Lesona 111: Fotopampianarana sy Fanekempihavanana 94–97

Fotopampianarana sy Fanekempihavanana 97

Ziona—Ny madio am-po

Rehefa niatrika fanenjehana mafy ireo Olomasina tao amin’ny tanin’i Ziona (Fivondronan’i Jackson, Missouri) dia naniry ny hahafantatra ny sitrapon’ny Tompo ho azy ireo. Nampianatra azy ireo momba ireo fitahiana avy amin’ny fananana fadiovam-po ny Tompo. Ity lesona ity dia afaka manampy ireo mpianatra ho lasa madio am-po.

Sahanasa fianarana azo atao

Rano madio

Atombohy amin’ny alalan’ny lesona ampiasana rano ny fotoam-pianarana. Ampisehoy rano madio ny iray kilasy ary ifanakalozy hevitra ireo fitahiana avy amin’ny rano madio sy ny vokatry ny fampiasana rano maloto. Azonao atao ny manampy ny mpianatra hampitaha ireo fitahiana avy amin’ny rano madio amin’ireo fitahiana avy amin’ny fananana fo madio.

• Inona no soa azo avy amin’ny fananana rano madio sy mangarahara?

• Rehefa maloto ny rano dia inona avy ireo fomba vitsivitsy hanadiovana azy?

• Ahoana no mety hampitahana ny rano madio amin’ny fo madio?

Ao amin’ny Fotopampianarana sy Fanekempihavanana 97 ny Tompo dia naneho ny faniriany mba hananan’ny olony fo madio. Rehefa mandalina ianao anio dia eritrereto ny toetry ny fonao. Mikatsaha fitaomam-panahy mba hahatakarana ireo fitahiana avy amin’ny famelana ny Tompo hanadio ny fonao.

Ny madio am-po no Ziona

Nisy vondrona loholona tao “Ziona,” anarana izay nampiasaina tamin’izany fotoana izany rehefa niresaka momba ny Fivondronan’i Jackson, Missouri, naniry ny hahafantatra ny sitrapon’ny Tompo ho azy ireo, ka nanoratra taratasy ho an’i Joseph Smith izy ireo mba hikatsahana valiny. Ho valin’izany dia nofaritan’ny Tompo ireo drafitra lehibe ho an’ny sekoly, ny Fiangonana, eny fa na dia ny tempoly ao amin’ny tanin’i Ziona aza. Mba hamporisihana ny Olomasina ho madio sy hanaiky Azy dia nampitahain’ny Tompo tamin’ny hazo roa izy ireo: ny iray izay hokapaina ary ny iray hafa izay hahavanim-boa (jereo ny Fotopampianarana sy Fanekempihavanana 97:1–10). Tahaka ny niantsoan’ny Tompo ny vahoakan’i Enoka hoe Ziona (jereo ny Mosesy 7:18), dia te hiantso ny Olomasiny amin’ny andro farany hoe Ziona koa ny Tompo. Tiany ho tonga tahaka Azy izy ireo, fa tsy hipetraka amin’ny toerana antsoina hoe Ziona fotsiny.

Vakio ny Fotopampianarana sy Fanekempihavanana 97:21, ka tadiavo ao ny fomba namariparitan’ny Tompo an’i Ziona.

Azonao atao ny manoratra hoe Ny madio am-po no Ziona eny amin’ny solaitrabe. Azonao atao ny manasa ireo mpianatra hanisy marika ireo teny ao amin’ny soratra masiny izay mampianatra io fahamarinana io.

Raha mila fanampiana amin’ny famaliana ity fanontaniana manaraka ity ny mpianatra dia azonao atao ny mitarika azy ireo hijery ny Môzià 5:2 na ny Almà 13:12.

• Inona araka ny eritreritrareo no dikan’ny hoe madio am-po?

Ny Filoha Russell M. Nelson dia nampianatra momba ny zavatra azontsika atao mba hadio:

Tsy manantena fahalavorariana avy amintsika ny Tompo amin’izao dingana ao anatin’ny fivoarantsika mandrakizay izao. Saingy manantena Izy fa ho lasa hihamadio isika. Ny fibebahana isan’andro no lalana mitondra any amin’ny fahadiovana ary ny fahadiovana dia mitondra hery. (Russell M. Nelson, “Afaka manao tsaratsara kokoa sy ho lasa tsaratsara kokoa isika,” Liahona, mey 2019, 68)

• Manampy anao hahatakatra inona momba ny fahadiovana io fanambarana io?

