Lesona 96: Mataupu Faavae ma Feagaiga 84

Mataupu Faavae ma Feagaiga 84:49–102

“I le Lalolagi Atoa i Tagata Uma”

I le tautoulu o le 1832, sa amata ona toe foi atu faifeautalai e aofia ai Iareto Kata ma Stephen Burnett i Katelani, Ohaio, mai le talaiina atu o le talalelei a Iesu Keriso. O se taimi fiafia a o aumaia e toeaina lipoti o le auauna atu i le Alii i le itu i sasae o le Iunaite Setete. E le o toe mamao ae talia e le toatele ni valaauga faaopoopo e faaauau pea ona auauna atu. I o tatou aso, e mafai foi e i tatou ona auauna atu i le Alii e ala i le faasoaina atu o Lana talalelei. O lenei lesona e mafai ona fesoasoani i tagata aoga ia lagonaina le manao faaKeriso e faasoa atu le talalelei i tagata uma i le lalolagi.

Gaoioiga E Ono Mafai Ona Aoao Ai

O le lalolagi atoa

Ina ia fesoasoani i tagata aoga ia iloa le toatele o fanau a le Atua o loo i ai i le lalolagi ma e manaomia Lana talalelei, e mafai ona e amataina le vasega e ala i le faaali atu o se faafanua o le lalolagi. Mafaufau e fai atu i tagata aoga e ta’u mai ni atunuu se tele e mafai ona latou mafaufau i ai i se minute se tasi, pe e mafai foi ona e valaaulia i latou e faasino mai nisi o atunuu i luga o le faafanua. E mafai foi e tagata aoga ona sue le faitau aofai o lo outou atunuu po o le lalolagi.

Suiga i le talanoa e uiga i le talalelei toefuataiina a Iesu Keriso i le lalolagi atoa. E mafai ona e fai atu fesili faapenei:

• O fea o loo auauna ai faifeautalai i le lalolagi atoa? O fea e le o auauna ai?

• E faapefea ona faatusatusa le faitau aofai atoa o tagata O Le Ekalesia a Iesu Keriso o le Au Paia o Aso e Gata Ai i le lalolagi atoa i le faitau aofai atoa o le lalolagi? E faapefea e tagata auai o le Ekalesia i la outou eria ona faatusatusa i le aofaiga atoa o le faitau aofai i la outou eria?

Mo se fesoasoani i le taliina o fesili faafuainumera e uiga i le Ekalesia, faafesootai le itulau o “Mea Moni ma Fuainumera” i le newsroom.ChurchofJesusChrist.org.

E mafai ona e fai atu i tagata aoga e mafaufau loloto i mea lelei e mafai ona latou faia e ala i le filifili e auauna atu i se misiona. Faitau le faamatalaga lenei ma valaaulia tagata aoga e faasoa mai o latou manatu po o lagona.

Sa aoao mai e Peresitene Russell M. Nelson le mea lenei:

E manaomia e tagata uma le avanoa e iloa ai e uiga i le talalelei toefuataiina a Iesu Keriso. E manaomia e tagata uma ona iloa po o fea e mafai ona latou maua ai le faamoemoe ma le filemu lea e “[silisili lava] i mea uma e manatu i ai” [Filipi 4:7]. (Russell M. Nelson, “Tala’i Atu le Talalelei o le Filemu,” Liahona, Me 2022, 7)

Fai i le vasega e tusi ni nai manatu e tali atu ai i le fesili lenei:

Faaalu sina taimi e mafaufau loloto ai i lagona o le Atua e uiga i Ana fanau uma i le lalolagi atoa. O a mea o loo misia e le toatele o tagata e ala i le lē iloaina o Iesu Keriso ma Lana Ekalesia toefuataiina? O a ni mea ua e iloa ma o a faamanuiaga ua e oo i ai e mafai ona faia ai se eseesega i olaga o isi tagata?

O tulaga o le lalolagi

O Setema 1832 o se taimi o le olioli i Katelani a o toe foi mai faifeautalai mai le auauna atu i misiona ma lipoti atu o latou aafiaga i setete i sasae o Amerika. I le taimi lea, na maua ai e Iosefa Samita faatonuga mai le Alii. O nisi o nei faatonuga na talanoaina ai tulaga ma manaoga o le lalolagi.

Faitau le Mataupu Faavae ma Feagaiga 84:49–53, ma vaavaai mo upu ma fasifuaitau na faaaoga e le Alii e faamatala ai mea na oo i ai tagata i le lalolagi.

