Lesona 94: Mataupu Faavae ma Feagaiga 84

Mataupu Faavae ma Feagaiga 84:1–32

“O Le Mana o le FaaleAtua”

Ina ua toe foi mai i le fale mai a latou misiona, sa feiloai se vaega o toeaina ma le Perofeta o Iosefa Samita. A o tatalo faatasi, sa maua e le Perofeta se faaaliga na ofoina mai ai ni malamalamaaga e uiga i le “mana o le faaleatua” (Mataupu Faavae ma Feagaiga 84:20) o loo avanoa mo tamaitai ma alii e ala i sauniga o le perisitua. O lenei lesona e mafai ona fesoasoani i tagata aoga ia lagonaina le taua o le mauaina o le mana o le faaleatua lea e ofoina mai e Iesu Keriso e ala i Ana sauniga o le perisitua.

Gaoioiga E Ono Mafai Ona Aoao Ai

Sauniga o le perisitua

Mafaufau e faailoa atu le saunoaga lenei a Elder Neil L. Andersen o le Korama a Aposetolo e Toasefululua. Valaaulia tagata aoga e faasoa mai o latou lagona e uiga i ana fesili ma pe faapefea ona latou taliina.

I a’u femalagaaiga o se sui o le Korama a Aposetolo e Toasefululua, ou te feiloai i le autalavou i le lalolagi atoa. O le toatele o i latou e tauivi ma ni atugaluga moni: “Pe o le a fesoasoani mai le Atua ia te au? Pe o le a Ia taitaia lou olaga? E mafai faapefea ona ou maua le fesoasoani, taitaiga, ma le filemu ou te manaomia?” (Neil L. Andersen, “O le Mana o le Faaleatua e Ala i Sauniga ma Faamanuiaga o le Perisitua,” Mo le Malosi o le Autalavou, Aok. 2021, 10)

• Toe mafaufau i tua i taimi o lou olaga na e manaomia ai le fesoasoani, taitaiga, ma le filemu. O le a se mea na e faia pe na mafai ona e faia e saili ai le fesoasoani ma le taitaiga a le Atua?

Faitau le vaega o totoe o le saunoaga a Elder Neil L. Andersen, ma vaavaai mo se mea se tasi ua tuuina mai e le Atua e fesoasoani ai ia i tatou.

A’u uo talavou pelē, o le a fesoasoani le Atua ia te outou, ma ua Ia tu saunia e faamanuia outou. I le avea ai ma o tatou Tama alofa, ua Ia tuuina mai ia i tatou sauniga e fesoasoani tatou te lagona ai Lona mana i o tatou olaga—le mana o le faaleatua. (Neil L. Andersen, “O le Mana o le Faaleatua e Ala i Sauniga ma Faamanuiaga o le Perisitua,” Mo le Malosi o le Autalavou, Aok. 2021, 10)

Atonu e lei mafaufauina e tagata aoga pe mafai faapefea e sauniga ona fesoasoani ia i latou i o latou olaga. E mafai ona e valaaulia tagata aoga e manatunatu i o latou manatu ma lagona e uiga i sauniga. E mafai ona e faaali atu le iloiloga lenei a le tagata lava ia e fai ai lenei mea:

I le faaaogaina o se fua o le 1–5 (1 = maualalo; 5 = maualuga), e faapefea ona e iloiloina lou talitonuga i faamatalaga nei:

• Ou te iloa po o a sauniga o le perisitua.

• Ua ou iloa le ala ua uma ona faamanuiaina ai e le Atua lo’u olaga e ala i sauniga o le perisitua.

• O loo ou sauniuni ma le iloa lelei ia maua le sauniga e sosoo ai i lo’u olaga.

Valaaulia tagata aoga ia gaua’i atu i uunaiga mai le Agaga Paia a o latou suesueina le vaega 84 ma aoao atili e uiga i le mana o le Atua lea e mafai ona oo mai i o latou olaga e ala i sauniga o le perisitua.

