110-р хичээл: Сургаал ба Гэрээ 94–97

Сургаал ба Гэрээ 95

“Миний өргөөг барь”

Көртландын ариун сүмийн барилгын ажил

Есүс Христийн сайн мэдээний Сэргээлтийн нэг хэсэг болгон Тэрээр гэгээнтнүүдэд Огайогийн Көртландад ариун сүм барихыг зарлигласан. Хэдэн сарын дараа гэгээнтнүүдийг барилгын ажлыг ч эхлүүлээгүй байх үед Аврагч тэднийг хайраар сахилгажуулж, Түүний өргөөг барих зарлигаа дахин хэлжээ. Гэгээнтнүүд Көртландын ариун сүмийг барихаар дуулгавартай хичээнгүйлэн хөдөлмөрлөсөн. Энэ хичээл суралцагчдад Их Эзэний ариун сүмд Түүнийг шүтэн бишрэх хүслээ нэмэгдүүлэхэд тусална.

Боломжит суралцах үйл ажиллагаа

Ариун сүмийн сүсэг бишрэлийг эн тэргүүнд тавих

Их Эзэнийг Түүний ариун сүмд шүтэн бишрэхийн ач холбогдлын талаар бодоход нь суралцагчдад туслахын тулд та зохиомлоор өсвөр үеийн хүүхэд ариун сүмд орохоор төлөвлөж байсан хэдий ч орохгүй байхыг сонгож байгаа жишээ зохиоход нь тэдэнд тусалж болно. Ингэх нэг арга зам бол дараах зургийг үзүүлээд, хэн нэгний хэлж болох, ариун сүмд орохгүй байх шалтгааныг хоосон зайд нөхөхийг суралцагчдаас хүс. Бид яагаад заримдаа ариун сүмд орохыг эн тэргүүнд тавьж чаддаггүй талаар ярилц.

Та болон суралцагчид тань ариун сүмд орохыг эн тэргүүнд тавих боломжгүй, ариун сүмээс хэтэрхий хол амьдардаг бол хоосон зайг бөглөх үйл ажиллагааны дараах өөрийгөө үнэлэх хэсгээр хичээлээ эхлүүлж болно.

Би ариун сүмд орохыг хүссэн. Гэсэн хэдий ч би ороогүй.

Дараах хэмжүүрийг ашиглан, Их Эзэнийг ариун сүмд шүтэн бишрэхийг хэр чухал гэж мэдэрдгээ тунгаан бод.

1–5 оноо

Суралцагчдыг ариун сүмийн сүсэг бишрэлийг эн тэргүүнд тавьж болох арга замуудыг мэдэхээр хичээлийн турш хувийн илчлэлт эрэлхийлэхэд урамшуулан дэмж.

Орох боломжтой ариун сүм ойрхон байхгүй бол хэзээ нэгэн өдөр ариун сүмд ороход бэлтгэхийн ач холбогдлыг мэдрэхэд нь суралцагчдад туслах байдлаар хичээлээ өөрчилнө үү.

Их Эзэн хайрладаг хүмүүсээ цээрлүүлдэг

1832 оны 12-р сарын сүүлээр Аврагч хүмүүстээ ариун сүм буюу “Бурханы өргөө” (Сургаал ба Гэрээ 88:119) барихыг зарлиглажээ. 1833 оны 6-р сард Их Эзэнийг Сургаал ба Гэрээ 95-ыг илчлэх үед гэгээнтнүүд газар худалдаж авсан ч барилгын ажлыг хараахан эхлүүлээгүй байлаа.

• Сургаал ба Гэрээ 95:1–3-ыг уншаад, Их Эзэн хүмүүстээ юу гэж хэлснийг олж мэд.

• Ариун сүмийн талаар Их Эзэн ямар мэдрэмжтэй байдаг талаар эдгээр шүлэг юу зааж байна вэ?

• Их Эзэн Өөрийн хүмүүсийг хайрладаг гэдгээ хэрхэн харуулсан бэ?