Valaaulia tagata aoga e faasoa mai upu ma fasifuaitau na latou maua ma o latou manatu i o latou uiga. Atonu o le a latou faasino maia se autu o le agasala ma le nofopologa. Atonu e matauina foi e tagata aoga sa i ai tagata i le pogisa ma oi ona o nei tulaga. O lona uiga sa latou lagonaina le leai o se faamoemoe, faanoanoa, ma le tiga. E mafai e tagata aoga ona faasoa mai pe na faapefea ona latou vaaia o le agasala e afua ai le tiga ma le faavauvau ma taitai atu ai i le nofopologa. Lapataia tagata aoga e aua nei faasoa maia ni faamatalaga e mafai ona le faaaloalogia ai le tulaga faalilolilo o se tasi.

Sa ta’u mai e le Alii e oo lava i tagata o Lana Ekalesia sa oo i se tikeri o le pogisa ma le faasalaga i lena taimi.

Faitau le Mataupu Faavae ma Feagaiga 84:54–57 e vaai ai po o le a le mea na mafua ai le pogisa ma le faasalaga mo tagata o le Ekalesia.

• O le a se mea sa e mauaina?

• O le a se mea e mafai ona tatou aoao mai i nei fuaiupu e uiga i le taua o le Tusi a Mamona ma faaaliga i le Mataupu Faavae ma Feagaiga?

Fesoasoani i tagata aoga ia malamalama i lagona o Iesu Keriso ma Ona soo pe a latou vaai i tagata o mafatia i le agasala ma le pogisa. E mafai ona latou suesueina se tasi pe lua o fuaitau nei taitoatasi pe i ni vaega toalaiti.

• Mose 7:26, 28, 41 (faaaliga ia Enoka)

• Mosaea 28:3 (o atalii o Mosaea)

• Alema 31:2 (Alema le Itiiti)

• 3 Nifae 17:14 (Iesu Keriso)

• O a upu e fesoasoani e te malamalama ai i lagona o le Faaola mo i latou o i le agasala ma le pogisa? Mafaufau pe faape’ī le tauivi i le agasala ma le pogisa.

• E mafai faapefea ona fesoasoani le malamalama i lagona o le Alii?

• O le a sou manatu e mafai faapefea e le Tusi a Mamona ona fesoasoani i se tasi e faatoilalo le pogisa faaleagaga?

O le siufofoga o le Faaola

Faitau le Mataupu Faavae ma Feagaiga 84:60–62, ma vaavaai mo mea na faatonuina e Iesu Keriso nei tagata e fai. E mafai ona fesoasoani le iloa o “nei mea” i le fuaiupu 60 ma “na mea” i le fuaiupu 61 e faasino i mea na faaalia mai e le Alii i le vaega 84, lea e aofia ai le manatuaina o le Tusi a Mamona.

• O le a le mea na faasino e Iesu i latou e fai?

• O a faamanuiaga o le a latou maua e ala i le usiusitai i Lana taitaiga?

Faataga tagata aoga e faasoa atu mea na latou aoaoina. O se upumoni e tasi e mafai ona latou faailoa mai o le, e finagalo Iesu Keriso ia i tatou e faasoa atu le Tusi a Mamona ma a tatou molimau i fanau uma a le Atua i le lalolagi atoa.

Fesoasoani i tagata aoga ia malamalama pe aisea e finagalo ai Iesu Keriso ia i tatou e faasoa atu Lana talalelei i tagata uma. E mafai ona e amata i le fesoasoani i tagata aoga ia iloa faamanuiaga e finagalo le Alii ia maua e tagata uma. O le gaoioiga lenei e mafai ona avea o se auala fiafia mo tagata aoga e galulue ai ma se paga a o latou suesue atili i le Mataupu Faavae ma Feagaiga 84.

Faaali atu faatonuga nei, ma fesoasoani i tagata aoga e mulimuli ia i latou. Mo le Laasaga 2, e mafai ona e muai filifilia ni misiona patino mo tagata aoga e filifili mai ai.

1. Filifili se tasi e galue o sau “soa o le misiona” mo le vaega o totoe o le lesona.

2. Filifili se misiona i le lalolagi e te fiafia e auauna atu ai. (Afai e ese le gagana e tautatala ai tagata i le misiona na e filifilia, vaai pe mafai ona vave ona e aoao pe faapefea ona faafeiloai lau soa i lena gagana.)

3. Faitau le Mataupu Faavae ma Feagaiga 84:64–73, ma fai se lisi o faamanuiaga e finagalo Iesu Keriso e tuuina mai i tagata uma o e taliaina o Ia ma Lana talalelei.

4. Ia talanoaina pe mafai faapefea e faamanuiaga taitasi na e lisiina ona fesoasoani i se tasi e faatoilalo le pogisa ma le nofopologa i le agasala.

