Lesona 100: Mataupu Faavae ma Feagaiga 88

Mataupu Faavae ma Feagaiga 88:1–13, 41–50

O Le Malamalama o Keriso

A o i ai i Katelani, Ohaio, sa tatalo Iosefa Samita ma nisi o ositaulaga sili i le Tama Faalelagi mo se faaaliga e faatatau i le fausiaina o Siona. O le faaaliga na aoao mai ai upumoni e uiga i le mana ma le maoae o le Malamalama o Iesu Keriso. O lenei lesona ua faamoemoe e fesoasoani i tagata aoga ia lagonaina se agaga faafetai sili atu mo le aafiaga o le Malamalama o Keriso i o latou olaga.

Gaoioiga E Ono Mafai Ona Aoao Ai

O mea tatou te lagonaina

Mafaufau e fai atu i tagata aoga le fesili lenei ma lisi a latou tali. E mafai foi ona e tuu atu ia i latou e talanoaina le fesili i ni vaega toalaiti ona tusi lea o a latou tali i luga o le laupapa.

• O a ni faataitaiga o mea e mafai ona e lagonaina ae le o vaaia?

  E mafai e tagata aoga ona lisi ni mea e pei o le vevela, matagi, alofa, lotofaafetai, faatuatua, ma isi mea faapena.

• Aisea e ono taua ai le iloa o loo i ai ni mea e mafai ona e lagonaina ae le o vaaia?

E mafai ona e valaaulia tagata aoga e saili musumusuga e iloa ai le aafiaga o le Atua i o latou olaga.

O Aogā o le malamalama o Keriso

Sa potopoto faatasi Iosefa Samita ma toeaina e toaiva o le Ekalesia i le fogafale i luga o le Faleoloa o Newel K. Whitney i Katelani, Ohaio. Sa latou mananao ia malamalama atili e uiga i o latou tiute i le fausia Siona. Sa valaaulia e Iosefa tagata taitasi e feauaua’i e tatalo ia iloa le finagalo o le Alii. Ina ua uma ona tatalo, sa maua e le Perofeta le mea ua ta’ua nei o le Mataupu Faavae ma Feagaiga 88.

A o amata e tagata aoga le faitauga lenei, ia mautinoa ua latou malamalama o le fuaiupu 6 o loo faasino ia Iesu Keriso.

Faitau le Mataupu Faavae ma Feagaiga 88:6–13, ma vaavaai mo mea e mafai ona aoao atu e nei fuaiupu ia te oe e uiga ia Iesu Keriso ma Lona malamalama.

• O a mea ua e aoaoina mai nei fuaiupu e uiga i le Malamalama o Keriso?

  Faatasi ai ma malamalamaaga eseese e ono faasoa mai e tagata aoga, fesoasoani ia i latou e faailoa mai le upumoni faapea o le Malamalama o Keriso e aumaia le malamalama ma le ola i Ana foafoaga uma.

  Fesoasoani i tagata aoga ia iloa pe mafai faapefea ona aafia ai o latou olaga i aso taitasi ia malamalama ai i le aafiaga o le Atua e ala i le Malamalama o Keriso. O le fesili lenei o se tasi lea o auala e faia ai lenei mea.

• O a nisi o tulaga e feagai ma le autalavou lea o le a faamanuiaina ai i latou mai le iloaina o le aafiaga o le Atua? Aisea?

O le gaoioiga lenei ua faamoemoe e fesoasoani i tagata aoga ia maua se agaga faafetai sili atu mo le Malamalama o Keriso ma le auala e mafai ai ona aafia ai o latou olaga.

E mafai ona e faia ni nofoaga se fa i totonu o le potu e mafai e tagata aoga taitasi ona asiasi i ai ma faatumu. E mafai ona valaaulia tagata aoga e ave a latou api talaaga, se mea e tusitusi ai, ma a latou tusitusiga paia i nofoaga taitasi. I se isi itu, e mafai ona e vaevaeina tagata aoga i ni vaega se fa ma atofa atu i tagata aoga taitasi se vaega o le pepa tufa atu e faatumu. Ona mafai lea e tagata aoga ona faasoa mai mea na latou aoaoina ma tagata o vaega.

