Leksiyon 111: Doktrina ug mga Pakigsaad 94–97

Doktrina ug mga Pakigsaad 97

Zion—Ang Putli og Kasingkasing

Samtang nakasinati og grabeng paglutos, gustong mahibaloan sa mga Santos sa yuta sa Zion (Jackson County, Missouri) kon unsay kabubut-on sa Ginoo para kanila. Gitudloan sila sa Ginoo bahin sa mga panalangin sa pagkaputli sa kasingkasing. Kini nga leksiyon makatabang sa mga estudyante nga mahimong putli ang ilang kasingkasing.

Mga Posibleng Kalihokan sa Pagkat-on

Dalisay nga tubig

Ikonsiderar ang pagsugod sa klase pinaagi sa paggamit og usa ka leksiyon gamit ang tubig. Ipakita sa klase ang dalisay nga tubig, ug hisgoti ang mga panalangin sa dalisay nga tubig ug ang mga resulta sa paggamit og hugaw nga tubig. Pwede nimong tabangan ang mga estudyante nga ikompara ang mga panalangin sa dalisay nga tubig ngadto sa mga panalangin sa pagbaton og putling kasingkasing.

• Unsay pipila ka kaayohan sa hinlo ug putli nga tubig?

• Kon hugaw ang tubig, unsa ang pipila ka paagi sa paglimpyo niini?

• Sa unsang paagi makompara ang dalisay nga tubig sa putling kasingkasing?

Sa Doktrina ug mga Pakigsaad 97, gipahayag sa Ginoo ang Iyang tinguha nga ang Iyang katawhan makabaton og putli nga kasingkasing. Samtang magtuon ka karon, hunahunaa ang kahimtang sa imong kasingkasing. Pangayog inspirasyon aron masabtan ang mga panalangin sa pagtugot sa Ginoo nga putlion ang imong kasingkasing.

Ang Zion mao ang putli og kasingkasing

Gustong mahibaloan sa grupo sa mga elder sa “Zion,” ang ngalan nga gigamit niadtong panahona para sa Jackson County, Missouri, kon unsay kabubut-on sa Ginoo para nila, busa misulat sila kang Joseph Smith aron pangitaon ang mga tubag. Agi og tubag, gihulagway sa Ginoo ang dagkong mga plano para sa eskwelahan, sa Simbahan, ug bisan sa templo sa yuta sa Zion. Aron dasigon ang mga Santos nga mahimong putli ug dawaton Siya, gikompara sila sa Ginoo sa duha ka kahoy: ang usa pagaputlon ug ang usa mabungahon (tan-awa sa Doktrina ug mga Pakigsaad 97:1–10). Sama nga ang Ginoo mitawag sa katawhan ni Enoc nga Zion (tan-awa sa Moises 7:18), gustong tawgon sa Ginoo ang Iyang mga Santos sa ulahing mga adlaw og Zion. Gusto niyang mahisama sila Niya, dili lang magpuyo sa usa ka lugar nga gitawag og Zion.

Basaha ang Doktrina ug mga Pakigsaad 97:21, nga mangita kon giunsa paghulagway sa Ginoo ang Zion.

Pwede nimong isulat ang Zion putli og kasingkasing sa pisara. Pwede nimong dapiton ang mga estudyante sa pagmarka sa mga pulong diha sa ilang mga kasulatan nga nagtudlo niini nga kamatuoran.

Kon nagkinahanglan og tabang ang mga estudyante sa pagtubag sa mosunod nga pangutana, pwede nimo silang giyahan sa Mosias 5:2 o Alma 13:12.

• Unsa kaha ang ipasabot alang nimo sa pagbaton og putli nga kasingkasing?

Si Presidente Russell M. Nelson mitudlo bahin sa kon unsay atong himoon aron mahimong putli:

Ang Ginoo wala magdahom og kahingpitan gikan kanato niining puntoha sa atong mahangtorong pag-uswag. Apan Siya nagdahom gayod nga kita mag-anam-anam og kaputli. Ang matag adalw nga paghinulsol mao ang agianan ngadto sa kaputli, ug ang kaputli magdala og gahom. (Russell M. Nelson, “Kita Makabuhat og Mas Maayo pa ug Mahimong mas Maayo,” Liahona, Mayo 2019, 68)

• Unsay ikatabang niini nga pamahayag aron masabtan nimo ang bahin sa pagkaputli?

