pagbuhat niini. |
Usa ka posible nga paagi sa paggamit niini nga handout mao ang pagtino daan sa gidugayon sa panahon nga gikinahanglan sa mga estudyante sa pagkompleto sa matag kalihokan. Ipahibalo sa mga estudyante ang gitakda nga gidugayon sa panahon nga ilang kompletohon ang kalihokan sa matag kahon ug pagtakda og timer. Sa matag higayon nga ang timer motingog, ingna sila nga ipasa ang ilang papel ngadto sa laing estudyante, basahon kon unsay gisulat sa ilang mga klasmeyt, ug buhaton ang kalihokan diha sa sunod nga kahon.
Human niini nga kalihokan, mandoi ang mga estudyante sa pag-uli sa mga papel ngadto sa orihinal nga mga tag-iya. Dapita ang mga estudyante sa pagbasa ngadto sa ilang kaugalingon sa tanan nga nasulat sa ilang papel. Ang mga estudyante mahimong mopakigbahin og mga panabot gikan sa ilang mga klasmeyt o sa ilang kaugalingong pagtuon nga ilang gibati nga makatabang sa ilang mga paningkamot sa pagpakigbahin sa kalipay sa ebanghelyo ni Jesukristo.
Pagpakigbahin sa unsay atong nadungog, gituohan, ug nasayran nga tinuod
Ikonsiderar ang pagrebyo sa Doktrina ug mga Pakigsaad 80:4. Niini nga bersikulo, ang Ginoo mihangyo kanato sa pagpakigbahin kon unsay atong nadungog, gituohan, ug nasayran nga tinuod. Pagdapit og pipila ka estudyante sa pagpakigbahin sa unsay ilang gisulat o sa usa ka klasmeyt niana nga kwadrado.
Aron matabangan ang mga estudyante sa paghanduraw kon unsaon nila sa paggamit ang ilang nakat-onan sa pagpakigbahin sa ebanghelyo, ikonsiderar ang pagpakigbahin og usa ka ehemplo gamit ang usa ka istorya o bidyo. Usa sa maong bidyo mao ang “Good Things to Share” (2:21), anaa sa ChurchofJesusChrist.org.
Good Things to Share
Sharing what matters most is not unusual at all. What good things will you share?
-
Unsa ang imong gibati karon nga nakapalambo sa imong tinguha sa pagpakigbahin sa kalipay sa ebanghelyo sa Manluluwas?
-
Unsa ang pipila ka mga paagi nga imong magamit ang mga kamatuoran nga imong nakat-onan karon sa tibuok nimong kinabuhi?
Dapita ang mga estudyante sa pagrekord sa mga impresyon nga ilang nadawat nga makatabang kanila sa pagpakigbahin sa kalipay sa ebanghelyo sa Manluluwas ngadto sa mga indibidwal nga ilang gitino sa pagsugod sa klase. Awhaga ang mga estudyante sa pagsunod sa ilang mga impresyon ug sa pagpakigbahin sa ilang mga gituohan ngadto sa uban sa makahuloganong mga paagi sama sa personal nga mga panag-istoryahanay, mga mensahe sa text, o sa social media.