Lesona 103: Mataupu Faavae ma Feagaiga 88

Mataupu Faavae ma Feagaiga 88:76–80, 117–141

Saili le Aoaoina e ala i le Suesue ma le Faatuatua

I le vaega lenei o le Mataupu Faavae ma Feagaiga 88, na faaali mai ai e le Alii ia mataupu faavae o le aoaoina ma poloaiina Iosefa Samita ma isi e faatulaga le Aoga a Perofeta. O i latou o auai i le aoga e tatau ona saili le poto “mai tusi sili ona lelei” ma saili faatasi i le aoaoina, “e ala i le suesue ma le faatuatua foi” (Mataupu Faavae ma Feagaiga 88:118). O lenei lesona e mafai ona fesoasoani i tagata aoga e aoao ai e ala i le faatuatua ia Iesu Keriso i faatulagaga eseese.

Gaoioiga E Ono Mafai Ona Aoao Ai

E finagalo le Tama Faalelagi ia ou aoao

Ina ia amata le lesona, mafaufau e valaaulia tagata aoga e faasoa mai a latou mataupu e fiafia i ai i le aoga pe faamatala faapuupuu se autu latou te fiafia e aoao i ai. Afai e manaomia, faamalamalama atu o aoaoga faalelalolagi e faasino i le aoaoina e le fesootai i mataupu faalelotu.

• Aisea atonu e taua ai le maua uma o le malamalama faalelalolagi ma faaleagaga i o tatou olaga atoa?

• E mafai faapefea e le aoaoina o mataupu o le aoga e pei o le matematika po o le saienisi ona ese mai le suesueina o le talalelei a Iesu Keriso? E faapefea ona tutusa?

Ia Ianuari 1833, sa mulimuli ai Iosefa Samita ma isi e umia le perisitua sa nonofo i Katelani, Ohaio, i faatonuga a le Alii e faatulaga se aoga e ta’ua o le Aoga a Perofeta. I le taimi o le taumalulu o le 1833, sa feiloai ai tagata o le aoga i se potu i luga i le Faleoloa o Newel K. Whitney. Mulimuli ane, sa latou feiloai i le ofisa lomitusi a le Ekalesia ma le Malumalu o Katelani. Faitau le Mataupu Faavae ma Feagaiga 88:77–80, ma vaavaai mo le mea na poloaiina e le Alii i latou nei na umia le perisitua e aoao.

E mafai ona e tusia mataupu i luga o le laupapa e pei o le suesuega o le lalolagi, talafaasolopito, suesuega o fetu, faaupufai, ma le faataatiaga faafaafanua ma fai atu i tagata aoga e faailoa mai upu po o fasifuaitau e faatatau i nei mataupu.

• O le a se mea na e mauaina?

• E tusa ai ma le fuaiupu 80, aisea na faatonuina ai e le Alii nei alii e suesue se vaega tele o mataupu?

• O a ni auala e mafai ai e le aoaoina o nei mea ona fesoasoani ia i tatou e saunia ai e auauna atu i le Alii?

Faasoa atu i tagata aoga o le vaega o totoe o le lesona o le a taulai atu i mataupu faavae o le aoaoina lea e mafai ona faamalosia ai lo latou faatuatua ia Iesu Keriso ma saunia ai i latou e auauna lelei atili atu ia te Ia. Atonu e te manao e valaaulia tagata aoga e saili faaaliga faaletagata lava ia e faatatau i mea e mafai ona latou faia e tuputupu ae ai i lo latou lava faatuatua ma le aoaoina.

Saili le aoaoina i le suesue ma le faatuatua

O leMataupu Faavae ma Feagaiga 88:118 o se fuaitau o le atamai i aoaoga faavae. Mafaufau e valaaulia tagata aoga e faailoga ia fuaitau o le atamai i aoaoga faavae i se auala iloga ina ia faigofie ona latou mauaina.