O le malumalu ma le perisitua

Mafaufau pe mafai faapefea ona e faasoa atu le faamatalaga lenei i tagata aoga:

Ia Setema 1832, na toe foi atu ai faifeautalai i Katelani, Ohaio, ina ua uma ona talai atu le talalelei i le itu i sasae o le Iunaite Setete. I le taimi o le latou feiloaiga, na maua ai e le Perofeta o Iosefa Samita le faaaliga ua faamaumauina i le Mataupu Faavae ma Feagaiga 84. I lenei faaaliga, na faalauteleina ai e le Alii le malamalama o le Au Paia e uiga i le perisitua. Faitau le Mataupu Faavae ma Feagaiga 84:1–5, ma vaavaai mo le mea na faatonuina ai e le Alii le Au Paia e faamuamua ao latou fausiaina le aai o Ierusalema Fou.

• Aisea e te manatu ai e taua le amataina e le Alii o se faaaliga i le perisitua e ala i le aoao atu e uiga i le taua o malumalu?

Afai e le ta’ua maia e tagata aoga, e mafai ona e ta’u atu i ai o totonu o le malumalu, e faatino ai sauniga o le perisitua e tatau ai mo lo tatou faaolataga ma le faaeaga.

Atonu e te manao e faasoa atu i tagata aoga e faapea i fuaiupu 6–18, na tautino mai ai e le Alii e faapea, sa faaee atu Lana perisitua i luga o Atamu ma faaauau ai lava i le taimi o Mose. Na faaee atu foi e Iesu Keriso le perisitua i luga o Arona ma e tupuga mai ia te ia. Atonu e te manao e ta’u atu o loo faaauau pea Lana perisitua i le Ekalesia toefuataiina a Iesu Keriso i aso nei. O pule uma o le perisitua, e aofia ai lea e manaomia e faatino ai sauniga o le malumalu, e sau mai ia Iesu Keriso.

Ua faaalia le mana faaleatua e ala i sauniga

Atonu o se taimi lelei lea e fesili atu ai i au tagata aoga po o le a le sauniga. Afai latou te tauivi e faamalamalama atu, e mafai ona e valaaulia i latou e faaaoga fesoasoaniga mo le suesueina o tusitusiga paia e saili ai. Fesoasoani ia i latou ia malamalama o se sauniga o se faatinoga paia ma aloaia e faatinoina i le pule o le perisitua. O nisi o sauniga e alagatatau i lo tatou faaeaga.

Atonu e te manao e lisi sauniga o le perisitua i luga o le laupapa, e pei o le papatisoga, faamanatuga, faamanuiaga o le faamafanafanaga ma fautuaga, faamanuiaga faapeteriaka, faamauga ma le meaalofa o le Agaga Paia, faaeega paia o le malumalu, ma le faamauga i le malumalu.

Faitau i le Mataupu Faavae ma Feagaiga 84:19–22, ma saili mo mea e aoao atu e le Alii e uiga i sauniga.

O leMataupu Faavae ma Feagaiga 84:20–22 o se fuaitau o le atamai i aoaoga faavae. Mafaufau e valaaulia tagata aoga e faailoga ia fuaitau o le atamai i aoaoga faavae i se auala iloga ina ia faigofie ona latou mauaina.

• O a ni mea na e aoaoina e uiga i sauniga faaleperisitua?

• O a ni au fesili e uiga i mea na e faitau ai?

  I le faalagolago ai i le malamalama o tagata aoga ma fesili latou te fai mai, atonu e te manao e faasoa atu nisi po o fesili uma nei:

• “O le perisitua maualuga atu e faatautaia le talalelei” e faasino i le pule o le Perisitua Mekisateko e faatautaia ai sauniga e tatau ai mo lo tatou faaolataga ma le faaeaga.

• ”O mea lilo” o ni “upumoni faaleagaga e na o faaaliga e iloa ai” (Taiala i Tusitusiga Paia, “Mealilo a le Atua,” scriptures.ChurchofJesusChrist.org).

