Leksiyon 98: Doktrina ug mga Pakigsaad 85–87

Doktrina ug mga Pakigsaad 86

Ang Manluluwas Nagpundok sa Israel

Diha sa pagpadayag nga narekord diha sa Doktrina ug mga Pakigsaad 86, ang Manluluwas mipadayag og dugang nga kahulogan sa Iyang orihinal nga interpretasyon sa sambingay sa trigo ug mga sagbot (Mateo 13:36–43). Siya mitudlo mahitungod sa Iyang mga paningkamot sa pagpundok sa mga matarong aron sa pagpangandam alang sa Iyang Ikaduhang Pag-anhi. Kini nga leksiyon makatabang sa mga estudyante sa ilang mga paningkamot sa pag-apil uban sa Manluluwas sa pagpundok sa Israel.

Mga Posibleng Kalihokan sa Pagkat-on

Ang Manluluwas nagpundok sa Iyang katawhan

Ikonsiderar ang pagdapit sa mga estudyante sa paghunahuna og mga pananglitan sa mga tawo nga gusto nilang ikauban ug ngano.

Dayon mahimo nimong dapiton ang mga estudyante sa paghunahuna og mga tawo kinsa gusto nga makauban si Jesukristo atol sa Iyang yutan-ong pangalagad. Kon gikinahanglan, mahimo nimong ipakigbahin ang pipila ka mga ehemplo, sama sa Mateo 9:10; 19:1–2, 13–15; Juan 6:1–14; 3 Nephi 17:1–5.

• Ngano sa imong hunahuna nga ang mga tawo gusto nga ikauban ang Manluluwas?

• Ngano sa imong hunahuna nga ang Manluluwas gusto nga ang mga tawo magapundok ngadto Kaniya?

Ikonsiderar ang pagdapit sa mga estudyante sa pagtuon sa pipila ka mga kasulatan nga nagtudlo kanato kon nganong ang Manluluwas gusto nga kita magapundok ngadto Kaniya. Mga ehemplo mahimong maglakip sa Mateo 11:28–30; 3 Nephi 9:13–14; 10:4–6.

Hunahunaa ang imong kaugalingong mga tinguha sa pagsunod o sa pagpundok ngadto sa Manluluwas. Hunahunaa usab ang imong mga tinguha sa pagtabang sa pagpundok sa uban ngadto Kaniya. Sa imong pagtuon, pangitaa ang mga kamatuoran nga makatabang nimo nga makasabot sa kaimportante sa pagpundok sa imong kaugalingon ug sa uban ngadto ni Jesukristo.

Ang sambingay sa trigo ug mga sagbot

Basaha o ipamubo ang mosunod nga parapo aron matabangan ang mga estudyante nga makasabot sa konteksto sa kasaysayan sa pagpadayag nga narekord sa Doktrina ug mga Pakigsaad 86.

Samtang si Joseph Smith ug Frederick G. Williams nagtrabaho sa dinasig nga hubad sa Biblia, ang Manluluwas mipadayag og interpretasyon sa sambingay sa trigo ug mga sagbot. Kini nga interpretasyon narekord diha sa Doktrina ug mga Pakigsaad 86.

Sa dili pa magtuon ang mga estudyante sa Doktrina ug mga Pakigsaad 86, tabangi sila nga makasabot sa sambingay sa trigo ug mga sagbot. Mahimo nilang basahon ang Mateo 13:24–30, ang usa ka estudyante mahimong mopakigbahin og pagpamubo sa sambingay, o mahimo nimong ipakita ang bidyo nga “Jesus Declares the Parables of the Wheat and Tares, Mustard Seed, and Leaven” gikan sa time code 0:00 hangtod sa 1:30. Kini nga bidyo anaa sa ChurchofJesusChrist.org.

Mahimong makatabang ang pagpasabot nga ang mga sagbot [tares] usa ka matang sa makahilo nga sagbot. Ang trigo ug mga sagbot halos managsama kon kini moturok, apan kini mahimong mailhan sa higayon nga kini mohingkod. Kon ang usa ka tawo mosulay sa pag-ibot sa mga sagbot sa dili pa mohingkod ang trigo ug mga sagbot, lagmit iya usab maibot ang dakong bahin sa trigo.

• Unsa ang mipatigbabaw kanimo niini nga sambingay?

• Unsa ang gisimbolo sa trigo ug mga sagbot? (Tan-awa sa Mateo 13:38.)

