Դաս 92. Վարդապետություն և Ուխտեր 81–83

Վարդապետություն և Ուխտեր 82․8–24

«Ես՝ Տերս, կապված եմ, երբ դուք անում եք այն, ինչ ես ասում եմ»

Միացյալ Միաբանության անդամներին Փրկիչը հրավիրեց կապել իրենց ուխտով՝ Իր Եկեղեցու գործերը կառավարելու համար: Նա տվեց նրանց պատվիրաններ և խոստացավ օրհնել, եթե նրանք հնազանդվեն պատվիրաններին: Երբ մենք ուխտ ենք կապում՝ հնազանդվել Հիսուս Քրիստոսի պատվիրաններին, Նա խոստանում է օրհնել մեզ: Այս դասը կօգնի ուսանողներին հասկանալ, թե ինչպես պահել այն ուխտերը, որոնք կապում ենք Երկնային Հոր և Հիսուս Քրիստոսի հետ:

Հնարավոր ուսումնական վարժություններ

Ուխտով կապված Տիրոջ հետ

Հետևյալ առարկայական դասը կարող է օգնել ուսանողներին խորհել Երկնային Հոր և Հիսուս Քրիստոսի հետ իրենց հարաբերությունների մասին: Ուսանողներին ցուցադրեք երկու մագնիս: Ուսանողներից մեկը կարող է ցուցադրել, թե ինչպես են մագնիսները ձգում կամ վանում միմյանց, երբ դրանք մոտեցնում ենք իրար: Խնդրեք ուսանողներին պատկերացնել, որ մագնիսներից մեկը խորհրդանշում է Հիսուս Քրիստոսին, իսկ մյուսը՝ իրենց:

• Այս մագնիսների միջոցով ի՞նչ կարող ենք սովորել Երկնային Հոր և Հիսուս Քրիստոսի հետ մեր հարաբերությունների մասին:

Առաջարկեք ուսանողներին խորհել իրենց հարաբերությունների մասին Երկնային Հոր և Հիսուս Քրիստոսի հետ։ Երբ ուսանողներն ուսումնասիրեն Վարդապետություն և Ուխտեր 82 բաժինը, խրախուսեք նրանց փնտրել անձնական հայտնություն այն մասին, թե ինչպես կարող են ամրացնել իրենց հարաբերությունները Երկնային Հոր և Հիսուս Քրիստոսի հետ:

«Ես՝ Տերս, կապված եմ, երբ դուք անում եք այն, ինչ ես ասում եմ»

Վարդապետություն և Ուխտեր 82 բաժնում Տերը կրկնեց ավելի վաղ հայտնության մեջ տրված հրահանգները (տես Վարդապետություն և Ուխտեր 78)։ Հրահանգները տրվել էին, որպեսզի ստեղծվեր Միացյալ Միաբանություն՝ Եկեղեցու աշխարհիկ գործերը ղեկավարելու և Սիոնը կառուցելու համար:

Վարդապետություն և Ուխտեր 82․10 հատվածը վարդապետության սերտման հատված է: Առաջարկեք ուսանողներին նշել վարդապետության սերտման հատվածները տարբերակիչ եղանակով, որպեսզի կարողանան հեշտությամբ գտնել դրանք:

Կարդացեք Վարդապետություն և Ուխտեր 82․8–10 հատվածները և փնտրեք, թե ինչ է ուսուցանել Տերն Իր պատվիրանների մասին:

• Ո՞րն է մեզ պատվիրաններ տալու Փրկչի պատճառը:

• Ի՞նչ է խոստանում Փրկիչը, եթե մենք պահենք Իր պատվիրանները:

Ուսանողներին առաջարկեք վերաձևակերպել այս հատվածներից մի ճշմարտություն իրենց բառերով: Նրանք կարող են նաև գրել այն իրենց օրագրում կամ գրատախտակին: Ուսանողները կարող են նշել նմանատիպ ճշմարտություններ. Երբ մենք հնազանդվում ենք Տիրոջ պատվիրաններին, Նա խոստանում է օրհնել մեզ:

Ի՞նչ են ուսուցանում ձեզ այս հատվածները Երկնային Հոր և Նրա Որդի Հիսուս Քրիստոսի էության և բնույթի մասին:

Որպեսզի օգնեք ուսանողներին հասկանալ, թե երբ են իրենք տեսել այս ճշմարտության կատարումը, կարող եք կատարել հետևյալ վարժությունը.