Ireo fitahian’ny Tompo izay misy any amin’ny tempoly

Ao amin’ny Fotopampianarana sy Fanekempihavanana 97:10–21 ny Tompo dia nanome torolalana ho an’ny vahoakany izay hanampy azy ireo ho madio am-po. Vakio ny Fotopampianarana sy Fanekempihavanana 97:10–12, ka tadiavo ny torolalana nomen’ny Tompo ny olony.

• Inona no fantatrao momba ny tempolin’ny Tompo izay manampy anao hahatakatra ny antony ahafahan’izy ireo manampy ny olony ho madio am-po?

Mety ho toerana tsara hanampiana ireo mpianatra hampihatra ny fahaizana mandalina soratra masina amin’ny fitadiavana lisitra ao amin’ny soratra masina izany. Afaka mitanisa ireo fitahiana izay ho azo avy amin’ny fanorenana tempoly ny mpianatra.

Azonao atao ihany koa ny manao sarin’ny tempoly eny amin’ny solaitrabe. Asao ny mpianatra hameno izany amin’ny teny sy andian-teny izay mamaritra ny fitahian’ny Tompo.

Vakio ny Fotopampianarana sy Fanekempihavanana 97:13–21, ka tadiavo ireo fitahiana nofaritan’ny Tompo izay mifandray amin’ny fitsaohana ao amin’ny tempoliny.

• Ahoana no mety hanosehan’ireo fitahiana ireo antsika ho madio am-po?

Mety ho nahatsikaritra ireo mpianatra fa ny iray amin’ireo fitahiana nampanantenain’ny Tompo dia ny hoe “hahita an’ Andriamanitra” ny madio am-po. (andininy 16). Azonao atao ny manasa ny mpianatra hampifandray io andinin-tsoratra masina io amin’ny Salamo 24:3–5 sy ny Matio 5:8 ary anontanio ireo mpianatra hoe inona no fifandraisana tsikaritr’izy ireo ao amin’ireo andininy ireo eo amin’ny hoe madio am-po sy ny fahitana an’ Andriamanitra.

Ny Filoha Henry B. Eyring ao amin’ny Fiadidiana Voalohany dia nindrana ny Fotopampianarana sy Fanekempihavanana 97:15–17 ary nampianatra ny mety ho dikan’ny hoe mahita an’ Andriamanitra any amin’ny tempoly:

Nohazavain’ny Filoha Russell M. Nelson mazava tsara tamintsika fa isika dia afaka “mahita” ny Mpamonjy ao amin’ny tempoly amin’ny fomba izay hahatonga Azy tsy ho vahiny amintsika intsony. Nilaza izao ny Filoha Nelson hoe: “Ho fantatsika Izy. Ho takatsika ny asany sy ny voninahiny. Ary hanomboka ho tsapantsika ny fiantraikany tsy misy fetran’ny fiainany tsy manam-paharoa” [Teachings of Russell M. Nelson (2018), 369].

Raha toa izaho na ianao ka tsy madio tsara rehefa mankany amin’ny tempoly, dia tsy ho afaka ny hahatakatra ny fampianarana ara-panahy mikasika ny Mpamonjy, izay raisintsika any amin’ny tempoly amin’ny alalan’ny herin’ny Fanahy Masina. (Henry B. Eyring, “Mahita ny tempoly no mahafinaritra ahy,” Liahona, mey 2021, 30)

• Ahoana no mety hanosehan’io fampanantenana io ny olona iray ho madio am-po?

• Nahoana araka ny hevitrao no mitaky fo madio ny Tompo rehefa hiditra ny tempoly ny olona?

Lasa madio am-po

Azonao atao ny manampy ireo mpianatra hifanakalo hevitra mikasika ny fomba ahafahan’ireo tafa sy dinika hahazoana fahazoan-dalana hidirana ny tempoly manampy antsika hanombantombana raha toa ka madio am-po isika na tsia. Afaka mizara ny zavatra tsapany rehefa namaly ireo fanontaniana ireo angamba ny mpianatra vitsivitsy izay nanao tafa sy dinika vao haingana mba hahazo fahazoan-dalana hidirana ny tempoly. Azonao atao ihany koa ny manome ity fanasana manaraka ity:

Ireo fanontaniana apetraka mandritra ny tafa sy dinika momba ny fahazoan-dalana hidirana ny tempoly dia hita ao amin’ny Ho zatovo mahery!: Torolalana amin’ny fanaovana safidy. Makà fotoana hisaintsainana ny fanontaniana tsirairay momba ny fahazoan-dalana hidirana ny tempoly. Diniho ny fomba hanehoan’ny valin-teninao ny toetry ny fonao.

