Leksiyon 102: Doktrina ug mga Pakigsaad 88

Doktrina ug mga Pakigsaad 88:51–95

“Paduol ngari Kanako ug Ako Mopaduol nganha Kaninyo”

Niini nga bahin sa Doktrina ug mga Pakigsaad 88, si Jesukristo mipadayag kon giunsa Niya pagdumala ang Iyang mga linalang ug nagdapit kanato sa pagpaduol ngadto Kaniya. Kini nga leksiyon makatabang sa mga estudyante nga makadawat sa mga panalangin sa pagpaduol ngadto sa Langitnong Amahan ug ni Jesukristo.

Mga Posibleng Kalihokan sa Pagkat-on

Suod nga mga Relasyon

Ikonsiderar ang pagsugod sa klase pinaagi sa paghimo og panaghisgot mahitungod sa pagpalambo og suod nga mga relasyon. Mahimo nimong dapiton ang matag estudyante sa pagsulat diha sa pisara sa ngalan sa usa ka tawo nga ilang gibati nga suod. Hangyoa ang pipila ka estudyante sa pagpakigbahin kon nganong sila mipili niana nga tawo.

Mahimo kang mangutana og follow-up nga mga pangutana sama sa mosunod:

• Unsa man ang nakapasuod sa relasyon tali sa duha ka tawo? Unsay nakapalayo?

• Unsay inyong mabuhat aron makamugna pag-usab og suod nga relasyon uban sa usa ka tawo nga napalayo ninyo?

Sa Doktrina ug mga Pakigsaad 88, ang Manluluwas mihulagway sa Iyang gahom nga nagdumala sa Iyang mga linalang (tan-awa sa mga bersikulo 41–45). Siya mitudlo nga kon kita makakita sa mga bitoon ug sa mga planeta sa langit, kita “nakakita sa Dios nga naglihok sa iyang pagkahalangdon ug gahom” (Doktrina ug mga Pakigsaad 88:47). Dayon si Jesukristo mihatag og usa ka sambingay aron sa pagtudlo mahitungod sa relasyon sa Dios ngadto sa Iyang mga linalang. Kini nagtudlo nga ang Dios milalang og daghang mga kalibotan nga gipuy-an sa Iyang mga anak ug nga Siya mibisita sa matag usa niini. Ang Ginoo misugo sa Iyang mga higala sa pagtawag Kaniya samtang Siya duol kanila (tan-awa sa mga bersikulo 51–62).

“Paduol ngari kanako”

Basaha ang Doktrina ug mga Pakigsaad 88:63, mangita sa unsay gidapit ni Jesukristo nga atong buhaton.

• Unsa nga mga pagdapit ang imong nakita nga personal nga makahuluganon?

• Unsa nga mga baroganan ang imong matino gikan niining mga pagdapit?

  Mahimong moila ang mga estudyante og lain-laing mga baroganan—pananglitan, samtang ako mopaduol ngadto ni Jesukristo, Siya mopaduol kanako. Mahimo nimong hisgotan nga samtang kita nagpaduol ngadto kang Jesukristo, kita nagpaduol usab ngadto sa Langitnong Amahan.

  Aron matabangan ang mga estudyante nga makasabot niini nga baroganan, mahimo nimong hisgotan kon sa unsang paagi kini gihulagway sa sambingay. Pipila sa mosunod nga mga pangutana makatabang usab:

• Unsaon nimo sa paghulagway kon unsa ang buot ipasabot sa pagpaduol ngadto sa Langitnong Amahan ug kang Jesukristo?

• Sa unsang mga paagi sa imong hunahuna nga Sila nagpaduol kanato?

• Unsa ang pipila ka mga rason nga ang usa ka tawo tingali gusto nga mobati nga naduol ngadto sa Langitnong Amahan ug ni Jesukristo?

Hatagi ang mga estudyante og kahigayonan sa pagpamalandong kon unsa ka suod ngadto sa Langitnong Amahan ug ni Jesukristo ang ilang gibati. Mahimo nimo silang dapiton sa pagsulat sa “Langitnong Amahan ug ni Jesukristo” sa usa ka panid diha sa ilang mga journal sa pagtuon. Dayon hangyoa ang mga estudyante sa pagdrowing og hulagway nga nagrepresentar sa ilang kaugalingon. Ang mga estudyante mahimong mamalandong sa mga panahon nga mibati sila nga suod sa Dios ug sa Iyang Anak ug unsay nakatabang kanila nga mobati niini nga paagi. Mahimo usab nga pamalandongan sa mga estudyante kon unsa ka suod ang ilang gibati karon ngadto sa Langitnong Amahan ug ni Jesukristo.

