Leksiyon 101: Doktrina ug mga Pakigsaad 88

Doktrina ug mga Pakigsaad 88:14–41

Paningkamot sa Pagtuman sa Celestial nga Balaod

Diha sa Doktrina ug mga Pakigsaad 88, ang Ginoo mipadayag sa mga kamatuoran mahitungod sa Pagkabanhaw ug sa mga gingharian sa himaya lakip ang celestial nga himaya. Kini nga mga kamatuoran makapahiusa ug makapanalangin sa mga miyembro sa Simbahan samtang sila matinud-anong nagsunod ni Jesukristo. Kini nga leksiyon makatabang sa mga estudyante nga madugangan ang ilang pagsalig nga sila makadawat sa celestial nga himaya.

Mga Posibleng Kalihokan sa Pagkat-on

Tumong sa celestial nga himaya

Dapita ang mga estudyante sa pagdrowing og hagdanan diha sa ilang mga journal sa pagtuon ug pamarkahi ang tumoy sa hagdanan og “Ang Celestial nga Gingharian.” Hangyoa ang mga estudyante sa pagdrowing diin ilang makita ang ilang kaugalingon diha sa hagdanan. Awhaga sila sa pagrekord sa ilang mga tubag sa mosunod nga mga pangutana:

• Gibati ba nimo nga ang imong kasamtangan nga mga pagpili nagtabang kanimo sa pag-uswag padulong sa celestial nga gingharian? Ngano o nganong dili?

• Unsa ka kamasaligon nga sa kataposan makab-ot nimo ang celestial nga himaya sa tabang ni Jesukristo?

Pahinumdomi ang mga estudyante nga tungod kay si Jesukristo mao ang atong Manluluwas, makasalig kita Kaniya sa pagtabang kanato nga mausab, maghinulsol, ug mohatag og kalig-on samtang kita maningkamot nga makab-ot ang celestial nga himaya.

Ang pagpadayag sa Ginoo nga narekord diha sa Doktrina ug mga Pakigsaad 88 naghatag og balaanong panabot aron matabangan kita nga makasabot sa mahangtorong mga kamatuoran. Diha sa seksiyon 88, atong mahibaloan ang mga detalye mahitungod sa plano sa atong Langitnong Amahan, mga kamatuoran mahitungod ni Jesukristo, ug kon unsaon nato pagbalik ngadto sa Ilang presensiya.

Mahimo nimong ipakigbahin kon unsay imong gibati bahin sa katahom ug kahalangdon sa plano sa Langitnong Amahan. Dasiga ang mga estudyante samtang sila magtuon karon sa pagtinguha og inspirasyon aron makahibalo sa mga paagi nga sila makalihok diha sa hugot nga pagtuo ug makadawat sa tabang sa Manluluwas samtang sila mouswag padulong sa celestial nga gingharian.

Ang atong mortal nga mga lawas

Ipasabot nga ang importante nga bahin sa plano sa Dios mao nga kita mahimong sama Kaniya, sa espirituhanon ug sa pisikal nga paagi. Sa atong pagkahimugso, kita adunay pisikal nga lawas. Moabot ang panahon nga kini nga lawas mamatay ug mabanhaw.

Ikonsiderar ang pagrekord sa mga tubag sa mga estudyante sa mosunod nga pangutana diha sa pisara:

• Unsay imo nang nahibaloan bahin sa pagkabanhaw?

Kon gikinahanglan, mahimong gamiton sa mga estudyante ang Mga Hilisgotan ug Mga Pangutana, “Resurrection [Pagkabanhaw],” topics.ChurchofJesusChrist.org aron suportahan ang ilang mga tubag.

Mahimong kompletohon sa mga estudyante ang mosunod nga kalihokan sa pagtuon uban sa usa ka kapares. Mahimo nimong ipakita ang mga pangutana alang sa mga estudyante aron matan-aw, nga ang matag pares responsable sa pagtubag sa usa sa mga pangutana.

Basaha ang Doktrina ug mga Pakigsaad 88:14–17, 27–31. Pamalandongi ang mosunod samtang magbasa ka:

• Unsa ang imong nakat-onan mahitungod sa Pagkabanhaw?

• Unsa ang imong nakat-onan mahitungod sa tulo ka ang-ang sa himaya?

Dapita ang mga estudyante sa pag-report sa unsay ilang nakat-onan. Paminaw og maayo ug pangutana ogfollow-up nga mga pangutana aron matabangan nga maklaro ang ilang pagsabot kon gikinahanglan. Kon ang mga estudyante adunay dugang nga mga pangutana, mahimo ninyong hisgotan kini isip usa ka klase.

Pagsukod sa kahibalo sa mga estudyante: Alang sa dugang nga pagpraktis niini, tan-awa ang pagbansay nga giulohan nga “Pangandam kanunay sa pagtubag sa espirituhanong mga pag-aghat mahitungod sa mga panginahanglan sa mga tigkat-on.” nga makita sa Pagpalambo sa mga Kahanas sa Magtutudlo: Pagtudlo pinaagi sa Espiritu. Ikonsiderar ang pagpraktis sa kahanas nga “Pangutana aron sa pagsukod sa nakat-onan sa dili pa mopadayon sa leksiyon.”

Ang pagtuman sa mga balaod sa Dios modala ngadto sa himaya

Ikonsiderar ang pagdapit sa mga estudyante sa pagpakigbahin sa unsay ilang gihanduraw kon unsa kaha ang makabaton og celestial nga lawas o kon nganong gusto nila nga makadawat og celestial nga lawas sa Pagkabanhaw.

Kon ang mga estudyante kaganena nakigtinabangay uban sa usa ka kapares, mahimo silang makigtinabangay sa lain na pod nga kapares alang sa mosunod nga kalihokan sa pagtuon.

Basaha ang Doktrina ug mga Pakigsaad 88:21–24, 34–36, 38–39, mangita kon sa unsang paagi kaha kita mabanhaw nga adunay celestial nga lawas. Ikonsiderar ang pagmarka sa mga pulong ug mga hugpong sa mga pulong nga mipatigbabaw diha kanimo.

• Unsa sa imong hunahuna ang importante nga masabtan dinhi niini nga mga bersikulo?

• Unsa ang nagtino sa himaya nga atong madawat human sa Kataposang Paghukom? Ngano man?

Hatagi og panahon ang mga estudyante sa paghisgot sa ilang nakat-onan. Ang mga estudyante mahimong mopahayag og lainlaing mga kamatuoran, lakip ang usa ka butang sama sa kon kita mosunod sa celestial nga mga balaod, makadawat kita og celestial nga himaya o sa Pagkabanhaw, makadawat kita og himaya sumala sa balaod nga atong gisunod. Mahimo nimong isulat kini nga mga kamatuoran diha sa pisara.

Aron matabangan ang mga estudyante nga makasabot ug mobati sa kaimportante sa balaanong mga balaod, mahimo nimong ipakigbahin ang mosunod nga pamahayag:

Si Elder D. Todd Christofferson sa Korum sa Napulog Duha ka Apostoles mitudlo:

Ang balaod sa celestial nga gingharian mao, siyempre, ang balaod sa ebanghelyo ug mga pakigsaad, diin naglakip sa atong makanunayon nga paghinumdom sa Manluluwas ug sa atong pasalig sa pagkamasulundon, pagsakripisyo, pagpahinungod, ug pagkaligdong. (D. Todd Christofferson, “Dali na diri sa Zion,” Liahona, Nob. 2008, 39)

• Unsa ang imong nakat-onan mahitungod sa gugma, kaangayan, ug kaluoy sa Langitnong Amahan?

• Unsay imong mga pagbati mahitungod kon sa unsang paagiha Siya nagalihok sa tagsa-tagsa sa Iyang mga anak?

Tabang samtang nagpadayon sa dalan

Dapita ang mga estudyante sa pagpamalandong kon unsaon nila sa pagtubag ang usa ka higala kinsa naluya ug mibati nga dili paigo ang iyang kamaayo aron makadawat og celestial nga himaya. Mahimo nimong dapiton ang mga estudyante sa pagbasa sa mosunod nga mga bersikulo, dayon sa pagsulat og mubo nga tubag sa kabalaka sa ilang higala.

Basaha ang 3 Nephi 27:19–20, mangita kon sa unsang paagi gihimo sa Langitnong Amahan nga posible alang sa Iyang mga anak nga makadawat og celestial nga himaya. Mahimo nimong ikonektar kini nga mga bersikulo ngadto sa Doktrina ug mga Pakigsaad 88:21, 34.

Ikonsiderar ang pagdapit sa mga estudyante sa pagmarka sa pulong nga gawas diha sa 3 Nephi 27:19. Mahimo nimong pangutan-on ang mga estudyante kon sa unsang paagi kini nakatabang kanila nga makasabot sa mga pulong ni Jesus ngadto sa mga Nephite.

Aron matabangan ang mga estudyante nga makaila sa paglaom ug kausaban nga nahimong posible kanila pinaagi ni Jesukristo, mahimo nimong ipakigbahin ang mosunod nga pamahayag:

Si Elder D. Todd Christofferson sa Korum sa Napulog Duha ka Apostoles mitudlo:

Tingali sama sa atong pag-ampo alang sa kaluoy, kita kinahanglang mag-ampo alang sa panahon ug oportunidad sa pagbuhat ug pagpaningkamot ug pagbuntog sa sala. Segurado gayod nga ang Ginoo mopanalangin sa tawo nga nagtinguha nga takus nga moatubang sa hukmanan, kinsa determinadong naningkamot matag adlaw nga pulihan ang kahuyang og kalig-on. Ang tinuod nga paghinulsol, tinuod nga kausaban mahimong magkinahanglan og balik-balik nga pagsulay, apan adunay butang nga makapalunsay ug makapabalaan niana nga paningkamot. Ang balaang pagpasaylo ug pag-ayo hilom nga moabot niana nga kalag, kay sa pagkatinuod, “ang hiyas mohigugma sa hiyas; ang kahayag mounong ngadto sa kahayag; [ug] ang kaluoy adunay kapuangod sa kaluoy ug moangkon sa iyang kaugalingon” (D&P 88:40).

Pinaagi sa paghinulsol kanunay natong mapalambo ang atong kapasidad sa pagsunod sa celestial nga balaod, kay atong masayran nga “siya kinsa dili makahimo sa pagsunod sa balaod sa celestial nga gingharian dili makalahutay sa celestial nga himaya” (D&C 88:22). (D. Todd Christofferson, “Ang Balaanong Gasa sa Paghinulsol,” Liahona, Nob. 2011, 39)

• Sa unsang paagi nga ang pagsabot sa Pag-ula sa Manluluwas makaimpluwensiya sa imong pagtuo sa pagkab-ot sa celestial nga himaya?

• Gikan sa unsay imong natun-an karon, unsa kaha ang imong isulti ngadto sa usa ka tawo nga nahadlok nga dili siya makakab-ot sa celestial nga himaya?

Dapita ang mga estudyante sa pagsusi pag-usab sa hagdanan nga ilang gidrowing sa pagsugod sa klase. Awhaga sila sa pagsulat diha o sa palibot sa hagdanan sa unsay ilang nakat-onan nga makatabang kanila nga mas maduol ngadto sa celestial nga gingharian. Ang mga estudyante mahimong morekord sa ilang mga hunahuna o mga pagbati mahitungod sa Langitnong Amahan ug ni Jesus. Mahimo usab nilang ilakip kon sa unsang paagi ang ilang determinasyon ug paglaom nga makab-ot ang celestial nga himaya napalig-on o kon sa unsang paagi ang mga kamatuoran nga ilang nakat-onan makaimpluwensiya sa ilang mga pagpili karon ug sa umaabot.

Kon itugot sa panahon, mahimo kang magdapit og usa o duha ka estudyante sa pagpakigbahin sa ilang mga hunahuna diha sa klase.

Dugang nga mga Kapanguhaan

Sa unsang paagi ang mga balaod sa Dios nagpamatuod sa Iyang gugma alang kanato?

Si Presidente Russell M. Nelson mitudlo:

Ang balaanong mga balaod mao ang mga gasa sa Dios ngadto sa Iyang mga anak. … Akong isulti kini sa mubo kutob sa akong mahimo: Samtang kamo nagsunod sa mga balaod sa Dios, kamo nag-uswag ngadto sa kahimayaan. …

… Ang labing dako nga mga panalangin sa Dios gitagana alang niadto kinsa mosunod sa Iyang mga balaod, sama sa Iyang gipasabot: “Alang sa tanan kinsa makabaton og panalangin sa akong mga kamot kinahanglan nga motuman sa balaod nga gitudlo alang niana nga panalangin” [Doktrina ug mga Pakigsaad 132:5]. Ang mga balaod sa Dios hingpit nga nadasig pinaagi sa Iyang walay kinutoban nga gugma alang kanato ug sa Iyang tinguha nga kita mahimong tanan nga atong mahimo. …

… Ang panalangin sa kahimayaan dili sayon. Ang mga kinahanglanon naglakip sa usa ka nakapunting ug makanunayon nga paningkamot sa pagsunod sa mga balaod sa Dios, hugot nga paghinulsol kon kita dili. Apan ang ganti sa pagbuhat niini mas dako pa kaayo kay sa bisan unsa nga atong mahanduraw, tungod kay kini nagdala kanato og hingpit nga kalipay dinhi ug “walay kataposan nga kalipay” [Mosiah 2:41] sa umaabot. (Russell M. Nelson, “The Love and Laws of God” [debosyonal sa Brigham Young University, Sept.°17, 2019], speeches.byu.edu)

Doktrina ug mga Pakigsaad 88:27. Unsay buot ipasabot nga kita mobangon isip usa ka “espirituhanonnga lawas”?

Si Presidente Joseph Fielding Smith (1876–1972) mitudlo:

Sa pagkabanhaw gikan sa mga patay, ang mga lawas nga gipahimutang sa kinaiyanhon nga mga lawas mogula sa espirituhanon nga mga lawas. Sa ato pa, sa pagka-mortal ang kinabuhi sa lawas anaa sa dugo, apan ang lawas kon banhawon na ngadto sa pagka-imortal pagabuhion pinaagi sa espiritu ug dili pinaagi sa dugo. Busa, kini nahimong espirituhanon, apan kini gilangkuban sa unod ug mga bukog, sama sa lawas ni Jesus, kinsa mao ang ehemplo. (Joseph Fielding Smith, Doctrines of Salvation, comp. Bruce R. McConkie [1955], 2:284–85)

Doktrina ug mga Pakigsaad 88:20–24. Unsa ang motino kon hain nga gingharian sa himaya ang akong madawat sa Kataposang Paghukom?

Si Presidente Russell M. Nelson mipamatuod:

Pagahukman kamo sa matag usa sumala sa inyong mga buhat ug sa mga tinguha sa inyong mga kasingkasing,[tan-awa sa D&P 137:9]. Dili kamo kinahanglan magbayad sa utang sa uban. Ang inyong kataposan nga pagbutang sa celestial, terrestrial, o telestial nga gingharian dili matino pinaagi sa sulagma. Ang Ginoo naghatag og dili mausab nga mga kinahanglanon alang sa matag usa. Makahimo kamo sa pagkahibalo kon unsay gitudlo sa mga kasulatan, ug isunod ang inyong mga kinabuhi sumala niini [tan-awa sa Juan 14:2; 1 Mga Taga-Corinto 15:40–41; Doktrina ug mga Pakigsaad 76:50–119;98:18]. (Russell M. Nelson, “Constancy amid Change,” Ensign, Nov. 1993, 35)

Doktrina ug mga Pakigsaad 88:35. Unsay mahitabo niadtong molapas sa mga balaod sa Dios?

Si Elder Dale G. Renlund sa Korum sa Napulog Duha ka Apostoles mipasabot:

Human sa kamatayon, kita makadawat sa unsay angay alang kanato ug “maglipay [lamang] niana diin [kita] mouyon sa pagdawat” [Doktrina ug mga Pakigsaad 88:32]. Ang pag-amgo sa atong mahangtoron nga padulngan mag-agad sa atong mga pagpili. Kini nagkinahanglan sa paghimo ug pagtuman sa sagradong mga pakigsaad. Kini nga dalan sa pakigsaad mao ang paagi nga kita makaduol ngadto ni Kristo ug gibase sa hingpit nga kamatuoran ug mahangtoron, dili mausab nga balaod. Kita dili makahimo og atong kaugalingong dalan ug molaom nga mosangpot sa mga saad sa Dios. Ang pagpaabot sa Iyang mga panalangin samtang wala magsunod sa mahangtorong mga balaod diin kini gipasikad [tan-awa sa Doktrina ug mga Pakigsaad 130:20–21] wala magiyahi sa sakto, sama sa paghunahuna nga kita mohikap sa init nga stove ug “mohukom” nga dili mapaso. …

… Gawasnon kita sa pagpili, apan kita dili makapili sa mga sangpotanan sa dili pagsunod sa gipadayag nga dalan [tan-awa sa 2 Nephi 2:5, 16, 26–27]. Ang Ginoo nag-ingon “Kana nga naglapas sa usa ka balaod, ug wala magsunod pinaagi sa balaod, apan nagtinguha nga mahimo nga usa ka balaod ngadto sa iyang kaugalingon, … dili mabalaan pinaagi sa balaod, ni pinaagi sa kaluoy, kaangayan, ni paghukom” [Doktrina ug mga Pakigsaad 88:35]. Kita dili makatipas gikan sa dalan sa Langitnong Amahan ug dayon basolon Siya sa ubos nga mga sangpotanan. (Dale G. Renlund, “Ang Inyong Diosnong Kinaiya ug Mahangtorong Padulngan,” Liahona, Mayo 2022, 75–76)

Dugang nga mga Kalihokan sa Pagkat-on

Leksiyon nga mogamit og butang

Isip alternatibo nga sinugdanan sa bahin nga “Ang atong mortal nga mga lawas,” mahimo nimong tabangan ang mga estudyante sa pagrebyo sa daklit sa doktrina sa Pagkabanhaw. Ipakita ang usa ka guwantes ug ipasabot nga kini nagrepresentar sa usa ka pisikal nga lawas. Dapita ang usa ka estudyante sa pagsul-ob sa guwantes ug sa pagkitoy sa iyang mga tudlo. Mahimo kang mangutana sama sa:

• Kon ang gwantes nagrepresentar sa usa ka pisikal nga lawas, unsa ang girepresentar sa kamot?

• Unsa kaha ang mahitabo kon ang “lawas” mahimulag gikan sa “espiritu”?

Ang mga balaod sa Dios nanalipod kanato

Aron matabangan ang mga estudyante sa pagpamalandong sa panalipod nga gihatag sa mga balaod sa Dios, mahimo nimong ikonsiderar ang pagpasalida sa usa sa mosunod nga mga bidyo:

• “A Secure Anchor” (3:36)

• “Why Does God Give Us Commandments?” (0:39)

• “Blessed and Happy Are Those Who Keep the Commandments of God” (5:41)

Usa ka hagdanan

Kon ang mga estudyante motimbang-timbang sa ilang hagdanan paingon sa kataposan sa leksiyon, mahimo nimong ipakigbahin ug hisgotan ang mosunod nga pamahayag ni Propeta Joseph Smith (1805–44).

Kon ikaw mosaka og hagdanan, ikaw kinahanglan magsugod sa ubos, ug motikang sa kada ang-ang, hangtod ikaw moabot sa ibabaw; ug ingon usab niini ang mga baroganan sa ebanghelyo—kinahanglan nga ikaw magsugod sa sinugdanan, ug mopadayon hangtod nga ikaw makakat-on sa tanang mga baroganan sa kahimayaan. Apan mahimo nga madugay-dugay nga ikaw makaaninag sa luyo sa tabil sa dili pa ikaw makakat-on kanila. Dili ang tanan mahimong masabtan dinhi sa kalibotan, may dako nga buluhaton sa pagkat-on sa atong kaluwasan ug kahimayaan nga molungtad lapas sa lubnganan. (Mga Pagtulun-an sa mga Presidente sa Simbahan: Joseph Smith [2007], 323).

Ang han-ay sa Pagkabanhaw

Mahimo nimong dapiton ang mga estudyante sa pagbasa sa Doktrina ug mga Pakigsaad 88:96–102, mangita kon unsay mahitabo sa Pagkabanhaw. Mahimo nimong bahinon ang pagbasa taliwala sa mga bersikulo sa daghang pagkabanhaw (mga bersikulo 96–98, 99, 100–101, 102). Mahimo nimong ikonsiderar ang pagpakigbahin sa mosunod aron sa dugang pagpasabot niini nga mga bersikulo:

Ang mga matarong nga buhi atol sa Ikaduhang Pag-anhi sa Ginoo “pagabuhion ug pagasakgawon aron sa pagsugat kaniya” (D&P 88:96). Kadtong makapanunod sa celestial nga gingharian mabanhaw og una (tan-awa sa D&P 88:96–98). Human kadto kinsa makapanunod sa celestial nga gingharian mabanhaw, kadto kinsa makapanunod sa terrestrial nga gingharian mabanhaw (tan-awa sa D&P 88:99; tan-awa usab sa D&P 76:71–79). Kini mao ang mga indibidwal kinsa wala modawat ni Jesukristo samtang sila buhi apan midawat Kaniya didto sa kalibotan sa espiritu (tan-awa sa D&P 88:99). Human sa Milenyum, ang “kataposan nga pagkabanhaw” (D&P 76:85), o ang pagkabanhaw sa mga dili makiangayon, mahitabo. Kini nga mga indibidwal mao kadto kinsa makapanunod sa telestial nga gingharian ug, sa kataposan, sa mga anak sa kapildihan “kinsa magpabilin nga mahugaw sa gihapon” (tan-awa sa D&P 88:100–102). (Manwal sa Estudyante sa Doktrina ug mga Pakigsaad [2018], 488)