“98-р хичээл—Сургаал ба Гэрээ 86: Аврагч Израилыг цуглуулж байна,” Сургаал ба Гэрээний семинарын багшийн гарын авлага (2025)
“Сургаал ба Гэрээ 86,” Сургаал ба Гэрээний семинарын багшийн гарын авлага
98-р хичээл: Сургаал ба Гэрээ 85–87
Сургаал ба Гэрээ 86
Аврагч Израилыг цуглуулж байна
Сургаал ба Гэрээ 86-д цэдэглэгдсэн илчлэлтээр дамжуулан Аврагч буудай болон зэрлэг өвсний тухай сургаалт зүйрлэлийнхээ анхны тайлбарт нэмэлт утгыг илчилсэн (Матай 13:36–43). Тэрээр Хоёр дахь ирэлтдээ бэлтгэн зөв шударга хүмүүсийг цуглуулах Өөрийн ажлын талаар заасан. Энэ хичээл нь суралцагчдад Аврагчтай хамт Израилыг цуглуулахаар хичээж зүтгэхэд тусалж чадна.
Боломжит суралцах үйл ажиллагаа
Аврагч Өөрийн хүмүүсийг цуглуулдаг
Суралцагчдыг хамт байх дуртай хүмүүсээ, мөн яагаад дуртай гэдгээ бодож үзэхэд урь.
Дараа нь та суралцагчдыг Есүс Христийн дэлхий дээрх тохинууллын үеэр дэргэд нь байхыг хүссэн хүмүүсийн талаар бодоход урьж болно. Шаардлагатай бол та дараахтай адил хэд хэдэн жишээг хуваалцаж болно. Жишээлбэл: Матай 9:10; 19:1–2, 13–15; Иохан 6:1–14; 3 Нифай 17:1–5.
-
Хүмүүс яагаад Аврагчийн дэргэд байхыг хүссэн гэж та нар бодож байна вэ?
-
Аврагч яагаад хүмүүсийг Өөр дээр нь цугларахад урьдаг гэж та нар бодож байна вэ?
Аврагч яагаад биднийг Өөр дээр нь цугларч ирээсэй гэж хүсдэгийг заадаг зарим судрыг судлахад тэднийг урь. Жишээлбэл: Матай 11:28–30; 3 Нифай 9:13–14; 10:4–6.
Аврагчийг дагах эсвэл Түүнд цугларах хүслийнхээ талаар бод. Бусдыг Түүнд цуглуулахад туслах хүслээ бас бод. Судлах явцдаа та өөрийгөө болон бусдыг Есүс Христэд цуглуулах нь хэр чухлыг ойлгуулах үнэнийг олж мэд.
Буудай болон зэрлэг өвсний тухай сургаалт зүйрлэл
Сургаал ба Гэрээ 86 дахь илчлэлт өгөгдөх үеийн түүхэн нөхцөл байдлыг ойлгоход нь суралцагчдад туслахын тулд дараах догол мөрийг уншиж өг эсвэл тоймлон хэл.
Иосеф Смит, Фредерик Г.Виллиамс хоёрыг Библийн сүнслэгээр өдөөгдсөн орчуулга дээр ажиллаж байхад Аврагч буудай болон зэрлэг өвсний тухай сургаалт зүйрлэлийн тайлбарыг илчилсэн. Энэ орчуулга Сургаал ба Гэрээ 86-д цэдэглэгдсэн байдаг.
Суралцагчдыг Сургаал ба Гэрээ 86-г судлахын өмнө буудай болон зэрлэг өвсний тухай сургаалт зүйрлэлийг ойлгоход тусал. Тэд Матай 13:24–30-ийг уншиж, нэг нь сургаалт зүйрлэлийг хураангуйлан хуваалцаж эсвэл та “Jesus Declares the Parables of the Wheat and Tares, Mustard Seed, and Leaven” видеог цагийн код 0:00-оос 1:30 хүртэл үзүүлж болно. Энэ видеог ChurchofJesusChrist.org-оос үзэх боломжтой.
Зэрлэг өвс гэдэг нь хортой хогийн ургамлын нэг төрөл гэдгийг тайлбарлах нь тустай байж болох юм. Буудай болон зэрлэг өвс нахиалахдаа бараг л ялгагдахгүй адилхан боловч боловсорч гүйцээд ирэхээрээ ялгарч харагддаг. Хэрэв хүн буудай болон зэрлэг өвсийг боловсрохоос нь өмнө, зэрлэг өвсийг зулгаах гэж оролдвол мөн хэмжээний буудай хамт зулгаагдаж мэднэ.
-
Энэ сургаалт зүйрлэлийн юу нь та нарын анхаарлыг татсан бэ?
-
Буудай болон үрийн сүүл (зэрлэг өвс) юуг бэлгэддэг вэ? (Матай 13:38-ыг үзнэ үү.)
Аврагч сургаалт зүйрлэлийг ийн тайлбарласан
Сургаал ба Гэрээ 86:1–7-г уншаад, Аврагч бидэнд сургаалт зүйрлэлийн ямар бэлгэдлийг ойлгоход тусалсныг олж мэд.
-
Их Эзэний Хоёр дахь ирэлтийнхээ бэлтгэл болгон хийж буй ажлын талаар та нар энэ сургаалт зүйрлэлээс юу сурсан бэ?
Цөөн суралцагчийг олж мэдсэн зүйлээ хуваалцсаны дараа, Их Эзэн Хоёр дахь ирэлтийнхээ өмнө Израилыг цуглуулж байна гэх үнэнийг онцол.
-
Энэ үнэнийг мэдэх нь Есүс Христийн Хоёр дахь ирэлтийн тухай бодох үед найдвар, амар амгаланг мэдрэхэд тань хэрхэн туслах вэ?
-
Энэ үнэн өнөөдрийн та нарын гаргаж буй шийдвэрүүдийг хэрхэн удирдаж чадах вэ?
Ерөнхийлөгч Рассэлл М.Нэлсон бид өнөөдөр Их Эзэнтэй хамт Израилыг цуглуулах ажилд хэрхэн оролцож болох талаар ийн хуваалцсан.
Бурханыг амьдралынхаа хамгийн хүчтэй нөлөө үзүүлэгч болгохыг сонгосон хүмүүсийг Их Эзэн цуглуулж байна.
Олон зууны туршид бошиглогчид энэ цугларалтын тухай зөгнөн хэлсэн [Исаиа 11:11–12; 2 Нифай 21:11–12; Moзая 15:11] ба яг одоо ид өрнөж байна! Их Эзэний Хоёр дахь ирэлтийн өмнөх нэн чухал оршил үйл явдлын хувьд энэ нь дэлхий дээрх хамгийн чухал ажил билээ! …
Бид хөшигний хоёр талд Израилыг цуглуулах ажлын талаар ярихдаа мэдээж номлол, ариун сүм, гэр бүлийн түүхийн ажлын тухай ярьдаг. Бид мөн хамт амьдардаг, ажилладаг, үйлчилдэг хүмүүсийнхээ зүрх сэтгэлд итгэл, гэрчлэлийг нь бататгах тухай ярьдаг. Бид ямар ч үед хөшигний аль аль талд байгаа хэнд ч болов Бурхантай гэрээ байгуулж, түүнийгээ сахихад нь туслахдаа Израилыг цуглуулахад тусалж байдаг. (Рассэлл М.Нэлсон, “Бурхан ялах болтугай,” 2020 оны 10-р сарын Ерөнхий чуулган, 101)
-
Та нар энэ мэдэгдлээс Их Эзэнд Израилыг цуглуулахад нь хэрхэн тусалж болох талаар юу сурсан бэ?
“Харийнханд гэрэл”
Сургаал ба Гэрээ 86:11-ийг уншаад, хүмүүсийг Түүнд цуглуулахад Аврагч бидэнд хэрхэн тусалж болох талаар юу заасныг олж мэд.
11-р шүлэг дэх харийнхан гэдэг үг нь Сүмийн гишүүн бус хүмүүсийг хэлж байгааг тайлбарлах нь тустай байж болох юм.
Дараагийн асуултын талаар ярилцахдаа суралцагчдыг Матай 5:14–16, 3 Нифай 18:24-ийг уншихад урих тухай бодож үз. Тэд эдгээр шүлэг ямар ойлголт өгснийг хуваалцаж болно.
-
“Харийнханд гэрэл” байх гэдэг нь юу гэсэн утгатай гэж та нар бодож байна вэ?
-
Аврагчийн гэрлийг бусадтай хуваалцсанаар Израилыг цуглуулахад ямар арга замаар туслах вэ?
Суралцагчдын санааг самбарт жагсаан бич. Ярилцлагын нэг хэсэгт та суралцагчдыг өөрт тохиолдсон туршлагаа хуваалцахад урьж болно. Илүү олон жишээг харахын тулд “LightTheWorld—Follow the Example of Jesus Christ. Share His Light—Serve as He Served” (2:17) видеог цагийн код 0:29-өөс 2:17 хүртэл ChurchofJesusChrist.org-оос үзүүлж болно.
Аврагчтай хамт Израилыг цуглуулах төлөвлөгөө гарга
Суралцагчдыг судлах тэмдэглэлдээ дараах асуултуудын аль нэгд эсвэл хоёуланд хариулахад урих замаар судалсан үнэнээ хэрэгжүүлэхэд тусал.
-
Та нар Аврагчид цугларан очихын тулд юу хийхийг хичээх вэ?
-
Израилыг цуглуулахад Аврагчид туслахын тулд та нар ямар тодорхой зүйл хийх вэ?
Зорилгодоо хэрхэн, хэзээ хүрэх тухай дэлгэрэнгүй мэдээлэл оруул.
Цөөн суралцагч бичсэн зүйлээсээ хуваалцаж болно. Ярилцсан үнэнүүдийг гэрчилж, суралцагчдыг тавьсан зорилгоо хэрэгжүүлэхэд урамшуул.