Lesona 105: Mataupu Faavae ma Feagaiga 89–92

Mataupu Faavae ma Feagaiga 89:18–21

“O A’u, o le Alii, Ou Te Tuu Atu ia te i Latou se Folafolaga”

Ina ua uma ona faaali mai le Upu o le Poto ia Iosefa Samita (tagai i le lesona “Mataupu Faavae ma Feagaiga 89:1–17”), sa faamalamalama mai e Iesu Keriso nisi o faamanuiaga ua Ia ofoina mai ia i latou o e tausia ma le faamaoni ia mataupu faavae o loo aoao mai i lenei faaaliga. O lenei lesona ua faamoemoe e fesoasoani i tagata aoga e filifili e ola i le Upu o le Poto ma maua faamanuiaga folafolaina a le Faaola.

Gaoioiga E Ono Mafai Ona Aoao Ai

O le papupuni

Amata le vasega e ala i le fesoasoani i tagata aoga ia malamalama na tuuina mai e le Faaola ia i tatou le Upu o le Poto e fai ma puipuiga ona e alofa o Ia ia i tatou. O se tasi o auala e faia ai lenei mea o le tusi lea i luga o le laupapa o se faga [vaifagaloa] ma se papupuni na faia e se tagata e vavaeese ai mai le vasaloloa, e pei o le faataitaiga lenei.

Faamalamalama atu na aoaoina Elder Von G. Keetch (1960–2018) o le Fitugafulu i se lesona taua i luga o se matafaga e talitutusa ma lenei. Faasoa atu lona aafiaga e faaaoga ai le parakalafa lenei ma lana faamatalaga o loo i lalo.

Sa fiafia Elder Von G. Keetch i se aso i le matafaga ina ua le fiafia se vaega o tagata faasee asiasi ona sa tuu se papupuni na faia e tagata i le va o le faga ma le vasaloloa. Sa faaseā ma le ita le aufaasee ona ua faaleagaina e le papupuni la latou malaga e ala i le taofia o i latou mai le faasee i galu tetele sa fati i fafo atu o le faga.

Na iu ina tu ane i luga [se tagata faasee matua o le nuu] ma savali atu i le vaega lea. E aunoa ma le fai atu o se upu, sa ia to mai lana seti meavaai mamao mai lana ato faafafa ma tuu atu i se tasi o le au faasee galu ma faasino atu agai i le papupuni. Sa taitasi ona tofu autilotilo atu le au faasee galu i le meavaai mamao. Ina ua oo mai ia te au, faatasi ai ma le fesoasoani a le vaaiga faalapopoa o le meavaai, sa mafai ai ona ou vaai ma iloa atu se mea e lei mafai ona ou vaai i ai muamua: apaapa papatua—o malie tetele o loo aai e latalata i le aau i le isi itu o le papupuni. …

A o matou tutu ai i luga o lena matafaga matagofie, sa faafuasei ona suia la matou vaaiga. O se papupuni sa foliga mai e malō ma faasāsā—sa foliga mai ua taotaomia ai le malie ma le sagisagi fiafia o le faasee ai i galu tetele—a ua avea o se mea ua matua ese lava. Faatasi ai ma lo matou malamalama fou i le matautia sa faalafi i lalo ifo tonu o le fogasami, ua tuuina mai nei e le papupuni le puipuiga, saogalemu, ma le filemu. (Von G. Keetch, “E Manuia ma Fiafia i Latou o E Tausi i Poloaiga a le Atua,” Liahona, Nov. 2015, 116)

• O le a se mea e mafai ona aoao mai e le aafiaga a Elder Keetch ia i tatou e uiga i le Atua ma Ana poloaiga?

• O le fea poloaiga e sili ona faaalia ia te oe le finagalo o le Atua e puipuia i tatou? Aisea?

