114-р хичээл: Сургаал ба Гэрээ 98–101

Сургаал ба Гэрээ 101:1–42

“Тэдний нүглүүдийг үл харгалзан, миний дотор тэднийг өрөвдөх сэтгэлээр дүүрдэг”

Христийн энэрэнгүй дүр зураг

Миссури дахь гэгээнтнүүд Их Эзэний зарлигласан ёсоор зөв шударга амьдарч чадахгүй байв. Үүний үр дүнд тэд Их Эзэний хүч, хамгаалалтын ихэнхийг алдсан ба дайснууд нь тэднийг орон гэрээс нь хөөжээ. Хэдий тийм ч Их Эзэн тэдэнд хайр, нинжин сэтгэлээ батлан илэрхийлж байлаа. Энэ хичээл суралцагчдад Аврагчийн тэднийг гэх нинжин сэтгэл, нигүүлслийг мэдрэхэд туслах зорилготой.

Боломжит суралцах үйл ажиллагаа

Зовох шалтгаан

Дараах зургийг харуулж, суралцагчдаас энэ залуу эмэгтэйн уйлж байгаа өөр өөр шалтгааныг асууж болно. Та суралцагчдын хариултыг самбарт жагсааж болно.

Шаналалд автсан өсвөр насны хүүхэд

Хангалттай цаг гаргаж өгсний дараа, бидэнд тулгардаг сорилт бэрхшээл янз бүрийн шалтгааны улмаас ирж болно гэдгийг суралцагчдад хуваалц. Үүнд бидний өөрсдийн сонголт, амьдралын жам ёсны нэгэн хэсэг эсвэл бусдын буруу сонголт зэрэг нь орно. Самбарын нөгөө талд эдгээр гурван ангиллыг жагсааж бичээд, ангилал бүрд жагсаасан шалтгаануудыг ялган хуваах боломжийг суралцагчдад олго.

Эдгээр зовж зүдрэх шалтгааны талаар дэлгэрэнгүй мэдэхийн тулд “Нэмэлт эх сурвалж” хэсэг дэх Topics and Questions-аас эш татсан “Adversity”-ын талаарх мэдэгдлийг үзэж болно.

Гэгээнтнүүдийн зовлон шаналалд үзүүлсэн Их Эзэний хариу үйлдэл

Та дараах хам сэдвийн мэдээллийг унших юм уу өөрийн үгээр хураангуйлж болно.

1833 онд танхайрагчид Индепенденсээс гэгээнтнүүдийг гаргахаар хүч хэрэглэж эхэлснээр Миссури дахь эсэргүүцэл харгис хэрцгий болж байлаа. Цаг агаар хүйтэрч, хурцадмал байдал нэмэгдэх үед гэгээнтнүүд тэсэж үлдэх эсвэл зугтах эсэхдээ эргэлзэж байв. Яг энэ үед бошиглогч Иосеф Смит Огайогийн Көртландад байсан ч гэгээнтнүүдийн нөхцөл байдлын талаарх мэдээллийг авч байлаа. Тэдний зовлон шаналлыг мэдээд, бошиглогч Тэнгэрлэг Эцэгээс тэднийг Миссури дахь орон гэрээ эргүүлж авч чадах эсэхийг асуухаар залбирав. Тэрээр одоогийн Сургаал ба Гэрээ 101 хэмээх илчлэлтийг хүлээж авсан. (Гэгээнтнүүдийн сорилт бэрхшээлийн талаар илүү ихийг Гэгээнтнүүд номын 1-р боть Үнэний жишиг номын 17-р бүлэг-ээс үзнэ үү.)

Сургаал ба Гэрээ 101:1–2-ыг уншаад, Их Эзэн яагаад гэгээнтнүүдийг ийм байдлаар зовж шаналахыг зөвшөөрсөн тухай олж мэд.

• Та нар юу олж мэдсэн бэ?

• Өөр юу тэдний зовлон зүдгүүрийн шалтгаан байсан байж болох вэ?

Гэгээнтнүүд өөрсдийн гэмт үйлдлээс болж зовж шаналснаас гадна бусдын (танхайрагчид) буруу сонголтоос мөн амьдрал дахь байгалийн хүчин зүйлээс (өвлийн хүйтэн) болж зовсон гэдгийг ойлгоход суралцагчдад тусал.

Дараах үйл ажиллагаагаар та суралцагчдыг хоёр хоёроор нь хуваарилж болно. Та тэднийг уг шүлгүүдийг уншихдаа нэг нь сонсоход хэцүү байж болох зүйлсийг олж, нөгөө суралцагч нь сонсоод тайвшрах зүйлсийг олоход урьж болно.

Сургаал ба Гэрээ 101:3–9-ийг уншаад, сонсоод тайвшрах ямар зүйл байж болох мөн юуг сонсоход хэцүү байхыг олж мэд.

