Lesona 95: Mataupu Faavae ma Feagaiga 84

Mataupu Faavae ma Feagaiga 84:33–44

O Le Tautoga ma le Feagaiga o le Perisitua

I le Mataupu Faavae ma Feagaiga 84:20, na faaali mai ai e le Faaola e faapea “i sauniga [o le perisitua], ua faaalia ai le mana o le faaleatua.” Ua avanoa lenei mana o le perisitua i tagata uma o le Ekalesia o e osia ma tausia feagaiga o le papatisoga ma le malumalu. I le Mataupu Faavae ma Feagaiga 84:33–44, na aoao mai ai e le Faaola se tautoga ma se feagaiga e pulea ai le faaaogaina o Lona mana o le perisitua. O lenei lesona e mafai ona fesoasoani i tagata aoga e faalolotoina lo latou malamalama i le tautoga ma le feagaiga o le perisitua.

Gaoioiga E Ono Mafai Ona Aoao Ai

Ua faamanuiaina e le Tama Faalelagi e tausi feagaiga i Lona mana

E mafai ona e amataina le vasega i le tusia o se auala i luga o le laupapa e faatusa i le ala o feagaiga. E mafai ona e faaigoaina le amataga o le auala “fanau mai” ma le iuga o le “ola e faavavau faatasi ma le Tama Faalelagi.” Valaaulia tagata aoga e o mai i le laupapa ma faaigoa feagaiga tatou te osia i luga o le ala e ala i sauniga e pei o le papatisoga, faamauga, faauuga i le perisitua mo alii, faaeega paia, ma faamauga.

Afai e manaomia e tagata aoga le malamalama o feagaiga o ni folafolaga e lua itu ma le Atua, mafaufau e talanoaina fesili e pei o fesili nei a o lei faasoaina atu le saunoaga lenei mai ia Peresitene Russell M. Nelson:

• O a nisi o folafolaga tatou te faia i le Tama Faalelagi pe a tatou taliaina le sauniga o le papatisoga? (Tagai Mosaea 18:8–10 ma le Mataupu Faavae ma Feagaiga 20:77–79.)

• O le a le mea ua folafola mai e le Tama Faalelagi ia i tatou pe a tatou taumafai e usitai i lenei feagaiga?

Suesue le saunoaga lenei mai ia Peresitene Russell M. Nelson, ma vaavaai mo se faamanuiaga e tuuina mai e le Tama Faalelagi ia i latou o e osia ma tausia feagaiga ma Ia.

O tagata taitoatasi e osia feagaiga i vai papatiso ma i totonu o malumalu—ma tausi i ai—ua ia faateleina le avanoa e maua ai le mana o Iesu Keriso. Faamolemole ia mafaufau loloto i lena upumoni ofoofogia!

O le taui mo le tausiga o feagaiga ma le Atua, o le mana faalelagi—mana e faamalosia ai i tatou e tetee atili atu ai i o tatou tofotofoga, faaosoosoga, ma lototiga. O lenei mana na te faafaigofieina o tatou ala. O i latou e ola i tulafono maualuluga atu a Iesu Keriso latou te mauaina Lona mana maualuga atu. (Russell M. Nelson, “Manumalo i le Lalolagi ma Maua le Malologa,” Liahona, Nov. 2022, 96)

• Aisea e manaomia ai faamanuiaga o le feagaiga lea na faamatalaina e Peresitene Nelson i lo tatou ala e toe foi atu ai i le Tama Faalelagi?

O le tautoga ma le feagaiga o le perisitua

I le Mataupu Faavae ma Feagaiga 84, na tuuina mai ai e Iesu Keriso “se faaaliga e uiga i le perisitua” ia Iosefa Samita (tagai i le faaulutala o le vaega). O se vaega o lenei faaaliga, sa Ia faamatalaina ai le “tautoga ma le feagaiga” (fuaiupu 39–40) o le perisitua. (O se tautoga o se folafolaga paia.)

I lau api talaaga mo suesuega, tusi ai le “Tautoga ma le Feagaiga o le Perisitua” i le pito i luga o se itulau. Fai ni koluma se lua i lalo o lenei ulutala. Faaigoa le tasi koluma “folafolaga a le Tama Faalelagi” ma le isi “O a tatou folafolaga.”

E mafai e tagata aoga ona faamaea taitoatasi le gaoioiga suesue o loo i lalo . Ona mafai lea ona latou faasoa atu i ni vaega toalaiti mea na latou mauaina.

