“Lēsoni 105—Tokāteline mo e Ngaahi Fuakava 89:18–21: ‘Ko Au, ko e ʻEikí, ʻOku Ou Fai ha Talaʻofa Kiate Kinautolu,’” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 89:18–21,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 105: Tokāteline mo e Ngaahi Fuakava 89–92
Tokāteline mo e Ngaahi Fuakava 89:18–21
“Ko Au, ko e ʻEikí, ʻOku Ou Fai ha Talaʻofa Kiate Kinautolu”
Hili hono fakahā e Lea ʻo e Potó kia Siosefa Sāmitá (vakai ki he lēsoni “Tokāteline mo e Ngaahi Fuakava 89:1–17”), naʻe fakamatalaʻi ʻe Sīsū Kalaisi ha niʻihi ʻo e ngaahi tāpuaki ʻokú Ne foaki kiate kinautolu ʻoku nau tauhi faivelenga ʻa e ngaahi tefitoʻi moʻoni ʻoku akoʻi ʻi he fakahā ko ʻení. ʻOku fakataumuʻa e lēsoni ko ʻení ke tokoni ki he kau akó ke nau fili ke moʻui ʻaki e Lea ʻo e Potó mo maʻu e ngaahi tāpuaki ʻa e Fakamoʻuí kuo talaʻofa maí.
Ngaahi ʻEkitivitī Ako ʻOku Ala Fakahokó
Ko e ʻā vahevahé
Kamata e kalasí ʻaki hono tokoniʻi e kau akó ke mahino kiate kinautolu naʻe foaki mai ʻe he Fakamoʻuí ʻa e Lea ʻo e Potó ko ha maluʻi koeʻuhí he ʻokú Ne ʻofa ʻiate kitautolu. Ko e founga ʻe taha ke fakahoko ai ʻení ko hano tā ʻi he palakipoé ha matāfanga ʻoku fakamavaheʻi ʻaki ha pā fakangatangata mei he ʻōsení, ʻo hangē ko e sīpinga ko ʻení.
Fakamatalaʻi ange naʻe ako ʻe ʻEletā Voni G. Kiisi (1960–2018) ʻo e Kau Fitungofulú ha lēsoni mahuʻinga ʻi ha matātahi ʻoku tatau mo ʻení. Vahevahe ʻene aʻusiá ʻo fakaʻaongaʻi e palakalafi ko ʻení mo ʻene fakamatala ʻi laló.
Naʻe ʻi he matātahí ʻa ʻEletā Voni K. Kiisi ʻi ha ʻaho ʻe taha, pea naʻe ʻi ai mo ha kulupu fānifo ai ne ʻaʻahi mai ʻo nau loto-mamahi koeʻuhí ko ha pā fakangatangata naʻe fokotuʻu ʻi he vahaʻa ʻo e matāfangá mo e ʻōsení. Naʻe lāunga fakaʻita ʻa e kau fānifó ʻi he maumauʻi ʻe he pā fakangatangatá ʻenau taimi ʻevá ʻi heʻene taʻofi kinautolu mei heʻenau fānifo ʻi he ngaahi peau lalahi naʻe fasi ʻi tuʻa he matāfangá.
Ne faifai pea tuʻu hake [ha taha fānifo matuʻotuʻa ange] ʻo lue atu ki he kulupú. Ne ʻikai ke ne lea ka ne toʻo hake ha ongo meʻa fakaʻata mei heʻene kato āfeí ʻo ʻoange ki ha taha ʻo e kau fānifó peá ne tuhu ki he paá. Ne sio tahataha e kau fānifó ʻi he meʻa fakaʻatá. ʻI heʻene aʻu mai kiate aú, naʻá ku lava ʻo sio, ʻi he tokoni mai ʻa e meʻa fakaʻata lahí ki ha meʻa naʻe ʻikai ke u lava ʻo sio ki ai ki muʻa: ko ha ngaahi tala—ʻo ha fanga ʻanga lalahi ʻoku fafanga ofi ʻi he hakaú ʻi he tafaʻaki ʻe taha ʻo e paá. …
Ne fakafokifā e liliu ʻemau fakakaukaú ʻi heʻemau tuʻu he matātahi fakaʻofoʻofa ko iá. Ko ha pā ne hangē naʻe tuʻumaʻu mo fakapōpulá—ne hangē naʻá ne fakangatangata ʻa e fakalata mo e fiefia ʻo e fānifo ʻi he ngaahi peau lalahí—kuo hoko ia ko ha meʻa lelei ʻaupito. ʻI he toki mahino kiate kimautolu ʻa e fakatuʻutāmaki ʻoku toitoi mai ʻi lalo he fukahi vaí, kuo ʻomi ai ʻe he paá ha maluʻi, haoʻanga mo e nonga. (Von G. Keetch, “ʻOku Monūʻia mo Fiefia ʻa Kinautolu ʻOku Tauhi e Ngaahi Fekau ʻa e ʻOtuá,” Liahona, Nōvema 2015, 116)
-
Ko e hā ʻe lava ke akoʻi mai ʻe he aʻusia ʻa ʻEletā Kīsí fekauʻaki mo e ʻOtuá mo ʻEne ngaahi fekaú?
