Lesona 91: Mataupu Faavae ma Feagaiga 81–83

Mataupu Faavae ma Feagaiga 82:1–7

“O Lē Ua Tuu Atu I Ai Mea e Tele, E Tele Foi Mea Ua Manaomia Mai Ai”

Ia Aperila 1832, sa malaga ai le perofeta o Iosefa Samita ma isi i Initipene, Misuri. Sa latou mulimuli i le poloaiga a le Alii e faatu se faalapotopotoga e fausia Siona ma tausia e matitiva (tagai Mataupu Faavae ma Feagaiga 78). Ina ua uma ona fesoasoani e foia nisi o feeseeseaiga i le va o tagata o le ekalesia, sa maua e le Perofeta lenei faaaliga e faamatala ai faamoemoega o le Alii o Lona nuu. O lenei lesona e mafai ona fesoasoani i tagata aoga ia malamalama i auala ua faamanuiaina ai i latou e le Alii ma le ala ua Ia faamoemoeina ai i latou e faaaoga na faamanuiaga.

Gaoioiga E Ono Mafai Ona Aoao Ai

O mea ua tuuina atu e le Alii ia te oe

Ina ia fesoasoani e saunia tagata aoga mo lenei lesona, mafaufau e usu se viiga e uiga i faamanuiaga ua tuuina mai e le Alii. O se tasi o faataitaiga o le: “Ona Ua Maua Tele,” (Viiga, nu. 124). O le viiga e mafai ona avea o se vaega o le faigalotu.

Valaaulia ni tagata aoga se toatolu e tutu i luma o le vasega. Tuu atu i se tasi le kopi o le Tusi a Mamona, o le tasi o se teutusi ma se tupe tele o loo tusia i fafo (mo se faataitaiga, $1,000,000), ma le isi o ni lole.

• E tusai ai ma mea ua tuuina atu ia i latou, o le a se mea e te faamoemoe o le a faia e nei tagata aoga?

Mafaufau e valaaulia tagata aoga i luma o le vasega e faasoa mai se manatu pe lua o auala e mafai ona latou faamanuiaina ai isi i mea ua tuuina atu ia i latou.

Ta’u i ai o le a le tutusa o tatou faamoemoega mo se tasi e lei mauaina ia lava mea e tasi.

I le avea ai ma fanau a le Tama Faalelagi ma tagata o Lana Ekalesia, ua tele mea ua tuuina mai ia i tatou. Valaaulia tagata aoga e faaalu ni nai minute e lisi ai faamanuiaga ua latou maua mai le Alii. Atonu e fesoasoani le fatuina o ni nai vaega mo tagata aoga e mafaufau ai a o latou faia a latou lisi (mo se faataitaiga, faamanuiaga o le i ai i le Ekalesia, aafiaga faaleagaga na latou maua, tagata o e faamanuiaina o latou olaga, oa faalelalolagi ma avanoa latou te maua, ma isi mea faapena).

Faaali atu fesili nei mo tagata aoga e mafaufau loloto i ai.

Manatunatu loloto i fesili nei:

• E faapefea e nei faamanuiaga ona aafia ai oe?

• O le a se mea e mafai ona latou aoao mai ia te oe e uiga i le Alii?

• Mata e faapefea ona faamoemoe le Alii ia ese lau amio mai se tasi e lei mauaina nei faamanuiaga?

A o e suesue i lenei lesona, vaavaai mo ni malamalamaaga faaopoopo i nei fesili.

Mataupu Faavae ma Feagaiga 82

Mafaufau e otooto faamatalaga nei:

Sa maua e le Au Paia i lea taimi ni faamanuiaga maoae mai le Alii. O nei faamanuiaga na aofia ai le Ekalesia toefuataiina, o le Tusi a Mamona, ma se perofeta soifua na faaalia mai afioga a le Alii. Peitai, sa latou tauivi pea e ola i le ala na finagalo i ai le Alii. O nisi nei o faataitaiga:

• Mo ni nai masina, na aliae ai ni lagona le lelei i le va o Sini Rikitone i Ohaio ma Epikopo Eteuati Paterika i Misuri. Sa lei leva ona la faalelei.

