Lesona 102: Mataupu Faavae ma Feagaiga 88

Mataupu Faavae ma Feagaiga 88:51–95

“Faalatalata Mai ia te Au ma o le a Ou Faalatalata Atu ai ia te Outou”

I le vaega lenei o le Mataupu Faavae ma Feagaiga 88, na faaali mai ai e Iesu Keriso le ala Na te pulea ai Ana foafoaga ma valaaulia i tatou e faalatalata atu ia te Ia. O lenei lesona e mafai ona fesoasoani i tagata aoga ia maua faamanuiaga o le faalatalata atu i le Tama Faalelagi ma Iesu Keriso.

Gaoioiga E Ono Mafai Ona Aoao Ai

Sootaga Vavalalata

Mafaufau e amata le vasega e ala i le fatuina o se talanoaga e uiga i le atiaeina o sootaga vavalalata. E mafai ona e valaaulia tagata aoga taitasi e tusi i luga o le laupapa le igoa o se tasi latou te lagona le latalata i ai. Fai i ni nai tagata aoga e faasoa mai pe aisea ua latou filifilia ai lena tagata.

E mafai ona e fai atu fesili tulitatao e pei o nei:

• O le a se mea e faia ai se sootaga i le va o ni tagata se toalua e vavalalata? O le a le mea e tupu ai le mamao?

• O le a se mea e mafai ona e faia e toefaatulaga ai se sootaga vavalalata ma se tasi ua e taumamao mai ai?

I le Mataupu Faavae ma Feagaiga 88, sa faamatala ai e le Faaola Lona mana e pulea ai Ana foafoaga (tagai fuaiupu 41–45). Sa ia aoao mai a tatou vaai i fetu ma paneta i le lagi, ua tatou “vaai i le Atua o femaliua’i i lona mamalu ma lona mana” (Mataupu Faavae ma Feagaiga 88:47). Ona tuu mai lea e Iesu Keriso se faataoto e aoao atu ai e uiga i le sootaga a le Atua ma Ana foafoaga. O loo aoao mai ai na foafoaina e le Atua le tele o lalolagi ua nofoia e Ana fanau ma e asiasi mai o Ia ia i latou taitoatasi. Na poloaiina e le Alii Ana uo e valaau atu ia te Ia a o latalata atu o Ia ia i latou (tagai fuaiupu 51–62).

“Faalatalata mai ia te a’u

Faitau le Mataupu Faavae ma Feagaiga 88:63, ma vaavaai i mea e valaaulia e Iesu Keriso i tatou e faia.

• O a valaaulia e te iloa e patino lona aoga?

• O a ni mataupu faavae e mafai ona e faailoa mai i nei valaaulia?

  Atonu e faailoa mai e tagata aoga ni mataupu faavae eseese—mo se faataitaiga, a o ou faalatalata atu ia Iesu Keriso, o le a Ia faalatalata mai ia te au. Atonu e te manao e ta’u atu a o tatou faalatalata atu ia Iesu Keriso, ua tatou faalatalata atu foi i le Tama Faalelagi.

  Ina ia fesoasoani i tagata aoga ia malamalama i lenei mataupu faavae, e mafai ona outou talanoaina pe faapefea ona faapupula mai i le faataoto. E mafai foi ona fesoasoani nisi o fesili nei:

• E faapefea ona e faamatalaina le uiga o le faalatalata atu i le Tama Faalelagi ma Iesu Keriso?

• O a ni auala e te manatu latou te faalatalata mai ai ia i tatou?

• O a nisi o mafuaaga atonu e manao ai se tasi e lagona le latalata atu i le Tama Faalelagi ma Iesu Keriso?

Tuu atu i tagata aoga se avanoa e toe manatunatu ai i le latalata atu i le Tama Faalelagi ma Iesu Keriso latou te lagonaina. E mafai ona e valaaulia i latou e tusi le “Tama Faalelagi ma Iesu Keriso” i luga o se itulau i a latou api talaaga mo suesuega. Ona fai lea i tagata aoga e tusi se ata e faatusa ia i latou lava. E mafai e tagata aoga ona tomanatu i taimi na latou lagonaina ai le latalata atu i le Atua ma Lona Alo ma le mea na fesoasoani ia i latou e lagona ai faapena. E mafai foi e tagata aoga ona tomanatu i le latalata o o latou lagona i le taimi nei i le Tama Faalelagi ma Iesu Keriso.