I se isi itu, e mafai ona e tuuina tagata aoga i ni paga, ma se paga se tasi e vaavaai mo folafolaga a le Tama Faalelagi ma le isi e vaavaai mo a tatou folafolaga. Ona mafai lea ona latou fefaasoaai le tasi ma le isi ma tusifaamaumau mea latou te talanoaina i a latou api talaaga mo suesuega.

Faitau le Mataupu Faavae ma Feagaiga 84:33–44. Mafaufau e maka i se auala se tasi ia folafolaga ua valaaulia i tatou e le Tama Faalelagi e faia ma faailoga ese ia faamanuiaga ua Ia ofoina mai ia i latou o e tausia a latou feagaiga. Tusi mea e te maua i koluma talafeagai i lau api talaaga mo suesuega.

O se taimi sili lea e faataitai ai e tagata aoga le faailoaina o mataupu faavae. E mafai ona latou faailoa mai ni mataupu faavae eseese. E mafai ona e tuu atu ia i latou e faailoa mai mataupu faavae e faaaoga ai faamatalaga e amata i mea tatou te folafola atu e fai ma faaiu i mea ua folafola mai le Atua e fai. Mo se faataitaiga, atonu e maua e tagata aoga ia mataupu faavae nei:

• Afai tatou te faalauteleina o tatou valaauga ma tiutetauave i le Ekalesia, o le a faapaiaina i tatou e le Atua e ala i Lona Agaga ma faafou o tatou tino.

• Afai tatou te maua ma le faamaoni le Perisitua Arona ma le Perisitua Mekisateko ma maua auauna filifilia a le Atua, o le a faamanuiaina i tatou e le Tama Faalelagi i mea uma ua ia te Ia.

Tuu atu i tagata aoga se taimi e aoao ai ma le agaga tatalo e uiga i folafolaga e sili ona latou fiafia i ai e malamalama atili ai. E mafai e tagata aoga ona galulue i ni vaega toalaiti faatasi ma isi tagata aoga o e na filifili e suesue i folafolaga lava e tasi, pe e mafai foi ona latou suesue taitoatasi.

O le pepa e tufa atu o loo tuuina atu ai punaoa e suesue ai e mafai ona fesoasoani i tagata aoga ia malamalama atili ai i nisi o folafolaga i le tautoga ma le feagaiga o le perisitua. E mafai ona e tuuina atu i tagata aoga lenei pepa e tufa atu pe a manaomia.

Afai e fiafia tagata aoga e suesue se fasifuaitau e le o aofia ai i le pepa e tufa atu, valaaulia i latou e aoao mea uma latou te mafaia e ala i le suesueina o a latou autu filifilia po o autu i punaoa e pei o nei:

• Taiala Mo Autu

• Autu ma Fesili

• Taiala i Tusitusiga Paia

• ChurchofJesusChrist.org po o luga o le polokalama o le Gospel Library

• Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai

Faaloloto Lou Malamalama i le Tautoga ma le Feagaiga o le Perisitua

Faapaiaina e le Agaga i le faafouina o le tino (tagai fuaiupu 33)

I le saunoa ai e uiga i le folafolaga a le Tama Faalelagi, sa faamalamalama mai ai e Peresitene Henry B. Eyring o le Au Peresitene Sili:

Ua ou vaaia le faataunuuina o lena folafolaga i lo’u lava olaga faapea ma olaga o isi. Sa auauna se tasi o a’u uo o se peresitene o le misiona. Na ia tau mai ia te au faapea i le faaiuga o aso taitasi a o ia auauna atu sa toetoe a le mafai ona ia oo atu i le fogafale i luga i lona moega i le po ma mafaufau pe na te toe maua le malosi e feagai ai ma le isi aso. Ona oo lea i le taeao, sa ia iloaina le toefuataiina o lona malosi ma lona lototele. Ua e vaaia i olaga o perofeta matutua o e na foliga mai ua faafouina i taimi taitasi uma e tutulai atu ai e molimau atu i le Alii o Iesu Keriso ma le talalelei toefuataiina. O se folafolaga lenei mo i latou o e agai i luma ma le faatuatua i la latou auaunaga i le perisitua. (Peresitene Henry B. Eyring, “Faatuatua ma le Tautoga ma le Feagaiga o le Perisitua,” Liahona,Me 2008, 62)

Ia faamaoni i le mauaina o le Perisitua Arona ma le Perisitua Mekisateko (tagai fuaiupu 33)

Ina ia faamaoni i le mauaina o “nei perisitua e lua” (Mataupu Faavae ma Feagaiga 84:33) e aofia ai le mauaina o le mana ma faamanuiaga e maua mai le mauaina o sauniga o le Perisitua Arona ma le Mekisateko ma tausia faamaoni ia feagaiga e o faatasi ai. Na aoao mai e le Perofeta o Iosefa Samita e faapea e maua e se tagata le atoaga o le perisitua “e ala i le tausia o poloaiga uma ma le usitaia o sauniga uma o le maota o le Alii” (Aoaoga a Peresitene o le Ekalesia: Iosefa Samita [2007], 419).

