Lesona 101: Mataupu Faavae ma Feagaiga 88

Mataupu Faavae ma Feagaiga 88:14–41

Taumafai e Usiusitai i le Tulafono Selesitila

I le Mataupu Faavae ma Feagaiga 88, na faaali mai ai e le Alii upumoni e uiga i le Toetutu ma malo o mamalu e aofia ai le mamalu selesitila. O nei upumoni e mafai ona tuufaatasia ma faamanuiaina ai tagata o le Ekalesia a o latou mulimuli faamaoni ia Iesu Keriso. O lenei lesona e mafai ona fesoasoani i tagata aoga e faateleina ai lo latou mautinoa e mafai ona latou maua le mamalu selesitila.

Gaoioiga E Ono Mafai Ona Aoao Ai

O se sini o le mamalu selesitila

Valaaulia tagata aoga e tusi se faasitepu i a latou api talaaga mo suesuega ma faaigoa le pito i luga o faasitepu “O Le Malo Selesitila.” Fai i tagata aoga e tusi se ata o le mea latou te vaai ai ia i latou lava i luga o le faasitepu. Faamalosi i latou e faamaumau a latou tali i fesili nei:

• Pe o e lagonaina o loo fesoasoani au filifiliga o i ai nei ia te oe e agai atu ai i le malo selesitila? Aisea pe aisea foi e leai ai?

• O le a lou mautinoa e mafai ona e maua mulimuli ane ai le mamalu selesitila faatasi ai ma le fesoasoani a Iesu Keriso?

Faamanatu i le vasega ona o Iesu Keriso o lo tatou Faaola, e mafai ai ona tatou faalagolago ia te Ia e fesoasoani ia i tatou ia suia, salamo, ma tuuina mai le malosi a o tatou taumafai e maua le mamalu selesitila.

O le faaaliga a le Alii o loo tusia i le Mataupu Faavae ma Feagaiga 88 ua tuuina mai ai le malamalama faalelagi e fesoasoani tatou te malamalama ai i upumoni e faavavau. I le vaega 88, tatou te aoao ai i auiliiliga e uiga i le fuafuaga a lo tatou Tama Faalelagi, upumoni e uiga ia Iesu Keriso, ma le ala e mafai ai ona tatou toe foi atu i lo La’ua afioaga.

Atonu e te manao e faasoa atu ou lagona e uiga i le matagofie ma le maoa’e o le fuafuaga a le Tama Faalelagi. Fautuaina tagata aoga a o latou suesue i le asō e saili musumusuga ia iloa ai auala e mafai ona latou galulue ai i le faatuatua ma maua le fesoasoani a le Faaola a o latou agai atu i luma i le malo selesitila.

O tatou tino faaletino

Faamalamalama atu o se vaega taua o le fuafuaga a le Atua e mo i tatou ina ia avea faapei o Ia, i le faaleagaga ma le faaletino. I le fanau mai tatou te maua ai se tino faaletino. O lenei tino o le a i ai se aso e oti ai ma toetu mai.

Mafaufau e faamaumauina tali a tagata aoga i le fesili o loo i luga o le laupapa:

• O le a se mea ua uma ona e iloa e uiga i le Toetu?

Afai e manaomia, e mafai e tagata aoga ona faaaoga Autu ma Fesili, “Toetu,” topics.ChurchofJesusChrist.org e lagolago ai a latou tali.

E mafai e tagata aoga ona faauma le gaoioiga suesue lenei ma se paga. E mafai ona e faaali atu fesili mo tagata aoga e faatatau i ai, ma paga taitasi e nafa mo le taliina o se tasi o fesili. E mafai ona fesoasoani i tagata aoga ia iloa le upu faaola e mafai ona faauigaina o le ola pe toe faaolaola.

Faitau le Mataupu Faavae ma Feagaiga 88:14–17, 27-31. Mafaufau loloto i mea nei ao e faitau:

• O le a se mea ua e aoaoina e uiga i le Toetu?

• O le a se mea ua e aoaoina e uiga i tikeri e tolu o le mamalu?