  Atonu e te manao e faaigoa le papupuni i le va o le faga ma le vasa loloa i luga o le laupapa o le “Upu o le Poto.” Fesili mo ni volenitia e faasoa mai mea latou te manatua e uiga i le Upu o le Poto. (Afai na fatuina e tagata aoga ni tamaitusi o loo otooto atu ai le Upu o le Poto i le lesona talu ai, e mafai ona latou faasino atu iai mo se fesoasoani.)

  I le avea ai ma se faamanatu, e mafai foi e tagata aoga ona faitau ma faasoa mai fuaitau mai le Mataupu Faavae ma Feagaiga 89:1–4 o loo faamatala ai faamoemoega o le Alii mo le faaalia mai o le Upu o le Poto.

  Mafaufau lea e faaali atu fesili nei ma valaaulia tagata aoga e tusifaamaumau a latou tali i a latou api talaaga mo suesuega.

• O e vaai i le Upu o le Poto o se faamanuiaga mai le Tama Faalelagi po o ua avea o se tapulaa i lou olaga?

• O le a se mea ua e iloa e uiga i faamanuiaga ua ofoina mai e le Tama Faalelagi ia i latou o e tausia le Upu o le Poto?

• O le a le taua ia te oe o le tausia o le Upu o le Poto? Aisea?

Faamanuiaga e finagalo le Faaola e tuuina mai ia i tatou

Ina ua uma ona faaali mai le Upu o le Poto ia Iosefa Samita, sa faamalamalama atu e Iesu Keriso ia faamanuiaga ua ofoina mai e Ia ma le Tama Faalelagi ia i latou o e usiusitai ma le faamaoni i lenei faaaliga.

Faitau le Mataupu Faavae ma Feagaiga 89:18–21, ma maka folafolaga taitasi na La’ua faia i e usiusitai.

O leMataupu Faavae ma Feagaiga 89:18–21 o se fuaitau o le atamai i aoaoga faavae. Mafaufau e valaaulia tagata aoga e faailoga ia fuaitau o le atamai i aoaoga faavae i se auala tulaga ese ina ia mafai ona latou mauaina gofie.

I le faga o le ata i luga o le laupapa, e mafai e tagata aoga ona tusi ia faamanuiaga latou te maua. Ia mautinoa ua iloa e tagata aoga o le a faamanuiaina i tatou e le Alii i le faateleina o le soifua maloloina, poto, onosai, ma le puipuiga pe afai tatou te mulimuli i Lana Upu o le Poto.

• O a ni fesili e te manatu e ono i ai i nisi o tagata a o latou faitauina nei folafolaga mai le Alii?

E faavae i fesili e faasoa mai e tagata aoga ma le taimi avanoa, fuafua po o le fea o vaega nei e tolu o le lesona o le a sili ona aoga mo tagata aoga. E mafai ona e faatagaina le vasega e filifili po o fea vaega latou te mananao e suesue i ai.

Faamanuiaga o le soifua maloloina ma le tutumau (fuaiupu 18, 20)

E mafai ona fesoasoani lenei vaega i tagata aoga ia malamalama e lē folafola mai e le Alii le soifua maloloina atoatoa ia i latou o e tausia le Upu o le Poto, ae o le a Ia faamanuia le e usiusitai i le soifua maloloina sili atu nai lo le mea latou te ono maua pe ana fai latou te le mulimuli i Lana fautuaga.

Faitau parakalafa 7–8 i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae (2023). Ia faitau foi aoaoga nei mai ia Peresitene Dieter F. Uchtdorf, ao i ai i le Au Peresitene Sili. Sa ia faasino i se aafiaga sa ia oo i ai o se alii talavou i le militeli lea na ia matauina ai o nisi o fitafita o e sa lei tausia le Upu o le Poto sa sili atu ia te ia i a latou aoaoga faaletino. Vaavaai mo upumoni e mafai ona fesoasoani i se tasi e tali ai a latou fesili e uiga i folafolaga na faia e le Alii i le Mataupu Faavae ma Feagaiga 89:18, 20.

