Leksiyon 100: Doktrina ug mga Pakigsaad 88

Doktrina ug mga Pakigsaad 88:1–13, 41–50

Ang Kahayag ni Kristo

Samtang didto sa Kirtland, Ohio, si Joseph Smith ug pipila ka halangdon nga mga pari nag-ampo ngadto sa Langitnong Amahan alang sa usa ka pagpadayag mahitungod sa pagtukod sa Zion. Ang pagpadayag nagtudlo og mga kamatuoran mahitungod sa gahom ug kadako sa Kahayag ni Jesukristo. Kini nga leksiyon gituyo aron matabangan ang mga estudyante nga mobati og mas dakong pasalamat sa impluwensiya sa Kahayag ni Kristo sa ilang kinabuhi.

Mga Posibleng Kalihokan sa Pagkat-on

Mga butang nga atong mabati

Ikonsiderar ang pagpangutana sa mga estudyante sa mosunod nga pangutana ug sa paglista sa ilang mga tubag. Mahimo usab nimong ipahisgot kanila ang pangutana diha sa gagmay nga mga grupo ug dayon ipasulat sa pisara ang ilang mga tubag.

• Unsa ang mga ehemplo sa mga butang nga inyong mabati apan dili makita?

  Mahimong ilista sa mga estudyante ang mga butang sama sa kainit, hangin, gugma, pasalamat, pagtuo, ug uban pa.

• Ngano kaha nga importante man nga mahibaloan nga adunay mga butang nga imong mabati apan dili makita?

Mahimo nimong dapiton ang mga estudyante sa pagtinguha og inspirasyon sa pag-ila sa impluwensiya sa Dios diha sa ilang mga kinabuhi.

Mga Papel sa Kahayag ni Kristo

Si Joseph Smith ug ang siyam ka mga elder sa Simbahan nagkatigom sa ibabaw nga andana sa Newel K. Whitney Store sa Kirtland, Ohio. Sila nagtinguha og dugang nga panabot mahitungod sa ilang mga katungdanan sa pagtukod sa Zion. Si Joseph midapit sa matag tawo sa pagpuli-puli sa pag-ampo aron masayod sa kabubut-on sa Ginoo. Human sa pag-ampo, ang Propeta nakadawat sa unsay karon mao ang Doktrina ug mga Pakigsaad 88.

Samtang magsugod ang mga estudyante sa mosunod nga pagbasa, seguroha nga masabtan nila nga ang bersikulo 6 nagpasabot kang Jesukristo.

Basaha ang Doktrina ug mga Pakigsaad 88:6–13, mangita sa unsay matudlo niini nga mga bersikulo kanimo mahitungod ni Jesukristo ug sa Iyang kahayag.

• Unsay imong nakat-onan mahitungod sa Kahayag ni Kristo gikan niini nga mga bersikulo?

  Taliwala sa lain-laing mga panabot nga mahimong ipakigbahin sa mga estudyante, tabangi sila sa pag-ila sa kamatuoran nga ang Kahayag ni Kristo naghatag og kahayag ug kinabuhi sa tanan Niyang mga linalang.

  Tabangi ang mga estudyante nga makasabot kon sa unsang paagi kini makaapekto sa ilang inadlaw nga kinabuhi ang pagsabot sa impluwensiya sa Dios pinaagi sa Kahayag ni Kristo. Ang mosunod nga pangutana mao ang usa ka paagi aron mabuhat kini.

• Unsa ang pipila ka mga sitwasyon nga giatubang sa kabatan-onan diin sila makabenepisyo sa pag-ila sa impluwensiya sa Dios? Ngano man?

Ang mosunod nga kalihokan gituyo aron makatabang sa mga estudyante nga mas magmapasalamatonsa Kahayag ni Kristo ug sa unsang paagi kini makaimpluwensya sa ilang mga kinabuhi.

