Leksiyon 113: Doktrina ug mga Pakigsaad 98–101

Doktrina ug mga Pakigsaad 98

Ang Tanang Butang Molihok alang sa Atong Kaayohan

Sa ting-init sa 1833, ang tensyon tali sa mga taga-Missouri ug mga Santos sa Jackson County miresulta sa pag-atake sa bayolenteng mga manggugubot sa mga tawo diha sa kabalayan, pagpangguba og mga negosyo, ug mimando nga papahawaon sa Simbahan ang tanang miyembro sa maong dapit. Sa Doktrina ug mga Pakigsaad 98, gihupay ug gitambagan sa Manluluwas ang nag-antos nga mga Santos ug gisugo ang mga lider sa Simbahan kon unsaon pagdumala ang dili maayong pagtagad. Kini nga leksiyon motabang sa mga estudyante nga mapailobong maghulat sa Ginoo sa panahon sa kasakitan.

Mga Posibleng Kalihokan sa Pagkat-on

Pailob

Ikonsiderar ang pagsugod sa leksiyon pinaagi sa pagtabang sa mga estudyante sa paghunahuna bahin sa pailob. Makatabang kini nila nga makakat-on bahin sa mapailobong paghulat sa Ginoo panahon sa kasakitan. Pwede nimong isulat sa pisara ang pulong “pailob” ug isukna ang mosunod nga mga pangutana.

• Kanus-a lisod magpailob?

• Unsa ang pipila ka sitwasyon diin kinahanglan kang magpailob?

• Kon sukdon gikan sa 1–10, diin 10 ang labing mapailobon, unsa kaha ka kamapailobon?

• Unsang mga sitwasyon kaha diin gusto sa Ginoo nga magpailob ka? Ngano?

Pagpapahawa sa mga Santos gikan sa Jackson County, Missouri

Pwedeng basahon o ipamubo sa kaugalingong nimong mga pulong ang mosunod nga parapo aron tabangan ang mga estudyante nga masabtan ang konteksto sa kasaysayan sa seksiyon 98.

Dihang miabot sa Missouri ang mga Santos sa pagtukod sa Zion, dihay mitumaw nga tensiyon uban sa mga residente sa Jackson County. Mipasamot sa mga problema ang politikal nga panagbangi, dili pagsinabtanay sa relihiyon, ug dili maalamong mga desisyon (apil ang wala pagtukod sa templo base sa gisugo sa Manluluwas). Atol sa ting-init sa 1833, nagtapok ang mga bigilanteng grupo aron pugson sa pagpapahawa ang mga Santos sa Jackson County. Si Bishop Edward Partridge ug Charles Allen gikulata, gibulit og alkitran, ug gisabwagan og mga balahibo. Giguba ang imprentahanan ni W. W. Phelps, ug gikatagkatag ang mga pahina sa Basahon sa mga Kasugoan. Maisogong gikuha ni Vienna Jaques, uban nila sister Mary ug Caroline Rollins, ang daghang pahina sa mga pagpadayag kutob sa mahimo sa dili pa kini madaot. Midagan sila ug mitago dala ang mga pagpadayag gikan sa bayolenteng mangguggubot. Niana nga pag-ataki, daghang Santos ang napugos sa pagbiya sa ilang balay kay gitionan sila og pusil (tan-awa ang Mga Santos: Ang Istorya sa Ang Simbahan ni Jesukristo sa Ulahing mga Adlaw, vol. 1, Ang Sumbanan sa Kamatuoran, 1815–1846 [2018], 172–181).

Dasiga ang mga estudyante sa paghunahuna sa mga pagsulay o kasakitan nga ilang gisinati. Dasiga sila sa pagpangita sa personal nga pagpadayag samtang ilang ginatun-an ang Doktrina ug mga Pakigsaad 98 ug paminawon kon unsay gusto sa Ginoo nga himoon nila.

Basaha ang Doktrina ug mga Pakigsaad 98:1–3, nga mangita giunsa pagtubag sa Manluluwas ang mga pag-ampo sa mga Santos sa Jackson County.

• Sa unsang paagi nakatabang kini nga tambag sa mga Santos sa Missouri?