• Sa faitio nisi o tagata o le Ekalesia i Misuri ia Iosefa Samita.

• A o siitia atu tagata o le Ekalesia i Misuri, o le toatele o i latou sa le usitai i fautuaga ma poloaiga a le Alii, e aofia ai le ola ai i le tulafono o le faapaiaga.

Sa malaga le Perofeta o Iosefa Samita ma isi taitai o le Ekalesia i Misuri ma faia se aufono a ositaulaga sili o le Ekalesia. O le faaaliga i le Mataupu Faavae ma Feagaiga 82 na mauaina i le taimi o le sauniga o le aoauli.

Faitau le Mataupu Faavae ma Feagaiga 82:1–7, ma vaavaai mo mea na faamoemoeina e le Alii mai le Au Paia ona sa matua faamanuiaina tele i latou.

• O a ni mea ua outou aoao mai i nei fuaiupu?

  Atonu e mafai ona faasoa mai e tagata aoga upu moni eseese. Fesili atu ia i latou pe aisea e taua ai ona malamalama i upumoni latou te faasoa mai.

  E mafai pe le mafai foi e tagata aoga ona faasoa mai le mataupu faavae faapea e manaomia e le Alii le tele o mea mai ia i latou ua Ia tuuina atu i ai mea e tele. Afai e le faia e tagata aoga, valaaulia i latou e faasoa mai mea na latou aoaoina mai le fuaiupu 3.

  Afai e fesili tagata aoga e uiga i agasala muamua na toe foi mai (tagai fuaiupu 7), fesoasoani ia latou malamalama afai tatou te faaauau pea ona faia lea lava agasala e tasi, e manaomia ona faaauau pea lo tatou salamo. E mafai ona tatou faalagolago ma le onosai i le Faaola ma faaauau pea ona taumafai e faaleleia atili, ma le iloaina o le a Ia fesoasoani mai ia i tatou. (Tagai i le Neil L. Andersen, “Salamo … Ina Ia Ou Faamaloloina Outou,” Liahona, Nov. 2009, 40).

• Aisea e te manatu ai e iai nei faamoemoega i le Alii?

• Aisea e taua ai mo i tatou ona malamalama ia i latou?

Mo malamalamaaga faaopoopo, faitau le saunoaga lenei a Elder D. Todd Christofferson o le Korama a Aposetolo e Toasefululua:

O lo tatou Tama Faalelagi o se Atua o ni faamoemoega maualuluga. …

… O le faamoemoega o le Atua, ia mafai e i tatou o Lana fanau ona oo i le olioli sili, e mafuta ma Ia e faavavau, ma oo ai ina avea e pei o Ia. …

Afai tatou te mananao faamaoni ma tauivi e tusa ma faamoemoega maualuluga o lo tatou Tama Faalelagi, o le a Ia faamautinoa mai tatou te maua uma le fesoasoaniga tatou te manaomia pe o le faamafanafanaga, faamalosia, po o le aoaiina. (D. Todd Christofferson, “Ou Te Aoai Atu ma Sasa ia i Latou Uma Ou te Alofa I Ai,” Liahona, Me 2011, 97, 99)

• Aisea e aoga ai foi le manatua o le natura malamalama ma le agaalofa o le Alii? (tagai fuaiupu 1, 7).

Manatuaina mea ua foai mai e le Alii ia i tatou

O se tasi lenei o auala e fesoasoani ai i tagata aoga ia malamalama pe aisea ua faamoemoe atili ai le Atua ia i latou “o e ua tuu atu i ai mea e tele” (Mataupu Faavae ma Feagaiga 82:3). E mafai e tagata aoga ona faia le gaoioiga i vaega toalaiti, pe taitoatasi.

