Դաս 111. Վարդապետություն և Ուխտեր 94–97

Վարդապետություն և Ուխտեր 97

Սիոն․ Սրտով մաքուրները

Դաժան հալածանքների ժամանակ Սրբերը Սիոնի հողի վրա (Միսսուրի, Ջեկսոն գավառ) ցանկանում էին իմանալ Տիրոջ կամքն իրենց վերաբերյալ: Տերն ուսուցանել է նրանց սրտով մաքուր լինելու օրհնությունների մասին: Այս դասը կօգնի ուսանողներին դառնալ սրտով մաքուր:

Հնարավոր ուսումնական վարժություններ

Մաքուր ջուր

Կարող եք սկսել առարկայական դասով՝ օգտագործելով ջուրը: Դասարանին ցույց տվեք մաքուր ջուր և քննարկեք մաքուր ջրի օրհնությունները և ոչ մաքուր ջուր օգտագործելու հետևանքները: Կարող եք օգնել ուսանողներին համեմատել մաքուր ջրի օրհնությունները մաքուր սիրտ ունենալու օրհնությունների հետ:

• Որո՞նք են մաքուր և անարատ ջուր ունենալու առավելությունները:

• Երբ ջուրը մաքուր չէ, ի՞նչ եղանակներ կան այն մաքրելու համար:

• Ինչպե՞ս կարելի է մաքուր ջուրը համեմատել մաքուր սրտի հետ:

Տերը Վարդապետություն և Ուխտեր 97 բաժնում արտահայտել է Իր ցանկությունները, որ Իր ժողովուրդն ունենա մաքուր սրտեր: Այսօր ուսումնասիրելիս մտածեք ձեր սրտի վիճակի մասին: Ոգեշնչում փնտրեք, որպեսզի հասկանաք այն օրհնությունները, որոնք Տերը տալիս է ձեր սիրտը մաքրելու համար:

Սիոնը «սրտով մաքուրներն են»

«Սիոնում», որը ներկայիս Միսսուրիի Ջեկսոն գավառն է, մի խումբ երեցներ ցանկանում էին իմանալ Տիրոջ կամքն իրենց վերաբերյալ, ուստի նրանք նամակ գրեցին Ջոզեֆ Սմիթին՝ պատասխաններ փնտրելու համար: Ի պատասխան՝ Տերը նկարագրեց մեծ ծրագրեր դպրոցի, Եկեղեցու և նույնիսկ Սիոնի հողի վրա գտնվող տաճարի համար: Որպեսզի Սրբերին ոգեշնչի լինել մաքուր և ընդունեն Իրեն, Տերը համեմատեց նրանց երկու ծառի հետ. մեկը, որը պետք է կտրվեր, և մյուսը, որը պտղաբեր էր (տես Վարդապետություն և Ուխտեր 97.1–10): Ճիշտ այնպես, ինչպես Տերը Սիոն կանչեց Ենովքի ժողովրդին (տես Մովսես 7.18), Նա ցանկանում էր Իր Սրբերին կանչել վերջին օրերի Սիոն։ Նա ցանկանում էր, որ նրանք դառնան Իր նման, ոչ թե պարզապես ապրեն Սիոն կոչվող վայրում:

Կարդացեք Վարդապետություն և Ուխտեր 97․21 հատվածը՝ փնտրելով, թե ինչպես է Տերը նկարագրել Սիոնը:

Կարող եք գրատախտակին գրել՝ Սիոնը սրտով մաքուրներն են: Կարող եք առաջարկել ուսանողներին իրենց սուրբ գրություններում նշել այն բառերը, որոնք ուսուցանում են այդ վարդապետությունը։

Եթե ուսանողներն օգնության կարիք ունեն՝ հետևյալ հարցերին պատասխանելու համար, կարող եք ուղղորդել նրանց կարդալ Մոսիա 5.2 կամ Ալմա 13.12 հատվածները։

• Ըստ ձեզ, ի՞նչ է նշանակում լինել սրտով մաքուր:

Նախագահ Ռասսել Մ. Նելսոնն ուսուցանել է, թե մենք ինչ կարող ենք անել՝ մաքուր լինելու համար.

Տերը մեր հավերժական առաջընթացի այս ժամանակահատվածում մեզանից կատարելություն չի ակնկալում: Սակայն նա ակնկալում է, որ մենք գնալով ավելի մաքուր լինենք: Ամենօրյա ապաշխարությունը մաքրության ուղին է, իսկ մաքրությունն ուժ է բերում: (Ռասսել Մ․ Նելսոն, «Մենք կարող ենք ավելի լավ գործել և ավելի լավը լինել», Լիահոնա, մայիս, 2019, 68)

• Այս խոսքերն ի՞նչ են օգնում ձեզ հասկանալ մաքրության մասին։

Տիրոջ օրհնությունները, որոնք հասանելի են տաճարներում

Տերը Վարդապետություն և Ուխտեր 97.10–21 հատվածներում Իր ժողովրդին ցուցումներ է տվել, որոնք կօգնեն նրանց սրտով մաքուր լինել: Կարդացեք Վարդապետություն և Ուխտեր 97․10–12 հատվածները և փնտրեք, թե ինչ ցուցումներ է տվել Տերն Իր ժողովրդին:

• Ի՞նչ գիտեք Տիրոջ տաճարների մասին, որն օգնում է ձեզ հասկանալ, թե դրանք ինչու են օգնում Նրա ժողովրդին սրտով մաքուր լինել:

Սա լավ պահ է՝ օգնելու ուսանողներին կիրառել սուրբ գրությունների ուսումնասիրության՝ սուրբգրային ցանկեր գտնելու հմտությունը: Ուսանողները կարող են թվարկել այն օրհնությունները, որոնք կարող են գալ տաճարը կառուցելուց:

Կարող եք նաև գրատախտակին տաճարի գծապատկեր նկարել: Ուսանողներին առաջարկեք լրացնել այն Տիրոջ օրհնությունները նկարագրող բառերով և արտահայտություններով:

Կարդացեք Վարդապետություն և Ուխտեր 97․13–21 հատվածները՝ փնտրելով Տիրոջ նկարագրած օրհնությունները, որոնք կապված են Նրա տաճարներում երկրպագելու հետ:

• Ինչպե՞ս կարող են այս օրհնությունները ոգեշնչել մեզ սրտով մաքուր լինել:

Ուսանողները հավանաբար նկատել են, որ Տիրոջ խոստացած օրհնություններից մեկն այն էր, որ սրտով մաքուր մարդիկ «կտեսնեն Աստծուն» (հատված 16): Կարող եք առաջարկել ուսանողներին կապել այս հատվածը Սաղմոս 24.3–5 և Մատթեոս 5.8 հատվածների հետ և հարցնել ուսանողներին, թե այս հատվածներում իրենք ինչ կապ են նկատում սրտով մաքուր լինելու և Աստծուն տեսնելու միջև:

Առաջին Նախագահությունից նախագահ Հենրի Բ. Այրինգը մեջբերել է Վարդապետություն և Ուխտեր 97.15–17 հատվածները և ուսուցանել է, թե ինչ է նշանակում տեսնել Աստծուն տաճարում.

Նախագահ Ռասսել Մ. Նելսոնը հստակեցրել է մեզ համար, որ մենք կարող ենք Փրկչին «տեսնել» տաճարում այն իմաստով, որ Նա այլևս անհայտ չէ մեզ համար: Նախագահ Նելսոնը հետևյալն է ասել․ «Մենք հասկանում ենք Նրան։ Մենք հասկանում ենք Նրա գործը և Նրա փառքը: Եվ մենք սկսում ենք զգալ Նրա անզուգական կյանքի անսահման ազդեցությունը» [Ռասսել Մ. Նելսոնի ուսմունքները (2018), 369]։

Եթե ես կամ դուք ոչ բավարար մաքրությամբ գնանք տաճար, մենք Սուրբ Հոգու զորությամբ չենք կարողանա տեսնել Փրկչի մասին հոգևոր ուսմունքները, որոնք մենք կարող ենք ստանալ տաճարում: (Հենրի Բ. Այրինգ, «Սիրում եմ նայել տաճարին», Լիահոնա, մայիս 2021, 30)

• Ինչպե՞ս կարող է այս խոստումը ոգեշնչել որևէ մեկին սրտով մաքուր դառնալ:

• Ըստ ձեզ, Տերն ինչո՞ւ է մեզանից մաքուր սիրտ պահանջում՝ տաճար մտնելու համար:

Դառնալ սրտով մաքուր

Կարող եք օգնել ուսանողներին քննարկել, թե ինչպես կարող է տաճարային երաշխավորագիր ստանալու համար տրվող հարցազրույցն օգնել մեզ գնահատել՝ արդյոք մենք մաքուր ենք սրտով: Գուցե մի քանի ուսանող, որոնք վերջերս տաճարային երաշխավորագիր ստանալու համար հարցազրույց են անցել, կարող են կիսվել, թե ինչ զգացողություններ ունեին՝ հարցերին պատասխանելիս: Կարող եք նաև առաջարկել հետևյալը.

Տաճարային երաշխավորագիր ստանալու համար տրվող հարցազրույցի հարցերը կարելի է գտնել Երիտասարդներին զորացնելու համար. Ընտրություններ կատարելու ուղեցույց գրքույկում։ Ժամանակ հատկացրեք տաճարային երաշխավորագիր ստանալու համար տրվող հարցազրույցի յուրաքանչյուր հարցի շուրջ խորհելու համար: Մտածեք, թե ինչպես են ձեր պատասխաններն արտացոլում ձեր սրտի վիճակը:

Ուսանողներին ժամանակ տվեք՝ դասարանում այս հարցերի շուրջ խորհելու համար: Երբ ուսանողները խորհեն յուրաքանչյուր հարցի շուրջ, խրախուսեք նրանց ընտրել մեկ կամ երկու բան, որ նրանք կարող են անել՝ իրենց սրտերը մաքրելու համար։ Խնդրեք ուսանողներին իրենց օրագրերում պատասխանել հետևյալ հարցերին.

• Ի՞նչ կանեք, որպեսզի թույլ տաք Տիրոջը մաքրել ձեր սիրտը:

• Ըստ ձեզ, ինչպես Երկնային Հոր, այնպես էլ Հիսուս Քրիստոսի համար ինչո՞ւ է այդքան կարևոր, որ ձեր սիրտը մաքուր լինի:

Օժանդակ նյութեր

Վարդապետություն և Ուխտեր 97․11–12։ Ի՞նչ նկատի ուներ Տերը, երբ տասանորդ էր խնդրում՝ տաճարը կառուցելու համար:

Ինչպես նշված է բաժին 97-ում, տասանորդը վերաբերում էր ցանկացած ինքնակամ նվիրատվությանը (տես Ջոզեֆ Սմիթի փաստաթղթերը, Փաստաթղթեր, հատոր 3, փետրվար 1833–մարտ 1834, 201, խմբ․ 241)։

Ի՞նչ օրհնություններ է տալիս Տերը տաճարներ կառուցելու միջոցով:

Նախագահ Ռասսել Մ. Նելսոնն ուսուցանել է․

Եկեք երբեք մեր տեսադաշտից բաց չթողնենք այն, թե Տերն ինչ է անում մեզ համար: Նա Իր տաճարներն ավելի հասանելի է դարձնում։ Նա մեծացնում է այն արագությունը, որով մենք տաճարներ ենք կառուցում: Նա մեծացնում է Իսրայելի հավաքմանն օգնելու մեր կարողությունը: Նա նաև օգնում է, որ յուրաքանչյուրս հոգեպես ավելի հղկված դառնա։ Ես խոստանում եմ, որ տաճարում անցկացրած ժամանակը կօրհնի ձեր կյանքն աննախադեպ եղանակներով։ (Ռասսել Մ. Նելսոն, «Կենտրոնացեք տաճարի վրա», Լիահոնա, նոյեմբեր 2022, 121)

Ինչպե՞ս է տաճարային երաշխավորագիր ստանալու պահանջներին համապատասխանելը նախապատրաստում ինձ տաճարին:

Նախագահ Ռասսել Մ. Նելսոնը բացատրել է․

Տիրոջ տուն մտնելու անձնական արժանավորությունը պահանջում է անհատական հոգևոր պատրաստվածություն։ Սակայն Տիրոջ օգնությամբ անհնարին ոչինչ չկա։ Որոշ առումներով, տաճար կառուցելն ավելի հեշտ է, քան տաճարին պատրաստ ժողովուրդ ստեղծելը: Անձնական արժանավորությունը պահանջում է մտքի և սրտի ամբողջական փոխակերպում, որպեսզի ավելի շատ նմանվենք Տիրոջը, լինենք ազնիվ քաղաքացիներ, լինենք ավելի լավ օրինակներ և լինենք ավելի սուրբ անձ: (Ռասսել Մ․ Նելսոն, «Ամփոփիչ ելույթ», Լիահոնա, նոյեմբեր 2019, 121–122)

Տասներկու Առաքյալների Քվորումից երեց Քվենթին Լ Քուքն ուսուցանել է.

Մեր մեծագույն ցանկությունն է, որ Եկեղեցու անդամները տաճարային երաշխավորագրի համար արժանի ապրեն: Խնդրում եմ, մի համարեք տաճարը հեռավոր ու գուցե անհասանելի մի նպատակ: Շատ անդամներ, աշխատելով իրենց եպիսկոպոսի հետ, համեմատաբար կարճ ժամանակում կարողանում են բավարարել բոլոր արդարացի պահանջները, եթե ունեն արժանի լինելու և մեղքերից ապաշխարելու վճռականություն: (Քվենթին Լ․ Քուք. «Ինքներդ ձեզ տաճարում տեսեք», Լիահոնա, մայիս 2016, 98)

Լրացուցիչ ուսումնական վարժություններ

Վարդապետություն և Ուխտեր 97․1–2։ Ջանասիրաբար իմաստություն փնտրեք՝ սովորելու համար

Ուսանողների համար օգտակար կլինի իմանալ, թե ինչպես մեծացնել իմաստության և ճշմարտության ուսումնասիրության իրենց կարողությունը: Խնդրեք ուսանողներին կիսվել սովորելու մեծ ցանկություն ունեցող որևէ մարդու հատկանիշներով և վարքագծով:

Կարող եք բացատրել, որ Փարլի Պ. Պրատը կանչվել է նախագահելու Սիոնի երեցների դպրոցում, որը նման է Օհայոյում Ջոզեֆ Սմիթի հիմնադրած Մարգարեների դպրոցին: Փարլին և Ջոզեֆը նամակներ էին գրում միմյանց, և Վարդապետություն և Ուխտեր 97 բաժինը եկավ՝ ի պատասխան այդ նամակներից մեկի: Ուսանողներին առաջարկեք կարդալ հատվածներ 1–2-ը՝ ուշադրություն դարձնելով, թե համաձայն Տիրոջ ասածի, ինչն է Սիոնի երեցներին լավ սովորողներ դարձրել: Օգնեք ուսանողներին այս հատվածներից բացահայտել հետևյալ ճշմարտությունը՝ Տերը ողորմած է և կօրհնի մեզ իմաստությամբ ու ճշմարտությամբ, երբ մենք խոնարհվենք և ջանասիրաբար ձգտենք սովորել։

Կարող եք խնդրել ուսանողներին քննարկել և բացահայտել, թե ինչու է Տերը կամենում օրհնել մեզ իմաստությամբ և ճշմարտությամբ, երբ մենք այս կերպ ենք մոտենում ուսմանը:

Վարդապետություն և Ուխտեր 97․7–9։ Երկու ծառ

Վարդապետություն և Ուխտեր 97.7–9 հատվածները կօգնեն ուսանողներին սովորել, թե ինչ կարող են անել, որպեսզի Տերն ընդունի իրենց: Ուսանողներին առաջարկեք խորհել, թե նրանք ինչու են ցանկանում, որ Տերն ընդունի իրենց։ Կարող եք առաջարկել ուսանողներին նկարագրել հատվածների երկու ծառերը կամ նկարել յուրաքանչյուր ծառի պարզ պատկերը: Նրանք կարող են լավ ծառի պտուղները վերնագրել 8-րդ հատվածում նկարագրված հատկանիշներով: Քննարկեք, թե ինչ է նշանակում ունենալ կոտրված սիրտ և փշրված հոգի և պահել մեր ուխտերը զոհաբերությամբ: Ուսանողներին խնդրեք կիսվել, թե այս քայլերի կատարումն ինչպես կօգնի մեզ ընդունված լինել Տիրոջ կողմից:

Վարդապետություն և Ուխտեր 97․18–28։ «Սիոնը սրտով մաքուրներն են»:

Ուսանողների համար օգտակար կլինի հասկանալ, թե ինչ է Սիոնը և ինչպես է այն առնչվում իրենց հետ: Գրատախտակին գրեք Սիոն բառը և խնդրեք ուսանողներին կիսվել, թե ինչ գիտեն Սիոնի մասին: Ուսանողներին օգնեք հասկանալ, որ Միսսուրի նահանգի Ջեկսոն գավառում ապրող մարդիկ իրենց ապրած վայրն անվանում էին Սիոն: Միսսուրիում ապրող Սրբերը ցանկանում էին հիմնել Սիոնը, ինչպես որ կարդացել էին սուրբ գրություններում (տես Թեմաների ուղեցույց՝ «Սիոն»): Ուսանողներին օգնեք բացահայտել, թե ինչպես է Տերը սահմանել Սիոնը՝ կարդալով Վարդապետություն և Ուխտեր 97.21 հատվածը (տես նաև Մովսես 7.18): Այնուհետև առաջարկեք ուսանողներին ուսումնասիրել Վարդապետություն և Ուխտեր 97.18–28 հատվածները՝ փնտրելով, թե Տերն ինչ օրհնություններ էր ցանկանում տալ Միսսուրիի Սրբերին, եթե նրանք ընտրեին լինել «սրտով մաքուր» (Վարդապետություն և Ուխտեր 97.21):