• Sa unsang paagi kini makatabang nimo o sa imong kaila nga makaya ang usa ka lisod nga butang?

• Unsa ang pipila ka baroganan nga imong mailhan gikan niini nga mga bersikulo?

Pwedeng ipakigbahin sa mga estudyante ang lainlaing nga mga baroganan. Usa ka paagi aron matabangan ang mga estudyante nga mailhan ang mga baroganan mao ang pagsulat sa mosunod nga dili kompletong pamahayag diha sa pisara ug dapita ang mga estudyante sa pagkompleto niini.

Samtang mapailobon kitang maghulat sa Ginoo, misaad Siya nga

Pwedeng taposon sa mga estudyante ang pamahayag gamit ang mga baroganan sama sa mosunod:

• tubagon ang atong mga pag-ampo.

• adunay moabot nga kaayohan gikan sa atong mga kasakit.

Mapailobong magahulat sa Ginoo

Pangita og inspirasyon aron mahibalo asa nga mga baroganan ang angay nimong tutokan. Ikonsiderar ang panginahanglan sa imong mga estudyante, ug pagpili og materyal nga para nimo mas makatabang. Hukmi kon hain sa mosunod nga mga materyal ang imong ipakigbahin sa imong mga estudyante. Dili nimo kinahanglang hisgotan tanan.

Ang laing kapilian mao ang pagbahin sa mga estudyante ngadto sa grupo ug paghatag og buluhaton sa matag grupo nga tun-an ang usa sa mga pamahayag o ang usa ka tudling sa Basahon sa Mormon. Dayon, dapita ang mga estudyante nga ipakigbahin sa klase ang ilang nakat-onan.

Si Presidente M. Russell Ballard sa Korum sa Napulog Duha ka Apostoles mitudlo bahin sa paghulat sa Ginoo. Basaha ang pamahayag, o motan-aw sa bidyo nga “Hope in Christ” gikan sa time code nga 9:13 hangtod 10:06, sa ChurchofJesusChrist.org.

Ang paghulat sa Ginoo nagpasabot og padayon nga pagkamasulundon ug espirituhanong pag-uswag paingon Kaniya. Ang paghulat sa Ginoo wala magpasabot nga naghulat lang nga walay gihimo. Kinahanglan nga dili kamo mobati nga anaa sa hulatanan nga lawak.

Ang paghulat sa Ginoo nagpasabot og paglihok. Akong nakat-onan sulod sa katuigan nga ang atong paglaom diha kang Kristo molambo kon moserbisyo kita sa uban. Ang moserbisyo sama sa pagserbisyo ni Jesus, sa natural nga paagi atong mapalambo ang atong paglaom diha Kaniya.

Ang personal nga paglambo nga mahimong maangkon sa usa ka tawo karon samtang naghulat sa Ginoo ug sa Iyang mga saad usa ka bililhon, sagrado nga elemento sa Iyang plano alang sa matag usa kanato. (M. Russell Ballard, “Paglaom diha kang Kristo,” Liahona, Mayo 2021, 55)

• Unsa ang pipila ka paagi nga mapailobon kitang makahulat sa Ginoo sa panahon sa kasakitan?

Gigamit ni Presidente Russell M. Nelson ang Doktrina ug mga Pakigsaaad 98:1–3 aron magtudlo kabahin sa mga tubag sa atong mga pag-ampo.

Kon kita mag-ampo uban sa mahangtorong panglantaw, dili nato angay nga ikahibulong kon ang atong gipaagasan og luha ug kinasingkasing nga mga pangamuyo dunggon. …

Ang Ginoo mipili sa Iyang labing kusganong mga pulong aron sa pagpasalig kanato! Selyo! Tugon! Nanumpa! Nagtakda! Dili mausab nga pakigsaad! Mga igsoon, tuo Kaniya! Ang Dios maminaw sa inyong tinud-anay ug kinasingkasing nga mga pag-ampo, ug ang inyong pagtuo mapalig-on. (Russell M. Nelson, “Atubanga ang Umaabot uban sa Hugot nga Pagtuo,” Liahona, Mayo 2011, 35)

• Unsay gitudlo kanimo niini nga pamahayag bahin sa Ginoo?

