93-р хичээл—Суралцахуйгаа үнэлэх 6: Сургаал ба Гэрээ 76–83,” Сургаал ба Гэрээний семинарын багшийн гарын авлага (2025)
“Суралцахуйгаа үнэлэх 6,” Сургаал ба Гэрээний семинарын багшийн гарын авлага
93-р хичээл: Сургаал ба Гэрээ 81–83
Суралцахуйгаа үнэлэх 6
Ахиц дэвшил хийгээд сүнслэг хөгжлөө таньж мэдэхэд цаг гаргах нь Тэнгэрлэг Эцэг, Есүс Христ хоёртой харилцах харилцааг маань бэхжүүлж, гэрээний зам дээрээ үлдэхэд биднийг урамшуулж чадна. Энэ хичээл нь суралцагчдад өнөөдрийг хүртэл Сургаал ба Гэрээг судлаад сүнслэгээр хэр өссөнөө үнэлэхэд тусална.
Боломжит суралцах үйл ажиллагаа
Энэ хичээл нь Сургаал ба Гэрээний сургаалыг тайлбарлах чадвар, тавьсан зорилго, сайн мэдээний дагуу амьдрах хандлага, хүсэл, чадвар нь хэрхэн өөрчлөгдөж байгааг үнэлэхэд суралцагчдад туслах зорилготой. Танай анги Сургаал ба Гэрээ 76–83-ыг судлахдаа энэ хичээл дээр онцолсноос өөр үнэнд төвлөрсөн байж магадгүй. Хэрэв тийм бол суралцагчдын судалсан үнэнийг оруулан үйл ажиллагааг өөрчлөх талаар бодож үз.
Өсөлт, ахиц дэвшилдээ талархах
Боломжтой бол ууланд алхаж, дугуй унаж, гүйж буй хүмүүсийн зургийг үзүүлснээр хичээлээ эхлүүл. Хэрэв тэд дараах үйл ажиллагаанаас аль нэгийг нь эсвэл хэд хэдийг нь хийсэн бол гараа өргөхөд суралцагчдыг урь. Дараа нь суралцагчдаас холын зайн, хэцүү бэрх гүйлт, уулын алхалт, дугуйн аялал зэрэгт оролцож байсан бол гараа өргөсөн хэвээр байхыг хүс. Гараа өргөсөн хэдэн суралцагчийг туршлагаа хуваалцахад урь. Дараах асуултуудтай адил асуултуудыг тавих талаар бодож үз.
-
Та нар аяллаа таатай байлгахын тулд юу хийж чадах вэ?
-
Бид ийм аяллыг Есүс Христтэй илүү адилхан болох үйл явцтай хэрхэн харьцуулж болох вэ?
-
Бид сүнслэг байдлаараа өсөх явцдаа илүү баяр баясгалантай байж, талархаж чадах ямар арга замууд байгаа вэ?
Суралцагчдыг Сургаал ба Гэрээнээс юу сурсан, үүний дагуу хэрхэн үйлдсэнээ болон сүнслэг аяныхаа талаар эргэцүүлэн бодоход урь. Тэд сүүлд гаргасан ахиц дэвшилд нь Аврагч хэрхэн тусалсан талаар тунгаан бодож болох юм.
-
Та нар өөрсдийгөө хэр хөгжиж, Их Эзэнд ойртож байна гэж мэдэрч байна вэ?
-
Их Эзэн та нарт хэрхэн тусалж байна вэ?
Дараах үйл ажиллагаа нь суралцагчдад илүү тодорхой ахиц дэвшил, өсөлт хөгжлийг таньж, талархаж, үнэлэхэд туслах зорилготой юм.
Алдар суугийн гурван зэрэглэлийг тайлбарлах
Суралцагчдад Тэнгэрлэг Эцэгийн төлөвлөгөөн дэх алдар суугийн гурван зэрэглэлийн талаарх ойлголтоо эргэн харж, дүгнэхэд туслахын тулд дараахтай адил жишээг ашиглах талаар бодож үз. Шаардлагатай бол тэд тухайн жишээний мэдээллийг өөрсдөдөө тохируулан өөрчилж болно.
Та нар Оливиа гэдэг дотнын найзтай бөгөөд тэр Сүмийн гишүүн биш ч Есүс Христэд бат итгэдэг гэж төсөөл. Нэгэн өдөр тэр тан дээр ирээд, “Танай Сүмийн гишүүд үхлийн дараах амьдралын талаар юу гэж итгэдэг вэ? Надад хүн бүр диваажин эсвэл там руу явна гэж заасан ч Есүс Христийн Хожмын Үеийн Гэгээнтнүүдийн Сүмийн гишүүд олон диваажинд итгэдэг гэж сонссон. Энэ юу гэсэн үг вэ?” гэж асуув.
Алдар суугийн гурван зэрэглэлийн талаарх ойлголт, мэдлэгээ ашиглан Оливиад хариу бичихэд хэдэн минут зарцуул. Хэрэв хүсвэл Оливиад тайлбарлах зүйлээ дүрслэн харуулахын тулд зураг зурж болно.
Тэднийг хариултаа бичиж дуусмагц, бичсэн зүйлээ хуваалцахыг эсвэл ангийнхны өмнө жүжигчлэн үзүүлэхэд цөөн хэдийг нь урих талаар бод.
