“91-р хичээл—Сургаал ба Гэрээ 82:1–7: ‘Их нь өгөгдсөн түүнээс их нь шаардагддаг,’” Сургаал ба Гэрээний семинарын багшийн гарын авлага (2025)
“Сургаал ба Гэрээ 82:1–7,” Сургаал ба Гэрээний семинарын багшийн гарын авлага
91-р хичээл: Сургаал ба Гэрээ 81–83
Сургаал ба Гэрээ 82:1–7
“Их нь өгөгдсөн түүнээс их нь шаардагддаг”
1832 оны 4-р сард бошиглогч Иосеф Смит болон бусад хүн Миссурийн Индепенденс рүү явав. Тэд Сионыг байгуулж, ядууст санаа тавих байгууллагыг байгуулах Их Эзэний зарлигийг дагаж байлаа (Сургаал ба Гэрээ 78-ыг үзнэ үү). Гишүүдийн хоорондох зарим маргааныг шийдвэрлэхэд тусалсныхаа дараа бошиглогч Их Эзэний хүмүүсээсээ хүсдэг хүлээлтийг дүрсэлсэн энэхүү илчлэлтийг хүлээн авсан юм. Энэ хичээл нь суралцагчдад Их Эзэн тэднийг хэрхэн адисалсан, эдгээр адислалыг хэрхэн ашиглаасай хэмээн хүсдэгийг ойлгоход тусалж чадна.
Боломжит суралцах үйл ажиллагаа
Их Эзэний та нарт өгсөн зүйлс
Суралцагчдад энэ хичээлд бэлтгэхэд нь туслахын тулд Их Эзэний өгсөн адислалуудын тухай ямар нэгэн дуулал дуулах талаар бодож үз. Уг дууллыг хичээлийн удиртгал хэсгийн үеэр ашиглаж болно.
Гурван суралцагчийг ангийнхны өмнө гарч ирэхийг хүс. Нэгэнд нь Мормоны Ном, нөгөөд нь гадна талд нь их хэмжээний мөнгөн дүн бичсэн дугтуй (жишээ нь: 1 сая доллар), сүүлийн суралцагчид хэдэн ширхэг чихэр өг.
-
Өгсөн зүйл дээрээ үндэслээд, тэднийг юу хийгээсэй гэж та хүсэж байна вэ?
Уг гурван суралцагчийг өөрсдөд нь өгөгдсөн зүйлээр дамжуулан хэрхэн бусдыг адисалж болох талаар ганц хоёр санаа хуваалцахад урихыг бод.
Тэдэнд ижил зүйл өгөөгүй учраас ижилхэн үр дүнг хүсэн хүлээхгүй гэдгийг онцлон хэл.
Тэнгэрлэг Эцэгийн хүүхдүүд, Түүний Сүмийн гишүүдийн хувьд бидэнд маш их зүйл өгөгдсөн. Суралцагчдыг Их Эзэнээс хүлээн авсан адислалуудаа жагсаан бичихэд хэдэн хором зарцуулахад урь. Тэдэнд жагсаалтаа хэд хэдэн ангиллаар (жишээ нь: Сүмд явахаас ирдэг адислал, тохиолдсон сүнслэг туршлага, амьдралыг нь адисалдаг хүмүүс, өөрсдөдөө байгаа дэлхийн эд баялаг, боломжууд гэх мэт) үүсгэх нь илүү дөхөм байж болох юм.
Тунгаан бодуулахын тулд суралцагчдад дараах асуултуудыг үзүүл.
Дараах асуултуудыг тунгаан бод.
-
Эдгээр адислал та нарт хэрхэн нөлөөлсөн бэ?
-
Тэдгээр нь Их Эзэний тухай та нарт юу заадаг вэ?
-
Эдгээр адислалыг хүлээн аваагүй хүмүүсээс өөрөөр таныг хэрхэн үйлдээсэй хэмээн Их Эзэн хүсэн хүлээж байж болох вэ?
Энэ хичээлийг судлах явцдаа эдгээр асуултад хариулах нэмэлт ойлголтуудыг эрэлхийл.
Сургаал ба Гэрээ 82
Дараах мэдээллийг нэгтгэн дүгнэх талаар бодож үз.