• O le “mana o le faaleatua” e faasino i le mana lea e sau mai le Atua e fesoasoani ia i tatou i lenei olaga ma saunia ai i tatou mo le ola e faavavau.

Fesoasoani i tagata aoga ia iloa e ala i sauniga o le perisitua, e mafai ai ona tatou maua le mana o le faaleatua i o tatou olaga.

Ina ia fesoasoani i tagata aoga ia loloto lo latou malamalama i lenei upumoni, valaaulia i latou e filifili se tasi o sauniga o loo lisiina i luga o le laupapa latou te mananao e aoao atili i ai. Tuu atu ia i latou se taimi e tusi ai i lalo ni a latou fesili se lua i le tolu o loo i ai e uiga i lena sauniga. Pe e mafai foi ona e faaali atu fesili e tolu o loo lisi atu i lalo mo i latou e mafaufau i ai.

• E mafai faapefea e se tasi ona saunia e maua lenei sauniga?

• O le a sou manatu e faapefea ona fesoasoani lenei sauniga o le perisitua ia i tatou ia maua le mana o le faaleatua e fesoasoani ai ia i tatou i lenei olaga?

• E mafai faapefea i le mauaina o lenei sauniga ona fesoasoani ia i tatou ia avea atili e pei o le Tama Faalelagi ma Iesu Keriso?

Valaaulia tagata aoga e saili punaoa mamana ua filifilia e aoao atili ai e uiga i le sauniga sa latou filifilia ma mo tali i a latou fesili. E mafai ona latou faia lenei mea e i latou lava pe faatasi foi ma isi o e na filifilia lea lava sauniga e tasi. O le Tusitaulima Aoao: Auauna atu i Le Ekalesia a Iesu Keriso o le Au Paia o Aso e Gata Ai, o loo maua i le ChurchofJesusChrist.org, o loo maua ai faamatalaga aoga mo i latou o e filifili e suesue i faaeega paia o le malumalu (27.2) ma le faamauga (27.3). E mafai foi ona latou mafaufau loloto i aafiaga patino ina ua fesoasoani sauniga na latou oo i ai ia latou lagona ai le mana o le faaleatua i o latou olaga.

A uma se taimi talafeagai, valaaulia tagata taitoatasi po o vaega e faasoa mai mea na latou maua i le vasega.

O le taua o sauniga

Ina ia fesoasoani i tagata aoga e toe manatunatu i mea ua latou aoaoina e uiga i le taua o sauniga o le perisitua, e mafai ona e fai atu i tagata aoga e tali mai i nisi po o fesili uma nei. E mafai e tagata aoga ona filifili se fesili ma faasoa mai a latou tali i se tasi o le vasega.

• O le a se mea ua e aoaoina e uiga i le mana o le faaleatua ma sauniga o le perisitua?

• E mafai faapefea e le galue agai ma le mauaina o nei sauniga ona fesoasoani ia te oe e latalata atili atu ai ia Iesu Keriso?

• O anafea na e lagonaina ai le mana o le Atua e ala i sauniga o le perisitua ua e mauaina?

Mafaufau e faasoa atu ou manatu ma lagona e uiga i le mana o le Atua ua e mauaina i lou olaga e ala i sauniga o le perisitua.

Tauloto

Atonu e te manao e fesoasoani i tagata aoga e tauloto le mau faasino o le atamai i aoaoga faavae ma le fuaitau autu o le mau i le taimi o lenei lesona ma toe faamanatu i latou i lesona i le lumanai. O le fuaitau autu o le mau, “O ona sauniga, ua faaalia ai le mana o le faaleatua.” O manatu mo gaoioiga o le taulotoina o loo i ai i anomea faaopoopo i lalo o le “Gaoioiga Toe Faamanatu o le Atamai i Aoaoga Faavae.”

