99-р хичээл: Сургаал ба Гэрээ 85–87

Сургаал ба Гэрээ 87

Иосеф Смит дайны тухай бошиглов

1830-аад онд Америкийн Нэгдсэн Улсад үүссэн улс төрийн тогтворгүй байдлын улмаас Иосеф Смит уг нөхцөл байдлын талаарх Бурханы бодлыг мэдэхээр Түүнд хандан залбирчээ. Дараах илчлэлт нь тухайн үед зөвхөн Бурхан л мэдэж чадах тодорхой нарийн зүйлс бүхий дайны тухай бошиглолыг агуулж байлаа. Энэ хичээл нь Их Эзэний бошиглогчдодоо хэлсэн бүх үг биелнэ гэдгийг ойлгоход суралцагчдад тусалж чадна.

Боломжит суралцах үйл ажиллагаа

Орсон Праттын туршлага

Суралцагчдад Сургаал ба Гэрээ 87-г судлахаар бэлтгэхэд нь туслахын тулд Орсон Праттын дараах номлолын туршлагыг товчхон ярьж өгөх юм уу уншиж өгөхийг бод.

Орсон Пратт бол Арван хоёр төлөөлөгчийн чуулгын анхны гишүүдийн нэгээр үйлчилж байсан Сүмийн эхэн үеийн гишүүн юм. Тэрээр амьдралынхаа туршид АНУ, Канад даяарх олон номлолд Есүс Христийн сэргээгдсэн сайн мэдээг номлохоор дуудагдаж байсан. Тэрээр уг аянууддаа Иосеф Смитийн 1832 онд Их Эзэнээс хүлээн авсан тодорхой илчлэлтийн хуулбарыг авч явжээ. Илчлэлт дэх бошиглол хараахан биелээгүй байсан ч ахлагч Пратт үүнийг бусадтай байнга хуваалцдаг байв. Хүмүүс уг бошиглолыг “хий хоосны туйл,” харин түүнийг “хууран мэхлэгчийн золиос” хэмээн байнга шоолж байсныг тэрээр эргэн дурссан байдаг (Orson Pratt, Journal of Discourses, 18:224–25).

• Хэрэв та Орсон Праттын оронд байсан бол хүмүүсийн хариу үйлдэл танд хэрхэн нөлөөлөх байсан гэж бодож байна вэ?

Их Эзэнээс ирэх бошиглол

Орсон Праттын бусадтай хуваалцсан бошиглол Сургаал ба Гэрээ 87-д цэдэглэгдсэн. Бошиглолыг уншихаасаа өмнө уг хэсгийн гарчигт агуулагдаж буй түүхэн мэдээллийг ойлгох нь тустай байж болох юм.

Суралцагчдад сайн мэдээний сургаал, зарчмуудыг олж мэдэхэд тусал. Үүгээр илүү их дадлага хийх бол Багшийн хөгжүүлбэл зохих ур чадвар: Сургаалыг заа дахь “Есүс Христийн сургаалд өөрөө суралц гарчигтай сургалтыг үзнэ үү. Сайн мэдээний сургаал, зарчмуудыг өөрсдөө олж мэдэхэд нь туслах, тогтсон хариулт руу хөтлөхөөргүй тодорхойлох асуултуудыг зохиож, уг ур чадвараар дадлага хийхийг бод.

Сургаал ба Гэрээ 87:1–4-ийг уншаад, Есүс Христ бошиглогчоороо дамжуулан юу илчилснийг олж мэд.

• Их Эзэн юуг “удахгүй тохиох” болно хэмээн хэлсэн бэ?

• Бид эдгээр шүлгээс Их Эзэний талаар юу мэдэж авч болох вэ?

Суралцагчдад Есүс Христийн талаар сурсан янз бүрийн үнэнүүдийг хуваалцах боломжийг олго. Тэдний дурдсан зүйлээс гадна Их Эзэн бошиглогчдоороо дамжуулан бидэнд ирээдүйн үйл явдлуудыг илчилж чадна гэдгийг ойлгуул.

Их Эзэний талаарх мэдлэгийн тухай илүү ойлголттой болохын тулд дараах судруудын заримыг эсвэл бүгдийг унш.