Faamanatu i tagata aoga afai tatou te lagona le taumamao ese mai le Alii, e mafai ona tatou faia se faatinoga e suia ai o tatou tulaga. Valaaulia tagata aoga e mafaufau i o latou manaoga ma pe faapefea ona faamanuiaina i latou pe afai latou te latalata atili atu i le Tama Faalelagi ma Iesu Keriso. Fautuaina tagata aoga e saili faaaliga faaletagata lava ia ia iloa ai mea e mafai ona latou faia e faalatalata atili atu ai ia i Latou.

Valaaulia ma faamanuiaga

E mafai e tagata aoga ona latou faatumu le siata lenei i luga o le laupapa po o a latou api talaaga mo suesuega. Pe a manaomia, fesoasoani i tagata aoga ia malamalama i fasifuaitau eseese i le Mataupu Faavae ma Feagaiga 88:63–69. Mo se faataitaiga, e mafai ona e faamaninoina le fuaiupu 65 e ala i le faamalamalama atu e le tatau ona i ai ni o tatou faamoemoega e le tatau ai pe saili foi e faamalie manaoga faalelalolagi pe a tatou tatalo. E mafai ona e fesoasoani i tagata aoga ia malamalama i le upu tatau ai i fuaiupu 64–65 o lona uiga e fetaui pe talafeagai.

Faitau le Mataupu Faavae ma Feagaiga 88:63–69 ma faatumu le siata lenei:

O Auala e Faalatalata Atu ai i le Tama Faalelagi ma Iesu Keriso	Faamanuiaga mai le Faalatalata Atu i le Tama Faalelagi ma Iesu Keriso

O se tasi o auala e fesoasoani ai i tagata aoga e auai i nei fuaiupu o le valaaulia lea o se tagata aoga se toatasi e uu se ata o le Faaola i luma o le vasega. Fai atu i se isi tagata aoga e tu i tua o le potuaoga.

A o faasoa mai e le vasega mea na latou maua, e mafai e le tagata aoga i tua o le vasega ona laa faalatalata atili atu i le tagata aoga o loo uuina le ata o le Faaola. O le tagata aoga o loo uuina le faatusa o le Faaola e mafai foi ona laa latalata atu i ai.

E mafai ona e faaaogaina nisi o faamatalaga i le “Punaoa Faaopoopo” e fesoasoani ai i tagata aoga ia malamalama i auala e faalatalata atu ai i le Tama Faalelagi ma Iesu Keriso.

O fesili nei e mafai ona fesoasoani ia te oe e talanoaina ai mea na maua e tagata aoga i fuaiupu latou te faitauina:

• O le a sou manatu e mafai faapefea e le faia o nei faatinoga ona fesoasoani ia te oe e faalatalata atili atu ai i le Tama Faalelagi ma Iesu Keriso?

• E mafai faapefea e nei faamanuiaga ona aafia ai lau sootaga ma i La’ua?

O la’u fuafuaga

Mafaufau e faaali le vitio “How I #HearHim: Elder Dale G. Renlund” (3:00). Fai i tagata aoga e vaavaai mo mea ua aoao mai e Elder Renlund e uiga i le faalatalata atu ia Iesu Keriso. Talanoaina mea na aoaoina e tagata aoga mai lona aafiaga.

O le valaauliaina o tagata aoga e tali fesili nei ia latou api faamaumau mo suesuega e mafai ona saunia ai i latou e faasoa mai a latou tali i le vasega. E mafai foi ona e faasoa atu se aafiaga patino e uiga i mea ua e faia e faalatalata atu ai ia Iesu Keriso ma pe na faapefea ona e lagonaina Lona faalatalata atu ia te oe.

