Leksiyon 112: Doktrina ug mga Pakigsaad 94–97

Pagbansay sa Doktrinal nga Kahanas 7

Isag-ulo; Pag-angkon og Espirituhanong Kahibalo

Ang doktrinal nga kahanas makatabang sa mga estudyante sa pagtukod og pundasyon alang sa ilang mga kinabuhi diha ni Jesukristo ug sa Iyang ebanghelyo. Kini nga leksiyon maghatag sa mga estudyante og mga kahigayonan sa pagbansay nga mahanas sa mga tudling sa doktrinal nga kahanas ug sa doktrina nga gitudlo niini. Makatabang usab kini nila nga makakat-on ug magamit ang balaang mga baroganan para sa pag-angkon og espirituwal nga kahibalo.

Mga Posibleng Kalihokan sa Pagkat-on

Pagrebyo sa doktrinal nga kahanas: pagsag-ulo

Ikonsiderar ang pagsugod sa klase uban ang mubong kalihokan nga makatabang sa mga estudyante nga masabtan ang kaimportante sa pagsag-ulo og mga pakisayran sa doktrinal nga kahanas ug importanteng hugpong sa mga pulong sa kasulatan. Pananglitan, pwede kang magpakitag kwarta, pagkaon, journal, o uban pang butang nga tipigan tingali sa ubang tawo. Dapita ang mga estudyante sa paghisgot sa mosunod nga mga pangutana uban ang usa ka pares.

• Nganong kolektahon o hiposon man ni nga mga iaytem sa mga tawo?

• Unsa ang uban pang pipila ka butang nga kuhaon ug hiposon tingali sa mga tawo para magamit sa umaabot?

• Sa unsang paagi nga kini sama sa pagsag-ulo og mga pakisayran sa doktrinal nga kahanas ug importanteng hugpong sa mga pulong sa kasulatan?

Pwede nimong dapiton ang mga estudyante nga ipakigbahin ang ilang nahisgotan sa ilang mga kauban. Kompletohon ang mosunod isip usa ka klase.

Basaha ang Doktrina ug mga Pakigsaad 84:85. Pangitaa ang saad nga gihimo sa Ginoo kon tipigan o ibahandi nato sa atong mga hunahuna ang Iyang pulong.

• Unsa ang gipasabot sa “mga pulong sa kinabuhi”?

• Unsa ang pipila ka paagi nga nagbahandi ka og pulong sa Dios sa imong hunahuna?

• Sa unsang paagi kini nga mga paningkamot nakatabang nimo nga mabati ang gugma o gahom sa Dios sa imong kinabuhi?

  Dapita ang mga estudyante nga hunahunaon ang mga panahon sa ilang kinabuhi nga misantop sa ilang hunahuna ang usa ka tudling sa doktrinal nga kahanas o laing kasulatan dihang gikinahanglan nila kini, sama pananglitan dihang mag-atubang og lisod nga desisyon o nangitag tubag sa usa ka pangutana. Ikonsiderar ang pagpakigbahin og mga ehemplo kon sa unsang paagi nakapanalangin sa imong kinabuhi ang pagsag-ulo og mga kasulatan.

• Giunsa ka pagpanalangin sa Ginoo pinaagi sa imong pagpahinumdom sa usa ka kasulatan sa oras nga gikinahanglan nimo kini?

  Hatagi og panahon ang mga estudyante nga ibahandi ang pulong sa Dios sa ilang mga hunahuna pinaagi sa pagsag-ulo og mga pakisayran sa doktrinal nga kahanas ug sa importanteng hugpong sa mga pulong sa kasulatan. Ang mosunod maoy usa ka paagi sa pagbuhat niini. (Ang dugang nga mga ideya sa pagsag-ulo makita sa apendiks sa kataposang bahin niini nga manwal, ubos sa “Mga Kalihokan sa Pagrebyo sa Doktrinal nga Kahanas.” Kinahanglang dili molapas sa 10 o 15 minutos ang kalihokan nga imong pilion aron naa pay panahon ang mga estudyante nga magpraktis sa paggamit sa mga baroganan sa pagkuhag espirituwal nga kahibalo sa ulahing bahin niini nga leksiyon.)

  Ikonsiderar ang pag-andam og daghang gagmayng papel o kard para sa mga estudyante ug ihatag nila ang mosunod nga instruksiyon.

• Pagpili og tulo ngadto sa lima ka tudling sa doktrinal nga kahanas nga para nimo importanteng “ibahandi” o sag-ulohon.

• Pamalandongi kon nganong makatabang nimo ang pagbahandi niini nga mga pakisayran sa pagsunod kang Jesukristo ug sa Iyang mga pagtulun-an.

• Paghimog flash card para sa matag tudling nga imong gipili pinaagi sa pagsulat sa pakisayran sa atubangan sa papel ug sa imortanteng hugpong sa mga pulong sa kasulatan sa likod.

• Sag-uloha ang nakasulat sa duha ka pahina sa matag flash card.

Human ang pipila ka minuto, pwedeng makigbaylo og flash card sa usa ka klasmeyt ug praktison sa pagsag-ulo ang dugang mga pakisayran sa doktrinal nga kahanas. Pwede usab nilang pangutan-on ang usag usa gamit ang mga flash card nga ilang gihimo.

Pagkat-on ug paggamit sa mga baroganan sa pag-angkon og espirituwal nga kahibalo

Ang nahibiling bahin sa leksiyon nakatutok sa pagtabang sa estudyante nga irebyo ang mga baroganan sa pag-angkon og espirituwal nga kahibalo ug pagpraktis sa paggamit niini gamit ang usa ka senaryo bahin sa Pulong sa Kaalam.

Ikonsiderar ang paghatag sa mga estudyante sa mosunod nga senaryo. Pwede nimong dapiton ang mga estudyante nga motabang sa pagpahaom sa senaryo aron mas konektado ni sa mga kahimtang nga ila tingaling maatubang bahin sa Pulong sa Kaalam.

Pipila sa imong mga higala nga dili miyembro sa Simbahan ang nangutana kon nganong dili ka moinom og kape, tsaa, o makahubog nga ilimnon. Human nimo mapasabot sa makadiyot unsay imong nahibaloan bahin sa Pulong sa Kaalam, moingon ang imong mga higala nga estrikto ra kaayo ni ug mangutana, “Nganong naay ganahan nga magkinabuhi og ingon ana?”

• Unsang baroganan sa pag-angkon og espirituwal nga kahibalo ang para nimo labing makatabang nga ikonsiderar samtang imong tubagon ang imong mga higala? Ngano?

Samtang tubagon sa mga estudyante ang nag-unang pangutana, masukod tingali nimo kon unsa ka dako ang ilang pagsabot sa mga baroganan sa pag-angkon og espirituwal nga kahibalo. Dayon pwede magamit nimo ang mosunod nga kalihokan o ipahaom kon gikinahanglan.

Ikonsiderar ang pagbutang sa mga estudyante sa gagmay nga mga grupo. Dapita ang matag grupo nga mopili og usa ka baroganan sa pag-angkon og espirituwal nga kahibalo nga ilang tun-an. Dapita ang mga estudyante nga tun-an ang ilang gipili nga baroganan gikan sa mga parapo 5–12 sa Mahinungdanon nga Dokumento sa Doktrinal nga Kahanas. Samtang nagtuon sila, dapita ang matag grupo nga magsulat og usa o duha ka pangutana nga konektado sa ilang napili nga baroganan. Kining mga pangutanaha kinahanglang makatabang nila sa pagtubag sa ilang mga higala sa nag-unang senaryo. Pwede nimong gamiton ang mosunod nga mga pangutana isip mga ehemplo o kon nanginahanglan og tabang ang mga estudyante.

Lihok uban ang hugot nga pagtuo

• Sa unsang paagi ang imong pasalig sa pagtuman sa Pulong sa Kaalam (tan-awa sa Doktrina ug mga Pakigsaad 89) maoy usa ka buhat sa hugot nga pagtuo kang Jesukristo?

• Unsay imong nahibaloan bahin kang Jesukristo ug sa Iyang ebanghelyo nga makatabang nimo sa pagtuman sa Pulong sa Kaalam bisan paman og wala nimo masabti sa hingpit kini?

Susihon ang mga konsepto ug mga pangutana inubanan sa mahangtorong panglantaw

• Sa unsang paagi ang pagsabot sa plano sa Dios sa kaluwasan makaimpluwensiya sa imong panglantaw sa Pulong sa Kaalam?

• Unsa ang pipila sa dali makab-ot nga mga benepisyo ang gituohan tingali sa mga tawo nga makab-ot nila kon dili nila sundon ang Pulong sa Kaalam? Sa unsang paagi makompara kini nga mga benepisyo sa mga panalangin nga dugay makab-ot nga gisaad sa Manluluwas samtang atong tumanon ang Pulong sa Kaalam? (tan-awa sa Doktrina ug mga Pakigsaad 89:18–21).

Tinguhaa ang dugang nga panabot pinaagi sa balaanong gitudlo nga mga tinubdan

• Unsa ang pipila ka butang nga imong nakat-onan samtang imong gitun-an ang Doktrina ug mga Pakigsaad 89 nga makatabang tingali sa imong pagtubag sa imong mga higala?

• Unsa ang pipila pa ka tudling sa doktrinal nga kahanas ang tingali makatabang?

• Sa unsang paagi ang gitudlo sa Dios nga mga tinubdan sama sa Espiritu Santo, imong mga ginikanan, o mga lider sa Simbahan makaimpluwensiya sa imong tinguha nga tumanon ang Pulong sa Kaalam?

Kon mahuman na ang mga estudyante, dapita sila nga makigbaylo og mga pangutana sa ubang grupo. Hatagi silag panahon nga hisgotan sa ilang grupo kon unsaon nila pagtubag ang mga pangutana sa uban. Dayon, pwedeng idrama-drama sa mga estudyante kon unsaon nila pagtubag sa sitwasyon gamit ang ilang mga tubag.

Human sa kalihokan, dapita ang mga estudyante sa pagpakigbahin sa mga panabot nga ilang nakuha gikan sa mga pangutana o tubag sa ilang mga sakop sa grupo. Kon aduna pay panahon, pwede usab nimong dapiton ang mga estudyante nga magpakigbahin og mga kasinatian nga anaa sila sa pagtudlo o pagpamatuod sa Pulong sa Kaalam ngadto sa uban.

Dugang nga mga Kalihokan sa Pagkat-on

Usa ka ehemplo sa kasulatan ang misantop sa hunahuna

Pwedeng ipakigbahin ang mosunod nga kasinatian isip ehemplo sa usa ka tawo nga gidasig sa Ginoo pinaagi sa pagpadala sa Iyang mga pulong ngadto sa ilang hunahuna.

Nag-alagad si Elder B. H. Roberts isip chaplain sa Kasundalohan sa Estados Unidos panahon sa Unang Gubat sa Kalibotan. Human mapirmahi ang kasabotan sa kalinaw aron taposon ang giyera, usa ka serbisyo sa Pagpasalamat [Thanksgiving] ang gipahigayon. Si Elder Roberts kalit nga gitawag aron basahon ang Salmo sa Pagpasalamat [Thanksgiving]. Kini nga salmo wala pa gyod sukad madungog ni Elder Roberts; pero, milihok siya uban ang hugot nga pagtuo ug miduol sa podyum. Samtang naglakaw, nakadungog siyag tingong nga nag-ingon, “Ang ika-100 nga Salmo.” Gibasa ni Elder Roberts ang Salmo 100 ug mibalik sa iyang lingkoranan. Wala gyod siya tan-awa sa ubang mga chaplain. Nasabtan ni Elder Roberts nga gusto nila siyang pakaulawan ug ang Simbahan. Pagbalik niya sa iyang tolda niadtong gabhiona, iyang nadiskorbrehan nga ang ika-100 nga Salmo ang pinakahaom nga salmo nga iyang ikapakigbahin aron saulogon ang okasyon. Nahibalo siya nga gipanalanginan siya sa Ginoo niining panahon sa panginahanglan (“Inspiration Key to Thanksgiving Psalm,” Church News, Nov. 22, 1975, 12).

Pagtabang sa uban sa pag-angkon og espirituwal nga kahibalo

Dapita ang mga estudyante nga handurawon ang ilang mga higala nga adunay sinsero nga tinguha aron makasabot kon nganong mipili ang mga estudyante nga motuman sa Pulong sa Kaalam. Isip usa ka klase, basaha ang mga parapo 14–17 diha sa Mahinungdanon nga Dokumento sa Doktrinal nga Kahanas, ug pangitaa ang mga baroganan nga makatabang sa ilang mga higala nga makaangkon og esprituwal nga kahibalo para sa ilang kaugalingon. Ikonsiderar ang pagsukna og mga pangutana human sa matag parapo aron matabangan ang mga estudyante sa pagpraktis sa paggamit sa ilang nabasa. Naa sa ubos ang pipila ka mga ehemplo:

• Unsang mga pangutana ang pwede nimong isukna aron mas masabtan ang katuyoan sa imong mga higala sa pagpangutana bahin sa Pulong sa Kaalam?

• Unsang mga imbitasyon ang pwede nimong ihatag nila aron molihok sila uban ang hugot nga pagtuo ug mas masabtan nila mismo ang imong mga gituohan?

• Unsang mga kapanguhaan ang pwede nimong pangitaon uban sa imong mga higala? Unsa nga mga pakigpulong sa kinatibuk-ang komperensiya ang gusto nimong ipabasa, ipatan-aw, o ipapaminaw?

Alternatibo nga senaryo

Aron matabangan ang mga estudyante nga magpraktis gamit ang mga baroganan sa pag-angkon og espirituwal nga kahibalo uban ang tudling sa doktrinal nga kahanas sa Doktrina ug mga Pakigsaad 88:118, ikonsiderar ang paghatag og senaryo nga konektado sa bili sa edukasyon, sama sa mosunod:

Ang mga ginikanan ni Brock mipadayon sa pagsulti kon unsa ka importante nga makaeskwela siya. Pero, naglisod siya sa eskwelahan ug wala mobati nga angayng sakripisyohan sa iyang panahon ug paningkamot.

Pwede nimong dapiton ang mga estudyante nga idrama-drama kon unsaon nila pagtabang ang ilang amigo nga si Brock gamit ang mga baroganan sa pag-angkon og espirituwal nga kahibalo.