-
Ko e ngaahi fekau fē ʻoku nau fakatātaaʻi lelei taha atu e finangalo ʻo e ʻOtuá ke maluʻi kitautolú? Ko e hā hono ʻuhingá?
ʻE lava ke ke fakahingoa ʻa e pā fakangatangata ʻi he vahaʻa ʻo e matāfangá mo e ʻōsení ʻi he palakipoé ko e “Lea ʻo e Potó.” Kole ki ha niʻihi ʻe loto-fiemālie ke vahevahe ʻa e meʻa ʻoku nau manatuʻi fekauʻaki mo e Lea ʻo e Potó. (Kapau naʻe faʻu ʻe he kau akó ha fanga kiʻi tohitufa ʻo fakamatalaʻi ʻa e Lea ʻo e Potó ʻi he lēsoni kuo ʻosí, te nau lava ʻo vakai ki ai ki ha tokoni.)
ʻE lava foki ke lau mo vahevahe ʻe he kau akó ha ngaahi kupuʻi lea mei he Tokāteline mo e Ngaahi Fuakava 89:1–4 ʻoku nau fakamatalaʻi e ngaahi taumuʻa ʻa e ʻEikí ki hono fakahā ʻa e Lea ʻo e Potó, ko ha fakamanatu.
Hili iá, fakakaukau ke fakaʻaliʻali e ongo fehuʻi ko ʻení pea fakaafeʻi e kau akó ke lekooti ʻenau ngaahi talí ʻi heʻenau tohinoa akó.
-
ʻOkú ke pehē ko e Lea ʻo e Potó ko ha tāpuaki ia mei he Tamai Hēvaní pe ko ha fakangatangata ʻi hoʻo moʻuí?
-
Ko e hā ʻokú ke ʻilo fekauʻaki mo e ngaahi tāpuaki ʻoku foaki ʻe he Tamai Hēvaní kiate kinautolu ʻoku nau tauhi e Lea ʻo e Potó?
-
Ko e hā hono mahuʻinga kiate koe ke tauhi e Lea ʻo e Potó? Ko e hā hono ʻuhingá?
Ngaahi tāpuaki ʻoku finangalo e Fakamoʻuí ke foaki maʻatautolú
Hili hono fakahā e Lea ʻo e Potó kia Siosefa Sāmitá, naʻe fakamatalaʻi ʻe Sīsū Kalaisi ʻa e ngaahi tāpuaki ʻokú Ne foaki mo e Tamai Hēvaní kiate kinautolu ʻoku talangofua faivelenga ki he fakahā ko ʻení.
Lau ʻa e Tokāteline mo e Ngaahi Fuakava 89:18–21, pea fakaʻilongaʻi ʻa e ngaahi talaʻofa takitaha ʻokú Na fai kiate kinautolu ʻoku talangofuá.
Ko e Tokāteline mo e Ngaahi Fuakava 89:18–21 ko ha potufolofola fakataukei fakatokāteline ia. Fakakaukau ke fakaafeʻi ʻa e kau akó ke nau fakaʻilongaʻi ʻa e ngaahi potufolofola fakataukei fakatokāteliné ʻi ha founga makehe koeʻuhí ke nau lava ʻo maʻungofua kinautolu.
