“Lesson 108—Doktrina at mga Tipan 93:19–53: Pagtanggap ng Liwanag at Katotohanan ng Tagapagligtas,” Manwal ng Titser ng Seminary para sa Doktrina at mga Tipan (2025)
“Doktrina at mga Tipan 93:19–53,” Manwal ng Titser ng Seminary para sa Doktrina at mga Tipan
Lesson 108: Doktrina at mga Tipan 93
Doktrina at mga Tipan 93:19–53
Pagtanggap ng Liwanag at Katotohanan ng Tagapagligtas
Sa paghahayag na nakatala sa Doktrina at mga Tipan 93, inilarawan ng Tagapagligtas kung paano natin matatanggap ang higit pang liwanag at katotohanan na nagmumula sa Kanya. Ang lesson na ito ay makatutulong sa mga estudyante na magplano na matanggap ang higit pang liwanag at katotohanan ng Diyos sa kanilang buhay.
Mga Posibleng Aktibidad sa Pag-aaral
Liwanag kumpara sa kadiliman
Inilarawan ni Elder Timothy J. Dyches ng Pitumpu ang isang karanasan niya at ng kanyang mga anak na lalaki habang nagra-rappel pababa sa isang malalim na kuweba.
Light Cleaveth unto Light
Elder Dyches teaches that Jesus Christ is the Light of the World and the source of true happiness and peace.
Nang walang babala, biglang namatay ang lahat ng ilaw [sa yungib]. Nakabitin sa napakalalim na espasyo, napalibutan kami ng kadiliman na sa sobrang tindi ay hindi na namin makita maging ang aming mga kamay sa lubid sa harap namin. Isang tinig ang agad na tumawag, “Itay, Itay, nariyan po ba kayo?”
“Narito ako, Anak, narito lamang ako,” ang sagot ko.
Ang hindi inaasahang pagkamatay ng ilaw ay nilayon upang ipakita na kung walang kuryente, ang kadiliman sa yungib ay hindi malulupig. Nagtagumpay ito; “nadama” namin ang kadiliman. (Timothy J. Dyches, “Ang Liwanag ay Kumukunyapit sa Liwanag,” Liahona, Mayo 2021, 113)
-
Ano ang ilang damdamin na iniuugnay ng mga tao sa kadiliman?
-
Ano ang ilang salita o parirala na naglalarawan sa kung paano nadarama ang liwanag?
Inilarawan ni Elder Dyches kung ano ang pakiramdam niya at ng kanyang mga anak nang muling sumindi ang mga ilaw sa yungib.
Light Cleaveth unto Light
Elder Dyches teaches that Jesus Christ is the Light of the World and the source of true happiness and peace.
Nang muling sumindi ang ilaw, mabilis na naglaho ang kadiliman, dahil ang kadiliman ay palaging naglalaho kahit napakahina lamang ng liwanag. Kami ng mga anak ko ay nagkaroon ng isang alaala ng kadiliman na noon lamang namin naranasan, ng mas malaking pagpapahalaga sa liwanag na hindi namin malilimutan, at ng katiyakan na hindi tayo kailanman mag-iisa sa dilim.
Ang pagbaba namin sa yungib na iyon ay may ilang pagkakatulad sa ating paglalakbay sa mortalidad. (“Ang Liwanag ay Kumukunyapit sa Liwanag,” 113)
-
Anong mga pagkakatulad ang napansin ninyo sa kuwentong ito at sa ating paglalakbay sa mortalidad?
Basahin ang Doktrina at mga Tipan 93:36, at hanapin ang mga salitang naglalarawan sa kaluwalhatian ng Diyos.
-
Paano makatutulong sa inyo ang liwanag at katotohanang nagmumula sa Ama sa Langit at kay Jesucristo sa inyong paglalakbay sa mortalidad?
Sabihin sa mga estudyante na isipin kung gaano katindi ang liwanag o impluwensya ng Diyos na nadarama nila ngayon sa kanilang buhay. Maaari mo rin silang anyayahang isipin kung paano maaaring maging iba ang kanilang buhay kung mas malaki ang impluwensya rito ng Ama sa Langit at ni Jesucristo.
Ipaliwanag na sa Doktrina at mga Tipan 93, itinuro ng Tagapagligtas ang mga pag-uugali na maaaring magpalakas o magpahina sa pagtatamo natin ng liwanag at katotohanan na nagmumula sa Kanya. Habang nag-aaral ang mga estudyante, hikayatin sila na hanapin ang mga turo na makatutulong sa kanila na matanggap ang higit pang liwanag at katotohanan ng Tagapagligtas sa kanilang buhay.
Itinuturo sa atin ni Jesucristo kung paano tanggapin ang Kanyang liwanag
Maaari mong ipakita ang sumusunod na chart at sabihin sa mga estudyante na kopyahin ito sa kanilang study journal. Maaari nilang kumpletuhin ang aktibidad sa pag-aaral nang may kapartner o sa isang maliit na grupo.
|
Palakasin ang liwanag at katotohanan |
Pahinain ang liwanag at katotohanan |
|---|---|
Basahin ang mga talatang nakalista sa chart, at alamin ang mga turo ng Tagapagligtas na naglalarawan sa kung paano natin mapapalakas o mapapahina ang Kanyang liwanag at katotohanan sa ating buhay. Itala ang mga natuklasan ninyo sa bawat column.
-
Anong mga pagpapala ang makakamtan ng mga naghahangad ng liwanag at katotohanan ng Tagapagligtas?
-
Paano ninyo ibubuod ang mga nalaman ninyo para sa bawat column sa inyong chart bilang mga pahayag ng katotohanan?