Faitau le Mataupu Faavae ma Feagaiga 88:118, ma vaavaai pe faapefea ona valaaulia i tatou e le Alii e saili le aoaoina.

A uma ona suesue e tagata aoga le fuaitau o le mau, valaaulia i latou e faasoa mai mea na faaali mai e le Alii e uiga i le aoaoina. O tali e ono aofia ai le sailia ma le filigā, aoao atu o le tasi ma le isi, sailia o le poto mai tusi sili ona lelei, ma le sailia o le aoaoina e ala i le suesue ma le faatuatua.

• O le a se mea ua aoao mai e fuaiupu e uiga i le aoaoina?

• O a mea ua tatou iloa e uiga i le faateleina o le tatou faatuatua ia Iesu Keriso?

Pe a manaomia ai, atonu e te ta’ua e faapea i le amataga o le fuaiupu 118 sa faailoa mai ai e le Alii e i ai nisi sa le lava le faatuatua. E mafai foi ona e valaaulia tagata aoga e faasoa mai ni faatonuga manino na tuuina mai e le Alii e fesoasoani ai ia i latou e le lava le faatuatua.

O se tasi lea o auala e faaupu mai ai se mataupu faavae e mafai ona tatou aoao mai nei fuaiupu: Afai tatou te saili ma le filigā e aoao e ala i le suesue ma le faatuatua, o le a faateleina lo tatou faatuatua ia Iesu Keriso.

• E faaopoopo atu i le aoaoina ma le filiga e ala i a tatou suesuega, o le a sou manatu i le uiga o le aoao e ala i le faatuatua?

Mafaufau e faaali atu le saunoaga lenei a Peresitene Russell M. Nelson e fesoasoani ai i tagata aoga ia malamalama atili i le uiga o le aoao e ala i le faatuatua. E mafai foi ona tou matamata i le vitio “Opogi le Lumanai i le Faatuatua” mai le faailotaimi 10:28 i le 11:20.

Na faamatala mai e Peresitene Russell M. Nelson:

Sa aoao i tatou e le Alii i le auala e faateleina ai lo tatou faatuatua e ala i le saili i le“aoao, e faapea foi i le suesue ma le faatuatua” [Mataupu Faavae ma Feagaiga 88:118; faaopoopo le faamamafa]. Tatou te faamalosia lo tatou faatuatua ia Iesu Keriso pe a tatou tauivi e tausia Ana poloaiga ma “manatua pea o Ia” [Moronae 4:3]. Ma le isi, e faateleina lo tatou faatuatua i taimi uma tatou te faatino ai lo tatou faatuatua ia te Ia. O le uiga lena o le aoao e ala i le faatuatua.

Mo se faataitaiga, o taimi taitasi tatou te maua ai le faatuatua ina ia usiusitai ai i tulafono a le Atua—e tusa lava pe faamāina i tatou e manatu lauiloa—po o taimi taitasi tatou te teena ai faafiafiaga po o filosofia ia e faamanatuina le soliga o feagaiga, o loo tatou faatinoina lo tatou faatuatua, lea i lona taunuuga e faateleina ai lo tatou faatuatua. (Russell M. Nelson, “Opogi le Lumanai i le Faatuatua,” Liahona, Nov. 2020, 75.)

• O le a se mea na e aoaoina mai le faamatalaga a Peresitene Nelson?

• O le a sou manatu e mafai faapefea ona faaaoga le aoaoina e ala i le faatuatua i ni avanoa eseese e aoao ai (e pei o le aiga, aoga, seminare, ma le lotu)?

Ina ia fesoasoani i tagata aoga e iloilo a latou taumafaiga i le taimi nei e saili le aoaoina e ala i le faatuatua, mafaufau e valaaulia i latou e lisi ia vaega nei i a latou api talaaga mo suesuega a o e tusia i luga o le laupapa: fale, aoga, seminare, ma le lotu. Fautuaina tagata aoga e faatulaga a latou taumafaiga e aoao ma le filigā e ala i le faatuatua i vaega taitasi e faaaoga ai se fua mai le 1 i le 5, ma le 5 e sili ona lelei.

