Lesona 106: Mataupu Faavae ma Feagaiga 89–92

Mataupu Faavae ma Feagaiga 90

O Le Au Peresitene Sili

Ia Mati 1833, sa faatonuina ai e le Alii Iosefa Samita e vaetofia Sini Rikitone ma Feterika G. Viliamu e avea ma ona fesoasoani i le Au Peresitene Sili. I le avea ai ma se au peresitene, sa umia e nei tamalii e toatolu ki o le perisitua na mafai ai ona latou pulefaamalumalu i le malo o le Alii i le lalolagi. O lenei lesona e mafai ona fesoasoani i tagata aoga ia lagona le taua o le taitaiga na tuuina mai e Iesu Keriso i le O Le Ekalesia a Iesu Keriso o le Au Paia o Aso e Gata Ai e ala mai i Lana Au Peresitene Sili.

Gaoioiga E Ono Mafai Ona Aoao Ai

O ki e mafai ona maua ai

O se tasi o auala e amata ai le vasega o le faaalia lea o ni ki e mafai ai ona tatou maua ni aitema faapitoa pe a manaomia. E mafai ona e valaaulia tagata aoga e tusi i lalo o ni fasipepa mea latou te lagona e taua ona tausia saogalemu. Valaaulia ni nai volenitia e faasoa mai mea na latou tusia ma pe aiseā. Ao mai pepa ma loka i se nofoaga e na o se ki e mafai ona maua ai. Afai e le mafai ona e puipuia pepa i se mea e mafai ona lokaina i se ki, e mafai ona e tuuina i totonu o se pusa ma valaaulia tagata aoga e vaai faalemafaufau ua lokaina a latou pepa. Faaali atu i tagata aooga se ki ma valaaulia i latou e mafaufau e uiga i le taua o lena ki. E mafai ona e fesili:

• O a nisi o mea taua i lou olaga e manaomia ai ki ina ia mafai ona e mauaina ai?

• O ai o le a e faatuatuaina e faaaoga ma puipuia le ki? Aisea?

Mafaufau e faamatala atu o loo umia e le Faaola ki o le perisitua o loo faaaogaina i Le Ekalesia a Iesu Keriso o le Au Paia o Aso e Gata Ai. Valaaulia tagata aoga a o latou suesue i le asō e mafaufau po o ai na Ia tuuina mai i ai na ki i le lalolagi ma mea e fesoasoani na ki ia tatou maua.

Na faatulagaina e Iesu Keriso le Au Peresitene Sili

Ina ia saunia tagata aoga e suesue le fuaitau o loo i lalo, atonu e te manao e faaali atu le ata o le Au Peresitene Sili i le 1833 (tagai i le ata autu o lenei lesona) ma tuuina mai nisi o mataupu nei:

O le mea ua lauiloa i aso nei o le Au Peresitene Sili na mua’i ta’ua o le Au Peresitene o le Perisitua Maualuga. Sa valaauina Sini Rikitone ma Feterika G. Viliamu ma vaetofia o ni fesoasoani i le Perofeta o Iosefa Samita ia Mati 1833 e faatulaga ai lenei au peresitene. I le Mataupu Faavae ma Feagaiga 90, na faaali mai ai e le Alii faatonuga ia Iosefa Samita e uiga i tiutetauave o le Au Peresitene Sili.

Faitau le Mataupu Faavae ma Feagaiga 90:1–3, 6, ma vaavaai mo mea na tuuina mai e le Atua ia Iosefa Samita, Sini Rikitone, ma Feterika G. Viliamu.

• O le a le tiutetauave na tuuina mai e le Alii i nei tamalii e tauave?

  Tuu atu i tagata aoga e faasoa mai mea ua latou malamalama i ai e uiga i ki o le perisitua. Ia tuu atu foi se taimi mo tagata aoga e fai mai ai ni a latou fesili e ono i ai e uiga i ki o le perisitua ma le faatulagaga o le Ekalesia a le Alii. Pe a manaomia, e mafai ona e valaaulia tagata aoga e sue “Ki o le Perisitua” i le Taiala i Tusitusiga Paia (scriptures.ChurchofJesusChrist.org) e aoao atili ai ma faasoa mai mea latou te maua.

• O le a se mea e mafai ona tatou aoaoina mai nei fuaiupu e uiga i le auala e pulea ai e le Alii Lana Ekalesia?

Atonu e ta’ua e tagata aoga ni upumoni se tele e mafai ona tatou aoaoina. O se tasi o upumoni e mafai ona e faamamafaina o le e taitai e Iesu Keriso Lana Ekalesia i le lalolagi e ala i ki o le perisitua ua Ia tuuina mai i Lana Au Peresitene Sili.