O Le Malamalama o Keriso

Faamanino le Malamalama o Keriso

Faitau le Mataupu Faavae ma Feagaiga 88:12–13, ma vaavaai mo faamatalaga o le Malamalama o Keriso.

Faitau le faauigaga lenei o le Malamalama o Keriso:

“[O le Malamalama o Keriso o le] malosiaga faalelagi, mana, po o le uunaiga e mai le Atua e ala ia Keriso ma e tuuina mai le ola ma le malamalama i mea uma. O le tulafono lea e pulea ai mea uma i le lagi ma le lalolagi (MF&F 88:6–13). E fesoasoani foi i tagata ia malamalama i upumoni o le talalelei ma fesoasoani e tuu i latou i luga o le ala o le talalelei lea e tau atu i le faaolataga.” (Taiala i Tusitusiga Paia, “Malamalama, Malamalama o Keriso,” scriptures.ChurchofJesusChrist.org)

• E faapefea ona e aoteleina mea e te malamalama i ai i le Malamalama o Keriso?

• O le a sou manatu e faapefea ona aafia oe lava e le Malamalama o Keriso?

O Le Malamalama o Keriso o lo tatou loto fuatiaifo

O se tasi o faailoaga mai o le Malamalama o Keriso, o le tatou lotofuatiaifo. Tusi se faauigaga o le a malamalama ai se tamaitiiti Peraimeri i le mea ua e malamalama i ai o le lotofuatiaifo.

Faitau le faauigaga lenei ma vaai po o le a se mea e mafai ona e faaopoopo atu i lau faauigaga:

“[O le lotofuatiaifo o] le lagona i totonu o le sa’o ma le sese, e sau mai le Malamalama o Keriso i tagata uma (Moro. 7:16). Ua tatou fananau mai ma se gafatia faalenatura e iloa ai le eseesega i le va o le sa’o ma le sese ona o le Malamalama o Keriso ua tuuina mai i tagata uma (MF&F 84:46). O lenei tomai e ta’ua o le lotofuatiaifo. O le mauaina o lena mea e avea ai i tatou ma tagata faatuatuaina. E pei foi o isi tomai, e mafai foi ona mate o tatou lotofuatiaifo e ala i le agasala po o le faaaoga seseina.” (O Le Taiala i Tusitusiga Paia, “Lotofuatiaifo,” scriptures.ChurchofJesusChrist.org)

Faitau le Mataupu Faavae ma Feagaiga 84:45–46 ma le Moronae 7:16, ma vaavaai mo upu po o fasifuaitau o loo faamatala ai le ala e avea ai le Malamalama o Keriso ma o tatou lotofuatiaifo. Mafaufau e fai se mau fesootai mo fuaiupu e lua.

• O le a se fasifuaitau mai nei fuaiupu e fesoasoani e te malamalama ai po o le a le lotofuatiaifo?

• Aisea e te manatu ai na tuuina atu e le Tama Faalelagi ma Iesu Keriso ia te oe se lotofuatiaifo?

E mafai faapefea e le faalogo po o le lē amanaiaina o lou loto fuatiaifo ona aafia ai filifiliga e te faia ma lou taunuuga e faavavau?

O le Malamalama o Keriso e i totonu o tagata uma

Vaai faalemafaufau e faapea ua talosagaina oe e faasoa atu se manatu puupuu i le Aoga Sa e uiga i le auala e maimoa ma taulima lelei ai tagata uma, aemaise lava i latou e ese mai ia te oe. E mafai ona e faaaogaina punaoa nei ma soo se isi lava e te iloa e aoga.

