Leksiyon 99: Doktrina ug mga Pakigsaad 85–87

Doktrina ug mga Pakigsaad 87

Si Joseph Smith Nanagna mahitungod sa Gubat

Tungod sa kagubot sa politika sa Estados Unidos sa Amerika niadtong mga 1830, nag-ampo si Joseph Smith sa Dios aron masayod sa Iyang hunahuna mahitungod sa sitwasyon. Ang pagpadayag nga misunod naglangkob sa panagna mahitungod sa gubat nga adunay piho nga mga detalye nga ang Dios lamang ang nakahibalo nianang panahona. Kini nga leksiyon makatabang sa mga estudyante nga makasabot nga ang tanan nga mga pulong sa Ginoo ngadto sa Iyang mga propeta matuman.

Mga Posibleng Kalihokan sa Pagkat-on

Kasinatian ni Orson Pratt

Aron matabangan ang mga estudyante nga maandam sa pagtuon sa Doktrina ug mga Pakigsaad 87, ikonsiderar ang pagpamubo o ang pagbasa sa mosunod nga misyonaryo nga mga kasinatian ni Orson Pratt.

Si Orson Pratt usa ka unang miyembro sa Simbahan kinsa nagserbisyo isip usa sa orihinal nga mga miyembro sa Korum sa Napulog Duha ka Apostoles. Siya natawag sa pagserbisyo og daghang mga misyon sa panahon sa iyang kinabuhi sa pagsangyaw sa gipahiuli nga ebanghelyo ni Jesukristo sa tibuok Estados Unidos ug Canada. Sa iyang mga panaw, nagdala siya og kopya sa usa ka piho nga pagpadayag nga nadawat ni Joseph Smith gikan sa Ginoo niadtong 1832. Bisan og ang panagna nga anaa sa pagpadayag wala pa matuman, si Elder Pratt kanunay nga mipakigbahin niini ngadto sa uban. Siya kanunayng gibugal-bugalan, nahinumdom nga ang mga tawo miingon nga ang panagna “walay pulos” ug nga siya “nailad sa usa ka impostor” (Orson Pratt, Journal of Discourses, 18:224–25).

• Kon ikaw si Orson Pratt, unsa sa imong hunahuna ang epekto sa reaksiyon sa mga tawo diha kanimo?

Usa ka panagna gikan sa Ginoo

Ang panagna nga gipakigbahin ni Orson Pratt ngadto sa uban narekord diha sa Doktrina ug mga Pakigsaad 87. Mahimong maayo alang sa mga estudyante ang pagsabot sa mga detalye sa kasaysayan nga anaa sa ulohan nga seksiyon sa dili pa basahon ang panagna.

Tabangi ang mga tigkat-on nga makadiskobre sa doktrina ug mga baroganan sa ebanghelyo: Alang sa dugang nga pagpraktis niini, tan-awa ang pagbansay nga giulohan nga “Pagkat-on sa doktrina ni Jesukristo sa imong kaugalingon” nga makita sa Pagpalambo sa mga Kahanas sa Magtutudlo: Itudlo ang Doktrina. Ikonsiderar ang pagpraktis sa kahanas pinaagi sa pagmugna og makapasiksik nga mga pangutana nga dili limitado ang tubag nga makatabang sa mga tigkat-on sa pagdiskobre og mga doktrina ug mga baroganan sa ebanghelyo sa ilang kaugalingon ug ayaw giyahi ang mga estudyante ngadto sa usa ka piho nga tubag.

Basaha ang Doktrina ug mga Pakigsaad 87:1–4, ug pangitaa kon unsay gipadayag ni Jesukristo pinaagi sa Iyang propeta.

• Unsa ang gisulti sa Ginoo nga “sa dili madugay mahinabo”?

• Unsa ang atong makat-onan mahitungod sa Ginoo gikan niini nga mga bersikulo?

Hatagi ang mga estudyante og oportunidad nga mopakigbahin og lain-laing mga kamatuoran nga ilang nakat-onan mahitungod ni Jesukristo. Agi og dugang sa unsay ilang gihisgotan, tabangi sila nga makasabot nga ang Ginoo makapadayag kanato sa umaabot nga mga panghitabo pinaagi sa Iyang mga propeta.

