“Lesona 112: Fanazaran-tena fifehezana fotopampianarana 7: Manao tsianjery; Mahazo fahalalana ara-panahy,” Fotopampianarana sy Fanekempihavanana: Boky torolalana ho an’ny mpampianatra seminera (2025)
“Fanazaran-tena fifehezana fotopampianarana 7,” Fotopampianarana sy Fanekempihavanana: Boky torolalana ho an’ny mpampianatra seminera
Lesona 112: Fotopampianarana sy Fanekempihavanana 94–97
Fanazaran-tena amin’ny fifehezana fotopampianarana 7
Manao tsianjery; Mahazo fahalalana ara-panahy
Ny fifehezana fotopampianarana dia afaka manampy ireo mpianatra hanorina ny fototry ny fiainan’izy ireo amin’i Jesoa Kristy sy ny filazantsarany. Ity lesona ity dia hanome fahafahana ireo mpianatra mba hizatra hanao tsianjery andinin-tsoratra masina fifehezana fotopampianarana sy ny fotopampianarana izay ampianarin’izany. Hanampy azy ireo hianatra sy hampihatra ireo fitsipika masin’ny fahazoana fahalalana ara-panahy ihany koa izany.
Sahanasa fianarana azo atao
Famerenana fifehezana fotopampianarana: ataovy tsianjery
Atombohy amin’ny sahanasa fohy iray ny fotoam-pianarana izay afaka manampy ireo mpianatra hahatakatra ny maha-zava-dehibe ny fitadidiana andinin-tsoratra masina fifehezana fotopampianarana sy ireo andian-teny manan-danja ao amin’ny soratra masina. Ohatra, azonao atao ny mampiseho vola, sakafo, diary, na zavatra hafa mety hotehirizin’ny olona. Asao ny mpianatra hifanakalo hevitra amina namana iray mikasika ireto fanontaniana manaraka ireto.
-
Nahoana ny olona no mety hanangona na hitahiry ireo zavatra ireo?
-
Inona avy ireo zavatra hafa mety hangonin’ny olona sy hotehiriziny mba hampiasaina amin’ny hoavy?
-
Ahoana no ifandraisan’izany amin’ny fitadidiana ireo andinin-tsoratra masina fifehezana fotopampianarana sy ireo andian-teny manan-danja ao amin’ny soratra masina?
Azonao atao ny manasa ny mpianatra hizara ny zavatra nifampiresahany tamin’ny namana mpiara-miasa aminy. Vitao miaraka amin’ny mpianatra rehetra ity manaraka ity.
Vakio ny Fotopampianarana sy Fanekempihavanana 84:85. Tadiavo ny fampanantenana omen’ny Tompo raha toa ka mitahiry na mirakitra ny teniny ao an-tsaintsika isika.
-
Inona no dikan’ny hoe “tenin’ny fiainana”?
-
Inona avy ireo fomba samihafa nezahinao niraketana ny tenin’ Andriamanitra tao an-tsainao?
-
Ahoana no nanampian’ireo ezaka ireo anao hahatsapa ny fitiavana na ny herin’ Andriamanitra teo amin’ny fiainanao?
Asao ny mpianatra hieritreritra fotoana teo amin’ny fiainany izay nahatonga ny andinin-tsoratra masina fifehezana fotopampianarana na soratra masina iray hafa tonga tao an-tsainy tamin’ny fotoan-tsarotra, toy ny tamin’ny fotoana niatrehan’izy ireo fanapahan-kevitra sarotra na ny fitadiavana valim-panontaniana iray. Mizarà ohatra mikasika ny fomba nitahian’ny fitadidiana soratra masina ny fiainanao.
-
Inona no fitahiana nomen’ny Tompo anao tamin’ny alalan’ny fanampiana anao hahatsiaro andinin-tsoratra masina iray tamin’ny ora tena nilanao izany?