ʻI he fakatātā ʻi he palakipoé ʻo e matāfangá, ʻe lava ke hiki ʻe he kau akó ʻa e ngaahi tāpuaki ʻoku nau maʻú. Fakapapauʻi ʻoku ʻiloʻi ʻe he kau akó ʻe tāpuakiʻi kitautolu ʻe he ʻEikí ʻaki ha moʻui lelei lahi ange, poto, kātaki, mo e maluʻi kapau te tau muimui ki Heʻene Lea ʻo e Potó.
-
ʻOkú ke pehē ko e hā ha ngaahi fehuʻi ʻe ala maʻu ʻe ha kakai ʻe niʻihi ʻi heʻenau lau e ngaahi talaʻofa ko ʻeni mei he ʻEikí?
Makatuʻunga ʻi he ngaahi fehuʻi ʻoku vahevahe ʻe he kau akó pea mo e faingamālie ʻa e taimí, fakapapauʻi pe ko e fē ʻi he ngaahi konga ko ʻeni ʻe tolu ʻo e lēsoní ʻe ʻaonga taha ki he kau akó. Te ke lava ʻo tuku ki he kalasí ke nau fili ʻa e konga te nau fie akó.
Ngaahi tāpuaki ʻo e moʻui leleí mo e kātakí (veesi 18, 20)
ʻE lava ke tokoni ʻa e konga ko ʻení ke mahino ki he kau akó ʻoku ʻikai talaʻofa ʻe he ʻEikí ha moʻui lelei haohaoa kiate kinautolu ʻoku nau tauhi e Lea ʻo e Potó, ka te Ne tāpuakiʻi ʻa e talangofuá ʻaki ha moʻui lelei ange ʻi he tuʻunga ne nau mei ʻi ai kapau naʻe ʻikai ke nau muimui ki Heʻene faleʻí.
Lau ʻa e palakalafi 7–8 ʻi he konga “Ko Hono Maʻu ʻo e ʻIlo Fakalaumālié” ʻo e Fakamatala ki he ʻElito ʻo e Fakataukei Fakatokāteliné (2023). Lau foki ʻa e ngaahi akonaki ko ʻeni meia Palesiteni Tieta F. ʻUkitofa, naʻe kau ʻi he Kau Palesitenisī ʻUluaki kimuʻá. Naʻá ne fakamatala ki ha meʻa naʻá ne aʻusia ʻi heʻene kei talavoú ʻi he ngāue fakakautaú ʻa ia naʻá ne fakatokangaʻi ai naʻe mahulu hake ha kau sōtia ʻe niʻihi naʻe ʻikai ke nau tauhi e Lea ʻo e Potó, ʻiate ia ʻi heʻenau ʻekitivitī fakatuʻasinó. Kumi ha ngaahi moʻoni ʻe lava ʻo tokoni ki ha taha ke ne tali ha ngaahi fehuʻi ʻokú ne maʻu fekauʻaki mo e ngaahi talaʻofa naʻe fai ʻe he ʻEikí ʻi he Tokāteline mo e Ngaahi Fuakava 89:18, 20.
Naʻe faifai pē peá u ʻiloʻi ʻoku ʻikai vave maʻu pē hono fakahoko ʻo e ngaahi talaʻofa ʻa e ʻOtuá ʻi he founga ʻoku tau ʻamanaki atu ki aí; ʻoku hoko mai ʻo fakatatau mo ʻEne taimí pea ʻi Heʻene ngaahi foungá. Hili ha ngaahi taʻu mei ai, ne u lava ʻo vakai lelei ki he fakamoʻoni ʻo e ngaahi tāpuaki fakatuʻasino ʻoku maʻu ʻe kinautolu ʻoku nau talangofua ki he Lea ʻo e Potó—ʻo fakalahi atu ia ki he ngaahi tāpuaki fakalaumālie ʻoku maʻu he taimi pē ko iá mei he talangofua ki ha taha pē ʻo e ngaahi fono ʻa e ʻOtuá. ʻI heʻeku vakai atu ki muí, ʻoku ou ʻiloʻi fakapapau ai ʻoku pau maʻu pē e ngaahi talaʻofa ʻa e ʻEikí, neongo ʻoku ʻikai hoko vave maʻu pē. (Dieter F. Uchtdorf, “Fai Atu Ai Pē ʻi he Faʻa Kātaki,” Liahona, Mē 2010, 58)
-
Ko e hā ha meʻa naʻá ke ako fekauʻaki mo e ʻEikí mo ʻEne ngaahi talaʻofá ʻe lava ʻo tokoni ki ha taha ʻokú ne tauhi faivelenga ʻa e Lea ʻo e Potó ka ʻoku kei fefaʻuhi pē mo ha ngaahi faingataʻaʻia fakaemoʻui lelei?
