“92-р хичээл: Сургаал ба Гэрээ 82:8–24: ‘Миний хэлснийг та нар хийхэд Их Эзэн бибээр үүрэг хүлээдэг,’” Сургаал ба Гэрээний семинарын багшийн гарын авлага (2025)
“Сургаал ба Гэрээ 82:8–24,” Сургаал ба Гэрээний семинарын багшийн гарын авлага
92-р хичээл: Сургаал ба Гэрээ 81–83
Сургаал ба Гэрээ 82:8–24
“Миний хэлснийг та нар хийхэд Их Эзэн бибээр үүрэг хүлээдэг”
Аврагч Нэгдсэн пүүсийн гишүүдийг Түүний Сүмийн ажил хэргийг удирдах гэрээнд хамтдаа холбогдоход урьсан. Тэрээр тэдэнд зарлигуудыг өгч, дуулгавартай байвал адислахаа амласан. Есүс Христийн зарлигуудыг дагахаар гэрээ байгуулах үед Тэр биднийг адисална гэж амласан. Энэ хичээл нь суралцагчдад Тэнгэрлэг Эцэг, Есүс Христ хоёртой байгуулсан гэрээнүүдээ хэрхэн сахих талаар ойлгоход тусалж чадна.
Боломжит суралцах үйл ажиллагаа
Их Эзэнтэй холбогдох
Дараах үзүүлэн хичээл нь суралцагчдад Тэнгэрлэг Эцэг, Есүс Христ хоёртой харилцах харилцаагаа эргэн харахад тусална. Суралцагчдад хоёр соронз үзүүл. Соронзуудыг хооронд нь ойртуулах үед тэд хэрхэн бие биедээ татагдаж эсвэл түлхэлцэж буйг нэг сурагч харуулж болно. Соронзуудын нэг нь Есүс Христийг, нөгөө нь тэднийг төлөөлж буй хэмээн төсөөлөхийг суралцагчдаас хүс.
-
Бид эдгээр соронзын жишээнээс Тэнгэрлэг Эцэг, Есүс Христ хоёртой харилцах харилцааныхаа талаар юу сурч болох вэ?
Тэнгэрлэг Эцэг, Есүс Христ хоёртой харилцах харилцааныхаа тухай бодоход суралцагчдыг урь. Тэднийг Сургаал ба Гэрээ 82-ыг судлах явцдаа Тэнгэрлэг Эцэг, Есүс Христ хоёртой харилцах харилцаагаа хэрхэн бэхжүүлэх талаар хувийн илчлэлт эрэлхийлэхэд урамшуул.
“Миний хэлснийг та нар хийхэд Их Эзэн бибээр үүрэг хүлээдэг”
Сургаал ба Гэрээ 82-т Их Эзэн өмнөх илчлэлтээр өгсөн удирдамжаа давтан хэлсэн (Сургаал ба Гэрээ 78-ыг үзнэ үү). Энэ бол Сүмийн үйл ажиллагааны материаллаг талыг зохицуулах зорилгоор Нэгдсэн пүүсийг үүсгэн байгуулж, Сионыг байгуулах удирдамж байв.
Сургаал ба Гэрээ 82:10 бол төгс эзэмших сургаалын судрын хэсэг юм. Суралцагчдыг төгс эзэмших сургаалын судрын хэсгийг амархан олохын тулд онцгойлон тэмдэглэхэд урьж болно.
Сургаал ба Гэрээ 82:8–10-ыг уншаад, Их Эзэн зарлигуудынхаа тухай юу заасныг олж мэд.
-
Аврагчийн бидэнд зарлигуудыг өгдөг шалтгаан юу вэ?
-
Хэрэв бид Түүний зарлигуудыг сахивал Аврагч юу амласан бэ?
Суралцагчдыг эдгээр шүлэгт агуулагдсан үнэнийг өөрсдийн үгээр илэрхийлэхэд урь. Тэд мөн үүнийг тэмдэглэлдээ эсвэл самбарт бичиж болно. Суралцагчид дараахтай төстэй үнэнийг тодорхойлж магадгүй. Их Эзэн бидэнд зарлигуудыг нь дуулгавартай дагах аваас адисална гэж амласан.
Эдгээр шүлэг Тэнгэрлэг Эцэг, Есүс Христ хоёрын зан чанарын талаар юу зааж байна вэ?
Энэ үнэний гүйцэлдэхийг хэзээ харснаа таньж мэдэхэд нь суралцагчдад туслахын тулд та дараахтай адил үйл ажиллагааг явуулж болох юм.
Ангийнхныг жижиг бүлгүүдэд хуваа. Аврагч хүмүүсийг зарлигуудыг нь дуулгавартай дагасны төлөө адисалсан жишээг олохыг бүлэг бүрээс хүс. Суралцагчид судруудаас болон өөрсдийн эсвэл таньдаг хүмүүсийнхээ амьдралаас жишээ татаж болно. Хангалттай хугацаа өнгөрсний дараа та бүлгүүдийг ээлжлэн жишээгээ хуваалцахад урь. Эдгээр жишээнээс Аврагчийн амлалтаа биелүүлэх хүслийн талаар бид юу сурч болох тухай ярилцаж болно.
