“Lēsoni 106—Tokāteline mo e Ngaahi Fuakava 90: Ko e Kau Palesitenisī ʻUluakí,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 90,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 106: Tokāteline mo e Ngaahi Fuakava 89–92
Tokāteline mo e Ngaahi Fuakava 90
Ko e Kau Palesitenisī ʻUluakí
ʻI Māʻasi 1833, naʻe fakahinohinoʻi ai ʻe he ʻEikí ʻa Siosefa Sāmita ke vaheʻi ʻa Sitenei Likitoni mo Feletiliki G. Uiliamisi ke na hoko ko hono ongo tokoni ʻi he Kau Palesitenisī ʻUluakí. ʻI heʻenau hoko ko e kau palesitenisií, naʻe maʻu ʻe he kau tangata ʻe toko tolu ko ʻení ʻa e ngaahi kī ʻo e lakanga fakataulaʻeikí ʻa ia naʻe lava ai ke nau tokangaʻi ʻa e puleʻanga ʻo e ʻEikí ʻi he māmaní. ʻE lava ke tokoni e lēsoni ko ʻení ke ongoʻi ʻe he kau akó ʻa e mahuʻinga ʻo e fakahinohino ʻoku ʻomi ʻe Sīsū Kalaisi ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻo fakafou ʻi Heʻene Kau Palesitenisī ʻUluakí.
Ngaahi ʻEkitivitī Ako ʻOku Ala Fakahokó
ʻE lava ke ʻomi ʻe he ngaahi kií ha founga
Ko e founga ʻe taha ke kamata ʻaki e kalasí ko hono fakahaaʻi ʻoku fakaʻatā kitautolu ʻe he ngaahi kií ke tau lava ʻo maʻu ha ngaahi meʻa makehe ʻi he taimi ʻoku fiemaʻu aí. Te ke lava ʻo fakaafeʻi e kau akó ke nau hiki ʻi ha fanga kiʻi laʻipepa iiki ʻa e ngaahi meʻa ʻoku nau ongoʻi ʻoku mahuʻinga ke tauhi ke malú. Fakaafeʻi ha niʻihi ʻe loto-fiemālie ke vahevahe ʻa e meʻa ne nau tohí pea mo hono ʻuhingá. Tānaki ʻa e ʻū laʻipepá pea lokaʻi kinautolu ʻi ha feituʻu ʻe toki lava pē ʻo fakaava ʻaki ha kī. Kapau ʻoku ʻikai ke ke lava ʻo tauhi ʻa e ʻū laʻipepá ʻi ha feituʻu ʻe lava ke lokaʻi ʻaki ha kī, te ke lava ʻo faʻo kinautolu ʻi ha puha pea fakaafeʻi e kau akó ke fakakaukauloto ʻoku lokaʻi ʻenau ʻū laʻipepá. Fakaʻaliʻali ki he kau akó ha foʻi kī pea fakaafeʻi ke nau fakakaukau ki he mahuʻinga ʻo e kī ko iá. Te ke lava ʻo fehuʻi ange:
-
Ko e hā ha ngaahi meʻa mahuʻinga ʻi hoʻo moʻuí ʻoku fiemaʻu ki ai ha ʻū kī kae lava ke ke maʻu kinautolu?
-
Ko hai te ke falala ki ai ke fakaʻaongaʻi mo maluʻi e foʻi kií? Ko e hā hono ʻuhingá?
Fakakaukau ke fakamatalaʻi ange ʻoku maʻu ʻe he Fakamoʻuí ʻa e ngaahi kī ʻo e lakanga fakataulaʻeikí ʻa ia ʻoku fakaʻaongaʻi ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Fakaafeʻi e kau akó ʻi heʻenau ako he ʻaho ní ke nau fakakaukau pe ko hai ʻokú Ne fakafalala ki ai e ngaahi kī ko iá ʻi he māmaní pea mo e meʻa ʻoku nau tokoni ke tau lava ʻo fakahokó.