Ngaahi tāpuaki ʻo e potó mo e ʻiló (veesi 19)
Lau ʻa e Tokāteline mo e Ngaahi Fuakava 29:34, pea fakakaukau ki he founga ʻe lava ke fakaʻaongaʻi ai e tokāteline naʻe akoʻi ʻe he Fakamoʻuí ʻi he veesi ko ʻení ki he Lea ʻo e Potó.
-
ʻOku hoko fēfē ʻa e Lea ʻo e Potó ko ha tāpuaki fakalaumālie ʻo tānaki atu ki ha tāpuaki fakatuʻasino?
-
Ko e hā ha ngaahi founga ʻoku fakaʻatā ai ʻe heʻetau talangofua ki he Lea ʻo e Potó ke tāpuakiʻi kitautolu ʻe he Fakamoʻuí ʻaki ha poto mo ha ʻilo fakaʻatamai lahi ange? ʻaki ha poto mo ha ʻilo fakalaumālie lahi ange?
-
ʻOku tokoniʻi fēfē kitautolu ʻe he talangofua ki he Lea ʻo e Potó ke tau maʻu kakato ange ha fakahā mei he ʻOtuá ʻo fakafou ʻi he Laumālie Māʻoniʻoní?
Ke tokoni ke tali ʻe he kau akó ʻa e fehuʻi kimuʻá, mahalo te ke fie vahevahe ʻa e ʻuluaki fakamatala naʻe fai ʻe Palesiteni Poiti K. Peeka ʻi he konga “Ngaahi Maʻuʻanga Tokoni Kehé.”
Fakakaukau ke fakahaaʻi ʻa e fakatātā ko ʻeni ʻo e fakafisi ʻa Taniela ke kai ʻa e “tufakanga meʻa kai ʻo e tuʻí” (Taniela 1:8) ko ha fakamoʻoni ʻo hono tāpuakiʻi ʻe he ʻOtuá ʻa kinautolu ʻoku nau tauhi ʻEne ngaahi fono ʻo e moʻui leleí. Kole ki he kau akó ke vahevahe ʻa e meʻa ʻoku nau manatuʻi fekauʻaki mo e talanoá. Kapau ʻe fiemaʻu, te ke lava ʻo vahevahe ha konga ʻo e palakalafi ko ʻení ke fakamanatu kiate kinautolu.
Naʻe akoʻi ʻa Taniela mo e toʻu tupu kehe naʻe nofo ʻi Pāpiloné ke nau hoko ko ha kau tangata poto maʻá e tuʻí. ʻI he taimi naʻe foaki ange ai kiate kinautolu ʻa e kakanoʻi manu ʻa e tuʻí, naʻe ʻikai fie kai ia ʻe Taniela koeʻuhí ko e ngaahi lao ʻa e ʻEikí ki he moʻui leleí ʻi he taimi ko iá. Naʻe fakaʻatā ʻe he tamaioʻeiki ʻa e tuʻí ʻa Taniela mo ha niʻihi kehe ʻi ha ʻaho ʻe 10 ke nau kai ha meʻakai kehe ke vakai pe te nau moʻui lelei mo fakapotopoto ʻo hangē ko e toenga ʻo e toʻu tupu ʻi he polokalamá.
Lau ʻa e Taniela 1:17–20, ʻo kumi ha fakamoʻoni ki he ngaahi tāpuaki fakatuʻasino mo fakalaumālie ʻo e potó naʻe foaki ʻe he ʻOtuá kia Taniela mo hono ngaahi hoá.
-
Ko e hā ha sīpinga ʻo e ngaahi tāpuaki ʻa e ʻOtuá naʻá ke maʻú?