Ina ia fesoasoani i tagata aoga ia malamalama ma lagonaina le taua o lenei upumoni, e mafai ona e faaali atu le vitiō “Where Are the Keys?” (2:51), o loo maua i le ChurchofJesusChrist.org.

E mafai foi ona e faaali atu ma talanoaina le faamatalaga lenei.

Sa faamalamalama mai e Elder D. Todd Christofferson o le Korama a Aposetolo e Toasefululua ia auala e faaaoga ai e le Faaola ki i Lana Ekalesia e faamanuia ai o tatou olaga:

I le pule o nei ki, ua faasaoina ai e tofi o le perisitua o le Ekalesia le mama a’ia’i o le aoaoga faavae a le Faaola ma le faamaoni a’ia’i o Ana sauniga faaola. Latou te fesoasoani e saunia i latou o e mananao ia mauaina, faamasino le alagatatau ma le agavaa o i latou e talosaga, ona faatino ai lea.

Faatasi ai ma ki o le malo, e mafai ai e auauna a le Alii ona iloa le moni ma le pepelo, ma ua toe faaupu mai ma le pule, “O loo faapea ona fetalai mai o le Alii.” (D. Todd Christofferson, “E Manaomia i Se A le Ekalesia,” Liahona, Nov. 2015, 110)

• O le a se mea e mafai ona tatou aoaoina e uiga ia Iesu Keriso mai le ala Na te faaaogaina ai ki o le perisitua i Lana Ekalesia?

Ina ia fesoasoani i tagata aoga ia malamalama atili i tiute o le Au Peresitene Sili, e mafai ona e valaaulia i latou e fatu ma faauma se pusa e pei o lea i a latou api talaaga mo suesuega. Tuu atu i tagata aoga e aoao ma se paga po o se vaega toalaiti e ala i le faitau, talanoaina, ma le faasoaina atu o malamalamaaga.

Tusitusiga Paia	Auala e faamanuiaina ai i tatou e le Alii e ala i le Au Peresitene Sili
Mataupu Faavae ma Feagaiga 90:9 (I le fuaiupu lenei, “o lau” e faasino i le Au Peresitene Sili, ma le “la’ua” e faasino i toeaina o le Ekalesia.)
Mataupu Faavae ma Feagaiga 90:14–16
Mataupu Faavae ma Feagaiga 107:8–9
Mataupu Faavae ma Feagaiga 107:33
Mataupu Faavae ma Feagaiga 120, ulutala o le vaega fuaiupu 1
Mataupu Faavae ma Feagaiga 124:125–126

O le Au Peresitene Sili ma faaaliga a le Atua

O lenei vaega e mafai ona fesoasoani i tagata aoga ia malamalama e taitai e le Alii Lana Ekalesia e ala i faaaliga i le Au Peresitene Sili. Faamalamalama atu i nei fuaitau, o loo faasino le Alii i faaaliga i Ana taitai filifilia o “faaaliga a le Atua” (Mataupu Faavae ma Feagaiga 90:4–5).

Faitau le Mataupu Faavae ma Feagaiga 90:4–5, ma vaavaai pe o a lagona o le Alii e uiga i faaaliga (po o faaaliga vaaia) Na te tuuina mai ia i tatou e ala mai i Lana Au Peresitene Sili.

• O a ni mea ua e aoao mai i nei fuaiupu?

• O anafea na e lagonaina ai o faaaliga a le Atua na puipuia ai oe mai afā o le olaga?

Sa faamalamalama mai e Elder Neil L. Andersen o le Korama a Aposetolo e Toasefululua le tiute silisili a le perofeta a le Alii:

E le tu se perofeta i le va o oe ma le Faaola. Ae, e tu o ia i ou talaane ma faasino atu le ala i le Faaola. O se tiutetauave aupito silisili ma se meaalofa sili ona faapelepele a se perofeta ia i tatou o lana molimau mautinoa, lona iloa mautinoa, o Iesu o le Keriso. E pei o Peteru o anamua, ua tautino mai lo tatou perofeta, “[O Ia] o le Keriso, le Alo o le Atua soifua” [Mataio 16:16]. (Neil L. Andersen, “O Le Perofeta a le Atua,” Liahona, Me 2018, 27)

• O a nisi o auala e faasino atu ai i tatou e le perofeta ma ona fesoasoani ia Iesu Keriso?

  Faaaoga upu a perofeta e faamamafa ai aoaoga faavae ma mataupu faavae. O le gaoioiga lenei e tuuina atu ai i tagata aoga se avanoa e suesue ai i upu a perofeta. Mo nisi faataitaiga i le auala e faaaoga ai upu a perofeta, tagai i le aoaoga ua faaautuina “Aoao atu mai tusitusiga paia ma upu a perofeta o aso e gata ai” i le Tomai o le Atinaega o Faiaoga: Aoao Atu le Aoaoga Faavae. Mafaufau e faataitai le tomai “Saunia ni valaaulia e fesoasoani i tagata aoga e faafesootai upumoni o loo maua i tusitusiga paia i mea o loo fai mai ai perofeta soifua.”