Valaaulia tagata aoga e lipoti mai mea ua latou aoaoina. Faalogo ma le toto’a ma fai atu fesili tulitatao e fesoasoani e faamanino ai lo latou malamalama pe a manaomia. Afai e i ai ni fesili faaopoopo a tagata aoga, e mafai ona outou talanoaina o se vasega.

Iloiloina o le malamalama o tagata aoga: Mo nisi faataitaiga i lenei mea, tagai i le aoaoga ua faaulutalaina “Ia saunia i taimi uma e tali atu i uunaiga faaleagaga e uiga i manaoga o tagata a’oa’o” o loo maua i Tomai o le Atinaega o Faiaoga: Aoao Atu e ala i le Agaga. Mafaufau e faataitai le tomai “Fai se fesili e iloilo ai le aoaoina a o lei agai atu i le lesona.”

O le usitaia o tulafono a le Atua e taitai atu ai i le mamalu

Mafaufau e valaaulia tagata aoga e faasoa mai mea latou te mafaufauina e ono i ai i le mauaina o se tino selesitila pe aisea foi latou te mananao ai e maua se tino selesitila i le Toetu.

Afai sa galulue muamua tagata aoga ma se paga, e mafai ona latou galulue ma se paga ese mo le gaoioiga suesue lenei.

Faitau le Mataupu Faavae ma Feagaiga 88:21–24, 34–36, 38–39, ma vaavaai pe mafai faapefea ona tatou toetutu ma se tino selesitila. Mafaufau e faailoga ia upu ma fasifuaitau e tulaga ese ia te oe.

• O le a sou lagona i le mea e taua ai ona malamalama i nei fuaiupu?

• O le a se mea e filimaotiina le mamalu e mafai ona tatou maua pe a mavae le Faamasinoga Mulimuli? Aisea?

Tuu atu i tagata aoga se taimi e talanoa ai i mea sa latou aoaoina. E mafai e tagata aoga ona faailoa mai ni upumoni eseese, e aofia ai se mea e pei o tatou usiusitai i tulafono selesitila, o le a tatou maua le mamalu selesitila po o le Toetutu, o le a tatou maua le mamalu e tusa ai ma le tulafono tatou te usiusitai i ai. Atonu e te manao e tusi nei upumoni i luga o le laupapa.

Ina ia fesoasoani i tagata aoga ia malamalama ma lagona le taua o nei tulafono faalelagi, e mafai ona e faasoa atu le faamatalaga lenei:

Na aoao mai Elder D. Todd Christoffferson o le Korama a Aposetolo e Toasefululua:

Ioe, o le tulafono o le malo selesitila, o le tulafono ma feagaiga o le talalelei, lea e aofia ai lo tatou manatuaina pea o le Faaola ma la tatou tautinoga ia usiusitai, ositaulaga, faapaiaina, ma faamaoni aiai. (D. Todd Christofferson, “Omai i Siona,” Liahona, Nov. 2008, 38)

• O le a se mea ua e aoaoina e uiga i le alofa, faamasinotonu, ma le alofa mutimutivale o le Tama Faalelagi?

• O a ni ou lagona e uiga i le ala e galue ai o Ia taitoatasi ma Ana fanau?

Fesoasoani i le ala

Valaaulia tamaiti aoga e mafaufau loloto pe faapefea ona latou tali atu i se uo e lotovaivai ma lagona e le lava lona agavaa e maua ai le mamalu selesitila. E mafai ona e valaaulia tamaiti aoga e faitau fuaiupu nei, ona tusi lea o se tali puupuu i popolega o le latou uo.

Faitau le 3 Nifae 27:19–20, ma vaavaai pe na mafai faapefea e le Tama Faalelagi ona faia ia mafai e Lana fanau ona maua le mamalu selesitila. Atonu e te manao e fesootai fuaiupu nei ma le Mataupu Faavae ma Feagaiga 88:21, 34.

Mafaufau e valaaulia tagata aoga e faailoga upu vagana ai i le 3 Nifae 27:19. Ta’u i ai o nei upu e mafai ona faauigaina o le “vagana” po o le “vagana ai.” E mafai ona e fesili i tagata aoga pe faapefea ona fesoasoani lenei mea ia i latou e malamalama ai i upu a Iesu i sa Nifae.