• O faapefea ona e taumafai e faalatalata atu i le Tama Faalelagi ma Iesu Keriso?

• Na faapefea ona faamanuiaina oe po o se tasi e te iloa ona o le taumafai e faalatalata i ai Laua?

Valaaulia tagata aoga e saili le Agaga Paia e taitai i latou ia iloa le mea e mafai ona latou faia e faalatalata atu ai i le Tama Faalelagi ma Iesu Keriso. Faamanatu i tagata aoga atonu ua uma ona latou mauaina ni uunaiga i le taimi o le lesona.

E mafai e tagata aoga ona tusi i lalo pe faapefea ona latou taumafai e faalatalata atu i le Tama Faalelagi ma Iesu Keriso, pe mafai faapefea ona fesoasoani lenei mea ia i latou i luitau o loo latou feagai, ma soo se faafitauli atonu latou te manaomia ona faatoilaloina. E mafai e tagata aoga ona tusi i luga o a latou ata pe tusi foi se faamatalaga o le a latou aveina i le fale.

Fautuaina tagata aoga e faasoa atu i le Tama Faalelagi i a latou tatalo mea ua latou fuafua e fai ma ole atu mo Lana fesoasoani.

Punaoa Faaopoopo

O a nisi o auala e mafai ona tatou faalatalata ai ia Iesu Keriso?

Na faasoa mai e Peresitene Henry B. Eyring o le Au Peresitene Sili:

Sa ou oo i aafiaga o le olioli o le latalata atu i le Faaola atoa ai ma Lona latalata soo mai ia te au e ala i nai faatinoga faatauvaa o le usiusitai i poloaiga. (Henry B. Eyring, “O Mai ia Te A’u,” Liahona, Me 2013, 22)

Na faailoa mai e Elder Dieter F. Uchtdorf o le Korama a Aposetolo e Toasefululua:

Ōle atu, ona outou maua ai lea. Tuitui atu, ma o le a tatala atu ia te outou [tagai Mataupu Faavae ma Feagaiga 88:63]. Faalagolago i le Alii [tagai Faataoto 3:5].

I o tatou olaga i aso taitasi, o lo tatou tiute aupito taua ma le avanoa manuia o le fetaiai ma le Atua.

A o tatou tuu ese le faamaualuga ma faalatalata atu i Lona nofoalii ma se loto mo ma se agaga salamo [tagai 3 Nifae 9:20; Mataupu Faavae ma Feagaiga 20:37], o le a Ia faalatalata mai ia i tatou [tagai Mataupu Faavae ma Feagaiga 88:63].

A tatou saili e mulimuli ia Iesu Keriso ma savavali i le ala o le avea ma so’o, i lea fuaiupu ma lea fuaiupu, o le a oo mai le aso o le a tatou maua ai lena meaalofa e le’i mafaufauina o le mauaina o se atoaga o le olioli. (Dieter F. Uchtdorf, “O Loo ia i Tatou le Atua,” Liahona, Me 2021, 11)

Na aoao mai Sister Neill F. Marriott, sa avea ma Fesoasoani Lona Lua i le Au Peresitene Aoao o Tamaitai Talavou:

O le taulagaina o o tatou lava naunauga e moomia ina ia maua ai se avanoa mo fuafuaga faavavau a le Atua. O le Faaola, o lē o avea ma fofoga taumomoli o le Tama, ua aioi mai o Ia ia i tatou e “faalatalata mai ia te au ma o le a Ou faalatalata atu ia te outou” [Mataupu Faavae ma Feagaiga 88:63]. O le faalatalata atu i le Atua e mafai ona faauigaina ia aoao Ana upumoni mai tusitusiga paia, mai le mulimuli i fautuaga faaperofeta, ma le taumafai e fai atoatoa atili Lona finagalo. (Neill F. Marriott, “Tumau i le Atua ma Faaleleia le Va,” Liahona, Nov. 2017, 11)

Faitau le saunoaga lenei mai ia Peresitene Russell M. Nelson pe matamata le vitio “Mauaina o le Mana o Iesu Keriso i o Tatou Olaga” mai le faailotaimi 12:25 i le 13:06, ma vaavaai mo mea na ia aoao mai e uiga i le faalatalata atu i le Atua.

