Lesona 109: Mataupu Faavae ma Feagaiga 93

Iloilo Lou Aoaoina 7

Mataupu Faavae ma Feagaiga 84–93

O le manatunatu ma iloiloina lo tatou aoaoina faaleagaga e mafai ona fesoasoani ia tatou faalatalata atili atu ai ia Iesu Keriso. O lenei lesona e mafai ona fesoasoani i tagata aoga ia manatua ma iloilo le tuputupu ae faaleagaga ua latou oo i ai e ala i a latou suesuega o le Mataupu Faavae ma Feagaiga.

Gaoioiga E Ono Mafai Ona Aoao Ai

Alualu i luma

Mafaufau e tusi le upu alualu i luma i luga o le laupapa.

E mafai foi ona e faaali atu se ata o se pa o le alualu i luma, e pei o nei:

• O a nisi o faataitaiga o mea e mafai ona tatou tulituliloaina le alualu i luma?

  O ni nai faataitaiga e mafai ona aofia ai a tatou aoaoga, o sini ua tatou faatulaga mo i tatou lava, o taunuuga o loo tatou faimalaga i ai, po o mea e mafai ona tatou faatauina pe sii mai le initoneti.

• Aisea e aoga ai le nofouta i le alualu i luma o nei mea?

I lenei lesona, o le a e iloiloina ai nisi o alualu i luma faaleagaga o loo e faia e ala i au suesuega o le Mataupu Faavae ma Feagaiga. O lenei mea e mafai ona tuuina atu ai ia te oe se avanoa e faamanatu ai ou manuia ma faia soo se fetuunaiga e manaomia.

• O a nisi o auala ua e alualu ai i luma faaleagaga a o e suesueina le Mataupu Faavae ma Feagaiga?

Atonu na e faamamafaina ni upumoni eseese a o aoao atu lesona i le Mataupu Faavae ma Feagaiga 84–93 nai lo upumoni na e iloiloina i gaoioiga nei. Afai e manaomia, fetuunai gaoioiga nei e fesoasoani ai i tagata aoga e iloilo i latou lava i upumoni na faamamafaina malosi e le vasega.

Faamatala matafaioi, faalagiga, ma uiga o Iesu Keriso

Mafaufau e faaali atu se ata o Iesu Keriso a o lei faasoaina mea nei.

O se tasi o valaaulia a le Faaola i le Mataupu Faavae ma Feagaiga o le “aoao e uiga ia te [Ia], ma faalogo i [Ana] upu” (Mataupu Faavae ma Feagaiga 19:23).

• O le a se mea ua e aoaoina e uiga ia Iesu Keriso i lau suesuega talu ai nei o le Mataupu Faavae ma Feagaiga?

  O lenei vaega o le lesona ua faamoemoe e fesoasoani i tagata aoga e faamalamalama mai nisi o matafaioi patino, faalagiga, po o uiga o Iesu Keriso. Mafaufau e faaali atu se tasi pe sili atu o filifiliga nei ma tuu atu i tagata aoga se taimi e faamaea ai se filifiliga se tasi. E mafai e tagata aoga ona galulue taitoatasi i nei gaoioiga pe fai paga.

  Atonu e fesoasoani le faaali atu o ni nai mau faasino na suesueina talu ai nei e tagata aoga e faamatala ai matafaioi po o faalagiga o Iesu Keriso. E mafai e tagata aoga ona iloilo nei mea o se vaega o le gaoioiga. O faataitaiga e mafai ona aofia ai le Mataupu Faavae ma Feagaiga 76:1–7, 22–24; 88:1–13, 41; 93:1–10.

• Tuufaatasi se lisi o nisi o suafa po o faalagiga o Iesu Keriso na e suesueina talu ai nei. Ona filifili lea o se tasi pe sili atu o i latou ma tali i fesili nei: (1) O le a se mea o aoao mai e lenei igoa po o le faalagiga ia te oe e uiga ia Iesu Keriso? (2) O le a se mea ua fesoasoani lenei igoa po o le faalagiga e te malamalama ai e uiga i le auala e mafai ona Ia fesoasoani ai ia te oe?

• Fatu se faatusa vaaia o nisi o matafaioi po o faalagiga e sili ona e fiafia i ai o Iesu Keriso. E mafai ona avea lenei mea o se upu i [totonu] o se ao po o se ata e faatusa i se tasi pe sili atu foi o matafaioi po o faalagiga na e filifilia. Ia aofia ai mau faasino talafeagai o se vaega o lou foafoaga.

• Tusi se solo po o ni upu o pese e aofia ai nisi o matafaioi e te fiafia i ai po o faalagiga o Iesu Keriso.

• Vaai faalemafaufau e faapea, sa e maua le avanoa e aoao ai se tasi e uiga po o ai Iesu Keriso ma le mea e mafai ona Ia faia mo i tatou. Tusi se faamatalaga ia le itiiti ifo ma le tasi se parakalafa umi e aofia ai le le itiiti ifo ma le tolu o matafaioi po o faalagiga a Keriso.

