Leksiyon 114: Doktrina ug mga Pakigsaad 98–101

Doktrina ug mga Pakigsaad 101:1–42

“Bisan pa sa Ilang mga Sala, ang Akong Kasingkasing Napuno sa Kapuangod”

Ang mga Santos sa Missouri nakigbisog sa matarong nga pagkinabuhi uyon sa gisugo sa Ginoo. Ingon og resulta, nawala nila ang dakong bahin sa gahom ug proteksiyon sa Ginoo ug gipapahawa sa ilang mga kaaway sa ilang mga pinuy-anan. Bisan pa niini, gipasaligan sila sa Ginoo sa Iyang pagmahal ug kaluoy alang kanila. Gituyo kini nga leksiyon aron tabangan ang mga estudyante nga mabati ang pagmahal ug kaluoy sa Manluluwas para nila.

Mga Posibleng Kalihokan sa Pagkat-on

Mga rason sa pag-antos

Ikonsiderar ang pagpakita sa mosunod nga hulagway ug pagpangutana sa mga estudyante sa lainlaing posibleng rason kon nganong naguol ang batan-ong babaye. Pwede nimong ilista ang tubag sa mga estudyante sa pisara.

Human sa igong oras, ipakigbahin sa mga estudyante nga lainlain og hinungdan kon nganong mag-atubang kita og mga pagsulay. Apil niini ang atong kaugalingon nga mga pagpili, natural nga bahin sa kinabuhi, o ang sayop nga mga pagpili sa uban. Ikonsiderar ang paglista niining tulo ka kategoriya sa pikas bahin sa pisara ug tugotan ang mga estudyante nga ihan-ay ang mga rason nga ilang gilista sa matag kategoriya.

Pwede kang modangop ngadto sa pamahayag sa seksiyon nga “Dugang nga mga Kapanguhaan” gikan sa sinulat sa Mga Hilisgotan ug mga Pangutana nga “Kalisdanan [Adversity]” para sa dugang impormasyon niining tulo ka rason sa pag-antos.

Ang tubag sa Ginoo sa pag-antos sa mga Santos

Pwede nimong basahon o ipamubo sa kaugalingon nimong mga pulong ang mosunod nga impormasyon sa konteksto.

Sa 1833, ang oposisyon nahimong bayolente samtang ang mga manggugubot sa Missouri migamit og pwersa sa pagpapahawa sa mga Santos gikan sa Independence. Wala mahibalo ang mga Santos kon mosukol ba sila o moikyas samtang nagkatugnaw ang panahon ug nagkagrabe ang tensiyon. Niining panahona, anaa sa Kirtland, Ohio si Propeta Joseph Smith apan nakadawat og kasayoran sa kahimtang sa mga Santos. Kay nahibalo sa ilang kasakit ug kagul-anan, miampo ang Propeta sa Langitnong Amahan nga pabalikon sila sa ilang mga balay sa Missouri. Nakadawat siya og pagpadayag nga nailhan karon isip Doktrina ug mga Pakigsaad 101. (Para sa dugang nga impormasyon bahin sa mga pagsulay sa mga Santos, tan-awa sa Mga Santos, vol. 1, Ang Sumbanan sa Kamatuoran, kapitulo 17.)

Basaha ang Doktrina ug mga Pakigsaad 101:1-2, nga mangita kon nganong gitugotan sa Ginoo nga mag-antos ang mga Santos og ingon niadto.

• Unsay imong nakaplagan?

• Unsa kahay uban pang hinungdan sa ilang pag-antos?

Tabangi ang mga estudyante nga masabtan nga gawas sa pag-antos tungod sa ilang mga kalapasan, nag-antos ang mga Santos tungod sa sayop nga mga pagpili sa uban (grupo sa mga manggugubot) ug isip natural nga bahin sa kinabuhi (ang bugnaw nga tingtugnaw).

Alang sa mosunod nga kalihokan, pwede nimong pares-pareson ang mga estudyante. Pwede nimo silang dapiton sa pagbasa sa mga bersikulo, ang usa ka pares mangita sa mga butang nga sakit paminawon ug ang laing pares mangita sa mga butang nga makapahupay paminawon.

Basaha ang Doktrina ug mga Pakigsaad 101:3–9, nga mangita sa mga butang nga makapahupay paminawon ug sakit paminawon.

• Unsay imong nakaplagan?

• Sumala sa mga bersikulo 3 ug 9, unsay panglantaw sa Ginoo niadtong mga nakasala?

  Pwedeng ilhon sa mga estudyante ang mga kamatuoran, lakip ang bisan kon nakasala kita, ang Ginoo molugway sa pagmahal ug kaluoy ngari kanato.

  Tabangi ang mga estudyante nga hisgotan kon sa unsang paagi kini nga baroganan motabang nato nga madangop ngadto sa Ginoo atol sa atong panahon. Makatabang ang mga pangutana nga sama sa mosunod.

• Unsay imong makat-onan bahin sa Ginoo samtang gilugway Niya ang kapuangod ug kaluoy ngari kanato kon kita makasala imbes dili tagdon ang atong mga sala?

• Sa imong hunahuna, nganong makahimo si Jesukristo nga ang kapuangod ug kaluoy ang ibalos sa atong mga sala?

Nadasig sa Kinaiya ni Kristo

Dapita ang mga estudyante nga mamalandong kon nganong personal nilang gikinahanglan ang kapuangod ug kaluoy sa Manluluwas. Hangyoa sila sa pagpamalandong sa unsang paagi napanalanginan ang ilang kinabuhi pinaagi sa pagdawat sa Iyang kapuangod ug kaluoy.

Hatagi ang mga estudyante og mga kahigayonan sa paghisgot sa mga kamatuoran sa ebanghelyo. Ang mosunod nga kalihokan magdasig sa mga estudyante nga tun-an ug dayon hisgotan ang mga kamatuoran sa ebanghelyo nga ilang nakat-onan. Alang sa dugang nga pagbansay kon unsaon ni paghimo, tan-awa ang pagbansay nga nag-ulohan og “Awhaga ang mga tigkat-on sa pagpakigbahin sa mga kamatuoran nga ilang nakat-onan,” makita sa Pagpalambo sa mga Kahanas sa Magtutudlo. Ikonsiderar ang pagpraktis sa kahanas pinaagi sa pagdapit sa mga estudyante nga ipakigbahin ang ilang nakat-onan sa usag usa.

Pwede nimong pares-pareson ang mga estudyante ug dapiton silang basahon ang pamahayag ug tudling sa kasulatan sa ubos. Dayon, pwede nila kining dungan nga hisgotan.

Basaha ang mosunod nga pamahayag ug tudling sa kasulatan, nga mangita kon unsay imong makat-onan sa kinaiya ni Jesukristo nga makatabang sa usa ka tawo nga nakasala.

Si Elder Ulisses Soares sa Korum sa Napulog Duha ka Apostoles mitudlo:

Dili sama nimo ug nako, si Kristo klaro nga makakita sa tanang aspeto sa piho nga sitwasyon. Bisan nasayod Siya sa tanan natong mga kahuyang, ang Manluluwas dili madali-dalion sa pagpanghimaraot kanato apan nagpadayon sa maloluy-ong pakigtambayayong kanato sa dugayng panahon. (Ulisses Soares, “Ang Malungtarong Kaluoy sa Manluluwas,” Liahona, Nob. 2021, 15)

Mga Hebreohanon 4:14–16

• Unsay imong nakaplagan? Sa unsang paagi ni makatabang sa usa ka tawo nga nakasala?

Ikonsiderar ang pagpakigbahin og personal nga kasinatian kon sa unsang paagi ika napanalanginan tungod sa pagmahal ug kaluoy sa Manluluwas. Dapita usab ang andam nga mga estudyante nga mopakigbahin sa ilang mga kasinatian. Timan-i nga ikaw o ang mga estudyante dili angayng magpakigbahin og mga kasinatian nga sobra ka personal o magkompisal og nangaging mga sala.

Unsa man ang bahin sa Zion?

Ikonsiderar ang pagpakigbahin sa mga estudyante nga naglaom ang mga Santos sa Missouri sa pagtukod sa Zion sa Independence apan pugos silang gipapahawa. Bisan paman dili masabtan sa mga estudyante ang pagkawala sa Zion, bation tingali nila nga morag nawad-an silag usa ka butang nga bililhon o balaan para nila, sama sa mga higala o oportunidad nga mouswag sa espirituwal. Dapita sila sa pagbasa sa mosunod nga mga bersikulo ug hunahunaon kon unsay gitudlo niini bahin sa Manluluwas.

Basaha ang Doktrina ug mga Pakigsaad 101:16–19, nga mangita og paghupay ug panglantaw nga gitanyag sa Ginoo.

• Unsay matabang niini nga mga bersikulo diha kanimo aron masabtan ang panglantaw sa Manluluwas?

• Unsay gitudlo sa Ginoo bahin sa Zion nga makonektar sa atong mga kinabuhi karon?

  Pwede nimong dapiton ang mga estudyante nga pamalandongan ang kaugalingon nilang mga hagit ug mga pagpili. Pwede nilang tubagon ang mosunod nga mga pangutana diha sa ilang mga journal sa pagtuon.

• Unsang bersikulo gikan sa Doktrina ug mga Pakigsaad 101:1–19 ang gusto nimong hinumdoman?

• Unsay imong gibati bahin sa pagmahal ug kaluoy sa Manluluwas nga pwedeng mahimo nga panalangin sa imong kinabuhi?

• Unsa nga lakang ang pwede nimong himoon aron molihok uyon sa imong gibati?

Dugang nga mga Kapanguhaan

Unsa ang lainlaing gigikanan sa atong mga pag-antos?

“Ang kalisdanan naggikan sa nagkalain-laing mga tinubdan. Ang mga pagsulay mahimong moabot isip resulta sa kaugalingong garbo og pagkamasinopakon sa tawo. Kini nga mga pagsulay mahimong malikayan pinaagi sa matarung nga pagpuyo. Ang ubang mga pagsulay mga natural nga bahin sa kinabuhi ug mahimong moabot sa panahon nga ang katawhan nagpakabuhi nga matarong. Sama pananglit, mahimong makasinati ang katawhan og mga pagsulay diha sa panahon sa pagkamasakiton o walay kasigurohan o sa pagkamatay sa usa ka minahal sa kinabuhi. Ang kalisdanan mahimong moabot usahay tungod sa dili maayo nga mga pagpili ug makapasakit nga mga istorya ug mga binuhatan sa uban” (Mga Hilisgotan ug mga Pangutana, “Kalisdanan [Adversity],” topics.ChurchofJesusChrist.org).

Posible kaha nga mas dako ang akong sala kay sa katakos sa Manluluwas nga luwason ko?

Si Elder Jeffrey R. Holland sa Korum sa Napulog Duha ka Apostoles mitudlo:

Bisan nagtuo ka nga ulahi ka na, bisan pila pa ka mga oportunidad wala ninyo mapahimusli, mga sayop nga inyong nahimo o mga talento nga wala ninyo, o unsa ka kalayo sa panimalay ug pamilya ug sa Dios, mopamatuod ko nga wala pa kamo malayo sa balaanong gugma. Imposible nga ang mahangtorong kahayag sa Pag-ula ni Kristo dili moabut kaninyo. (Jeffrey R. Holland, “Mga Mamumuo sa Ubasan,” Liahona, Mayo 2012, 33)

Si Elder C. Scott Grow sa Seventy miingon:

Si Jesukristo ang Bantugan nga Mag-aalim sa atong mga kalag. Gawas sa mga sala sa kapildihan, walay sala o kalapasan, kasakit o kasubo, nga wala malakip sa makaayo nga gahom sa Iyang pag-ula.

Kon makasala kita, si Satanas moingon kanato nga nawala na kita. Sa sukwahi, ang atong Manunubos mitanyag og katubsanan ngadto sa tanan—bisan unsa pa ang sayop natong nahimo—bisan gani kaninyo ug kanako. (C. Scott Grow, “Ang Milagro sa Pag-ula,” Liahona, Mayo 2011, 109)

Sa sibya sa kabatan-onan, gipakigbahin ni Elder Gerrit W. Gong sa Korum sa Napulog Duha ka Apostoles nga ang mosunod nga ehemplo sa kabatan-onan nga mibati nga dili siya angayan sa gugma sa Dios:

Doktrina ug mga Pakigsaad 101:5. Nganong gipanton kita sa Ginoo?

Ang balaanon nga pagpanton adunay labing minos tulo ka mga katuyoan: (1) aron sa pag-awhag kanato sa paghinulsol, (2) aron sa paglimpyo ug sa pagbalaan kanato, ug (3) usahay aron sa pagpasubay kanato og balik sa dalan sa kinabuhi sa unsay nahibaloan sa Dios nga mas maayo nga dalan. (D. Todd Christofferson, “Ako Nagabadlong ug Nagapanton sa Akong Gihigugma,” Liahona, Mayo 2011, 98)

Doktrina ug mga Pakigsaad 101:2. Unsa ang pipila sa mga kalapasan sa mga Santos?

Sa wala pa abuga ang mga Santos gikan sa Lalawigan sa Jackson, Missouri, nakadawat sila og mga pasidaan nga sila mag-antos og mga kasakitan kon dili sila maghinulsol. Pananglitan, sa Enero 1833, gibadlong ni Joseph Smith si William W. Phelps ug Sidney Gilbert para sa ilang mga sulat nga hinawayon ug negatibo. Si Orson Hyde ug Hyrum Smith misulat sa mga lider sa Simbahan sa Missouri nga nagpasidaan nila bahin sa “ubos, daotan, & walay klarong mga pasumbingay” nga gihimo bahin kang Propeta Joseph Smith. Tungod niini nga mga kalapasan ug uban pa, mipasidaan si Orson Hyde ug Hyrum Smith nga atubangon sa mga Santos sa Missouri ang “tunglo & paghukom” (tan-awa ang The Joseph Smith Papers, Documents, Volume 2: July 1831–January 1833,, ed. Matthew C. Godfrey ug uban pa [2013], 367, 373–74).

Dugang nga mga Kalihokan sa Pagkat-on

Usa ka senaryo

Kon para nimo makatabang ang usa ka senaryo para masabtan sa mga estudyante ang kamatuoran nga ilang nailhan gikan sa Doktrina ug mga Pakigsaad 101:3, 9, pwede nimong gamiton ang usa ka senaryo sama sa mosunod:

Si Grace mao usa ka batang babaye nga wala na makaapil sa Simbahan o sa ebanghelyo sulod sa daghang tuig. Niining panahona, nakahimo siyag mga desisyon nga dili uyon sa mga pagtudlo sa Manluluwas. Tungod niini nga mga desisyon, mibati siyang nahilayo siya sa Simbahan ug sa mga kaedad niyang batan-on sa iyang ward. Ang iyang panglantaw kang Jesukristo mao nga Siya usa ka perpektong nga tawo nga wala makauyon sa iyang mga pagpili. Mas komportable siyang balewalaon ang mga relihiyosong panghunahuna o pangutana sa iyang kinabuhi. Gibati usab niya nga nalabyan niya ang mga oportunidad nga makakat-on ug mouswag sama sa ubang kabatan-onan nga kaedad niya human mibiya sulod sa taas kaayong panahon.

• Unsay makatabang kang Grace nga makasabot sa imong nakat-onan o gibati karon?

• Sa unsang paagi ang pagkasabot bahin sa pagmahal ug kaluoy ni Jesukristo makaapektar sa atong kadasig nga maghinulsol?

• Unsang pamatuod o kasinatian gikan sa imong kaugalingong kinabuhi ang pwede nimong ipakigbahin kang Grace bahin sa pagmahal ug kaluoy sa Manluluwas?

Doktrina ug mga Pakigsaad 101:27–35. Mga Kahimtang panahon sa Milenyum

Mahimong makadasig sa mga estudyante ang pagkat-on bahin sa mga kahimtang panahon sa Milenyum.