Դասարանը բաժանեք փոքր խմբերի։ Յուրաքանչյուր խմբի խնդրեք գտնել օրինակներ, երբ Փրկիչն օրհնում է մարդկանց՝ Իր պատվիրաններին հնազանդվելու համար: Ուսանողները կարող են նշել օրինակներ սուրբ գրություններից, իրենց կյանքից կամ իրենց ծանոթ մարդկանց կյանքից: Բավարար ժամանակ հատկացնելուց հետո խմբերին առաջարկեք հերթով կիսվել օրինակներով: Քննարկեք, թե այս օրինակներից ինչ կարող ենք իմանալ Իր խոստումները պահելու Փրկչի պատրաստակամության մասին:

Ուխտով կապված

Կարող եք օգնել ուսանողներին տեսնել, թե ինչպես է հատված 1-ը ուսուցանում Երկնային Հոր և Հիսուս Քրիստոսի հետ մեր ուխտյալ հարաբերությունների մասին: Ուխտերի միջոցով մենք խոստումներ ենք տալիս Երկնային Հորը և Հիսուս Քրիստոսին, իսկ Նրանք խոստումներ են տալիս մեզ:

• Ձեր կարծիքով, հատված 10-ը ի՞նչ է ուսուցանում այն ուխտերի մասին, որոնք մենք կապում ենք Երկնային Հոր և Հիսուս Քրիստոսի հետ:

Կարդացեք նախագահ Ռասսել Մ. Նելսոնի հետևյալ խոսքերը՝ փնտրելով, թե նա ինչ է ուսուցանել ուխտերի մասին:

Երբ մենք ուխտ ենք կապում Աստծո հետ, ընդմիշտ հեռանում ենք չեզոք գոտուց։ Աստված չի խզի Իր հարաբերությունները նրանց հետ, ովքեր նման կապ են հաստատել Իր հետ: Իրականում բոլորը, ովքեր ուխտ են կապել Աստծո հետ, ունեն հատուկ սեր և ողորմություն: …

Երբ ես և դուք ուխտ ենք կապում Աստծո հետ, Նրա հետ մեր հարաբերությունները շատ ավելի սերտ են դառնում, քան մինչ մեր ուխտն էին: Մենք դառնում ենք կապված միմյանց հետ։ Աստծո հետ ունեցած մեր ուխտի շնորհիվ Նա չի դադարի օգնել մեզ, և մենք երբեք չենք սպառի Նրա ողորմած համբերատարությունը մեր հանդեպ։ Յուրաքանչյուրս հատուկ տեղ ունենք Աստծո սրտում։ Նա մեզ հետ կապված վեհ նպատակներ ունի։ (Ռասսել Մ. Նելսոն, «Հավիտենական ուխտը», Լիահոնա, հոկտեմբեր 2022, 5–6)։

• Ձեր կարծիքով, ի՞նչն է կարևոր հիշել այս խոսքերից։

Ուխտերը պահելը օրհնություններ է բերում

Միացյալ Միաբանության ղեկավարներին տրված Տիրոջ հրահանգում Նա խորհուրդ տվեց Ջոզեֆ Սմիթին, Օլիվեր Քաուդերիին, Էդվարդ Պատրիջին և մյուսներին «միմյանց կապվել կապով և ուխտով» (Վարդապետություն և Ուխտեր 82.11)՝ Եկեղեցու աշխարհիկ գործերը ղեկավարելու համար։ Որպես Աստծո ուխտյալ զավակներ՝ մենք նաև որոշակի բաներ անելու ուխտ ենք կապում՝ հետևելով Հիսուս Քրիստոսին:

Կարող եք դասարանը բաժանել երկու խմբի և յուրաքանչյուր խմբի առաջարկել կազմել հետևյալ ցուցակներից մեկը։ Ուսանողները կարող են նաև իրենց ցուցակները գրել գրատախտակին:

Կարդացեք Վարդապետություն և Ուխտեր 82․12–19 հատվածները և կազմեք ցուցակ, թե ինչի վերաբերյալ Տերը խնդրեց, որ ուխտ կապեն Միացյալ Միաբանության անդամները։

Կարդացեք Մոսիա 18.8–10 և Վարդապետություն և Ուխտեր 20.77 հատվածները և կազմեք ցուցակ, թե ինչի վերաբերյալ է Տերը խնդրում, որ մենք ուխտ կապենք այսօր:

• Այս ցուցակներում ի՞նչն է առանձնահատուկ ձեզ համար:

• Ինչո՞վ են նման ուխտի այս պարտականությունները:

• Ձեր կարծիքով, մեր ուխտերը պահելն ինչպե՞ս կարող է օգնել մեզ նմանվել Փրկչին:

Կարդացեք Վարդապետություն և Ուխտեր 82․24 հատվածը՝ փնտրելով, թե ինչ է խոստացել Տերը նրանց, ովքեր պահում են իրենց ուխտը Իր հետ։

Կարող եք ցուցադրել իրար միացված մագնիսները: Առաջարկեք ուսանողներին կիսվել, թե ինչ սովորեցին այս դասից Հիսուս Քրիստոսի հետ իրենց հարաբերությունների մասին: Դուք կարող եք նաև կիսվել ձեր զգացմունքներով այն օրհնությունների վերաբերյալ, որոնք ստացել եք Երկնային Հոր և Հիսուս Քրիստոսի հետ ուխտեր կապելու և պահելու արդյունքում:

Մտապահեք վարդապետության սերտման հատվածը

Այս դասի ընթացքում դուք կարող եք օգնել ուսանողներին մտապահել Վարդապետություն և Ուխտեր 82.10 հատվածը և սուրբգրային հիմնական արտահայտությունը․ «Ես՝ Տերս, կապված եմ, երբ դուք անում եք այն, ինչ ես ասում եմ»: Այնուհետև կարող եք կրկնել այն հետագա դասերի ընթացքում: Մտապահելու համար նախատեսված վարժությունների վերաբերյալ գաղափարները ներկայացված են հավելվածի նյութերում՝ «Վարդապետության սերտման կրկնության վարժություններ» բաժնում:

Լրացուցիչ նյութեր

Ուխտերը պահելը ինչպե՞ս կարող է փոխել Երկնային Հոր և Հիսուս Քրիստոսի հետ իմ հարաբերությունը։

Նախագահ Ռասսել Մ. Նելսոնը բացատրել է․

Երբ ես և դուք նույնպես կանգնում ենք ուխտի ճանապարհի վրա, մենք նոր ապրելակերպ ենք սկսում։ Այդպիսով, մենք հարաբերություններ ենք ստեղծում Աստծո հետ՝ թույլ տալով Նրան օրհնել և փոխել մեզ: Ուխտի ճանապարհը տանում է մեզ հետ՝ Նրա մոտ։ Եթե մենք թույլ տանք, որ Աստված տնօրինի մեր կյանքում, այդ ուխտը մեզ ավելի ու ավելի կմոտեցնի Նրան: Բոլոր ուխտերը նախատեսված են, որ կապող լինեն։ Դրանք հավերժորեն կապված հարաբերություններ են ստեղծում։ …

Աստծո հետ ուխտ կապելը հավիտյան փոխում է մեր հարաբերությունները Նրա հետ: Այն օրհնում է մեզ սիրո և ողորմության լրացուցիչ չափաբաժնով: Այն ազդում է այն բանի վրա, թե ով ենք մենք, և ինչպես Աստված կօգնի մեզ դառնալ այն, ինչ մենք կարող ենք դառնալ (Ռասսել Մ. Նելսոն «Հավիտենական ուխտը», Լիահոնա, հոկտ. 2022, 5, 10):

Իսկ եթե մենք չտեսնե՞նք պատվիրաններին հնազանդվելու և ուխտերը պահելու օրհնությունները:

Տասներկու Առաքյալների Քվորումից երեց Դ. Թոդ Քրիստոֆերսոնն ուսուցանել է.