A uma ua lava se taimi o tagata aoga e faauma ai le latou gaoioiga filifilia, tuu atu ia i latou se avanoa e faasoa mai ai mea na latou faia. Afai latou te galulue taitoatasi, e mafai ona latou faasoa atu i se paga po o se vaega toalaiti. Afai latou te galulue faatasi ma isi tagata aoga, e mafai ona latou faasoa atu i se isi vaega. E mafai foi ona e valaaulia nai tagata aoga naunau e faasoa mai mea na latou faia ma le vasega atoa.

Lagona se naunautaiga sili atu e faalatalata atili atu ia Iesu Keriso

O le gaoioiga suesue lenei e faatatau i le valaaulia a le Faaola i le Mataupu Faavae ma Feagaiga 88:63 e faalatalata atu ia te Ia. Afai e talafeagai, mafaufau e faamanatu i tagata aoga nisi o gaoioiga e aoao ai mai le lesona “Mataupu Faavae ma Feagaiga 88:51–95” e fesoasoani ia i latou e manatua ai mea sa latou aoaoina ma lagonaina.

Mo se faataitaiga, afai e te faaaogaina maneta e fai ma se lesona faatino, e mafai ona e mafaufau e uu i luga ni maneta se lua ma valaaulia tagata aoga e faasoa mai mea latou te manatua e uiga i lena lesona. Afai na fatuina e tagata aoga ni ata tusi ia latou api talaaga mo suesuega lea e faatusa i le latalata o o latou lagona i lena taimi i le Tama Faalelagi ma Iesu Keriso, e mafai ona e valaaulia i latou e sue na ata e fesoasoani ai ia i latou e faatusatusa o latou lagona i le taimi nei i o latou lagona i lena taimi.

Atonu e te manatua le suesueina o se valaaulia taua mai le Faaola i le Mataupu Faavae ma Feagaiga 88:63. Faitau le fuaiupu lenei e iloilo ai le valaaulia a le Faaola.

Tuu atu i tagata aoga se avanoa e iloilo ai o latou manaoga e faalatalata atili atu ia Iesu Keriso e ala i le taliina o fesili nei i a latou api talaaga mo suesuega.

• E faapefea e lou manao e latalata atili atu ia Iesu Keriso i le asō ona faatusatusa i le mea sa i ai i ni nai vaiaso po o masina ua tuanai (maualalo, pe talitutusa, po o le maualuga atu)?

• O le a se mea ua e aoaoina pe ua oo i ai ua aafia ai ou manaoga?

• O a ni faatinoga ua e faia e latalata atili atu ai ia Keriso? O a ni faatinoga e te manao e fai e latalata atili atu ai ia te Ia?

Afai na lava le taimi o tagata aoga e faamaumau ai a latou tali, valaaulia ni volenitia e faasoa mai nisi o latou tali i le vasega.

Valaaulia e faaaoga

O se vaega o lau suesuega i le seminare, atonu na valaaulia oe e faaaoga ni valaaulia faapitoa mai tusitusiga paia i lou olaga.

Faaalu sina taimi e manatua ai nisi o sini ua e setiina mo oe lava po o uunaiga faaleagaga na e maua a o e suesue. E mafai ona e faia lenei mea e ala i le tilotilo i lau api talaaga mo suesuega po o le sueina o tusitusiga paia na e makaina talu ai nei.

Afai e mafai, mafaufau e faasoa atu nisi o valaaulia patino na e tuuina atu i tagata aoga i lesona talu ai nei. Mo se faataitaiga, atonu na e valaaulia tagata aoga e faatutu ni sini e pei o nei:

• Mulimuli i le valaaulia a Iesu Keriso ina ia “saili i le aoaoina, e ala lava lea i le suesue ma le faatuatua foi” (Mataupu Faavae ma Feagaiga 88:118).

• Usitai i aoaoga a le Faaola i le Upu o le Poto (tagai i le Mataupu Faavae ma Feagaiga 89).

• Maua atili le malamalama ma le upumoni o Keriso i o latou olaga (tagai i le Mataupu Faavae ma Feagaiga 93:19–20, 27–28).

A uma ua lava se taimi o tagata aoga e iloilo ai le sini ua latou faatutuina mo i latou lava, tuu atu ia i latou se taimi e iloilo ai lo latou alualu i luma e ala i le fai atu ia i latou o fesili e pei o nei:

• O a ni taumafaiga ua e faia e faaaoga ai nei aoaoga mai ia Iesu Keriso i lou olaga?

• O le a se eseesega ua faia e nei taumafaiga i lou olaga ma i lou sootaga ma le Atua?

• O le a sou lagona i isi laasaga e tatau ona i ai i nei vaega?