  Tuu atu i tagata aoga se avanoa e suesue ai nisi o sāvali talu ai nei mai le perofeta po o ona fesoasoani. E mafai e tagata aoga ona filifili se tasi o sui o le Au Peresitene Sili ma sue se tasi o ana lauga o le konafesi aoao aupito lata mai i le ChurchofJesusChrist.org. Atonu e mafai ona e vaevaeina le vasega i ni vaega se tolu, lea e suesue ai e vaega taitasi ia upu mai se tasi o sui o le Au Peresitene Sili, ma vaavaai mo aoaoga latou te manatu e taua mo le autalavou ona malamalama ai. Ona mafai lea e tagata aoga ona lipoti mai mea ua latou aoaoina. I aoaoga taitasi ua faasoa atu, uunaia tagata aoga e mafaufau loloto ma faailoa mai pe faapefea ona faasino atu ai i tatou i le Faaola o Iesu Keriso.

  E mafai ona e faaiuina le lesona i le valaaulia o ni nai tagata aoga e faasoa mai mea sa latou aoaoina ma lagonaina i le aso sa sili ona talafeagai ia i latou. Mafaufau e fai atu fesili e pei o nei:

• O a mea sa e aoaoina i le asō e te manao e manatua?

• Afai e fesili mai se tasi pe aisea e te faalogo ai i faatonuga mai le Au Peresitene Sili, o le a se mea se tasi e te manao e faamalamalama atu ia i latou?

Punaoa Faaopoopo

O a ni faataitaiga o ki o le perisitua o faaaogaina i le Ekalesia a le Alii?

Na faamatala mai e Peresitene Dallin H. Oaks o le Au Peresitene Sili:

O ē umia tofi eseese o le Perisitua Arona, latou te taitai i le sauniga o le faamanatuga i lalo o ki ma le taitaiga a le epikopo, o lē e umiaina ki o le Perisitua Arona. O lea lava foi mataupu faavae e tasi e faatatau i sauniga o le perisitua ia e taitai ai tamaitai i totonu o le malumalu. E ui e lē umia e tamaitai se tofi i le perisitua, ae latou te faatinoina sauniga paia o le malumalu i lalo o le faatagaga a le peresitene o le malumalu, o lē e umiaina ki mo sauniga o le malumalu.

O se isi faataitaiga o le pule o le perisitua i lalo o le taitaiga a lē o umiaina ki, o aoaoga a alii ma tamaitai e valaauina e a’oa’o atu le talalelei, pe o ni vasega i a latou uarota masani po o le galuega faamisiona. O isi faataitaiga o i latou e umiaina tofiga faaleautaitai i le uarota ma faaaoga le pule o le perisitua ia latou taitaiga, ona o o latou valaauga ma i lalo o le vaetofiaina ma le taitaiga a le taitai perisitua o loo umiaina ki i le uarota po o le siteki. O le auala lenei e faaaoga ai le pule ma le mana o le perisitua ma sapi ai i Le Ekalesia a Iesu Keriso o le Au Paia o Aso e Gata Ai. (Dallin H. Oaks, “O Le Perisitua Mekisateko ma Ki,” Liahona, Me 2020, 70)

Mataupu Faavae ma Feagaiga 90:28–31. O ai Vienna Jaques?

O Vienna Jaques o se tagata o le Ekalesia sa faaalia le faamaoni tele i le Alii ma Lana Ekalesia toefuataiina. Sa fesoasoani o ia e aumai isi ia Keriso ma faapaiaina ana meatotino i le Alii. Sa ia foai atu foi se aofaiga tele o tupe i se taimi sa matuai manaomia ai lava se tupe.

Na tusia e le Perofeta o Iosefa Samita (1805–44) se tusi ia Vienna Jaques ma tau atu ia te ia sa musumusu atu e le Agaga lenei mea i lona loto:

Iosefa ua e nofo aitalafu i lou Atua mo le taulaga a lou Tuafafine Vienna lea na faamaonia ai se [faaola] o le ola …, o lea o le a le galo ai ia te ia oe. (Iosefa Samita, i le Talafaasolopito, 1838–1856, voluma A-1 faaopoopoga, josephsmithpapers.org)

Aoao atili e uiga ia te ia i punaoa nei:

• Punaoa Faasolopito o le Mataupu Faavae ma Feagaiga, “Vienna Jaques,” ChurchofJesusChrist.org

