“Lesona 97—Faataitaiga o le Atamai i Aoaoga Faavae 6: Malamalama i Aoaoga Faavae ma le Mauaina o le Malamalama Faaleagaga,” Tusi Lesona a le Faiaoga Seminare o le Mataupu Faavae ma Feagaiga (2025)
“Faataitaiga o le Atamai i Aoaoga Faavae 6,” Tusi Lesona a le Faiaoga Seminare o le Mataupu Faavae ma Feagaiga
Lesona 97: Mataupu Faavae ma Feagaiga 84
Faataitaiga o le Atamai i Aoaoga Faavae 6
Malamalama i Aoaoga Faavae ma Mauaina o le Malamalama Faaleagaga
O le atamai i aoaoga faavae e mafai ona fesoasoani i tagata aoga e fausia le faavae mo o latou olaga i luga o Iesu Keriso ma Lana talalelei. O lenei lesona e mafai ona fesoasoani i tagata aoga ia malamalama i upumoni ua aoaoina i fuaitau o le atamai i aoaoga faavae ma fesoasoani ia i latou e aoao ma faaaoga mataupu faavae paia mo le mauaina o le malamalama faaleagaga.
Gaoioiga E Ono Mafai Ona Aoao Ai
Iloiloga o le Atamai i Aoaoga Faavae: Malamalama
Ina ia fesoasoani i tagata aoga ia faamasani i fuaitau o le atamai i aoaoga faavae i vaega o totoe o le Mataupu Faavae ma Feagaiga, mafaufau e tuu atu ia i latou ni nai minute e faailoga ai nei fuaitau ia latou tusitusiga paia i se auala faapitoa. E mafai e tagata aoga ona maua le lisi o mau o le atamai i aoaoga faavae ma fasifuaitau autu o mau i le Pepa Autu o le Atamai i Aoaoga Faavae (2023).
Ona mafai lea ona e valaaulia tagata aoga e fai le gaoioiga lenei i ni vaega toalaiti e faateleina ai lo latou malamalama i le aoaoga faavae o loo aoaoina i nei fuaitau. Ia mautinoa o le makaina o tusitusiga paia ma le faamaeaina o lenei gaoioiga e mo na o le 10 i le 15 minute. O lenei mea o le a lava ai se taimi mo tagata aoga e faataitai ai le faaaogaina o mataupu faavae o le mauaina o le malamalama faaleagaga i se taimi mulimuli ane o le lesona.
Fai se lisi o faigata masani e feagai ma talavou i o latou olaga i aso taitasi.
Vaavaai mo fuaitau o le atamai i aoaoga faavae o le Mataupu Faavae ma Feagaiga e mafai ona fesoasoani i na tulaga. Faitau fuaitau na e filifilia, ma saunia e faasoa mai i le vasega au tali i fesili nei:
-
E faapefea ona e toe faaupuina i au lava upu mea o aoaoina mai e nei fuaitau?
-
E mafai faapefea e aoaoga a Iesu Keriso i nei fuaitau ona fesoasoani i tupulaga talavou i faigata masani na e lisiina?
Aoao ma faaaoga mataupu faavae o le mauaina o le malamalama faaleagaga
A o lei faailoaina atu le tulaga lenei, atonu e fesoasoani mo tagata aoga ona toe faamanatu i se taimi puupuu ia mataupu faavae o le mauaina o le malamalama faaleagaga. (O gaoioiga toe faamanatu fautuaina o loo aofia ai le “Gaoioiga o le Iloiloga o le Atamai i Aoaoga Faavae” i le faaopoopoga o lenei tusi lesona.)
O se tasi o auala e toe faamanatu ai o le tusi lea o mataupu faavae taitasi i luga o le laupapa o se isi ulutala ma se avanoa e tusi ai i lalo o mataupu faavae taitasi. Valaaulia le aofaiga tutusa o tagata aoga e toe faamanatu mataupu faavae eseese o le mauaina o le malamalama faaleagaga mai parakalafa 5–12 i le Pepa Autu o le Atamai i Aoaoga Faavae (2023). Ona valaaulia lea o ni volenitia se toatolu, tasi mo mataupu faavae taitasi, i le laupapa. Fai atu ia i latou e tusi i lalo o le ulutala talafeagai se fasifuaitau taua po o se manatu faavae mai parakalafa sa latou toe faamanatuina. O nei fasifuaitau po o manatu faavae o le a faaaogaina i se taimi mulimuli ane o le lesona.