Basaha ang pipila o ang tanan sa mosunod nga mga kasulatan aron matabangan ka nga mas masabtan ang kahibalo sa Ginoo.

• Abraham 2:8

• 1 Nephi 9:6

• Doktrina ug mga Pakigsaad 38:1–2

• Unsay imong nakat-onan? Ngano kaha nga makatabang man ang pagsabot niini nga mga butang mahitungod ni Jesukristo?

• Sa unsang paagi kini nga kahibalo makaapektar sa imong pagsalig Kaniya?

Hugot nga pagtuo sa Ginoo ug sa Iyang mga panagna

Basaha o ipamubo ang mosunod nga parapo aron matabangan ang mga estudyante nga makasabot kon unsay nahitabo human ipadayag sa Ginoo kining umaabot nga mga panghitabo ngadto ni Joseph Smith.

Sa sayong bahin sa 1833, wala madugay human mahatag ang panagna ni Joseph Smith, ang mga panagsumpaki nga nakapahimo niini nga makita nga ang gubat mahimong mobuto sa dili madugay sa Amerika malinawong nasulbad.

• Unsa sa imong hunahuna ang imong mga pangutana kon ikaw pamilyar sa panagna ni Joseph Smith niadtong panahona?

Si Orson Pratt nahinumdom sa iyang mga gipanghunahuna sa dihang kini nahimong dili klaro kon unsaon o kanus-a matuman ang panagna.

Nasayod ko nga ang panagna tinuod, kay ang Ginoo namulong ngari kanako ug mihatag kanako og pagpadayag. Ako nasayod usab mahitungod sa pagkabalaan niini nga buhat. Daghang katuigan ang milabay, may mga higayon nga usahay ang uban sa akong mga nakaila moingon, “Nan, unsa may mahitabo niana nga panagna? Dili gayod kana matuman.” Miingon ko, “Paghulat lang, ang Ginoo adunay iyang gitakda nga panahon.” (Orson Pratt, Journal of Discourses, 18:224–25)

• Unsa ang mipatigbabaw kanimo gikan sa tubag ni Orson Pratt?

• Giunsa niya sa pagpili nga molihok inubanan sa hugot nga pagtuo ug maghupot og usa ka mahangtorong panglantaw?

Pagpili nga mobarug uban sa Ginoo

Ikonsiderar ang pagdapit sa mga estudyante sa paghisgot sa mosunod nga pangutana uban sa usa ka pares o diha sa gagmay nga grupo sa dili pa sila mopakigbahin sa ilang mga tubag diha sa klase.

• Unsa ang pipila ka mga sitwasyon nga mahimong magkinahanglan og usa ka tawo sa paglihok inubanan sa hugot nga pagtuo agig tubag sa mensahe sa propeta karon?

Awhaga ang mga estudyante sa pagpamalandong kon unsa sila ka andam nga mobarog uban sa mga propeta sa Ginoo kon magtudlo sila og mga butang nga wala mauyoni sa uban.

Basaha ang Doktrina ug mga Pakigsaad 1:37–38 ug 21:4–6. Pangita og mga pagtulun-an nga makatabang kanimo nga magpabiling matinud-anon ngadto sa Ginoo ug sa Iyang mga propeta, bisan kon ang uban dili mouyon sa ilang mga pulong.

• Unsay imong nakaplagan?

Aron matabangan ang mga estudyante nga makasabot nga ang hugot nga pagtuo ug pailob kasagaran gikinahanglan aron makita ang katumanan sa mga panagna sa Ginoo, ikonsiderar ang pagpakigbahin sa mosunod nga mga detalye sa kasaysayan.

Bisan og si Joseph Smith dili buhi aron makakita sa katumanan sa panagna, usa ka bahin niini natuman hapit 30 ka tuig human kini gihatag. Ang panagbangi nagsugod sa South Carolina, ug ang habagatan ug amihanan nga mga estado nakig-away batok sa usag usa gikan sa 1861 ngadto sa 1865. Sama sa gitagna, ang Habagatan nanawagan sa Great Britain alang sa panabang ug daghan kinsa naulipon nakig-away batok sa ilang kanhi mga agalon (tan-awa sa Doktrina ug mga Pakigsaad 87:1–4). Daghang mga tawo ang namatay niini nga gubat. Sama sa gihulagway diha sa panagna, ang misunod nga mga gubat nahitabo sa mga nasod sa tibuok kalibotan (tan-awa sa Doktrina ug mga Pakigsaad 87:6–7).