Mahimo kang magbuhat og upat ka estasyon sa palibot sa lawak nga mahimong bisitahan ug kompletohon sa matag estudyante. Mahimong dapiton ang mga estudyante sa pagdala sa ilang journal, usa ka butang nga isulat, ug sa ilang mga kasulatan ngadto sa matag estasyon. Sa laing paagi, mahimo nimong bahinon ang mga estudyante ngadto sa mga grupo nga tag-upat ug hatagan ang matag estudyante og usa ka seksiyon sa handout aron kompletohon. Mahimo dayong ipakigbahin sa mga estudyante ang ilang nakat-onan ngadto sa mga miyembro sa grupo.

Ang Kahayag ni Kristo

Ipasabot ang Kahayag ni Kristo

Basaha ang Doktrina ug mga Pakigsaad 88:12–13, mangita sa mga paghulagway sa Kahayag ni Kristo.

Basaha ang mosunod nga kahulogan sa Kahayag ni Kristo:

“[Ang Kahayag ni Kristo mao] ang balaan nga kusog, gahom, o impluwensiya nga nagagikan sa Dios pinaagi ni Kristo ug naghatag og kinabuhi ug kahayag sa tanan nga mga butang. Kini mao ang balaod diin ang tanan nga mga butang gidumala didto sa langit ug dinhi sa yuta (D&P 88:6–13). Kini usab makatabang sa mga katawhan sa pagsabot sa mga kamatuoran sa ebanghelyo ug pagtabang sa pagbutang kanila diha niana nga dalan sa ebanghelyo nga paingon ngadto sa kaluwasan.” (Giya ngadto sa mga Kasulatan, “Kahayag, Kahayag ni Kristo,” scriptures.ChurchofJesusChrist.org)

• Unsaon nimo sa pagpamubo kon unsa ang imong nasabtan sa Kahayag ni Kristo?

• Sa unsang paagi kaha ka personal nga naimpluwensiyahan sa Kahayag ni Kristo?

Ang Kahayag ni Kristo isip atong tanlag

Usa ka pagpakita sa Kahayag ni Kristo mao ang atong tanlag. Pagsulat og kahulogan nga ang usa ka Primary nga bata makasabot kon unsa ang imong nasabtan sa tanlag.

Basaha ang mosunod nga kahulogan ug tan-awa unsa ang mahimo nimong ikadugang sa imong kahulugan:

“Ang [tanlag] mao ang lawom nga pagsabot sa matarong ug sayop, gikan sa Kahayag ni Kristo diha sa tanan nga mga tawo (Moro. 7:16). Kita natawo uban sa kinaiyanhon nga katakos sa pag-ila tali sa matarong ug sa sayop tungod sa kahayag ni Kristo nga gihatag ngadto sa matag tawo (D&C 84:46). Kini nga pagbati gitawag og tanlag. Ang paghupot niini makahimo kanato nga may kapangakohan nga mga binuhat. Sama sa uban nga mga pagbati, ang atong mga tanlag mahimo nga madaot pinaagi sa sala o sa sayop nga paggamit.” (Giya ngadto sa mga Kasulatan, “Tanlag,”) scriptures.ChurchofJesusChrist.org

Basaha ang Doktrina ug mga Pakigsaad 84:45–46 ug Moroni 7:16, mangita sa mga pulong nga naghulagway kon sa unsang paagi ang Kahayag ni Kristo naglihok isip atong tanlag. Ikonsiderar ang paghimo og cross-reference alang sa duha ka mga bersikulo.

• Unsa ang hugpong sa mga pulong gikan niini nga mga bersikulo nga nagtabang kanimo sa pagsabot kon unsa ang tanlag?

• Ngano kaha sa imong hunahuna nga ang Langitnong Amahan ug si Jesukristo mihatag kanimo og tanlag?

Sa unsang paagi nga ang pagpaminaw o pagbaliwala sa imong tanlag makaimpluwensiya sa mga pagpili nga imong gihimo ug sa imong mahangtorong destinasyon?

Ang Kahayag ni Kristo anaa sa tanan

Handurawa nga gihangyo ka sa pagpakigbahin og mubo nga hunahuna sa Sunday School kon unsaon sa pagtan-aw ug pagtratar og mas maayo ang tanan nga mga tawo, ilabi na niadtong lahi kay kanimo. Mahimo nimong gamiton ang mosunod nga mga kapanguhaan ug bisan unsa nga imong nakita nga makatabang.

• Doktrina ug mga Pakigsaad 88:11

• Doktrina ug mga Pakigsaad 93:2

Si Presidente Boyd K. Packer (1924–2015) sa Korum sa Napulog Duha ka Apostoles mitudlo:

Kon mas daghan kita og nahibaloan mahitungod sa Kahayag ni Kristo, mas masabtan nato ang mahitungod sa kinabuhi ug mas makabaton kita og lawom nga gugma alang sa tanang katawhan. Kita mahimong mas maayo nga mga magtutudlo ug mga misyonaryo ug mga ginikanan, ug mas maayo nga mga lalaki ug mga babaye ug mga bata. Kita makabaton og mas lawom nga pagtagad alang sa atong mga kaigsoonan diha sa Simbahan ug niadtong dili motuo. …

Ang Kahayag ni Kristo sama ka unibersal sa kahayag sa adlaw mismo. Bisan asa adunay kinabuhi sa tawo, anaa ang Espiritu ni Kristo. Ang matag buhi nga kalag gipanag-iya niini. …

Kon atong masabtan ang reyalidad sa Kahayag ni Kristo diha sa tanan nga atong makita … ug sulod sa atong kaugalingon, … kita makabaton og kaisog ug inspirasyon lapas nianang atong nahibaloan kaniadto. Ug kinahanglan nga ingon niini! Ug kini mahimo nga ingon niini! Kining tanan usa ka sukod sa kamatuoran sa ebanghelyo nga diyutay ra kaayo ang nakasabot. (Boyd K. Packer, “The Light of Christ,” Ensign, Apr. 2005, 8, 13–14)

Pagsulat og duha ngadto sa tulo ka kapahayag nga naghunahuna kon sa unsang paagi ang pagsabot sa Kahayag ni Kristo makaimpluwensya kon giunsa nimo pagtan-aw ang uban.

Ang Kahayag ni Kristo sa uniberso

Natandog ka na ba sa katahom o kahalangdon niining yuta ug sa uniberso? Unsa nga mga pagbati ang gipagawas niini nga mga butang diha kanimo?

Basaha ang Doktrina ug mga Pakigsaad 88:7–10, 45–47 ug pangitaa kon unsay imong nakat-onan mahitungod sa Kahayag ni Kristo, sa yuta, ug sa uniberso.

• Unsa ang atong makat-onan mahitungod sa Ginoo gikan sa Iyang mga linalang?

• Sa unsang paagi nga ang pagkakita sa impluwensiya sa Dios sa uniberso makatabang kanato sa pag-ila sa Iyang impluwensiya sa atong kinabuhi?

Human ang mga estudyante nakagahin na og panahon sa pagkompleto sa mga kalihokan diha sa mga estasyon, ikonsiderar ang paghatag kanila og kahigayonan nga ipakigbahin ang unsay ilang nakat-onan ug gibati. Ang mosunod nga mga pangutana tingali makatabang.

• Unsa ang imong nakat-onan mahitungod sa Kahayag ni Kristo nga adunay dakong epekto?

• Sa unsang paagi nimo nakita ang impluwensiya sa Kahayag ni Kristo diha sa imong kinabuhi?

• Sa imong hunahuna sa unsang paagi nga ang pag-ila sa Kahayag ni Kristo sa imong kinabuhi makaimpluwensiya sa imong relasyon ngadto sa Langitnong Amahan ug ni Jesukristo?

Mahimo nimong ipakigbahin kon sa unsang paagi ka naimpluwensiyahan pinaagi sa mas maayo nga pagsabot sa Kahayag ni Kristo.

Dugang nga mga Kapanguhaan

Unsa ang kalainan tali sa Kahayag ni Kristo ug gasa sa Espiritu Santo?

Si Presidente Boyd K. Packer (1924–2015) sa Korum sa Napulog Duha ka Apostoles mitudlo:

Ang tanan bisan asa aduna na sa Espiritu ni Kristo [o Kahayag ni Kristo], ug samtang ang Espiritu sa Espiritu Santo makaduaw ni bisan kinsa, ang gasa sa Espiritu Santo makuha “pinaagi sa pagsunod sa mga balaod ug mga ordinansa sa Ebanghelyo” (Mga Artikulo sa Hugot nga Pagtuo 1:3), pinaagi sa pagpasakop ngadto sa “bunyag pinaagi sa pagpaunlod alang sa kapasayloan sa mga sala; [ug] pagpandong sa mga kamot alang sa gasa sa Espiritu Santo” (Mga Artikulo sa Hugot nga Pagtuo 1:4). Kini dili awtomatik nga anaa sama sa Espiritu ni Kristo nga anaa. Kini nga gasa kinahanglan ihatag sa usa ka naghupot sa awtoridad (tan-awa sa Mga Artikulo sa Hugot nga Pagtuo 1:5). (Boyd K. Packer, “The Light of Christ,” Ensign, Apr. 2005, 13)

Sa unsang paagi ang pagkahimong nahiuyon sa Kahayag ni Kristo makaapekto kon sa unsang paagi kita makapakigbahin sa ebanghelyo ngadto sa uban?

Si Elder D. Todd Christofferson sa Korum sa Napulog Duha ka Apostoles mipakigbahin:

Kon ang gugma ni Kristo anaa kanato, ang uban masayud nga ang atong gugma alang kanila tinuod. Kon ang kahayag sa Espiritu Santo nagdilaab sa sulod kanato, modagkot kini sa Kahayag ni Kristo diha kanila. Kon unsa kamo mopakita sa pagkatinuod sa inyong pagdapit nga moduol aron makasinati sa hingpit nga kalipay sa kahingpitan sa ebanghelyo ni Jesukristo. (D. Todd Christofferson, “Pagpaambit sa Mensahe sa Pagpahiuli ug sa Pagkabanhaw,” Liahona, Mayo 2020, 112)

Mahimo bang mapalong ang Kahayag ni Kristo?

Si Presidente Boyd K. Packer (1924–2015) sa Korum sa Napulog Duha ka Apostoles mitudlo:

Ang Kahayag ni Kristo anaa diha kanimo sa wala pa ikaw matawo (tan-awa sa D&P 93:23, 29–30), ug kini anaa kanimo sa matag higayon nga ikaw buhi ug dili mapalong sa dihang ang mortal nga bahin kanimo mahimong abog. Kini kanunay lamang nga anaa diha. …

Si Presidente Harold B. Lee mipasabot: “Kana nga kahayag dili gayod hingpit nga mapalong … [naghisgot sa Kahayag ni Kristo] gawas kon kita mobuhat sa dili mapasaylo nga sala. Ang kahayag niini mahimong moawop nga halos dili nato kini makita, apan anaa kini alang kanato nga kon paypayan mosiga ug mas mohayag uban sa pagsabot ug kahibalo. Gawas niana, dili kita magmalamposon. Ang atong misyonaryo nga buhat mahimong walay kapuslanan.” (Boyd K. Packer, “The Light of Christ,” Ensign, Apr. 2005, 10, 14)

Si Sister Sharon Eubank, kanhi Unang Magtatambag sa Kinatibuk-ang Kapangulohan sa Relief Society, miingon:

Usa sa mga nag-unang panginahanglanon nato aron molambo mao ang magpabiling konektado ngadto sa tinubdan sa kahayag—si Jesukristo. Siya ang tinubdan sa atong gahom, ang Kahayag ug Kinabuhi sa Kalibutan. Kon wala ang lig-ong koneksiyon ngadto Kaniya, magsugod kita nga mamatay sa espirituhanong paagi. …

Si Jesus miingon, “Ako ang kahayag [nga] nagdan-ag sa kangitngit, ug ang kangitngit wala makasabot niini” [Doktrina ug mga Pakigsaad 6:21]. Kana nagpasabot nga bisan unsaon niini sa pagpaningkamot, ang kangitngit dili makapalong sa kahayag. Bisan unsaon pa. Makasalig ka nga ang Iyang kahayag anaa alang kanimo. (Sharon Eubank, “Kristo: Ang Kahayag nga Nagdan-ag taliwala sa Kangitngit,” Liahona, Mayo 2019, 73, 75)

Asa ako makakat-on pa og dugang mahitungod sa Kahayag ni Kristo?