Энэ үеийн гэгээнтнүүд Их Эзэнээс агуу адислалуудыг хүлээн авсан юм. Эдгээр адислалд сэргээгдсэн Сүм, Мормоны Ном, Их Эзэний үгийг илчлэх амьд бошиглогч багтаж байлаа. Гэсэн хэдий ч тэд Их Эзэний хүссэн замаар бүрэн дүүрэн амьдарч чадахгүй байв. Тухайлбал:
-
Хэдэн сарын туршид Огайод байсан Сидней Ригдон, Миссурид байсан бишоп Эдвард Партриж хоёрын хооронд таагүй харьцаа үүсжээ. Тэд яваандаа эвлэрэв.
-
Миссури дахь Сүмийн зарим гишүүн Иосеф Смитийг шүүмжилж байлаа.
-
Сүмийн гишүүдийг Миссури руу нүүх үед тэдний олон нь Их Эзэний зөвлөгөө, зарлигуудыг, тэр дундаа өргөлийн хуулийг дагаж чадахгүй байв.
Бошиглогч Иосеф Смит болон Сүмийн бусад удирдагч Миссури руу аялж, Сүмийн дээд санваартнуудын зөвлөлийг хуралдуулав. Сургаал ба Гэрээ 82-т цэдэглэгдсэн илчлэлтийг үдээс хойших хуралдааны үеэр хүлээн авчээ.
Сургаал ба Гэрээ 82:1–7-г уншаад, агуу ихээр адислагдсан тул гэгээнтнүүдээс Их Эзэн юу хийхийг хүссэнийг олж мэд.
-
Та эдгээр шүлгээс юу сурч мэдсэн бэ?
Суралцагчид өөр өөр үнэнийг хуваалцаж магадгүй. Тэдний хуваалцсан үнэнийг ойлгох нь яагаад чухал болохыг тэднээс асуу.
Суралцагчид Их Эзэн ихийг өгсөн хүмүүсээс ихийг шаарддаг гэсэн зарчмыг хуваалцаж магадгүй. Тэднийг хуваалцахгүй бол 3-р шүлгээс юу сурснаа хуваалцахад урь.
Хэрэв суралцагчид урьдын нүглүүд нь эргэж ирэх талаар асуувал (7-р шүлгийг үзнэ үү) бид ижил нүглийг үргэлжлүүлэн үйлдсээр байгаа бол үргэлжлүүлэн наманчлах хэрэгтэй гэдгийг ойлгоход нь тусал. Бид Аврагчид тэвчээртэйгээр найдаж, Түүнийг бидэнд тусална гэсэн мэдлэгтэйгээр, сайжрахын төлөө үргэлжлүүлэн хичээж чадна. (Нийл Л.Андэрсэн “Би та нарыг эдгээж болохын тулд … наманчлагтун” 2009 оны 10-р сарын Ерөнхий чуулган х. 46-г үзнэ үү).
-
Та нарын бодлоор Их Эзэн яагаад ийм хүлээлттэй байдаг вэ?
-
Тэдгээрийг ойлгох нь яагаад бидэнд чухал вэ?
Нэмэлт ойлголт авахыг хүсвэл Арван хоёр төлөөлөгчийн чуулгын ахлагч Д.Тодд Кристоффэрсоны дараах мэдэгдлийг унш.
Тэнгэрлэг Эцэг Бурхан маань биднээс өндөр жишигтэй байхыг хүсэн хүлээдэг. …
… Бурханы зорилго бол Түүний хүүхдүүд бид төгс баяр баясгаланг олж, Түүнтэй хамт үүрд амьдран, адилхан болох явдал мөн. …
Хэрэв бид Тэнгэрлэг Эцэгийнхээ өндөр хүлээлтийг биелүүлэхийг чин сэтгэлээсээ хүсэж, хичээвэл Тэр бидэнд тайвшруулах, хүчирхэгжүүлэх, ариусгах зэрэг бүхий л тусламжийг өгөх болно. (Д.Тодд Кристоффэрсон, “Би хайрладаг хүмүүсээ зэмлэдэг, сахилгажуулдаг юм,” 2011 оны 4-р сарын Ерөнхий чуулган , 104–107)
-
Их Эзэний ойлгодог, өрөвдөн энэрдэг мөн чанарыг санах нь яагаад тустай вэ? (1, 7-р шүлгийг үзнэ үү).
Их Эзэний бидэнд өгсөн зүйлсийг санах
Дараах нь суралцагчдад Бурхан яагаад “их нь өгөгдсөн” (Сургаал ба Гэрээ 82:3) хүмүүсээс илүү ихийг шаарддагийг ойлгоход туслах нэг арга юм. Суралцагчид үйл ажиллагааг жижиг бүлгээрээ эсвэл ганцаараа хийж гүйцэтгэж болно.