Ina ia fesoasoani i tagata aoga ia iloa le faamoemoe ma suiga o loo avanoa ia i latou e ala ia Iesu Keriso, e mafai ona e faasoa atu le faamatalaga lenei:

Na aoao mai Elder D. Todd Christoffferson o le Korama a Aposetolo e Toasefululua:

Atonu e tatau ona tatou tatalo mo ni taimi ma ni avanoa e galulue ai ma taumafai ma faatoilaloina le agasala e pei ona tatou tatalo mo le alofa mutimutivale. E mautinoa lava e faamanuia e le Alii se tagata e manao ia oo mai i le faamasinoga ma le agavaa, o le e galue ma le filiga i lea aso ma lea aso ina ia suitulaga e le malosi ia vaivaiga. O le salamo moni, o le suiga moni e manaomia ai ni taumafaiga fai soo, ae o loo i ai se mea lelei atu ma paia i ia taumafaiga. O le faamagaloga ma le faamalologa paia e tafe fua mai lava i se agaga, aua e moni, “e fiafia le amiomama i le amiomama; o le malamalama e pipii i le malamalama; [ma] o le alofa mutimutivale e agaalofa i le alofa mutimutivale ma āiā i ana lava” (MF&F 88:40).

Faatasi ai ma le salamo tatou te mafai ai ona siitia ma le mausali i o tatou gafatia e ola i le tulafono selesitila, aua ua tatou iloaina o “lē e le mafai ona ola i le tulafono o se malo selesitila e le mafai ona ia gafatia se mamalu selesitila” (MF&F 88:22). (D. Todd Christofferson, “O Le Meaalofa Paia o le Salamo,” Liahona, Nov. 2011, 39)

• E mafai faapefea e le malamalama i le Togiola a le Faaola ona tosina ai lou talitonuga i le mauaina o le mamalu selesitila?

• Mai mea ua e suesueina i le asō, o le a sau tala e fai atu i se tasi e fefe e le mafai ona ia maua le mamalu selesitila?

Valaaulia tagata aoga e toe iloilo le faasitepu sa latou tusia i le amataga o le vasega. Fautuaina i latou e tusi i luga pe faataamilo i le faasitepu mea ua latou aoaoina e mafai ona fesoasoani ia i latou e latalata atili atu ai i le malo selesitila. E mafai e tagata aoga ona tusifaamaumau o latou manatu po o lagona e uiga i le Tama Faalelagi ma Iesu. E mafai foi ona aofia ai le auala na faamalosia ai lo latou naunautaiga ma le faamoemoe ia maua le mamalu selesitila po o le auala e mafai ai e upumoni na latou aoaoina ona tosina ai a latou filifiliga i le taimi nei ma i le lumanai.

A lava le taimi, e mafai ona e valaaulia se tagata aoga se toatasi pe toalua e faasoa o latou manatu ma le vasega.

Punaoa Faaopoopo

O faapefea ona avea tulafono a le Atua ma faamaoniga o Lona alofa mo i tatou?

Na aoao mai Peresitene Russell M. Nelson:

O tulafono paia o meaalofa a le Atua i Ana fanau. … Se’i o’u fai atu i se aotelega ou te mafaia: A o outou ola ai i tulafono a le Atua, o loo outou agai atu i luma i le faaeaga. …

… O faamanuiaga silisili a le Atua ua faapolopoloina mo i latou o e usiusitai i Ana tulafono, e pei ona Ia faamalamalama mai: “Aua o i latou uma o e e fia maua se faamanuiaga i lo’u lima ia mau i le tulafono na tofia mo lena faamanuiaga” [Mataupu Faavae ma Feagaiga 132:5]. O tulafono a le Atua e uunaia atoatoa lava e Lona alofa e lē uma mo i tatou ma Lona finagalo ia avea tatou uma ma tagata e mafai ona tatou avea ai. …

… E le faigofie le faaeaga. O tulaga manaomia e aofia ai se taumafaiga taulai ma le finafinau e tausia tulafono a le Atua, salamo malosi pe a tatou lē salamo. Ae o le taui mo le faia o lena mea e sili mamao atu nai lo soo se mea e mafai ona tatou mafaufauina, aua e aumaia ia i tatou le olioli iinei ma le “fiafia e le gata” [Mosaea 2:41] pe a mavae lenei olaga. (Russell M. Nelson, “The Love and Laws of God” [faigalotu a le Iunivesite o Polika Iaga, 17 Setema., 2019], speeches.byu.edu)

Mataupu Faavae ma Feagaiga 88:27. O le a le uiga o le tatou tutulai a’e o se “tino faaleagaga”?

