“Lesona 93—Iloilo Lou Aoaoina 6—Mataupu Faavae ma Feagaiga 76–83,” Tusi Lesona a le Faiaoga Seminare o le Mataupu Faavae ma Feagaiga (2025)
“Iloilo Lou Aoaoina 6,” Tusi Lesona a le Faiaoga Seminare o le Mataupu Faavae ma Feagaiga
Lesona 93: Mataupu Faavae ma Feagaiga 81–83
Iloilo Lou Aoaoina 6
O le faaaluina o le taimi e iloa ai le tuputupu ae ma le atinaega faaleagaga e mafai ona faamalosia ai lo tatou sootaga ma le Tama Faalelagi ma Iesu Keriso ma uunaia ai i tatou e tumau i luga o le ala o feagaiga. O lenei lesona e mafai ona fesoasoani i tagata aoga e iloilo ai lo latou tuputupu ae faaleagaga mai a latou suesuega o le Mataupu Faavae ma Feagaiga i le taimi nei.
Gaoioiga E Ono Mafai Ona Aoao Ai
O lenei lesona ua faamoemoe e fesoasoani i tagata aoga e iloilo ai lo latou tomai e faamalamalama atu aoaoga o loo i le Mataupu Faavae ma Feagaiga, iloilo sini ua latou faatulagaina, ma fua pe faapefea ona suia o latou uiga faaalia, manaoga, ma le gafatia e ola ai i le talalelei. O le suesuega a lau vasega i le Mataupu Faavae ma Feagaiga 76–83 sa ono taula’i iupumoni e ese mai nai lo o upumoni i le lesona. Afai o lea, mafaufau e fetuunai gaoioiga e faaaofia ai upumoni ia sili atu ona masani ai au tagata aoga.
Talisapaiaina le tuputupu ae, ma le alualu i luma
Afai e mafai, amata le vasega i le faaali atu o ata o tagata o loo savali sopo, tietie uila, ma tamo’e. Fai atu i tagata aoga e sii o latou lima pe afai na latou faia se mea se tasi pe tele atu o nei gaoioiga. O le isi, fai atu i tagata aoga e sii o latou lima pe afai sa latou auai i se tamoega po o se savaliga sopo umi pe luitauina, po o se tietiega uila. Valaaulia ni nai tagata aoga e sii o latou lima e faamatala mai o latou aafiaga. Mafaufau e talanoaina nisi o fesili e pei o nei:
-
O le a se mea e mafai ona e faia e fiafia ai i le faigamalaga?
-
E mafai faapefea ona tatou faatusaina lena ituaiga o malaga i le faagasologa o le avea atili e faapei o Iesu Keriso?
-
O a ni auala e mafai ona tatou olioli ai ma talisapaia atili le faagasologa o le tuputupu ae faaleagaga?
Valaaulia tagata aoga e mafaufau i mea sa latou aoaoina i le Mataupu Faavae ma Feagaiga, pe na faapefea ona latou faatinoina, ma a latou malaga faaleagaga. Atonu latou te mafaufau loloto pe na faapefea ona fesoasoani le Faaola i soo se alualu i luma talu ai nei.
-
O le a sou lagona i lou alualu i luma ma le tuputupu ae ia latalata atili atu i le Alii?
-
O faapefea ona fesoasoani le Alii ia te oe?
O gaoioiga nei ua mamanuina e fesoasoani ai i tagata aoga ia iloa, talisapaia, ma iloilo atili le alualu i luma ma le tuputupu ae patino.
Faamatalaina o tikeri e tolu o le mamalu
Mafaufau e faaaoga se vaaiga faataitai e pei o lea e fesoasoani ai i tagata aoga e toe faamanatu ma iloilo lo latou malamalama i tikeri e tolu o le mamalu i le fuafuaga a le Tama Faalelagi. Afai e manaomia, e mafai e tagata aoga ona fetuunai auiliiliga i le ata faataitai ina ia mautinoa ai e moni ia i latou.
Manatu faapea e i ai sau uo mamae e igoa ia Olivia e le o se tagata o le Ekalesia ae e talitonu mausali ia Iesu Keriso. I se tasi aso na ia faalatalata atu ai ia te oe ma fesili atu: “O le a se talitonuga o tagata o lau Ekalesia e uiga i le olaga pe a mavae le oti? Ua aoaoina au o le a o tagata uma i le lagi po o seoli, ae sa ou faalogo o tagata O Le Ekalesia a Iesu Keriso o le Au Paia o Aso e Gata Ai e talitonu i le tele o lagi. O le a le uiga o lena mea?”
Faaalu ni nai minute e tusi ai se tali ia Olivia e faamatala ai lou malamalama ma lou ilo i tikeri e tolu o le mamalu. Afai e te manao ai, e mafai ona e faaaofia ai ni ata e fesoasoani ai ia Olivia e vaai faalemafaufau i mea o loo e faamatalaina.
A uma ona faamaea e tamaiti aoga a latou faamalamalamaga, mafaufau e valaaulia ni nai tagata e faasoa mai mea na latou tusia pe faatino le ata faataitai i luma o le vasega.