Pe a e aapa atu i luga mo le mana o le Alii i lou olaga i le malosi atoa e tutusa ma se tagata o loo malemo ma tau’ā’ā pea mo le ea, o le mana mai ia Iesu Keriso o le a avea ma ou mana. A silafia e le Faaola e te fia manao moni lava e aapa atu ia te Ia—pe a mafai ona Ia lagonaina le manao silisili o lou loto o le fia mauaina o Lona mana i lou olaga—o le a taitaia oe e le Agaga Paia ia iloa tonu le mea e tatau ona e faia [Mataupu Faavae ma Feagaiga 88:63]. (Russell M. Nelson, “Mauaina o le Mana o Iesu Keriso i o Tatou Olaga,” Liahona, Me 2017, 42)

Mo manatu faaopoopo, tagai i le Russell M. Nelson, “Mauaina o le Mana o Iesu Keriso i o Tatou Olaga,” Liahona, Me 2017, 39–42.

Ae faapefea pe afai ou te lagona le mamao mai le Atua?

Sa faasoa Peresitene Dieter F. Uchtdorf, o lē sa avea ma uso o le Au Peresitene Sili:

O le valaaulia [a le Atua] e faigofie:

“Liliu … ia te au” [Ioelu 2:12].

“O mai ia te au” [Mataio 11:28].

“Faalatalata mai ia te au, ma o le a ou faalatalata atu ai ia te outou” [Mataupu Faavae ma Feagaiga 88:63].

O le auala lenei tatou te faaali atu ai ia te Ia o loo tatou mananao ina ia laveaiina.

E manaomia ai sina faatuatua teisi. Ae aua le faanoanoa. Afai e le o mafai ona e fatuina le faatuatua i le taimi nei, amata i le faamoemoe.

Afai e le o mafai ona e fai atu e te iloaina o loo i ai le Atua iina, e mafai ona e faamoemoe o loo i ai o Ia. E mafai ona e manao ia talitonu. Ua lava lena e amata ai.

Ona faatino lea e tusa ma lena faamoemoe, fesootai atu i lou Tama Faalelagi. O le a faasafua mai e le Atua Lona alofa ia te oe, ma o Lana galuega o le laveai ma le liuaina o le a amataina.

I le aluga o taimi, o le a e iloa ai Lona aao i lou olaga. O le a e lagonaina Lona alofa. Ma o le a faateleina lou manao e savali i Lona malamalama ma mulimuli i Ona ala i laa uma o le faatuatua e te faia. (Dieter F. Uchtdorf, “O Le A Ia Tuu Oe i Luga o Ona Tauau ma Ave Oe i le Aiga,” Liahona, Me 2016, 103)

Gaoioiga Faaopoopo e Aoao Ai

Mataupu Faavae ma Feagaiga 88:51–62. O se faataoto

Na aoao mai e le Faaola se faataoto e fesoasoani tatou te malamalama ai i le ala e fegalegaleai ai le Atua ma malo, po o lalolagi, na Ia foafoaina.

O se tasi auala e faaauai ai tagata aoga ma fesoasoani ia latou malamalama i le faataoto o le valaaulia lea o nisi o i latou e faatino ia fuaiupu 51–60. E mafai e se tasi tagata aoga ona faitau ia fuaiupu o se faamatalaupu. O se isi tagata aoga e mafai ona avea ma alii e i ai le fanua e asiasi atu i isi tagata aoga, o e fai ma sui o auauna. A uma, ona mafai lea e tagata aoga ona faitau fuaiupu 61–62, ma vaavaai mo le uiga o le faataoto. O fesili nei e mafai ona taiala ai se talanoaga:

• O le a se mea o aoao mai e lenei faataoto ia te oe e uiga i le Atua ma malo, po o lalolagi, ua Ia foafoaina?

• O a ni auala e mafai ai e lenei faataoto ona fesoasoani ia tatou malamalama atili ai i Lana sootaga ma i tatou?