Naʻe fokotuʻutuʻu ʻe Sīsū Kalaisi ʻa e Kau Palesitenisī ʻUluakí
Ke teuteuʻi e kau akó ke nau ako ʻa e potufolofola ʻi laló, mahalo te ke fie fakaʻaliʻali ʻa e fakatātā ʻo e Kau Palesitenisī ʻUluaki ʻi he 1833 (vakai ki he fakatātā ʻi he kamataʻanga ʻo e lēsoni ko ʻení) pea ʻoange ha konga ʻo e puipuituʻa ko ʻení:
Ko e meʻa ʻoku ʻiloa he ʻahó ni ko e Kau Palesitenisī ʻUluakí naʻe fuofua ui ia ko e Kau Palesitenisī ʻo e Lakanga Fakataulaʻeiki Māʻolungá. Naʻe ui mo vaheʻi ʻa Sitenei Likitoni mo Feletiliki G. Uiliamisi ko ha ongo tokoni ki he Palōfita ko Siosefa Sāmitá ʻi Māʻasi ʻo e 1833 ke faʻu ʻa e kau palesitenisī ko ʻení. Naʻe fakahā ʻe he ʻEikí ʻi he Tokāteline mo e Ngaahi Fuakava 90, ha ngaahi fakahinohino kia Siosefa Sāmita fekauʻaki mo e ngaahi fatongia ʻo e Kau Palesitenisī ʻUluakí.
Lau ʻa e Tokāteline mo e Ngaahi Fuakava 90:1–3, 6, ʻo kumi e meʻa naʻe fakafalala ʻe he ʻOtuá kia Siosefa Sāmita, Sitenei Likitoni, mo Feletiliki G. Uiliamisí.
-
Ko e hā e fatongia naʻe ʻoange ʻe he ʻEikí ki he kau tangata ko ʻení?
Tuku ke vahevahe ʻe he kau akó ʻa e meʻa ʻoku mahino kiate kinautolu fekauʻaki mo e ngaahi kī ʻo e lakanga fakataulaʻeikí. ʻOange foki ha taimi ki he kau akó ke nau ʻeke ha ngaahi fehuʻi ʻoku nau ala maʻu fekauʻaki mo e ngaahi kī ʻo e lakanga fakataulaʻeikí pea mo hono fokotuʻutuʻu ʻo e Siasi ʻo e ʻEikí. Kapau ʻe fiemaʻu, te ke lava ʻo fakaafeʻi ʻa e kau akó ke kumi ʻa e “Kī ʻo e Lakanga Fakataulaʻeikí, Ngaahi” ʻi he Fakahinohino ki he Ngaahi Folofolá (scriptures.ChurchofJesusChrist.org) ke ako lahi ange mo vahevahe e meʻa te nau maʻú.
-
Ko e hā ha meʻa te tau lava ʻo ako mei he ngaahi veesi ko ʻení fekauʻaki mo e founga ʻoku puleʻi ʻaki ʻe he ʻEikí ʻa Hono Siasí?
Mahalo ʻe tala atu ʻe he kau akó ha ngaahi moʻoni lahi te tau lava ʻo ako. Ko ha foʻi moʻoni ʻe taha ʻe lava ke ke fakamamafaʻí ʻoku tataki ʻe Sīsū Kalaisi Hono Siasí ʻi he māmaní ʻo fakafou ʻi he ngaahi kī ʻo e lakanga fakataulaʻeikí kuó Ne foaki ki Heʻene Kau Palesitenisī ʻUluakí.
Ke tokoni ke mahino mo ongoʻi ʻe he kau akó e mahuʻinga ʻo e foʻi moʻoni ko ʻení, te ke lava ʻo huluʻi e vitiō “Where Are the Keys?” (2:51), ʻoku maʻu ʻi he ChurchofJesusChrist.org.
Te ke lava foki ʻo fakaʻaliʻali pea aleaʻi ʻa e fakamatala ko ʻení.