Omeo fotoana ny mpianatra hiraketany ny tenin’ Andriamanitra ao an-tsainy amin’ny alalan’ny fitadidiana ireo andinin-tsoratra masina fifehezana fotopampianarana sy ireo andian-teny manan-danja ao amin’ny soratra masina. Fomba iray anaovana izany ity manaraka ity. (Misy hevitra fanampiny amin’ny fanaovana tsianjery hita ao amin’ny tovana any amin’ny faran’ity boky torolalana ity, eo ambanin’ny “Sahanasa famerenana ny fifehezana fotopampianarana.” Ny sahanasa izay fidinao hampiasaina dia tsy tokony haharitra 10 na 15 minitra mba hananan’ny mpianatra fotoana hampiharana ireo fitsipika momba ny fahazoana fahalalana ara-panahy any aoriana any mandritra ny lesona.)
Hevero ny hanomana taratasy na karatra kely maromaro ho an’ny mpianatra ary omeo azy ireo ireto torolalana manaraka ireto.
-
Misafidiana andalan-tsoratra masina fifehezana fotopampianarana telo ka hatramin’ny dimy izay tsapanao fa hanan-danja ny hiraketana na hanaovana tsianjery izany.
-
Saintsaino ny fomba mety hanampian’ny firaketana an’ireo andinin-tsoratra masina ireo anao hanaraka an’i Jesoa Kristy sy ny fampianarany.
-
Mamoròna karatra fitadidiana ho an’ny andininy tsirairay nofidinao amin’ny alalan’ny fanoratana ny toko sy andininy eo anoloan’ny taratasy iray ary ny andian-teny manan-danja ao amin’ny lafiny ilany.
-
Manaova fanazaran-tena manao tsianjery ny votoatin-javatra ao amin’ny lafiny roa amin’ny karatra fitadidiana tsirairay.
Rehefa afaka fotoana fohy dia afaka mifanakalo karatra fitadidiana amin’ny mpiara-mianatra aminy ny mpianatra ary manao fanazaran-tena manao tsianjery ireo andinin-tsoratra masina fifehezana fotopampianarana fanampiny. Afaka mifampitsapa fahaizana koa izy ireo amin’ny fampiasana ireo karatra fitadidiana noforoniny.
Mianatra sy mampihatra ireo fitsipika hahazoana fahalalana ara-panahy
Ny ambin’ny lesona dia mifantoka amin’ny fanampiana ireo mpianatra hamerina hijery ireo fitsipika hahazoana fahalalana ara-panahy sy hizatra hampiasa azy ireo amina rafi-tantara momba ny Tenin’ny Fahendrena.
Hevero ny hanome an’ny mpianatra ity rafi-tantara manaraka ity. Azonao atao ny manasa ny mpianatra hanampy amin’ny fanamboarana ilay rafi-tantara mba hahatonga izany hifanaraka kokoa amin’ireo toe-javatra mety hatrehin’izy ireo mikasika ny Tenin’ny Fahendrena.
Ny namanao sasany izay tsy mpikamban’ny Fiangonana dia nanontany anao hoe nahoana ianao no tsy misotro kafe, dite, na toaka. Rehefa avy nanazava fohifohy ny zavatra fantatrao momba ny Tenin’ny Fahendrena ianao, dia milaza ilay namanao fa tena mamepetra be ny fahitan’izy ireo izany ary manontany izy ireo hoe: “Iza koa no olona te hiaina toy izany?”
-
Inona araka ny eritreritrao no fitsipika momba ny fahazoana fahalalana ara-panahy izay mety hanampy indrindra ka tsara hoheverinao rehefa mamaly ny namanao ianao? Nahoana?
Rehefa mamaly ny fanontaniana teo aloha ny mpianatra dia azonao atao ny manombantombana ny fahatakarany ny fitsipika momba ny fahazoana fahalalana ara-panahy. Azonao atao avy eo ny mampiasa ity sahanasa manaraka ity na mampifanaraka izany araka izay ilaina.
