“Lesson 91—Doktrina at mga Tipan 82:1-7: ‘Sa Kanya Na Siyang Binigyan Ng Marami Ay Marami Ang Hihingin,’” Manwal ng Titser ng Seminary para sa Doktrina at mga Tipan (2025)
“Doktrina at mga Tipan 82:1–7,” Manwal ng Titser ng Seminary para sa Doktrina at mga Tipan
Lesson 91: Doktrina at mga Tipan 81–83
Doktrina at mga Tipan 82:1–7
“Sa Kanya Na Siyang Binigyan Ng Marami Ay Marami Ang Hihingin”
Noong Abril 1832, si Propetang Joseph Smith at iba pa ay naglakbay patungong Independence, Missouri. Sinunod nila ang utos ng Panginoon na magtatag ng samahan upang maitayo ang Sion at pangalagaan ang mga maralita (tingnan sa Doktrina at mga Tipan 78). Matapos tumulong sa paglutas ng ilang pagtatalo sa mga miyembro, natanggap ng Propeta ang paghahayag na ito na naglalarawan sa mga inaasahan ng Panginoon sa Kanyang mga tao. Ang lesson na ito ay makatutulong sa mga estudyante na maunawaan kung paano sila pinagpala ng Panginoon at kung paano Niya inaasahang gamitin nila ang mga pagpapalang iyon.
Mga Posibleng Aktibidad sa Pag-aaral
Ang ibinigay sa inyo ng Panginoon
Upang ihanda ang mga estudyante para sa lesson na ito, maaari kayong kumanta ng isang himno tungkol sa mga pagpapalang ibinigay ng Panginoon. Ang isang halimbawa ay “Dahil Biyaya sa Akin ay Kayrami” (Mga Himno, blg. 133). Ang himno ay maaaring maging bahagi ng debosyonal.
Magpapunta ng tatlong estudyante sa harapan ng klase. Bigyan ang isang estudyante ng kopya ng Aklat ni Mormon, bigyan ang isa pang estudyante ng isang sobre na may nakasulat na malaking halaga ng pera sa labas (halimbawa, $1,000,000), at bigyan ang isa pang estudyante ng ilang piraso ng kendi.
-
Batay sa ibinigay sa kanila, ano ang inaasahan mo na gagawin ng mga estudyanteng ito?
Maaari mong anyayahan ang mga estudyante sa harap ng klase na magbahagi ng isa o dalawang ideya hinggil sa kung paano nila mapagpapala ang iba sa pamamagitan ng ibinigay sa kanila.
Ipaliwanag na hindi magiging pareho ang mga inaasahan natin sa isang taong iba ang mga natanggap.
Bilang mga anak ng Ama sa Langit at bilang mga miyembro ng Kanyang Simbahan, kayraming biyaya ang ibinigay sa atin. Sabihin sa mga estudyante na maglaan ng ilang minuto na ilista ang mga pagpapalang kanilang natanggap mula sa Panginoon. Maaaring makatulong ang paggawa ng ilang kategorya na pag-iisipan ng mga estudyante habang ginagawa nila ang kanilang listahan (halimbawa, mga pagpapala ng pagiging miyembro ng Simbahan, mga espirituwal na karanasan nila, mga taong pinagpapala ang kanilang buhay, mga ari-arian at oportunidad sa mundo, at iba pa).
Ipakita ang mga sumusunod na tanong para pag-isipan ng mga estudyante.
Pag-isipan ang mga sumusunod na tanong:
-
Paano nakaapekto sa iyo ang mga pagpapalang ito?
-
Ano ang maituturo ng mga ito sa iyo tungkol sa Panginoon?
-
Paano naiiba ang inaasahan sa iyo ng Panginoon sa isang taong hindi nakatanggap ng mga pagpapalang ito?
Sa pag-aaral mo ng lesson na ito, maghanap ng mga karagdagang kaalaman tungkol sa mga tanong na ito.