Faamanuiaga mai le Alii

Filifili ia le itiiti ifo ma le lua ni faamanuiaga nei, pe filifili isi faamanuiaga e le o lisiina atu.

• Tusitusiga Paia

• Perofeta soifua

• Faamagaloina o agasala

• O le meaalofa a le Agaga Paia

• O se malamalama ia Iesu Keriso ma Lana Togiola mo i tatou

• Malumalu

Mo ni nai minute, suesue e uiga i faamanuiaga na e filifilia. Faaaoga tusitusiga paia, saunoaga o konafesi aoao, ma isi punaoa a le Ekalesia e pei o le Mo Le Malosi o le Autalavou: O Se Taiala mo le Faia o Filifiliga (2022). Saili mo:

1. O auala e faaleleia ai e le Alii o tatou olaga e ala i nei faamanuiaga.

2. O mea ua faamoemoeina e le Alii mai ia i latou o e ua tuuina atu i ai nei faamanuiaga.

Faaopoopo i ai ni ou lava manatu po o ni malamalamaaga mai aafiaga patino. E mafai ona e faaaofia ai pe mafai faapefea e tagata e i ai nei faamanuiaga ona fesoasoani pe avea ma se faataitaiga ia i latou o e e lei tuuina atu i ai ia lava aafiaga ma le malamalama.

Valaaulia tagata aoga e faasoa mai mea na latou aoaoina. O se tasi o auala e faia ai lenei mea o le fai atu lea i se volenitia e faasoa mai ona ta’u mai lea o se isi tagata aoga latou te lagona o se faamanuiaga maoa’e i le vasega. Ona fai atu lea i le tagata aoga ua fautuaina mai pe latou te naunau e faasoa mai mea sa latou aoaoina. Ia mautinoa ua latou iloa e le o se matafaioi lo latou faasoa atu. Toe fai lenei faataitaiga mo ni nai taimi.

Afai e aoga le faaali atu o se faataitaiga o se tasi sa ola i lenei mataupu faavae, faaali atu “Oa i le Lagi: O Le Tala ia Ioane Tanner” mai le faailotaimi 8:21 i le 12:24. Faamalamalama atu o Ioane Tanner o se tagata sa faamanuiaina e le Alii i oa maoae a o lei liliu mai o ia i le talalelei. Valaaulia tagata aoga e vaavaai pe na faapefea ona faaaoga e Ioane lona tamaoaiga.

Faamoemoega ma le alofa o le Atua

A o tali mai tagata aoga i fesili nei, iloilo po o le a le lelei o lo latou malamalama i le mataupu faavae o loo aofia i lenei lesona. Vaavaai mo ni auala e faamamafa atu ai le alofa o le Alii ma le auala e mafai ona tatou faamanuiaina atili ai Ana fanau a o tatou ola e tusa ai ma mea ua Ia tuuina mai ia i tatou.

Taiala tagata aoao ia iloa le faatosinaga a le Alii i o latou olaga: Mo nisi aoaoga i le auala e faia ai lenei mea, tagai i le aoaoga ua faaautuina “Fesoasoani i tagata aoao ia iloa le alofa, mana, ma le alofa mutimutivale o le Alii i o latou olaga” o loo maua i Tomai o le Atinaega o Faiaoga: Taulai atu ia Iesu Keriso. Mafaufau e faataitai le tomai. E mafai ona e fai atu i tagata aoga ni fesili e taulai atu i le fesootaiga o le alofa, mana, ma le alofa mutimutivale o le Alii i o latou olaga.

• Aisea e te faafetaia ai faamoemoega o le Alii?

• E faapefea i famoemoega o le Alii ona faaalia ai Lona alofa?