• Aбрахам 2:8

• 1 Нифай 9:6

• Сургаал ба Гэрээ 38:1–2

• Та нар юу сурч мэдсэн бэ? Есүс Христийн талаар эдгээрийг мэдэх нь яагаад тустай гэж та нар бодож байна вэ?

• Энэ мэдлэг та нарын Түүнд итгэх итгэлд хэрхэн нөлөөлж байна вэ?

Их Эзэнд болон Түүний бошиглолд итгэх итгэл

Их Эзэн ирээдүйд тохиох тэрхүү үйл явдлуудыг Иосеф Смитэд илчилсний дараа юу болсныг суралцагчдад ойлгуулахын тулд дараах догол мөрийг унш эсвэл тоймлон хэл.

1833 оны эхээр Иосеф Смитийн бошиглолын дараахан Америкт дэгдэж магадгүй гэж яригдаж байсан санал зөрөлдөөн тайван замаар шийдэгдэв.

• Хэрэв та нар Иосеф Смитийн бошиглолын талаар тухайн үед мэдэж байсан бол ямар асуулттай тулгарна гэж бодож байна вэ?

Орсон Пратт уг бошиглол хэрхэн, хэзээ биелэх нь тодорхойгүй болсон үед төрсөн бодлынхоо талаар эргэн дурсжээ.

Их Эзэн надтай ярьж, надад илчлэлт өгсөн учир энэ бошиглол үнэн гэдгийг би мэдэж байсан. Би бас энэ ажлын тэнгэрлэг чанарыг ойлгож байсан. Жил өнгөрөх тусам зарим нэг хуучны танил маань: “За тэгээд, тэр зөгнөл чинь юу болж байна? Хэзээ ч тийм юм болохгүй шүү дээ” гэж хэлдэг байв. Харин би: “Чи жаахан азна, Их Эзэнд тогтоосон цаг бий” гэж хэлдэг байсан. (Orson Pratt, Journal of Discourses, 18:224–25)

• Орсон Праттын хариултаас юу нь та нарт онцгой санагдаж байна вэ?

• Тэр хэрхэн итгэлээр үйлдэж, үргэлжлүүлэн мөнхийн талаас нь харахаар сонгосон бэ?

Их Эзэнтэй хамт зогсохыг сонгох

Суралцагчдыг хос хосоороо эсвэл жижиг бүлгээрээ дараах асуултын талаар ярилцаад, хариултаа ангийнхантай хуваалцахад урих талаар бодож үз.

• Өнөө цагийн бошиглогчийн захиасны хариуд итгэлээр үйлдэхийг шаардах ямар нөхцөл байдал байж болох вэ?

Бусад хүний санал нийлдэггүй зүйлийн талаар заахдаа Их Эзэний бошиглогчидтой нэг байр суурьтай байхад хэр бэлэн байгаагаа тунгаан бодоход суралцагчдыг урамшуул.

Сургаал ба Гэрээ 1:37–38 болон 21:4–6-г унш. Бусад хүн тэдний үгтэй санал нийлэхгүй байсан ч Их Эзэн болон Түүний бошиглогчдод үнэнч үлдэхэд туслах сургаалуудыг хайж ол.

• Та нар юу олж мэдсэн бэ?

Их Эзэний бошиглол биелэхийг харахын тулд ихэвчлэн итгэл, тэвчээр шаардагддаг гэдгийг суралцагчдад ойлгуулахын тулд дараах түүхэн нөхцөл байдлыг хуваалцах талаар бодож үз.

Хэдийгээр Иосеф Смитийг амьд ахуйд уг бошиглол гүйцэлдээгүй ч нэг хэсэг нь анх өгөгдсөн цагаасаа хойш бараг 30 жилийн дараа биелсэн. Зөрчилдөөн Өмнөд Каролинад эхэлсэн ба өмнөд, умард мужууд 1861–1865 он хүртэл бие биеийнхээ эсрэг дайтсан юм. Бошиглосны дагуу өмнөдийнхөн Их Британиас тусламж гуйсан бөгөөд боол байсан олон хүн эздийнхээ эсрэг тулалджээ (Сургаал ба Гэрээ 87:1–4-ийг үзнэ үү). Энэ дайнд олон хүн амиа алдсан юм. Бошиглолд дурдсанчлан, дараагийн дайнууд дэлхий даяарх үндэстнүүд дээр буусан (Сургаал ба Гэрээ 87:6–7-г үзнэ үү).