Afai e manaomia, faamanatu atu ia i latou o le vaega o le uiga o le aoao e ala i le suesue ma le faatuatua o le auai malosi lea i avanoa e aoao ai ona faatino lea o mea latou te aoaoina ma lagonaina. Valaaulia tagata aoga e filifili se vaega se tasi latou te mananao e faaleleia atili ma suesue le vaega o totoe o le lesona i le mafaufau i lena vaega.

“Ia faatulaga outou lava”

Faitau le Mataupu Faavae ma Feagaiga 88:119–126, ma vaavaai mo fautuaga mai le Alii e mafai ona faateleina ai lo tatou tomai e aoao ai e ala i le suesue ma le faatuatua.

E mafai ona e aumaia se ato aoga ma saunia ni fasi pepa mo tagata aoga e faaaoga i ni vaega toalaiti. A o suesueina e tagata aoga le Mataupu Faavae ma Feagaiga 88:119–126, valaaulia i latou e tusi i lalo i ni fasipepa eseese ia aoaoga mai le Alii e mafai ona fesoasoani ia i latou e aoao ai e ala i le faatuatua. E mafai e tagata aoga ona lisi uiga ma amioga e faamalosiauina e le Alii ma i latou e tatau ona tatou aloese mai ai. A uma, e mafai e tagata aoga ona tuu fasipepa i totonu o le ato aoga.

• O fea o nei uiga po o amioga ua aafia ai lou tomai e aoao?

• O le fea o nei uiga po o amioga e te lagona le faagaeetia e le Agaga e taumafai ai?

Fai i tagata aoga e mafaufau i ni faafitauli eseese i le aoaoina e ala i le faatuatua e ono fetaiai ma tupulaga talavou i nofoaga eseese (fale, aoga, seminare, ma le lotu). Lisi o latou manatu i lalo o vaega taitasi. Valaaulia tagata aoga e filifili ni fasipepa mai le ato aoga. Ona mafai lea e tagata aoga ona faitau mea ua tusia ma taitai se talanoaga e faatatau i le ala e mafai ai e le fautuaga a le Alii ona fesoasoani i se tasi e faatoilalo se tasi o luitau i le aoaoina. E mafai foi ona e valaaulia tagata aoga e mafaufau i ni auala na faataitaia ai e le Faaola lenei fautuaga.

Mo se faataitaiga, atonu e faailoa mai e tagata aoga se luitau e pei o le suesue mo suega a le aoga po o le mauaina o tali i tatalo patino. Afai na filifilia se pepa mai le taga o loo tusia ai le, faatu se fale o le anapogi e mafai e tagata aoga ona talanoaina manatu ma aafiaga o le auala e mafai ai e le anapogi ma le tatalo ona faateleina lo latou gafatia e aoao ma iloa lelei ai tali mai le Alii. Afai e te fai i tagata aoga e mafaufau i se faataitaiga o le ala na faataitaia ai e le Faaola le aoaoina e ala i le anapogi, atonu latou te manatua le ala na Ia anapogi ai e sauni ai mo Lana galuega ma le auaunaga (tagai Mataio 4:1–10). Toe fai faatele le gaoioiga e fesoasoani ai i tagata aoga ia iloa le taua o aoaoga a Iesu Keriso i o latou olaga.

Faaaogaina patino

Ina ia faamae’a, tuu atu se taimi mo tagata aoga e mafaufau loloto ai i auala o le a sili atu ai ona latou sailia le aoaoina e ala i le faatuatua. E mafai ona e fautuaina i latou e tusifaamaumau o latou manatu i a latou api talaaga o suesuega e faaaoga ai fesili nei.