Barog diha sa balaan nga dapit

Ang ubang mga estudyante mahimong mobati og kawalay kasegurohan o kahadlok kon sila maghunahuna mahitungod sa gubat ug kalaglagan nga gihulagway niini nga panagna. Ipasabot nga ang kataposang mga pulong sa Ginoo niini nga pagpadayag naghatag og tambag nga makatabang kanato panahon sa mga kasamok sa kataposang mga adlaw.

Basaha ang Doktrina ug mga Pakigsaad 87:8, mangita sa tambag sa Ginoo.

• Unsa ang pipila ka balaan nga mga dapit nga gihatag kanato sa Ginoo nga makatabang kanimo nga makakaplag og kalinaw ug kaluwasan sa atong kalibotan?

Ikonsiderar ang pagpasabot nga ang pagpabilin nga matinud-anon ngadto sa Ginoo ug sa Iyang mga propeta usa ka paagi nga kita “[mo]barog … sa balaan nga mga dapit, ug [dili] [mo]balhin.” Pagpamatuod sa mga kamatuoran nga imong nahisgotan karon ug dasiga ang mga estudyante sa pagbuhat sa bisan unsa nga mga impresyon nga ilang nadawat.

Dugang nga mga Kapanguhaan

Unsa ang mga kahimtang nga misangpot sa Gubat Sibil sa Amerika?

Aron makakat-on og dugang pa mahitungod niini nga mga kahimtang, basaha ang Mga Hisgotanan sa Kasaysayan sa Simbahan, “Gubat Sibil sa Amerika,” ChurchofJesusChrist.org.

Unsa ang ikasulti kanako sa mga propeta mahitungod sa umaabot nga mga panghitabo?

“[Sa] usa ka higayon, ang mga propeta mahimo nga dasigon sa pagpanagna sa umaabot alang sa kaayohan sa katawhan. Ang iyang unang kapangakohan, mao ang pagpamatuod ni Kristo” (Giya ngadto sa mga Kasulatan, “Propeta,” scriptures.ChurchofJesusChrist.org).

Unsaon nako pagbati ang kalinaw taliwala sa kagubot sa kataposang mga adlaw?

Si Presidente Russell M. Nelson mitudlo:

Kita kada adlaw makadungog og makapadisturbo nga mga balita. Kamo tingali adunay mga adlaw nga kamo nanghinaot nga makasul-ob sa inyong mga pajama, makatikuko, ug mohangyo og usa ka tawo nga mopukaw ninyo kon kining tanan nga kasamok mahuman na.

Apan, akong minahal nga mga kaigsoonan, daghan kaayong talagsaong mga butang anaa sa unahan. Sa umaabot nga mga adlaw, kita makakita sa labing dako nga mga pagpakita sa gahom sa Manluluwas nga sukad wala makita sa kalibotan. Tali karon ug sa adlaw sa Iyang pagbalik “uban sa gahom ug dakong himaya” (Joseph Smith-Mateo 1:36), Siya motanyag og dili maihap nga mga pribilihiyo, mga panalangin, ug mga milagro diha sa mga matinud-anon. (Russell M. Nelson, “Buntoga ang Kalibotan ug Pangita og Kapahulayan,” Liahona, Nob. 2022, 95)

Unsay akong buhaton aron makabarog uban sa Ginoo ug sa Iyang mga propeta?