Ариун газруудад зогсогтун

Зарим суралцагч энэ бошиглолд дүрслэгдсэн дайн, сүйрлийн талаар бодох үедээ тодорхойгүй байдал эсвэл айдсыг мэдэрч магадгүй. Энэхүү илчлэлт дэх Их Эзэний сүүлчийн үгсэд эцсийн өдрүүдийн зовлон зүдгүүр дунд бидэнд туслах зөвлөгөө агуулагддаг гэдгийг тайлбарла.

Сургаал ба Гэрээ 87:8-ыг уншаад, Их Эзэний зөвлөгөөг хайж ол.

• Энэ дэлхий дээр амар амгалан, аюулгүй байдлыг олж авахад туслах Их Эзэний бидэнд өгсөн ямар ариун газрууд байдаг вэ?

Та Их Эзэнд мөн Түүний бошиглогчдод итгэлтэй үлдэх нь “ариун газруудад зогсоод … шилжин нүүхгүй байх” нэг арга гэдгийг тайлбарлаж болох юм. Өнөөдөр ярилцсан үнэнийхээ талаар гэрчлээд, суралцагчдыг хүлээн авсан сүнслэг сэтгэгдлийнхээ дагуу үйлдэхэд урамшуул.

Нэмэлт эх сурвалж

Америкийн иргэний дайн гарахад ямар нөхцөл байдал нөлөөлсөн бэ?

Эдгээр нөхцөл байдлын талаар илүү ихийг мэдэхийг хүсвэл ChurchofJesusChrist.org дахь Сүмийн түүхийн сэдвүүдээс “American Civil War” гэснийг унш.

Бошиглогчид ирээдүйн үйл явдлын талаар надад юу хэлж чадах вэ?

“Зарим тохиолдолд бошиглогчид хүн төрөлхтний ашиг тусын тулд ирээдүйг угтан хэлэхэд сүнслэгээр нөлөөлөгддөг. Гэвч түүний анхдагч үүрэг хариуцлага бол Христийн тухай гэрчлэх явдал мөн” (Судруудын удирдамж, “Бошиглогч,” scriptures.ChurchofJesusChrist.org).

Би эцсийн өдрүүдэд болох үймээн самуун дунд амар амгаланг хэрхэн мэдэрч болох вэ?

Ерөнхийлөгч Рассэлл М.Нэлсон ийн заасан.

Бид өдөр бүр сэтгэл сэрдхийм мэдээнд дарагдаж байна. Заримдаа та нарт унтлагын хувцсаа өмсөн орондоо орж эвхэрч хэвтээд, үймээн самуун өнгөрсний дараа хэн нэгэн сэрээгээсэй гэж хүсэх өдрүүд ч байсан байх.

Гэхдээ хайрт ах, эгч нар аа, олон сайн сайхан зүйл биднийг хүлээж байгаа. Ирэх өдрүүдэд бид дэлхийд урьд өмнө үзэгдэж байгаагүй, Аврагчийн хүч чадлын хамгийн агуу илрэлүүдийг харах болно. Өнөөдрөөс “сүр хүч хийгээд агуу алдар суутайгаар”Иосеф Смит—Матай 1:36 эргэн ирэх тэр өдрийг хүртэл Тэрээр итгэлтэй хүн бүрийн дээр тоо томшгүй олон боломж, адислал, гайхамшгийг хүртээх болно. (Рассэлл М.Нэлсон, “Ертөнцийг ялж, амралтыг олох нь,” Лиахона, 2022 оны 11-р сар, 95)

Би Их Эзэнтэй болон Түүний бошиглогчидтой нэгдмэл байхын тулд юу хийж чадах вэ?

Арван хоёр төлөөлөгчийн чуулгын ахлагч Роналд А.Расбанд ийн заасан.

Өнөөдөр бид тэнгэрийн илчлэлтээр бидэнд зааж, биднийг удирдахаар дуудагдсан удирдагчдыг дэмжин баталлаа. Тэд биднийг Хүндэтгэлийн өдрийг сахихдаа хайхрамжгүй байх, гэр бүлд заналхийлсэн аюул, шашны эрх чөлөөг боогдуулах, хожмын өдрийн илчлэлтийг үгүйсгэх зэрэг бидэнд өдөр тутам ирдэг аюулаас сэрэмжлүүлдэг юм. Ах, эгч нар аа, бид тэдний зөвлөгөөг сонсож байгаа юу? …

Өнөөдөр урган гарч байгаа асуулт тодорхой байна. Та улам бүр харанхуйлах дэлхийд Христийн гэрлийг түгээхийн тулд Сүмийн удирдагчидтайгаа хамт зогсож байна уу? …

Бидний удирдагчдаар болон гэр бүлийн гишүүдээр ихэнхдээ дамжуулан бидэн рүү сунгасан Түүний мутрыг гар сунган атгаж, Над руу ир гэх Түүний дуудлагыг сонсохын төлөө би залбирч байна. (Роналд А.Расбанд, “Сүмийн удирдагчидтайгаа хамт зогсох нь,” 2016 оны 4-р сарын Ерөнхий чуулган, 32, 33, 34)

Итгэл маань эргэлзээгээр соригдож байгааг мэдрэх үедээ би яах ёстой вэ?

Арван хоёр төлөөлөгчийн чуулгын ахлагч Нийл Л.Андэрсэн ийн заасан.

Та Христэд итгэх итгэлээ хэрэгжүүлэн, залбирч, судруудыг тунгаан бодож, наманчлан, зарлигуудыг сахиж, бусдад үйлчилснээр итгэлийнхээ үндэс суурийг тавихад туслах зүйлсийг хийхэд өөрийгөө дайчлан ажилладаг билээ.

Итгэлийг тань сорьсон ямар ч зүйл танд тохиолдсон бай, Сүмээс бүү холд! Итгэлийг тань сорьсон үед Бурханы хаант улсаас өөрийгөө хөндийрүүлэх нь далайн хар салхи нүдэнд харагдахаар ойртсон үед хоргодох байраа орхин явахтай адил юм. (Нийл Л.Андэрсэн, “Итгэлийн тань сорилт,” 2012 оны 10-р сарын Ерөнхий чуулган, 49)

Сургаал ба Гэрээ 86:7. Бид хэрхэн ариун газруудад зогсох вэ?

Ерөнхийлөгч Рассэлл М.Нэлсон ийн заасан.

Таны амьдралд ямар нэгэн үймээн самуун гарах бүрд сүнслэг байдлын хувьд хамгийн аюулгүй газар бол ариун сүмийн гэрээнүүд дотроо амьдрах явдал юм!

Сүнслэг суурь тань Есүс Христ дээр бат бөх тавигдсан үед та айх хэрэггүй гэсэн миний үгэнд итгээрэй. (Рассэлл М.Нэлсон, “Ариун сүм ба таны сүнслэг байдлын суурь,” Лиахона, 2021 оны 11-р сар, 96)

Нэмэлт суралцах үйл ажиллагаа

Сургаал ба Гэрээ 87:5–7. Бурханы “гарын зэмлэл” гэж юу вэ?

Суралцагчдад Сургаал ба Гэрээ 87:5–7-ийн талаар асуулт гарч магадгүй. Их Эзэн бидний хүн нэг бүрд олон арга замаар хайрын мутраа сунгадаг гэдгийг суралцагчдад ойлгуулах нь тустай байж болох юм. Суралцагчдыг самбарт тэдгээр арга замыг жагсаан бичихэд урихыг бод. Дараа нь биднийг Түүний хайрын мутраас ирдэг арга замуудыг үл тоомсорлох үед Бурхан юу хийдгийг өөр өөр судраас олж харахад суралцагчдад тусал. Биднийг Бурханы дуу хоолойг эсэргүүцэн зүрх сэтгэлээ хатууруулах үед Тэр заримдаа аянга цахилгаан, газар хөдлөлт гээд илүү хүчтэй арга замыг ашиглан биднийг гэсгээдэг гэдгийг ойлгоход тэдэнд тусал (1 Нифай 17:45-ыг үзнэ үү). Бурхан биднээс нүглээ наманчилж Түүнийг мөн Түүний сайн сайхныг санахыг хүсдэг (Хиламан 12:1–3-ыг үзнэ үү). Түүнчлэн Сургаал ба Гэрээ 87:5–7-д дүрсэлсэн шүүлтүүд нь зөвт хүмүүст шударга бусаар ханддаг хүмүүсийг Их Эзэн гэсгээх үед тохионо.

Сургаал ба Гэрээ 87:8. Би ариун газруудад зогсох Их Эзэний урилгыг хэрхэн дагаж чадах вэ?

8-р шүлэг дэх Их Эзэний зөвлөгөөг илүү сайн ойлгоход нь суралцагчдад туслахын тулд тэднийг дараахтай адил асуултуудыг авч үзэн ярилцахад урих талаар бодож үз.

• Ариун газруудад зогсоно гэдэг нь ямар утгатай гэж та нар бодож байна вэ?

• Хүнийг ариун газраас юу хөдөлгөж болох вэ?

• Бид хөдөлшгүй байгаагаа хэрхэн бататгаж чадах вэ?

• Өнөөгийн дэлхийд амар амгаланг мэдрэхэд ямар ариун газрууд тусалдаг вэ?

Ярилцлагын нэг хэсэгт 2013 оны 12-р сарын Лиахона сэтгүүлийн “Ариун газруудад зогсогтун” нийтлэлийг ашиглах талаар бодож үз. Энэ нийтлэлд дэлхийн өнцөг булан бүр дэх өсвөр үеийнхэн хэрхэн ариун газруудад зогсохоор сонгодог тухайгаа хуваалцсан.

Мөн та “Нэмэлт эх сурвалж”-ийн хамгийн сүүлд байгаа ерөнхийлөгч Рассэлл М.Нэлсоны мэдэгдлийг хуваалцаж болох юм.

Есүс Христэд болон Түүний бошиглогчдод итгэх итгэлээ тордож хадгалах

Түүхэн дэх итгэгчдийн итгэлийн сорилтын жишээнээс суралцах нь тэдэнд тустай байж болох юм. Та 3 Нифай 1:4–13 дахь түүхтэй адил судрын жишээг хуваалцаж болно. Мөн та Арван хоёр төлөөлөгчийн чуулгын ахлагч Нийл Л.Андэрсэны хуваалцсан жишээг ашиглаж болно.

Би олон жилийн өмнө Time сэтгүүл дээр Мартин Харрисын бичсэн захидал олдсон тухай нийтлэлийг олж уншсан юм. Уг захидал нь Мормоны Номын ялтаснууд олдсон талаарх Иосеф Смитийн түүхтэй зөрчилдөж байлаа.

Энэхүү баримтаас болж хэд хэдэн гишүүн Сүмийг орхин одсон юм.

Харамсалтай нь тэд хэт яарсан байлаа. Хэдэн сарын дараа уг захиа хуурамч болохыг мэргэжилтнүүд олж тогтоосон бөгөөд хуурамчаар үйлдэгч нь буруугаа хүлээжээ. Та нар хэвлэл мэдээллээр сонссон зүйлсдээ итгэхгүй байж болох ч Бурханы бошиглогчийн гэрчлэлд хэзээ ч эргэлзэх хэрэггүй билээ. (Нийл Л.Андэрсэн, “Иосеф Смит,” 2014 оны 10-р сарын Ерөнхий чуулган, 32)

Их Эзэн болон Түүний бошиглогчидтой хамт зогсох нь хэцүү санагдаж магадгүй үед эдгээр жишээ тэдэнд хэрхэн туслахыг ярилцахад урамшуул. Тэднийг Их Эзэнд болон Түүний сургаалд итгэлтэй зогссон цаг үеийнхээ талаар гэрчлэхэд урь.

Усан онгоцонд үлдэж, Их Эзэн болон Түүний бошиглогчидтой хамт зогс

Их Эзэн, Түүний бошиглогчидтой хамт зогсохын ач холбогдлыг ойлгоход нь суралцагчдад туслахын тулд дараах видеонуудаас аль нэгийг ашиглах талаар бодож үз. Эдгээр видеонд усан онгоцонд аюулгүй хоргодохыг Их Эзэний сэргээгдсэн Сүмд аюулгүй байдлыг олохтой харьцуулсан. Та суралцагчдад сурч буй зүйлээ ярилцах боломжийг олгохын тулд чухал мөчүүдэд видеог түр зогсоож болно.