• Mataupu Faavae ma Feagaiga 88:11

• Mataupu Faavae ma Feagaiga 93:2

Sa aoao mai Peresitene Boyd K. Packer (1924–2015) o le Korama a Aposetolo e Toasefululua:

O le tele o le tatou iloa e uiga i le Malamalama o Keriso, o le tele foi lea o le a tatou malamalama ai e uiga i le olaga ma le faatele ona tatou maua se alofa loloto mo tagata uma. O le a avea i tatou ma ni faiaoga ma ni faifeautalai ma ni matua sili atu, ma ni alii ma ni tamaiti e sili atu ona lelei. O le a loloto atu lo tatou manatu mo o tatou uso ma tuafafine i le Ekalesia ma i latou e le talitonu. …

O le Malamalama o Keriso e mo le lalolagi atoa e pei o le susulu o le la lava ia. Soo se mea lava o i ai le tagata ola, o loo i ai foi le Agaga o Keriso. Ua tofusia ai agaga ola uma lava. …

Afai tatou te malamalama i le moni o le Malamalama o Keriso i tagata uma tatou te vaai i ai … ma i totonu o i tatou lava, … o le a tatou maua le lototele ma musumusuga e sili atu nai lo mea ua tatou iloa i lenei taimi. Ma e tatau lava ona faapena! Ma o le a faapena lava! O nei mea uma o se vaaiga o le upumoni o le talalelei lea e toalaiti tele e malamalama i ai. (Boyd K. Packer, “O le Malamalama o Keriso,” Ensign,, Ape. 2005, 8, 13–14)

Tusi se fuaiupu se lua i le tolu e mafaufau i le auala e mafai ai e le malamalama i le Malamalama o Keriso ona tosina ai le ala e te vaai atu ai i isi.

O le Malamalama o Keriso i le atulaulau

Pe ua ootia ea oe i le matagofie po o le mamalu o lenei lalolagi ma le atulaulau? O a lagona ua aumaia e nei mea ia te oe?

Faitau le Mataupu Faavae ma Feagaiga 88:7–10, 45–47 ma vaavaai mo mea ua e aoaoina e uiga i le Malamalama o Keriso, le lalolagi, ma le atulaulau.

• O le a se mea e mafai ona tatou aoaoina e uiga i le Alii mai Ana foafoaga?

• E mafai faapefea e le vaaia o aafiaga o le Atua i le atulaulau ona fesoasoani tatou te iloa ai Lona aafiaga i o tatou olaga?

A uma se taimi na galulue ai tagata aoga i nofoaga, mafaufau e tuu atu ia i latou se avanoa e faasoa mai ai mea sa latou aoaoina ma lagonaina. Atonu e mafai ona fesoasoani fesili nei.

• O le a se mea ua e aoaoina e uiga i le Malamalama o Keriso na aogā?

• Na faapefea ona e vaaia le aafiaga o le Malamalama o Keriso i lou olaga?

• O le a sou manatu e mafai faapefea e le iloaina o le Malamalama o Keriso i lou olaga ona aafia ai lou sootaga ma le Tama Faalelagi ma Iesu Keriso?

E mafai ona e faasoa atu pe na faapefea ona aafia oe e ala i le malamalama atili i le Malamalama o Keriso.

Punaoa Faaopoopo

O le a le eseesega i le va o le Malamalama o Keriso ma le meaalofa o le Agaga Paia?

Sa aoao mai Peresitene Boyd K. Packer (1924–2015) o le Korama a Aposetolo e Toasefululua:

O tagata uma i soo se mea lava ua i ai le Agaga o Keriso [po o le Malamalama o Keriso], ma talu ai ona o le Agaga o le Agaga Paia e mafai ona asiasi atu i soo se tasi, o le meaalofa o le Agaga Paia e maua ‘e ala i le usiusitai i tulafono ma sauniga o le Talalelei’ (Mataupu Faavae o le Faatuatua 1:3), e ala i le gauai atu i le ‘papatisoga e ala i le faatofuina mo le faamagaloga o agasala; [ma le] faaee atu o lima mo le meaalofa o le Agaga Paia’ (Mataupu Faavae o le Faatuatua 1:4). E le otometi ona i ai e pei o le i ai o le Agaga o Keriso. O lenei meaalofa e tatau lava ona faaee atu e se tasi o loo i ai le pule (tagai i le Mataupu Faavae o le Faatuatua 1:5). (Boyd K. Packer, “O Le Malamalama o Keriso,” Ensign, Ape. 2005, 13)

E mafai faapefea e le ogatusa ma le Malamalama o Keriso ona aafia ai le auala tatou te faasoa atu ai le talalelei i isi?

Na faasoa mai e Elder D. Todd Christoffferson o le Korama a Aposetolo e Toasefululua:

Faasoaina Atu o le Savali o le Toefuataiga ma le Toetu

Ua aoao mai Elder Christoffferson e uiga i le taua o le faasoaina atu o le savali o le Toefuataiga ma ofoina mai ni mea manaomia se tolu e faia ma le manuia.

Afai e mau le alofa o Keriso i totonu o i tatou, o le a iloa e isi e moni lo tatou alolofa mo i latou. Afai o mumu le Agaga Paia i totonu o i tatou, o le a toe faamumuina le Malamalama o Keriso i totonu o i latou. O le tagata e i ai oe o le a avatua le mea moni i lau valaaulia ia o mai ma lagona le olioli o le atoatoaga o le talalelei a Iesu Keriso. (D. Todd Christofferson, “Faasoaina Atu o le Savali o le Toefuataiga ma le Toetu,” Liahona, Me 2020, 112)

Pe mafai ea ona alu ese le Malamalama o Keriso?

Sa aoao mai Peresitene Boyd K. Packer (1924–2015) o le Korama a Aposetolo e Toasefululua:

Sa i ai le Malamalama o Keriso ia te oe ae e te lei fanau mai (tagai i le MF&F 93:23, 29–30), ma o le a i ai ia te oe taimi uma e te ola ai ma o le a le fano ai pe a liliu atu le vaega faaletino o outou i le efuefu. E i ai pea lava iina. …

Sa faamalamalama mai e le peresitene o Harold B. Lee: “E le uma lava lena malamalama … [talanoa e uiga i le Malamalama o Keriso] sei vagana ua tatou faia le agasala e le mafaamagaloina. O lona susulu atonu e matua itiiti lava ma e tau le mafai ona tatou iloaina, ae o loo i ai iina mo i tatou le tapiliina i se afi o le a mumu susulu atili i le malamalama ma le atamai. Sei vagana ai lena mea, o le a le mafai ona matou ausia. O la tatou galuega faafaifeautalai o le a oo o se meanoa.” (Boyd K. Packer, “O Le Malamalama o Keriso,” Ensign, Ape. 2005, 10, 14)

Na faapea mai Sister Sharon Eubank, o le Fesoasoani Muamua i le Au Peresitene Aoao o le Aualofa i lena taimi:

O se tasi o ō tatou manaoga tāua o iai ina ia tuputupu a’e ai o le fesootai pea i le puna o le malamalama—o Iesu Keriso. O Ia o le puna o lo tatou mana, o le Malamalama ma le Ola o le Lalolagi. A aunoa ma se fesootaiga malosi ia te Ia, e amata ona tatou feoti faaleagaga. …

Na fetalai Iesu, “O Aʼu o le malamalama [lea e] susulu i le pouliuli, ae ua lē malamalama i ai le pouliuli” [Mataupu Faavae ma Feagaiga 6:21]. O lona uiga e tusa lava po o le a le malosi e taumafai ai, e le mafai e le pogisa ona tapeina lena malamalama. Po o le a lava. E mafai ona e faatuatuaina o le a i ai Lona malamalama iina mo oe. (Sharon Eubank, “O Keriso: O Le Malamalama e Susulu i le Pogisa,” Liahona, Me 2019, 73–75)

O fea e mafai ona ou aoao atili ai e uiga i le Malamalama o Keriso?

Patterns of Light: The Light of Christ

What is light? In this three part series, Elder David A. Bednar discusses how we receive and perceive light from God. Part 1 centers on the properties of light and how the Light of Christ affects all men and women everywhere.

“O le Malamalama ma le Ola o le Lalolagi”

“O le Malamalama o Keriso”

Gaoioiga Faaopoopo e Aoao Ai

Galuega faaopoopo o le Malamalama o Keriso

Afai e manaomia, e mafai ona e faaaogaina anomea nei e sui ai se tasi o vaega pe faaopoopo se vaega faaopoopo i le pepa e tufa atu.

Meaalofa ma Le Fatufatua’i

O se tasi o faamoemoega o le Malamalama o Keriso o le, e “faapupula ai o outou malamalamaaga” (Mataupu Faavae ma Feagaiga 88:11). E mafai ona tupu lenei mea e ala i le musuia o oe i soo se galuega faamamaluina e te faia.

Sa aoao mai Peresitene Boyd K. Packer (1924–2015) o le Korama a Aposetolo e Toasefululua:

E mafai e le Agaga o Keriso ona faamalamalama le tagata fatufatu, le saienitisi, le valiata, le vanefaatagata, le fatupese, le tagata faafiafia, le tusiatatosi, le tusitala e faia ni mea sili, pe musuia foi mo le manuia ma le lelei o tagata uma.

O lea Agaga e mafai ona uunaia le faifaatoaga i lona fanua ma le faifaiva i luga o lona vaa. E mafai ona ia musuia le faiaoga i le potuaoga, le faifeautalai i le tuuina atu o lana lesona. E mafai ona ia musuia le tagata aoao o le e faalogo. Ma le mea e sili ona taua, e mafai ona musuia le tane ma le ava, ma le tama ma le tina. (Boyd K. Packer, “O Le Malamalama o Keriso,” Ensign, Ape. 2005, 10)

• O le a sou manatu e faapefea ona e iloaina le fesoasoani lea e oo mai e ala mai i le malamalama o le Faaola?

• O le a le galuega ua faaleleia e le Malamalama o Keriso pe mafai ona faaleleia i lou olaga?

O Le Agaga Paia o le folafolaga

Ina ia fesoasoani i tagata aoga ia malamalama i le uiga o le Mataupu Faavae ma Feagaiga 88:3–5, mafaufau e valaaulia tagata aoga e faitau ia fuaiupu ma vaavaai mo mea na tuuina mai e le Alii i nei Au Paia o e sa faapotopoto i le tatalo.

E mafai ona e faasoa atu le upusii lenei ia malamalama atili ai i le Agaga Paia o le folafolaga.

Na faamalamalama mai e Elder David A. Bednar o le Korama a Aposetolo e Toasefululua:

O le Agaga Paia o le Folafolaga o mana faamaonia lea o le Agaga Paia. Pe a faamaufaailogaina e le Agaga Paia o le Folafolaga, ua fusifusia se sauniga, se tautoga, po o se feagaiga i le lalolagi ma i le lagi. (Tagai MF&F 132:7.) O le mauaina o lenei “faailoga o le faamaoniga” mai le Agaga Paia o le taunuuga lea o le faamaoni, amiosao, ma le tumau mausali i le faamamaluina o feagaiga o le talalelei “i [le] aluga o taimi” (Mose 7:21). Peitai, o lenei faamauga e mafai ona faaleaogaina e ala i le amioletonu ma le solitulafono.

O le faamamaina ma le faamauina e ala i le Agaga Paia o le Folafolaga e aofia ai laasaga faaiu i le faagasologa o le toe fanaufouina. (David A. Bednar, “E Ao ina Toe Fanau Mai Outou,” Liahona, Me 2007, 22).