Afai e le ta’ua maia e tagata o le vasega, fesili atu ia i latou pe faapefea e tikeri e tolu o le mamalu ona faaalia le alofa ma le alofa mutimutivale o le Tama Faalelagi ma Iesu Keriso (tagai Mataupu Faavae ma Feagaiga 76:40–43). Ia faamanino atu o le mautofi i se malo o le mamalu, e aofia ai le mamalu selesitila, e na o Iesu Keriso lava e mafai ai (tagai i le Mataupu Faavae ma Feagaiga 76:69–70).
Fai i tagata aoga po o a mea na latou aoaoina mai lenei aafiaga. Afai e i ai ni fesili a tagata aoga e faatatau i tikeri e tolu o le mamalu, fai atu i le vasega pe mafai ona latou sailia fuaiupu i le Mataupu Faavae ma Feagaiga 76 e fesoasoani e tali ai a latou fesili. E mafai foi ona e toe faamanatuina nisi o anomea mai lesona talu ai.
Faaaloalo i le Tama Faalelagi ma Iesu Keriso
Mafaufau e valaaulia tagata aoga e fai se lisi o soo se mea na latou aoaoina talu ai nei i le Mataupu Faavae ma Feagaiga ua faateleina ai lo latou alolofa, talisapaia, ma le migao mo le Tama Faalelagi ma Iesu Keriso. E mafai foi e tagata aoga ona faaaofia ai aafiaga i le aiga, i faatulagaga faale-Ekalesia, po o isi nofoaga na faamalosia ai lo latou sootaga ma le Tama Faalelagi ma Iesu Keriso.
Atonu e fesoasoani le valaaulia o tagata aoga e toe faamanatu le Mataupu Faavae ma Feagaiga 63:58–64; 76:19–24 ma soo se faamatalaga atonu na latou tusia a’o suesueina muamua nei fuaiupu.
E mafai ona e faaali atu le fesili lenei ma valaaulia tagata aoga e tali mai e fesoasoani ia i latou e iloilo a latou taumafaiga, manaoga, ma le alualu i luma i le taimi nei:
-
O le a se mea ua e aoaoina e uiga i le Tama Faalelagi ma Iesu Keriso lea e faateleina ai lou alofa, talisapaia, ma le migao mo i Laua?
Uunaia ni tagata aoga e faasoa mai. Mafaufau e faasoa atu foi ou manatu.
Suesue ma mafaufau loloto i tusitusiga paia
Mafaufau e faaali atu le ata o loo i luga ma fai atu fesili nei:
-
O a mea a Iosefa Samita ma Sini Rikitone na fai ae la te lei mauaina le faaaliga o tikeri e tolu o le mamalu?
-
O le a se mea na e aoaoina mai lo la’ua aafiaga?
Afai e le manatua e tagata aoga, valaaulia i latou e toe faamanatu le Mataupu Faavae ma Feagaiga 76:15–19. Ia mautinoa ua latou malamalama a o lei tatalaina ia faaaliga vaaia ia Iosefa ma Sini, sa suesue ma mafaufau loloto nei alii e toalua i tusitusiga paia. O se tasi o mea moni atonu e aoaoina e tagata aoga o lenei: A o tatou suesue ma le agaga tatalo ma mafaufau loloto i tusitusiga paia, ua tatou saunia i tatou lava e maua le malamalama mai le Alii e ala i le Agaga Paia.
Tuu atu i tagata aoga se taimi e manatunatu ai i le aogā o a latou suesuega o tusitusiga paia. Atonu latou te mafaufau loloto pe o le a le lelei o loo latou suesue ai ma le agaga tatalo ma mafaufau loloto i tusitusiga paia. Afai e aogā, e mafai ona e faaali atu le ata lenei ma valaaulia tagata aoga e faasoa mai pe mafai faapefea e aitema taitasi ona fesoasoani ia i latou i a latou suesuega o tusitusiga paia. E mafai e tagata aoga ona faasoa mai mea o loo latou faia latou te lagona o le fesoasoani ia i latou.
E mafai foi ona manuia tagata aoga mai le talanoaina o luitau ma vaifofo talafeagai ma isi tagata o le vasega. E mafai ona e vaevaeina tagata aoga i ni vaega toalaiti ma valaaulia i latou e talanoaina luitau latou te feagai a o taumafai e suesue ma mafaufau loloto i tusitusiga paia. Fautuaina vaega taitasi e filifili se luitau ma mafaufau i ni nai laasaga faigofie e mafai ona latou faia e faatoilalo ai lena luitau ma faateleina ai le aafiaga o a latou suesuega o tusitusiga paia. Valaaulia vaega taitasi e faasoa mai i le vasega atoa.
Ina ia faaiu, valaaulia ni nai tagata aoga e molimau mai pe faapefea e le mafaufau loloto ma le suesueina o tusitusiga paia ona faamanuiaina o latou olaga ma fesoasoani ia latou lagona le latalata atili atu ia Iesu Keriso.