Lesona 89: Mataupu Faavae ma Feagaiga 77–80

Mataupu Faavae ma Feagaiga 78

O Le Faleteuoloa a le Alii

Sa faatonuina e le Alii ia Iosefa Samita, Sini Rikitone, Newel K. Whitney, ma isi faitaulaga sili e faatulaga i latou lava i se vaega ua ta’ua o le Kamupani Tuufaatasi. Sa pulea e le kamupani meatotino a le Ekalesia, faleteuoloa, ma taumafaiga lomitusi ma saunia punaoa e fesoasoani e taulima ai manaoga faaletino o le Au Paia. O lenei lesona e mafai ona fesoasoani i tagata aoga e faateleina lo latou manao ia avea e faapei o le Faaola e ala i le tausia o i latou e manaomia le fesoasoani.

Gaoioiga E Ono Mafai Ona Aoao Ai

O Le Kamupani Tuufatasi

O se tasi o auala e amata ai le lesona o le fesoasoani lea i tagata aoga e faia se vaaiga faataitai o se aiga e i ai manaoga faaletino. I le avea ai ma se vaega o le vaaiga faataitai, e aofia ai faigata tautupe o loo feagai ma le aiga ma manaoga patino o loo ia i latou. O lenei vaaiga faataitai o le a faasino atu i ai i se taimi mulimuli ane o le lesona.

Faamalamalama atu o le a aoao atili tagata aoga e uiga i auala e fesoasoani ai le Alii ia i tatou e tausia i latou e le tagolima a o latou suesueina le Mataupu Faavae ma Feagaiga 78. Valaaulia tagata aoga e saili faaaliga e iloa ai po o ai e ono tuu atu e le Alii ia i latou e fesoasoani i ai ma mea e mafai ona latou faia.

I le aso 1 Mati, 1832, sa fono ai le Perofeta o Iosefa Samita ma se vaega o faitaulaga sili i Katelani, Ohaio. I lea fonotaga, sa faalau mai ai e le Perofeta le faaaliga o loo tusia i le Mataupu Faavae ma Feagaiga 78. Mulimuli ane, sa faavaeina ai le Kamupani Tuufaatasi. E faavae i luga o le tulafono o le faapaiaga, sa pulea ai e le Kamupani Tuufaatasi meatotino a le Ekalesia, taumafaiga tautupe, ma taumafaiga lomitusi i Ohaio ma Misuri. E ala atu i le kamupani, sa faatuina ai e le Alii se faleteuoloa e tausia ai i latou e manaomia le fesoasoani, ma sa faatonuina ai Iosefa Samita, Sini Rikitone, ma Newel K. Whitney e malaga atu i Misuri (Siona) e faatulaga.

Faitau le Mataupu Faavae ma Feagaiga 78:1–6, ma vaavaai mo le mafuaaga na manao ai le Alii i ana auauna e faatulaga i latou lava i lenei auala.

• O a mea o loo aoao mai e nei fuaiupu e uiga i manaoga o le Alii mo Ona tagata?

• Aisea e te manatu ai o le tausia o e matitiva e manaomia e “faalautele ai le faamoemoe” o Siona? E mafai faapefea ona aumai ai le mamalu i le Tama Faalelagi?

O le faleteuoloa a le Alii

Mafaufau e aumai se atigipusa i le vasega ma faaigoa “O Le Faleteuoloa a le Alii.” Fesili i tagata aoga po o le a so latou manatu po o le a le faleteuoloa a le Alii. Atonu e te manao e valaaulia se epikopo po o se peresitene o le paranesi e talanoaina pe faapefea ona faagaoioia le faleteuoloa a le Alii i la outou eria.

Faitau le faauigaga lenei o le faleteuoloa a le Alii, ma vaavaai pe faapefea ona fesoasoani le Faaola ia i latou e manaomia le fesoasoani.

O punaoa uma ua maua i le Ekalesia e fesoasoani ai ia i latou e i ai manaoga faaletino ua faaigoaina o le faleteuoloa a le Alii (tagai i le Mataupu Faavae ma Feagaiga 82:18–19). Ua aofia ai le ofoina atu e tagata o le ekalesia o taimi, taleni, agaalofa, anomea, ma punaoa tautupe e fesoasoani ai ia i latou o e le tagolima.

E i ai le faleteuoloa a le Alii i uarota taitasi ma siteki. E mafai ona fesoasoani soo ia taitai i tagata taitoatasi ma aiga ia maua vaifofo i o latou manaoga e ala i le utuvai mai le malamalama, tomai, ma auaunaga e ofoina atu e tagata o uarota ma siteki. (Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 22.2.1, ChurchofJesusChrist.org)

Talanoa ni auala patino e mafai ai e le autalavou ona fai so latou sao i le faleteuoloa a le Alii (o lona uiga o le, taimi, taleni, agaalofa, anomea, punaoa tautupe). Avatu i tagata aoga se fasipepa. Fai atu i tagata aoga e tusi ia le itiiti ifo ma le tasi se mea patino e mafai ona latou tuuina patino atu i le faleteuoloa a le Alii ona tuu lea o a latou pepa i totonu o le pusa.