Si Elder Ronald A. Rasband sa Korum sa Napulog Duha ka Apostoles mitudlo:

Atong gipaluyohan ang mga lider karon kinsa, pinaagi sa balaang inspirasyon, gitawag nga motudlo ug mogiya nato ug nanawagan nato nga maglikay sa mga peligro nga atong giatubang matag adlaw—gikan sa wala kaayoy pagtagad sa adlawng Igpapahulay, ngadto sa mga hulga sa pamilya, ngadto sa pangataki sa kagawasan sa relihiyon, ug gani sa pagsupak sa pinadayag sa ulahing mga adlaw. Mga kaigsoonan, naminaw ba kita sa ilang tambag? …

Ang dakong pangutana karon klaro: nagbarog ba mo uban sa mga lider sa Simbahan sa nagkangitngit nga kalibotan aron mapakaylap ninyo ang Kahayag ni Kristo? …

Nag-ampo ko nga kita motabang—motabang ug mokupot sa kamot sa Manluluwas nga Iyang gituyhad ngari nato, kasagaran pinaagi sa Iyang balaanong gitawag nga mga lider ug mga sakop sa atong pamilya—ug maminaw sa Iyang panawagan nga mopauli. (Ronald A. Rasband, “Nagbarog uban sa mga Lider sa Simbahan,” Liahona, Mayo 2016, 47, 48, 49)

Unsa ang akong buhaton kon akong gibati nga ang akong hugot nga pagtuo gihagit sa mga pagduda?

Si Elder Neil L. Andersen sa Korum sa Napulog Duha ka Apostoles mitudlo:

Isubsob ninyo ang inyong kaugalingon sa mga butang nga nakatabang sa paglig-on sa pagtuo: ipakita ninyo ang inyong hugot nga pagtuo kang Kristo, mag-ampo kamo, mamalandong sa kasulatan, maghinulsol, magsunod sa mga sugo, ug moserbisyo sa uban.

Kon mag-atubang og pagsulay sa hugot nga pagtuo—bisan unsay inyong buhaton, ayaw pagpalayo sa Simbahan! Ang pagpalayo gikan sa gingharian sa Dios kon may pagsulay sa hugot nga pagtuo sama ra sa pagbiya sa luwas nga lawak taguanan dihang nagkaduol na ang buhawi. (Neil L. Andersen, “Pagsulay sa Inyong Hugot nga Pagtuo,” Liahona, Nob. 2012, 40)

Doktrina ug mga Pakigsaad 86:7. Unsaon nako sa pagbarog sa balaan nga mga dapit?

Si Presidente Russell M. Nelson mitudlo:

Bisan unsa nga matang sa kasamok nga mahitabo sa inyong kinabuhi, ang labing luwas nga dapit sa pagkaespirituwal mao ang pagtuman sa inyong mga pakigsaad sa templo!

Palihog tuohi ko kon ako moingon nga kon ang inyong espirituwal nga pundasyon natukod nga lig-on diha ni Jesukristo kamo dili kinahanglan nga mahadlok. (Russell M. Nelson, “Ang Templo ug ang Inyong Espirituwal nga Pundasyon,” Liahona, Nob. 2021, 95)

Dugang nga mga Kalihokan sa Pagkat-on

Doktrina ug mga Pakigsaad 87:5–7. Unsa ang “pagpanton” sa Dios?

Mahimong adunay mga pangutana ang mga estudyante mahitungod sa Doktrina ug mga Pakigsaad 87:5–7. Mahimong maayo nga tabangan ang mga estudyante nga makamatikod nga ang Ginoo mokab-ot uban sa mahigugmaong mga kamot ngadto sa matag usa kanato sa daghang mga paagi. Ikonsiderar ang pagdapit sa mga estudyante sa paglista sa pipila niana nga mga paagi. Dayon, tabangi ang mga estudyante nga makat-on gikan sa laing mga kasulatan kon unsay buhaton sa Dios kon kita mobaliwala sa mga paagi nga Siya motabang diha sa gugma. Tabangi sila nga makasabot nga kon kita mopatig-a sa atong mga kasingkasing batok sa tingog sa Dios, Siya usahay mogamit og mga dalugdog, mga linog, ug uban pang mas grabe nga mga paagi sa pagpanton kanato (tan-awa sa 1 Nephi 17:45). Gusto sa Dios nga kita maghinulsol sa atong mga sala ug mahinumdom Kaniya ug sa Iyang kaayo (tan-awa sa Helaman 12:1–3). Dugang pa, ang pipila sa mga paghukom nga gihulagway diha sa Doktrina ug mga Pakigsaad 87:5–7 mahitabo samtang ang Ginoo mopanton niadto kinsa nagtratar sa mga matarong sa dili makiangayon.