Doktrina at mga Tipan 82
Maaari mong ibuod ang sumusunod na impormasyon:
Ang mga Banal sa panahong ito ay nakatanggap ng malalaking pagpapala mula sa Panginoon. Kabilang sa mga pagpapalang ito ang ipinanumbalik na Simbahan, ang Aklat ni Mormon, at isang buhay na propeta na naghahayag ng mga salita ng Panginoon. Gayunpaman, nahihirapan pa rin silang mamuhay ayon sa ninanais ng Panginoon. Ang mga sumusunod ay ilang halimbawa:
-
Sa loob ng ilang buwan, nagkasamaan ng loob si Sidney Rigdon na nasa Ohio at si Bishop Edward Partridge na nasa Missouri. Nagkasundo sila kalaunan.
-
Pinulaan ng ilang miyembro ng Simbahan sa Missouri si Joseph Smith.
-
Nang lumipat sa Missouri ang mga miyembro ng Simbahan, marami sa kanila ang hindi sumunod sa payo at mga kautusan ng Panginoon, kabilang na ang pagsunod sa batas ng paglalaan.
Si Propetang Joseph Smith at iba pang lider ng Simbahan ay naglakbay patungong Missouri at nagdaos ng kapulungan ng matataas na saserdote o high priest ng Simbahan. Ang paghahayag sa Doktrina at mga Tipan 82 ay natanggap sa sesyon sa hapon.
Basahin ang Doktrina at mga Tipan 82:1–7, at alamin kung ano ang inaasahan ng Panginoon sa mga Banal dahil napakarami nilang pagpapala.
-
Ano ang inyong natutuhan mula sa mga talatang ito?
Maaaring magbahagi ang mga estudyante ng iba’t ibang katotohanan. Itanong sa kanila kung bakit mahalagang maunawaan ang mga katotohanang ibinahagi nila.
Maaaring ibahagi o hindi ibahagi ng mga estudyante ang alituntuning marami ang hihingin ng Panginoon sa mga yaong binigyan Niya ng marami. Kung hindi ito naibahagi ng mga estudyante, anyayahan silang ibahagi ang kanilang natutuhan mula sa talata 3.
Kung magtatanong ang mga estudyante tungkol sa mababalik ang mga dating kasalanan (tingnan sa talata 7), tulungan silang maunawaan na kung patuloy nating gagawin ang ganoon ding kasalanan, kailangan nating ipagpatuloy ang ating pagsisisi. Maaari tayong matiyagang magtiwala sa Tagapagligtas at patuloy na magsumikap upang maging mabuti, batid na tutulungan Niya tayo. (Tingnan sa Neil L. Andersen, “Magsisi … Upang Mapagaling Ko Kayo,” Liahona, Nob. 2009, 40).
-
Sa inyong palagay, bakit may mga ganitong inaasahan ang Panginoon?
-
Bakit mahalaga para sa atin na maunawaan ang mga ito?
Para sa mga karagdagang kaalaman, basahin ang sumusunod na pahayag ni Elder D. Todd Christofferson ng Korum ng Labindalawang Apostol:
Ang ating Ama sa Langit ay isang Diyos na mataas ang inaasahan sa atin. …
… Layunin ng Diyos na tayo, na Kanyang mga anak, ay maranasan ang sukdulang kagalakan, makasama Siya nang walang hanggan, at maging tulad Niya. …
Kung taos-pusong hinahangad at sinisikap nating abutin ang mataas na inaasahan ng ating Ama sa Langit, titiyakin Niyang matatanggap natin ang lahat ng tulong na kailangan natin, ito man ay nagpapanatag, nagpapalakas, o nagtutuwid. (D. Todd Christofferson, “Ang Lahat Kong Iniibig, ay Aking Sinasaway at Pinarurusahan,” Liahona, Mayo 2011, 97, 99)
-
Bakit makatutulong ding alalahanin ang pagiging maunawain at mahabagin ng Panginoon? (tingnan sa talata 1, 7).
Pag-alaala sa kung ano ang ibinigay ng Diyos sa atin
Ang sumusunod ay isang paraan upang matulungan ang mga estudyante na maunawaan kung bakit marami ang inaasahan ng Diyos sa mga taong “binigyan ng marami” (Doktrina at mga Tipan 82:3). Maaaring gawin ng mga estudyante ang aktibidad sa maliliit na grupo o nang mag-isa.
Mga Pagpapala mula sa Panginoon
Pumili ng dalawa sa mga sumusunod na pagpapala, o pumili ng iba pang pagpapala na hindi nakalista.