• Filifili se vaega o lou olaga e mafai ona e faaleleia ai au taumafaiga e aoao e ala i le faatuatua (e pei o le aiga, aoga, seminare, ma le lotu).

• O le a sou manatu e mafai faapefea e le aoaoina e ala i le faatuatua ona fesoasoani ia te oe i lenei vaega?

• O le a se mea o le a e taumafai e fai e aoao ai e ala i le faatuatua ia Iesu Keriso?

Valaaulia tagata aoga e mananao e faasoa atu o latou manatu. Atonu foi o se taimi lelei lea e valaaulia ai le molimau a le tagata aoga mai ia i latou o e na oo i manuia ua mavae.

Punaoa Faaopoopo

O fea e mafai ona ou aoao atili ai e uiga i le Aoga o Perofeta?

• O Autu o le Talafaasolopito o le Ekalesia, “Aoga a Perofeta,” ChurchofJesusChrist.org

• Nathan Waite, “O le Aoga ma le Faaeega Paia,” i le Faaaliga i le Tulaga (2016)

Mataupu Faavae ma Feagaiga 88:118. O fea e tatau ona ou sailia ai “upu o le poto”?

Na lapatai mai Peresitene Dallin H. Oaks o le Au Peresitene Sili:

Ua tatou ola i se taimi ua matuai taape ma salalau solo ai faamatalaga. Ae e le o faamatalaga uma nei e moni. E tatau ona tatou faaeteete a o tatou saili i le upumoni ma le filifilia o punavai mo lena sailiga. E le tatau ona tatou manatu o le ta’uta’ua po o le pule faalelalolagi o ni punavai agavaa o upumoni. E tatau ona tatou faaeteete e tusa ai ma le faalagolago i faamatalaga po o fautuaga e ofoina mai e tagata faafiafia lauiloa, tagata taaalo ta’uta’ua, po o punavai e le mailoa i le initoneti. O le tomai faapitoa i le tasi matata e le tatau ona avea o se tomai faapitoa i upumoni i isi mataupu. …

A tatou saili i upumoni e uiga i tapuaiga, e tatau ona tatou faaaogaina metotia faaleagaga talafeagai mo lena sailiga: tatalo, o le molimau a le Agaga Paia, ma le suesueina o tusitusiga paia ma upu a perofeta o aso nei. (Dallin H. Oaks, “Upumoni ma le Fuafuaga,” Liahona, Nov. 2018, 25)

E mafai faapefea e le aoaoina e ala i le faatuatua ona manuia ai lo’u olaga?

Na folafola mai e Elder David A. Bednar o le Korama a Aposetolo e Toasefululua faamanuiaga i ai latou e saili e aoao e ala i le faatuatua:

A o tatou vaavaai atu i le lumanai ma faatalitali i le lalolagi sili ona fenumiai ma galua o le a tatou ola ai, ou te talitonu o le a tāua mo i tatou uma le faateleina o lo tatou malosiaga e saili i le aoaoina e ala i le faatuatua. I o tatou olaga patino, i o tatou aiga, ma i le Ekalesia, e mafai ma o le a tatou maua faamanuiaga o le malosi faaleagaga, taitaiga, ma le puipuiga a o tatou saili atu i le faatuatua ia maua ma faaaoga le malamalama faaleagaga. (David A. Bednar, “Saili e Aoao e Ala i le Faatuatua,” Ensign, Sept. 2007, 61)

Gaoioiga Faaopoopo e Aoao Ai

Mataupu Faavae ma Feagaiga 88:118–126. Faufautua e faaleleia ai le aafiaga tau le aoaoina i se vasegaseminare

Atonu e aoga le valaaulia i nisi taimi o tagata aoga e iloilo o latou aafiaga i le seminare. E mafai ona e amata i le fai atu o ni fesili e pei o nei:

• O a nisi o mea e lelei ona tatou faia o se vasega seminare?

• O a nisi vaega e mafai ona tatou faaleleia?