Punaoa Faaopoopo

Mataupu Faavae ma Feagaiga 84:20–21. O le a le sootaga i le va o sauniga faaola ma le mana o le faaleatua?

Na saunoa mai Elder David A. Bednar o le Korama a Aposetolo e Toasefululua e faapea:

O sauniga o le perisitua o le ala lea i le mana o le faaleatua. … E matuai manaomia lava sauniga o le perisitua ia “o mai atoatoa ai ia Keriso, ma faaatoatoaina ia te ia” (tagai i le Moronae 10:30–33). A aunoa ma sauniga, e le mafai ona maua e se tagata ia faamanuiaga uma ua avanoa e ala i le taulaga togiola e le iu ma faavavau a le Alii (tagai Alema 34:10–14)— o le mana lava lea o le faaleatua. (David A. Bednar, “Faifeautalai, Talafaasolopito o Aiga, ma Galuega o le Malumalu,” Liahona, Oke. 2014, 16)

Mataupu Faavae ma Feagaiga 84:22. O le a le uiga a “aunoa ma lea, e leai se tagata e mafai ona vaai i fofoga o le Atua … ma ola”?

Na aoao atu e le Alii ia Atamu e faapea “e leai se mea le mama e mafai ona mau … i lona afioaga” (Mose 6:57). E na o le mauaina o sauniga e ala i le mana o le perisitua ma le tausiga o feagaiga e o faatasi ai e mafai ai ona faamamaina i tatou mai le agasala ma tatou paia ai ma mama a’ia’i e faapei o le Atua. Na aoao mai le Perofeta o Iosefa Samita “Afai e te manao e te alu i le mea o i ai le Atua, e tatau ona e faapei o le Atua, pe umia foi mataupu faavae o loo umia e le Atua” (Aoaoga o Peresitene o le Ekalesia: Iosefa Samita [2007], 72).

O ai e mafai ona mauaina le mana o le perisitua?

Na aoao mai ia Peresitene Camille N. Johnson, Peresitene Aoao a le Aualofa:

O tamaitai, alii ma tamaiti e mauaina ma utuvai mai le mana o le perisitua, le mana o le Faaola, e fesoasoani ai i tagata latou te alolofa i ai (tagai Dallin H. Oaks, “O Le Perisitua Mekisateko ma Ki,” Liahona, Me 2020, 69–72). O faamanuiaga o le mana o le perisitua e avanoa mo tagata uma o le Ekalesia o e tausia a latou feagaiga—tamaitai, alii, ma tamaiti—e aofia ai:

• Taitaiga mo o latou olaga.

• Musumusuga e iloa ai pe faapefea ona auauna atu i tagata o le aiga ma isi.

• Malosiaga e onosaia ai ma faatoilalo luitau.

• Meaalofa o le Agaga e faalautele ai o latou tomai.

• Faaaliga e iloa ai pe faapefea ona faataunuu le galuega ua faauuina, vaetofia, pe tofia ai i latou e fai.

• Fesoasoani ma le malosi e avea atili ai e faapei o Iesu Keriso ma le Tama Faalelagi (Tusitaulima Aoao, 3.5).

O le Faaola o le punavai o nei faamanuiaga uma. O le taitaiga, musumusuga, meaalofa a le Agaga ma faaaliga e oo uma mai e ala i le Agaga Paia, na auina mai e le Tama i le suafa o le Faaola. …

I lo’u aafiaga, o le mana o le perisitua, aemaise lava lena ua faaeeina ai a’u i le maota o le Alii, e faateleina ai le mafutaga a le Agaga Paia ma lo’u malamalama i le Togiola a Iesu Keriso. (Camille N. Johnson, “Peresitene Camille N. Johnson: O a Mea e Tatau i Tamaitai ma Alii ona Fai ina ia Maua ai le Mana o le Perisitua?,” Church News, Oke. 30, 2022, thechurchnews.com)

E mafai faapefea ona fesoasoani le malumalu ia te au ia maua le mana o le Atua?