Faitau le ata faataitai lenei ma mafaufau pe faapefea ona fesoasoani ia mataupu faavae o le mauaina o le malamalama faaleagaga:
Ua lagona e Chris le lē mautonu. O lona tuafafine matua, o le ua faaipoipo, na ta’u atu talu ai nei ia te ia ua ia tuua le Ekalesia ma ua le toe manao e avea ma se tagata o le ekalesia. O Chris e i ai isi tagata o le aiga ma uo o e sa malolosi muamua i le talalelei ae ua le toe auai soo i le lotu. O i latou o ni tagata lelei tele ma e foliga fiafia ma faamanuiaina i o latou olaga. Sa fuafua pea lava Chris e tumau le toaga i le Lotu, ae na amata ona ia mafaufau pe o le tumau pea o le toaga i le Ekalesia i lona olaga atoa o le a matua taua lava.
Valaaulia tagata aoga e fai ni vaega taitoatolu, pe a mafai, ma tagata aoga o e na iloiloina mataupu faavae eseese o le mauaina o le malamalama faaleagaga. Fai atu i vaega e talanoaina pe mafai faapefea e fasifuaitau po o manatu faavae taitasi o i le laupapa ona fesoasoani ia Chris.
E faavae i le taimi, e mafai ona e toe faia faafia le gaoioiga talu ai e ala i le valaaulia o isi volenitia e tusi ni fasifuaitau po o ni manatu faavae eseese i luga o le laupapa i lalo o mataupu faavae taitasi. Mo ni faiga eseese e faaopoopo i ai, i faagasologa taitasie mafai e tagata aoga ona faia ni vaega eseese taitoatolu e talanoaina ai fasifuaitau po o manatu faavae fou i luga o le laupapa.
Ina ia faaiu lenei gaoioiga, e mafai e tagata aoga ona toe faatulaga ni vaega fou mo se taimi se tasi e talanoaina ai mea nei:
-
O le fea fuaitau o le atamai i aoaoga faavae o le Mataupu Faavae ma Feagaiga e sili ona fesoasoani ia Chris e malamalama ai i mea ua ofoina mai e Iesu Keriso ia i latou o e tumau faamaoni i Lana Ekalesia?
-
O le fea fuaitau o le atamai i aoaoga faavae mai isi tusi o tusitusiga paia e mafai foi ona fesoasoani ia te ia?
A uma ua lava se taimi o tagata aoga e saili ma talanoaina i a latou vaega, valaaulia i latou e faasoa mai i le vasega po o a fuaitau na latou lagona o le a sili ona aoga ma pe aisea foi. Faamalosiau i le tele o vaega e faasoa mai. (O nisi fuaitau e ono filifili e tagata aoga e aofia ai le Mataupu Faavae ma Feagaiga 1:30; 84:20–22; Helamana 5:12; Iosua 24:15; Isaia 58:13–14; Luka 22:19–20; Efeso 2:19–20.)
E mafai ona e faaiuina le lesona i le fai atu i tagata aoga e tali mai i nisi po o fesili uma nei i a latou api talaaga mo suesuega:
Mai se vaaiga e faavavau, e finagalo le Tama Faalelagi ia ou tumau faamaoni ia Iesu Keriso ma toaga i Lana Ekalesia ona .
O se fuaitau o se mau e fesoasoani ou te manao ai e tumau faamaoni ia Iesu Keriso ma toaga i Lana Ekalesia o le .
O se tasi o mea e mafai ona ou faia e tumau faamaoni ai ia Iesu Keriso ma toaga ai i Lana Ekalesia i lo’u olaga atoa o le .