Хэрэв суралцагчид энэ тухай дурдаагүй бол алдар суугийн гурван зэрэглэл нь Тэнгэрлэг Эцэг болон Есүс Христийн хайр, нигүүлслийг хэрхэн харуулж байгааг тэднээс асуу (Сургаал ба Гэрээ 76:40–43-ыг үзнэ үү). Алдар суугийн хаант улсыг, тэр дундаа селестиел алдар сууг өвлөн авах нь зөвхөн Есүс Христээр дамжин боломжтой гэдгийг бататга (Сургаал ба Гэрээ 76:69–70-ыг үзнэ үү).
Энэ туршлагаас юу сурсныг нь суралцагчдаас асуу. Суралцагчдад алдар суугийн гурван зэрэглэлтэй холбоотой асуулт байвал ангийнхнаас Сургаал ба Гэрээ 76-ийн аль шүлэг тэдгээрт хариулж чадахыг олж харахыг хүс. Та өмнөх хичээлүүдийн зарим материалыг харж болно.
Тэнгэрлэг Эцэг, Есүс Христ хоёрыг хүндэтгэн бишрэх
Тэнгэрлэг Эцэг, Есүс Христ хоёрыг хайрлах, бишрэх, Тэдэнд талархах сэтгэлийг нь нэмэгдүүлсэн Сургаал ба Гэрээнээс сураад удаагүй байгаа зүйлээ жагсаан бичихэд суралцагчдыг урих талаар бодож үз. Үүнд гэртээ, Сүмийн орчинд бүр эсвэл өөр газарт Тэнгэрлэг Эцэг, Есүс Христ хоёртой харилцах харилцаагаа бэхжүүлсэн туршлагаасаа оруулж болно.
Суралцагчдыг Сургаал ба Гэрээ 63:58–64; 76:19–24 болон өмнө нь эдгээр шүлгийг судалж байхдаа бичсэн тэмдэглэлүүдээ эргэн харахад урих нь тустай байж магадгүй.
Та дараах асуултуудыг үзүүлээд, гаргаж буй хичээл зүтгэл, хүсэл, ахиц дэвшлийг нь үнэлэхэд туслах хариултыг өгөхөд урьж болно.
-
Та Тэнгэрлэг Эцэг, Есүс Христ хоёрыг хайрлах, хүндлэх, Тэдэнд талархах сэтгэлийг тань нэмэгдүүлэх юуг сурч байна вэ?
Хэдэн суралцагчийг хуваалцахад урамшуул. Мөн өөрийн санаа бодлыг хуваалцаж болно.
Судруудыг судалж мөн тунгаан бодох
Дээрх зургийг үзүүлж, дараах асуултуудыг тавь.
-
Иосеф Смит, Сидней Ригдон хоёр алдар суугийн гурван зэрэглэлийн тухай үзэгдлийг хүлээн авахаасаа өмнө юу хийж байсан бэ?
-
Та нар тэдний туршлагаас юу сурсан бэ?
Хэрэв суралцагчид санахгүй байвал тэднийг Сургаал ба Гэрээ 76:15–19-ийг эргэж харахад урь. Иосеф, Сидней хоёрт үзэгдэл нээгдэхээс өмнө тэд судруудыг судалж, тунгаан бодож байсныг суралцагчид ойлгосон эсэхийг нягтал. Суралцагчид дараах үнэнийг сурсан байж магадгүй. Бид судруудыг залбирч судлан мөн тунгаан бодох үедээ Ариун Сүнсээр дамжуулан Их Эзэнээс ойлголт хүлээн авахад өөрсдийгөө бэлтгэдэг.
Суралцагчдад судраас хэр үр дүнтэй суралцаж байгаа талаараа эргэцүүлэн бодох цаг гаргаж өг. Тэд судруудыг хэр сайн залбирч байгаад судалж мөн тунгаан бодож байгаагаа эргэцүүлж магадгүй. Шаардлагатай бол та дараах графикийг үзүүлж, тус бүр нь судар судлахад хэрхэн тусалж болохыг хуваалцахад урьж болно. Тэд өөрсдөд нь тустай гэж бодож байгаа зүйлээ хуваалцаж болно.
Суралцагчдад тулгамдаж буй бэрхшээл, боломжит шийдлийн талаар ангийн бусад гишүүнтэй ярилцах нь тустай байж магадгүй. Та суралцагчдыг жижиг бүлгүүдэд хувааж, судар судалж тунгаан бодох явцад нь тулгардаг бэрхшээлүүдийн талаар ярилцуулж болох юм. Бүлэг бүрийг нэг бэрхшээлийг сонгоод, үүнийг даван туулж, сурах үр нөлөөг нэмэгдүүлэхийн тулд хийж болох хэдэн энгийн алхмын талаар бодоход урамшуул. Бүлэг бүрийг ангийн бусад гишүүнтэй хуваалцахад урь.
Цөөн суралцагчийг тунгаан бодож, судраас судлах нь тэдний амьдралыг хэрхэн адисалж, Есүс Христтэй илүү ойр болоход тусалсныг гэрчлэхэд урьснаар хичээлээ дуусга.