Leksiyon 103: Doktrina ug mga Pakigsaad 88

Doktrina ug mga Pakigsaad 88:76–80,117–141

Pangitaa ang Pagtulun-an pinaagi sa Pagtuon ug sa Hugot nga Pagtuo

Niini nga bahin sa Doktrina ug mga Pakigsaad 88, ang Ginoo mipadayag sa mga baroganan sa pagkat-on ug misugo ni Joseph Smith ug sa uban sa pag-organisar sa Tunghaan sa mga Propeta. Kadtong miapil sa tunghaan mao ang pagtinguha og kaalam “gikan sa labing maayo nga mga basahon” ug dungan nga magkat-on “pinaagi sa pagtuon ug usab pinaagi sa hugot nga pagtuo” (Doktrina ug mga Pakigsaad 88:118). Kini nga leksiyon makatabang sa mga estudyante nga makakat-on pinaagi sa hugot nga pagtuo kang Jesukristo sa nagkalainlaing mga kahimtang.

Mga Posibleng Kalihokan sa Pagkat-on

Gusto sa Langitnong Amahan nga magkat-on ako

Sa pagsugod sa leksiyon, ikonsiderar ang pagdapit sa mga estudyante sa pagpakigbahin sa ilang paborito nga mga asignatura sa eskwelahan o sa paghulagway sa makadiyot sa usa ka hilisgotan nga ganahan nilang kat-onan. Kon gikinahanglan, ipasabot nga ang sekular nga edukasyon nagtumong sa pagkat-on nga dili konektado sa relihiyon.

• Ngano kaha nga importante man ang pag-angkon og sekular ug espirituhanong kahibalo sa tibuok natong kinabuhi?

• Sa unsang paagi nga ang pagkat-on sa mga asignatura sa eskwelahan sama sa matematika o siyensiya lahi gikan sa pagtuon sa ebanghelyo ni Jesukristo? Sa unsang paagi kaha kini managsama?

Niadtong Enero 1833, si Joseph Smith ug ang ubang mga naghupot sa pagkapari nga nagpuyo sa Kirtland, Ohio, misunod sa mga instruksyon sa Ginoo sa pag-organisar og usa ka tulunghaan nga gitawag og Tulunghaan sa mga Propeta. Atol sa tingtugnaw sa 1833, ang mga sakop sa tunghaan nagtigom sa ibabaw nga lawak sa tindahan ni Newel K. Whitney. Sa kadugayan, nagtigom sila diha sa opisina sa pag-imprinta sa Simbahan ug sa Templo sa Kirtland. Basaha ang Doktrina ug mga Pakigsaad 88:77–80, mangita sa unsay gisugo sa Ginoo nga tun-an niining mga naghupot sa pagkapari.

Mahimo nimong isulat sa pisara ang mga hilisgotan sama sa geolohiya, kasaysayan, astronomiya, politika, ug heyograpiya ug ipaila sa mga estudyante ang mga pulong o hugpong sa mga pulong nga nagtumong niini nga mga hilisgotan.

• Unsay imong nadiskobrehan?

• Sumala sa bersikulo 80, nganong gisugo man sa Ginoo kining mga tawhana sa pagtuon sa ingon ka halapad nga mga hilisgotan?

• Sa unsang mga paagi nga ang pagkat-on niini nga mga butang makatabang kanato sa pagpangandam sa pag-alagad sa Ginoo?

Ipakigbahin sa mga estudyante nga ang nahibilin sa leksiyon magtutok sa mga baroganan sa pagkat-on nga makapalig-on sa ilang hugot nga pagtuo diha ni Jesukristo ug makaandam kanila sa mas maayo nga pag-alagad Kaniya. Mahimo nimong dapiton ang mga estudyante sa pagtinguha og personal nga pagpadayag mahitungod sa unsay ilang mahimo aron molambo sa ilang kaugalingong hugot nga pagtuo ug pagkat-on.

Pangitaa ang pagtulun-an pinaagi sa pagtuon ug sa hugot nga pagtuo

Ang Doktrina ug mga Pakigsaad 88:118 usa ka tudling sa doktrinal nga kahanas. Ikonsiderar ang pagdapit sa mga estudyante sa pagmarka sa mga tudling sa doktrinal nga kahanas sa lahi nga paagi aron dali ra kini nilang makit-an.

Basaha ang Doktrina ug mga Pakigsaad 88:118, mangita kon sa unsang paagi kita gidapit sa Ginoo sa pagpangita sa pagtulun-an.

