Դաս 93. Վարդապետություն և Ուխտեր 81–83

Գնահատեք ձեր գիտելիքները 6

Վարդապետություն և Ուխտեր 76–83

Մեր աճը և հոգևոր զարգացումը ճանաչելու համար ժամանակ տրամադրելը կարող է ամրացնել մեր հարաբերությունները Երկնային Հոր և Հիսուս Քրիստոսի հետ և մղել մեզ մնալ ուխտի ուղու վրա: Այս դասը կօգնի ուսանողներին գնահատել իրենց հոգևոր աճը՝ մինչ այժմ Վարդապետություն և Ուխտեր գրքի իրենց ուսումնասիրության արդյունքում:

Հնարավոր ուսումնական վարժություններ

Այս դասը նախատեսված է օգնելու ուսանողներին գնահատել Վարդապետություն և Ուխտեր սուրբ գրության ուսմունքները բացատրելու իրենց կարողությունը, իրենց դրած նպատակները և ինչպես են փոխվում իրենց վերաբերմունքը, ցանկությունները և ավետարանով ապրելու կարողությունը: Դասարանով Վարդապետություն և Ուխտեր 76–83 բաժիններն ուսումնասիրելու արդյունքում գուցե ուշադրությունը կենտրոնացվել է ոչ այն ճշմարտությունների վրա, որոնք ընդգծված են դասում։ Եթե այդպես է, կարող եք հարմարեցնել վարժությունները՝ ներառելով ձեր ուսանողներին ավելի ծանոթ ճշմարտություններ։

Գնահատեք աճն ու առաջընթացը

Հնարավորության դեպքում սկսեք դասը՝ ցուցադրելով քայլարշավի գնացող, հեծանիվ վարող և վազող մարդկանց պատկերներ: Խնդրեք ուսանողներին ձեռք բարձրացնել, եթե զբաղվել են այս մարզատեսակներից մեկով կամ մի քանիսով։ Այնուհետև, խնդրեք ուսանողներին ձեռքերը բարձր պահել, եթե իրենք երբևէ մասնակցել են շատ երկար կամ դժվարին վազքարշավի, քայլարշավի կամ հեծանվարշավի: Ձեռք բարձրացրած մի քանի ուսանողի առաջարկեք նկարագրել իրենց փորձառությունը: Կարող եք քննարկել նմանատիպ հարցեր.

• Ի՞նչ կարող եք անել՝ ճամփորդությունը վայելելու համար:

• Ինչպե՞ս կարող ենք այդպիսի ճամփորդությունը համեմատել Հիսուս Քրիստոսին ավելի նմանվելու գործընթացի հետ:

• Ի՞նչ եղանակներով կարող ենք ավելի շատ վայելել և գնահատել հոգևոր աճի գործընթացը:

  Առաջարեք ուսանողներին խորհել այն մասին, թե ինչ են սովորել Վարդապետություն և Ուխտեր սուրբ գրությունից, ինչպես են գործել ըստ դրա, ինչպես նաև խորհել իրենց հոգևոր ճամփորդությունների մասին: Նրանք կարող են խորհել, թե ինչպես է վերջերս Փրկիչն օգնել իրենց առաջընթաց ունենալ։

• Ինչպե՞ս եք զգում, որ առաջադիմում եք և մոտենում եք Տիրոջը:

• Տերն ինչպե՞ս է օգնում ձեզ:

Հետևյալ վարժությունները նախատեսված են օգնելու ուսանողներին ավելի հստակ ճանաչել, արժևորել և գնահատել առաջընթացն ու աճը:

Փառքի երեք աստիճանների բացատրությունը

Կարող եք օգտագործել նմանատիպ մի սցենար, որպեսզի օգնեք ուսանողներին վերանայել և գնահատել Երկնային Հոր ծրագրի փառքի երեք աստիճանների իրենց ընկալումը: Անհրաժեշտության դեպքում ուսանողները կարող են ճշգրտել սցենարի մանրամասները, որպեսզի այն դարձնեն ավելի իրատեսական:

Պատկերացրեք, որ ունեք Օլիվիա անունով մտերիմ ընկեր, որը Եկեղեցու անդամ չէ, բայց հաստատակամորեն հավատում է Հիսուս Քրիստոսին: Մի օր նա մոտենում է ձեզ և հարցնում. «Ինչի՞ն են հավատում ձեր Եկեղեցու անդամները՝ կյանքից հետո մահի վերաբերյալ: Ինձ ուսուցանել են, որ բոլորը գնալու են կամ դրախտ կամ դժոխք, բայց ես լսել եմ, որ Հիսուս Քրիստոսի Վերջին Օրերի Սրբերի Եկեղեցու անդամները հավատում են բազմաթիվ դրախտների: Ինչի՞ մասին է խոսքը»