“Ang Kahayag ug ang Kinabuhi sa Kalibotan”

“Ang Kahayag ni Kristo”

Dugang nga mga Kalihokan sa Pagkat-on

Dugang nga mga gimbuhaton sa Kahayag ni Kristo

Kon gitinguha, mahimo nimong gamiton ang mosunod nga materyal aron mapulihan ang usa sa mga seksiyon o makadugang og dugang nga seksiyon sa handout.

Mga Gasa ug Pagkamamugnaon

Usa sa mga gimbuhaton sa Kahayag ni Kristo mao nga kini “nakapadugang sa inyong mga salabutan” (Doktrina ug mga Pakigsaad 88:11). Mahimo kini pinaagi sa pagdasig kanimo sa bisan unsang matarong nga buhat nga imong gibuhat.

Si Presidente Boyd K. Packer (1924–2015) sa Korum sa Napulog Duha ka Apostoles mitudlo:

Ang Espiritu ni Kristo makadan-ag sa hunahuna sa imbentor, scientist, pintor, eskultor, komposer, tigpasundayag, arkitekto, sa tigsulat aron paghimo og mahinungdanon, gani dinasig nga mga butang alang sa panalangin ug kaayohan sa tanang katawhan.

Kini nga Espiritu makaaghat sa mag-uuma diha sa iyang umahan ug sa mananagat diha sa iyang sakayan. Makadasig kini sa magtutudlo diha sa lawak klasehanan, sa misyonaryo sa pagpresentar sa iyang diskusyon. Makadasig kini sa estudyante nga naminaw. Ug ang pinakaimportante, modasig kini sa bana ug asawa, ug sa amahan ug inahan. (Boyd K. Packer, “Ang Kahayag ni Kristo,” Liahona, Abr. 2005, 8-14)

• Unsaon kaha nimo sa pag-ila ang tabang nga moabot pinaagi sa kahayag sa Manluluwas?

• Unsa nga buhat ang gipalambo sa Kahayag ni Kristo o mahimong mapalambo sa imong kinabuhi?

Ang Balaan nga Espiritu sa Saad

Aron matabangan ang mga estudyante nga makasabot sa kahulogan sa Doktrina ug mga Pakigsaad 88:3–5, ikonsiderar ang pagdapit sa mga estudyante sa pagbasa sa mga bersikulo ug sa pagpangita kon unsa ang gihatag sa Ginoo ngadto niini nga mga Santos kinsa nagpundok diha sa pag-ampo.

Mahimo nimong ipakigbahin ang mosunod nga kinutlo aron mas masabtan ang Balaang Espiritu sa Saad.

Si Elder David A. Bednar sa Korum sa Napulog Duha ka Apostoles mipasabot:

Ang Balaang Espiritu sa Saad mao ang nagpamatuod nga gahom sa Espiritu Santo. Kon giselyohan sa Balaang Espiritu sa Saad, usa ka ordinansa, panaad, o pakigsaad ang nagbugkos sa yuta ug sa langit. (Tan-awa sa D&C 132:7.) Ang pagdawat sa ‘selyo sa pag-uyon‘ gikan sa Espiritu Santo mao ang resulta sa pagkamatinud-anon, integridad, ug sa pagkamakanunayon sa pagtahod sa mga pakigsaad sa ebanghelyo “diha [sa] pagpadayon sa panahon” (Moises 7:21). Hinoon, kini nga pagkabugkos mawala pinaagi sa pagkadaotan ug kalapasan.

Ang pagkalimpyo ug pagselyo pinaagi sa Balaan nga Espiritu sa Saad naglangkob sa kataposan nga mga lakang sa proseso sa pagpakatawo pag-usab. (David A. Bednar, “Kinahanglang Matawo Kamo Pag-usab,” Liahona, Mayo 2007, 21-22).