Pahinumdomi ang mga estudyante nga kon mobati kita nga layo sa Ginoo, makahimo kita og aksyon sa pag-usab sa atong sitwasyon. Dapita ang mga estudyante sa pagpamalandong sa ilang mga panginahanglan ug sa unsa nga paagi sila mapanalanginan kon mas suod sila sa Langitnong Amahan ug ni Jesukristo. Awhaga ang mga estudyante sa pagtinguha og personal nga pagpadayag aron masayod unsay ilang mabuhat sa pagpaduol ngadto Kanila.

Mga pagdapit ug mga panalangin

Ang mga estudyante mahimong mokompleto sa mosunod nga tsart diha sa pisara o diha sa ilang mga journal sa pagtuon. Kon gikinahanglan, tabangi ang mga estudyante nga makasabot sa nagkalain-laing mga hugpong sa mga pulong diha sa Doktrina ug mga Pakigsaad 88:63–69. Sama pananglit, mahimo nimong ipatin-aw ang bersikulo 65 pinaagi sa pagpasabot nga dili kita kinahanglan nga adunay dili husto nga mga motibo ni magtinguha sa pagtagbaw sa kalibotanong mga tinguha kon kita mag-ampo.

Basaha ang Doktrina ug mga Pakigsaad 88:63–69 ug kompletoha ang mosunod nga tsart:

Mga Paagi sa Pagpaduol ngadto sa Langitnong Amahan ug ni Jesukristo	Mga Panalangin gikan sa Pagpaduol ngadto sa Langitnong Amahan ug ni Jesukristo

Usa ka paagi sa pagtabang sa mga estudyante nga madani niini nga mga bersikulo mao ang pagdapit og usa ka estudyante sa paghupot og hulagway sa Manluluwas diha sa atubangan sa klase. Hangyoa ang laing estudyante nga mobarog sa luyo sa lawak-klasehanan.

Samtang ipakigbahin sa mga estudyante ang unsay ilang nakaplagan, ang estudyante sa likod sa klase mahimong mas mopaduol ngadto sa estudyante nga nagkupot sa hulagway sa Manluluwas. Ang estudyante nga nagkupot sa hulagway sa Manluluwas mahimo usab nga mopaduol.

Mahimo nimong gamiton ang pipila sa mga pamahayag diha sa “Dugang nga mga Kapanguhaan” aron matabangan ang mga estudyante nga makasabot sa mga paagi sa pagpaduol ngadto sa Langitnong Amahan ug ni Jesukristo.

Ang mosunod nga mga pangutana makatabang kanimo sa paghisgot kon unsay nakaplagan sa mga estudyante diha sa mga bersikulo nga ilang gibasa:

• Sa unsang paagi sa imong hunahuna nga ang paghimo niini nga mga aksyon makatabang kanimo nga mapaduol ngadto sa Langitnong Amahan ug kang Jesukristo?

• Sa unsang paagi kaha nga kini nga mga panalangin makaimpluwensiya sa imong relasyon Kanila?

Akong plano

Ikonsiderar ang pagpasalida sa bidyo nga “How I #HearHim: Elder Dale G. Renlund” (3:00). Hangyoa ang mga estudyante sa pagpangita kon unsay gitudlo ni Elder Renlund mahitungod sa pagpaduol ngadto ni Jesukristo. Hisgoti kon unsay nakat-onan sa mga estudyante gikan sa iyang kasinatian.

Ang pag-awhag sa mga estudyante nga tubagan ang mosunod nga mga pangutana diha sa ilang mga journal sa pagtuon mahimong makaandam kanila nga mopakigbahin ngadto sa klase. Mahimo ka usab nga mopakigbahin og usa ka personal nga kasinatian mahitungod sa unsay imong nahimo sa pagpaduol ngadto kang Jesukristo ug sa unsang paagi imong gibati nga Siya mipaduol kanimo.

• Sa unsang paagi ka naningkamot nga mapaduol ngadto sa Langitnong Amahan ug kang Jesukristo?