• “Jaques, Vienna,” josephsmithpapers.org

Gaoioiga Faaopoopo e Aoao Ai

Faamasani i le Au Peresitene Sili

A o lei talanoa e uiga i nisi o tiutetauave o le Au Peresitene Sili, e mafai ona e fai atu i tagata aoga e faasoa faapuupuu mai mea latou te iloa e uiga i fesoasoani a Iosefa Samita. Mafaufau e faasoa atu se mea moni se tasi pe lua e uiga i fesoasoani taitasi. Mo se fesoasoani, tagai i mea nei:

• Autu o le Talafaasolopito a le Ekalesia: “Sini Rikitone,” ChurchofJesusChrist.org/study/history/topics

• Punaoa Faasolopito o le Mataupu Faavae ma Feagaiga, “Feterika G. Viliamu,” ChurchofJesusChrist.org

E mafai foi e tagata aoga ona iloa le Au Peresitene Sili o i ai nei e ala i aoaoga taitasi e uiga i le olaga o se tasi o sui o le Au Peresitene. Mo se faataitaiga, atonu latou te sueina o latou talaaga i le ChurchofJesusChrist.org ma maua faamatalaga e uiga i o latou aiga, o latou olaga faalegaluega, o latou aso fanau, po o mea sa latou fiafia i ai a o talavou i latou.

E mafai e tagata aoga ona galulue na o i latou lava ona faasoa mai lea o mea na latou aoaoina ma tagata aoga o e na aoaoina e uiga i sui eseese o le Au Peresitene Sili.

Atonu e te manao e faasino atu tagata aoga i le itulau o le “Au Peresitene Sili” i le ChurchofJesusChrist.org pe saunia ni kopi pepa o le faamatalaga.

E tuuina mai e le Alii le lagolagosua

O le faatulagaga o le Au Peresitene Sili o se tasi lea o auala na tuuina atu ai e le Alii ia Iosefa Samita le lagolagosua manaomia i ona tiutetauave. Ina ia fesoasoani i tagata aoga e vaai faalemafaufau i lenei mea, e mafai ona e valaaulia se volenitia e uu sina mea mamafa laitiiti ao faaloloa ona lima i le umi e mafai ai e ia e aunoa ma se fesoasoani. A amata ona lelavā lima o le tagata aoga, valaaulia ni tagata aoga se toalua e tutu i ona tafatafa e fesoasoani e lagolago le avega mamafa. Ona mafai lea ona e faaali atu le ata lenei ma tuu atu i tagata aoga e faasoa mai mea ua latou iloa e uiga i le tala o i le Esoto 17:8–13.

Ona tou talanoaina lea o fesili e pei o nei:

• O anafea na fesoasoani ai isi ia te oe i se mea sa faigata ona ausia e oe lava ia?

• O a nisi o auala ua saunia ai e Iesu Keriso tagata taitoatasi i Lana Ekalesia ma le lagolago atonu latou te manaomia mai isi?

Mataupu Faavae ma Feagaiga 91. Iloatinoina o le upumoni

Filifili se autu faapitoa ma valaaulia tagata aoga e lisi ni punaoa eseese e ono maua ai e se tasi ni faamatalaga. Fai atu i tagata aoga e talanoaina pe mafai faapefea ona e iloa pe moni se mea na e faitauina e uiga i lenei autu.

Faamalamalama atu o le faaaliga o loo tusia i le Mataupu Faavae ma Feagaiga 91 ua ta’u mai ia Iosefa Samita i le auala e iloatino ai pe moni se mea sa ia faitauina. Ina ua ia mauaina lenei faaaliga, sa faaliliuina e Iosefa Samita le Tusi Paia ma sa oo mai i se vaega na ta’ua o le Apokalifa.

Afai e fiafia i ai tagata aoga, e mafai ona e faasoa atu o le Apokalifa o se tuufaatasiga o tusi e paia sa lei aofia ai muamua i le Tusi Paia Eperu (Feagaiga Tuai) ae sa aofia ai i faaliliuga faa-Eleni o le Feagaiga Tuai sa faaaoga i ona po o Iesu. O le kopi o le Tusi Paia sa faaaogaina e Iosefa Samita e fatu ai ana faaliliuga musuia o loo i ai le Apokalifa. Na ta’u atu e le Alii ia Iosefa e le manaomia ona ia faaliliuina lenei vaega o le Tusi Paia (tagai Mataupu Faavae ma Feagaiga 91:1–3).

Valaaulia tagata aoga e faitau le Mataupu Faavae ma Feagaiga 91:4–6, ma vaavaai mo le fautuaga a le Alii i le auala e iloatino ai le mea moni mai mea sese i mea tatou te faitauina, matamata, pe faalogo i ai. O le fuaitau o le atamai i aoaoga faavae Mataupu Faavae ma Feagaiga 8:2–3 e mafai foi ona fesoasoani i le talanoaina o lenei autu. Uunaia tagata aoga e faaaoga le lapataiga pe a latou le mautonu e uiga i le moni o faamatalaga latou te mauaina.