Valaaulia tagata aoga e vaavaai i la latou lisi o mea ua tuuina mai e le Alii ia i latou. E mafai ona latou faaopoopo nisi faamanuiaga faaopoopo sa latou mafaufau i ai i le aluga o le lesona. Fai atu ia i latou e tusifaamaumau mea latou te mananao e manatua pe faia ona o mea ua tuuina mai e le Alii ia i latou.

Punaoa Faaopoopo

O le a se mea ua tuuina mai e Iesu Keriso ia i tatou e ala i Lana Togiola?

Sa aoao mai Peresitene Dallin H. Oaks o le Au Peresitene Sili:

O le a le mea ua faia e Iesu Keriso mo i tatou taitoatasi? Ua Ia faia mea uma e tatau ai mo la tatou malaga i le olaga faaletino ma agai atu i le taunuuga ua faataatia mai i le fuafuaga a lo tatou Tama Faalelagi. …

… E pei ona a’oa’o mai Iesu, “Ou te ola au, o le mea lea e ola ai outou” (Ioane 14:19). …

Ae o le Toetū ua aumaia ia i tatou se mea e sili atu nai lo lenei faamautinoaga o le tino ola pea. Ua suia ai le ala tatou te vaai ai i le olaga faaletino. …

… Ona ua tofu i tatou ma se toetū mautinoa, ua tatou iloa ai o … faaletonu faaletino ma mea faafeagai ua na o se taimi lē tumau. …

Na onosaia e lo tatou Faaola ma le Togiola le mafatiaga lē mafaamatalaina, ina ia avea ai o Ia lava ma taulaga mo agasala a tagata uma o le a salamo. O lenei taulaga togiola … ua tatala ai le faitotoa mo i tatou taitoatasi ina ia faamamaina ai mai a tatou lava agasala patino, ina ia mafai ai ona toe faaulufale atu i tatou i le afioaga o le Atua, lo tatou Tama e Faavavau. …

… E ala i a’oa’oga a Ana perofeta ma e ala i Lana auaunaga patino, sa a’oa’o mai ai e Iesu ia i tatou le ata o le faaolataga. …

Ua lagona ma silafia e lo tatou Faaola o tatou faaosoosoga, o tatou tauiviga, o tatou lototiga, ma o tatou puapuaga, aua na Ia loto e oo i ai i na mea uma e fai ma vaega o Lana Togiola. … O tagata uma e mafatia i soo se ituaiga o vaivaiga faaletino e tatau ona manatua na oo foi lo tatou Faaola i lena ituaiga o tiga, ma e ala i Lana Togiola, ua Ia ofo mai ai ia i tatou taitoatasi le malosi e onosaia ai. (Dallin H. Oaks, “O Le A le Mea Ua Faia e lo Tatou Faaola mo i Tatou?,” Liahona, Me 2021, 75–77)

Aisea e tele ai mea ua faamoemoeina mai tagata o le Ekalesia?

Ua aoao mai Elder Neil L. Andersen o le Korama a Aposetolo e Toasefululua:

E fesili nisi, “Pe tatau ona ou matua ese mai isi?” “Pe le mafai ona avea au ma soo o Keriso e aunoa ma le mafaufau tele i la’u amio?” “Pe le mafai ona ou alofa ia Keriso e aunoa ma le tausia o le tulafono o le ola mama?” “Pe le mafai ona ou alofa ia te Ia ma faia mea ou te manao e fai i le Aso Sa?” E faigofie lava le tali na tuuina mai e Iesu: “Afai tou te alofa mai ia te au, ia outou tausi mai i a’u poloaiga” [Ioane 14:15]. …