• Sa unsang paagi ka o ang usa ka tawo nga imong kaila napanalanginan sa pagpaningkamot nga mapaduol Kanila?

Dapita ang mga estudyante sa pagtinguha sa Espiritu Santo sa paggiya kanila nga masayod kon unsay ilang mabuhat sa pagpaduol ngadto sa Langitnong Amahan ug ni Jesukristo. Pahinumdomi ang mga estudyante nga tingali nakadawat na sila og mga pag-aghat atol sa leksiyon.

Mahimong isulat sa mga estudyante kon unsaon nila sa pagpaningkamot nga mapaduol ngadto sa Langitnong Amahan ug kang Jesukristo, kon sa unsang paagi kini makatabang kanila sa mga hagit nga ilang giatubang, ug sa bisan unsang mga babag nga tingali kinahanglan nilang buntogon. Ang mga estudyante mahimong mosulat sa ilang mga drowing o mohimo og mubo nga sulat nga ilang dad-on sa balay.

Awhaga ang mga estudyante sa pagpakigbahin ngadto sa Langitnong Amahan diha sa ilang mga pag-ampo kon unsay plano nilang buhaton ug sa pagpangayo sa Iyang tabang.

Dugang nga mga Kapanguhaan

Unsa ang pipila ka mga paagi nga kita makapaduol ngadto kang Jesukristo?

Si Presidente Henry B. Eyring sa Unang Kapangulohan mipakigbahin:

Akong nasinati ang kalipay sa akong pagpaduol sa Manluluwas ug sa Iyang pagpaduol kanako pinaagi sa yanong pagsunod kanunay sa mga sugo. (Henry B. Eyring, “Umari Kanako,” Liahona, Mayo 2013, 22)

Si Elder Dieter F. Uchtdorf sa Korum sa Napulog Duha ka Apostoles mipahayag:

Pangayo, ug kamo hatagan. Panuktok, ug ang pultahan ablihan alang kaninyo [tan-awa saDoktrina ug mga Pakigsaad 88:63]. Salig sa Ginoo [ Mga Panultihon 3:5].

Sa atong inadlaw-adlaw nga kinabuhi mahinungdanon kaayo nato nga buluhaton ug nindot nga oportunidad ang makaplagan ang Dios.

Samtang atong ipadaplin ang garbo ug moduol sa Iyang trono uban sa masulub-on nga kasingkasing ug mahinulsolon nga espiritu [tan-awa sa 3 Nephi 9:20; Doktrina ug mga Pakigsaad 20:37], Siya mopaduol nganha kanato [tan-awa sa Doktrina ug mga Pakigsaad 88:63].

Samtang kita magtinguha sa pagsunod ni Jesukristo ug maglakaw sa dalan sa pagkadisipulo, pagtulun-an human sa usa ka pagtulun-an, ang adlaw moabot nga kita makasinati nianang dili katuohan nga gasa sa pagdawat sa kahingpitan sa kalipay. (Dieter F. Uchtdorf, “Ang Dios taliwala Kanato,” Liahona, Mayo 2021, 11)

Si Sister Neill F. Marriott, kanhi Ikaduhang Magtatambag sa Kinatibuk-ang Kapangulohan sa Young Women, mitudlo:

Ang pagsakripisyo sa atong personal nga mga buluhaton gikinahanglan sa paghimo og luna alang sa mahangtorong mga plano sa Dios. Ang Manluluwas, kinsa namulong alang sa Amahan, nangaliyupo ngari kanato, “Paduol ngari kanako ug Ako mopaduol nganha kaninyo” [Doktrina ug mga Pakigsaad 88:63]. Ang pagpaduol ngadto sa Amahan mahimong magpasabot sa pagkat-on sa Iyang kamatuoran pinaagi sa mga kasulatan, pagsunod sa propetikanhong tambag, ug sa pagpaninguha sa pagbuhat sa Iyang kabubut-on sa mas hingpit nga paagi. (Neill F. Marriott, “Pagpuyo diha sa Dios ug Paghulip sa Kal-ang,” Liahona, Nob. 2017, 11)

Basaha ang mosunod nga pamahayag gikan ni Presidente Russell M. Nelson o tan-awa ang bidyo nga “Pagdawat sa Gahom ni Jesukristo diha sa Atong Kinabuhi” gikan sa time code 12:25 hangtod sa 13:06, mangita sa unsay iyang gitudlo mahitungod sa pagpaduol ngadto sa Dios.