E mafai ona e faaaogaina le vitio “You Matter” (0:48) e fesoasoani ai i tagata aoga ia iloa e faapea, i le tele o Ana foafoaga, ua silafia ai e le Atua i latou.

Mataupu Faavae ma Feagaiga 88:73. “O le a Ou faanatinatiina laʼu galuega i lona taimi”

Ina ia fesoasoani i tagata aoga ia malamalama i le uiga ina ua faailoa mai e le Alii o le a Ia faanatinatiina Lana galuega, e mafai ona e fesoasoani ia i latou e faamatala le upu faanatinati. Mafaufau e faasoa atu le saunoaga lenei mai ia Peresitene Russell M. Nelson ma talanoaina auala ua faanatinati ai e le Alii Lana galuega. E mafai foi ona outou talanoaina auala tatou te auai ai i lenei galuega ma pe aisea ua avea ai o se avanoa e faia ai.

O Le Ekalesia lenei a Iesu Keriso o le Au Paia o Aso e Gata Ai. O i tatou o Lona nuu o le feagaiga. Na faailoa mai e le Alii o le a Ia faanatinatiina Lana galuega i lona taimi [tagai i le Mataupu Faavae ma Feagaiga 88:73] ma o loo Ia faia lea i se saoasaoa matuā faateleina lava. Ua faamanuiaina i tatou e auai i le faatinoga o Lana galuega paia. (Russell M. Nelson, “Upumoni Mamā, Aoaoga Faavae Mamā, ma Faaaliga Mamā,” Liahona, Nov. 2021, 7)

Mataupu Faavae ma Feagaiga 88:81. “Ua tatau i tagata taitoatasi o e ua uma ona lapataia ona lapatai atu i le la te tuaoi”

Mafaufau e talanoaina le faamoemoega o lapataiga ma auala eseese ua lapataia ai i tatou.

Faitau le Mataupu Faavae ma Feagaiga 88:81 ma le saunoaga lenei a Elder D. Todd Christofferson o le Korama a Aposetolo e Toasefululua. Talanoa po o ai o tatou tuaoi ma auala e mafai ona tatou lapataia ai i latou.

E ui e lagonaina patino e perofeta le tiute e lapatai atu i isi, ae o se tiute foi e tatau ona i ai i isi. O le mea moni, “ua tatau i tagata taitoatasi o e ua uma ona lapataia ona lapatai atu i le la te tuaoi” [Mataupu Faavae ma Feagaiga 88:81]. O i tatou o e ua mauaina se malamalama o le fuafuaga sili o le fiafia—ma poloaiga e fesootai i ai—e tatau ona lagona se manao e faasoa atu lena malamalama ona e faia ai se eseesega tele iinei ma i le faavavau. (D. Todd Christofferson, “O Le Leo o le Lapataiga,” Liahona, Me 2017, 108)

Mataupu Faavae ma Feagaiga 88:88–95. O faailoga e molimau mai i le afio mai o le Faaola

O nei fuaiupu e mafai ona fesoasoani i tagata aoga e iloa ai auala o loo fetalai mai ai le Alii ia i tatou e saunia ai i tatou mo Lona toe foi mai. E mafai e tagata aoga ona faitau nei fuaiupu ma fai se lisi o mea na tutupu po o mala o le a auina mai e le Alii a o lei oo i Lona Afio Mai Faalua. Talanoaina pe mafai faapefea e le Faaola ona fetalai mai ia i tatou e ala i nei mea na tutupu e fesoasoani ai ia i tatou e saunia mo Lona toe foi mai. Fesoasoani i tagata aoga ia malamalama o le tele o mala i aso e gata ai o se valaaulia ia salamo ma saunia e fetaiai ma le Alii. Atonu foi e te manao e faamanatu i tagata aoga e le manaomia ona tatou atuatuvale i nei faailoga, aua e mafai ona latou faamanatu mai ia i tatou folafolaga a le Alii (tagai Mataupu Faavae ma Feagaiga 45:35).