111-р хичээл: Сургаал ба Гэрээ 94–97

Сургаал ба Гэрээ 97

Сион—Зүрх сэтгэлдээ цэвэр ариун

Ариун сүмийн зөвшөөрлийн бичиг барьсан охин

Сионы газар нутагт (Миссурийн Жаксон гүнлэг) гэгээнтнүүд ширүүн хавчлагад өртөж байхдаа тэдний төлөө Их Эзэний юу хүсэж буйг мэдэхийг хүсэж байв. Их Эзэн тэдэнд зүрх сэтгэлдээ цэвэр ариун байхын адислалуудын талаар заав. Энэ хичээл суралцагчдад зүрх сэтгэлдээ цэвэр ариун болоход тусална.

Боломжит суралцах үйл ажиллагаа

Цэвэр ус

Ус ашиглах үзүүлэнт хичээлээр хичээлийг эхлүүл. Ангийнханд цэвэр ус үзүүлж, цэвэр ус хэрэглэхийн адислал, бохир ус хэрэглэхийн үр дагаврыг ярилц. Та суралцагчдад цэвэр ус хэрэглэхийн адислалыг цэвэр ариун зүрх сэтгэлтэй байхын адислалтай харьцуулахад тусалж болно.

Шилэн аяганд ус хийх

• Цэвэр, цэнгэг устай байхын зарим ашиг тус юу вэ?

• Ус бохир үед цэвэрлэх ямар ямар арга байдаг вэ?

• Цэвэр усыг цэвэр ариун зүрх сэтгэлтэй хэрхэн харьцуулж болох вэ?

Сургаал ба Гэрээ 97-д Их Эзэн Өөрийн хүмүүсийг цэвэр ариун зүрх сэтгэлтэй байгаасай гэж хүсдэгээ илэрхийлсэн. Өнөөдөр судлах явцдаа та өөрийн зүрх сэтгэлийн байдлыг эргэцүүлэн бодоорой. Их Эзэнд зүрх сэтгэлийг тань цэвэршүүлэхийг зөвшөөрснөөр ирэх адислалуудыг ойлгохын тулд сүнслэг өдөөлт эрэлхийл.

Сион бол зүрх сэтгэлийн цэвэр ариун байдал

Тухайн үед Миссурийн Жаксон гүнлэгийг хэлдэг байсан “Сион” дахь ахлагчдын бүлэг тэдний талаарх Их Эзэний хүслийг мэдэхийг хүссэн тул хариулт хайн Иосеф Смитэд захидал бичжээ. Хариуд нь Их Эзэн уг сургуульд, Сүмд болон бүр Сионы газар нутаг дахь ариун сүмийн агуу төлөвлөгөөг танилцуулсан. Гэгээнтнүүдийг Их Эзэнийг хүлээн авч цэвэр ариун байхад нь урамшуулахын тулд Тэрээр тэднийг хоёр модтой буюу тас цавчигдах гэж буй мод, үр жимстэй мод хоёртой зүйрлэсэн (Сургаал ба Гэрээ 97:1–10-ыг үзнэ үү). Их Эзэн Енохын хүмүүсийг Сион (Мосе 7:18-ыг үзнэ үү) гэж нэрлэсэнтэй яг адил Их Эзэн хожмын үе дэх гэгээнтнүүдээ Сион хэмээн нэрлэхийг хүссэн. Тэрээр тэднийг Сион хэмээх газарт амьдрахыг бус Өөртэйгөө адил болоосой гэж тэднээс хүсэж байв.

Сургаал ба Гэрээ 97:21-ийг уншаад, Их Эзэн Сионыг хэрхэн дүрсэлснийг олж мэд.

Та Сион бол зүрх сэтгэлийн цэвэр ариун байдал гэж самбар дээр бичиж болно. Та суралцагчдыг энэ үнэнийг зааж буй үгийг судар дээрээ тэмдэглэхэд урьж болно.

Хэрэв суралцагчдад дараах асуултад хариулахад нь тусламж хэрэгтэй бол тэднийг Мозая 5:2 болон Алма 13:12-ыг уншихад чиглүүлж болно.

• Таны бодлоор зүрх сэтгэлээрээ цэвэр байх гэдэг нь юу гэсэн утгатай вэ?

Ерөнхийлөгч Рассэлл М.Нэлсон бид цэвэр ариун байхын тулд юу хийж болох талаар ингэж заасан.