Human ang mga estudyante misiksik diha sa tudling sa kasulatan, dapita sila sa pagpakigbahin kon unsay gipadayag sa Ginoo mahitungod sa pagkat-on. Ang mga tubag mahimong maglakip sa makugihon nga pagtinguha, pagtudlo sa usag usa, pagtinguha og kaalam gikan sa labing maayo nga mga basahon, ug pagtinguha og pagtulun-an pinaagi sa pagtuon ug sa hugot nga pagtuo.

• Unsa ang gitudlo niini nga bersikulo mahitungod sa pagkat-on?

• Unsa ang atong makat-onan mahitungod kon unsaon sa pagpalambo ang atong hugot nga pagtuo kang Jesukristo?

Kon gikinahanglan, mahimo nimong hisgotan nga sa sinugdanan sa bersikulo 118 ang Ginoo miingon nga adunay pipila nga walay hugot nga pagtuo. Mahimo usab nimong dapiton ang mga estudyante sa pagpakigbahin og klaro nga mga instruksiyon nga gihatag sa Ginoo sa pagtabang niadtong walay hugot nga pagtuo.

Ang mosunod usa ka paagi sa pagsulti og usa ka baroganan nga atong makat-onan gikan niini nga mga bersikulo: Kon kita makugihon nga magtinguha sa pagkat-on pinaagi sa pagtuon ug sa hugot nga pagtuo, ang atong hugot nga pagtuo kang Jesukristo molambo.

• Agi og dugang sa makugihon nga pagkat-on pinaagi sa atong pagtuon, unsa sa imong hunahuna ang gipasabot sa pagkat-on pinaagi sa hugot nga pagtuo?

Ikonsiderar ang pagpakita sa mosunod nga pamahayag ni Presidente Russell M. Nelson aron matabangan ang mga estudyante nga mas masabtan kon unsa ang gipasabot sa pagkat-on pinaagi sa hugot nga pagtuo. Mahimo usab nimong tan-awon ang bidyo nga “Hangupon ang Umaabut uban sa Hugot nga Pagtuo” gikan sa time code 10:28 hangtod sa 11:20.

Si Presidente Russell M. Nelson mipasabot:

Ang Ginoo mitudlo kanato unsaon sa pagpadugang sa atong hugot nga pagtuo pinaagi sa pagpangita og “pagtulun-an, gani pinaagi sa pagtuon ug usab pinaagi sa hugot nga pagtuo.” [Doktrina ug mga Pakigsaad 88:118]. Kita molig-on sa atong hugot nga pagtuo diha ni Jesukristo samtang kita maningkamot sa pagtuman sa Iyang mga sugo ug sa “kanunay mahinumdom Kaniya” [Moroni 4:3]. Dugang pa, ang atong hugot nga pagtuo madugangan matag higayon kita mogamit sa atong hugot nga pagtuo diha Kaniya. Mao kana ang gipasabot sa pagkat-on pinaagi sa hugot nga pagtuo.

Pananglitan, matag higayon nga kita adunay hugot nga pagtuo nga magmasulundon sa mga balaod sa Dios—bisan kon ang inila nga mga opinyon nagtamay kanato—o sa matag higayon nga kita mobatok sa kalingawan o mga ideolohiya nga nagsaulog sa pagsupak sa pakigsaad, kita nagpakita sa atong hugot nga pagtuo, nga maoy makapadugang sa atong hugot nga pagtuo. (Russell M. Nelson, “Hangopon ang Umaabot uban sa Hugot nga Pagtuo,” Liahona, Nob. 2020, 75)

• Unsa ang imong nakat-onan gikan sa pamahayag ni Presidente Nelson?

• Sa unsang paagi sa imong hunahuna nga ang pagkat-on pinaagi sa hugot nga pagtuo mahimong magamit sa nagkalain-laing mga oportunidad sa pagkat-on (sama sa panimalay, eskwelahan, seminary, ug simbahan)?

Aron matabangan ang mga estudyante sa pagtimbang-timbang sa ilang kasamtangan nga mga paningkamot sa pagtinguha sa pagkat-on pinaagi sa hugot nga pagtuo, ikonsiderar ang pagdapit kanila sa paglista sa mosunod nga mga kategoriya diha sa ilang mga journal sa pagtuon samtang imong gisulat kini diha sa pisara: panimalay, eskwelahan, seminary, ug simbahan. Dasiga ang mga estudyante sa paggrado sa ilang mga paningkamot sa makugihon nga pagkat-on pinaagi sa hugot nga pagtuo sa matag kategoriya gamit ang sukdanan gikan sa 1 ngadto sa 5, nga ang 5 mao ang labing maayo.

Kon gikinahanglan, pahinumdomi sila nga kabahin sa unsay gipasabot sa pagkat-on pinaagi sa pagtuon ug sa hugot nga pagtuo mao ang aktibo nga pag-apil sa mga oportunidad sa pagkat-on ug dayon paglihok sa mga butang nga ilang nakat-onan ug gibati. Dapita ang mga estudyante sa pagpili og usa ka dapit nga gusto nilang pauswagon ug tun-an ang nahibilin sa leksiyon nga naghunahuna nianang dapita.

“Han-aya ninyo ang inyong mga kaugalingon”

Basaha ang Doktrina ug mga Pakigsaad 88:119–126, mangita sa tambag gikan sa Ginoo nga makadugang sa atong abilidad sa pagkat-on pinaagi sa pagtuon ug sa hugot nga pagtuo.

Mahimo kang magdala og bag sa eskwelahan ug mag-andam og daghang mga piraso sa papel aron magamit sa mga estudyante diha sa gagmay nga mga grupo. Samtang magtuon ang mga estudyante sa Doktrina ug mga Pakigsaad 88:119–126, dapita sila sa pagsulat diha sa lain nga mga piraso sa papel sa mga pagtulun-an gikan sa Ginoo nga makatabang kanila sa pagkat-on pinaagi sa hugot nga pagtuo. Ang mga estudyante mahimong maglista sa mga kinaiya ug mga pamatasan nga gidasig sa Ginoo ug kadtong atong likayan. Kon mahuman na sila, mahimong ibutang sa mga estudyante ang mga piraso sa papel ngadto sa bag sa eskwelahan.

• Hain niini nga mga kinaiya o mga pamatasan ang nakaapekto sa imong abilidad sa pagkat-on?

• Hain niini nga mga kinaiya o mga pamatasan nga paminaw nimo gihatagan ka og impresyon sa Espiritu nga sulayan?

Hangyoa ang mga estudyante sa paghunahuna sa nagkalain-laing mga babag sa pagkat-on pinaagi sa hugot nga pagtuo nga ang mga tin-edyer mahimong makasugat sa nagkalain-laing mga kahimtang (panimalay, eskwelahan, seminary, ug simbahan). Ilista ang ilang mga ideya sa ubos sa matag kategoriya. Dapita ang mga estudyante sa pagpili og mga piraso sa papel gikan sa bag sa eskwelahan. Mahimo dayon nga basahon sa mga estudyante kon unsay nasulat ug mangulo og usa ka diskusyon kon sa unsang paagi nga ang tambag sa Ginoo makatabang sa usa ka tawo sa pagbuntog sa usa sa mga hagit sa pagkat-on. Mahimo usab nimong dapiton ang mga estudyante sa paghunahuna og mga paagi nga ang Manluluwas mihatag og ehemplo niini nga tambag.

Sama pananglit, mahimong moila ang mga estudyante og hagit sama sa pagtuon alang sa mga eksamin sa eskwelahan o pagdawat og mga tubag sa piho nga mga pag-ampo. Kon ang usa ka papel nga gipili gikan sa bag adunay pagtukod og usa ka balay sa pagpuasa nga nakasulat diha niini, ang mga estudyante mahimong maghisgot og mga ideya ug mga kasinatian kon sa unsang paagi ang pagpuasa ug pag-ampo makadugang sa ilang kapasidad sa pagkat-on ug mas makaila sa mga tubag gikan sa Ginoo. Kon imong gihangyo ang mga estudyante sa paghunahuna og usa ka ehemplo kon sa unsang paagi ang Manluluwas mihatag og ehemplo sa pagkat-on pinaagi sa pagpuasa, mahimo nilang mahinumdoman kon sa unsang paagi Siya nagpuasa sa pagpangandam alang sa Iyang buhat ug pangalagad (tan-awa sa Mateo 4:1–10). Balika ang kalihokan sa makadaghan aron sa pagtabang sa mga estudyante sa pag-ila sa kalabotan sa mga pagtulun-an ni Jesukristo diha sa ilang mga kinabuhi.

Personal nga paggamit

Sa pagtapos, paghatag og panahon alang sa mga estudyante sa pagpamalandong og mga paagi nga mas magtinguha sila sa pagkat-on pinaagi sa hugot nga pagtuo. Mahimo nimo silang awhagon sa pagrekord sa ilang mga hunahuna diha sa ilang mga journal sa pagtuon gamit ang mosunod nga mga pag-aghat.

• Pagpili og usa ka dapit sa imong kinabuhi diin imong mapauswag ang imong mga paningkamot sa pagkat-on pinaagi sa hugot nga pagtuo (sama sa panimalay, eskwelahan, seminary, ug simbahan).

• Sa imong hunahuna, sa unsang paagi ang pagkat-on pinaagi sa hugot nga pagtuo makatabang kanimo niini nga bahin?

• Unsa man ang imong paningkamotan nga buhaton aron makakat-on pinaagi sa hugot nga pagtuo kang Jesukristo?

Pagdapit og andam nga mga estudyante sa pagpakigbahin sa pipila sa ilang mga ideya. Kini mahimo usab nga usa ka maayong panahon sa pagdapit sa pagpamatuod sa estudyante gikan niadtong nakasinati sa nangaging mga kalamposan.

Dugang nga mga Kapanguhaan

Asa ako makakat-on pa og dugang mahitungod sa Tunghaan sa mga Propeta?

• Mga Hisgotanan sa Kasaysayan sa Simbahan, “Tulunghaan sa mga Propeta,” ChurchofJesusChrist.org

Doktrina ug mga Pakigsaad 88:118. Asa nako pangitaon ang “mga pulong sa kaalam”?

Si Presidente Dallin H. Oaks sa Unang Kapangulohan mipasidaan:

Nagpuyo kita sa panahon sa gipalapad ug gisabwag og maayo nga impormasyon. Apan dili tanan niini nga impormasyon tinuod. Kinahanglang magmatngon kita samtang mangita kita sa kamatuoran ug magpili og mga tinubdan niana nga pagsiksik. Dili gayod nato hunahunaon ang sekyular nga kabantog o awtoridad isip haom nga mga tinubdan sa kamatuoran. Kinahanglang magmatngon kita mahitungod sa pagsalig sa impormasyon o tambag nga gitanyag sa mga tigpasiugdang mga artista, iladong mga atleta, o wala hiilhing mga tinubdan gikan sa internet. Ang kabatid sa usa ka butang dili gayod isipon nga kabatid sa kamatuoran sa ubang mga aspeto. …

Kon mangita kita sa kamatuoran mahitungod sa relihiyon, kinahanglan natong gamiton ang espiritwal nga mga paagi niana nga pagsiksik: pag-ampo, saksi sa Espiritu Santo, ug pagtuon sa mga kasulatan ug sa mga pulong sa modernong mga propeta. (Dallin H. Oaks, “Kamatuoran ug ang Plano,” Liahona, Nob. 2018, 25)

Sa unsang paagi nga ang pagkat-on pinaagi sa hugot nga pagtuo magpanalangin sa akong kinabuhi?

Si Elder David A. Bednar sa Korum sa Napulog Duha ka Apostoles misaad og mga panalangin niadtong nagtinguha sa pagkat-on pinaagi sa hugot nga pagtuo:

Samtang maglantaw kita sa umaabot ug magpaabot sa mas nagkaguliyang ug masamok nga kalibotan nga atong gipuy-an, ako nagtuo nga importante para kanatong tanan ang pagdugang sa atong kapasidad sa pagpaningkamot sa pagkat-on pinaagi sa hugot nga pagtuo. Sa atong personal nga kinabuhi, sa atong mga pamilya, ug sa Simbahan, makadawat kita sa mga panalangin sa espirituhanong kalig-on, direksiyon, ug proteksiyon samtang magtinguha kita pinaagi sa hugot nga pagtuo sa pag-angkon ug paggamit sa espirituhanong kahibalo. (David A. Bednar, “Paningkamot sa Pagkat-on pinaagi sa Hugot nga Pagtuo,” Liahona, Sept. 2007, 17)

Dugang nga mga Kalihokan sa Pagkat-on

Doktrina ug mga Pakigsaad 88:118–126. Tambag sa pagpalambo sa kasinatian sa pagkat-on diha sa klase sa seminary

Mahimong makatabang ang panagsang pagdapit sa mga estudyante sa pagtimbang-timbang sa ilang kasinatian sa seminary. Mahimo nimong sugdan pinaagi sa pagpangutana sa pipila ka mga pangutana sama sa mosunod:

• Unsa ang pipila ka mga butang nga maayo natong nabuhat isip usa ka klase sa seminary?

• Unsa ang pipila ka mga dapit nga mahimo natong pauswagon?

Dapita ang mga estudyante sa pagbasa sa Doktrina ug mga Pakigsaad 88:118–126, mangita sa mga baroganan nga makapauswag sa kasinatian sa pagkat-on diha sa usa ka klase sa seminary. Samtang ang mga estudyante makadiskobre og mga baroganan diha sa mga kasulatan, mahimo nimo silang dapiton sa paglista niini diha sa pisara. Mahimo usab nimong bahinon ang mga estudyante ngadto sa gagmay nga mga grupo ug dapiton sila sa pagpili og usa sa mosunod nga mga pangutana nga hisgotan. Kon mahuman na sila sa paghisgot, pagdapit og pipila ka estudyante sa pagpakigbahin sa ilang mga hunahuna diha sa klase.

• Sa unsang paagi ang atong personal nga pagpangandam ug espirituhanong mga batasan makapauswag sa kinatibuk-ang kasinatian sa pagkat-on alang sa tanan? (Tan-awa sa mga bersikulo 119, 124.)

• Sa unsang paagi nga ang pagpaningkamot sa pagbuhat sa tanan nga mga butang “sa ngalan sa Ginoo” samtang anaa sa seminary makapalig-on sa atong tinguha sa pagsunod Kaniya? (bersikulo 120).

• Sa unsang paagi nga ang paghunong sa “walay hinungdan nga mga pakigpulong” ug sa dili angay nga mga tinguha mas makadapit sa impluwensiya sa Espiritu Santo? (bersikulo 121).

• Sa unsang paagi nga ang paghatag sa tanan og “usa ka managsama nga kahigayonan” sa pagpakigbahin ug pagtinguha sa “[p]aghinigugmaay sa usag usa” makapalambo sa panaghiusa diha sa klase? (mga bersikulo 122–123).

Doktrina ug mga Pakigsaad 88:119. “Balay sa Dios”

Ikonsiderar ang pagpakita og hulagway sa Kirtland Temple. Ipasabot ngadto sa mga estudyante nga samtang ang Ginoo nagtudlo sa unang mga Santos sa pagtinguha sa pagkat-on pinaagi sa pagtuon ug sa hugot nga pagtuo (tan-awa sa Doktrina ug mga Pakigsaad 88:118), Siya usab mimando kanila sa pagtukod og usa ka templo diin sila makadawat og dugang nga kahayag ug kahibalo (tan-awa sa Doktrina ug mga Pakigsaad 88:119). Mahimo nimong ipakigbahin kini nga pamahayag ni Presidente Russell M. Nelson: “Ganahan ang Ginoo nga mobuhat sa Iyang kaugalingong pagtudlo diha sa Iyang balaan nga balay” (“Ang Bugti sa Gahom sa Priesthood,” Liahona, Mayo 2016, 68). Mahimo dayon nimong dasigon ang mga estudyante sa pagkonsiderar sa bisan unsa nga gitudlo sa Ginoo kanila samtang nangandam ug nagtambong sa templo. Dapita ang mga estudyante sa pagtuon sa Doktrina ug mga Pakigsaad 88:119, mangita sa matang sa balay nga gisugo sa Ginoo nga itukod. Ilista ang mga tubag sa estudyante diha sa pisara ug hisgoti ang mga paagi nga ang templo makapalig-on sa hugot nga pagtuo ngadto sa Langitnong Amahan ug ni Jesukristo.

Doktrina ug mga Pakigsaad 88:125. “[Ang] higot sa gugma nga putli”

Human maanalisar sa mga estudyante ang tambag sa Ginoo diha sa Doktrina ug mga Pakigsaad 88:118–126, mahimo kang mogahin sa makadiyot sa paghisgot sa kamahinungdanon sa bersikulo 125 ug sa unsang paagi ang hiyas sa gugmang putli makatabang kanato sa pagkat-on pinaagi sa hugot nga pagtuo. Mahimo nimong dapiton ang mga estudyante sa pagpangita og dugang nga mga pakisayran mahitungod sa gugma nga putli (tan-awa sa Moroni 7:45, 47) ug ipangutana ang pipila sa mosunod nga mga pangutana sa panaghisgot:

• Ngano kaha nga ang Ginoo nagsugod sa bersikulo 125 gamit ang hugpong sa mga pulong nga “Ug labaw sa tanan nga mga butang”?

• Unsa kaha kini mahisama ang usa ka tawo nga magsul-ob sa ilang kaugalingon sa gugmang putli?

• Sa unsang paagi nga ang pagpaningkamot alang sa gugma nga putli makatabang kanato nga makakat-on pinaagi sa hugot nga pagtuo?