Суралцагчдаас “гэсгээн цээрлүүлэх” гэдэг нь ямар утгатайг асуух нь тустай байж болох юм. Шаардлагатай бол “гэсгээн цээрлүүлэх” гэдэг нь зан байдлыг сайжруулах зорилготойгоор засаж залруулах гэсэн утгатайг тайлбарла.

Их Эзэн ариун сүм барихыг хүмүүстээ зарлиглав

Сургаал ба Гэрээ 95:4, 8–9-ийг уншаад, Их Эзэн Өөрийн ариун сүмийг барих зарлигийг гэгээнтнүүдэд өгсөн шалтгааныг олж мэд.

• Ариун сүм барих Их Эзэний зарлигийг дуулгавартай дагаснаар гэгээнтнүүд хэрхэн адислагдах байсан бэ?

• Тэнгэрлэг Эцэг тэдэнд юуг онцгойлон амласан бэ?

  Суралцагчдыг Их Эзэний Өөрийнх нь өргөөг барихыг гэгээнтнүүдэд зарлигласан шалтгааныг хуваалцах явцад Есүс Христ Тэнгэрлэг Эцэгийн хүчээр тэднийг хишиг хүртээх амлалтыг биелүүлэхийн тулд Өөрийн хүмүүст ариун сүм барихыг зарлигладаг гэх мэт зарчмыг тодорхойлоход нь тусал.

• Бурханы хүчээр хишиг хүртсэн гэдэг нь ямар утгатай гэж та бодож байна вэ?

  Шаардлагатай бол “хишиг хүртээх” гэдэг нь хэн нэгэнд бэлэг өгөх гэсэн утгатайг тайлбарла. Ариун сүмд хишиг хүртэх гэдэг нь сүнслэг хүчийн болон мэдлэгийн бэлгийг хүлээн авах гэсэн утгатай.

  Ярилцлага өрнүүлэхэд урамшуулан дэмждэг асуулт тавь. Дараах асуултуудыг ангид утга учиртай хэлэлцүүлэг өрнүүлэхэд ашиглаж болно. Багшийн хөгжүүлбэл зохих ур чадвар гарын авлагын “Суралцагчдад сурах үүргээ хүлээхэд нь тусал” гарчигтай сургалтаас үүнийг хэрхэн хийх илүү их дадлагыг үзнэ үү. “Сэтгэгдэл, асуулт бүрд хариулах хандлагаасаа зайлсхийж, ангийнхныг хариулахад урь” ур чадвараар дадлага хийх талаар бодож үз.

• Бурхан ариун сүмээрээ дамжуулан биднийг Өөрийн хүч чадлаар адислахын тулд сонгож болох өөр ямар ямар арга зам байна вэ?

• Бурханы ариун сүмээр дамжуулан Түүний хүчийг хүлээн авах нь гэр орон, хичээл сургуульд эсвэл амьдралын тань бусад талбарт хэрхэн нөлөөлнө гэж та бодож байна вэ?

“Үүнийг барих хүч та нарт байх болно”

Сургаал ба Гэрээ 95:11–14-ийг уншаад, гэгээнтнүүдийг ариун сүм барь гэсэн Их Эзэний зарлигийг дуулгавартай дагахад урам өгсөн үг, хэллэгийг хайж ол.

• Та нар юу олж мэдсэн бэ? Энэ нь хэрхэн урам өгсөн байж болох вэ?

Ангийнхныг жижиг бүлгүүдэд хуваарилна уу. Та бүлэг бүрд “Көртландын ариун сүмийг барихад гаргасан золиослол” гэсэн тараах материалын хуулбарыг өгч болно. Көртландын ариун сүмийг барьсан тухай тараах материалаас эсвэл Гэгээнтнүүд 1-р боть Үнэний жишиг номын х. 210–211, 221-ээс уншихад суралцагчдыг урь.

Суралцагчид Көртландын ариун сүмийг барихын тулд гэгээнтнүүдийн гаргасан зарим золиосыг тараах материал дээр эсвэл самбар дээр жагсаан бичиж болно. Дараа нь бид хэзээ нэгэн өдөр ариун сүмд орж, Их Эзэний ариун сүмд Түүнийг шүтэн бишрэхдээ бэлдэхийн тулд хийж чадах золиослолуудын тухай ярилцаж, тэдгээрийг жагсаан бичиж болно.