Ерөнхийлөгч Рассэлл М.Нэлсон

Их Эзэн мөнхийн өсөлт хөгжлийн энэ шатанд биднээс төгс төгөлдөр болохыг шаарддаггүй. Гэхдээ Тэр биднээс урьд урьдынхаасаа илүү цэвэр ариун байхыг шаарддаг. Өдөр тутмын наманчлал нь цэвэр ариун байдалд хүрэх зам бөгөөд цэвэр ариун байдал нь хүч чадлыг авчирдаг. (Рассэлл М.Нэлсон, “Бид илүү сайн үйлдэж, илүү сайн байж чадна,” 2019 оны 4-р сарын Ерөнхий чуулган, 78)

• Энэ мэдэгдэл танд цэвэр ариун байдлын талаар юуг ойлгоход тусалж байна вэ?

Их Эзэний адислалуудыг ариун сүмд авах боломжтой

Сургаал ба Гэрээ 97:10–21-т Их Эзэн зүрх сэтгэлдээ цэвэр ариун байхад туслах зааврыг Өөрийн хүмүүст өгсөн. Сургаал ба Гэрээ 97:10–12-ыг уншаад, Их Эзэний хүмүүстээ өгсөн зааварчилгааг олж мэд.

• Их Эзэний ариун сүмүүд Түүний хүмүүст зүрх сэтгэлдээ цэвэр ариун байхад нь хэрхэн тусалдгийг ойлгоход тань туслах тэдгээр ариун сүмийн талаар та юуг мэдэх вэ?

Энэ нь судраас жагсаалт олох судар судлах ур чадвараар дадлага хийхэд суралцагчдад туслах сайхан боломж юм. Суралцагчид ариун сүм барьснаар ирэх адислалуудыг жагсаан бичиж болно.

Мөн та самбарт ариун сүмийн загварыг зурж болно. Суралцагчдыг үүнийг Их Эзэний адислалуудыг дүрсэлсэн үг, хэллэгээр дүүргэхэд урьж болох юм.

Сургаал ба Гэрээ 97:13–21-ийг уншаад, Түүний ариун сүмд шүтэн бишрэхтэй холбоотой Их Эзэний дүрсэлсэн адислалуудыг олж мэд.

• Эдгээр адислал биднийг зүрх сэтгэлдээ цэвэр ариун байхад хэрхэн урамшуулж болох вэ?

Суралцагчид Их Эзэний амласан адислалуудын нэг болох зүрх сэтгэлдээ цэвэр ариун тэд “Бурханыг харах болно” (16-р шүлэг) гэдгийг анзаарсан байж болно. Үүнийг Дуулал 24:3–5, Матай 5:8-тай холбоход суралцагчдыг урьж мөн эдгээр шүлэгт зүрх сэтгэлдээ цэвэр ариун байх, Бурханыг харах хоёрын хооронд ямар холбоо байгааг анзаарсныг асуу.

Тэргүүн зөвлөлийн ерөнхийлөгч Хэнри Б.Айринг Сургаал ба Гэрээ 97:15–17-г эш татаж, ариун сүмд Бурханыг харах гэдэг нь ямар утгатай тухай заасан.

Ерөнхийлөгч Хэнри Б.Айринг

Ерөнхийлөгч Рассэлл М.Нэлсон бид ариун сүмд Аврагчийг бидэнд танигдахгүй байхаа больтол “харж” чадна гэдгийг ойлгуулсан. Ерөнхийлөгч Нэлсон энэ талаар “Бид Түүнийг ойлгодог. Бид Түүний ажил мөн алдар сууг ухаарсан. Мөн бид Түүний зүйрлэшгүй амьдралын хязгааргүй нөлөөллийг мэдэрч эхэлдэг“ [Teachings of Russell M. Nelson (2018), 369] гэж хэлжээ.

Хэрэв та эсвэл би ариун сүмд хангалттай цэвэр бус байхдаа орвол, ариун сүмд хүлээн авч болох Аврагчийн талаарх сүнслэг сургаалыг Ариун Сүнсний хүчээр харах боломжгүй байх болно. (Хэнри Б.Айринг, “Би ариун сүм харах дуртай,” Лиахона, 2021 оны 5-р сар, 28)

• Энэ амлалт хэн нэгнийг зүрх сэтгэлдээ цэвэр ариун байхад хэрхэн түлхэц өгөх вэ?

• Их Эзэн яагаад биднээс ариун сүмд цэвэр ариун зүрх сэтгэлтэй орохыг шаарддаг гэж та бодож байна вэ?

Зүрх сэтгэлдээ цэвэр ариун болох

Та суралцагчдад ариун сүмийн зөвшөөрлийн бичгийн ярилцлага нь зүрх сэтгэлдээ цэвэр ариун байгаа эсэхээ үнэлэхэд бидэнд хэрхэн тусалж болох талаар ярилцахад тусалж болно. Магадгүй саяхан ариун сүмийн зөвшөөрлийн бичгээ хүлээн авахаар ярилцлагад орсон цөөн хэдэн суралцагч тэдгээр асуултад хариулахад тэдэнд ямар байсныг хуваалцаж болно. Та мөн дараах урилгыг өгч болно.

Өсвөр үеийнхний бат бөх байдлын төлөө: Сонголт хийхэд туслах хөтөч товхимлоос ариун сүмийн зөвшөөрлийн бичгийн асуултууд-ыг олох боломжтой. Ариун сүмийн зөвшөөрлийн бичгийн асуулт бүрийг тунгаан бодох цаг гарга. Таны хариултууд зүрх сэтгэлийг тань хэрхэн илэрхийлдэг талаар эргэцүүлэн бод.

Хичээл дээр эдгээр асуултын дагуу эргэцүүлэн бодох хугацааг суралцагчдад гаргаж өг. Суралцагчдыг асуулт бүрийг тунгаан бодсоны дараа та тэднийг зүрх сэтгэлээ цэвэршүүлэхэд нь туслах нэг юм уу хоёр зүйлийг сонгоход урамшуулж болно. Та суралцагчдаас тэмдэглэл дээрээ дараах асуултуудад хариулахыг хүс.

• Та Их Эзэнд зүрх сэтгэлийг тань цэвэршүүлэх боломж олгохын тулд юу хийх вэ?

• Таны зүрх сэтгэл цэвэр ариун байх нь яагаад Тэнгэрлэг Эцэг, Есүс Христ хоёрт хоёуланд нь чухал гэж та бодож байна вэ?

Нэмэлт эх сурвалж

Сургаал ба Гэрээ 97:11–12. Их Эзэн ариун сүм барихын тулд аравны нэгийг хүсэхдээ ямар утгаар хэлсэн бэ?

97-р хэсэг-т ашигласан аравны нэг нь өөрийн хүслээр өгч буй аливаа өргөл буюу хандивыг хэлсэн (The Joseph Smith Papers, Documents, Volume 3: February 1833–March 1834, 201, note 241-ийг үзнэ үү).

Ариун сүм барихаар дамжуулан Их Эзэн ямар адислал өгдөг вэ?

Ерөнхийлөгч Рассэлл М.Нэлсон ийн заасан.

Ерөнхийлөгч Рассэлл М.Нэлсон

Их Эзэний бидний төлөө хийж буй бүхнээс хараагаа салгахгүй байцгаая. Тэрбээр ариун сүмүүдээ улам хүртээмжтэй болгож байна. Тэрээр бидний ариун сүм барих явцыг улам хурдасгаж байна. Тэр Израилыг цуглуулахад туслах чадварыг маань улам нэмэгдүүлж байна. Тэр мөн бидний хүн нэг бүрийн сүнслэгээр цэвэршүүлэгдэх үйл явцыг улам хялбарчилж байна. Ариун сүмд илүү их цагийг өнгөрүүлэх нь юу юунаас илүүтэй амьдралыг тань адислах болно гэдгийг би амлаж байна. (Рассэлл М.Нэлсон, “Ариун сүмд анхаарлаа төвлөрүүл,” Лиахона, 2022 оны 11-р сар, 121)

Ариун сүмийн зөвшөөрлийн бичигтэй болоход тэнцэх нь намайг ариун сүмд хэрхэн бэлтгэх вэ?

Ерөнхийлөгч Рассэлл М.Нэлсон ийн тайлбарласан.

Ерөнхийлөгч Рассэлл М.Нэлсон

Их Эзэний өргөөнд орох зохистой байхын тулд хувь хүн сүнслэг байдлын хувьд сайтар бэлтгэгдсэн байх ёстой. Гэхдээ Их Эзэний тусламж байхад боломжгүй зүйл гэж үгүй. Зарим талаараа ариун сүм барих нь ариун сүмд орох хүмүүсийг бэлтгэхээс илүү амархан байдаг. Хувь хүний зохистой байдал бол Их Эзэнтэй илүү адил болж, үнэнч шударга иргэн байж, илүү сайн үлгэр дуурайл үзүүлэн, илүү цэвэр ариун болохын тулд оюун ухаан, зүрх сэтгэлээрээ бүрэн хөрвөгдсөн байхыг шаарддаг. (Рассэлл М.Нэлсон, “Хаалтын үг,” 2019 оны 10-р сарын Ерөнхий чуулган, 139)

Арван хоёр төлөөлөгчийн чуулгын ахлагч Квинтин Л.Күк ийн заасан.

Ахлагч Квинтин Л.Күк

Сүмийн гишүүдээсээ бид ариун сүмийн эрхийн бичиг авахуйц зохистой амьдраасай хэмээн чин сэтгэлээсээ хүсдэг. Ариун сүмийг хол, магадгүй хүрч чадахгүй зорилго гэж битгий хараарай. Ихэнх гишүүн маань бишоптойгоо хамт ажиллан, шаардлагыг хангахын төлөө тууштай байж, гэм нүглээ бүрэн наманчилснаар бүх зөв шударга жишигт харьцангуй богино хугацаанд хүрч чадна. (Квинтин Л.Күк, “Өөрийгөө ариун сүмд байгаагаар хар,” 2016 оны 4-р сарын Ерөнхий чуулган, 84)

Нэмэлт суралцах үйл ажиллагаа

Сургаал ба Гэрээ 97:1–2. Мэргэн ухаанд суралцахаар хичээнгүйлэн эрэлхийл

Мэргэн ухааныг болон үнэнийг олж мэдэх чадвараа нэмэгдүүлэх талаар суралцах нь суралцагчдад ашигтай байж болох юм. Сурах агуу их хүсэлтэй хүний онцлог чанар, зан авирын заримаас хуваалцахыг суралцагчдаас хүс.

Та Парлей П.Пратт бошиглогч Иосеф Смитийн Огайод байгуулсан сургуультай төстэй Сион дахь ахлагчдын сургуулийг тэргүүлэхээр дуудагдсан гэдгийг тайлбарлаж болно. Парлей, Иосеф хоёр нааш цааш захидал бичиж байсан ба Сургаал ба Гэрээ 97 тэдгээр захидлын нэгнийх нь хариу болж ирсэн юм. Суралцагчдыг 1–2-р шүлэг-ийг уншаад, Их Эзэн Сион дахь ахлагчдыг сайн суралцагчид гэж хэлэхдээ юу гэснийг олж мэдэхэд урь. Их Эзэн биднийг нигүүлсэнгүй бөгөөд өөрсдийгөө даруу болгож, суралцахыг хичээнгүйлэн эрэлхийлэх үед Тэрээр биднийг мэргэн ухаан болон үнэнээр адислах болно зэрэг үнэнийг эдгээр шүлгээс тодорхойлоход нь суралцагчдад тусал.

Та суралцагчдаас биднийг ийм маягаар суралцах үйл явцад хандах үед Их Эзэн яагаад мэргэн ухаан, үнэнээр адислахад бэлэн байдаг талаар олж мэдэн, ярилцахыг хүсэж болно.

Сургаал ба Гэрээ 97:7–9. Хоёр мод

Эхний мод

Хоёр дахь мод

Сургаал ба Гэрээ 97:7–9 нь Их Эзэнд хүлээн зөвшөөрөгдөхийн тулд юу хийж болох талаар олж мэдэхэд суралцагчдад тусална. Суралцагчдыг яагаад Их Эзэнээр хүлээн зөвшөөрөгдөхийг хүсэх байснаа тунгаан бодоход урь. Та суралцагчдыг уг шүлгүүд дэх хоёр модыг дүрслэх юм уу мод бүрийг энгийнээр зурахад урьж болно. Тэд сайн модон дээрх жимсийг 8-р шүлэгт дүрсэлсэн шинж чанаруудаар нэрлэж болно. Харууссан зүрх, гэмшсэн сэтгэлтэй байх, гэрээнүүдээ золиослолоор дагах гэдэг нь ямар утгатай талаар ярилц. Эдгээр зүйлийг хийх нь Их Эзэнд хүлээн зөвшөөрөгдөхөд нь тэдэнд хэрхэн тусалдаг талаар хуваалцахыг суралцагчдаас хүс.

Сургаал ба Гэрээ 97:18–28. “Сион—зүрх сэтгэлдээ цэвэр ариун” байх

Суралцагчдад Сион гэдэг нь юу болох, энэ нь тэдэнтэй хэрхэн холбогдохыг ойлгох нь тустай байж магадгүй. Сион гэдэг үгийг самбар дээр бичиж, Сионы тухай юу мэддэгээ хуваалцахыг суралцагчдаас хүс. Миссурийн Жаксон гүнлэгт амьдарч байсан хүмүүс амьдарч байсан газраа Сион гэж нэрлэдэг байсныг ойлгоход суралцагчдад тусал. Судруудаас уншсанчлан, Миссурид амьдарч байсан гэгээнтнүүд Сионыг байгуулахыг хүсжээ (Судруудын удирдамж, “Сион”-ыг үзнэ үү). Сургаал ба Гэрээ 97:21-ийг уншаад, Их Эзэн Сионыг хэрхэн тодорхойлсныг олж мэдэхэд суралцагчдад тусал (Мосе 7:18-ыг мөн үзнэ үү). Дараа нь та суралцагчдыг Сургаал ба Гэрээ 97:18–28-ыг судлаад, Миссурийн гэгээнтнүүд “зүрх сэтгэлдээ цэвэр ариун” (Сургаал ба Гэрээ 97:21) байхыг сонгох аваас Их Эзэн тэдэнд ямар ямар адислал өгөхийг хүссэн талаар олж мэд.