• Sa unsang paagi ang pagsabot niini nga mga pagtulun-an makatabang sa usa ka tawo nga mapailobong maghulat Kaniya?

Basaha ang 2 Nephi 2:1–2, nga mangita kon unsay gitudlo ni propeta Lehi sa iyang anak nga si Jacob bahin sa iyang mga kasakitan.

• Unsa ang pipila ka paagi nga ang Ginoo mahimong “magpahinungod sa [atong] mga kasakitan alang sa [atong] kaayohan”?

Ang tambag sa Manluluwas

Aron tun-an ang Doktrina ug mga Pakigsaad 98:11–22, mahimong ang mga estudyante magtrabaho uban sa usa ka pares o sa ginagmayng grupo. Mahimong mopili og baroganan nga tutokan ang mga estudyante ug dayon pangitaon ang tambag sa Manluluwas nga makatabang sa usa ka tawo sa paggamit sa maong baroganan.

Pananglitan, “siya mohatag ngadto sa matinod-anon … lagda ngadto sa lain nga lagda” (bersikulo 12) makatabang sa usa ka tawo nga mapailobong maghulat sa Ginoo samtang anam-anam Niyang tubagon ang ilang mga pag-ampo. Ang hugpong sa mga pulong nga “mosalikway sa tanan nga mga daotan ug mounong ngadto sa tanan nga mga maayo” (bersikulo 11) makatabang sa usa ka tawo nga magkinabuhi sa paagi nga mapahinabo sa Ginoo nga “maghiusa sa paglihok alang sa [ilang] kaayohan” ang ilang mga kasakitan (bersikulo 3).

Basaha ang Doktrina ug mga Pakigsaad 98:11–22, nga mangita sa tambag sa Manluluwas nga pwedeng makatabang nimo o sa laing tawo nga mapailobong maghulat sa Ginoo.

• Unsay imong nakita niini nga mga bersikulo nga pwedeng makatabang sa usa ka tawo nga mapailobong maghulat sa Ginoo?

• Unsang mga pulong o hugpong sa mga pulong ang imong ipakigbahin sa usa ka tawo nga nag-atubang og pagsulay? Ngano?

Mahimo nimong dapiton ang mga estudyante nga pamalandongan ang panahon dihang gitabangan sila sa Manluluwas nga makita ang kaayohan nga resulta sa panahon sa pagsulay. Pwede nimong ipasalida ang bidyo nga “od Will Lift Us Up” (4:59) o ang bidyo nga “Mountains to Climb” (5:05), nga anaa sa ChurchofJesusChrist.org.

Paghatag og higayon niadtong mga estudyante nga andam mopakigbahin kon giunsa sila pagtabang sa Manluluwas nga mapailobong maghulat Kaniya panahon sa pagsulay. Kon nahiangay, pwedeng ipakigbahin sa mga estudyante ang kasinatian diin nakita nila ang kaayohan nga resulta sa pagsulay.

Gamita ang mga pagtulun-an sa Manluluwas

Sa imong journal sa pagtuon, mainampoong tubaga ang mosunod nga mga pangutana gikan sa kon unsay imong nakat-onan karon:

• Unsay imong nakat-onan nga pwedeng modugang sa imong abilidad nga mapailobong maghulat sa Ginoo?

• Unsay imong gibati nga buhaton nga makatabang nimo nga mapailobong maghulat sa Manluluwas dihang nag-atubang ka og mga hagit?

Sa pagtapos sa klase, pwede kang magpakigbahin og kasinatian dihang mapailobon kang naghulat sa Ginoo o dihang gigamit Niya ang pagsulay para sa imong kaayohan ug sa Iyang kahimayaan. Pwede kang mopakigbahin sa imong paksaksi nga andam ang Langitnong Amahan nga panalanginan kita panahon sa kalisdanan samtang maghulat kita Kaniya.

Dugang nga mga Kapanguhaan

Unsa kaha kon mobati ko nga wala tubaga ang akong mga pag-ampo?