Ang Manluluwas naghatag og pagpasabot sa sambingay

Basaha ang Doktrina ug mga Pakigsaad 86:1–7, mangita kon hain nga mga simbolo gikan sa sambingay nga ang Manluluwas mitabang kanato nga makasabot.

• Unsa man ang imong nakat-onan gikan niini nga sambingay mahitungod sa mga pagpangandam nga gihimo sa Ginoo alang sa Iyang Ikaduhang Pag-anhi?

  Human ang pipila ka mga estudyante makapakigbahin sa unsay ilang nadiskobrehan, hisgoti ang mosunod nga kamatuoran: Ang Ginoo nagpundok sa Israel sa dili pa ang Iyang Ikaduhang Pag-anhi.

• Sa unsang paagi nga ang pagkasayod niini nga kamaturoan makatabang kanimo nga mobati og paglaom ug kalinaw kon maghunahuna ka mahitungod sa Ikaduhang Pag-anhi ni Jesukristo?

• Sa unsang paagi kini nga kamatuoran makagiya sa mga desisyon nga imong himoon karon?

Si Presidente Russell M. Nelson mipakigbahin kon sa unsang paagi kita makaapil uban sa Ginoo sa pagpundok sa Israel karon.

Ang Ginoo nagpundok niadtong mopili nga tugotan ang Dios nga maoy labing importante nga impluwensiya diha sa ilang mga kinabuhi.

Sulod sa daghang mga siglo, ang mga propeta nanagna niini nga pagpundok [tan-awa sa Isaias 11:11–12; 2 Nephi 21:11–12; Mosiah 15:11], ug nahitabo na kini karon! Isip usa ka gikinahanglang mag-una nga panghitabo sa dili pa ang Ikaduhang Pag-anhi sa Ginoo, kini ang labing importante nga buhat sa kalibutan! …

Kon maghisgot kita sa pagpundok sa Israel sa duha ka habig sa tabil, naghisgot kita, siyempre, sa buhat sa misyonaryo, templo, ug family history. Naghisgot usab kita sa paglig-on sa pagtuo ug pagpamatuod diha sa mga kasingkasing niadtong kauban nato sa pagpuyo, pagtrabaho, ug pagserbisyo. Bisan kanus-a nga mobuhat kita og bisan unsa sa pagtabang ni bisan kinsa—sa matag habig sa tabil—sa paghimo ug pagtuman sa ilang mga pakigsaad sa Dios, nagtabang kita sa pagpundok sa Israel. (Russell M. Nelson, “Ipatigbabaw ang Dios Labaw sa Tanan,” Liahona, Nob. 2020, 92–93)

• Unsay imong nakat-onan gikan niini nga pamahayag mahitungod kon sa unsang paagi ka makatabang sa Ginoo sa pagpundok sa Israel?

“Usa ka kahayag ngadto sa mga Hentil”

Basaha ang Doktrina ug mga Pakigsaad 86:11, mangita sa unsay gitudlo sa Manluluwas mahitungod kon unsaon nato sa pagtabang sa pagpundok sa mga tawo ngadto Kaniya.

Mahimong makatabang ang pagpasabot nga ang pulong nga mga Hentil diha sa bersikulo 11 mahimong nagpasabot niadtong dili mga miyembro sa Simbahan.

Isip kabahin sa inyong panaghisgotan sa sunod nga pangutana, ikonsiderar ang pagdapit sa mga estudyante sa pagbasa sa Mateo 5:14–16 ug sa 3 Nephi 18:24. Mahimo silang mopakigbahin kon unsay gidugang niini nga mga bersikulo sa ilang panabot.

• Unsa kaha sa imong hunahuna ang gipasabot nga mahimong “kahayag ngadto sa mga Hentil”?

• Unsa ang pipila ka mga paagi nga makatabang ka sa pagpundok sa Israel pinaagi sa pagpakigbahin sa kahayag sa Manluluwas ngadto sa uban?

Ikonsiderar ang paglista diha sa pisara sa mga ideya sa mga estudyante. Isip kabahin niini nga panaghisgot, mahimo nimong dapiton ang mga estudyante sa pagpakigbahin sa ilang mga kasinatian. Aron makakita og dugang nga mga ehemplo, ipakita ang bidyo nga “LightTheWorld—Follow the Example of Jesus Christ. Share His Light—Serve as He Served. ” (2:17) gikan sa time code 0:29 hangtod sa 2:17, anaa sa ChurchofJesusChrist.org.