• Та нар юу олж мэдсэн бэ?

• 3 ба 9-р шүлэг-ийн дагуу, Их Эзэн нүгэл үйлдсэн хүмүүсийг хэрхэн хардаг вэ?

  Биднийг нүгэл үйлдсэн үед ч Их Эзэн бидэнд нинжин сэтгэлээр, нигүүлсэнгүй ханддаг зэрэг үнэнийг суралцагчид тодорхойлж болно.

  Өнөө үед энэ зарчим Их Эзэн рүү харахад бидэнд хэрхэн тусалж болох тухай ярилцахад нь суралцагчдад тусал. Дараахтай адил асуултууд тус болж болох юм.

• Биднийг нүгэл үйлдэх үед нүглийг маань үл тоохын оронд Их Эзэн бидэнд нинжин сэтгэлээр нигүүлсэнгүй ханддаг гэдгээс та Их Эзэний талаар юу мэдэж авах вэ?

• Яагаад Есүс Христ бидний нүглийн хариуд нинжин сэтгэлээр нигүүлсэнгүй хандах чадвартай гэж та бодож байна вэ?

Христийн зан чанараар өдөөгдсөн

Хувь хүний хувьд Аврагчийн нинжин сэтгэл, нигүүлсэл өөрсдөд нь яагаад хэрэгтэй талаар тунгаан бодоход суралцагчдыг урь. Түүний нинжин сэтгэл, нигүүлслийг хүлээн авах нь амьдралыг тань хэрхэн адислах талаар эргэцүүлэх бодохыг тэднээс хүс.

Сайн мэдээний үнэнийг хэлэлцэх боломжийг суралцагчдад олго. Дараах үйл ажиллагаа нь тэднийг өөрсдийн суралцаж байгаа сайн мэдээний үнэнүүдийг судалж, дараа нь энэ талаар ярилцахад урамшуулдаг. Багшийн хөгжүүлбэл зохих ур чадвар гарын авлагын “Суралцагчдыг суралцаж байгаа үнэнийхээ талаар хуваалцахад урамшуул” гарчигтай сургалтаас хэрхэн ийн үйлдэх талаар илүү ихийг олж үзнэ үү. Сурч буй зүйлээ бие биетэйгээ хуваалцахад урих байдлаар энэ чадвараар дадлага хийхийг бодож үз.

Суралцагчдыг хоёр хоёроор нь хуваарилж, тэднийг уг мэдэгдлийг болон доорх судрын хэсгийг уншихад урьж болно. Дараа нь тэд уг асуултуудыг хамтдаа ярилцаж болно.

Дараах мэдэгдлийг болон судрын хэсгийг уншаад, нүгэл үйлдсэн нэгэнд тус болох Есүс Христийн зан чанарын талаар юу сурч мэдсэнээ олж мэд.

Арван хоёр төлөөлөгчийн чуулгын ахлагч Үлиссэс Соарэс ийн заасан.

Ахлагч Үлиссэс Соарэс

Христ тухайн нөхцөл байдлыг бүх талаас нь тодорхой харж чаддагаараа та биднээс ялгаатай. Аврагч бүх сул талыг маань мэддэг ч биднийг яаран зэмлэдэггүй бөгөөд цаг хугацааны явцад бидэнтэй үргэлжлүүлэн өрөвч нинжин сэтгэлээр ажилладаг. (Үлиссэс Соарэс, “Аврагчийн хувиршгүй нинжин сэтгэл,” Лиахона, 2021 оны 11-р сар, 15)

Еврей 4:14–16

• Та нар юу олж мэдсэн бэ? Нүгэл үйлдсэн хүнд энэ нь хэрхэн тус болох байсан бэ?

Аврагчийн нинжин сэтгэл, нигүүлслээр хэрхэн адислагдаж байсан хувийн туршлагаа та хуваалцаж болно. Хуваалцах хүсэлтэй суралцагчдыг мөн туршлагаа хуваалцахад урь. Хэт хувийн чанартай эсвэл өнгөрсөн нүглээ тоочих туршлагыг хуваалцах хэрэггүй гэдгийг суралцагчдад сануул.

Сионы тухайд?

Миссурийн гэгээнтнүүд Сионыг Индепенденст байгуулна гэж найдаж байсан ч явахаас өөр аргагүй болсон тухай суралцагчдад хуваалц. Суралцагчид Сионыг алдах ямар байдгийг ойлгохгүй ч найз нөхдөө эсвэл сүнслэгээр өсөх боломж зэрэг тэдэнд үнэ цэнтэй, нандин зүйлээ алдсан мэт мэдэрч болно. Тэднийг дараах шүлгүүдийг уншиж, Аврагчийн талаар юу заасныг бодоход урь.

Сургаал ба Гэрээ 101:16–19-ийг уншаад, Их Эзэний өгдөг тайтгарал, харах өнцгийг олж мэд.