Na iu lava ina ou iloa e lē o taimi uma e vave faataunuuina ai folafolaga a le Atua pe faataunuuina foi i se ala tatou te ono faamoemoe i ai; ae e oo mai e tusa ai ma Lona lava taimi ma i Lana lava ala. O tausaga mulimuli ane na mafai ona ou vaai manino ai i faamaoniga o faamanuiaga faaletino e oo mai ia i latou o e usitai i le Upu o le Poto—e faaopoopo atu i faamanuiaga faaleagaga ia e vave oo mai mai le usitaia o soo se tulafono a le Atua. O le toe vaai faalemafaufau i tua, na ou mautinoa ai o folafolaga a le Alii, afai e le o taimi uma e vave mai ai, o taimi uma lava e mautinoa e faataunuuina ai. (Dieter F. Uchtdorf, “Faaauau i le Onosai,” Liahona, Me 2010, 58)

• O le a se mea na e aoaoina e uiga i le Alii ma Ana folafolaga e mafai ona fesoasoani i se tasi o loo tausia ma le faamaoni le Upu o le Poto ae o loo tauivi pea ma luitau o le soifua maloloina?

Faamanuiaga o le poto ma le malamalama (fuaiupu 19 )

Faitau le Mataupu Faavae ma Feagaiga 29:34, ma mafaufau pe mafai faapefea ona faaaoga le aoaoga faavae na aoao mai e le Faaola i lenei fuaiupu i le Upu o le Poto.

• E faapefea ona avea le Upu o le Poto ma se faamanuiaga faaleagaga e faaopoopo i se faamanuiaga faaletino?

• O a ni auala ua faatagaina ai e lo tatou usiusitai i le Upu o le Poto le Faaola e faamanuia i tatou i le poto ma le malamalama faalelalolagi faateleina? i le poto ma le poto ma le malamalama faaleagaga faateleina?

• E faapefea e le usiusitai i le Upu o le Poto ona fesoasoani ia i tatou ia maua atoatoa ai faaaliga mai le Atua e ala i le Agaga Paia?

Ina ia fesoasoani i tagata aoga e tali le fesili talu ai, atonu e te manao e faasoa atu le saunoaga muamua a Peresitene Boyd K. Packer i le vaega o le “Punaoa Faaopoopo”.

E avea o se faamaoniga o le faamanuiaina e le Atua o i latou o e tausia Ana tulafono o le soifua maloloina, mafaufau e faaali atu lenei ata o Tanielu o loo musu e ‘ai “manufasi a le tupu” (Tanielu 1:8). Fai atu i tagata aoga e faasoa mai mea latou te manatua e uiga i le tala. Afai e manaomia, e mafai ona e faasoa atu nisi o parakalafa nei e faamanatu atu ai ia i latou.

O Tanielu ma isi talavou sa nonofo i Papelonia sa aoaoina ma toleni e avea ma ni tagata popoto mo le tupu. Ina ua ofoina atu ia i latou aano o manufasi a le tupu, sa musu Tanielu e ai ona o tulafono o le soifua maloloina a le Alii i lena taimi. Na faatagaina e le auauna a le tupu ia Tanielu ma isi i se faataitaiga e 10 aso o le aai i meaai eseese e vaai pe faamata e lelei lo latou soifua maloloina ma atamamai e pei o isi talavou uma i le polokalama.

Faitau le Tanielu 1:17–20, ma vaavaai mo faamaoniga o faamanuiaga faalelalolagi ma faaleagaga o le poto na tuuina atu e le Atua ia Tanielu ma ana soa.

• O le a se faamaoniga o faamanuiaga a le Atua na e mauaina?