Paghimo og plano sa pagpundok sa Israel uban sa Manluluwas

Tabangi ang mga estudyante sa paggamit sa mga kamatuoran nga ilang gitun-an pinaagi sa pagdapit kanila sa pagtubag sa usa o sa duha sa mosunod nga mga pangutana diha sa ilang mga journal sa pagtuon.

• Unsa ang usa ka butang nga imong paningkamotan nga buhaton aron mapundok ngadto sa Manluluwas?

• Unsa ang piho nga butang nga imong buhaton aron sa pagtabang sa Manluluwas sa pagpundok sa Israel?

Paglakip og mga detalye kon sa unsang paagi ug kon kanus-a nimo makab-ot ang imong tumong.

Pipila ka mga estudyante mahimong mopakigbahin unsay ilang nasulat. Pagpamatuod sa mga kamatuoran nga imong nahisgotan, ug dasiga ang mga estudyante sa pagbuhat sa mga tumong nga ilang gitakda alang sa ilang kaugalingon.

Dugang nga mga Kapanguhaan

Nganong pundokon man sa Manluluwas ang Iyang mga katawhan?

Si Elder David A. Bednar sa Korum sa Napulog Duha ka Apostoles mitudlo:

Ang Ginoo nagpundok sa Iyang katawhan sa higayon nga sila modawat Kaniya ug motuman sa Iyang mga sugo. …

… Gipundok sa Ginoo ang Iyang katawhan aron mosimba, motukod sa Simbahan, aron manalipod sa ilang kaugalingon ug sa usag usa, ug modawat og tambag ug instruksyon. …

Si Propeta Joseph Smith namahayag nga sa tanang kapanahonan ang balaanong katuyoan sa pagpundok mao ang pagtukod og mga templo aron nga ang mga anak sa Ginoo makadawat sa labing taas nga mga ordinansa ug sa ingon makabaton og kinabuhing dayon. (David A. Bednar, “The Spirit and Purposes of Gathering” [Brigham Young University–Idaho devotional, Oct. 31, 2006], byui.edu)

Unsaon man nako nga maapil sa trigo nga gipundok sa Manluluwas?

Si Elder Neil L. Andersen sa Korum sa Napulog Duha ka Apostoles mitudlo:

Ang Ginoo mipasabot nga niining kataposang panahon sa dili pa ang Iyang pagbalik, ang “mga trigo,” nga Iyang gihulagway isip “ang mga anak sa gingharian” [Mateo 13:38], magdungan og tubo sa “mga bunglayon,” o niadtong wala mahigugma sa Dios ug wala magsunod sa Iyang mga sugo. Sila “magdungag tubo” [Mateo 13:30].

Mao kini ang kahimtang sa atong kalibotan hangtod mobalik ang Manluluwas, nga adunay daghang maayo ug daghang daotan sa tanang dapit.

Tingali usahay dili kamo mobati nga sama ka lig-on, guwang na nga uhay sa trigo. Pagmapailobon sa inyong kaugalingon! Ang Ginoo miingon nga ang trigo maglakip sa linghod nga mga udlot nga migitib [Doktrina ug mga Pakigsaad 86:4, 6]. Kitang tanan mao ang Iyang mga Santos sa Ulahing mga Adlaw, ug bisan kon wala pa kita mamahimo sa unsay gusto nato nga kitang tanan mamahimo, kita matinud-anon sa atong tinguha nga mahimong Iyang tinuod nga mga disipulo. (Neil L. Andersen, “Magpaduol ngadto sa Manluluwas,” Liahona, Nob. 2022, 73)

Doktrina ug mga Pakigsaad 86:11. Unsa ang gipasabot nga mahimong “usa ka manluluwas ngadto sa akong mga katawhan sa Israel”?

Namulong mahitungod sa buluhaton alang sa atong namatay nga mga katigulangan, si Presidente Wilford Woodruff (1807–98) mipasabot:

Duna kitay mga amahan ug mga inahan ug mga kaliwatan sa kalibotan sa espiritu, ug duna kitay himoon alang kanila. Isip indibidwal duna koy dakong interes niini nga buhat sa pagtubos sa mga patay, ug mao usab kamo mga kaigsoonan. Kini ang trabaho nga atong ipadayon hangtod nga duna kitay oportunidad. … Kini ang buhat nga gisangon sa mga Santos sa Ulahing mga Adlaw. Buhata ang taman nga [inyong] mahimo niini nga bahin, aron kon moadto na [kamo] sa laing bahin sa bilo ang inyong mga amahan, mga inahan, mga paryente ug mga higala manalangin kaninyo tungod sa inyong nabuhat, ug tungod kay kamo nahimong mga instrumento sa mga kamot sa Dios sa pag-angkon sa ilang katubsanan, pagailhon kamo isip mga Manluluwas sa Bukid sa Zion agi og katumanan sa panagna. (Mga Pagtulun-an sa mga Presidente sa Simbahan: Wilford Woodruff [2004], 209-210)