Kon mokab-ot kamo alang sa gahom sa Ginoo diha sa inyong kinabuhi uban sa samang paningkamot sa tawo nga hapit na malumos nga naningkamot nga makaginhawa, ang gahom gikan ni Jesukristo inyong maangkon. Kon ang Manluluwas masayod nga gusto gayod ninyong modangop Kaniya—kon Iyang mabati nga ang inyong labing dakong tinguha mao ang pagdawat sa Iyang gahom nganha sa inyong kinabuhi—magiyahan kamo sa Espiritu Santo aron masayod kon unsa gayod ang kinahanglan ninyong buhaton [tan-awa sa Doktrina ug mga Pakigsaad 88:63]. (Russell M. Nelson, “Pagdawat sa Gahom ni Jesukristo diha sa Atong Kinabuhi,” Liahona, Mayo 2017, 42)

Alang sa dugang nga mga ideya, tan-awa sa Russell M. Nelson, “Pagdawat sa Gahom ni Jesukristo diha sa Atong Kinabuhi,” Liahona, Mayo 2017, 39–42.

Unsa kaha kon mobati ko nga layo sa Dios?

Si Presidente Dieter F. Uchtdorf, kanhi sa Unang Kapangulohan, mipakigbahin sa mosunod:

Yano lamang ang pagdapit sa [Dios]:

“Bumalik kamo kanako” [Joel 2:12].

“Umari kanako” [Mateo 11:28].

“Paduol ngari kanako ug Ako mopaduol nganha kaninyo” [Doktrina ug mga Pakigsaad 88:63].

Mao kini ang paagi sa pagpakita Kaniya nga gusto kitang maluwas.

Nagkinahanglan kini og gamayng pagtuo. Apan ayaw kaguol. Kon dili ka makapakita og hugot nga pagtuo karon, sugdi sa paglaom.

Kon dili ka makaingon nga nasayod ka nga anaa ang Dios, makalaom ka nga anaa Siya. Mahimo kang magtinguha nga motuo. Igo na kana sa pagsugod.

Ug dayon, lihokon kana nga paglaom, pakig-istorya sa Langitnong Amahan. Ang Dios mohatag sa Iyang gugma kanimo, ug ang Iyang buhat sa pagluwas ug pag-usab magsugod.

Paglabay sa panahon, maila nimo ang Iyang impluwensiya sa imong kinabuhi. Mabati nimo ang Iyang gugma. Ug ang tinguha sa paglakaw inubanan sa Iyang kahayag ug pagsunod sa Iyang pamaagi, motubo dungan sa matag lakang sa pagtuo nga imong pagahimoon. (Dieter F. Uchtdorf, “Pas-anon Ka Niya sa Iyang Abaga ug Dad-on Pauli,” Liahona, Mayo 2016, 103)

Dugang nga mga Kalihokan sa Pagkat-on

Doktrina ug mga Pakigsaad 88:51–62. Usa ka sambingay

Ang Manluluwas mitudlo og usa ka sambingay aron sa pagtabang kanato nga makasabot kon sa unsang paagi ang Dios nakig-uban sa mga gingharian, o mga kalibotan, nga Iyang gilalang.

Usa ka paagi sa pag-apil sa mga estudyante ug sa pagtabang kanila nga makasabot sa sambingay mao ang pagdapit og pipila kanila sa pagdrama-drama sa mga bersikulo 51–60. Ang usa ka estudyante mahimong mobasa sa mga bersikulo isip tigsaysay. Ang laing estudyante mahimong mao ang tawo nga adunay uma nga mibisita sa ubang mga estudyante, kinsa nagrepresentar sa mga sulugoon. Human niana, mahimong basahon sa mga estudyante ang mga bersikulo 61–62, mangita sa kahulogan sa sambingay. Ang mosunod nga mga pangutana makagiya sa usa ka panaghisgotan:

• Unsa ang gitudlo niini nga sambingay kanimo mahitungod sa Dios ug sa mga gingharian, o mga kalibotan, nga Iyang gilalang?

• Sa unsang mga paagi nga kining sambingay makatabang kanato nga mas makasabot sa Iyang relasyon kanato?