Մեր հարաբերությունը Աստծո հետ

Աստված իսկապես կպատվի մեզանից յուրաքանչյուրին տված Իր ուխտերն ու խոստումները: Մենք չպետք է անհանգստանանք դրա մասին [Վարդապետություն և Ուխտեր 82.10]: Հիսուս Քրիստոսի քավիչ զորությունը, ով իջավ բոլոր բաներից ներքև, իսկ հետո բարձրացավ վեր [Վարդապետություն և Ուխտեր 88․6], ով ունի ողջ զորությունը երկնքում և երկրի վրա [Մատթեոս 28․18], երաշխավորում է, որ Աստված կարող է և կիրականացնի Իր խոստումները: Կարևոր է, որ մենք հարգենք և հնազանդվենք Նրա օրենքներին, բայց հնազանդվելու վրա հիմնված ոչ ամեն օրհնություն է, որ [Վարդապետություն և Ուխտեր 130.20–21] ձևավորվում է, նախագծվում և ժամկետավորվում՝ ըստ մեր ակնկալիքների: Մենք պետք է անենք հնարավոր ամեն բան, բայց պետք է Նրան թողնենք օրհնությունների կառավարումը: (Դ. Թոդ Քրիստոֆերսոն, «Մեր հարաբերությունը Աստծո հետ», Լիահոնա, նոյեմբեր 2022, 78)

Նախագահ Ռասսել Մ. Նելսոնը խորհուրդ է տվել․

Հոգևոր ճշմարտությունը չի կարող անտեսվել, հատկապես՝ աստվածային պատվիրանները: Աստվածային պատվիրանները պահելու արդյունքում օրհնություններ են գալիս՝ ամեն անգամ: Աստվածային պատվիրանները խախտելու արդյունքում օրհնություններ են կորսվում՝ ամեն անգամ (Ռասսել Մ. Նելսոն, «Ցույց տվեք ձեր հավատքը», Լիահոնա, մայիս 2014, 30)

Ի՞նչ լրացուցիչ օրհնություններ են կապված ուխտերը պահելու հետ:

Տասներկու Առաքյալների Քվորումից երեց Դեյվիդ Ա. Բեդնարն ուսուցանել է․

Մենք ապահով կերպով կապվում ենք Փրկչի հետ, երբ հավատարմորեն հիշում ենք և լավագույնս ջանում ենք ապրել մեր ընդունած պարտավորությունների համաձայն: Եվ այդ կապը Նրա հետ հոգևոր ուժի աղբյուրն է մեր կյանքի բոլոր ժամանակներում: …

… Ես վկայում եմ, որ այսօր Տիրոջ ուխտյալ ժողովուրդն իսկապես զինված է արդարությամբ և Աստծո զորության մեծ փառքով։ Ես ականատես եմ եղել հավատքի, քաջության, ապագայի հանդեպ հեռանկարի, համառության և ուրախության, որոնք վեր են մահկանացու կարողություններից, և որոնք միայն Աստված կարող էր տալ: (Դեյվիդ Ա. Բեդնար, «Աստծո զորության մեծ փառքով», Լիահոնա, նոյեմբեր 2021, 29–30)

Սփոփող Միության նախկին գերագույն նախագահ քույր Ջին Բ. Բինգհեմը նկատել է․

Covenants with God Strengthen, Protect, and Prepare Us for Eternal Glory

Նրանք, ովքեր մկրտվել են, այդ երբեք չմոռացվող օրը ուխտել են իրենց վրա վերցնել Հիսուս Քրիստոսի անունը, միշտ հիշել Նրան, պահել Նրա պատվիրանները և ծառայել Նրան մինչև վերջ: Երբ մենք կատարում ենք այդ քայլերը, Երկնային Հայրը խոստանում է ներել մեր մեղքերը և հաստատման արարողության միջոցով մեզ տալ Սուրբ Հոգու ընկերակցությունը: Այդ օրհնությունները մեկնարկն են այն ճանապարհի, որը մեզ թույլ կտա Նրա և Նրա Որդի Հիսուս Քրիստոսի հետ ապրել սելեստիալ արքայությունում, եթե շարունակենք առաջ գնալ և համբերել մինչև վերջ: Յուրաքանչյուր մկրտված մարդ ունի այս օրհնությունների և արտոնությունների խոստումը, եթե նա պահի այն ուխտը, որը կապել է այդ հատուկ օրը:

Նրանք, ովքեր լրացուցիչ ուխտեր են կապում տաճարում, ստանում են հզոր խոստումներ՝ պայմանավորված անձնական հավատարմությամբ: Մենք հանդիսավոր խոստանում ենք հնազանդվել Աստծո պատվիրաններին, ապրել Հիսուս Քրիստոսի ավետարանով, լինել բարոյապես մաքուր և մեր ժամանակն ու տաղանդները նվիրել Տիրոջ ծառայությանը: Փոխարենը, Աստված խոստանում է հրաշալի օրհնություններ այս կյանքում և Իր մոտ վերադառնալու հնարավորություն։ Այդ գործընթացում մենք օժտված ենք կամ մեզ տրված է իշխանություն՝ տարբերել ճշմարիտն ու սուտը, ճիշտն ու սխալը շփոթեցնող և բացասական ձայների բազմության մեջ, որոնք ամեն կողմից ռմբակոծում են մեզ: Ինչպիսի հզոր պարգև: (Ջին Բ. Բինգհեմ, «Աստծո հետ կապած ուխտերը զորացնում, պաշտպանում և պատրաստում են մեզ հավերժական փառքի համար», Լիահոնա, մայիս 2022, 66)

Օժանդակ ուսումնական վարժություններ

Վարդապետություն և Ուխտեր 82․8–9։ «Այն կարող է դառնալ ձեզ՝ ձեր փրկության համար»

Օգտագործելով Վարդապետություն և Ուխտեր 82.8–9 հատվածները՝ առաջարկեք ուսանողներին գրել այն պատվիրանները, որոնք Տերը խնդրում է իրենց պահել այսօր: Կարող եք հարցնել ուսանողներին, թե ինչ է նշանակում «այն կարող է դառնալ ձեզ՝ ձեր փրկության համար» արտահայտությունը։ Այնուհետև քննարկեք, թե իրենց ցանկի յուրաքանչյուր պատվիրանին հնազանդվելն ինչպես կարող է նպաստել իրենց փրկությանը:

Ուխտերը պահելն օգնում է հաստատել Սիոնը

Վարդապետություն և Ուխտեր 82.12–19 հատվածները ուսումնասիրելու այլընտրանքային եղանակ է Սիոնի հիմնադրման վրա կենտրոնանալը: Վարդապետություն և Ուխտեր 82.14 հատվածում ասվում է, որ Սիոնը պետք է առաջանա, զորանա և աճի գեղեցկությամբ և սրբությամբ: Միացյալ Միաբանությունը ստեղծվել էր Սիոնի հիմնադրմանն օգնելու և աղքատներին օգտակար լինելու համար (տես Վարդապետություն և Ուխտեր 78 վերնագրով բաժինը):

Առաջարկեք ուսանողներին կարդալ Մովսես 7․18 հատվածը՝ ուշադրություն դարձնելով, թե ինչպես է Տերը սահմանում Սիոնը: Այնուհետև առաջարկեք նրանց կարդալ Վարդապետություն և Ուխտեր 82․12–19 հատվածները՝ բացահայտելով, թե Տերը ինչ եղանակներով խնդրեց վաղ շրջանի Սրբերին պահել իրենց ուխտերը, որպեսզի օգնեն կառուցել Սիոնը:

Կարող եք գրատախտակին գրել Սիոն բառը։ Առաջարկեք ուսանողներին ավելացնել արտահայտություններ և նկարներ, որոնք ներկայացնում են այն եղանակները, որոնցով մենք կարող ենք հետևել այդ հրահանգներին մեր օրերում: Երբ նրանք մի քանի նկար կամ արտահայտություն ավելացնեն գրատախտակին, քննարկեք, թե այս գործողություններն ինչպես կարող են մեզ կապել Փրկչի և միմյանց հետ՝ Սիոնը ստեղծելու համար: Դուք կարող եք հաշվի առնել այն օրհնությունները, որոնք առնչվում են ուխտի միջոցով Փրկչի հետ կապված լինելուն: