Leksiyon 110: Doktrina ug mga Pakigsaad 94–97

Doktrina ug mga Pakigsaad 95

“Ang Pagtukod sa Akong Balay”

Isip kabahin sa Pagpahiuli sa Iyang ebanghelyo, gisugo ni Jesukristo ang mga Santos sa pagtukod og templo sa Kirtland, Ohio. Pila ka bulan ang milabay, dihang wala pa masugdi sa mga Santos ang pagtukod, mahigugmaon silang gipanton sa Manluluwas ug gisulti pag-usab ang Iyang sugo nga tukoron ang Iyang balay. Sa pagkamasulondon, makugihong naghago ang mga Santos sa pagtukod sa Templo sa Kirtland. Kini nga leksiyon motabang sa mga estudyante nga mobati og dakong tinguha sa pagsimba sa Ginoo diha sa Iyang templo.

Mga Posibleng Kalihokan sa Pagkat-on

Paghimo sa pagsimba diha sa templo usa ka prayoridad

Aron matabangan ang mga estudyante nga maghunahuna sa kaimportante sa pagsimba sa Ginoo sa diha sa Iyang mga templo, mahimong tabangan nimo ang mga estudyante nga makahimo sa usa ka senaryo sa usa ka hinimo-himo nga istorya bahin sa usa ka batan-on nga nagplanong motambong sa templo apan mipili nga dili nalang. Usa ka paagi nga mahimo nimo kini mao ang pagpakita sa mosunod nga panultol ug dapita ang mga estudyante nga butangan ang blangko sa posibleng mga rason kon nganong dili motambong sa templo ang usa ka tawo. Hisgoti kon nganong dili nato maprayoridad ang pagtambong sa templo usahay.

Kon ikaw o ang imong mga estudyante nagpuyo nga layo sa templo aron sa paghatag og prayoridad sa pagtambong sa templo, pwede nimong sugdan ang leksiyon gamit ang pagsukod sa kaugalingon nga nagsunod sa kalihokan nga sulatan ang blagko.

Gusto kong motambong sa templo. Pero, tungod sa , wala ko makaadto.

Gamita ang mosunod nga sukdanan aron pamalandongan kon unsa ka importante para nimo ang pagsimba sa Ginoo diha sa templo.

Dapita ang mga estudyante nga magtinguha sa personal nga pagpadayag atol sa panahon sa leksiyon aron makakita silag mga paagi nga mahatagan og prayoridad ang pagsimba sa templo.

Kon walay templo sa duol sa imong mga estudyante, ipahaom ang leksiyon aron matabangan ang mga estudyante nga mobati sa kaimportante sa pagpangandam nga motambong sa templo sa umaabot.

Gipanton sa Ginoo kadtong Iyang gihigugma

Sa ulahing bahin sa Disyembre 1832, gimandoan sa Ginoo ang Iyang katawhan nga tukoron ang templo, o “balay sa Dios” (Doktrina ug mga Pakigsaad 88:119). Dihang gipadayag sa Ginoo ang Doktrina ug mga Pakigsaad 95 niadtong Hunyo 1833, nakapalit na og yuta ang mga Santos, pero wala pa masugdi ang pagtukod.

• Basaha ang Doktrina ug mga Pakigsaad 95:1–3, nga mangita kon unsay gisulti sa Ginoo sa Iyang katawhan.

• Unsay gitudlo niini nga mga bersikulo bahin sa mga pagbati sa Ginoo para sa templo?

• Giunsa pagpakita sa Ginoo ang Iyang gugma para sa Iyang katawhan?

Maayo tingaling pangutan-on ang mga estudyante kon nahibalo sila sa kahulogan sa “pagpanton”. Kon kinahanglan, ipatin-aw nga ang “pagpanton” nagpasabot nga pagkorehir uban sa tumong nga mapauswag ang kinaiya.

Gisugo sa Ginoo ang Iyang katawhan sa pagtukod og templo

Basaha ang Doktrina ug mga Pakigsaad 95:4, 8–9, nga mangita og mga rason nganong gisugo sa Ginoo ang mga Santos nga tukoron ang Iyang balay.

• Sa unsang paagi nga ang mga Santos mapanalanginan pinaagi sa pagsunod sa sugo sa Ginoo nga magtukod og templo?

• Unsa ang pihong gisaad sa Langitnong Amahan kanila?

  Samtang ipakigbahin sa mga estudyante ang mga rason kon nganong gisugo sa Ginoo ang mga Santos sa pagtukod sa Iyang balay, tabangi silang mailhan ang baroganan nga sama sa gisugo ni Jesukristo ang Iyang katawhan nga magtukod ug mga templo aron tumanon ang gisaad sa Langitnong Amahan nga tugahan sila og gahom.