Zarao ho vondrona kely maromaro ny mpianatra. Asao ny vondrona tsirairay hisafidy fitsipika iray momba ny fahazoana fahalalana ara-panahy hohalalinina. Manasà mpianatra roa mba handalina ny fitsipika nosafidian’izy ireo avy amin’ny andiam-pehezan-teny 5–12 ao amin’ny Tahirin-kevitra fototra ho an’ny fifehezana fotopampianarana. Rehefa mandalina izy ireo dia asao ny vondrona tsirairay hanoratra fanontaniana iray na roa mifandray amin’ny fitsipika nosafidiany. Tokony ho fanontaniana afaka manampy azy ireo hamaly ny namany tamin’ilay toe-javatra teo aloha ireo fanontaniana ireo. Azonao atao ny mampiasa ireto fanontaniana manaraka ireto hatao ohatra na raha sendra mila fanampiana ny mpianatra.
Manao asa amim-pinoana
-
Inona no maha-fanaovana asa am-pinoana an’i Jesoa Kristy ny fanoloran-tenanao hankatò ny Tenin’ny Fahendrena (jereo ny Fotopampianarana sy Fanekempihavanana 89)?
-
Inona no fantatrao momba an’i Jesoa Kristy sy ny filazantsarany izay afaka manampy anao hankatò ny Tenin’ny Fahendrena na dia tsy takatrao tanteraka aza izany?
Mamakafaka ireo hevi-dehibe sy ireo fanontaniana amin’ny fomba fijery mibanjina ny mandrakizay
-
Inona no fiantraikan’ny fahatakarana ny drafitr’ Andriamanitra ho an’ny famonjena eo amin’ny fomba fijerinao ny Tenin’ny Fahendrena?
-
Inona avy ireo tombontsoa azo ao anatin’ny fotoana tsy maharitra izay inoan’ny olona fa afaka ny ho azony avy amin’ny tsy fankatoavana ny Tenin’ny Fahendrena? Manao ahoana ireo tombontsoa ireo raha oharina amin’ireo fitahiana maharitra nampanantenain’ny Mpamonjy rehefa mankatò ny Tenin’ny Fahendrena isika? (jereo ny Fotopampianarana sy Fanekempihavanana 89:18–21).
Mikatsaka fahatakarana misimisy kokoa amin’ny alalan’ireo loharanom-pahalalana nofinidin’ Andriamanitra
-
Inona avy ireo zavatra nianaranao nandritra ny fandalinanao ny Fotopampianarana sy Fanekempihavanana 89 izay mety hanampy rehefa mamaly ny namanao ianao?
-
Inona avy ireo andinin-tsoratra masina fifehezana fotopampianarana fanampiny sasantsasany izay afaka manampy?
-
Ahoana no nanovan’ireo loharanom-pahalalana nofinidin’ Andriamanitra toy ny Fanahy Masina, ny ray aman-dreninao, na ny mpitarika ao amin’ny Fiangonana, ny fanirianao hankatò ny Tenin’ny Fahendrena?
Rehefa mahavita ny mpianatra dia asao izy ireo hifanakalo fanontaniana amin’ny vondrona hafa. Omeo fotoana izy ireo hifanakalozan-kevitra amin’ny vondrona misy azy momba ny fomba hifamaian’izy ireo ny fanontaniany. Azon’ny mpianatra atao avy eo ny manao fanazaran-tena amin’ny filalaovana an-tsehatra ny fomba hamalian’izy ireo ao anatin’ilay rafi-tantara amin’ny alalan’ny fampiasana ny valin-tenin’izy ireo.
Aorian’ilay sahanasa dia asao ny mpianatra hizara ny hevi-baovao azony avy tamin’ireo fanontaniana na valin-teny nomen’ireo mpikambana ao amin’ny vondrona misy azy ireo. Raha misy fotoana dia azonao atao koa ny manasa ireo mpianatra hizara ny zavatra niainany rehefa nampianatra na nijoro ho vavolombelona momba ny Tenin’ny Fahendrena tamin’ny hafa.