Гэрээгээр холбогдсон
Та суралцагчдад 1-р шүлэгт Тэнгэрлэг Эцэг, Есүс Христ хоёртой тогтоосон гэрээний харилцааны маань талаар юу зааж байгааг олж харахад тусалж болох юм. Гэрээнүүдээр дамжуулан бид Тэнгэрлэг Эцэг, Есүс Христ хоёрт харилцан амлалт өгдөг.
-
Та нарын бодлоор 10-р шүлэгт Тэнгэрлэг Эцэг, Есүс Христ хоёртой бидний байгуулдаг гэрээний талаар юу зааж байна вэ?
Ерөнхийлөгч Рассэлл М.Нэлсоны дараах мэдэгдлийг уншаад, тэрээр гэрээнүүдийн талаар юу заасныг олж мэд.
Бид Бурхантай гэрээ байгуулснаар төвийг сахихаа бүрмөсөн больдог. Бурхан Өөртэй нь ийм холбоо тогтоосон хүмүүстэй харилцаагаа хэзээ ч тасалдаггүй. Үнэндээ Бурхантай гэрээ байгуулсан бүх хүн онцгой хайр, нигүүлсэл хүртэх эрхтэй. …
Та бид Бурхантай гэрээ байгуулсан л бол Түүнтэй харилцах харилцаа маань бидний гэрээ байгуулахаас өмнөх үеийнхээс ч илүү дотно болно. Одоо бид бие биетэйгээ харилцан холбоотой болсон. Бид Бурхантай гэрээ байгуулсан тул Тэр бидэнд туслах хүчин чармайлтдаа хэзээ ч бууж өгөхгүй бөгөөд Түүний бидэнд хандсан нигүүлсэнгүй тэвчээр хэзээ ч дундрахгүй. Бид бүгдээрээ Бурханы зүрх сэтгэлд онцгой байр суурь эзэлдэг. Тэр бидэнд их итгэл найдвар тавьдаг. (Рассэлл М.Нэлсон, “Үүрдийн гэрээ,” Лиахона, 2022 оны 10-р сар, 2)
-
Энэ мэдэгдлээс юуг санах нь чухал гэж та нар бодож байна вэ?
Гэрээгээ сахих нь адислалуудыг авчирдаг
Их Эзэн Нэгдсэн пүүсийн удирдагчдад өгсөн удирдамж дундаа Иосеф Смит, Оливер Каудери, Эдвард Партриж болон бусад хүн Сүмийн материаллаг ажил хэргийг удирдахын тулд “гэрээгээр хамтдаа холбогдох” (Сургаал ба Гэрээ 82:11) ёстой хэмээн зааварчилсан. Бурханы гэрээт хүүхдүүдийн хувьд бид Есүс Христийг дагаснаар тодорхой зүйлийг хийхээр гэрээ байгуулдаг.
Ангийг хоёр бүлэгт хуваагаад, бүлэг бүрийг дараах жагсаалтын аль нэгийг эмхэтгэхэд урих талаар бод. Суралцагчид мөн самбарт жагсаалтуудаа бичиж болно.
Сургаал ба Гэрээ 82:12–19-ийг уншаад, Их Эзэн Нэгдсэн пүүсийн гишүүдээс юу хийхээр гэрээлэхийг хүссэнийг жагсаан бич.
Мозая 18:8–10, Сургаал ба Гэрээ 20:77-г уншаад, Их Эзэн өнөөдөр биднээс юу хийхээр гэрээлэхийг хүсэж буйг жагсаан бич.
-
Эдгээр жагсаалтаас юу нь та нарт онцгой санагдаж байна вэ?
-
Энэ хоёр гэрээний үүргүүд юугаараа төстэй байна вэ?
-
Гэрээнүүдээ сахих нь биднийг Аврагчтай адил болоход хэрхэн тусалж чадна гэж та нар бодож байна вэ?
Сургаал ба Гэрээ 82:24-ийг уншаад, байгуулсан гэрээгээ сахидаг хүмүүст Их Эзэн юу амладгийг олж мэд.
Нийлүүлсэн соронзуудыг харуулахыг бод. Суралцагчдыг Есүс Христтэй харилцах харилцааныхаа талаар энэ хичээлээс сурсан зүйлээ хуваалцахад урь. Та мөн Тэнгэрлэг Эцэг, Есүс Христ хоёртой гэрээ байгуулж, сахиснаараа хүлээн авсан адислалуудаа хуваалцаж болно.
Төгс эзэмших сургаалыг цээжлэх
Энэ хичээлийн үеэр та суралцагчдад Сургаал ба Гэрээ 82:10 ба “Миний хэлснийг та нар хийхэд Их Эзэн бибээр үүрэг хүлээдэг” гэсэн судрын түлхүүр хэллэгийг цээжлэхэд тусалж болох юм. Та үүнийг дараагийн хичээлүүд дээр давтаж болно. “Төгс эзэмших сургаалыг давтах үйл ажиллагаа” хэсгийн хавсралт материалуудад цээжлэх үйл ажиллагаанд зориулсан санаанууд бий.