Naʻe fakamatalaʻi ʻe ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e founga ʻoku fakaʻaongaʻi ai ʻe he Fakamoʻuí ʻa e ngaahi kií ʻi Hono Siasí ke tāpuekina ʻetau moʻuí:
ʻI he mafai ʻo e ngaahi kī ko ʻení, ʻoku paotoloaki ʻe he kau ʻōfisa ʻo e Siasí ʻi he lakanga fakataulaʻeikí ʻa hono haohaoa ʻo e tokāteliné mo hono totonu ʻo ʻEne ngaahi ouau fakahaofí. ʻOku nau tokoni ke teuteuʻi ʻa kinautolu ʻoku nau fakaʻamu ke maʻu iá, fakamāuʻi e tuʻunga feʻunga mo moʻui taau ʻa kinautolu ʻoku nau koleá, pea fakahoko leva.
ʻOku malava ʻe he kau tamaioʻeiki ʻa e ʻEikí ʻo ʻiloʻi ʻa e moʻoní mo e loí fakatouʻosi, pea ʻi hono mafaí ʻokú Ne folofola mai, “ʻOku pehē ʻe he ʻEikí.” (D. Todd Christofferson, “ʻUhinga ʻo e Siasí,” Liahona, Nōvema 2015, 110)
-
Ko e hā ha meʻa te tau lava ʻo ako fekauʻaki mo Sīsū Kalaisi mei he founga ʻokú Ne fakaʻaongaʻi ai e ngaahi kī ʻo e lakanga fakataulaʻeikí ʻi Hono Siasí?
Ke tokoni ke mahino lelei ange ki he kau akó ʻa e ngaahi fatongia ʻo e Kau Palesitenisī ʻUluakí, te ke lava ʻo fakaafeʻi kinautolu ke faʻu mo fakakakato ha tēpile hangē ko ʻení ʻi heʻenau tohinoa akó. Tuku ke ako ʻa e kau akó mo ha hoa pe kulupu tokosiʻi ʻo fakafou ʻi he laukongá, alēleá, mo hono vahevahe ʻo e ngaahi fakakaukaú.
|
Ngaahi Folofolá |
Founga ʻoku tāpuekina ai kitautolu ʻe he ʻEikí ʻo fakafou ʻi he Kau Palesitenisī ʻUluakí |
|---|---|
|
Tokāteline mo e Ngaahi Fuakava 120, ʻuluʻi vahé mo e veesi 1 | |
Ko e Kau Palesitenisī ʻUluakí mo e ngaahi mafai ʻo e ngaahi folofola ʻa e ʻOtuá
ʻE lava ke tokoni ʻa e konga ko ʻení ke mahino ki he kau akó ʻoku tataki ʻe he ʻEikí Hono Siasí ʻo fakafou ʻi he fakahā ki he Kau Palesitenisī ʻUluakí. Fakamatalaʻi ange ʻoku ʻuhinga ʻa e ʻEikí ʻi he ngaahi potufolofola ko ʻení, ki he ngaahi fakahā ki Heʻene kau taki kuo filí ko e “ngaahi mafai ʻo e folofola ʻa e ʻOtuá” (Tokāteline mo e Ngaahi Fuakava 90:4–5).
Lau ʻa e Tokāteline mo e Ngaahi Fuakava 90:4–5, ʻo kumi e ongo ʻoku maʻu ʻe he ʻEikí fekauʻaki mo e ngaahi mafai (pe ngaahi fakahā) ʻokú Ne ʻomi kiate kitautolu ʻo fakafou ʻi Heʻene Kau Palesitenisī ʻUluakí.
-
Ko e hā ha meʻa ʻokú ke ako mei he ngaahi veesi ko ʻení?
-
Ko e fē ha taimi kuó ke ongoʻi ai hono maluʻi koe ʻe he ngaahi fakahā ʻa e ʻOtuá mei he ngaahi faingataʻa ʻo e moʻuí?