Valaaulia tagata aoga e faitau le Mataupu Faavae ma Feagaiga 88:118–126, ma vaavaai mo mataupu faavae e mafai ona faaleleia ai le aafiaga e aoao ai i se vasega seminare. A o maua e tagata aoga ia mataupu faavae i mau, e mafai ona e valaaulia i latou e lisi nei mea i luga o le laupapa. E mafai foi ona e vaevaeina tagata aoga i ni vaega toalaiti ma valaaulia i latou e filifili se tasi o fesili nei e talanoaina. A uma ona talanoaina, valaaulia ni nai tagata aoga e faasoa mai o latou manatu i le vasega.

• E mafai faapefea e a tatou sauniuniga faaletagata lava ia ma fiafiaga faaleagaga ona faaleleia le aafiaga aoaoina mo tagata uma? (Tagai i fuaiupu 119, 124.)

• E mafai faapefea e le taumafai e faia mea uma “i le suafa o le Alii” a o i ai i le seminare ona faamalosia lo tatou manao e mulimuli ia te Ia? (fuaiupu 120).

• E mafai faapefea e le taofia mai “lauga māmā” ma manaoga le talafeagai ona valaaulia atili ai le uunaiga a le Agaga Paia? (fuaiupu 121).

• E mafai faapefea e le tuuina atu o “se avanoa tutusa” e faasoa atu ai ma saili ia “fealofani” ona faateleina le lotogatasi i le vasega? (fuaiupu 122–123).

Mataupu Faavae ma Feagaiga 88:119. “O se fale o le Atua”

Mafaufau e faaali atu se ata o le Malumalu o Katelani. Faamalamalama atu i tagata aoga, a o faatonuina e le Alii le Au Paia anamua e saili le aoaoina e ala i le suesue ma le faatuatua (tagai Mataupu Faavae ma Feagaiga 88:118), sa Ia poloaiina foi i latou e fausia se malumalu lea e mafai ai ona latou maua le malamalama faaopoopo ma le poto (tagai Mataupu Faavae ma Feagaiga 88:119). E mafai ona e faasoa atu lenei saunoaga a Peresitene Russell M. Nelson: “E fiafia le Alii e faia Ana lava aoaoga i Lona maota paia” (“O Le Tau o le Mana o le Perisitua,” Liahona, Me 2016, 68). Ona mafai lea ona e fautuaina tagata aoga e mafaufau i soo se mea na aoao atu e le Alii ia i latou a o sauniuni mo ma auai atu i le malumalu. Valaaulia tagata o le vasega e suesue le Mataupu Faavae ma Feagaiga 88:119, ma vaavaai mo le ituaiga o fale na faatonuina e le Alii ina ia faatuina. Lisi tali a tagata aoga i luga o le laupapa ma talanoaina auala e mafai ai e le malumalu ona faamalosia le faatuatua i le Tama Faalelagi ma Iesu Keriso.

Mataupu Faavae ma Feagaiga 88:125. “Fusi o le alofa mama”

A uma ona iloilo e tagata aoga le fautuaga a le Alii i le Mataupu Faavae ma Feagaiga 88:118–126, atonu e te manao e faaalu sina taimi e talanoaina ai le taua o le fuaiupu 125 ma pe mafai faapefea e le uiga o le alofa mama ona fesoasoani ia i tatou e aoao e ala i le faatuatua. E mafai ona e valaaulia tagata aoga e saili mo ni mau faaopoopo e uiga i le alofa mama (tagai Moronae 7:45, 47) ma fai atu nisi o fesili nei o talanoaga:

• Aisea e te manatu ai na amata e le Alii le fuaiupu 125 i le fasifuaitau “Ma luga o mea uma”?

• Mata o le a se foliga o se tagata e faaofuina i latou lava i le alofa moni?

• E mafai faapefea e le taumafai mo le alofa moni ona fesoasoani ia i tatou e aoao e ala i le faatuatua?