Их Эзэнээс ирэх адислал
Дараах адислалуудаас дор хаяж хоёрыг эсвэл жагсаалтад ороогүй өөр адислалуудыг сонго.
-
Судрууд
-
Амьд бошиглогчид
-
Нүглүүдийн өршөөл
-
Ариун Сүнсний бэлэг
-
Есүс Христ ба бидний төлөөх Түүний Цагаатгалын талаарх мэдлэг
-
Ариун сүмүүд
Сонгосон адислалуудынхаа талаар хэдэн хормын турш судал. Судар, ерөнхий чуулганы үгс, Өсвөр үеийнхний бат бөх байдлын төлөө: Сонголт хийхэд туслах хөтөч (2022) зэрэг Сүмийн бусад эх сурвалжийг ашигла. Дараахыг хайж ол.
-
Их Эзэн эдгээр адислалаар дамжуулан бидний амьдралыг сайжруулдаг арга замууд.
-
Эдгээр адислал өгөгдсөн хүмүүсээс Их Эзэн юу хүсэн хүлээдэг тухай.
Хувийн туршлага дээрээ үндэслэн өөрийн бодол, ойлголтыг нэм. Эдгээр адислалыг авсан хүмүүс ийм туршлага, мэдлэг өгөгдөөгүй хүмүүст хэрхэн тусалж эсвэл үлгэр жишээ болж чадах талаар оруулж болно.
Суралцагчдыг сурсан зүйлээ хуваалцахад урь. Үүнийг хийх нэг арга бол ангийнхнаас хэн нэгнийг сайн дураараа хуваалцахыг, дараа нь ангийнхныг агуу адисалсан гэж бодож байгаа өөр нэг суралцагчийг нэрлэхийг хүсэх явдал юм. Дараа нь нэр дурдагдсан суралцагчдаас сурсан зүйлээ хуваалцахад бэлэн эсэхийг асуу. Тэднийг хуваалцахыг хүчлэх ёсгүй. Энэ дасгалыг хэд хэдэн удаа давт.
Хэрэв энэ зарчмын дагуу амьдарсан хэн нэгний жишээг үзүүлэх нь тустай бол “Treasures in Heaven: The John Tanner Story” видеог цагийн код 8:21-ээс 12:24 хүртэл үзүүл. Жон Таннер бол сайн мэдээнд хөрвөгдөхөөсөө өмнө Их Эзэний эд баялгаар асар ихээр адислагдсан хүн байсан гэдгийг тайлбарла. Жон энэ адислалаа хэрхэн ашигласан талаар олж мэдэхэд суралцагчдыг урь.
Бурханы хүлээлт ба хайр
Суралцагчдыг дараах асуултуудад хариулах зуур энэ хичээлд гарсан зарчмуудыг хэр сайн ойлгосныг нь үнэл. Их Эзэний хайрыг онцлох, Түүний бидэнд өгсөн зүйлийн дагуу амьдарч, илүү олон хүүхдийг нь адислах арга замуудыг эрэлхийл.
Суралцагчдыг амьдралд нь үзүүлсэн Их Эзэний нөлөөг танин мэдэхэд чиглүүл. Үүнийг хэрхэн гүйцэтгэх талаар нэмэлт сургалт авахыг хүсвэл Багшийн хөгжүүлбэл зохих ур чадвар: Есүс Христэд анхаарлаа төвлөрүүл хэсгээс “Суралцагчдад Их Эзэний хайр, хүч, нигүүлслийг амьдралдаа танихад нь тусал” гэсэн гарчигтай сургалтыг үзнэ үү. Уг ур чадвараар дадлага хийхийг бод. Та суралцагчдад Их Эзэний хайр, хүч, нигүүлслийг амьдралтайгаа холбоход төвлөрсөн асуултуудыг тавь.
-
Та нар яагаад Их Эзэний хүлээлтэд талархдаг вэ?
-
Их Эзэний хүлээлт биднийг хайрладаг гэдгийг нь хэрхэн харуулж байна вэ?
Их Эзэний өгсөн адислалуудын жагсаалтыг харахад суралцагчдыг урь. Тэд хичээлийн үеэр санаанд нь орсон ямар ч адислалуудыг нэмж болно. Их Эзэний өгсөн зүйлсийн улмаас юуг санахыг эсвэл юуг хийхийг хүсэж байгааг нь суралцагчдаас асуу.