Pwede nimong ipasabot nga,isip kabahin sa Iyang paghupay sa mga Santos, gipakigbahin kanila sa Ginoo ang gipalapad nga panglantaw sa Zion ug ang pagpundok ug pagpanalangin sa mga Santos (tan-awa sa Doktrina ug mga Pakigsaad 101:16–19). Mas gipalapad pa sa Ginoo ang maong panglantaw pinaagi sa pagtudlo sa mga Santos bahin sa pag-abot sa Milenyum, nga mosunod sa pagkatukod sa Zion ug sa Ikaduhang Pag-anhi (tan-awa sa Doktrina ug mga Pakigsaad 101:20–23).

Ikonsiderar ang pagdapit sa mga estudyante nga basahon ang Doktrina ug mga Pakigsaad 101:27–35, nga mangita kon unsay gipadayag sa Ginoo nga mahitabo panahon sa Milenyum. Pwede nimong pangutan-on ang mga estudyante kon unsay ilang nakat-onan nga nakapahinam nila. Pwede nimong dapiton ang mga estudyante nga mangutana og bisan unsang mga pangutana nga sila aduna kabahin sa mga bersikulo. Mahimong sulatan sa mga estudyante ang ilang mga kasulatan nga kini nga mga bersikulo nagtumong sa Milenyum. Konsideraha ang pagtan-aw sa Manwal sa Estudyante sa Doktrina ug mga Pakigsaad (2025) para sa komentaryo niini nga mga bersikulo.

Dayon pwede nimong dapiton ang mga estudyante nga basahon ang Doktrina ug mga Pakigsaad 101:36-38 ug ipakigbahin kon sa unsang paagi makatabang nila kini nga mga bersikulo sa pagtubag sa mosunod nga mga pangutana:

• Unsay gusto sa Manluluwas nga imong bation tungod sa imong pagkahibalo kon unsay mahitabo sa umaabot?

• Sa unsang paagi ang pagkahibalo bahin sa mahitabo sa umaabot nakapausab sa atong panglantaw sa mga hagit karon?

Doktrina ug mga Pakigsaad 101:39–41. “Asin alang sa yuta”

Aron tabangan ang mga estudyante nga mas masabtan ang Doktrina ug mga Pakigsaad 101:39–41 (tan-awa usab sa Mateo 5:13), pwede nimo silang pangutan-on kon asa magamit ang asin. Tabangi silang masabtan nga ang asin makapalami sa pagkaon, makapreserbar sa pagkaon, ug aduna pod kini mga sangkap nga makaayo. Dapita sila nga basahon ang mga bersikulo 39–40, nga mangita kon unsay gitudlo sa Manluluwas bahin sa mga tawo ug sa asin.

Ikonsiderar ang pagpakigbahin sa mosunod nga pamahayag gikan kang Elder Carlos E. Asay (1926–1999): “Ang usa ka inila sa tibuok kalibotan nga chemist misulti nako nga ang asin dili mawad-an sa iyang lami bisan sa gidugayon. Mawala ang lami niini tungod sa sagol ug kontaminasyon” (Carlos E. Asay, “Salt of the Earth: Savor of Men and Saviors of Men,” Ensign, May 1980, 42). Mahimo nimong ipangutana ang mga mosunod:

• Sa unsang paagi ang mga lalaki ug mga babaye mahimong sama sa asin ngadto sa mga tawo sa kalibotan?

• Sa unsang paagi kini nga analohiya makumpara sa mga Santos sa Missouri?

• Giunsa pagpreserbar sa katawhan sa Ginoo karon ang ilang lami?

Basaha ang Doktrina ug mga Pakigsaad 101:41–42, nga mangita sa gitudlo sa Manluluwas nga kinahanglang mahitabo sa mga Santos aron makasugod sa pagbalik sa ilang lami. Hatagi og higayon ang mga estudyante nga makapakigbahin ug tabangi sila nga masabtan nga gusto sa Ginoo nga maputli ang iyang mga Santos pinaagi sa pagpanton ug sa pagpaubos sa ilang kaugalingon sa Iyang atubangan.

• Sa unsang paagi makita ang gugma sa Ginoo niini nga mga bersikulo?