Si Elder Jeffrey R. Holland sa Korum sa Napulog Duha ka Apostoles mipamatuod:

Dunay mga panahon sa atong kinabuhi nga gani ang atong pinaka-espirituhanong paningkamot, ug matinguhaong mga pag-ampo dili moani sa kadaogan nga atong gipangandoy, kabahin man sa dagko nga mga isyu sa kalib[o]tan o sa ginagmay nga personal nga mga isyu. Busa samtang magtrabaho kita ug magpaabot sa mga tubag sa pipila sa atong mga pag-ampo, akong ihalad kaninyo ang akong apostolikanhong saad nga kini gidungog ug gitubag, apan tingali dili sa panahon o sa paagi nga atong gusto. Apan kanunay kini nga gitubag sa panahon ug sa paagi nga kini tubagon sa usa nga nasayod sa tanan ug walay paglurang nga maloluy-ong ginikanan. Pinalangga kong mga igsoon, palihog sabta nga Siya kinsa dili gayud magduka o matulog mahunahunaon alang sa kalipay ug sa umaabut nga kahimayaan sa Iyang mga anak labaw sa tanan nga buhaton sa usa ka balaang binuhat. . Siya ang mahimayaon nga hulagway sa tiunay nga gugma, ug Manggiluy-on nga Amahan ang Iyang ngalan. (Jeffrey R. Holland, “Naghulat sa Ginoo,” Liahona, Nob. 2020, 115–116)

Unsay akong mahimo dihang mag-atubang og mga hagit?

Si Sister Michelle D. Craig sa Kinatibuk-ang Kapangulohan sa Young Women mipasabot:

Kon ang lisod nga mga panahon moabot, ako maningkamot sa paghinumdom nga ako mipili sa pagsunod ni Kristo sa wala pa ako moari sa kalibotan ug nga ang mga hagit sa akong hugot nga pagtuo, akong kahimsog, ug akong paglahutay tanan kabahin sa rason nga anaa ko diri. Ug ako sigurado nga dili maghunahuna nga ang mga pagsulay karon makapaduda sa gugma sa Dios alang kanako o makapausab sa akong hugot nga pagtuo ngadto sa pagduhaduha. Ang mga pagsulay wala magpasabot nga ang plano napakyas, kini kabahin sa plano nga gituyo sa pagtabang nako nga mangita sa Dios. Ako mahimong mas sama Kaniya kon ako molahutay nga mapailobon, ug hinaot pa, sama Niya, kon naa sa pag-antos, ako hugot kaayo nga mag-ampo. (Michelle D. Craig, “Kinasingkasing,” Liahona, Nob. 2022, 61–62)

Asa ko makakat-on og dugang bahin sa pagpapahawa sa mga Santos gikan sa Jackson County?

• Mga Santos, 1:172–193

• David W. Grua, “Waiting for the Word of the Lord,” in Konteksto sa mga Pagpadayag [2016]

• Mga Hisgotanan sa Kasaysayan sa Simbahan, “Ang Kagubot sa Jackson County,” ChurchofJesusChrist.org/study/history/topics

Dugang nga mga Kalihokan sa Pagkat-on

Ang kaaghop ni Bishop Edward Partridge

Rebyuha ang istorya sa pagbulit og alkitran ug pagsabwag og balhibo kang Bishop Partridge sa Mga Santos, 1:179–180. Dapita ang mga estudyante nga tun-an ang gihunahuna ni Bishop Partridge bahin sa insidente (makita sa ubos), nga mangita kon giunsa niya pagpakita ang mga pagtulun-an sa Manluluwas sa Doktrina ug mga Pakigsaad 98:1–3. Dapita ang mga estudyante sa pagkonsiderar kon unsaon nila pagtubag sa susama nga mga paagi.