Na aoao mai Peresitene Iosefa Filitia Samita (1876–1972):

I le toetutu mai le oti, o tino sa tuu i lalo tino faalenatura o le a o mai i tino faaleagaga. O lona uiga, i le olaga faitino, o le ola o le tino o loo i le toto, ae o le tino pe a faatu mai i le tino ola pea o le a faaolaina e le agaga ae le o le toto. O le mea lea, e oo ina faaleagaga, ae o le a aofia ai aano ma ivi, e pei lava ona i ai le tino o Iesu, o ia o le faataitaiga. (Joseph Fielding Smith, Doctrines of Salvationcomp. Bruce R. McConkie [1955], 2:284–85)

Mataupu Faavae ma Feagaiga 88:20–24. O le a le mea o le a filimaotiina po o le fea malo o le mamalu o le a ou mauaina i le Faamasinoga Mulimuli?

Ua molimau mai Peresitene Russell M. Nelson:

O le a faamasinoina outou taitoatasi e tusa ai ma a outou galuega taitoatasi ma manaoga o o outou loto [tagai i le MF&F 137:9]. O le a le manaomia ona e totogiina le sala a se isi. O lou tofiga faaiu i le malo selesitila, terasitila, po o le malo telesitila, e le fuaina i se taumatega. Ua faatonuina e le Alii tulaga manaomia e le masuia mo ia malo taitasi. E mafai ona e iloa mea o loo aoao mai e tusitusiga paia, ma mamanu o outou olaga e tusa ai [tagai Ioane 14:2; 1 Korinito 15:40–41; Mataupu Faavae ma Feagaiga 76:50–119; 98:18]. (Russell M. Nelson, “Constancy amid Change,” Ensign, Nov. 1993, 35)

Mataupu Faavae ma Feagaiga 88:35. O le a le mea e tupu ia i latou o e solia tulafono a le Atua?

Na faamatala mai e Elder Dale G. Renlund o le Korama a Aposetolo e Toasefululua:

A mavae le oti, o le a tatou mauaina le mea ua tatou agavaa ai ma “olioli i [na o] mea ua [tatou] loto e talia” [Mataupu Faavae ma Feagaiga 88:32]. O le iloaina o lo tatou taunuuga e faavavau e faalagolago lea ia tatou filifiliga. E manaomia ai le osia ma tausia o feagaiga paia. O lenei ala o feagaiga o le ala lea tatou te o mai ai ia Keriso ma e faavae i luga o upumoni atoatoa, ma le tulafono e faavavau ma e le masuia. E le mafai ona tatou foafoaina lo tatou lava ala ma faamoemoe i taunuuga o folafolaga a le Atua. O le faamoemoe i Ana faamanuiaga ae le mulimuli i tulafono e faavavau o loo faavae ai i luga [tagai i le Mataupu Faavae ma Feagaiga 130:20–21] o se mea sese, e pei o le mafaufau e mafai ona tatou pa’i atu i se ogaumu aasa ma “filifili” e aua le mu ai. …

… Tatou te saoloto e filifili, ae e le mafai ona tatou filifilia taunuuga o le lē mulimuli i le ala ua faaalia mai [tagai i le 2 Nifae 2:5, 16, 26–27]. Ua fetalai mai le Alii, “O ia o lē solia se tulafono, ma lē ola i le tulafono, ae saili e avea ma se tulafono ia te ia lava, … e lē mafai ona faapaiaina i le tulafono, pe i le alofa mutimutivale, faamasinotonu, po o le faamasinoga” [Mataupu Faavae ma Feagaiga 88:35]. E le mafai ona tatou o ese mai le ala a le Tama Faalelagi ona tuuaia lea o Ia mo taunuuga faatauvaa. (Dale G. Renlund, “O Lou Natura Paia ma le Taunuuga e Faavavau,” Liahona, Me 2022, 75)