Մի քանի րոպե հատկացրեք՝ Օլիվիային պատասխան գրելու համար, որը կբացատրի ձեր ըմբռնումն ու գիտելիքները փառքի երեք աստիճանների վերաբերյալ: Ցանկության դեպքում կարող եք ներառել նկարներ, որոնք կօգնեն Օլիվիային պատկերացնել այն, ինչ դուք բացատրում եք:

Երբ ուսանողներն ավարտեն իրենց բացատրությունը, նրանցից մի քանիսին կարող եք առաջարկել կիսվել իրենց գրածով կամ դերախաղով ներկայացնել սցենարը դասարանի առաջ:

Եթե ուսանողները չնշեն դա, հարցրեք նրանց, թե ինչպես են փառքի երեք աստիճանները ցույց տալիս Երկնային Հոր և Հիսուս Քրիստոսի սերն ու ողորմածությունը (տես Վարդապետություն և Ուխտեր 76․40–43)։ Հստակեցրեք, որ փառքի արքայությունը՝ այդ թվում սելեստիալ փառքը ժառանգելը, հնարավոր է միայն Հիսուս Քրիստոսի միջոցով (տես Վարդապետություն և Ուխտեր 76․69–70)։

Ուսանողներին հարցրեք, թե ինչ սովորեցին այս փորձառությունից: Եթե ուսանողները հարցեր ունենան փառքի երեք աստիճանների վերաբերյալ, խնդրեք նրանց Վարդապետություն և Ուխտեր 76 բաժնում գտնել հատվածներ, որոնք կօգնեն պատասխանել իրենց հարցերին: Կարող եք նաև վերանայել նախորդ դասերի որոշ նյութեր:

Ակնածանքով վերաբերվել Երկնային Հորը և Հիսուս Քրիստոսին

Կարող եք առաջարկել ուսանողներին ցանկ կազմել այն բաների, որոնք իրենք վերջերս սովորել են Վարդապետություն և Ուխտեր սուրբ գրությունից և որոնք մեծացրել են իրենց սերը, երախտագիտությունն ու ակնածանքը Երկնային Հոր և Հիսուս Քրիստոսի հանդեպ։ Ուսանողները կարող են նաև ներառել իրենց փորձառությունները տանը, Եկեղեցում և այլուր, որոնք ամրապնդել են իրենց հարաբերությունները Երկնային Հոր և Հիսուս Քրիստոսի հետ:

Օգտակար կլինի ուսանողներին առաջարկել վերանայել Վարդապետություն եւ Ուխտեր 63․58–64, 76․19–24 հատվածները և այն բոլոր նշումները, որ նրանք, հնարավոր է, կատարել են՝ նախկինում այս հատվածներն ուսումնասիրելիս:

Կարող եք ցուցադրել հետևյալ հարցը և առաջարկել ուսանողներին պատասխանել այս հարցին, որը կօգնի նրանց գնահատել իրենց ընթացիկ ջանքերը, ցանկություններն ու առաջընթացը.

• Ի՞նչ եք սովորում Երկնային Հոր և Հիսուս Քրիստոսի մասին, որը մեծացնում է ձեր սերը, երախտագիտությունն ու ակնածանքը Նրանց հանդեպ:

Մի քանի ուսանողի խրախուսեք կիսվել: Կարող եք կիսվել նաև ձեր մտքերով:

Ուսումնասիրել սուրբ գրությունները և խորհել դրանց շուրջ

Կարող եք ցուցադրել վերևում ներկայացված նկարը և տալ հետևյալ հարցերը.

• Ի՞նչ էին անում Ջոզեֆ Սմիթը և Սիդնի Ռիգդոնը փառքի երեք աստիճանների տեսիլքը ստանալուց առաջ:

• Ի՞նչ սովորեցիք նրանց փորձառությունից:

Եթե ուսանողները չեն հիշում, առաջարկեք նրանց վերանայել Վարդապետություն և Ուխտեր 76․15–19 հատվածները։ Համոզվեք, որ նրանք հասկանում են, որ Ջոզեֆը և Սիդնին ուսումնասիրում էին սուրբ գրությունները և խորհում դրանց շուրջ, նախքան տեսիլքները կբացվեին նրանց համար: Ճշմարտություններից մեկը, որ ուսանողները կարող են սովորել, հետևյալն է․ Երբ մենք աղոթքով ուսումնասիրում ենք սուրբ գրությունները և խորհում դրանց մասին, մենք պատրաստում ենք մեզ Սուրբ Հոգու միջոցով Տիրոջից հասկացողություն ստանալուն:

Ուսանողներին ժամանակ տվեք մտածելու սուրբ գրությունների իրենց ուսումնասիրության արդյունավետության մասին: Նրանք կարող են խորհել, թե որքանով լավ են իրենք աղոթքով ուսումնասիրում սուրբ գրությունները և խորհում էին դրանց շուրջ։ Եթե օգտակար կլինի, կարող եք ցուցադրել հետևյալ գծապատկերը և առաջարկել ուսանողներին կիսվել, թե ինչպես կարող է յուրաքանչյուր տարր օգնել իրենց սուրբ գրությունների ուսումնասիրության մեջ: Ուսանողները կարող են կիսվել, թե ինչ են անում, որն իրենց կարծիքով օգնում է իրենց:

Ուսանողների համար կարող է նաև օգտակար լինել դժվարությունների և հնարավոր լուծումների քննարկումը դասարանի այլ անդամների հետ։ Կարող եք ուսանողներին բաժանել փոքր խմբերի և առաջարկել նրանց քննարկել այն դժվարությունները, որոնց իրենք բախվում են, երբ ուսումնասիրում են սուրբ գրությունները և խորհում դրանց շուրջ: Խրախուսեք յուրաքանչյուր խմբին ընտրել մի դժվարություն և մտածել մի քանի պարզ քայլ, որ իրենք կարող են ձեռնարկել՝ այդ դժվարությունը հաղթահարելու և սուրբ գրությունների իրենց ուսումնասիրության արդյունավետությունը մեծացնելու համար: Յուրաքանչյուր խմբին առաջարկեք կիսվել դասարանի մնացած մասի հետ:

Եզրափակելով՝ մի քանի ուսանողի առաջարկեք վկայել, թե ինչպես է խորհելը և սուրբ գրությունների ուսումնասիրությունն օրհնում իրենց կյանքը և օգնում ավելի մոտ զգալ իրենց Հիսուս Քրիստոսին:

Օժանդակ ուսումնական վարժություններ

Փառքի երեք աստիճանների բացատրությունը

Ի լրումն դասի սցենարի կամ դրա փոխարեն կարող եք օգտագործել հետևյալը: Սա կարող է լինել նաև կրկնության վարժություն մեկ այլ դասի ժամանակ:

Գրատախտակին նկարեք արևի, լուսնի և աստղերի պատկերներ: Առաջարկեք ուսանողներին գալ գրատախտակի մոտ և յուրաքանչյուր պատկերի կողքին գրել այն մանրամասները, որ իրենք հիշում են փառքի աստիճանների մասին: Խրախուսեք նրանց վերանայել Վարդապետություն և Ուխտեր 76 բաժինը և իրենց նշումները՝ լրացուցիչ տեղեկությունների համար: Մի քանի ուսանողի առաջարկեք բացատրել, թե ինչու են իրենք երախտապարտ Վարդապետություն և Ուխտեր 76 բաժնում տրվող գիտելիքների համար և այդ գիտելիքներն ինչպես կարող են մեծացնել իրենց սերը Երկնային Հոր և Հիսուս Քրիստոսի հանդեպ:

Ակնածանքով վերաբերվել Երկնային Հորը և Հիսուս Քրիստոսին

Հետևյալ վարժությունը կարող եք օգտագործել որպես այլընտրանքային եղանակ՝ օգնելու ուսանողներին գնահատել իրենց երախտագիտությունն ու ակնածանքը Երկնային Հոր և Հիսուս Քրիստոսի հանդեպ:

Առաջարկեք ուսանողներին հիշել Վարդապետություն և Ուխտեր սուրբ գրությունից վերջերս սովորած այն հատվածները, որոնք մեծացրել են իրենց սերը, երախտագիտությունն ու ակնածանքը Երկնային Հոր և Հիսուս Քրիստոսի հանդեպ։ Երբ ուսանողները կիսվեն այդ հատվածներով, կարող եք գրել դրանք գրատախտակին։ Ցուցադրեք Հիսուս Քրիստոսի պատկերը և խրախուսեք ուսանողներին նայել նկարին, մինչ դուք բարձրաձայն կկարդաք սուրբ գրությունների հատվածներից մեկը: Առաջարկեք ուսանողներին իրենց ուսումնական օրագրերում պատասխանել հետևյալ հարցերին.

• Ինչպե՞ս կարող է սուրբգրային այս հատվածն օգնել ձեզ զարգացնել և ամրացնել ձեր հարաբերությունները Երկնային Հոր և Հիսուս Քրիստոսի հետ:

• Ձեր կարծիքով այս հատվածում պարունակվող ո՞ր ճշմարտության կամ ճշմարտությունների մասին դուք կարող եք վկայել:

• Այս հատվածում պարունակվող ո՞ր ճշմարտության կամ ճշմարտությունների մասին կցանկանայիք ավելին իմանալ: Ինչո՞ւ։

Եթե ժամանակը թույլ տա, կարող եք կրկնել վարժությունը՝ օգտագործելով սուրբգրային մեկ այլ հատված: