Leksiyon 115: Doktrina ug mga Pakigsaad 98–101

Doktrina ug mga Pakigsaad 101:43–101

Mga Sambingay mahitungod sa Zion

Dihang nadungog ni Propetang Joseph Smith ang grabeng pagpanggukod nga giantos sa mga Santos sa Missouri, mihangyo siya sa Ginoo para nila. Isip bahin sa Iyang tubag, migamit ang Manluluwas og mga sambingay aron tambagan ug hupayon ang mga Santos. Kini nga leksiyon mohatag og kahigayonan sa mga estudyante nga tun-an ang usa ka sambingay ug diskobrehon ang espirituwal nga kahulogan niini.

Mga Posibleng Kalihokan sa Pagkat-on

Si Jesukristo kanunay magtudlo gamit ang mga sambingay

Ikonsiderar ang pagpakita og komon nga mga butang sama sa mga gamit sa pag-eskwela, mga sinina, o mga elektronik. O dapita ang mga estudyante nga tan-awon ang mga butang sulod sa classroom o mga butang nga dala nila. Dapita ang mga estudyante nga mopili og butang ug maghunahuna og mamugnaon nga paagi aron ikompara kini sa usa ka aspeto sa plano sa Langitnong Amahan o kang Jesukristo ug sa Iyang ebanghelyo. Pananglitan, pwede nilang ikompara ang cell phone sa pag-ampo, kay atong ginagamit ang pag-ampo aron makig-istorya sa Langitnong Amahan. Dapita ang mga estudyante nga ipakigbahin ang ilang butang ug espirituwal nga pagkompara ngadto sa iyang pares o sa klase.

Sa kasagaran si Jesukristo nagtudlo pinaagi sa paggamit og mga simpleng sugilanon nga nailhan isip mga sambingay. Niini nga mga sambingay, gikompara ni Jesus ang pamilyar nga mga butang o sitwasyon ngadto sa espirituwal nga mga kamatuoran (tan-awa sa Giya ngadto sa mga Kasulatan, “Sambingay,” scriptures.ChurchofJesusChrist.org).

• Unsa ang pipila ka ehemplo sa mga sambingay nga gitudlo sa Manluluwas?

• Unsa ang pipila ka espirituwal nga mga kamatuoran ang atong makat-onan gikan sa mga pagtulun-an sa Manluluwas diha sa maong mga sambingay?

Pananglitan, pwedeng ipakigbahin sa mga estudyante ang sambingay sa maayong Samarianhon (tan-awa sa Lucas 10:25–37), nga nagtudlo bahin sa paghigugma ug pag-alagad sa uban sama sa ginahimo sa Manluluwas. O pwede nilang ipakigbahin ang sambingay sa napulo ka birhen (tan-awa sa Mateo 25:1–13), nga nagtudlo kanato nga mangandam para sa Ikaduhang Pag-anhi sa Manluluwas.

Aron maandam ang mga estudyante sa pagtuon sa usa ka sambingay bahin sa katubsanan sa Zion, ikonsiderar ang paghangyo sa mga estudyante nga ipakigbahin kon unsay ilang nahinumdoman sa bag-o lang nga mga leksiyon bahin sa mga pagsulay nga giantos sa mga Santos sa Missouri. Kon kinahanglan, pwede nimong ipakigbahin ang mosunod nga summary:

Panahon sa grabeng panglutos, migamit ang Manluluwas og mga sambingay aron tudloan si Joseph Smith ug ang mga Santos bahin sa katubsanan sa Zion (tan-awa sa Doktrina ug mga Pakigsaad 101:43). Sa ulahing bahin sa 1833, napapahawa sa bayolenteng manggugubot ang kapin sa 1,000 ka Santos sa Jackson County, Missouri, ug kapin sa 200 sa ilang mga balay ang gisunog. Gipangutana ni Propeta Joseph Smith ang Ginoo kon nganong gipapahawa sa Zion ang mga Santos ug kon unsay angay nilang himoon aron makabalik sila. Mitubag ang Ginoo gamit ang usa ka sambingay.

Pagtuon sa mga sambingay

Gitudlo ni Elder David A. Bednar ang bahin sa pagtuon sa mga sambingay sa Manluluwas:

Ang gipasabot nga kahulogan o mensahe sa sambingay sa kasagarana dili tataw nga gipahayag. Hinuon, ang istorya nagpahayag lamang og balaanon nga kamatuoran ngadto sa usa ka tigdawat base sa iyang hugot nga pagtuo sa Dios, personal nga espirituhanon nga pagpangandam, ug kaandam nga magkat-on. Mao nga, ang usa ka indibidwal kinahanglan nga mogamit og moral nga kabubut-on ug aktibong “mangayo, mangita, ug manuktok” [tan-awa ang Mateo 7:7–8; Lucas 11:9–10] aron makadiskobre sa mga kamatuoran nga nasulod diha sa usa ka sambingay. (David A. Bednar, “Isul-ob ang Imong Kusog, O Zion,” Liahona, Nob. 2022, 92)

• Sa unsang paagi maimpluwensiyahan sa atong pagtuo kang Jesukristo ang atong katakos sa pagsabot sa iyang mga pagtulun-an?

• Unsay ginapakita sa atong paningkamot sa pagtuon sa mga pulong sa Manluluwas ngadto Kaniya bahin sa atong gibati para Niya?

Ikonsiderar ang paghatag sa mga estudyante sa handout nga nag-ulohang “Unsaon Pagtuon sa mga Sambingay sa Manluluwas” aron magiyahan sila sa niining tibuok leksiyon.

Unsaon Pagtuon sa mga Sambingay sa Manluluwas

1. Pangitaa ang importanteng mga detalye. Kini nga mga detalye mahimong maglakip sa mga tawo, mga dapit, mga butang, mga aksyon, o mga panghitabo.

2. Maghimo og mga pagtandi. Ilha kon unsay posibleng girepresentahan o gisimbolohan sa matag mga detalye diha sa sambingay. Makatabang tingali ang panultol sa konteksto, mga tabang sa pagtuon sa kasulatan, ug pagpamalandong.

3. Pagkaplag og bililhong mga leksiyon. Human makomparar, pangayo og tabang gikan sa Espiritu Santo aron makita ang bililhong mga leksiyon nga gitudlo sa Manluluwas diha sa sambingay.

4. Tinoa ang personal nga paggamit. Pangayog tabang sa Langitnong Amahan ug sa Espiritu Santo aron masayod unsaon nimo nga magamit sa personal ang mga leksiyon nga imong nadiskobrehan.

Ang sambingay sa halangdon nga tawo

Ang mosunod nga kalihokan makatabang sa mga estudyante nga mapraktis ang upat ka lakang sa pagtuon og mga sambingay. Ikonsiderar ang pagpakita sa mosunod nga tsart o kopyahon kini diha sa pisara. Paghimog unom ka grupo, ug tahasi ang matag-usa aron kompletohon ang magkalaing kahon diha sa tsart. O dapita ang mga estudyante nga kopyahon ang tsart sa ilang mga journal sa pagtuon ug indibidwal kining sulatan.

Mangita og importanteng mga detalye

Basaha ang Doktrina ug mga Pakigsaad 101:43–62. Para sa matag grupo sa mga bersikulo, paghimog simpleng drowing o pagsulat og summary aron ihulagway ang mga bersikulo.

Doktrina ug mga Pakigsaad 101:43–45. Ang mga instruksiyon sa halangdon nga tawo	Doktrina ug mga Pakigsaad 101:46–50. Ang gihimo sa mga sulugoon
Doktrina ug mga Pakigsaad 101:51. Ang resulta sa gihimo sa mga sulugoon	Doktrina ug mga Pakigsaad 101:52–54. Ang reaksyon sa halangdon nga tawo
Doktrina ug mga Pakigsaad 101:55–58. Ang sunod nga mga instruksiyon sa halangdon nga tawo	Doktrina ug mga Pakigsaad 101:59–62. Ang tubag sa mga sulugoon

Pagkahuman sa mga estudyante, dapita sila nga ipakigbahin ang ilang nadiskobrehan. Seguradoha nga nasabtan nila ang mga detalye sa sambingay.

Ikonsiderar ang pagkompleto sa kataposang lakang sa tulo ka lakang sa pagtuon sa sambingay isip usa ka klase.

Paghimo og mga pagtandi

• Unsang mga panultol ang makatabang nato nga makit-an nga ang halangdon nga tawo nagrepresentar ni Jesukristo?

• Unsa kaha ang girepresentahan sa ubasan o sa tore?

• Sa unsang paagi usahay ang atong mga aksiyon mahisama nianang mga sulugoon?

Ikonsiderar ang pagdapit sa mga estudyante nga irebyo ang tudling sa doktrinal nga kahanas sa Ezekiel 3:16–17 aron makita ang posibleng pagkapareho sa mga tigbantay sa tore. Ang mosunod nga teksto makatabang tingali sa mga estudyante nga makahimo og dugang nga mga pagtandi:

Sama sa mga sulugoon sa sambingay nga mibalibad sa pagtukod sa tore, gibaliwala sa mga Santos sa Missouri ang pagtukod sa templo nga mao ang gisugo kanila sa Ginoo (tan-awa sa Doktrina ug mga Pakigsaad 57:3; 84:3–4; 97:10–12).

Para sa mga Santos sa Jackson County, ang sulugoon nga gihisgotan sa bersikulo 55 nagrepresenta ni Joseph Smith (tan-awa ang Doktrina ug mga Pakigsaad 103:21). Gisunod ni Joseph Smith ang sugo sa Ginoo ug miorganisar og grupo nga gitawag og Zion’s Camp aron tubson ang yuta sa Zion. Hisgotan ang Kampo sa Zion sa mga leksiyon diha sa Doktrina ug mga Pakigsaad 103 ug 105.

Pagdiskobre og importante nga mga leksiyon

• Unsang pipila ka importanteng leksiyon ang gitudlo sa Ginoo pinaagi niini nga sambingay?

• Unsa ang gitudlo kanimo niini nga sambingay bahin sa mga kinaiya ni Jesukristo?

  Kon naglisod ang mga estudyante sa pag-ila sa importanteng mga leksiyon, ikonsiderar ang paghatag og usa o kapin pa sa mosunod nga mga baroganan. Dapita ang mga estudyante nga ipakigbahin kon sa unsang paagi gipakita sa sambingay kini nga mga kamatuoran. Kon tumanon nato ang sugo sa Ginoo, Iya kitang lig-onon aron makabarog batok sa espirituwal ug pisikal nga mga kaaway. Ang mga propeta ingon og mga tigbantay sa tore, nga naghatag nato og mga pasidaan gikan sa Ginoo para sa nagsingabot nga mga peligro. Pinaagi sa buhat sa templo, giandam kita sa Manluluwas nga makabarog batok sa kaaway.

• Nganong mahimong makatabang kini nga mga leksiyon alang sa mga Santos sa 1833?

• Giunsa nimo pagkakita sa mga ebidensiya sa usa o kapin pa niini nga mga kamatuoran sa imong kinabuhi?

Itino ang personal nga paggamit

• Unsa ang pipila ka paagi nga imong magamit kini nga sambingay sa atong panahon?

Pangayo og tabang gikan sa Espiritu Santo aron mailhan ang usa o kapin pang mga paagi nga pwede nimong magamit ang usa ka kamatuoran nga importante para nimo niini nga sambingay. Isulat ang imong mga impresyon diha sa imong journal sa pagtuon.

Dapita ang mga estudyante nga ipakigbahin ang ilang nakat-onan bahin sa pagtuon sa mga sambingay nga magamit nila aron mapauswag ang ilang personal nga pagtuon sa mga kasulatan. Dasiga ang mga estudyante sa ilang paningkamot nga magpakitag pagtuo ni Jesukristo samtang personal nilang tun-an, pamalandongon, ug i-apply ang Iyang mga pagtulun-an.

Dugang nga mga Kapanguhaan

Doktrina ug mga Pakigsaad 101:77–79. Unsa ang katuyoan sa Dios sa pagtukod sa Konstitusyon sa Estados Unidos?

Si Presidente Dallin H. Oaks sa Unang Kapangulohan mitudlo:

Unsa ang katuyoan sa Dios sa pagtukod sa Konstitusyon sa Estados Unidos? Ato kining makita sa doktrina sa moral nga kabubut-on. Sa unang dekada sa gipahiuli nga Simbahan, ang mga miyembro sa kasadpan nga utlanan nag-antos sa pribado ug publikong pagpanglutos. Sa usa ka bahin tungod kini sa ilang pagsupak sa pagpangulipon nga nahitabo kaniadto sa Estados Unidos. Niining walay palad nga mga kahimtang, ang Dios mipadayag pinaagi ni Propeta Joseph Smith sa mahangturon nga mga kamatuoran mahitungod sa Iyang doktrina.

Ang Dios mihatag sa Iyang mga anak og moral nga kabubot-on—ang gahom sa paghukom ug sa pagbuhat. Ang labing maanindot nga kahimtang alang sa paggamit nianang kabubot-on mao ang kinadak-an nga kagawasan alang sa kalalakin-an ug kababayen-an sa pagbuhat sumala sa iyang indibidwal nga mga pagpili. Dayon, ang pagpadayag gipasabot, nga “ang matag tawo mao ang manubag sa iyang kaugalingon nga mga sala sa adlaw sa paghukom” (Doktrina ug mga Pakigsaad 101:78). “Busa,” ang Ginoo mipadayag, “dili matarong nga bisan kinsa nga tawo mahimo nga ulipon ngadto sa usag usa” (Doktrina ug mga Pakigsaad 101:79). (Dallin H. Oaks, “Pagdepensa sa Atong Balaanong Dinasig nga Konstitusyon,” Liahona, Mayo 2021, 106)

Doktrina ug mga Pakigsaad 101:76, 86–88. Unsay nahitabo dihang nangayo og tabang gikan sa mga lider sa gobyerno ang mga Santos?

Misunod ang mga Santos sa Missouri sa mga instruksyon sa Ginoo ug miapelar sa mga lider sa gobyerno “alang sa kahusayan” (Doktrina ug mga Pakigsaad 101:76), o bayad sa danyos para sa nawala nilang kabtangan. Apil niini nga mga lider ang mga lokal nga maghuhukom, gobernador sa Missouri nga si Daniel Dunklin, ug si Andrew Jackson, nga nag-alagad isip presidente sa Estados Unidos. Bisan sa binalik-balik nga mga paningkamot, ang mga Santos sa Missouri napakyas sa pagkadawat og panalipod sa mga inhustisya nga ilang giantos.

Para sa dugang impormasyon, tan-awa ang “Kapitulo 39: Doktrina ug mga Pakigsaad 101” sa Manwal sa Estudyante sa Doktrina ug mga Pakigsaad alang sa institute.

Doktrina ug mga Pakigsaad 101:53. Sa unsang paagi naghatag kanako og proteksiyon ang templo?

Usa sa mga ipasabot sa sambingay sa halangdon nga tawo mao nga kon nagtukod lang unta og templo ang mga Santos sa Missouri sama sa gisugo sa Ginoo, naprotektahan unta sila (tan-awa sa Doktrina ug mga Pakigsaad 101:53).

Nagtudlo ang mga lider sa Simbahan nga makadawat kita og proteksyon pinaagi sa pagtuman sa mga gihimo natong pakigsaad sa templo.

Si Sister Jean B. Bingham, kanhi Kinatibuk-ang Presidente sa Relief Society, mitudlo:

Kanunay akong gipasaligan nga ang pagtuman sa mga pakigsaad nga atong gihimo ngadto sa Dios motugot kanato sa paggamit sa gahom sa Manluluwas, nga molig-on kanato diha sa dili kapugngan nga mga pagsulay, mohatag sa proteksiyon gikan sa impluwensiya sa kaaway, ug moandam kanato alang sa mahangtorong himaya. (Jean B. Bingham, “Ang mga Pakigsaad uban sa Dios Makalig-on, Makapanalipod, ug Makaandam Kanato alang sa Mahangtoron nga Himaya,” Liahona, Mayo 2022, 67)

Dugang nga mga Kalihokan sa Pagkat-on

Uban pang mga sambingay sa Doktrina ug mga Pakigsaad 101

Ang sambingay sa trigo ug mga sagbot

Ikonsiderar ang pagpraktis sa upat ka lakang sa pagtuon sa mga sambingay uban sa klase gamita ang Doktrina ug mga Pakigsaad 101:63–67.

Pangitaa ang importanteng mga detalye.

Dapita ang mga estudyante nga basahon ang Doktrina ug mga Pakigsaad 101:63–67 ug pangitaon ang importanteng mga detalye.

Mabantayan tingali sa mga estudyante nga giayo pag-ani ang mga trigo ug gibutang sa kamalig, samtang gihiktan ug gisunog ang mga sagbot. Timan-i nga ang mga kamalig mao ang butanganan sa mga bag-ong ani nga lugas.

Maghimo og mga pagtandi.

• Unsa ang pipila ka “balaang dapit” (bersikulo 64) nga pwedeng magrepresentar sa mga kamalig?

• Unsang mga panabot ang gihatag niini nga ilhanan bahin sa kon unsay girepresentahan sa mga trigo ug sagbot?

Usa sa posibleng gisimbolohan sa mga kamalig mao ang balaang mga templo. Tan-awa sa (David A. Bednar, “Madungganon nga Paghupot og usa ka Ngalan ug Katungdanan,” Liahona, Mayo 2009, 97)

Pagkaplag og bililhong mga leksiyon.

• Kon nahibalo ta nga ang mga kamalig nagsimbolo sa balaang mga dapit sama sa mga templo, unsang mga leksiyon ang gusto tingali sa Manluluwas nga atong masabtan gikan niini nga sambingay?

Usa sa posibleng leksiyon nga makita tingali sa mga estudyante mao nga gidapit kita sa Manluluwas nga maghiusa sa Iyang templo aron makadawat sa Iyang proteksiyon ug andamon ang atong kaugalingon para sa kinabuhing dayon.

Tinoa ang personal nga paggamit.

• Unsaon nimo paggamit sa imong kinabuhi ang leksiyon nga imong nadiskobre?

Ang sambingay sa dili patas nga maghuhukom

Pwede usab magpraktis ang mga estudyante sa mga lakang pinaagi sa pagbasa sa sambingay sa dili patas nga maghuhukom sa Doktrina ug mga Pakigsaad 101:81–84. Human mapakigbahin sa mga estudyante kon unsay ilang nadiskobrehan, ipasabot nga sa Doktrina ug mga Pakigsaad 101, gigamit sa Manluluwas ang sambingay sa dili patas nga maghuhukom aron hatagan og instruksiyon ang gipanggukod nga mga Santos nga mangayo og tabang sa mga opisyal sa gobyerno (tan-awa ang mga bersikulo 85–92). Gitudlo usab Niya kini nga sambingay panahon sa iyang mortal nga pagpangalagad aron tudloan ang iyang mga tinun-an bahin sa pag-ampo (tan-awa ang Lucas 18:1–8; Doktrina ug mga Pakigsaad 101:81).

Doktrina ug mga Pakigsaad 101:76–80. Konstitusyon sa Estados Unidos

Aron matabangan ang mga estudyante nga makakat-on og dugang bahin sa Konstitusyon sa Estados Unidos ug kon sa unsang paagi ang mga baroganan niini magamit sa tibuok kalibotan, ikonsiderar ang pagtuon sa pakigpulong nga “Pagdepensa sa Atong Balaanong Dinasig nga Konstitusyon,” nga gihatag ni Presidente Dallin H. Oaks sa Abril 2021 nga kinatibuk-ang komperensiya. Ikonsiderar ang paggamit sa usa sa mga ideya sa leksiyon nga “Template: Pagtulun-an sa mga Lider sa Simbahan.”

Moral nga kabubut-on

Dapita ang mga estudyante nga hisgotan kon unsaon nila pagtubag sa usa ka tawo nga dili gustong mosunod sa mga pagtulun-an sa Manluluwas ug moingon, “Aduna koy kaugalingong kabubut-on. Akoy magbuot kon unsay gusto nako.”

Basaha ang Doktrina ug mga Pakigsaad 101:78. Pangita og panabot niini nga bersikulo nga pwede nimong iapil sa imong tubag.

• Sa unsang paagi ang pagkahibalo nga manubag kita sa Manluluwas makaimpluwensya sa atong panglantaw ug paggamit sa atong kabubut-on?

Ikonsiderar ang pagdapit sa mga estudyante nga basahon ang tudling sa doktrinal nga kahanas sa 2 Nephi 2:27, nga mangita og dugang nga panabot kabahin sa kabubut-on. Pwede nilang ikonektar kini nga bersikulo sa Doktrina ug mga Pakigsaad 101:78.

Gipakigbahin ni Presidente Ezra Taft Benson (1899-1994) ang mosunod bahin sa paggamit sa kabubut-on:

Gawasnon kita sa pagpili, apan dili kita gawasnon sa pag-usab sa mga sangpotanan niadtong mga pagpili. (Mga Pagtulun-an sa mga Presidente sa Simbahan: Ezra Taft Benson [2014], 74)

Aron mas mahulagway ang doktrina sa moral nga kabuuot-on, ikonsiderar ang pagtan-aw sa “Agency” (6:20), anaa sa ChurchofJesusChrist.org.