108-р хичээл: Сургаал ба Гэрээ 93

Сургаал ба Гэрээ 93:19–53

Аврагчийн гэрэл, үнэнийг хүлээн авах

Есүс Христ

Сургаал ба Гэрээ 93-т цэдэглэгдсэн илчлэлтэд Аврагчийн гэрэл, үнэнийг бид хэрхэн илүү ихээр хүлээн авч болохыг дүрсэлсэн. Энэ хичээл Бурханы гэрэл, үнэнийг амьдралдаа илүү их хүлээн авах төлөвлөгөө гаргахад нь суралцагчдад тусална.

Боломжит суралцах үйл ажиллагаа

Гэрэл ба харанхуй

Далын ахлагч Тимоти Ж.Дайкэс хөвгүүдийнхээ хамт гүн агуй руу олсоор доош бууж байхад тохиолдсон туршлагаа хуваалцав.

Ахлагч Тимоти Ж.Дайкэс

Гэтэл [агуйд] гэнэт тас харанхуй болов. Ангалын дээр дүүжлэгдсэн биднийг олсноосоо тас зуурсан гараа ч харж чадахааргүй хав харанхуй нөмрөн авч билээ. Яг тэр мөчид “Аав аа, аав аа, та байна уу?” гэсэн дуу гарч,

“Байна аа, хүү минь, би яг энд байна” гэж би хариулав.

Гэнэт гэрэлгүй болдог нь цахилгаан гэрэлгүйгээр энэхүү агуй ямар таг харанхуй болохыг харуулахаар төлөвлөсөн хэрэг байжээ. Төлөвлөгөө ёсоор бид харанхуйг “мэдэрсэн.” (Тимоти Ж.Дайкэс, “Гэрэл гэрэлтэй нэгдэн нийлдэг,” 2021 оны 4-р сарын Ерөнхий чуулган, 116)

• Хүмүүст харанхуйтай холбоотой ямар мэдрэмж төрдөг вэ?

• Гэрэл хэрхэн мэдрэгддэгийг дүрсэлсэн ямар үг, хэллэг байдаг вэ?

Ахлагч Дайкэс агуйд гэрэл эргэн асахад түүнд болон хөвгүүдэд нь ямар байсныг дүрсэлжээ.

Ахлагч Тимоти Ж.Дайкэс

Гэрэл эргэн асахад, харанхуй гэрэлд үргэлж ялагддаг шиг, бүр өчүүхэн гэрэлд ч ялагддаг шиг тэр даруй харанхуйлахаа болив. Энэ явдлаас бид урьд өмнө хэзээ ч үзэж байгаагүй харанхуйн талаарх дурсамжийг болон тэрхүү гэрэлд илүү их талархах хэзээ ч мартагдахгүй талархлыг мөн харанхуйд бид хэзээ ч ганцаараа байдаггүй гэсэн баталгааг авч үлдсэн юм.

Агуй руу буусан аялал маань бидний мөнх бус амьдралын аялалтай зарим талаараа төстэй. (“Гэрэл гэрэлтэй нэгдэн нийлдэг,” 116–117)

• Та энэ түүх болон бидний мөнх бус амьдралын аяллаас адил төстэй ямар зүйлийг олж харсан бэ?

Сургаал ба Гэрээ 93:36-г уншаад, Бурханы алдар сууг дүрсэлсэн үгийг хайж ол.

• Тэнгэрлэг Эцэг, Есүс Христ хоёроос ирдэг гэрэл, үнэн мөнх бус амьдралын аялалд тань хэрхэн тус болж болох вэ?

Суралцагчдыг яг одоо амьдралдаа Бурханы гэрэл хийгээд нөлөөллийг хэр их мэдэрч байгаа талаар бодоход урь. Мөн та хэрэв Тэнгэрлэг Эцэг, Есүс Христ хоёр амьдралд нь илүү их нөлөөтэй байсан бол тэдний амьдрал хэр өөр байх байсан талаар бодож үзэхэд тэднийг урь.