Ngaahi tāpuaki ʻo e maluʻí (veesi 21)
Fakakaukau ke fakaʻaliʻali ʻa e fakatātā ko ʻeni ʻo e Laka Atú pea taki e tokanga ʻa e kau akó ki he toto ʻi he kau matapaá. Fakamatalaʻi ange ʻe lava ke fakamanatu mai ʻe he maluʻi mei he “ʻāngelo fakaʻauhá” ʻa e taimi naʻe maluʻi ai ʻa e kau ʻIsilelí mei ha mahaki fakaʻauha ʻo e mate ʻa e ʻuluaki fānaú naʻá ne kāpui ʻa ʻIsipite he kuonga muʻá. Naʻe fakahaofi ʻa kinautolu naʻe talangofua ʻo vali e toto ʻo e lamí ʻi honau ngaahi matapaá (fakataipe ʻa e taʻataʻa ʻo e Lami ʻa e ʻOtuá). ʻE lava ke ʻuhinga ʻa e talaʻofa ko ʻeni ʻo e maluʻí ki he malu fakatuʻasino mo fakalaumālié.
ʻI he ʻōseni ʻi he fakatātā he palakipoé, ʻe lava ke lisi ai ʻe he kau akó ʻa e ngaahi fakatuʻutāmaki ʻoku maluʻi kitautolu ʻe he Fakamoʻuí mei ai ʻo fakafou ʻi he Lea ʻo e Potó. (Mahalo te nau lisi ha ngaahi meʻa hangē ko e maʻunimaá, mahakí, taʻetāú, ngaahi vā fetuʻutaki maumaú, mo e ngaahi meʻa peheé.)
Ke tokoni ke aleaʻi ʻe he kau akó ʻa e maluʻi fakalaumālie ʻoku foaki mai ʻe he Fakamoʻuí, te ke lava ʻo vahevahe ʻa e fakamatala hono ua ʻa Palesiteni Peeka ʻi he konga “Ngaahi Maʻuʻanga Tokoni Kehé.”
-
Ko e hā ha ngaahi sīpinga ʻo e maluʻi ʻa e Fakamoʻuí kuó ke mamata ai ʻi hoʻo moʻuí ʻi hoʻo tauhi e Lea ʻo e Potó?
Ko e Talangofua ki he Lea ʻo e Potó
Fakakaukau ke fakamoʻoni ki he founga kuo tāpuekina ai koe ʻe he ʻEikí ʻi hoʻo tauhi e Lea ʻo e Potó. Poupouʻi ʻa e kau akó ke lekooti ‘enau tali ki he fehuʻi ko ʻení ʻi heʻenau tohinoa akó:
-
Makatuʻunga ʻi he meʻa kuó ke ako fekauʻaki mo e Lea ʻo e Potó, ko e hā e ʻuhinga ʻoku mahuʻinga ai kiate koe ke ke talangofua ki he fakahā ko ʻeni meia Kalaisí?
Faʻu ha palani ʻe tokoni atu ke ke tauhi e Lea ʻo e Potó. Fakakaukau ki ha ngaahi tūkunga pe ʻahiʻahi te ke ala fehangahangai mo ia, pea fili e founga lelei taha ke ke ikunaʻi ai kinautolú. Fakakaukau ke vahevahe hoʻo ngaahi holí mo hoʻo palaní mo e Tamai Hēvaní ʻi he lotu pea kolea Hono mālohí ke lavameʻa.
Ako Ma‘uloto
Mahalo te ke fie tokoni ki he kau akó ke ako maʻuloto ʻa e potufolofola fakataukei fakatokāteliné mo e kupuʻi lea mahuʻinga ʻo e potufolofolá lolotonga ʻa e lēsoni ko ʻení pea fakamanatu leva ia ʻi he ngaahi lēsoni ʻi he kahaʻú. Ko e kupuʻi lea folofola mahuʻingá ko e “Ko e ngaahi tāpuaki ʻo e Lea ʻo e Potó.” Ko e ngaahi fakakaukau ki he ngaahi ʻekitivitī ako maʻulotó ʻoku maʻu ia ʻi he ngaahi naunau fakalahi ʻi he “Ngaahi ʻEkitivitī Fakamanatu ʻo e Fakataukei Fakatokāteliné.”