Anaa sa mga templo ang mga panalangin sa Ginoo

Sa Doktrina ug mga Pakigsaad 97:10–21, gihatagan og instruksiyon sa Ginoo ang Iyang katawhan nga makatabang nila sa pagbaton og putli nga kasingkasing. Basaha ang Doktrina ug mga Pakigsaad 97:10–12, nga mangita kon unsa nga mga instruksiyon ang gihatag sa Ginoo para sa Iyang Katawhan.

• Unsay imong nahibaloan bahin sa mga templo sa Ginoo nga makatabang nimong masabtan nganong makatabang kini aron mahimong putli ang kasingkasing sa Iyang katawhan?

Mao tingali kini ang maayong higayon sa pagtabang sa mga estudyante sa pagpraktis sa kahanas sa pagtuon sa kasulatan aron mangitag mga listahan sa kasulatan. Pwedeng ilista sa mga estudyante ang mga panalangin nga moabot tungod sa pagtukod sa templo.

Pwede sab kang magdrowing og usa ka latid [outline] sa usa ka templo sa pisara. Dapita ang mga estudyante nga sulatan kini og mga pulong o hugpong sa mga pulong nga naghulagway sa mga panalangin sa Ginoo.

Basaha ang Doktrina ug mga Pakigsaad 97:13–21, nga mangita sa mga panalangin nga gihulagway sa Ginoo nga konektado sa pagsimba diha sa Iyang mga templo.

• Sa unsang paagi kini nga mga panalangin magdasig kanato sa pagbaton og putling kasingkasing?

Mahimong mabantayan sa mga estudyante nga usa sa mga panalangin nga gisaad sa Ginoo mao nga ang putli og kasingkasing “makakita sa Dios” (bersikulo 16). Pwede nimong dapiton ang mga estudyante nga ikonektar kini nga bersikulo sa Salmo 24:3–5 ug Mateo 5:8 ug pangutan-a ang mga estudyante kon unsang mga koneksiyon ang ilang nabantayan niini nga mga bersikulo tali sa pagbaton og putli nga kasingkasing ug pagkakita sa Dios.

Gikutlo ni Presidente Henry B. Eyring sa Unang Kapangulohan ang Doktrina ug mga Pakigsaad 97:15–17 ug gitudlo kon unsay ipasabot sa pagkakita sa Dios diha sa templo:

Si Presidente Russell M. Nelson miklaro alang kanato nga kita “makakita” sa Manluluwas diha sa templo sa pamaagi nga Siya ato nang mailhan. Si Presidente Nelson miingon niini: “Kita makasabot Kaniya. Atong masabtan ang Iyang buhat ug ang Iyang himaya. Ug kita magsugod sa pagbati sa walay kinutobang epekto sa Iyang dili hitupngan nga kinabuhi” [Teachings of Russell M. Nelson (2018), 369].

Kon ako o ikaw kinahanglang moadto sa templo nga kulang ang kaputli, dili nato makita, pinaagi sa gahom sa Espiritu Santo, ang espiritwal nga pagtulun-an bahin sa Manluluwas nga atong mahimong madawat sa templo. (Henry B. Eyring, “Gusto Ko nga Makita ang Templo,” Liahona, Mayo 2021, 30)

• Sa unsang paagi kini nga saad modasig sa usa ka tawo nga magbaton og putli nga kasingkasing?

• Ngano kahang gipangayo sa Ginoo nga putli og kasingkasing ang mosulod sa templo?

Pagbaton og putli nga kasingkasing

Pwede nimong tabangan ang mga estudyante nga hisgotan kon sa unsang paagi makatabang nato ang interbyu sa rekomend sa templo nga masusi kon putli kita og kasingkasing. Makapakigbahin tingali ang pipila ka estudyante nga bag-o lang giinterbyu aron makadawat og rekomend sa templo bahin sa kon unsa alang kanila ang pagtubag sa maong mga pangutana. Pwede usab nimong ihatag ang mosunod nga pagdapit:

Ang mga pangutana sa interbyu sa rekomend sa templo nga makita sa Alang sa Kalig-on sa mga Kabatan-onan: Usa ka Giya alang sa Paghimo og mga Pagpili. Paggahin og panahon sa pagpamalandong sa mga pangutana sa rekomend sa templo. Hunahunaa kon sa unsang paagi ang imong mga tubag nagpakita sa kahimtang sa imong kasingkasing.

Hatagig panahon ang mga estudyante sa pagpamalandong niini nga mga pangutana sa klase. Human makapamalandong ang mga estudyante sa matag pangutana, pwede nimo silang dasigon nga mopili og usa o duha ka butang nga ilang mahimo nga makatabang sa pagputli sa ilang kasingkasing. Pwede nimong hangyoon ang mga estudyante nga tubagon ang mosunod nga mga pangutana diha sa ilang mga journal:

• Unsay imong himoon aron tugotan ang Ginoo nga putlion ang imong kasingkasing?

• Sa imong hunahuna, nganong importante para sa Langitnong Amahan ug kang Jesukristo nga putli ang imong kasingkasing?

Dugang nga mga Kapanguhaan

Doktrina ug mga Pakigsaad 97:11–12. Unsay ipasabot sa Ginoo dihang mihangyo siya nga ang ikapulo para sa pagtukod sa templo?

Sama sa gigamit sa seksiyon 97, ang ikapulo nagpasabot sa bisan unsang kabubut-on nga halad o donasyon (tan-awa sa (tan-awa sa The Joseph Smith Papers, Documents, Volume 3: February 1833–March 1834, 201, note 241).

Unsang mga panalangin ang gihatag sa Ginoo pinaagi sa pagtukod sa mga templo?

Si Presidente Russell M. Nelson mitudlo:

Dili nato kalimtan kon unsa ang gibuhat sa Ginoo alang kanato karon. Iyang gibuhat ang Iyang mga templo nga mas dali nga maadtoan. Iyang gipaspasan ang gikusgon sa atong pagtukod og mga templo. Iyang gipalambo ang atong abilidad sa pagtabang sa pagpundok sa Israel. Iya usab nga gihimong mas sayon alang sa matag usa kanato nga mahimong malamboon sa espirituhanon nga paagi. Ako mosaad nga ang paggahin og mas dako nga oras diha sa templo mopanalangin sa inyong kinabuhi sa mga paagi nga walay laing makahimo. (Russell M. Nelson, “Magpunting sa Templo,” Liahona, Nob. 2022, 121)

Sa unsang paagi ang pagkahimong takos para sa rekomend sa templo mag-andam nako para sa templo?

Si Presidente Russell M. Nelson mipasabot:

Ang indibidwal nga katakos aron makasulod sa balay sa Ginoo nagkinahanglan og dakong indibidwal nga espirituhanong pagpangandam. Apan uban sa tabang sa Ginoo, walay imposible. Sa ubang paagi, mas sayon ang pagtukod og templo kay sa pag-ugmad og katawhan nga andam alang sa templo. Ang indibidwal nga katak[o]s nagkinahanglan og hingpit nga pagkakabig sa hunahuna ug kasingkasing aron mahimong mas sama sa Ginoo, mahimong matinuoron nga lumulupyo, mahimong mas maayo nga ehemplo, ug mahimong mas balaan nga tawo. (Russell M. Nelson, “Panapos nga Pakigpulong,” Liahona, Nob. 2019, 121–122)

Si Elder Quentin L. Cook sa Korum sa Napulog Duha ka Apostoles mitudlo:

Dako namong tinguha nga ang mga miyembro sa Simbahan magpakabuhi nga takos sa temple recommend. Palihog ayaw hunahunaa nga ang pagtambong sa templo lisud ug tingali dili makab-ot nga tumong. Naningkamot uban sa ilang bishop, kadaghanan sa mga miyembro makahimo sa tanang matarong nga mga gikinahanglan sulod sa mubo nga panahon kon sila may determinasyon nga mopasarang ug hingpit nga maghinulsol sa mga kalapasan. (Quentin L. Cook, “Hunahunaa ang Inyong Kaugalingon nga anaa sa Templo,” Liahona, Mayo 2016, 98)

Dugang nga mga Kalihokan sa Pagkat-on

Doktrina ug mga Pakigsaad 97:1–2. Makugihong mangita aron makabaton og kaalam

Makabenepisyo ang mga estudyante gikan sa pagkat-on kabahin sa pagdugang sa ilang katakos sa pagbaton og kaalam ug kamatuoran. Hangyoa ang mga estudyante sa pagpakigbahin og mga hiyas ug mga kinaiya sa usa ka tawo nga gusto kaayong mokat-on.

Pwede nimong ipasabot nga gitawag si Parley P. Pratt aron modumala sa tunghaan sa mga elder sa Zion parehas sa Tunghaan sa mga Propeta nga gitukod ni Joseph Smith didto sa Ohio. Nagsinulatay si Parley ug Joseph, ug miabot ang Doktrina ug mga Pakigsaad 97 agig tubag sa usa sa maong mga sulat. Dapita ang mga estudyante nga basahon ang mga bersikulo 1–2, nga mangita kon unsay gisulti sa Ginoo nga nakahimong maayong tigkat-on ang mga estudyante sa elder sa Zion. Tabangi ang mga estudyante nga mailhan ang kamatuoran gikan niini nga mga bersikulo, sama sa ang Ginoo maluluy-on ug mopanalangin nato og kaalam ug kamatuoran kon atong ipaubos ang atong kaugalingon ug makugihong mangita aron makakat-on.

Pwede nimong hangyoon ang mga estudyante nga hisgotan ug diskobrehon kon nganong gusto sa Ginoo nga panalanginan kita og kaalam ug kamatuoran dihang mokat-on kita sa ingon niini nga paagi.

Doktrina ug mga Pakigsaad 97:7–9. Duha ka kahoy

Ang Doktrina ug mga Pakigsaad 97:7–9 makatabang sa mga estudyante nga makakat-on kon unsay ilang mahimo aron dawaton sa Ginoo. Dapita ang mga estudyante sa pagpamalandong nganong gusto nilang dawaton sa Ginoo. Pwede nimong dapiton ang mga estudyante nga ihulagway ang duha ka kahoy sa mga bersikulo o mohimog simpleng drowing sa kada kahoy. Pwede nilang butangan ang bunga sa maayong kahoy og mga hiyas nga gihulagway sa bersikulo 8. Hisgoti kon unsay ipasabot sa pagbaton og masulob-on nga kasingkasing ug mahinulsolong espiritu ug sa pagtuman sa atong mga pakigsaad pinaagi sa sakripisyo. Hangyoa ang mga estudyante nga ipakigbahin kon sa unsang paagi ang pagbuhat niining mga butang makatabang aron dawaton kita sa Ginoo.

Doktrina ug mga Pakigsaad 97:18–28. “Zion—ang putli og kasingkasing”

Maayo tingali nga masabtan sa mga estudyante kon unsa ang Zion ug kon unsay koneksiyon niini kanila. Isulat sa pisara ang pulong Zion ug hangyoa ang mga estudyante nga ipakigbahin kon unsay ilang nahibaloan bahin sa Zion. Tabangi ang mga estudyante nga masabtan nga ang mga tawo nga nagpuyo sa Jackson County, Missouri, nagtawag sa ilang gipuy-an nga Zion. Gusto sa mga Santos nga nagpuyo sa Missouri nga tukoron ang Zion samtang gibasa nila ni sa mga kasulatan (tan-awa sa Topical Guide, “Zion, Sion”). Tabangi ang mga estudyante nga madiskobrehan kon giunsa paghulagway sa Ginoo ang Zion pinaagi sa pagbasa sa Doktrina ug mga Pakigsaad 97:21 (tan-awa usab sa Moises 7:18). Dayon pwede nimong dapiton ang mga estudyante nga tun-an ang Doktrina ug mga Pakigsaad 97:18–28, nga mangita kon unsang mga panalangin ang gustong ihatag sa Ginoo sa mga Santos sa Missouri, kon pilion nilang mahimong “ ang putli og kasingkasing” (Doktrina ug mga Pakigsaad 97:21).