Сургаал ба Гэрээ 93-т Аврагч Өөрөөс нь ирдэг гэрэл, үнэнийг мэдэж авах боломжийг нэмэгдүүлэх эсвэл бууруулах боломжтой зан чанаруудын талаар заасан. Судалж байхдаа та Аврагчийн гэрэл, үнэнийг амьдралдаа илүү их хүлээн авахад туслах сургаалыг олж мэдэхэд нь тэднийг урамшуулан дэмж.

Есүс Христ бидэнд Түүний гэрлийг хэрхэн хүлээн авахыг заав

Дараах хүснэгтийг харуулаад, үүнийг судлах тэмдэглэлдээ хуулж авахад суралцагчдыг урь. Суралцагчид уг судлах үйл ажиллагааг хамтрагчтайгаа эсвэл жижиг бүлгээр гүйцэтгэж болно.

Үнэн, гэрлийг нэмэгдүүлэх Сургаал ба Гэрээ 93:19–20, 24–28	Үнэн, гэрлийг бууруулах Сургаал ба Гэрээ 93:37–40

Хүснэгтэд жагсаасан шүлгүүдийг уншаад, бид амьдралдаа хэрхэн Аврагчийн гэрэл, үнэнийг нэмэгдүүлж мөн бууруулдаг талаарх Аврагчийн сургаалыг олж мэд. Олж мэдсэн зүйлсээ багана тус бүрд тэмдэглэ.

• Аврагчийн гэрэл, үнэнийг эрэлхийлдэг хүмүүст ямар ямар адислал боломжтой вэ?

• Та олж мэдсэн зүйлээ хүснэгтэн дээрх багана бүрд үнэний мэдэгдэл болгон хэрхэн хураангуйлж болох вэ?

  Суралцагчид дараахтай адил үнэнийг тодорхойлж болох юм. Үүнд: Бид Аврагчийн зарлигуудыг сахих үедээ амьдрал дахь Түүний гэрлийг болон үнэнийг нэмэгдүүлдэг (20, 28-р шүлэг). Дуулгаваргүй байдал нь биднийг амьдрал дахь Аврагчийн гэрэл болон үнэнийг алдахад хүргэдэг (39-р шүлэг).

• Аврагчийн зарлигуудыг сахих нь үнэнийг ялган таних чадварт тань хэрхэн нөлөөлөх боломжтой гэж та бодож байна вэ?

Өмнөх асуултыг авч ярилцахдаа дараах зургийг үзүүлэх юм уу зурахыг бод. Суралцагчдыг Сургаал ба Гэрээ 93 дахь сургаалуудыг үүнд хэрхэн тусгасан талаар хуваалцахад урь. Шаардлагатай бол, бид Бурханы зарлигуудыг дуулгавартай дагаснаар амьдралдаа Аврагчийн гэрлээр илүү их адислагддаг бөгөөд энэ нь үнэнийг ойлгож, ялган таних чадварыг маань нэмэгдүүлдэг гэдгийг тайлбарла. Бид зарлигуудад дуулгаваргүй байх үедээ Аврагчийн гэрлийг алдаж мөн үнэнийг ойлгож, ялган таних чадвар маань багасдаг.

үнэн

• Эдгээр шүлэг дэх Аврагчийн сургаалыг ойлгох нь бидний сонголтод хэрхэн нөлөөлж болох вэ?

Амьдралдаа Аврагчийн гэрэл, үнэнийг нэмэгдүүлэх

• Амьдралдаа Аврагчийн гэрлийг илүү ихээр хүлээн авахад тань тусалсан эсвэл тусалж болох зарим тодорхой зүйл юу вэ?

Ангийнхандаа хариултаа хуваалцахаасаа өмнө суралцагчид өмнөх асуултад хамтрагчтайгаа эсвэл жижиг бүлэг дотроо ярилцаж болно. Мөн та суралцагчдад санаануудаа эргэцүүлэн бодоход нь туслахын тулд ахлагч Дийтр Ф.Угдорфын дараах мэдэгдлийг ашиглаж болох юм.

Арван хоёр төлөөлөгчийн чуулгын ахлагч Дийтр Ф.Угдорф бид Аврагчийн гэрлийг хэрхэн мэдрэх боломжтой жишээнүүдийг хуваалцжээ.