Doktrina ug mga Pakigsaad 87:8. Unsaon nako sa pagtuman sa pagdapit sa Ginoo nga mobarog sa balaan nga mga dapit?

Aron matabangan ang mga estudyante nga mas masabtan ang tambag sa Ginoo sa bersikulo 8, ikonsiderar ang pagdapit kanila sa paghisgot sa mga pangutana sama sa mosunod:

• Unsa kaha sa imong hunahuna ang gipasabot sa mobarog diha sa balaan nga mga dapit?

• Unsa kaha ang makapabalhin sa usa ka tawo gikan sa usa ka balaan nga dapit?

• Unsaon man nato sa pagseguro nga kita dili mabalhin?

• Hain nga balaan nga mga dapit ang nagtabang nimo nga mobati og kalinaw sa kalibotan karon?

Isip kabahin sa inyong panaghisgotan, ikonsiderar ang pagtan-aw sa Disyembre 2013 nga artikulo sa Liahona “Pagbarog sa Balaan nga mga Dapit.” Niini nga artikulo, ang kabatan-onan gikan sa tibuok kalibotan mipakigbahin kon sa unsang paagi sila mipili nga mobarog sa balaan nga mga dapit.

Mahimo usab nimong hisgotan ang kataposang pamahayag ni Presidente Russell M. Nelson diha sa “Dugang nga mga Kapanguhaan.”

Padayong paghupot og hugot nga pagtuo diha ni Jesukristo ug sa Iyang mga propeta

Mahimong makatabang alang sa mga estudyante ang pagkat-on gikan sa mga ehemplo sa tibuok kasaysayan diin ang hugot nga pagtuo sa mga magtotuo gisulayan. Kini nga mga ehemplo mahimo gikan sa kasulatan, sama sa asoy diha sa 3 Nephi 1:4–13. Mahimo usab nimong gamiton ang usa ka ehemplo nga gipakigbahin ni Elder Neil L. Andersen sa Korum sa Napulog Duha ka Apostoles.

Mga tuig na ang milabay nakabasa ko og artikulo sa Time nga magasin nga mireport sa pagkadiskobre sa usa ka sulat, nga gisulat kuno ni Martin Harris, nga misukwahi sa asoy ni Joseph Smith bahin sa pagkakaplag sa mga palid sa Basahon ni Mormon.

Pipila ka mga miyembro ang mibiya sa Simbahan tungod sa dokumento.

Ang nakaguol, dali kaayo silang mibiya. Pipila ka bulan ang milabay ang mga eksperto (ug ang nagtumo-tumo mikumpisal) nga ang sulat usa ka pagpangilad. Masabtan ra nga makapangutana kamo bahin sa unsay inyong nadungog sa balita, apan dili gayod ninyo dudahan ang pagpamatuod sa mga propeta sa Dios. (Neil L. Andersen, “Joseph Smith,” Liahona, Nob. 2014, 29)

Tabangi ang mga estudyante sa paghisgot kon unsay mahimo niini nga mga ehemplo alang kanila kon ang pagbarog uban sa Ginoo ug sa Iyang mga propeta mahimong lisod buhaton. Dapita sila sa pagpamatuod sa mga panahon sa diha nga sila nagpabilin nga matinud-anon ngadto sa Ginoo ug sa Iyang mga pagtulon-an.

Barog uban sa Ginoo ug sa Iyang mga propeta pinaagi sa pagpabilin sa sakayan

Ikonsiderar ang paggamit sa usa sa mosunod nga mga bidyo aron matabangan ang mga estudyante nga makasabot sa kamahinungdanon sa pagbarog uban sa Ginoo ug sa Iyang mga propeta. Kini nga mga bidyo naggamit sa pagtandi sa pagpangita og kaluwasan sa sakayan ngadto sa pagpangita og kaluwasan sa gipahiuli nga Simbahan sa Ginoo. Mahimo nimong ihunong ang bidyo sa mahinungdanon nga mga gutlo aron tugotan ang mga estudyante sa paghisgot sa unsay ilang nakat-onan.