Faamanuiaga o le puipuiga (fuaiupu 21)

Mafaufau e faaali atu le ata lenei o le Paseka ma tatai atu mafaufau o tagata aoga i le toto i luga o pou o faitotoa. Faamalamalama atu o le puipuiga mai le “agelu o le faafanoga” e mafai ona faamanatu mai ai ia i tatou le taimi na puipuia ai Isaraelu mai se mala o le oti o fanau ulumatua na salalau atu i Aikupito anamua. O i latou o e sa valiina ma le usiusitai le toto o le tamai mamoe i luga o o latou pou o faitotoa (e faatusa i le toto o le Tamai Mamoe a le Atua) sa faasaoina. O lenei folafolaga o le puipuiga e mafai ona faasino i le saogalemu faaletino faapea foi ma le faaleagaga.

I le vasa loloa i le ata i luga o le laupapa, e mafai e tagata aoga ona lisi ai tulaga lamatia e puipuia ai i tatou e le Faaola e ala mai le Upu o le Poto. (Atonu latou te lisiina mea e pei o vaisu, faama’i, lē agavaa, mafutaga faaleagaina, ma isi mea faapena.)

Ina ia fesoasoani i tagata aoga e talanoaina le puipuiga faaleagaga ua ofoina mai e le Faaola ia i tatou, e mafai ona e faasoa atu le saunoaga lona lua a Peresitene Packer i le vaega o le “Punaoa Faaopoopo”.

• O a faataitaiga o le puipuiga a le Faaola ua e vaaia i lou olaga a o e tausia le Upu o le Poto?

Usitai i le Upu o le Poto

Mafaufau e molimau atu pe na faapefea ona faamanuiaina oe e le Alii ona o le tausia o le Upu o le Poto. Uunaia tagata aoga e tusi a latou tali i le fesili lenei i a latou api talaaga o suesuega:

• E faavae i mea ua e aoaoina e uiga i le Upu o le Poto, aisea e aoga ai ia te oe le usitai i lenei faaaliga mai ia Keriso?

Fai se fuafuaga o le a fesoasoani ia te oe e tausia ai le Upu o le Poto. Mafaufau i tulaga po o faaosoosoga e ono feagai ma oe, ma filifili le auala sili mo oe e faatoilalo ai latou. Mafaufau e faasoa atu ou manaoga ma lau fuafuaga i le Tama Faalelagi e ala i le tatalo ma ole atu mo Lona malosi ina ia manuia.

Tauloto

Atonu e te manao e fesoasoani i tagata aoga e tauloto le mau faasino o le atamai i aoaoga faavae ma le fasifuaitau autu o le mau i le taimi o lenei lesona ona iloilo lea i lesona i le lumanai. O le fasifuaitau autu o mau o le “O faamanuiaga o le Upu o le Poto.” O manatu mo gaoioiga o le taulotoina o loo i ai i anomea faaopoopo i lalo o le “Gaoioiga Toefaamanatu o le Atamai i Aoaoga Faavae.”

Punaoa Faaopoopo

E mafai faapefea e le tausia o le Upu o le Poto ona taitai atu ai i le faateleina o le malamalama ma le poto?

Sa faapea mai Peresitene Boyd K. Packer (1924–2015) o le Korama a Aposetolo e Toasefululua:

“Ua ou iloa nei foi … o se mafuaaga autu o le Upu o le Poto ua faatatau lea i faaaliga. …

Afai o se tasi ua i “lalo o faatosinaga” e faigata ona faalogo i talanoaga manino, e faapefea ona latou tali i uunaiga faaleagaga e pai i o latou lagona e sili ona maaleale?

E ui lava i le taua o le Upu o le Poto o se tulafono o le soifua maloloina, atonu e sili atu le taua ia te oe faaleagaga nai lo le faaletino. (Boyd K. Packer, “Talosaga ma Tali i Talosaga,” Liahona, Nov. 1979, 20)

O le a le mea o faatatau i ai le folafolaga o le puipuiga mai le agelu o le faafanoga?