Valaaulia se tagata aoga e aveese mai aitema mai le faleteuoloa ma taitai se talanoaga e uiga i le auala e mafai ai e saofaga faapitoa ona fesoasoani i le aiga i le vaaiga faataitai na fatuina e le vasega. Toe fai lenei faataitaiga mo ni nai taimi.

O le faamatalaga lenei ua faamoemoe mo tagata aoga e mafaufau ai na o i latou lava.

Mafaufau pe faapefea ona e naunau e foai atu lou taimi, taleni, ma punaoa e fesoasoani ai ia i latou e le tagolima (naunau tele, naunau teisi, pe le naunau tele i ai).

Fautuaina tagata aoga e saili musumusuga e ala i le Agaga Paia e fesoasoani ia i latou ia lagona atili le naunau e fesoasoani ia i latou e le tagolima faapea foi ma le iloaina o auala e mafai ona latou saofaga ai i le faleteuoloa a le Alii.

Faitau le Mataupu Faavae ma Feagaiga 78:7–8, 14–15, ma vaavaai mo faamanuiaga ua folafola mai e le Alii.

• E mafai faapefea e nei faamanuiaga ona aafia ai oe ma tagata e te iloa?

• O le a le mea ua folafola mai e le Alii ia i latou o e tausia i latou e manaomia le fesoasoani?

  Fesoasoani i tagata aoga e faailoa mai se upumoni e pei o lenei: O le tausia o e matitiva ma e le tagolima e fesoasoani tatou te saunia ai mo se nofoaga i le malo selesitila.

  O leMataio 25:31–40 e mafai ona faaaoga e fesoasoani ai ia malamalama tagata aoga i le mataupu faavae.

• O le a sou manatu e faapefea ona fesoasoani le tausiaina o i latou e lē tagolima e saunia ai tatou e mautofi i le malo selesitila?

• E faapefea ona avea le Faaola ma se faataitaiga o le tausiaina o i latou e lē tagolima?

• E mafai faapefea e se tasi ona faateleina lo latou manao e alofa ma tausia i latou e lē tagolima e pei ona faia e le Faaola?

O le mea e mafai ona tatou faia

Faitau le Mataupu Faavae ma Feagaiga 78:17–22, ma vaavaai mo upu autu po o fasifuaitau e mafai ona fesoasoani ia i tatou e mulimuli ai i le Faaola.

Ina ia fesoasoani i tagata aoga e auai i le talanoaga, e mafai ona e faaali atu fesili nei ma tuu atu i tagata aoga e mafaufau pe faapefea ona latou tali atu. E mafai ona e filifilia solo ni tagata aoga e tali mai e ala i le fai atu i se tasi e filifili se masina o le tausaga. O tagata aoga naunau o e na fananau mai i lena masina e mafai ona filifili se fesili e tali ae e le tatau ona lagona le faamalosia e auai.

Fesoasoani i tagata aoga taitasi ia fai sao i le aafiaga faaleaoaoga: Mo nisi faataitaiga i lenei mea, tagai i le aoaoga ua faaautuina “Fatu se siosiomaga e faaaloalogia ai tagata uma ma iloa ai e faatauaina a latou saofaga” o loo maua i Tomai o le Atinaega o Faiaoga: Alofa Ia i Latou E te Aoaoina. Mafaufau e faataitai le tomai e ala i le faailoa atu e te faatauaina tagata aooga ae latou te lei tuuina mai ni manatu faaalia pe sii mai o latou lima i se manatu.

• O a ni upu po o ni fasifuaitau e sili ona aoga mo oe? Aisea?

• O le a se mea na e maua e mafai ona fesoasoani ia i tatou e usitai ai i le poloaiga a le Faaola e tausia i latou e lē tagolima?

• O le a se mea na e maua e atagia ai le finagalo o le Faaola ina ia tatou avea e faapei o Ia?

Tuu atu i tagata aoga se isi fasipepa. Tuu atu ia i latou se taimi e iloa ai uunaiga atonu na latou maua e uiga i le fesoasoani atu i se tasi o manaomia le fesoasoani po o ni auala patino latou te lagona e mafai ona latou saofaga atu ai i le faleteuoloa a le Alii. Valaaulia i latou e tusi o latou manatu. Ona mafai lea e tagata aoga ona tuu a latou pepa i totonu o le pusa e fai ma sui o le faleteuoloa a le Alii o se auala e faaalia ai lo latou naunautai e fesoasoani, pe mafai foi ona latou aveina le pepa i le fale e fai ma faamanatu.