Naʻe fakamatalaʻi ʻe ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e fatongia maʻongoʻonga taha ʻo e palōfita ʻa e ʻEikí:
ʻOku ʻikai vaetuʻua ʻe ha palōfita ho vā mo e Fakamoʻuí. Ka, ʻokú ne tuʻu ʻi hotau tafaʻakí ʻo fakahonohino mai ʻa e hala ki he Fakamoʻuí. Ko e fatongia maʻongoʻonga taha mo e meʻaʻofa mahuʻinga taha ʻa ha palōfita kiate kitautolú, ʻa ʻene fakamoʻoni ʻiloʻilopau ko Sīsū ʻa e Kalaisí. Hangē ko Pita ʻo e kuonga muʻá, ʻoku fakahā ʻe hotau palōfitá, “[Ko Ia] ʻa e Kalaisí, ko e ʻAlo ʻo e ʻOtua moʻuí” [Mātiu 16:16]. (Neil L. Andersen, “Ko e Palōfita ʻa e ʻOtuá,” Liahona, Mē 2018, 27)
-
Ko e hā ha ngaahi founga ʻoku tataki ai kitautolu ʻe he palōfitá mo hono ongo tokoní kia Sīsū Kalaisi?
Fakaʻaongaʻi ʻa e ngaahi lea ʻa e kau palōfitá ke fakamamafaʻi ʻaki ʻa e tokāteliné mo e ngaahi tefitoʻi moʻoní. ʻOku ʻoange ʻe he ʻekitivitī ko ʻení ki he kau akó ha faingamālie ke nau ako ai e ngaahi lea ʻa e kau palōfitá. Ki ha ako lahi ange ki he founga hono fakaʻaongaʻi ʻo e ngaahi lea ʻa e kau palōfitá, vakai ki he ako ʻoku ui ko e“Faiako mei he ngaahi folofolá mo e ngaahi lea ʻa e kau palōfita ʻo e ngaahi ʻaho ki mui ní” ʻi he Fakatupulaki ʻa e Ngaahi Taukei ʻa e Faiakó: Akoʻi ʻa e Tokāteliné. Fakakaukau ke akoako ʻa e taukei “Teuteuʻi ha ngaahi fakaafe ʻe tokoni ki he kau akó ke fakafehokotaki ʻa e ngaahi moʻoni ʻoku maʻu ʻi he folofolá ki he meʻa ʻoku lea ʻaki ʻe he kau palōfita moʻuí.”
ʻOange ha faingamālie ki he kau akó ke nau ako ai ha niʻihi ʻo e ngaahi pōpoaki kimuí ni mei he palōfitá pe ko hono ongo tokoní. ʻE lava ke fili ʻe he kau akó ha mēmipa ʻe taha ʻo e Kau Palesitenisī ʻUluakí pea kumi ha taha ʻo ʻene ngaahi lea konifelenisi lahi fakamuimuitahá ʻi he ChurchofJesusChrist.org. ʻE lava ke ke vahevahe e kalasí ki ha kulupu ʻe tolu, ʻa ia ʻe ako ai ʻe he kulupu takitaha e ngaahi lea mei ha mēmipa ʻe taha ʻo e Kau Palesitenisī ʻUluakí, ʻo kumi e ngaahi akonaki ʻoku nau ongoʻi ʻoku mahuʻinga ke mahino ki he toʻu tupú. Hili iá, ʻe lava ke lipooti ʻe he kau akó ʻa e meʻa ʻoku nau akó. ʻI hono vahevahe ʻo e akonaki takitaha, poupouʻi e kau akó ke nau fakalaulauloto mo fakahaaʻi e founga ʻokú ne tataki ai kitautolu ki he Fakamoʻui ko Sīsū Kalaisí.
Te ke lava ʻo fakaʻosi e lēsoní ʻaki hano fakaafeʻi ha niʻihi ʻo e kau akó ke vahevahe ʻa e meʻa ne nau ako mo ongoʻi he ʻahó ni naʻe mahuʻinga taha kiate kinautolú. Fakakaukau ke ʻeke ha ngaahi fehuʻi hangē ko ʻení:
-
Ko e hā ha meʻa naʻá ke ako ʻi he ʻahó ni ʻokú ke loto ke manatuʻí?
-
Kapau ʻe fehuʻi atu ʻe ha taha pe ko e hā ʻokú ke fanongo ai ki he ngaahi fakahinohino mei he Kau Palesitenisī ʻUluakí, ko e hā ha meʻa ʻe taha te ke loto ke fakamatalaʻi ange kiate kinautolu?