Tuu atu i tagata aoga se avanoa e faasoa mai ai faamanuiaga sili e maua mai le mulimuli ia Iesu Keriso. E faaopoopo atu i le faia o se fesili e pei o nei, e mafai ona e faaali atu le vitio “A Change of Heart” (4:39).

• Afai e mafai ona e faasoa atu se mea e uiga ia Iesu Keriso i se tasi e le iloa pe mulimuli ia te Ia, mata o le a lena mea?

O uo a le Faaola

Faaalu sina taimi e mafaufau loloto ai pe aisea ua taliaina ai ma le naunautai e le toatele o tamaitai talavou ma alii talavou se valaauga mai le Alii e avea ma se faifeautalai faamisiona po o auaunaga.

A o mafaufau loloto tagata aoga, e mafai ona e fai atu ia i latou e faasoa mai po o ai latou te iloa na maua talu ai nei se valaauga mai le Alii e auauna atu. Afai e maua, e mafai ona e faasoa atu se faasalalauga faaagafesootai o se tasi e faasilasila atu lo latou valaauga o le misiona i aiga ma uo. Fesoasoani i tagata aoga ia iloa le olioli e mafai ona oo mai ia i latou o e mananao e auauna atu i le Alii.

• O a nisi o mea e ono faigata pe taufaafefe e uiga i le auauna atu i le Alii o se faifeautalai?

Mafaufau e valaaulia tagata aoga e faitau fuaiupu nei ma latou “soa o le misiona.” E mafai ona e valaaulia i latou e filifili ni aoaoga se lua pe tolu a le Faaola e tuuina atu ai le talitonuga mautinoa ia i latou o e mananao e faasoa atu le talalelei i isi. Ona mafai lea e paga ona faasoa mai mea na latou aoaoina i isi paga o tagata aoga i le vasega.

Faitau le Mataupu Faavae ma Feagaiga 84:77–88, ma vaavaai mo upu faamalosiau a le Alii ia i latou o e atonu e popole e uiga i le taliaina o se valaauga e auauna atu ia te Ia.

E mafai foi ona e faasoa atu ni upu faamalosiau mai taitai o le Ekalesia. (Tagai i “Punaoa Faaopoopo.”)

• O a afioga a le Alii na tulaga ese ia te oe?

• Mai mea ua e aoaoina i le asō, aisea e te manatu ai o le a mafaufau Iesu Keriso ia i latou o e talai atu Lana talalelei o ni Ana uo? (tagai fuaiupu 77).

• O le a se mea ua e aoaoina i le aso e fesoasoani e te malamalama atili ai i lagona o le Alii e uiga i tagata uma i le lalolagi? O a ni taga e ono uunaia ai oe e le Agaga Paia e fai ona o mea sa e aoaoina?

Punaoa Faaopoopo

O le a le taua o le faasoa atu o le talalelei a Iesu Keriso?

Na faamatala mai e Peresitene Russell M. Nelson:

Uso e ma tuafafine, e leai se isi taimi ua matua sili ona manaomia ai le talalelei a Iesu Keriso i lo le taimi nei. … Ou te alofa i le Alii o Iesu Keriso ma molimau atu o Lana talalelei e na o le pau lea o le vaifofo tumau mo le filemu. O Lana talalelei o se talalelei o le filemu [Mataupu Faavae ma Feagaiga 27:16]. …

O faifeautalaiuma latou te aoao ma molimau atu e uiga i le Faaola. O le pogisa faaleagaga i le lalolagi ua matua manaomia atili ai le malamalama o Iesu Keriso i lo se isi lava taimi muamua. (Russell M. Nelson, “Talai Atu o le Talalelei o le Filemu,” Liahona, Me 2022, 6–7)

O a faamanuiaga e mafai ona oo mai e ala i se misiona tala’i po o auaunaga ?

Na faapea mai Elder Denelson Silva o le Fitugafulu:

O le avanoa paia o le avea ma sui o le Faaola o Iesu Keriso ma Lana Ekalesia e lē mafai ona faatuatuana’i i ai. O le auai i le faatinoina o tatalo e le mafaitaulia, atina’e ma le tuuina atu faafia o lau molimau i le aso, o le tele o itula e suesue ai tusitusiga paia, feiloai ma tagata semanu e te le feiloai i ai pe ana faapea e te nofo i le fale, o ni aafiaga e le mafaamatalatalaina. O le maualuga lava lea o le aafiaga o loo faapolopolo mo le autalavou e valaauina e le Alii e auauna atu ai i se misiona. E matuai talileleia oe ma e tatau ai. Faamolemole aua nei tuuitiitia le taua o se misiona o auaunaga, aua o misiona o auaunaga e maua ai foi ni aafiaga e lē mafaamatalaina. “Ua tele lava le taua o agaga i le silafaga a le Atua” (Mataupu Faavae ma Feagaiga 18:10), e aofia ai le taua o lou agaga. (Denelson Silva, “Lototoa e Talai Atu le Upumoni,” Liahona, Nov. 2022, 71)

Mataupu Faavae ma Feagaiga 84:73. Aisea na lapatai mai ai le Alii e aua nei mitamita i vavega tatou te oo i ai?