Punaoa Faaopoopo

E faapefea ona fesoasoani le Ekalesia a le Alii ia i tatou e tausia i latou e le tagolima?

Na faamatala mai e Peresitene Russell M. Nelson:

Ina ia fesoasoani e fafaga e fiaaai, o loo faagaoioi ai e le Ekalesia faleteuoloa a epikopo e 124 i le lalolagi atoa. E ala atu ia i latou, pe tusa e 400,000 oka o meaai e tuuina atu i tausaga taitasi i tagata taitoatasi o mafatia. I nofoaga e le o i ai ni faleteuoloa, e tala mai e epikopo ma peresitene o paranesi ni tupe mai le taulaga anapogi a le Ekalesia e tuu atu ai meaai ma sapalai mo o latou tagata le tagolima. (Russell M. Nelson, “O Poloaiga Sili e Lua,” Liahona, Nov. 2019, 98)

Sa aoao mai Peresitene Henry B. Eyring o le Au Peresitene Sili:

Talu ai e faafofogaina e le Alii a latou tagi ma lagonaina lou lotoalofa mo [i latou e le tagolima], o lea na Ia saunia ai lava mai le amataga o taimi ni auala mo Ona so’o e fesoasoani ai. Na Ia valaaulia Ana fanau ina ia faapaiaina o latou taimi, o a latou mea e maua, ma i latou lava e auai atu faatasi ma Ia e auauna atu ai i isi.

O Lana auala e fesoasoani ai sa faaigoaina i nisi taimi o le ola i le tulafono o le faapaiaga. I se tasi vaitau, sa faaigoaina ai Lana ala o le faatulagaga aufaatasi maopoopo. Ua faaigoa nei i lo tatou taimi, o le polokalama uelefea a le Ekalesia.

O igoa ma auiliiliga o le faagaoioiga ua suia ina ia fetaui ma manaoga ma tulaga o tagata. Peitai o taimi uma lava, o le ala a le Alii e fesoasoani ai ia i latou e i ai manaoga faaletino, e manaomia ai tagata ua faapaiaina i latou lava ma a latou meatotino i le Atua ma Lana galuega, ona o lo latou lava alolofa.

Sa ia valaaulia ma poloaiina i tatou ina ia auai i le faatinoga o Lana galuega e sii a’e ai i latou o loo manaomia le fesoasoani. Ua tatou osia se feagaiga e faia lena mea, i le vai o le papatisoga ma totonu o malumalu paia o le Atua. Tatou te faafouina le feagaiga i Aso Sa pe a tatou aai ma feinu i le faamanatuga. (Henry B. Eyring, “O Avanoa e Fai ai Mea Lelei,” Liahona, Me 2011, 22)

Mataupu Faavae ma Feagaiga 78:3–4. E faapefea ona faaaoga e le Ekalesia ana punaoa tautupe e faalautele ai le galuega a le Faaola?

O punaoa nei e mafai ona fesoasoani i tagata aoga ia malamalama i auala e faamanuiaina ai e punaoa faaletino a le Ekalesia ia fanau a le Tama Faalelagi i le lalolagi atoa.

• Mea Tau Tupe a le Ekalesia—Pisinisi (ChurchofJesusChrist.org)

• O Mea Tautupe a le Ekalesia ma se Faatuatuaga Faatupulaia i le Lalolagi Atoa (ChurchofJesusChrist.org)

• O Le Ekalesia ma Lona Tutoatasi i Mea Tautupe (ChurchofJesusChrist.org)

• Russell M. Nelson, “O Poloaiga Sili e Lua,” Liahona, Nov. 2019, 96–100

• Dallin H. Oaks, “Fesoasoani i e Matitiva ma Mafatia,” Liahona, Nov. 2022, 6–8

• newsroom.ChurchofJesusChrist.org

Mataupu Faavae ma Feagaiga 78:5–6. O le a le uiga o le “tutusa i mea faaletino”?

Ina ia “tutusa i mea faaletino” e le faapea o le a tatau ona tutusa mea faaletino e maua e tagata uma, ae ia tutusa aia mo le mauaina o punaoa e tusa ai ma o latou tulaga eseese ma manaoga (tagai Mataupu Faavae ma Feagaiga 51:3; 82:17). Sa folafola atu e le Alii i le Au Paia o e ola ai i lenei mataupu faavae e faapea, o le a Ia faasoa mai mea uma ua ia te Ia ia i latou ma o le a “tutusa i maliega o mea faalelagi” (Mataupu Faavae ma Feagaiga 78:5).