Na aoao mai Peresitene Russell M. Nelson:

O le malumalu o le totonugalemu lea o le faamalosia o lo tatou faatuatua ma le malosiaga faaleagaga ona o le Faaola ma Lana aoaoga faavae o le taulaiga autu lea o le malumalu. O mea uma o loo aoaoina i totonu o le malumalu, e ala i aoaoga ma e ala i le Agaga, e faateleina ai lo tatou malamalama ia Iesu Keriso. O ana sauniga taua e fusia ai i tatou ia te Ia e ala i feagaiga paia o le perisitua. Ma, a o tatou tausia a tatou feagaiga, Na te faaeeina i tatou i Lona mana faamalolo ma faamalosi [tagai i le Mataupu Faavae ma Feagaiga 109:15, 22]. Ma ioe, oka so tatou manaomiaina o Lona mana i aso o i luma atu. (Russell M. Nelson, “O Le Malumalu ma Lou Faavae Faaleagaga,” Liahona, Nov. 2021, 93, 94)

Gaoioiga Faaopoopo e Aoao Ai

O le faamanatuga

Afai e te manao e faaalu se taimi faaopoopo e fesoasoani ai i tagata aoga ia malamalama i le taua o le faamanatuga, e mafai ona e faasoa atu le faamatalaga lenei:

[O] le faamanatuga o se sauniga lea e tagofia ai e tagata o le Ekalesia le falaoa ma le vai e faamanatu ai le taulaga togiola a Iesu Keriso. O lenei sauniga o se vaega taua o le tapuaiga ma le atiina ae faaleagaga. E ala i lenei sauniga, e faafou ai e tagata o le Ekalesia ia feagaiga na latou osia ma le Atua i le taimi na papatisoina ai i latou. (Autu o le Talalelei, “Faamanatuga,” topics.ChurchofJesusChrist.org)

Mafaufau e talanoaina le taua o le sauniga o le faamanatuga faatasi ma tagata aoga. Fesoasoani ia i latou ia malamalama o se vaega taua o la latou tapuaiga ma le atinaega faaleagaga. E mafai ona latou faatu se sini i se mea e mafai ona latou faia i le taimi o le faamanatuga lea o le a fesoasoani ia i latou e faateleina ai lo latou tapuai ma le atinaega faaleagaga.

Laina o le pule

Faitau le Mataupu Faavae ma Feagaiga 84:6–16. Valaaulia tagata aoga e faailoa mai mea o loo i ai i nei fuaiupu ma mea e mafai ona aoao mai e fuaitau ia i tatou e uiga i le perisitua. Afai e mafai, aumai se kopi o se laina o le pule o le perisitua a se tasi i le vasega. Atonu e te manao e kopi le faasologa o le laina o le pule o le perisitua i luga o le laupapa. Fesoasoani i tagata aoga ia malamalama o le faasologa o le pule o le perisitua, e faaalia ai le auala na tuuina mai ai le pule o le perisitua mai le tasi tagata e umia le perisitua i le isi, mai ia Iesu Keriso i sē ua umia le perisitua i le taimi nei. E mafai foi ona e faafaaali atu le auala e talosaga ai se laina o le pule.

Faamalamalama atu le taua o sauniga

E mafai ona e tusia mea nei i luga o le laupapa: “Aisea e taua ai sauniga o le perisitua i lo’u olaga?” Tuu atu i tagata ni nai minute e mafaufau ai pe faapefea ona latou tali atu i lenei fesili. E mafai ona e fai atu i tagata aoga e fai lenei mea i le amataga o le lesona e tuu ai lo latou malamalama i sauniga po o le faaiuga ina ia mafai ai ona latou faaalia mea ua latou aoaoina. A uma ona latou mafaufau loloto pe faapefea ona latou taliina lenei fesili, valaaulia ni nai tagata aoga e faasoa mai pe faapefea ona latou tali atu.