-
Mga banal na kasulatan
-
Mga buhay na propeta
-
Kapatawaran ng mga kasalanan
-
Ang kaloob na Espiritu Santo
-
Kaalaman tungkol kay Jesucristo at sa Kanyang Pagbabayad-sala para sa atin
-
Mga templo
Sa loob ng ilang minuto, pag-aralan ang mga pagpapalang iyong pinili. Gamitin ang mga banal na kasulatan, mga mensahe sa pangkalahatang kumperensya, at ibang resources ng Simbahan gaya ng Para sa Lakas ng mga Kabataan: Isang Gabay sa Paggawa ng mga Pagpili (2022). Hanapin ang:
-
Mga paraan kung paano pinabubuti ng Panginoon ang ating buhay sa pamamagitan ng mga pagpapalang ito.
-
Inaasahan ng Panginoon sa mga taong binigyan ng mga pagpapalang ito.
Magdagdag ng alinman sa sariling saloobin o ideya mo mula sa mga personal na karanasan. Maaari mong isama kung paano makatutulong o magiging isang halimbawa ang mga taong may mga ganitong pagpapala sa mga taong hindi pa nakatatanggap ng mga ganitong karanasan at kaalaman.
Sabihin sa mga estudyante na ibahagi ang kanilang natutuhan. Ang isang paraan upang gawin ito ay sabihin sa isang boluntaryo na magbahagi, at pagkatapos ay magtawag ng iba pang estudyante na sa kanyang palagay ay naging malaking pagpapala sa klase. Pagkatapos ay itanong sa estudyante na tinawag kung handa siyang ibahagi ang kanyang natutuhan. Tiyaking alam niya na hindi siya obligadong magbahagi. Ulitin ang aktibidad na ito nang ilang beses.
Kung makatutulong ang pagpapakita ng halimbawa ng isang taong isinabuhay ang alituntuning ito, ipanood ang “Treasures in Heaven: The John Tanner Story” mula sa time code na 8:21 hanggang 12:24. Ipaliwanag na si John Tanner ay isang lalaking pinagpala ng Panginoon ng maraming kayamanan bago siya nagbalik-loob sa ebanghelyo. Sabihin sa mga estudyante na alamin kung paano ginamit ni John ang kanyang kayamanan.
Treasure in Heaven: The John Tanner Story
John Tanner freely gave all he had, giving us an example of generosity and consecration in serving the Lord.
Mga inaasahan at pagmamahal ng Diyos
Habang sinasagot ng mga estudyante ang mga sumusunod na tanong, suriin kung gaano nila nauunawaan ang alituntuning tinalakay sa lesson na ito. Maghanap ng mga paraan upang mabigyang-diin ang pagmamahal ng Panginoon at kung paano natin mas mapagpapala ang Kanyang mga anak kapag namuhay tayo ayon sa ibinigay Niya sa atin.
Gabayan ang mga mag-aaral para makilala ang impluwensya ng Panginoon sa kanilang buhay: Para sa karagdagang training kung paano ito gawin, tingnan ang training na may pamagat na “Tulungan ang mga mag-aaral na madama ang pagmamahal, kapangyarihan, at awa ng Panginoon sa kanilang buhay” na matatagpuan sa Mga Kasanayan para sa Pag-unlad ng Guro: Magtuon kay Jesucristo. Maaari mong praktisin ang kasanayan. Maaari kang magtanong sa mga estudyante ng mga bagay na nakatuon sa pag-uugnay ng pagmamahal, kapangyarihan, at awa ng Panginoon sa kanilang buhay.
-
Bakit ninyo ipinagpapasalamat ang mga inaasahan ng Panginoon?
-
Paano naipapakita ng mga inaasahan ng Panginoon ang Kanyang pagmamahal?
Sabihin sa mga estudyante na tingnan ang listahan nila ng mga pagpapalang ibinigay sa kanila ng Panginoon. Maaari silang magdagdag ng anumang karagdagang pagpapala na naisip nila sa buong lesson. Sabihin sa kanila na isulat kung ano ang gusto nilang alalahanin o gawin dahil sa ibinigay sa kanila ng Panginoon.