Көртландын ариун сүмийг барихад гаргасан золиослол

95-р хэсэг-ийг хүлээж авсны дараа тэр даруй Хайрум Смит ариун сүм баригдах талбайг цэвэрлэж эхэлжээ. Ариун сүм барих нь хүнд хэцүү сорилт байсан. Уг бүс нутагт ердөө 150 орчим Сүмийн гишүүн амьдарч байв. Тэдэнд тийм том барилгад хяналт тавих туршлага, ур чадвар байсангүй. Ариун сүмийн барилгын ажил нь Сүмийг төдийгүй гишүүдийг ч санхүүгийн дарамтад оруулах байлаа. Гэсэн хэдий ч тэд хөдөлмөрлөж, Их Эзэн тэдэнд “үүнийг барих хүч” (Сургаал ба Гэрээ 95:11) өгнө хэмээх амлалтаа биелүүлсэн. Канад гаралтай хөрвөгч, туршлагатай өрлөгчин Артимус Миллэт Көртланд руу нүүн ирж, барилгын ажлыг хариуцан ажиллав. Өөр нэг хөрвөгч Жон Таннер эгзэгтэй үед санхүүгийн тусламж үзүүлжээ. Тухайн бүс нутгийн эрэгтэйчүүд, эмэгтэйчүүд, хүүхдүүд ариун сүм барихад цаг хугацаа, хөдөлмөр, хөрөнгө мөнгөө хандивласан билээ.

• Көртландын ариун сүмийг барихад гэгээнтнүүд ямар ямар золиос гаргасан бэ? Эдгээр золиослолын юу нь танд гүн сэтгэгдэл төрүүлсэн бэ?

• Бид Их Эзэний өргөөнд орохын тулд юугаа золиосолж болох вэ?

Суралцагчдад хангалттай цаг гаргаж өгсний дараа, сурч мэдсэнээ хуваалцахад тэднийг урь. Ариун сүмд Их Эзэнийг шүтэн бишрэхийн тулд золиослол гаргахын ач холбогдлыг давтан хэлсэн ерөнхийлөгч Нэлсоны дараах мэдэгдлийг суралцагчдад хэзээ хуваалцах талаар залбирч, тунгаан бод.

Ерөнхийлөгч Рассэлл М.Нэлсон ариун сүмд шүтэн бишрэхийн тулд золиослол гаргаасай хэмээн биднийг адисалсан.

Ерөнхийлөгч Рассэлл М.Нэлсон

Хайрт ах, эгч нар аа, эдгээр ариун сүмийн барилга та нарын амьдралыг өөрчлөхгүй байж болох ч ариун сүмд өнгөрүүлсэн цаг мөч таныг өөрчлөх нь дамжиггүй. Иймээс би та бүхнийг ариун сүмд ороход илүү цаг зав гаргахын тулд хойш тавьж болох зүйлсээ олж тодорхойлоосой хэмээн адисалж байна. (Рассэлл М.Нэлсон, “Хамтдаа үргэлжлүүлцгээе,” 2018 оны 4-р сарын Ерөнхий чуулган, 148)

• Та болон таны таньдаг хүмүүс хэрхэн Их Эзэний ариун сүмд Түүнийг шүтэн бишрэхээр золиослол гаргасныхаа төлөө адислагдаж байсан бэ?

  Хэрэв танд Их Эзэний ариун сүмд Түүнийг шүтэн биширч байсан туршлага байгаа бол үүний үр дүнд Их Эзэн таныг адисалж байсан арга замуудыг хуваалцах талаар бодож үз. Танд болон суралцагчдын хэнд нь ч ариун сүмд орох боломж байгаагүй бол “Temples Are A Beacon” (2:50) видео нь золиослолыг үл харгалзан ариун сүмд Их Эзэнийг шүтэн бишрэх хүслийг мэдрэхэд нь суралцагчдад тусална.

  Судлах тэмдэглэл дээрээ дараах асуултад хариулан бичих нь суралцагчдад тустай байж магад. Дараа нь та хуваалцах хүсэлтэй цөөн суралцагчийг санаа бодлоо хуваалцахад урьж болно.

• Сургаал ба Гэрээ 95 дахь сургаал нь өнөө үед тантай хэрхэн холбоотой гэж та бодож байна вэ?

• Та Их Эзэний ариун сүмд Түүнийг шүтэн бишрэхийн ач холбогдлын тухай юу сурсан бэ?

Нэмэлт эх сурвалж

Гэгээнтнүүдэд ариун сүм барихтай холбоотой ямар бодол анх төрсөн бэ?

Бошиглогч Иосеф Смитийн ээж Люси Мак Смит дурсан ярихдаа: “Зөвлөл дуудагдаж, Иосеф ахлагч нэг бүрийг босоод үзэл бодлоо хуваалцахыг хүссэн ба тэдний дараа тэрээр өөрийн саналыг хэлсэн. … Зарим ах карказ [байшин] барих нь дээр гэж бодож байв. Бусад нь карказ [байшин] барих нь хэтэрхий өртөг өндөртэй гэж хэлж байсан ч … олонх нь дүнзэн байшин барих дүгнэлтэд хүрч, үүнийг барихын тулд юу хийхээ тооцоолсон байлаа. Иосеф босож, тэд өөрсдөдөө эсвээс хэн нэгэн хүнд биш харин Бурханд зориулан өргөө барих гэж байгааг сануулж ийн хэлэв. ‘Мөн ах нар аа, бид өөрсдийнхөө Бурханд зориулан гуалингаар өргөө барих гэж үү? Үгүй ээ, ах нар аа. Надад үүнээс илүү сайн төлөвлөгөө байна. Надад Их Эзэний Өөрийнх нь өгсөн Түүнд зориулан барих өргөөний төлөвлөгөө байна. Та нар үүгээр бидний тооцоолол болон Түүний санаа хоёрын ялгааг харах болно.’” Бошиглогч дараа нь “Көртландын Их Эзэний өргөөний бүрэн төлөвлөгөөг” танилцуулж, энэ нь ах нарыг “ихэд баярлуулав.” Цуглааны дараа тэд барилгын талбай руу алхаж, хашаа буулгаж, газраа цэвэрлэж, хана барихад зориулан шуудуу ухан хөдөлмөрлөж эхлэв. (“Lucy Mack Smith, History, 1844–1845,” book 14, pages 1–2, josephsmithpapers.org; үг үсэг, цэг таслал, том үсгийг шинэчилсэн)

Сургаал ба Гэрээ 95:4. Их Эзэний “ер бусын үйл” гэж юу вэ?

Есүс Христийн Хоёр дахь ирэлтийн өмнө Их Эзэнийг “Өөрийн үйлийг, ер бусын үйлийг үйлдэнэ. Тэр ажилаа, этгээд ажилаа хийнэ” (Исаиа 28:21) хэмээн Исаиа бошигложээ. Исаиагийн дурдсан “ер бусын үйл” нь Сургаал ба Гэрээ 95-д цэдэглэгдсэн илчлэлтэд батлан хэлсэн сайн мэдээний Сэргээлтийг хэлдэг (Сургаал ба Гэрээ 95:4; 101:95-ыг үзнэ үү). Энэ ажлын нэг хэсэг болгон, Их Эзэн “Сүнсээ бүх махан бодь дээр юүлнэ” хэмээн амласан (Сургаал ба Гэрээ 95:4-ийг мөн Иоел 2:28–32-ыг үзнэ үү). Тэнгэрлэг айлчлал, илчлэл, үзэгдэл, Сүнсний бэлгүүдэд болон бусад сүнслэг зүйлд итгэдэггүй хүмүүс сэргээгдсэн сайн мэдээг “ер бусын” гэж үзэж магад.

Их Эзэн Сургаал ба Гэрээ 95:14 дээрх амлалтаа хэрхэн биелүүлсэн бэ?

Көртланд дахь Тэргүүн зөвлөл

“Их Эзэн [Сургаал ба Гэрээ 95 дээр цэдэглэгдсэн уг илчлэлтийг хүлээн авснаас] хэд хоногийн дараа Өөрийн амлалтыг биелүүлж, Иосеф Смит болон Тэргүүн зөвлөл дэх түүний зөвлөхүүдэд нэгэн гайхамшигт үзэгдлийг өгчээ. Тэд эл үзэгдлээр ариун сүмийн нарийн тодорхой төлөвлөгөөг харсан байна. Тэргүүн зөвлөлийн хоёрдугаар зөвлөх Фредерик Г.Виллямс хожим нь ийн дурсжээ. ‘Иосеф [Смит] хоёр зөвлөх [Фредерик Г.] Виллямс, [Сидней] Ригдон нарт хүргэх үгийг Их Эзэнээс хүлээн аваад, Их Эзэний өмнө очиход Тэрбээр баригдах өргөөний төлөвлөгөө буюу загварыг тэдэнд үзүүлсэн юм. Биднийг өвдөг сөгдөж, Их Эзэнийг дуудтал сайхь барилга харагдах зайд гарч ирэв. Барилгыг би хамгийн түрүүнд олж харсан. Дараа нь бид бүгдээрээ түүнийг харлаа. Биднийг гадна талыг нь сайтар харсны дараа барилга бидний чанх орой дээр харагдаж байлаа’ [Frederick G. Williams, quoted by Truman O. Angell, in Truman Osborn Angell, Autobiography 1884, pp. 14–15, Church Archives, The Church of Jesus Christ of Latter-day Saints, Salt Lake City, Utah]” (Сүмийн ерөнхийлөгчдийн сургаалаас: Иосеф Смит [2007], 307).

Көртландын ариун сүмд амласан хишиг нь өнөөгийн ариун сүмийн хишигтэй адил байсан уу?

Сургаал ба Гэрээ 95-д цэдэглэгдсэн илчлэлтэд яригдсан хишиг нь хожмын ариун сүмд гүйцэтгэдэг хишиг хүртэх ёслолтой яг адил биш юм. Огайогийн Көртландад Сүмийн гишүүдийн хүлээн авсан хишиг нь өнөөгийн ариун сүмд гүйцэтгэдэг тэдгээр ёслолтой төстэй ч Их Эзэн Өөрийн Сүнсээ цутгаж, сүнслэг хүчээр тэдэнд хишиг хүртээсэн үеийн үйл явдлууд мөн үүнд багтсан байсан (Сургаал ба Гэрээ 109; 110 болон Church History Topics, “Endowment of Power,” Gospel Library-г үзнэ үү). Энэ эрин үе дэх анхны бүрэн хишиг хүртээлт нь 1842 оны 5-р сард Иллинойн Наувуд бошиглогч Иосеф Смитээр танилцуулагдсан юм. Үүнд Көртландад гүйцэтгэсэн зарим зүйлийг багтаасан боловч олон нэмэлт бүрэлдэхүүн хэсэгтэй байсан.

Би Көртландын ариун сүмийн барилгын ажлын талаар илүү дэлгэрэнгүй мэдээллийг хаанаас олж авч болох вэ?

• Church History Topics, Kirtland Temple-ийг үзнэ үү

• Lisa Olsen Tait and Brent Rogers, in “A House for Our God,” Revelations in Context (2016)-г үзнэ үү

Нэмэлт суралцах үйл ажиллагаа

Сургаал ба Гэрээ 95:1. “Өөрийн хайрладаг та нарыг би тэрчлэн гэсгээн цээрлүүлнэ”

Суралцагчдад Аврагч биднийг яагаад гэсгээн цээрлүүлдгийг ойлгосноор түүний зан чанарын талаар суралцахад нь тусалж болно. Гэсгээн цээрлүүлэх гэдгийн утгыг ярилцсаны дараа суралцагчид дараах шүлгүүдийг уншаад, Аврагч Өөрийн хүмүүсийг гэсгээн цээрлүүлдэг шалтгаануудыг олж мэд.

• Еврей 12:5–7, 9

• Moзая 23:21

• Сургаал ба Гэрээ 98:19–22

• Сургаал ба Гэрээ 105:2–6

Суралцагчдаас гэсгээн цээрлүүлэх үедээ ихэвчлэн хэрхэн хариу үзүүлдгээ тунгаан бодохыг хүс. Дараа нь та Их Эзэн биднийг гэсгээн цээрлүүлэх үед бид итгэлтэй хариу үзүүлж болох арга замуудыг хуваалцахыг тэднээс хүсэж болно.

Гэсгээн цээрлүүлэх талаар илүү их мэдээлэл авахын тулд ахлагч Д.Тодд Кристоффэрсоны “Би хайрладаг хүмүүсээ зэмлэдэг, сахилгажуулдаг юм” захиасыг 2011 оны 4-р сарын Ерөнхий чуулган сэтгүүлээс эсвэл ChurchofJesusChrist.org дээрх “The Will of God” (3:02) видеог үзнэ үү.

Сургаал ба Гэрээ 95:6. “Үд дундад харанхуйд алхах”

Энэ үйл ажиллагаа нь суралцагчдад Их Эзэний зарлигуудыг сахихын ач холбогдлыг ойлгоход туслах болно. Та суралцагчдыг “үд дундад харанхуйд алхах” гэдгийг юу гэсэн утгатай үг гэж бодож байгаагаа дүрслэхэд урьж болно. Тэгээд дараах асуултуудын дагуу ярилцахыг бод. Үүнд:

• Ариун сүм барих Их Эзэний зарлигийг үл тоомсорлох нь хэрхэн “үд дундад харанхуйд алхахтай” адил байж болох вэ?

• Хэрэв бид бусад зарлигийг үл тоомсорлохыг сонговол хэрхэн “үд дундад харанхуйд алхаж” болох вэ? (Сургаал ба Гэрээ 95:12-ыг мөн үзнэ үү).

Есүс Христийн нэр, цол

Энэхүү үйл ажиллагаа суралцагчдад Есүс Христийн нэр, цолд төвлөрснөөр Түүний тухай илүү ихийг мэдэхэд тусална. Суралцагчдыг Сургаал ба Гэрээ 95:7, 17-оос Аврагчийн нэрийг олоход урь. Суралцагчид эдгээр нэрээс Аврагчийн тухай олж мэдсэн зүйлээ хуваалцаж болно.

Шаардлагатай бол дараахыг тайлбарла. Үүнд:

7-р шүлэгт Их Эзэн “Сабаотын Их Эзэн” гэдэг нэрийн орчуулгыг өгдөг. Мөн энэ нь “олон түмэн,” “арми” гэсэн утгатай еврей үг юм. Олон түмэн гэдэгт тэнгэрийн тэнгэр элч нарын арми ордог (Bible Dictionary, “Sabaoth”-ыг үзнэ үү).

Иосеф Смитийн хэлснээр Аман хэмээх үг нь Адамын цэвэр хэлэнд Бурханы нэр мөн “Аманы Хүү” (17-р шүлэг) гэдэг нь Бурханы Хүү, Есүс Христийн нэр юм (The Joseph Smith Papers, Documents, Volume 2: July 1831–January 1833, ed. Matthew C. Godfrey and others [2013], 213–15-ыг үзнэ үү). Тэр мөн Аман нь “анхны хүн эсвэл анхны Бурхан” гэсэн утгатайг тайлбарласан (“Minutes, 5 April 1844,” 84-р хуудас, josephsmithpapers.org; Сургаал ба Гэрээ 78:20-ийг мөн үзнэ үү).

Алфус (Альфа) ба Омегус (Омега) нь грек цагаан толгойн эхний ба сүүлийн үсгүүд юм. Тэд “Христийн анхны ба сүүлчийн, эхлэл ба төгсгөл болох бүхнийг хамарсан мөн чанарыг” дүрсэлдэг (Bible Dictionary, “Alpha”).

тараах материал