Mo alii, o lenei foi mea e aofia ai le faaee atu o le perisitua i o latou luga ma faauuina i tofi o le perisitua.

Faalautele o tatou valaauga (fuaiupu 33)

Mataupu Faavae ma Feagaiga 58:27–28; 107:99–100

O avanoa e maua ai valaauga ma auai i le galuega a le Alii o le faaolataga

Na aoao mai Peresitene M. Russell Ballard o le Korama o Aposetolo e Toasefululua:

A o tatou galulue e faalautele o tatou valaauga, e tatau ona tatou sailia musumusuga a le Agaga e foia faafitauli i auala o le a sili ona fesoasoani ai i tagata tatou te auauna atu i ai. E i ai a tatou tusitaulima o faatonuga, ma e tatau ona mulimulitaia o latou taiala. Ae i totonu o lena auivi o loo i ai ni avanoa tetele e mafaufau ai, e fatufatu ai, ma faaaoga ai taleni taitasi. O le faatonuga e faalautele o tatou valaauga e le o se poloaiga e faamalosia ma faafaigata i latou. O le faalauiloa e le faapea o le faalauteleina; o le tele lava o taimi o lona uiga o le faafaigofie. (M. Russell Ballard, “Ia Faautauta Lava,” Liahona, Nov. 2006, 19)

O mea uma o i ai i le Tama Faalelagi (tagai i le fuaiupu 38 )

Mataupu Faavae ma Feagaiga 76:55–60; 81:6

Na faasoa mai Elder Ronald A. Rasband o le Korama a Aposetolo e Toasefululua:

Ina ia iloa o loo i ai so tatou Tama i le Lagi ma o Iesu Keriso o Lona Alo e Toatasi o lona uiga o loo tatou vaavaai mamao atu i le ala o feagaiga nai lo le mea tonu o loo tatou tutu ai i aso nei. O lona uiga tatou te talisapaia i tatou o suli i mea uma ua i ai i le Tama; o malo e le mafaitaulia o Lona malo ma e mafai ona avea ma o tatou malo. Sa folafola le Faaola, “Afai e te faamaoni e oo i le iuga o le a e maua se pale o le ola pea, ma le ola e faavavau i maota ua Ou saunia i le fale o loʼu Tamā.” (Ronald A. Rasband, “The Divine Destiny of His Daughters” [BYU Women’s Conference, Ape. 30, 2021], broadcasts.ChurchofJesusChrist.org)

A uma ua lava se taimi e suesue ai, valaaulia tagata aoga e faasoa atu i se paga po o se vaega toalaiti mea sa latou aoaoina. E mafai ona e faaaogaina fesili e pei o nei e fesoasoani e taiala ai le talanoaga:

• Aisea o le a taua ai lenei faamanuiaga ia te oe i le asō?

• O le a se mea o aoao atu e lenei faamanuiaga ia te oe e uiga i le Tama Faalelagi?

Faasoa atu se faataitaiga (mai tusitusiga paia po o lou olaga) o se tasi ua e vaai i ai o faaalia le tausia o le folafolaga na e filifilia.

Ina ia faaiu le vasega, e mafai ona e faasoa atu pe na faapefea ona faamanuiaina oe i le mana o le perisitua a o e taumafai e tausia ma le faamaoni feagaiga na e osia ma le Tama Faalelagi. Valaaulia tagata o le vasega e vaavaai mo avanoa e utuvai mai ai i le mana o le perisitua ua folafola mai e le Atua i Ana fanau o le feagaiga.

Punaoa Faaopoopo

E faapefea ona talafeagai le perisitua i fanau uma a le Atua?