Ерөнхийлөгч Дийтр Ф.Угдорф

Та нар даруухнаар залбирч, зүрх сэтгэлээ Бурханд хандуулах бүрдээ Түүний гэрлийг мэдэрдэг. Та нарыг судруудаас Түүний үг болон хүслийг эрэлхийлэх бүрд уг гэрэл улам хурц болдог. Та нарыг тусламж хэрэгтэй хэн нэгнийг анзаарч, хайраар хүрч туслахаар тав тухаа золиослох бүрд уг гэрэл өсөн нэмэгдэж байдаг. Та нарыг уруу таталтыг эсэргүүцэж, цэвэр ариун байдлыг сонгох бүрд, өршөөл эрэлхийлж мөн үзүүлэх болгонд, түүнчлэн үнэнийг зоригтойгоор гэрчлэх бүрд уг гэрэл харанхуйг үлдэн хөөж, гэрэл ба үнэнийг эрэлхийлэгчдийг татаж байдаг. (Дийтр Ф.Угдорф, “Тэнгэрлэг гэрэл түгээгчид,” 2017 оны 10-р сарын Ерөнхий чуулган, 75)

Цөөн суралцагчийг тэдний ярилцсан санаанууд өөрсдийнх нь амьдралыг хэрхэн өөрчилж байсан тухай сайн дураараа хуваалцахад урь. Энэ ярилцлагын нэг хэсэг болгож ChurchofJesusChrist.org дээрээс “Finding Christ during Difficult Times” (4:35) видеог үзүүлж болно. Суралцагчдыг видеонд гарч буй залуу эрэгтэйд Аврагчийн гэрэлгүй байх, нэмэлт гэрэлтэй байхын аль аль нь хэрхэн нөлөөлж буйг анзаарч харахад урьж болно.

Аврагчийн сургаалуудыг хэрэгжүүлэх

Судлах тэмдэглэлдээ дараах асуултад хариулах үедээ Аврагчийн гэрэл, үнэнийг амьдралдаа хэрхэн нэмэгдүүлж болох талаар залбирч байгаад эргэцүүлэхэд суралцагчдыг урь.

• Аврагчийн үнэн, гэрлийг амьдралдаа илүү их урихын тулд юу хийж эхлэх сэдэл танд төрсөн бэ? Танд юуг хийхээ болих сэдэл төрсөн бэ?

• Эдгээр үйлдлийг эхлүүлэх эсвэл зогсоох үед танд ямар саад бэрхшээл тулгарч болох вэ? Та өөрийн тодорхойлсон саад бэрхшээлд хэрхэн хандах вэ?

Христийн гэрэл, үнэний амьдралд тань авчирсан хүчний тухай мэдрэмжээ хуваалцсанаар хичээлээ дуусга. Өнөөдөр төрсөн сэдлийнхээ дагуу үйлдсэнээр амьдрал дахь Аврагчийн гэрлээ нэмэгдүүлэхээр хичээхэд суралцагчдыг урь.

Нэмэлт эх сурвалж

Би амьдралдаа Христийн гэрлийг нэмэгдүүлэхийн тулд юу хийж болох вэ?

Арван хоёр төлөөлөгчийн чуулгын ерөнхийлөгч М.Рассэлл Баллард ийн заасан.

Ерөнхийлөгч М.Рассэлл Баллард

Өнөө үед Сатан “дэлхийн гэрэл ба амь, мөн үнэнийг” (Ифер 4:12) хааж, Бурханы хүүхдүүдийг харанхуй тийш удирдахаар улам хичээнгүйлэн ажиллаж байна.

Бид Аврагчийн гэрэл, үнэнийг алдсан үед Түүнийг болон Түүний сайн мэдээг бүрэн ойлгож үнэлэхээ больдог. Гэсэн ч бид наманчилж, дуулгавартай байж, үйлчилж, Түүнийг шүтэн биширснээр харанхуйг ялан дийлдэг. Түүний гэрэл эргэн ирснээр бидний дундаас мөн бидний оюун ухаанаас дэлхийн сүүдрийг арилгадаг. (М.Рассэлл Баллард, “Амьдралын гэрэл,” Лиахона, 2023 оны 1-р сар, 5–6)

Үнэн гэж юу вэ?