• Unsa kahay ipasabot sa pagkanatugahan og gahom sa Dios?

  Kon kinahanglan, ipasabot nga ang “pagtuga” nagpasabot sa paghatag og regalo sa usa ka tawo. Ang pagtuga nga himoon sa templo nagpasabot sa pagkadawat og espirituwal nga kahibalo ug gahom.

  Pagsukna og mga pangutana nga nagdasig og panaghisgot: Pwedeng gamiton ang mosunod nga mga pangutana aron makabaton ug makahuloganong panaghisgot ang klase. Para sa dugang nga pagpraktis kon unsaon kini paghimo, tan-awa ang pagbansay nga nag-ulohang “Tabangi ang mga Tigkat-on nga Mag-ako og Responsibilidad alang sa Ilang Pagkat-on,” makita sa Pagpalambo sa mga Kahanas sa Magtutudlo. Ikonsiderar ang pagpraktis sakahanas nga, “Batoki ang kalagmitan nga motubag sa matag komento ug pangutana ug dapita ang klase nga motubag.”.

• Unsa ang pipila ka paagi nga mopili ang Ginoo sa pagpanalangin kanato sa Iyang gahom pinaagi sa Iyang mga templo?

• Sa imong hunahuna sa unsang paagi ang pagdawat sa gahom sa Ginoo pinaagi sa iyang templo makaapekto diha kanimo sa panimalay, sa eskwelahan, o uban pang mga aspeto sa imong kinabuhi?

“Kamo makabaton sa gahom sa pagtukod niini”

Basaha ang Doktrina ug mga Pakigsaad 95:11-14, magita sa mga pulong o hugpong sa mga pulong nga posibleng nakadasig sa mga Santos nga sundon ang sugo sa Ginoo nga magtukod og templo.

• Unsay imong nakaplagan? Ngano kahang nakadasig man kini kanila?

Ikonsiderar ang pagbahin sa klase ngadto sa ginagmayng mga grupo. Pwede nimong hatagan og kopya ang matag grupo sa handout nga “Mga Gisakripisyo aron Matukod ang Templo sa Kirtland.” Dapita ang mga estudyante nga basahon ang bahin sa pagtukod sa Templo sa Kirtland diha sa handout o sa Mga Santos, vol. 1, Ang Sumbanan sa Kamatuoran, 239–41, 251-252.

Pwedeng ilista sa mga estudyante diha sa handout o sa pisara ang pipila sa mga sakripisyo nga gihimo sa mga Santos para sa Templo sa Kirtland. Dayon pwede nilang hisgotan ug ilista ang mga sakripisyo nga mahimo natong mabuhat aron makatambong sa templo o makapangandam sa pagsimba sa Ginoo diha sa Iyang mga templo sa atong panahon.

Mga Sakeripisyo nga Gihimo aron Matukod ang Templo sa Kirtland

Human dayon madawat ang seksiyon 95, gisugdan ni Hyrum Smith ang paglimpyo sa luna diin ang templo itukod. Ang pagtukod og templo usa ka malisod nga hagit. Aduna lay 150 ka miyembro sa Simbahan diha sa dapit. Wala silay kasinatian o kahanas sa pagdumala sa ingon niadto ka dako nga bilding. Ang pagtukod sa templo magbutang usab og pinansiyal nga kalisod sa Simbahan ug sa mgha miyembro. Bisan pa niana, mitrabaho sila, ug gituman sa Ginoo ang Iyang saad nga hatagan silag “gahom sa pagtukod niini” (Doktrina ug mga Pakigsaad 95:11). Si Artemus Millet, usa ka kinabig nga taga-Canada ug hanas nga mason, ang mibalhin sa Kirtland ug gidumala ang pagtukod. Lain pang kinabig, si John Tanner, mihatag sa pinansyal nga tabang sa panahon sa kalisdanan. Mga lalaki, mga babaye, ug mga bata sa lugar ang mihatag sa ilang panahon, kahago, ug kapanguhaan aron matukod ang templo. (Tan-awa ang Lisa Olsen Tait and Brent Rogers, “A House for Our God,” sa Konteksto sa mga Pagpadayag [2016], 167; Mga Santos, vol. 1, Ang Sumbanan sa Kamatuoran, 210–11.)

• Unsa ang pipila ka mga sakripisyo ang gibuhat sa mga Santos aron matukod ang Templo sa Kirtland? Unsay nakapatandog nimo bahin niini nga mga sakripisyo?

• Unsa ang pipila ka sakripisyo nga atong mabuhat aron makatambong sa balay sa Ginoo?

Human sa igong panahon, dapita ang mga estudyante sa pagpakigbahin sa ilang nakat-onan. Mainampoong ikonsiderar kon kanus-a nimo maayong ipakigbahin sa mga estudyante ang mosunod nga pamahayag gikan kang Presidente Nelson nga naghatag og gibug-aton sa kaimportante sa pagsakripisyo aron makasimba sa Ginoo diha sa templo.

Gipanalanginan ta ni Presidente Russell M. Nelson aron makahimo og sakripisyo sa pagsimba diha sa templo:

Pinalanggang mga kaigsoonan, ang pagtukod niining mga templo mahimong dili makausab sa inyong mga kinabuhi, apan ang inyong panahon sulod sa templo seguradong makahimo. Niana nga diwa, Ako mopanalangin kaninyo sa pagtino sa mga butang nga inyong ipadaplin aron kamo makagahin og dugang panahon sa templo. (Russell M. Nelson, “Magpadayon Tang Tanan,” Liahona, Mayo 2018, 119)

• Sa unsang paagi ikaw o ang uban nga imong kaila napanalanginan pinaagi sa paghimo og mga sakripisyo aron makasimba sa Ginoo diha sa Iyang templo?

  Kon naa kay mga kasinatian sa pagsimba sa Ginoo diha sa Iyang templo, ikonsiderar ang pagpakigbahin sa mga panalangin sa Ginoo nga imong nadawat isip resulta. Kon ikaw o ang imong mga estudyante walay kahigayonan sa pagtambong sa templo, makatabang ang bidyo nga “Temples Are A Beacon” (2:50) makatabang sa mga estudyante nga mabati ang tinguha nga simbahon ang Ginoo diha sa templo, bisag unsa pay angayng isakripisyo.

  Makabenepisyo tingali ang mga estudyante kon ilang isulat ang ilang mga tubag sa mosunod nga mga pangutana diha sa ilang mga journal sa pagtuon. Pwede nimong dapiton ang andam nga mga estudyante nga ipakigbahin ang ilang mga gihunahuna.

• Unsaon kaha nimo paggamit ang mga gitudlo sa Doktrina ug mga Pakigsaad 95 karon?

• Unsay imong nakat-onan bahin sa kaimportante sa pagsimba sa Ginoo diha sa Iyang mga templo?

Dugang nga mga Kapanguhaan

Unsay pipila sa unang mga gihunahuna sa mga Santos sa wala pa gisugdan pagtukod ang templo?

Si Lucy Mack Smith, inahan ni Propeta Joseph Smith, mihinumdom: “Usa ka konseho ang gitawag ug si Joseph mihangyo sa kaigsoonan, sa matag usa, sa pagbarug ug mopahayag sa iyang hunahuna, ug inigkahuman ihatag niya ang iyang opinyon. … Ang uban naghunahuna nga mas maayo nga magtukod og usa ka [balay] nga tabla. Miingon ang uban nga ang [balay] nga tabla dako kaayo og gasto…, ug ang mayoriya mihukom nga maghimo og usa ka balay nga troso ug mihimo sa ilang mga kalkulasyon unsay ilang mahimo aron matukod kini. Mitindog si Joseph ug mipahinumdom kanila nga dili sila maghimo og balay alang sa ilang kaugalingon o para kang bisan kinsang tawhana apan balay para sa Dios: ‘Ug kita ba, mga kaigsoonan, ‘motukod og balay alang sa atong Dios, nga hinimo sa troso? Dili, mga kaigsoonan. Duna koy mas maayong plano kay niana. Naa nako ang plano kabahin sa balay sa Ginoo nga Siya Mismo ang naghatag. Inyong makita pinaagi niini ang kalainan tali sa atong mga pagbana-bana ug sa Iyang mga ideya.’” Ang propeta dayon mihatag sa “kinatibuk-ang plano sa balay sa Ginoo sa Kirtland,” nga “gidawat sa dakong kahimuot” sa kaigsoonan. Human sa miting, nangadto sila sa luna diin tukoron ang bilding ug gisugdan ang trabaho—gitangtang ang mga koral, gihawanan ang yuta, ug nagkalot og lungag para sa paril. (“Lucy Mack Smith, History, 1844–1845,” basahon 14, pahina 1–2 josephsmithpapers.org)

Doktrina ug mga Pakigsaad 95:4. Unsa ang “katingalahan nga panlihok” sa Ginoo?

Gipanagna ni Isaias nga sa dili pa ang Ikaduhang Pag-anhi ni Jesukristo, ang Ginoo “magahimo sa iyang buluhaton, sa iyang katingalahan nga buluhaton ug sa pagpahinabo sa iyang hilimoon, sa iyang katingalahan nga panlihok” (Isaias 28:21). Ang “katingalahan nga panlihok” nga gihisgotan ni Isaias, ug gipamatud-an diha sa pagpadayag nga narekord sa Doktrina ug mga Pakigsaad 95, nagpasabot sa Pagpahiuli sa ebanghelyo (tan-awa sa Doktrina ug mga Pakigsaad 95:4; 101:95). Isip kabahin sa iyang buhat, misaad ang Ginoo nga “mobubu sa [Iyang] Espiritu diha sa tanan nga mga katawhan” (Doktrina ug mga Pakigsaad 95:4; tan-awa usab sa Joel 2:28–32). Kadtong dili motuo sa langitnong mga pagbisita, pagpadayag, mga panan-awon, mga gasa sa Espiritu, ug uban pang espirituwal nga butang, maghunahuna tingali nga “katingalahan” ang gipahiuli nga ebanghelyo.

Giunsa pagtuman sa Ginoo ang Iyang saad sa Doktrina ug mga Pakigsaad 95:14?

“Pipila ka adlaw [human nadawat ang pinadayag nga narekord diha sa Doktrina ug mga Pakigsaad 95], ang Ginoo mituman sa Iyang saad, mipakita ni Joseph Smith ug sa iyang mga magtatambag sa Unang Kapangulohan og usa ka talagsaong panan-awon diin ilang nakita ang detalyadong mga plano alang sa templo. Si Frederick G. Williams, ang Ikaduhang Magtatambag sa Unang Kapangulohan, sa kadugayan nahinumdom: ‘Si Joseph [Smith] nakadawat sa pulong sa Ginoo nga dad-on ang iyang duha ka mga magtatambag, si [Frederick G.] Williams ug [Sidney] Rigdon, ngadto sa atubangan sa Ginoo, ug nga Siya mopakita kanila sa plano o modelo sa balay nga pagatukuron. Nanluhod dayon kami, misangpit sa Ginoo, ug ang bilding mitunga sa gilay-on nga igong makita, ako ang unang nakakita niini. Unya kaming tanan mitan-aw niini. Human namo matan-aw og maayo ang gawas nga bahin, ang bilding ingon nga sa diha gayod sa among atubangan.”’ [Frederick G. Williams, gikutlo ni Truman O. Angell, sa Truman Osborn Angell, Kasaysayan sa Kaugalingong Kinabuhi 1884, 14–15, Church Archives, Ang Simbahan ni Jesukristo sa mga Santos sa Ulahing mga Adlaw, Salt Lake City, Utah]” (Mga Pagtulun-an sa mga Presidente sa Simbahan: Joseph Smith [2007],327).

Ang pagtuga ba nga gisaad sa Templo sa Kirtland sama sa pagtuga sa templo karon?

Ang pagtuga nga gihisgotan sa pagpadayag nga narekord sa Doktrina ug mga Pakigsaad 95 dili parehas sa pagtuga sa ordinansa nga gipangalagad sa ulahing mga templo. Ang pagtuga nga nadawat sa mga miyembro sa Simbahan sa Kirtland, Ohio, naglakip sa pipila ka ordinansa nga parehas nga gihimo sa mga templo karon apan kini naglakip usab sa mga higayon diin gibubo sa Ginoo ang Iyang Espiritu ug gitugahan sila og espirituwal nga gahom (tan-awa sa Doktrina ug mga Pakigsaad 109; 110 ug Mga Hisgotanan sa Kasaysayan sa Simbahan, “Pagtuga sa Gahom,” Librarya sa Ebanghelyo). Ang unang kompletong pagtuga sulod sa templo niini nga dispensasyon gihimo ni Propeta Joseph Smith sa Nauvoo, Illinois, niadtong Mayo 1842. Kini naglangkob sa pipila nga gipangalagadsa Kirtland pero naa usab kini daghang dugang nga mga bahin.

Asa ako makakat-on og dugang bahin sa pagtukod sa Templo sa Kirtland?

• Tan-awa ang Mga Hisgotanan sa Kasaysayan sa Simbahan, Templo sa Kirtland

• Tan-awa ang Lisa Olsen Tait and Brent Rogers, sa “A House for Our God,” Konteksto sa mga Pagpadayag (2016)

Dugang nga mga Kalihokan sa Pagkat-on

Doktrina ug mga Pakigsaad 95:1. “Kinsa kadto nga Ako naghigugma Ako usab nagpanton”

Ikonsiderar ang pagtabang sa mga estudyante sa pagkat-on bahin sa kinaiya sa Manluluwas pinaagi sa pagsabot kon nganong gipanton kita Niya. Human maghisgot sa kahulogan sa pagpanton, pwede pangitaon sa mga estudyante ang mosunod nga mga bersikulo, nga nangitag mga rason kon nganong gipanton sa Manluluwas ang Iyang katawhan:

• Mga Hebreohanon 12:5–7, 9

• Mosiah 23:21

• Doktrina ug mga Pakigsaad 98:19–22

• Doktrina ug mga Pakigsaad 105:2–6

Dapita ang mga estudyante sa pagpamalandong kon unsay sagad nga pagtubag nila dihang pantonon sila. Dayon, pwede nimo silang hangyoon nga ipakigbahin ang mga pamaagi kon unsay mas maayong pagtubag dihang pantonon kita sa Ginoo.

Para sa dugang impormasyon sa pagpanton, tan-awa sa “Ako Nagabadlong ug Nagapanton sa Akong Gihigugma” ni Elder D. Todd Christofferson Liahona, Mayo 2011, 97–100; o tan-awa ang video nga “The Will of God” (3:02) sa ChurchofJesusChrist.org.

Doktrina ug mga Pakigsaad 95:6. “Naglakaw diha sa kangitngit sa udtong tutok”

Kini nga kalihokan makatabang sa mga estudyante nga masabtan ang kaimportante sa pagtuman sa mga sugo sa Ginoo. Pwede nimong dapiton ang mga estudyante nga isaysay kon unsay kahulogan sa hugpong sa mga pulong nga “naglakaw diha sa kangitngit sa udtong tutok” para nila. Dayon ikonsiderar ang paghisgot sa mosunod nga mga pangutana:

• Sa unsang paagi kaha ang pagbaliwala sa sugo sa Ginoo sa pagtukod og templo parehas sa “[p]aglakaw diha sa kangitngit sa udtong tutok”?

• Sa unsang paagi kaha ang pagbaliwala sa sugo sa Ginoo sa pagtukod og templo susama sa “[pag]lakaw diha sa kangitngit sa udtong tutok”? (tan-awa usab sa Doktrina ug mga Pakigsaad 95:12).

Mga Titulo ni Jesukristo

Kini nga kalihokan motabang sa mga estudyante nga makakat-on og dugang bahin kang Jesukristo pinaagi sa pagtutok sa Iyang mga titulo. Dapita ang mga estudyante sa pagpangita sa mga titulo sa Manluluwas sa Doktrina ug mga Pakigsaad 95:7, 17. Pwedeng ipakigbahin sa mga estudyante ang ilang nakat-onan bahin sa Manluluwas gikan niini nga mga titulo.

Kon gikinahanglan, ipasabot ang mosunod:

Sa bersikulo 7, ang Ginoo mihatag og interpretasyon kon unsay gipasabot sa ngalan nga “Ginoo sa Sabaoth. Kini usab maoy Hebreohanong pulong nga nagkahulogang “mga panon” o “mga kasundalohan.” Apil sa kadaghanan ang panon sa mga anghel sa langit (tan-awa ang Diksyonaryo sa Maayong Balita Biblia, “Sabaoth”).

Sumala kang Joseph Smith, ang pulong nga Ahman mao ang ngalan sa Dios sa putli nga pinulongan ni Adan, ug ang “Anak ni Ahman” (bersikulo 17) mao ang ngalan sa Anak sa Dios, si Jesukristo (tan-awa sa The Joseph Smith Papers, Documents, Volume 2: July 1831–January 1833, ed. Matthew C. Godfrey ug uban pa [2013], 213–15). Gipasabot usab niya nga ang Ahman nagpasabot og “ang unang tawo o unang Dios” (“Minutes, 5 Abril 1844,” pahina 84, josephsmithpapers.org; tan-awa usab ang Doktrina ug mga Pakigsaad 78:20).

Ang Alphus (Alpha) ug Omegus (Omega) mao ang una ug kataposang mga letra sa Gregong alpabeto. Naghulagway kini sa “tanang apil sa kinaiyan ni Kristo, isip ang una ug ang kinaulahian, ang sinugdanan ug ang kataposan” (Bible Dictionary, “Alpha”).