Mataupu Faavae ma Feagaiga 84

Mataupu Faavae ma Feagaiga 84

Vaaiga Aoao

Ina ua toe foi mai i le fale mai a latou misiona, sa feiloai se vaega o Toeaiina ma le Perofeta o Iosefa Samita. A o tatalo faatasi, sa maua e le Perofeta se faaaliga lea na ofoina mai ai ni malamalamaaga e uiga i le mana o le faalēatua o loo avanoa i tamaitai ma alii e ala i sauniga o le perisitua. Sa faamalamalama mai foi e le Faaola le tautoga ma le feagaiga lea e faatatau i Lona mana o le perisitua ma poloaiina Ona soo e molimau atu i Lana talalelei i le lalolagi uma.

Fai fesili e valaaulia ai le mafaufau loloto: O le mafaufau loloto ma le iloiloga faaletagata lava ia e mafai ona valaaulia ai le Agaga Paia e fesoasoani i tagata aoga taitoatasi ia vaai i mea “e pei ona i ai moni lava, ma … o le a i ai moni lava” (Iakopo 4:13). O iloiloga aogā faaletagata lava ia e fesoasoani i tagata aoga e mafaufau ai i lo latou malamalama i le taimi nei ma le taua o upumoni o le talalelei, faapea foi ma le auala e ola ai. Mo nisi faamatalaga i le ala na faia ai e le Faaola lenei mea, tagai i le vaega lea “Na Saunia e le Faaola Avanoa mo Tagata ina ia Aoaoina e le Agaga Paia” i le Aoao Atu i le Ala a le Faaola. E mafai foi ona e vaai i se faataitaiga o le auala e faia ai lenei mea i le lesona o lenei vaiaso ua faaulutalaina “Mataupu Faavae ma Feagaiga 84:1–32.”

Ia saunia e aoao atu

O lenei faamatalaga e tuuina atu ai ia te oe ni manatu o mea atonu e manaomia ona muai saunia mo lesona taitasi.

Mataupu Faavae ma Feagaiga 84:1–32

Faamoemoega o le lesona: Ina ia fesoasoani i tagata aoga ia lagonaina le taua o le mauaina o le mana o le faaleatua lea e ofoina mai e Iesu Keriso e ala i Ana sauniga o le perisitua.

Sauniuniga a le tagata aoga: Valaaulia tagata aoga e mafaufau loloto i mea ua latou iloa e uiga i sauniga o le perisitua ma pe aisea e taua ai i o latou olaga taitoatasi o ni tagata O Le Ekalesia a Iesu Keriso o le Au Paia o Aso e Gata Ai.

Mataupu Faavae ma Feagaiga 84:33–44

Faamoemoega o le lesona: Ina ia fesoasoani i tagata aoga ia loloto lo latou malamalama i le tautoga ma le feagaiga o le perisitua.

• Sauniuniga a le tagata aoga: Valaaulia tagata aoga e mafaufau pe na faapefea ona faamanuiaina i latou e ala i le osia ma le tausia o feagaiga ma le Atua. Fai atu ia i latou e sauni e faasoa mai pe na faapefea e le taumafai e tausia a latou feagaiga ona faateleina le mana o le Atua i o latou olaga.

• Pepa e tufa atu: “Faaloloto Lou Malamalama i le Tautoga ma le Feagaiga o le Perisitua (Vaega 1 ma le Vaega 2)”

Mataupu Faavae ma Feagaiga 84:49–102

Faamoemoega o le lesona: Ina ia fesoasoani i tagata aoga ia lagona le manao faaKeriso e faasoa atu le talalelei i tagata uma o le lalolagi.

• Sauniuniga a le tagata aoga: Valaaulia tagata aoga e fesili i se tasi e uiga i faamanuiaga o le taliaina o le Alii o Iesu Keriso ma Lana talalelei toefuataiina. Afai e mafai, valaaulia i latou e fesili i se tasi na papatiso ina ua uma ona aoaoina e faifeautalai.

• Ata e faaali atu: O se faafanua o le lalolagi

• Vitiō: “O Se Liuga o le Loto” (4:39)

Faataitaiga o le Atamai i Aoaoga Faavae 6

Faamoemoega o le lesona: Ina ia fesoasoani i tagata aoga ia malamalama i upumoni ua aoaoina i fuaitau o le atamai i aoaoga faavae ma aoao ma faaaoga mataupu faavae paia mo le mauaina o le malamalama faaleagaga.

Sauniuniga a le tagata aoga: Valaaulia tagata aoga e fesili i se tagata matua o le aiga po o se taitai o le Ekalesia pe aisea ua latou filifili ai e tumau le toaaga i le Ekalesia ma ia faamaoni i le talalelei a Iesu Keriso.