Ерөнхийлөгч Рассэлл М.Нэлсон ийн тайлбарласан.

Ерөнхийлөгч Рассэлл М.Нэлсон

Үнэн бол үнэн.

Зарим зүйл зүгээр л үнэн байдаг. Үнэний шүүгч бол Бурхан. Энэ нь таны дуртай олон нийтийн мэдээллийн хэрэгсэл дээрх мэдээ биш, Google биш мөн мэдээж Сүмийг эсэргүүцдэг хүмүүс ч биш юм.

Ерөнхийлөгч Спэнсэр В.Кимбалл туйлын үнэний талаар “хүмүүсийн бодлоор өөрчлөх боломжгүй. … Хэрэв хүмүүс үнэхээр даруу бол тэд үнэнийг бий болгодоггүй харин олж мэддэг гэдгийг ойлгох болно” гэж заасан [Spencer W. Kimball, “Absolute Truth,” BYU devotional address, 6 September 1977; эх хувилбарт тодотгол оруулсан].

Одоо үед олон хүн үнэн бол харьцангуй бөгөөд тэнгэрлэг хууль эсвээс тэнгэрлэг төлөвлөгөө гэж байдаггүй хэмээн тунхагладаг. Ийн тунхаглах нь зүгээр л худал юм. Зөв, буруу хоёрын хооронд ялгаа бий. Бурханы хүүхдүүдийнхээ хүмүүжил, хамгаалалт мөн найдвартай байдлын төлөө тогтоосон хуулиудад үнэн суурилдаг. Бидний итгэх эсэхээс үл хамааран мөнхийн хуулиуд бидний хүн бүрийн амьдралд үйлчилдэг бөгөөд нөлөөлдөг. (Russell M. Nelson, “The Love and Laws of God,” Brigham Young University devotional, Sept. 17, 2019, 1–2)

Нэмэлт суралцах үйл ажиллагаа

Хичээлийг эхлүүлэх өөр арга

Ангид том гар чийдэн болон том толь авчир. Өрөөний гэрлийг унтрааж хичээлийг эхлүүлнэ үү. Нэг суралцагчийг гар чийдэн бариад, толь руу гэрэлтүүлэхийг хүс. Тухайн суралцагчийг толины тусгалыг ашиглан гар чийдэнгийн гэрлийг өрөөний хамгийн харанхуй буланд тусгах гэж оролдоход урь. Та хоёр эсвэл гурван суралцагчаас толь ашиглан өрөөг бүхэлд нь гэрэлтүүлэхэд урьж болно. Суралцагчдаас энэ үйл ажиллагаанаас харанхуйг дийлэх гэрлийн хүчний талаар анзаарсан зүйлээ хуваалцахыг хүс. Биднийг Аврагчийн гэрлийг тусгах үед уг гэрэл үргэлж харанхуйг ялан дийлдэг гэдгийг та тэдэнд тайлбарлаж болно.

Эсвэл та гар чийдэн, хөшиг зэрэг гэрлийг нэмэгдүүлэх юм уу бууруулдаг цөөн хэдэн эд зүйлийг харуулж болно. Суралцагчдыг эдгээр эд зүйлийг ашиглан үнэний тухай зааж болох үзүүлэнт хичээл зохиоход урь. Цөөн суралцагчийг үзүүлэнт хичээлээ ангийнханд тайлбарлахад урь.

Видеоны сонголт

Амьдралдаа Аврагчийн гэрэлд төвлөрөх хэрэгтэйг ойлгоход нь суралцагчдад туслахын тулд та ChurchofJesusChrist.org дээрх “Choose the Light” видеог цагийн код 2:05-аас 7:02 хүртэл үзүүлж болно. Видеог хэд хэдэн удаа зогсоогоод, суралцагчдаас Далын ахлагч Вөрн П.Станфиллын хуваалцсан захиаснаас юу нь онцгой санагдсаныг хуваалцахыг хүс.

Өөрсдийн амьдрал дахь Христийн гэрэлд төвлөрөхөд нь суралцагчдыг урихаасаа өмнө тэдэнд ChurchofJesusChrist.org дээрх “Why We Need a Savior” (2:15) видеог үзүүлж болно.

Сургаал ба Гэрээ 93:24–28, 36–37. Үнэн гэж юу вэ?

Үнэнийг мөнхийн талаас нь үнэлэх гэдгийг илүү сайн ойлгоход нь суралцагчдад туслахын тулд, тухайн үеийн хамгийн ухаалаг хүмүүст ч түүхэн дэх аливаа зүйлсийг буруу боддог байсан үе байсан талаар хуваалцахад урь (дэлхий хавтгай, атом бол хамгийн жижиг молекул, нар дэлхийг тойрон эргэдэг гэх мэт). Суралцагчдыг Сургаал ба Гэрээ 93:24–28, 36–37-г уншиж байхад, гэрэл, үнэний хоорондын холбоо хамаарлын талаар бид юу сурч болохыг олж мэдэхийг тэднээс хүс.

• Бурханд оршдог гэрэл, үнэний хэмжээний тухайд та юу анзаарсан бэ?

• Эдгээр шүлэг нь үнэнийг эрэлхийлэхийн ач холбогдлыг ойлгоход тань хэрхэн тусалж байна вэ?

Бүх үнэний эх сурвалж болох Бурханд найдах нь яагаад чухал гэдгийг хуваалцахыг суралцагчдаас хүс (Мозая 4:9 болон Сургаал ба Гэрээ 88:41-ийг үзнэ үү). Суралцагчдыг судлах тэмдэглэл дээрээ Бурханы алдар суу, оюун билиг, гэрэл, үнэн зэрэг үгсийг бичихэд урь. Та тэднийг үгсийн хооронд тэнцүүгийн тэмдэг бичихэд урьж болно.

Та ChurchofJesusChrist.org дээрх “Үнэнийг олж мэдэх нь” (4:49) видеог үзүүлж болно. Уг видеонд Тэргүүн зөвлөлийн ерөнхийлөгч асан Дийтр Ф.Угдорф үнэнийг ойлгох дэлхийнхний хязгаарлагдмал ойлголтыг мөнхийн талаас нь харах ойлголттой харьцуулж үзүүлэхийн тулд “Сохор эрс ба заан” шүлгийг ашиглажээ. Та суралцагчдыг үнэнийг таньж мэдэхийн тулд хэрхэн Бурханд найдаж байснаа хуваалцахад урьж болно.

Гэрэл, үнэнийг нэмэгдүүлэх нь бидний амьдралд хэрхэн нөлөөлж болох вэ?

Гэрэл, үнэний хоорондын холбоо хамаарлыг ойлгохын тулд уг зургийн талаар ярилцах явцдаа, энэ үйл явц ямархуу байх жишээг харахад нь суралцагчдад туслахын тулд дараах жишээнүүдийг ашиглана уу. Та уг жишээг ангийнхаа хэрэгцээ шаардлагад нийцүүлэн өөрчилж болно.

• Ханна Тэнгэрлэг Эцэгтэй ойр байхаар хичээх үедээ энэ нь мөнхийн зүйлсийг ойлгоход амархан болгож байгааг анзаарчээ. Тэр илүү эерэг хандлагатай болж, ирээдүйн талаар итгэл найдварыг мэдэрдэг.

• Райлан Есүс Христийн үлгэр жишээг дагах хичээл зүтгэл нь түүний амьдрал дахь харилцаа холбоог сайжруулж байгааг анзаарсан. Тэр эцэг эхтэйгээ илүү ойртож байгаагаа мэдэрсэн төдийгүй найзуудынх нь хэн нь түүний амьдралд сайн нөлөөг үзүүлж байгааг таньж мэдсэн.

Ханна, Райлан хоёрын мэдэрч буй гэрэл, үнэнийг нь нэмэгдүүлэх өөр ямар үйлдлүүд хийж болох талаар ярилцахад та тэднийг урьж болно.