Seminare
Lesona 104: Mataupu Faavae ma Feagaiga 89:1–17: O Se Upu o le Poto mai le Alii

“Lesona 104—Mataupu Faavae ma Feagaiga 89:1–17: O Se Upu o le Poto mai le Alii,” Tusi Lesona a le Faiaoga Seminare o le Mataupu Faavae ma Feagaiga (2025)

“Mataupu Faavae ma Feagaiga 89:1–17,” Tusi Lesona a le Faiaoga Seminare o le Mataupu Faavae ma Feagaiga

Lesona 104: Mataupu Faavae ma Feagaiga 89–92

Mataupu Faavae ma Feagaiga 89:1–17

O Se Upu o le Poto mai le Alii

talavou o loo faamalositino

E pei ona taatele i le 1833, e toatele tagata o le Ekalesia sa faaaogaina tapaa ma inu ava malosi, lauti, ma le kofe. I le tali mai i tatalo a Iosefa Samita e uiga i le mataupu, sa faaali mai ai ma le alofa mutimutivale e le Alii le Upu o le Poto. O lenei lesona e mafai ona fesoasoani i tagata aoga e lagona ai le lotofaafetai mo faatonuga alofa a le Alii ua ta’ua o le Upu o le Poto.

Gaoioiga E Ono Mafai Ona Aoao Ai

Manatua: O faamanuiaga faaleagaga folafolaina i le Mataupu Faavae ma Feagaiga 89:18–21 mo le tausia o le Upu o le Poto o le taulaiga lea o le lesona e sosoo ai. Atonu e sili atu le aoao atu o nei lesona uma e lua e fesoasoani ai i tagata aoga ia iloa o faamanuiaga o le Upu o le Poto e sili atu le faaleagaga i le natura nai lo le faaletino.

Togafiti a Satani

Mafaufau e valaaulia tagata aoga e talanoaina mailei e faaaoga e Satani e maileia ai fanau a le Atua. E mafai ona e aumaia i totonu pe faaali atu se ata o maunu fagota. E mafai foi ona e fai atu i tagata aooga e i ai se potomasani i le fagota e faamatala mai ni maunu e sili ona lelei e faaaoga i la outou eria. O le isi filifiliga o le faaali atu lea o le vaega muamua o le vitiō “You Will Be Freed,” o loo maua i le ChurchofJesusChrist.org, mai le faailo taimi 0:00 i le 1:29.

maunu fagota eseese
2:55

  • E mafai faapefea ona faatusatusa maunu fagota i mailei a Satani?

  • O le a se fautuaga ua tuuina mai e le Faaola e fesoasoani ia i tatou e iloa ai ma aloese ai mai mailei a Satani?

    E tele tali sa’o i le fesili lona lua, e aofia ai le tatalo (tagai i le Mataupu Faavae ma Feagaiga 10:5), suesueina o tusitusiga paia i aso taitasi (tagai i le Helamana 3:29–30), sailia le agaga o faaaliga (tagai i le Mataupu Faavae ma Feagaiga 8:2–4), ma mulimuli i fautuaga mai perofeta ma taitai o le Ekalesia (tagai i le Mataupu Faavae ma Feagaiga 21:5).

    Ina ia fesoasoani i tagata aoga ia iloa pe aisea e mafai ai ona tatou faalagolago i le fautuaga a le Faaola, e mafai ona e valaaulia i latou e faitau le 2 Nifae 26:24 ma le Iakopo 4:10 ma faasoa mai mea ua latou aoaoina e uiga ia te Ia.

    E mafai foi ona e fai i tagata aoga e mafaufau loloto pe faasoa mai i le vasega a latou tali i le fesili lenei:

  • Na faapefea ona faamanuiaina ma puipuia lou olaga e fautuaga patino po o lapataiga mai le Faaola ma Ana auauna faamaonia?

O Le Upu o le Poto

Mafaufau e faaali atu le ata lenei o se tamai potu i luga ae o le faleoloa o Newel K. Whitney i Katelani, Ohaio. Valaaulia au tagata aoga e vaai faalemafaufau i le potu ua faatumulia i alii, o le toatele o i latou sa ulaula ma lamuina le tapaa, a o e faamatalaina le faamatalaga o loo i le parakalafa lenei.

aoga a perofeta

I le taumalulu o le 1833, e tusa ma le 20 e umia le perisitua sa fono soo i lenei potu e auai i le Aoga a Perofeta (tagai i le Mataupu Faavae ma Feagaiga 88:127). E pei ona sa masani ai i na aso, o le toatele o i latou sa ulaula ma lamu tapaa i le taimi o fonotaga. Na manatuaina e Polika Iaga e faapea, “e masani pe a oo atu i totonu le Perofeta e tuuina atu ni aoaoga, e na te vaaia le tele o le asu o tapaa” (Aoaoga a Peresitene o le Ekalesia: Iosefa Samita [2007], 263). O nei tulaga faapea ma lagona o Ema Samita, o lē sa faamamaina feanuga o tapaa lamu mai le fola, na uunaia ai Iosefa Samita e tatalo e uiga i le faaaogaina o na vailaau faapena. I le tali, na faaalia ai e le Alii i le Mataupu Faavae ma Feagaiga 89 (tagai i le Au Paia: O Le Tala o le Ekalesia a Iesu Keriso i Aso e Gata Ai, vol. 1, O Le Tagavai o le Upumoni, 1815–1846 [2018], 167–68).

Faitau le Mataupu Faavae ma Feagaiga 89:1–4, ma vaavaai mo ni mafuaaga na tuuina mai ai e le Faaola lenei faaaliga.

  • O le a se mea ua e aoaoina e uiga i faamoemoega o Iesu Keriso mo le faaalia mai o lenei vaega?

    A o faasoa mai e tagata aoga ia tali i le fesili na muamua atu, ia mautinoa ua latou malamalama na tuuina mai e le Alii ia i tatou le Upu o le Poto e puipuia ai i tatou mai mea leaga o o tatou aso.

  • E mafai faapefea e le malamalama pe aisea na faaali mai ai e le Faaola le Upu o le Poto ona aafia ai o tatou lagona e uiga i ai?

  • O a nisi o fuafuaga leaga o o tatou aso tatou te manaomia ai Lana puipuiga?

A o tali mai tagata aoga i le fesili talu ai, e mafai ona e fesoasoani ia i latou ia iloa pe na faapefea ona mamanuina pe fuafuaina nisi o mea leaga latou te faasoa mai e faasese ai i tatou.

Atonu e aoga mo tagata aoga le mafaufau e uiga pe faasoa mai ni a latou fesili e uiga i le Upu o le Poto. O le vaega lenei e mafai ona fesoasoani ia i latou e sue ai tali.

O se tusi faaaoga mai le tagata Foafoa

Ina ia folasia atu le gaoioiga lenei, atonu e te manao e aumai i totonu pe talanoa e uiga i se tusi faasino a le tagata e anaina mo se oloa e masani ai tagata aoga. Faamatala faapuupuu atu le taua o le iloaina pe faapefea ona faatumauina le oloa ma nisi o lapataiga e uiga i le faaaogaina lē tatau. Fesoasoani ia malamalama tagata aoga o le Atua, i le avea ai ma Foafoa (tagai i le Kenese 1:27), e malamalama atoatoa i o tatou tino ma tuuina mai faatonuga ma lapataiga e uiga i lo latou faaaogaina ma le tausiga.

Afai e i ai ni fesili a tagata aoga e uiga i faamatalaga o le Upu o le Poto e lei manino ona aoaoina e le Ekalesia, fautuaina i latou e fefautuaai ma o latou matua, epikopo, po o le peresitene o le paranesi.

Fatu se tusi ta’iala mo le faaaogaina tatau o o tatou tino. Ia fatufatuai ma faapatino i soo se auala e te filifilia. O laasaga nei ua na o se tasi o le tele o auala e mafai ona faia ai lenei mea:

  1. Gagau faaafa se pepa ina ia foliga mai o se tamaitusi puupuu. Fai se itulau o le faavaa ma se ulutala e pei o le “O Le Upu o le Poto: O Se Tusi Faaaoga a le Tagata e Anaina mai le Foafoa.” E mafai ona e faaopoopoina ni ata po o ni ata i le itulau o le faavaa.

  2. I totonu o le tamaitusi, faaulutala le itulau agavale o se mea e pei o le “O Le Fautuaga a le Foafoa i Mea e Tatau ona Tatou Faia.” Faaulutala le itulau taumatau o se mea e pei o le “O Le Fautuaga a le Foafoa i Mea e Tatau Ona Tatou Aloese Mai Ai.” Ia lagona le saoloto e faaopoopo ni ata po o ni mamanu i totonu foi o itulau.

  3. Suesue le Mataupu Faavae ma Feagaiga 89:5–17 ma faatumu lau tamaitusi e ala i le tusia po o le faaopoopoina o ata o mea ua e aoaoina.

    E faaopoopo atu i fautuaga nei, mafaufau e tuu atu i tagata aoga ni anomea aoga mai le vaega o “Punaoa Faaopoopo” o lenei lesona.

  4. Saili nisi punaoa mamana ua filifilia e pei o le Mo Le Malosi o le Autalavou (tamaitusi, 2022), Taiala i Tusitusiga Paia, ma saunoaga a taitai o le Ekalesia. Faaopoopo mea ua e aoaoina i lau tamaitusi.

Tuu atu i tagata aoga se avanoa e faasoa pe faaali mai mea na latou faia.

Manatua: I le vaega o “Gaoioiga Faaopoopo e Aoao Ai” o le lesona e sosoo ai, o loo i ai se fautuaga mo tagata aoga e faaopoopo se itulau i tua i a latou tamaitusi. O le itulau i tua o le a otooto mai ai faamanuiaga ua ofoina mai e le Atua i le Mataupu Faavae ma Feagaiga 18–21 mo le tausia o le Upu o le Poto. Afai o se aafiaga lelei lena mo au tagata aooga, e mafai ona e fautuaina i latou e aumai i totonu a latou tamaitusi i le asō pe ia mautinoa e toe aumai i latou i le vasega mo le lesona e sosoo ai.

O lo tatou Faaola alofa mutimutivale ma onosai

Ina ia fesoasoani i tagata aoga ia iloa pe na faapefea ona onosai le Faaola i Lana Au Paia ina ua uma ona faaalia mai lenei poloaiga, atonu e te manao e faasoa atu i tagata aoga nisi o mea nei i au lava upu :

Sa faaalia mai e Iesu le Upu o le Poto i le 1833, ae sa lei tuuina mai o se poloaiga i lena taimi (tagai i le fuaiupu 2). Ina ua uma maua mai, e toatele le Au Paia na amata ona taumafai e faatoilalo tu ma aga faaleaganuu na taliaina ma mo nisi, o vaisu na latou atia’eina. I le aluga o taimi, sa taitaia ai e le Alii ia taitai o le Ekalesia, e aofia ai Polika Iaga ma Ioane Teila, ia faamoemoe atili mai le Au Paia e tusa ai ma lo latou tausiga o mataupu faavae o loo aoaoina i le Mataupu Faavae ma Feagaiga 89. Ina ua mavae le seneturi e luasefulu, sa “luiina i latou e [Peresitene Ipa J. Kurene] ina ia tausia le Upu o le Poto ma le sa’o lelei, aloese mai le ava malosi, kofe, lauti, tapaa, ma isi mea leaga na faaaoga e augatupulaga na muamua atu o le Au Paia,” ma faia ai “le Upu o le Poto e faamalosia mo le auai atu i le malumalu ma le galuega faafaifeautalai” (Au Paia, 3:291–92). “I le 1921, sa musuia ai e le Alii ia Peresitene Ipa J. Kurene e manaomia le Au Paia uma ia aloese mai le ava malosi, tapaa, kofe, ma le lauti ina ia maua ai se pepa faataga o le malumalu” (Mataupu o Talafaasolopito o le Ekalesia, “Upu o le Poto [MF&F 89],” Potutusi o le Talalelei).

  • O a fesoasoaniga ua saunia e le Faaola i o tatou aso mo i latou o e tauivi ma vaisu?

O le faaiuga o le vitiō o loo fautuaina atu i le amataga o le lesona e mafai ona aumaia ai le faamoemoe e ala ia Keriso mo i latou o loo tauivi ma vaisu. Atonu e te mafaufau e faaali atu le “O Le a Faasaolotoina Oe” mai le faailo taimi 1:29 i le 2:55.

O tagata aoga o e mananao i nisi punaoa mo se fesoasoani i vaisu e mafai ona faasinotonu i o latou taitai o le uarota ma i le itulau o le “Fesoasoani mo le Olaga” ChurchofJesusChrist.org.

2:55

A o lei faia le fesili lenei, mafaufau e fesoasoani i tagata aoga ia iloa le agalelei o Iesu Keriso i le tuuina mai ia i tatou o le Upu o le Poto. Atonu e fesoasoani le valaaulia o i latou e vaai faalemafaufau pe o le a faapefea ona ese le lalolagi pe afai e leai ni fualaau faasaina. E mafai foi ona e tuuina atu ia i latou se taimi e tusi ai pe na faapefea e le Upu o le Poto.ona faamanuiaina ma puipuia i latou ma e pele ia i latou.

  • E faapefea e le faaalia o le Upu o le Poto ona faaalia ai le alofa mutimutivale ma le alofa o Iesu Keriso?

Mafaufau e faaiu le lesona i le faasoa atu pe na faapefea ona faamanuiaina lou olaga e le Upu o le Poto ma faailoa atu le lotofaafetai mo le Faaola ua tuuina mai ai ia i tatou lenei faaaliga.