Doktrina ug mga Pakigsaad 88

Doktrina ug mga Pakigsaad 88

Kinatibuk-ang Pagpasabot

Sa ulahing bahin sa Disyembre sa 1832 ug sa sayo sa Enero sa 1833, ang Ginoo mipadayag og mensahe nga gitudlo ni Joseph Smith isip “dahon sa oliba.” Kini nga mensahe sa kalinaw gikan sa Ginoo mipadayag og daghang mga kamatuoran nga mahangtoron ang kamahinungdanon, lakip ang gahom nga Iyang gigamit sa pagdumala sa Iyang mga linalang ug ang kamatuoran mahitungod sa Iyang mahangtorong balaod. Ang Manluluwas mitudlo mahitungod sa Pagkabanhaw ug nga ang balaod nga atong gisunod nagtino sa himaya nga atong madawat kon banhawon na. Gidapit Niya ang Iyang mga sumusunod nga magpaduol Kaniya. Siya misugo sa Iyang katawhan sa pagtukod og templo ug mihatag og mga instruksiyon sa pag-organisar sa Tunghaan sa mga Propeta.

Pagsukod sa kahibalo sa mga estudyante: Ang kahibalo sa mga estudyante sa mga hilisgotan sa ebanghelyo mahimong magkalahi. Mahimong makatabang ang pagtino kon unsa ka daghan ang ilang nahibaloan bahin sa usa ka butang aron matabangan sila nga mouswag. Ang pagdapit kanila sa pagpakigbahin sa ilang nakat-onan o sa pagpangutana kon sila adunay mga pangutana makatabang kanimo sa pagtino sa mga bahin sa leksiyon nga kinahanglan nilang pagatutokan. Alang sa dugang pa kon sa unsang paagi kini gibuhat sa Manluluwas, tan-awa ang seksiyon nga “Ang Manluluwas Kanunay nga Andam sa Pagtubag sa mga Panginahanglan sa Uban” diha sa Pagtudlo Sumala sa Pamaagi sa Manluluwas. Makita usab nimo ang usa ka ehemplo kon unsaon sa pagbuhat niini sa leksiyon karong semanaha nga giulohan nga “Doktrina ug mga Pakigsaad 88:14–41.”

Pangandam sa pagtudlo

Ang mosunod nga impormasyon naghatag kanimo og mga ideya kon unsa ang imong gikinahanglan nga andamon daan alang sa matag leksiyon.

Doktrina ug mga Pakigsaad 88:1–13, 41–50

Katuyoan sa leksiyon: Aron matabangan ang mga estudyante nga mobati og mas dakong pasalamat sa impluwensiya sa Kahayag ni Kristo sa ilang kinabuhi.

• Pagpangandam sa estudyante: Ikonsiderar ang pagdapit sa mga estudyante nga mogahin og panahon sa pagtan-aw sa kalangitan sa kagabhion o pagpangita sa online og mga hulagway sa kawanangan ug sa pagpamalandong sa kahalangdon sa Dios nga makita diha sa uniberso.

• Handout: “Ang Kahayag ni Kristo (Bahin 1 ug Bahin 2)”

Doktrina ug mga Pakigsaad 88:14–41

Katuyoan sa leksiyon: Aron matabangan ang mga estudyante nga madugangan ang ilang pagsalig nga sila makadawat sa celestial nga himaya.

• Pagpangandam sa estudyante: Dapita ang mga estudyante sa paghimo og mubo nga lista kon sa unsang paagi ang mga balaod makahatag og benepisyo sa atong mga kinabuhi. Awhaga sila sa pagpangandam sa pagpakigbahin sa ilang mga hunahuna.

Doktrina ug mga Pakigsaad 88:51–95

Katuyoan sa leksiyon: Aron matabangan ang mga estudyante nga makadawat sa mga panalangin sa pagduol ngadto sa Langitnong Amahan ug ni Jesukristo.

• Pagpangandam sa estudyante: Dapita ang mga estudyante sa pagpangutana sa Langitnong Amahan diha sa pag-ampo kon unsay ilang mabuhat aron mobati nga mas duol Kaniya ug ni Jesukristo.

• Bidyo: “How I #HearHim: Elder Dale G. Renlund” (3:00)

Doktrina ug mga Pakigsaad 88:76-80,117–141

Katuyoan sa leksiyon: Aron matabangan ang mga estudyante nga makakat-on pinaagi sa hugot nga pagtuo kang Jesukristo sa nagkalainlaing mga kahimtang.

• Pagpangandam sa estudyante: Awhaga ang mga estudyante sa pagpamalandong sa bisan unsa nga ilang gibuhat aron makat-on mahitungod ni Jesukristo ug madugangan ang hugot nga pagtuo diha Kaniya. Dapita sila sa pagtambong nga andam sa pagpakigbahin og mga ideya ug pag-uswag ngadto sa klase.

• Bidyo: “Hangupon ang Umaabot uban sa Hugot nga Pagtuo” (16:24; tan-awa gikan sa time code 10:28 hangtod sa 11:20)

• Mga butang: Usa ka bag sa eskwelahan ug pipila ka mga piraso sa papel