Maaaring tukuyin ng mga estudyante ang mga katotohanang katulad ng mga sumusunod: Pinapalakas natin ang liwanag at katotohanan ng Tagapagligtas sa ating buhay kapag sinusunod natin ang Kanyang mga kautusan (talata 20, 28). Ang pagsuway ay maaaring maging sanhi para mawala ang liwanag at katotohanan ng Tagapagligtas sa ating buhay (talata 39).
-
Sa inyong palagay, paano makakaapekto ang pagsunod sa mga kautusan ng Tagapagligtas sa kakayahan ninyong mahiwatigan ang katotohanan?
Bilang bahagi ng inyong talakayan tungkol sa naunang tanong, maaari mong ipakita o idrowing ang sumusunod na larawan. Sabihin sa mga estudyante na ibahagi kung paano nila nakikitang kinakatawan dito ang mga turo mula sa Doktrina at mga Tipan 93. Kung kinakailangan, ipaliwanag na kapag sinusunod natin ang mga kautusan ng Diyos, binibiyayaan tayo ng higit pang liwanag ng Tagapagligtas sa ating buhay, na nagpapalakas sa kakayahan nating maunawaan o mahiwatigan ang katotohanan. Kapag sinusuway natin ang mga kautusan, nawawala sa atin ang liwanag ng Tagapagligtas at nababawasan ang kakayahan nating maunawaan o mahiwatigan ang katotohanan.
-
Paano nakakaapekto sa mga pagpiling ginagawa natin ang pag-unawa sa mga turo ng Tagapagligtas mula sa mga talatang ito?
Pagpapalakas sa liwanag at katotohanan ng Tagapagligtas sa ating buhay
-
Ano ang ilang partikular na bagay na nakatulong o makatutulong sa inyo na makatanggap ng higit pang liwanag ng Tagapagligtas sa inyong buhay?
Maaaring talakayin ng mga estudyante ang naunang tanong sa isang kapartner o sa maliliit na grupo bago ibahagi ang kanilang mga sagot sa klase. Maaari mo ring gamitin ang sumusunod na pahayag ni Elder Dieter F. Uchtdorf para matulungan ang mga estudyante na mag-isip ng mga ideya.
Ibinahagi ni Elder Dieter F. Uchtdorf ng Korum ng Labindalawang Apostol ang mga halimbawa ng kung paano natin mararanasan ang liwanag ng Tagapagligtas.
Mga Maytaglay ng Makalangit na Liwanag
Itinuro ni Pangulong Uchtdorf sa mga maytaglay ng priesthood na sila ang mga tagadala ng liwanag ng Diyos, na makapagdadala ng espirituwal na paggaling sa mga nasa kadiliman.
Sa tuwing itinutuon ninyo ang inyong mga puso sa Diyos sa pagdarasal nang may pagpapakumbaba, nararanasan ninyo ang Kanyang liwanag. Sa tuwing hinahangad ninyo ang Kanyang salita at kalooban sa mga banal na kasulatan, lalong tumitindi ang liwanag. Sa tuwing napapansin ninyo ang isang taong nangangailangan at isinasakripisyo ang inyong sariling kaginhawahan upang makatulong nang may pagmamahal, lalong lumiliwanag at nadaragdagan ang liwanag. Sa tuwing tinatanggihan ninyo ang tukso at pinipili ang kadalisayan, tuwing naghahangad o nagpapatawad kayo, tuwing matapang kayong nagpapatotoo tungkol sa katotohanan, itinataboy palayo ng liwanag ang kadiliman at inaakit ang iba na naghahangad din ng liwanag at katotohanan. (Dieter F. Uchtdorf, “Mga Tagadala ng Makalangit na Liwanag,” Liahona, Nob. 2017, 79)
Maaari mong anyayahan ang ilang nakahandang estudyante na ibahagi kung paano nakagawa ng kaibahan sa sarili nilang buhay ang mga ideyang tinalakay nila. Bilang bahagi ng talakayang ito, maaari mong ipanood ang “Finding Christ during Difficult Times” (4:35), na mapapanood sa ChurchofJesusChrist.org. Maaari mong anyayahan ang mga estudyante na pansinin kung paano parehong nakaapekto sa binatilyo sa video ang kawalan at ang pagkakaroon ng liwanag ng Tagapagligtas.
Finding Christ During Difficult Times
A young pole-vaulter contemplates suicide, then turns his life around when he fasts to know if the Church is true and gets baptized.
Ipamuhay ang mga turo ng Tagapagligtas
Sabihin sa mga estudyante na mapanalanging pag-isipan kung paano nila mapapalakas ang liwanag at katotohanan ng Tagapagligtas sa kanilang buhay habang sinasagot nila ang mga sumusunod na tanong sa kanilang study journal.
-
Ano ang nadama mo na kailangang simulang gawin para maanyayahan ang higit pang katotohanan at liwanag ng Tagapagligtas sa iyong buhay? Ano ang isang bagay na naramdaman mong kailangan nang itigil?
-
Anong mga balakid ang maaari mong maranasan kapag sinimulan o itinigil mo ang mga gawaing ito? Paano mo haharapin ang mga balakid na natukoy mo?
Para tapusin ang lesson, maaari mong ibahagi ang iyong nadarama tungkol sa idinulot na kapangyarihan ng liwanag at katotohanan ni Cristo sa iyong buhay. Sabihin sa mga estudyante na sikaping palakasin ang liwanag ng Tagapagligtas sa kanilang buhay sa pamamagitan ng nadama nila na dapat nilang gawin ngayon.