O fea e mafai ona ou aoao atili ai e uiga i le Kamupani Tuufaatasi?

Tagai i Autu o Talafaasolopito o le Ekalesia: “United Firm (“United Order”),” ChurchofJesusChrist.org.

Tagai i le Revelations in Context (2016), “Newel K. Whitney and the United Firm.”

Gaoioiga Faaopoopo e Aoao Ai

Vitiō e uiga i le fesoasoani atu ia i latou e le tagolima

Mafaufau e faaaoga se tasi pe sili atu o vitio nei e fesoasoani ai i tagata aoga ia malamalama i auala e mafai ona tatou fesoasoani ai ia i latou e manaomia le fesoasoani. E mafai ona faaalia pe a folasia mai le faleteuoloa a le Alii i le lesona pe saunia tagata aoga e tusi i lalo ni auala e mafai ona latou saofaga ai i le faleteuoloa a le Alii.

Filifili se vitio mai le faaputuga vitio a le Community Outreach e talafeagai ma au tagata aoga.

Ina ia vaai i se faataitaiga o se aiga sa faamanuiaina e ala i le faleteuoloa a le Alii, e mafai ona e matamata i le “Tausiga o e Matitiva ma e le Tagolima” (5:40).

Ina ia vaai i faataitaiga o auala e tausia ai e le Ekalesia i latou e manaomia le fesoasoani i le lalolagi atoa, e mafai ona e matamata i le “Ata o le Nofoaga Autu mo Fesoasoaniga Alofa” (3:13) po o le “Maimoaga i le Lotoa o le Uelefea” (6:02)

Mataupu Faavae ma Feagaiga 78:15. O Le Paia e Toatasi o Siona

Ina ia fesoasoani i tagata aoga e aoao e uiga i le Faaola e ala i le taulai atu i Ana faalaniga ma matafaioi, e mafai ona e suesue i Lana faalaniga o le Paia e Toatasi o Siona. Atonu e aoga le faitau ma talanoaina le Mataupu Faavae ma Feagaiga 97:19–21; Mose 7:18, 53. E mafai e tagata aoga ona faailoa mai uiga e manaomia e fausia ai Siona ma pe faapefea ona avea le Faaola ma se faataitaiga o na uiga auaumama.

Mataupu Faavae ma Feagaiga 78:18. “O le a ou taitaia outou i le ala”

Atonu e te manao e fesoasoani i tagata aoga ia faateleina lo latou talitonuga o le a taialaina ma taitaia e le Tama Faalelagi o latou olaga. A uma ona faitau le Mataupu Faavae ma Feagaiga 78:18, e mafai ona outou talanoaina auala e taitai ai i tatou e le Tama Faalelagi (e ala mai i le Agaga Paia, matua, taitai o le Ekalesia, faamanuiaga faapeteriaka, ma isi). E mafai e tagata aoga ona faasoa o latou aafiaga patino. E mafai foi ona outou talanoaina pe faapefea e le iloaina o le a taitai i tatou e le Tama Faalelagi i le ala e mafai ona fesoasoani tatou te lototetele ai. O le faamatalaga lenei e ono faatamaoaigaina ai le talanoaga.

Na faasoa mai Elder Ronald A. Rasband o le Korama a Aposetolo e Toasefululua:

Tau ina ia tatou manatu mamafa i le valaau a le Alii ina “ia fiafia, ona o le a Ou taitaia outou i le ala” [Mataupu Faavae ma Feagaiga 78:18]. Na te taitaiina i tatou e ala i le Agaga Paia. Ia ao ai ona tatou ola faalatalata i le Agaga, i le vave ona faatino o tatou ulua’i uunaiga, i le iloaina ai e mai le Atua ia. Ou te molimau atu o le mana o le Agaga Paia e taitaia i tatou, puipuia i tatou, ma faatasi ai pea ma i tatou. (Ronald A. Rasband, “Tuu Atu i le Agaga Paia e Taitai,” Liahona, Me 2017, 96)

Mataupu Faavae ma Feagaiga 78:19. Talia mea uma ma le faafetai

Ina ia lagonaina le taua o le lotofaafetai, e mafai e tagata aooga ona faitau ma talanoaina le Mataupu Faavae ma Feagaiga 78:19. A o latou talanoaina le uiga o le “taliaina mea uma ma le faafetai,” fai se lisi o mea e mafai ona latou faafetai ai i le Alii ma vaavaai mo faamanuiaga ua folafola mai e le Alii ia i latou o e “taliaina mea uma ma le faafetai.”

E mafai foi ona e filifilia se tasi o vitio mai le faaputuga o le Lotofaafetai i le Potutusi o Ala o Faasalalauga.