… I le avea ai ma tagata o Le Ekalesia a Iesu Keriso o le Au Paia o Aso e Gata Ai, o le i ai o se molimau i Lona moni a’ia’i, e le gata mai le Tusi Paia, ae mai le Tusi a Mamona foi; o le iloa ua toefuatai mai Lana perisitua i le fogaeleele; o le uma ai ona osia o feagaiga paia e mulimuli ia te Ia ma maua ai le meaalofa o le Agaga Paia; i le uma ai ona faaeeina i mana i Lona malumalu paia, ma avea ma se vaega o le sauniuniga mo Lona toe afio mai ma le mamalu i le fogaeleele; e le mafai ai ona faatusalia o tatou tagata ma i latou e le’i mauaina nei upumoni. “O lē Ua tuu atu i ai mea e tele, e tele foi mea ua manaomia mai ai” [Mataupu Faavae ma Feagaiga 82:3]. (Neil L. Andersen, “Aua Lava Nei Tuua o Ia,” Liahona, Nov. 2010, 41)

Ina ia vaai i le ala na aoao atu ai e Peresitene Dieter F. Uchtdorf, a o i ai i le Au Peresitene Sili, i latou e umia le perisitua e uiga i lenei mataupu faavae, matamata i le “O Se Mataupu o Ni Nai Tikeri” mai le faailotaimi 9:42 i le 10:54.

Gaoioiga Faaopoopo e Aoao Ai

Fatatauina o tusitusiga paia ia i tatou

O se auala ese e suesue ai lenei faaaliga, faamalamalama atu e mafai ona fesoasoani le faatatau o tusitusiga paia i o tatou olaga a o tatou faitauina. Valaaulia tagata aoga e faitau i le lesona ia faafitauli na feagai ma le Au Paia ina ua faaali mai le Mataupu Faavae ma Feagaiga 82 . Fatu se tulaga moni ma talafeagai mo le asō lea e mafai ai e tagata o le Ekalesia ona:

• Ia i ai ni lagona lē alofa i le tasi ma le isi.

• Ia faitio i le perofeta po o taitai o le Ekalesia.

• E le usitai i se poloaiga.

• Le faasoa atu a latou tupe, taimi, po o taleni e fesoasoani ai i isi.

Valaaulia tagata aoga e filifili se tulaga latou te manatu o le a anoa e mafaufau loloto i ai a o latou suesueina le Mataupu Faavae ma Feagaiga 82. Fautuaina i latou e vaavaai mo mataupu faavae e mafai ona fesoasoani i lenei tulaga.

Pe a ou le manao i ni faamoemoega maualuluga

I le taufaaiuiuga o le lesona, atonu e aoga le valaaulia o tagata aoga e vaai faalemafaufau faapea e faitau e se tasi le Mataupu Faavae ma Feagaiga 82 ma moomoo maimau pe ana le tuuina atu ia i latou le tele o faamanuiaga ina ia faaitiitia ai le faamoemoega o le Alii ia i latou. Tuu atu i tagata aoga e tali mai e faavae i mea sa latou aoaoina i le lesona. O fesili mulimuli e lua i le lesona e mafai foi ona fesoasoani.

O se gaoioiga vaaia

Afai e te lagona o le a aoga, valaaulia tagata aoga e lisi i le itu tauagavale o se fasipepa faamanuiaga e 5 i le 10 ua latou mauaina. Ona mafai lea ona latou tusia mai faamanuiaga taitasi mea latou te lagona o le a faamoemoeina e le Alii mai se tasi e mauaina lena faamanuiaga.

Malamalama i vaega eseese e lua o le Faaola

Faaali le afa o le ata, ona faaali atu lea o le isi afa. Fesili i tagata aoga pe faapefea e le vaaia o afa uma e lua ona fesoasoani ia i latou e malamalama atili ai i le ata atoa. E pei o afa e lua o se ata, e alofa mutimutivale Iesu ma e maualuga foi ona faamoemoega mo i tatou. Faitau le Mataupu Faavae ma Feagaiga 82:1–7, ma vaavaai mo faamaoniga o uiga faaalia e lua i totonu ia te Ia. Aisea e taua ai le iloa o loo ia te Ia na uiga uma e lua? E mafai faapefea ona aafia ai se tasi pe a na ona latou malamalama i le itu e tasi o Ia?