Sa aoao mai Peresitene Dallin H. Oaks o le Au Peresitene Sili:

I le tuuina atu o molimau ma a matou lauga faalauaitele e seāseā ona ta’ua o matou aafiaga aupito ofoofogia, ma e seāseā ona matou faalagolago i faailoga faapea e moni le talalelei. … E masani lava ona le talafeagai le taulotoina o tulaga faavavega i se aofia lautele lea e aofia ai tagata e matua eseese tulaga o le matua faaleagaga. I se aofia lautele, o vavega o le a faamalosia ai le faatuatua mo nisi ae o se faailoga e le talafeagai mo isi. (Dallin H. Oaks, “Vavega,” Ensign, Iuni 2001, 10)

Mataupu Faavae ma Feagaiga 84:88. O le a se fesoasoani o ofo mai e le Faaola ia i tatou a o tatou auauna atu ia te Ia?

Na saunoa mai Peresitene Henry B. Eyring o le Au Peresitene Sili:

Ou te molimau atu e muamua atu le Alii i o outou luma i soo se taimi lava tou te i ai i Lana feau. O nisi taimi o le a avea ai oe ma le agelu e auina atu e le Alii e sapasapai i luga isi. O nisi taimi o le a avea ai oe ma lē e siosiomia e agelu e sapasapaia i luga oe. Ae o le a e maua pea Lona Agaga e afio i lou loto, e pei ona folafola atu ia te oe i sauniga faamanatuga uma. Pau lava le mea o lou tausi i Ana poloaiga. (Henry B. Eyring, “Aua le Fefe e Fai Mea Lelei,” Liahona, Nov. 2017, 103)

Gaoioiga Faaopoopo e Aoao Ai

Manatuaina le Tusi a Mamona

Fesoasoani i tagata aoga e aoao le upumoni e finagalo le Alii ia tatou suesue i le Tusi a Mamona ma ola e tusa ai ma ona aoaoga. E mafai ona e amata i le aveina o tagata aoga ChurchofJesusChrist.org e vaai pe fia gagana ua faaliliuina ai le Tusi a Mamona .

Valaaulia tagata aoga e talanoaina pe aisea ua tele ai taumafaiga ua faia e faaliliu ai le Tusi a Mamona i le tele o gagana. Ona mafai lea ona e faitauina le Mataupu Faavae ma Feagaiga 84:54–57 o se vasega, ma vaavaai pe o a lagona o le Alii e uiga i le Tusi a Mamona. Mafaufau e saunia se auala mo tagata aoga e iloilo ai pe o le a le tele o lo latou faatauaina o le Tusi a Mamona. Pe o lagona patino e tagata aoga o le savali i le fuaiupu 54 e faatatau ia i latou? O a ni mea o latou faia e suesue ai le Tusi a Mamona? E faapefea ona latou faasoa atu, pe mafai faapefea ona latou faasoa atu, le molimau ia Keriso o loo maua i le Tusi a Mamona i isi? E mafai ona e valaaulia tagata aoga o e iloa le auala e faasoa atu ai le Tusi a Mamona e faaaoga ai le polokalama o le Gospel Library e aoao atu ai isi i le vasega.

Lagolagoina e le Alii

Atonu e manuia tagata aoga mai le iloaina o le lagolago ua ofoina mai e Iesu Keriso e pei ona faamatalaina i le Mataupu Faavae ma Feagaiga 84:88. E mafai ona e fai atu i tagata aoga e tusi se ata fasilaau e faatusa ia i latou o se faifeautalai. Ona mafai lea ona latou faitauina le fuaiupu 88 ma tusi se ata o auala uma e lagolagoina ai i tatou e le Faaola pe a tatou taumafai e faasoa atu Lana talalelei. Fesoasoani i tagata aoga e talanoaina o latou lagona e uiga i le lagolagoina e le Alii o i latou o e auauna atu i Lona suafa. Mafaufau e faasoa atu se tala faatusipaia e pei o le 2 Tupu 6:15–17 e faapupula ai le lagolago faalelagi e masani ona le vaaia.