Gaoioiga Faaopoopo e Aoao Ai

Lesona faatino

I le avea ai ma se isi amataga i le vaega “O o tatou tino faitino,” e mafai ona e fesoasoani i tagata aoga e iloilo faapuupuu le aoaoga faavae o le Toetu. Faaali atu se totinilima ma faamalamalama atu ua faatusa i se tino faaletino. Valaaulia se tagata aoga e faamaulu le totinilima ma faaminoinoi ona tamatamailima. E mafai ona e fai atu fesili e pei o:

• Afai o le totinilima ua faatusa i se tino faaletino, o le a le mea e faatusa i ai le lima?

• O le a le mea e tupu pe afai e tuueseese le “tino” mai le “agaga”?

O tulafono a le Atua e puipuia tatou

Ina ia fesoasoani i tagata aoga e toe manatunatu i le puipuiga ua tuuina mai e tulafono a le Atua, e mafai ona e mafaufau e faaali atu se tasi o vitio nei:

• “O Se Taula Saogalemu” (3:36)

• “Aisea e Tuuina mai ai e le Atua ia i Tatou Poloaiga?” (0:39)

• “E Manuia ma Fiafia i Latou o E Tausi i Poloaiga a le Atua” (5:41)

O se faasitepu

A iloilo e tagata aoga a latou faasitepu agai i le faaiuga o le lesona, atonu e te manao e faasoa atu ma talanoaina le saunoaga lenei a le Perofeta Iosefa Samita (1805–44).

Pe a e a’e i se apefai, e tatau ona e amata atu i le pito i lalo, ma alu atu i luga mai lea sitepu i lea sitepu, seia e taunuu i le tumutumu; ma e faapena i mataupu faavae o le talalelei—e tatau ona e amata i le muamua, ma alu atu ai seia e aoao i mataupu faavae uma o le faaeaga. Ae o le a i ai se taimi umi pe a maea ona e ulu atu i le veli e faatoa e aoaoina ai ia mea. E lē faapea o le a malamalama uma i ai i le lalolagi lenei; o le a avea ma galuega tele lo tatou aoao i lo tatou faaolataga ma le faaeaga e oo lava i tala atu o le tuugamau. (Aoaoga a Peresitene o le Ekalesia: Iosefa Samita [2007], 268).

O le faatulagaga o le Toetu

E mafai ona e valaaulia tagata aoga e faitau le Mataupu Faavae ma Feagaiga 88:96–102, ma vaavaai mo mea o le a tutupu i le Toetutu. E mafai ona e vaevaeina le faitauga i fuaiupu o le tele o toetutu (fuaiupu 96–98, 99, 100–101, 102). Atonu e te mafaufau e faasoa atu mea nei e faamalamalama atili ai nei fuaiupu:

O e amiotonu o ola i le taimi o le Afio Mai Faalua o le Alii “o le a liua ma segia i luga e fetaiai ma ia” (MF&F 88:96). O i latou o le a mautofi i le malo selesitila o le a muamua ona toetutu mai (tagai MF&F 88:96–98). A uma ona toetutu mai i latou o le a fai mo latou tofi le malo selesitila, ona toetutu mai ai lea o i latou o le a fai mo latou tofi le malo terasitila (tagai i le MF&F 88:99; tagai foi i le MF&F 76:71–79). O i latou ia e lei taliaina Iesu Keriso a o ola ai ae na talia o Ia i le lalolagi o agaga (tagai i le MF&F 88:99). A mavae le Meleniuma, o le “toetutu mulimuli” (MF&F 76:85), po o le toetutu o e amioletonu, o le a tupu. O nei tagata o i latou ia o le a fai mo latou tofi le malo telesitila ma, mulimuli lava, o atalii o le malaia, “o e o le a tumau pea i le eleelea” (tagai MF&F 88:100–102). (Mataupu Faavae ma Feagaiga Tusi Lesona a le Tagata Aoga [2018], 488)