Omeo fotoana ny mpianatra hisaintsainana ireo fanontaniana ireo ao am-pianarana. Rehefa avy nisaintsaina ny fanontaniana tsirairay ireo mpianatra dia azonao atao ny mamporisika azy ireo hisafidy zavatra iray na roa azon’izy ireo atao izay afaka manampy amin’ny fanadiovana ny fony. Azonao atao ny mangataka ny mpianatra hamaly ireto fanontaniana manaraka ireto ao amin’ny diary fandalinan’izy ireo:

• Inona no hataonao mba hamelana ny Tompo hanadio ny fonao?

• Nahoana araka ny eritreritrao no zava-dehibe amin’ny Ray any An-danitra sy i Jesoa Kristy ny fahadiovan’ny fonao?

Loharanom-pitaovana fanampiny

Fotopampianarana sy Fanekempihavanana 97:11–12. Inona no tian’ny Tompo holazaina rehefa nangataka fahafolonkarena Izy mba hanorenana ny tempoly?

Araka ny ampiasaina ao amin’ny fizarana 97, ny hoe fahafolonkarena dia entina ilazana ny fanatitra an-tsitrapo na fanomezana (jereo ny The Joseph Smith Papers, Documents, boky 3: febroary 1833–martsa 1834, 201, naoty 241).

Inona no fitahiana omen’ny Tompo amin’ny alalan’ny fanorenana tempoly?

Nampianatra toy izao ny Filoha Russell M. Nelson:

Aoka isika tsy ho very fifantohana amin’ireo zavatra izay ataon’ny Tompo ho antsika amin’izao. Manao izay hisian’ny tempoly betsaka kokoa Izy. Manafaingana ny fanorenantsika tempoly Izy. Mampitombo ny fahafahantsika manampy amin’ny fanangonana an’i Isiraely Izy. Ataony ihany koa izay hampamora ny hahalasa antsika ho tsaratsara kokoa eo amin’ny lafiny ara-panahy. Mampanantena aho fa ny fotoana lany betsaka kokoa any amin’ny tempoly dia hitahy ny fiainanareo amin’ny fomba izay tsy misy na inona na inona hafa hahavita izany. (Russell M. Nelson, “Mifantoha amin’ny tempoly,” Liahona, nôv. 2022, 121)

Rehefa mahafeno fepetra hahazoana fahazoana fahazoan-dalana hidirana ny tempoly aho dia ahoana no hanomanan’izany ahy ho any amin’ny tempoly?

Nanazava toy izao ny Filoha Russell M. Nelson:

Ny fahamendrehan’ny tena manokana mba hiditra ny tranon’ny Tompo dia mitaky fiomanan’ny tena manokana ara-panahy be dia be. Kanefa miaraka amin’ny fanampian’ny Tompo dia tsy misy zavatra tsy azo tanterahina. Amim-panajana no ilazako fa dia mora kokoa ny manorina tempoly toy izay ny manorina vahoaka iray niomana ho an’ny tempoly iray. Ny fahamendrehan’ny tena manokana dia mitaky fiovana tanteraka ao an-tsaina sy ny ao am-po mba hitovy kokoa amin’ny Tompo, mba ho olom-pirenena marin-toetra, sy ho ohatra tsaratsara kokoa, ary ho olona masina kokoa. (Russell M. Nelson, “Lahateny famaranana,” Liahona, nôv. 2019, 121–122)

Nampianatra toy izao ny Loholona Quentin L. Cook ao amin’ny Kôlejin’ny Apôstôly Roambinifolo:

Tena irinay mafy ny hananan’ny mpikambana tsirairay ato amin’ny Fiangonana fiainana mendrika hahazo fahazoan-dalana hidirana ny tempoly. Miangavy anareo aho mba tsy hihevitra ny tempoly ho toy ny tanjona lavitra ary angamba tsy ho azo tratrarina mihitsy. Ny ankamaroan’ny mpikambana, raha miara-miasa amin’ny evekany, dia afaka mahafeno ireo fepetran’ny fahamarinana takina ao anatin’ny fotoana tsy dia lava loatra raha toa ka manam-piniavana ny ho mendrika sy ny hibebaka tanteraka amin’ireo fandikan-dalàna izy ireo. (Quentin L. Cook, “Alaivo sary an-tsaina ny tenanao hoe any amin’ny tempoly,” Liahona, mey 2016, 98)