Dugang nga mga Kalihokan sa Pagkat-on

Ang pagdapit ni Presidente Nelson sa pagpundok sa Israel

Ipasabot nga niadtong 2018, si Presidente Russell M. Nelson mihatag sa mosunod nga mga pagdapit aron sa pagtabang sa mga kabatan-onan sa pagpundok sa Israel.

• Ihunong ang social media sa pito ka sunod-sunod nga adlaw.

• Paghimo og sinemana nga sakripisyo sa panahon ngadto sa Ginoo, pagbiya sa usa ka butang nga gusto nimong buhaton ug paggamit niana nga panahon sa pagtabang sa pagpundok sa Israel.

• Pabilin o balik sa dalan sa pakigsaad.

• Pag-ampo kada adlaw alang sa tanang anak sa Langitnong Amahan nga makadawat sa mga panalangin sa ebanghelyo ni Jesukristo.

• Magpalahi; mahimong lahi kaysa kalibotan. (Russell M. Nelson ug Wendy W. Nelson, “Paglaum sa Israel” [tibuok kalibotan nga debosyonal alang sa mga kabatan-onan, Hunyo 3, 2018], ChurchofJesusChrist.org.)

Mahimo nimong hisgotan kon sa unsang paagi kini nga mga pagdapit makatabang sa mga estudyante nga moapil uban sa Ginoo sa pagpundok sa Israel. Mahimo nimong dapiton ang mga estudyante sa pagpili og usa ka butang gikan sa lista nga paningkamotang buhaton alang sa sunod semana. Sa umaabot nga leksiyon, mahimo nimong dapiton ang mga estudyante sa pagpakigbahin sa unsay ilang gipili ug sa unsang paagi kini nakatabang kanila nga mobati nga mas naduol sa Manluluwas.

Tan-awa ang uban sama sa pagtan-aw sa Dios kanila

Samtang magtuon ang mga estudyante sa Doktrina ug mga Pakigsaad 86:5–6, mahimo nimo silang dapiton sa pagkonsiderar kon unsay mahimong resulta kon kita daling mohukom sa uban.

• Unsa ang gitudlo kanato sa tinguha sa Manluluwas sa paglangan sa paghukom niini nga mga bersikulo mahitungod Kaniya?

Mahimo kang mopakita og usa ka hulagway sa mga sagbot nga nagtubo sa usa ka uma sa trigo. Makatabang ka sa mga estudyante nga makasabot nga ang Manluluwas nagtan-aw kanato isip malumo nga mga udlot nga nagpadayon sa paglambo. Siya mapailobon ug mabination kon bahin sa atong pag-uswag. Kita mahimong mosunod sa Iyang ehemplo ug magbaton og kaluoy alang sa atong kaugalingon ug niadtong anaa sa atong palibot. Uban sa Manluluwas, kinahanglan natong tan-awon ang tanan isip “trigo” ug dapiton ang tanan sa pagpundok uban Kaniya. Mahimo kang modapit og panaghisgotan nga adunay mga pangutana nga sama niini:

• Unsa ang makatabang kanimo nga makakita sa uban sama sa pagtan-aw kanila sa Langitnong Amahan ug ni Jesukristo?

• Unsa nga mga kasinatian ang aduna ka nga nakakita sa mga benepisyo sa pagpaningkamot sa pagtan-aw sa uban sama sa pagtan-aw sa Langitnong Amahan ug ni Jesus kanila?

• Sa unsang paagi nga kana nga kinaiya makatabang kanimo sa pagtabang sa Manluluwas sa pagpundok sa Israel?

Uban sa Manluluwas, kita makapundok sa Israel

Aron matabangan ang mga estudyante nga makahunahuna og mga ideya kon unsaon nila pagpundok ang Israel, mahimo nimong ipakita ang bidyo nga “Gatherers in the Kingdom” (1:51) o “Gathering and Growing: Eldon’s Story (2:10). Dapita ang mga estudyante sa pagpangita og praktikal nga mga paagi nga sila makaapil sa pagpundok karon.