Si Bishop Edward Partridge nahinumdom:

Sa wala pa ko gibulit sa alkitran ug gisabwagan sa balahibo, gipasulti usa ko. Giingnan nako sila nga giantos sa mga Santos ang mga pagpanglutos sa tanang kasaysayan sa kalibotan; nga wala koy nahimo nga makapasilo kang bisan kinsa; nga kon ila kong dagmalan, gidagmalan nila ang inosenteng tawo; nga andam akong mag-antos alang ni Kristo; pero ang paghawa sa nasod dili ko mouyon sa ang pagbiya sa dapit. …

… Giantos nako ang pagpangdagmal uban sa pailob ug kaaghop nga nakapahingangha sa katawhan, nga mitugot nga mobiya ko sa hilom, daghan nila ang klarong nakadayeg, sa akong hunahuna morag natandog ang ilang kaluoy; ug sa akong bahin, napuno gyod ko sa Espiritu ug sa gugma sa Dios, nga wala ko nagdumot niadtong naglutos nako o kang bisan kinsa. (Edward Partridge, in History, 1838–1856 [Manuscript History of the Church], volume A-1, 327–28, josephsmithpapers.org)

Pagluwas sa Basahon sa mga Kasugoan

Aron matabangan ang mga estudyante nga makita ang ehemplo sa batan-ong mga babaye nga nagpakitag kalig-on ug kaisog panahon sa pagsulay, mahimo nimong ipakigbahin ang istorya ni Mary ug Caroline Rollins gikan sa Mga Santos, 1:178–79. Pwede nimong hisgotan kon sa unsang paagi madasig sa ehemplo niini nga mga sister ang mga batan-on karon.

Doktrina ug mga Pakigsaad 98:23–48. Ang mga balaod sa Ginoo sa pagbalos, giyera, ug pagpasaylo

Kon makabenepisyo ang mga estudyante sa pagkat-on og dugang bahin sa reaksyon sa Manluluwas sa pagpanglutos, dapita sila nga ihulagway ang pipila ka posibleng reaksyon sa mga tawo dihang masilo o mapasakitan sila sa uban. Ipasabot ang pagpadayag nga narekord sa Doktrina ug mga Pakigsaad 98:23–48, nagtudlo ang Ginoo ug mga baroganan nga makatabang natong mahibalo unsaon pagsanong sa dihang masakitan ta sa mga gisulti o mga gihimo sa uban. Mahimo nimong organisahon ang klase sa pagpares-pares o sa gagmay nga mga grupo. Pwedeng mopili ang matag grupo ug usa sa mosunod nga mga hilisgotan aron tun-an ug pwede silang mag-andam aron ilang ipakigbahin sa klase ang ilang nakat-onan.

1. Doktrina ug mga Pakigsaad 98:23–32—Ang balaod sa Manluluwas sa pagsanong sa pagpanglutos

2. Doktrina ug mga Pakigsaad 98:33-38—Ang balaod sa Manluluwas bahin sa giyera

3. Doktrina ug mga Pakigsaad 98:39-48—Ang balaod sa Manluluwas bahin sa pagpasaylo

Pwede nimong dapiton ang mga estudyante sa paghisgot sa mosunod nga mga pangutana gamit ang mga senaryo sa ubos, o pwedeng maghimo ang mga estudyante og parehas nga mga sitwasyon nga konektado kanila.

• Unsay imong himoon kon mahitabo kini?

• Sa unsang paagi ang Manluluwas naghangyo kanato sa pagsanong sama sa Doktrina ug mga Pakigsaad 98?

• Si Nephi gigapos sa iyang mga igsoon ug gibiyaan sa disyerto, hapit mamatay samtang naa siya sa barko paingon sa yutang saad, ug nagplano nga patyon siya human pagkamatay si Lehi.

• Dihang nag-post kag mga litrato sa Manluluwas ug sa templo online, mikomentaryo ang imong schoolmate og dili maayo diha sa social media feed.

• Usa ka misyonaryo nga nag-alagad sa imong ward o branch ang misulat nimo ug nangayog pasaylo kay gidaug-daog ka niya niadtong high school pa mo.

Pwede usab nimong ipasalida ang bidyo nga “That We Might Be One: The Story of the Dutch Potato Project” (11:57) gikan sa ChurchofJesusChrist.org. Gipakigbahin niini nga bidyo ang istorya sa mga Santos sa Netherlands kinsa andam nga misakripisyo sa ilang mga rasyon sa pagkaon para sa ilang kanhing mga kaaway human sa Ikaduhang Gubat Kalibotan. Pwede nimong dapiton ang mga estudyante sa pagpangita kon giunsa pagpanalangin sa Manluluwas ang Dutch nga mga Santos para sa ilang pagpaningkamot nga mahisama kang Kristo.