Sahanasa fianarana fanampiny

Fotopampianarana sy Fanekempihavanana 97:1–2. Katsaho ny hianatra fahendrena amim-pahazotoana

Mety handray soa avy amin’ny fianarana mikasika ny fampitomboana ny fahafahany mianatra fahendrena sy fahamarinana ny mpianatra. Angataho ny mpianatra hizara ireo toetra sy fitondrantena sasany ananan’ny olona iray izay manana faniriana lehibe ny hianatra.

Azonao atao ny manazava fa i Parley P. Pratt dia nantsoina hiahy ny sekolin’ny loholona tao Ziona izay mitovy amin’ny Sekolin’ny Mpaminany naorin’i Joseph Smith tao Ohio. Nifanoratra taratasy matetika i Parley sy Joseph, ary ny Fotopampianarana sy Fanekempihavanana 97 dia tonga ho valin’ny iray amin’ireo taratasy ireo. Asao ny mpianatra hamaky ny andininy 1–2, ka hitady ny zavatra nolazain’ny Tompo fa nahatonga ireo loholona tao Ziona ho mpianatra tsara. Ampio ny mpianatra hahita fahamarinana iray avy amin’ireo andininy ireo, toy ny hoe mamindra fo ny Tompo ary hitahy antsika amin’ny fahendrena sy fahamarinana rehefa manetry tena sy mikatsaka amim-pahazotoana ny hianatra isika.

Azonao atao ny manasa ireo mpianatra hifanakalo hevitra sy hitady ny antony mety hahatonga ny Tompo ho vonona ny hitahy antsika amin’ny fahendrena sy fahamarinana rehefa amin’izany fomba izany no hianarantsika.

Fotopampianarana sy Fanekempihavanana 97:7–9. Hazo roa

Ny Fotopampianarana sy Fanekempihavanana 97:7–9 dia afaka manampy ireo mpianatra hianatra momba ny zavatra azony atao mba haneken’ny Tompo azy ireo. Asao ireo mpianatra hisaintsaina ny antony mahatonga azy ireo haniry ny faneken’ny Tompo azy ireo. Azonao atao ny manasa ireo mpianatra hamaritra ireo hazo roa ao amin’ireo andininy ireo na hanao sary tsotsotra ny hazo tsirairay. Azon’izy ireo atao ny manome anarana ny voa eo amin’ilay hazo tsara amin’ireo toetra voalaza ao amin’ny andininy faha-8. Ifanakalozy hevitra ny dikan’ny hoe manana fo torotoro sy fanahy manenina ary mitandrina ny fanekempihavanantsika amin’ny alalan’ny fahafoizan-tena. Asao ny mpianatra hizara ny fomba ahafahan’ny fanaovana ireo zavatra ireo manampy antsika mba heken’ny Tompo.

Fotopampianarana sy Fanekempihavanana 97:18–28. “Ziona—Ny madio am-po”

Mety hahasoa ny mpianatra ny mahatakatra ny atao hoe Ziona sy ny fifandraisan’izany amin’izy ireo. Soraty eny amin’ny solaitrabe ny teny hoe Ziona ary angataho ny mpianatra hizara ny zavatra fantany momba an’i Ziona. Ampio ny mpianatra hahatakatra fa ireo olona nonina tao amin’ny Fivondronan’i Jackson, Missouri, dia niantso ny toerana nipetrahany hoe Ziona. Naniry ny hanorina an’i Ziona ireo Olomasina nipetraka tany Missouri rehefa namaky momba izany tao amin’ny soratra masina izy ireo (jereo ny Torolalana ho an’ny soratra masina, “Ziona”). Ampio ny mpianatra hahita ny fomba namaritan’ny Tompo an’i Ziona amin’ny alalan’ny famakiana ny Fotopampianarana sy Fanekempihavanana 97:21 (jereo koa ny Mosesy 7:18). Azonao atao avy eo ny manasa ny mpianatra handalina ny Fotopampianarana sy Fanekempihavanana 97:18–28, ka hitady ireo fitahiana tian’ny Tompo homena ny Olomasina tany Missouri, raha toa ka nisafidy ny ho “madio am-po” izy ireo (Fotopampianarana sy Fanekempihavanana 97:21).