Mahimo nimong gamiton ang bidyo nga “Kamo Importante ngadto Kaniya” (0:48) aron matabangan ang mga estudyante nga mahibalo nga taliwala sa Iyang daghang mga linalang, ang Dios nakaila kanila.

Doktrina ug mga Pakigsaad 88:73. “Ako modali sa akong buluhaton diha sa iyang angay nga panahon”

Aron matabangan ang mga estudyante nga makasabot unsay buot ipasabot sa dihang ang Ginoo mipahayag nga Siya mopadali sa Iyang buhat, mahimo nimong tabangan sila sa paghubit sa pulong nga mopadali. Ikonsiderar ang pagpakigbahin sa mosunod nga pamahayag gikan kang Presidente Russell M. Nelson ug paghisgot og mga paagi nga ang Ginoo nagdali sa Iyang buhat. Mahimo usab nimong hisgotan ang mga paagi nga kita moapil niini nga buluhaton ug nganong usa ka pribilehiyo nga buhaton kini.

Kini mao Ang Simbahan ni Jesukristo sa mga Santos sa Ulahing mga Adlaw. Kita ang Iyang mga katawhan sa pakigsaad. Ang Ginoo mipahayag nga Siya modali sa Iyang buluhaton diha sa iyang angay nga panahon [tan-awa sa Doktrina ug mga Pakigsaad 88:73], ug Siya mibuhat sa ingon sa nagkapaspas kaayo nga paagi. Kita adunay pribiliheyo nga makaapil sa Iyang balaang buhat. (Russell M. Nelson, “Putli nga Kamatuoran, Putli nga Doktrina, ug Putli nga Pagpadayag,” Liahona, Nob. 2021, 7)

Doktrina ug mga Pakigsaad 88:81. “Matag tawo kinsa napasidan-an magpasidaan sa iyang silingan”

Ikonsiderar ang paghisgot sa katuyoan sa mga pasidaan ug lain-laing mga paagi nga kita gipasidan-an.

Basaha ang Doktrina ug mga Pakigsaad 88:81 ug ang mosunod nga pamahayag ni Elder D. Todd Christofferson sa Korum sa Napulog Duha ka Apostoles. Hisgoti kon kinsa ang atong silingan ug kon unsaon nato sila pagpasidaan.

Samtang gibati gayod sa mga propeta ang katungdanan nga mopasidaan sa uban, katungdanan kini nga anaa usab sa uban. Gani, “matag tawo kinsa napasidan-an magpasidaan sa iyang silingan” [Doktrina ug mga Pakigsaad 88:81]. Kita nga nakadawat og kahibalo sa mahinungdanong plano sa kalipay—ug sa mga sugo kalabot niini—kinahanglang mobati og tinguha sa pagpaambit niana nga kahibalo tungod kay kini makahimo og dakong epekto dinhi ug sa kahangtoran. (D. Todd Christofferson, “Ang Tingog sa Pagpasidaan,” Liahona, Mayo 2017, 109)

Doktrina ug mga Pakigsaad 88:88–95. Mga timailhan nga nagpamatuod sa pag-anhi sa Manluluwas

Kini nga mga bersikulo makatabang sa mga estudyante sa pag-ila sa mga paagi nga ang Ginoo nakigsulti kanato sa pag-andam kanato alang sa Iyang pagbalik. Mahimong basahon sa mga estudyante kini nga mga bersikulo ug maghimo og lista sa mga panghitabo o mga katalagman nga ipadala sa Ginoo sa wala pa ang Iyang Ikaduhang Pag-anhi. Hisgoti kon sa unsang paagi ang Manluluwas mamulong kanato pinaagi niini nga mga panghitabo aron sa pagtabang kanato sa pagpangandam alang sa Iyang pagbalik. Tabangi ang mga estudyante nga makasabot nga daghan sa mga katalagman sa kataposang mga adlaw usa ka pagdapit sa paghinulsol ug sa pagpangandam sa pagsugat sa Ginoo. Mahimo usab nimong pahinumdoman ang mga estudyante nga dili kita kinahanglan nga mabalaka niini nga mga timailhan, kay sila makapahinumdom kanato sa mga saad sa Ginoo (tan-awa sa Doktrina ug mga Pakigsaad 45:35).