Na aoao mai Peresitene Boyd K. Packer o le Korama a Aposetolo e Toasefululua:

Ae e le o le oti faaletino lea e laveaiina ai i tatou i lea paseka pe a tatou savavali i le usiusitai i nei poloaiga, aua e oti i tatou taitoatasi i se taimi. Ae e i ai le oti faaleagaga lea e le manaomia ona e mafatia ai. Afai e te usiusitai, o le a sopoloa lena oti faaleagaga ia te oe, aua o ‘Keriso lo tatou paseka ua taulagaina mo i tatou,’ ua aoao mai ai le faaaliga i le (1 Kor. 5:7). (Boyd K. Packer, “O Le Upu o le Poto: O le Mataupu Faavae ma Folafolaga,” Liahona,, Me 1996, 19)

Pe e lelei le faaaoga i nisi taimi pe faaaoga ni nai aofaiga laiti o mea faasaina?

Na faamatala mai e Peresitene Dallin H. Oaks o le Au Peresitene Sili:

E oo lava i nai taga laiti o le lē usitai po o nai toilalo iti e mulimuli i faiga amiotonu e mafai ona tata’i ese mai ai i tatou i se taunuuga ua uma ona lapataia ai i tatou e aloese mai ai. Ua aumaia e le Upu o le Poto se faataitaiga o lenei mea. E faapena foi le aafiaga o le tino o se sikareti se tasi po o se inu se tasi i le ava malosi po o se inumaga se tasi o se isi fualaau faataumaoi e le mafai ona fuaina. Ae i le aluga o taimi, e malosi tele le aafiaga ma e mafai ona le toe taofia. … E tasi le mea ua mautinoa, o taunuuga matuia o le faaaogaina o soo se mea e mafai ona avea ma mausa, e pei o fualaau faataumaoi ia e osofaia ai o tatou tino po o anomea faaponokalafi e faaleaga ai o tatou mafaufauga, e matuai mafai lava ona taumamao mai ai pe afai tatou te le faaaogaina lava mo le taimi muamua—pe na o le tasi lava. (Dallin H. Oaks, “O Mea Laiti ma Faatauvaa,” Liahona, Me 2018, 91–92)

Gaoioiga Faaopoopo e Aoao Ai

Se isi amataga

E mafai ona e faasoa atu le aafiaga o Elder Keetch i le amataga o le vasega e ala i le faaali atu o le vitiō faatino “Blessed and Happy Are Those Who Keep the Commandments of God” (5:41).

Tamaitusi o Upu o le Poto

Afai na faia e tagata aoga ni tamaitusi o loo otooto atu ai le Upu o le Poto i le lesona “Mataupu Faavae ma Feagaiga 89:1–17,” e mafai ona latou faaopoopo atu ia i latou i lenei lesona. E mafai ona latou faaaogaina le Mataupu Faavae ma Feagaiga 89:18–21 ma isi punaoa e fatu ai se itulau i tua ua faaautuina “Faamanuiaga na Ofoina mai e le Foafoa.”

O tala moni o le tausiaina o le Upu o le Poto

O le faalogo i tala moni o i latou o e na faia ni faaiuga mausali e mulimuli i le Alii e mafai ona musuia ai tagata aoga e faia faaiuga faapena i o latou olaga. Mafaufau e faasoa atu ni tala patino po o le uunaia o tagata aoga e faasoa mai ni tala o tagata latou te iloa o e ua faatoilaloina le faaosoosoga e solia le Upu o le Poto. Faamanatu i tagata aoga e aua nei faasoa maia ni faamatalaga e patino tele e uiga i tagata latou te faamatalaina. E mafai foi ona e faasoa atu ni tala moni mai taitai o le Ekalesia, e pei o nei:

• “O Se Faaiuga Mausali” (Liahona, Iuni 2006, F6–F7)

• “I Le Lalolagi” (L. Tom Perry, Liahona, Me 1988, 14–15)