Na aoao mai Peresitene Russell M. Nelson:

O tamaitai uma ma alii uma e osia ni feagaiga ma le Atua ma tausia na feagaiga, ma o e auai ma le agavaa i sauniga o le perisitua, e mauaina le avanoa tuusao i le mana o le Atua. O i latou ua maua faaeega paia i le maota o le Alii ua mauaina se meaalofa o le mana o le perisitua a le Atua e tusa ma le paia o a latou feagaiga, faatasi ma se meaalofa o le poto e iloa ai le auala e utuvai ai mai lena mana. (Russell M. Nelson, “O Oa Faaleagaga,” Liahona, Nov. 2019, 77)

Na faamatala mai e Sister Jean B. Bingham, o lē na avea ma Peresitene Aoao o le Aualofa i lena taimi:

E ui o le tautoga ma le feagaiga o le perisitua e pei ona maua i le Mataupu Faavae ma Feagaiga 84 o loo tautala sa’o atu i alii ua faauuina i le tofi o le perisitua, ae o le tele o folafolaga ma faamanuiaga ua tuuina atu iina e faatatau foi i tamaitai tausi feagaiga. …

E taua le malamalama o tamaitai o i tatou foi, o le a faamanuiaina e maua “mea uma ua i ai i lo [tatou] Tama” pe a tatou taliaina, pe uai atu i ai, o auauna a le Alii (Mataupu Faavae ma Feagaiga 84:38).

Ou te uunaia outou ia suesue ma aoao pe faapefea ona faamanuiaina oe ma i latou e te alofa i ai i le tautoga ma le feagaiga o le perisitua. O tamaitai uma e faia ma osia ni feagaiga ma le Atua, ma o e auai ma le agavaa i sauniga o le perisitua, e mauaina le avanoa tuusao i le mana o le Atua! (Jean B. Bingham, “O Le Tautoga ma le Feagaiga o le Perisitua e Talafeagai i Tamaitai,” Aualofa, ChurchofJesusChrist.org)

Mataupu Faavae ma Feagaiga 84:33. “O le a le uiga o le faalauteleina o lo tatou valaauga?

Na faasoa mai e Peresitene Thomas S. Monson (1927–2018) le faauigaga lenei:

Sa fesiligia le Perofeta o Iosefa Samita i se tasi taimi, “Uso Iosefa, ua masani ona e naunau ina ia tatou faalauteleina o tatou valaauga. O le a le uiga o lena mea?” Sa faapea lana tali, “O le faalauteleina o se valaauga o le tuuina lea i luga i le mamalu ma le taua, ina ia susulu atu le malamalama o le lagi e ala i le faatinoga a se tasi i le vaai atu i isi tagata.” (Thomas S. Monson, “O Lo Tatou Tiute Paia Faaleperisitua,” Liahona, Me 2006, 56)

Gaoioiga Faaopoopo e Aoao Ai

Faalautele ou valaauga

Mafaufau e faaali atu i tagata aoga se tioata faamatamatatetele po o se ata o se tasi e faaaoga pe uuina se tioata faamatamatatetele. Valaaulia le vasega e talanoaina pe mafai faapefea e se tioata faamatamatatetele ona fesoasoani ia tatou malamalama ai i le finagalo o le Faaola mo le auala tatou te auauna atu ai ia te Ia i valaauga ma tofiga. E mafai ona e ta’u i ai e faaopoopo atu i le faia o mea ia tetele atu ma manino atili, ae o se tioata faamatamatatetele e taulai atu foi i le malamalama.

Mafaufau e faasoa atu le saunoaga a Peresitene Thomas S. Monson i le “Punaoa Faaopoopo.”

Valaaulia tagata aoga e faitau le Mataupu Faavae ma Feagaiga 84:45–46, ma vaavaai mo mea na aoao ai tatou e le Faaola e uiga i Lona malamalama.

• E mafai faapefea ona tatou taulai atu le malamalama o le Faaola a o tatou auauna atu i le Ekalesia?

O le tautoga ma le feagaiga o le perisitua e talafeagai i tamaitai ma alii

Afai o le a manuia tagata aoga mai le malamalama sili atu e faapea, o le tautoga ma le feagaiga o le perisitua e talafeagai i tamaitai ma alii tausi-feagaiga, e mafai ona e faaalia le vitio “O Le Tautoga ma le Feagaiga o le Perisitua E Talafeagai i Tamaitai” (mai le faailotaimi 01:48 i le 03:31). O Sister Jean B. Bingham, a o avea ma Peresitene Aoao o le Aualofa, o loo talanoaina le tautoga ma le feagaiga o le perisitua faatasi ma Peresitene Russell M. Nelson.