• Эдгээр шүлэг нь Аврагчийн харах өнцгийн тухай ойлгоход танд хэрхэн тусалж байна вэ?

• Бидний одоогийн амьдралтай холбоотой Сионы талаар Их Эзэн юу заасан бэ?

  Та суралцагчдыг өөрсдийн сорилт, сонголтын талаар эргэцүүлэн бодоход урьж болно. Тэд судлах тэмдэглэл дээрээ дараах асуултуудад хариулж болно.

• Та Сургаал ба Гэрээ 101:1–19-өөс аль шүлгийг санахыг хүсэж байна вэ?

• Та Аврагчийн өрөвч нинжин сэтгэл, нигүүлсэл амьдралд тань адислал байж болох талаар юу мэдэрсэн бэ?

• Мэдэрсэн зүйлийнхээ дагуу үйлдэхийн тулд та ямар алхам хийж болох вэ?

Нэмэлт эх сурвалж

Бидний зовлон зүдгүүрийн өөр ямар ямар эх сурвалж байдаг вэ?

“Саад тотгор нь янз бүрийн эх сурвалжаас улбаатай байдаг. Сорилтууд нь тухайн хүний бардам зан, дуулгаваргүй байдлын үр дагавар болон ирж болно. Зөв шударга амьдарснаар эдгээр хүнд сорилтыг зайлуулж чадна. Бусад сорилт нь амьдралын нэгээхэн хэсэг бөгөөд заримдаа тэдгээр нь хүмүүсийг зөв шударга амьдарч байхад ч ирж болно. Жишээ нь, та өвдөх юм уу тодорхой бус байдалд орох үедээ эсвэл хайртай хүмүүс тань нас барах үед хүнд сорилтуудтай тулгарч болно. Саад бэрхшээл заримдаа бусдын буруу сонголт, хор хөнөөлтэй үг, үйлдлээс болж үүсдэг” (Topics and Questions, “Adversity,” topics.ChurchofJesusChrist.org).

Миний алдаа Аврагчийн намайг аврах чадвараас хэтэрсэн байх боломжтой юу?

Арван хоёр төлөөлөгчийн чуулгын ахлагч Жэффри Р.Холланд ийн заасан.

Ахлагч Жэффри Р.Холланд

Дэндүү оройтчихсон гэж бодож байсан ч, өчнөөн олон боломжоо алдсан гэж бодож байсан ч, би чинь олон алдаа гаргасан шүү дээ гэж бодож байсан ч, ямар нэг авьяас чадваргүй эсвэл гэр орон, гэр бүл, Бурханаасаа хэчнээн их холдчихсон мэт санагдаж байсан ч тэнгэрлэг хайрын хүрэх хязгаарын цаад талд та нар гараагүй шүү гэдгийг би та нарт гэрчилж байна. Христийн Цагаатгалын хязгааргүй гэрэл гэрэлтүүлж чадахааргүй тийм гүнзгий ангал руу та нар орно гэж байхгүй шүү. (Жэффри Р.Холланд, “Талбайд хөдөлмөрлөгсөд,” 2012 оны 4-р сарын Ерөнхий чуулган, 34)

Далын ахлагч С.Скотт Грөү ийн хэлсэн.

Ахлагч С.Скотт Грөү

Есүс Христ бол бидний бодгалийн Агуу Эдгээгч мөн. Түүний Цагаатгалын эдгээгч хүчгүйгээр мөхлийн нүглүүдээс ангижрах нүгэл, гэм буруу, өвчин эмгэг, гашуудал гэж үгүй.

Биднийг нүгэл үйлдэхэд Сатан “та нар өнгөрсөн хүмүүс” гэж хэлдэг бол Гэтэлгэгч маань—ямар ч буруу зүйл хийсэн—бидэнд гэтэлгэлийг санал болгодог. (С.Скотт Грөү, “Цагаатгалын гайхамшиг,” 2011 оны 4-р сарын Ерөнхий чуулган)

Өсвөр үеийнхний нэвтрүүлгийн үеэр Арван хоёр төлөөлөгчийн чуулгын ахлагч Гэррит В.Гонг өөрийгөө Бурханы хайрыг хүртэхэд зохисгүй гэж үзэж байсан өсвөр насны хүүхдийн дараах жишээг хуваалцжээ.

Сургаал ба Гэрээ 101:5. Яагаад Их Эзэн биднийг сахилгажуулдаг вэ?

Ахлагч Д.Тодд Кристоффэрсон

Бурханлаг зэмлэл нь: (1) биднийг наманчлахад чиглүүлэх, (2) төгөлдөржүүлж, ариусгах, (3) заримдаа бидний амьдралын замыг Бурханы мэдэх илүү сайн зам руу өөрчлөн чиглүүлэх гэсэн гурван зорилготой юм. (Д.Тодд Кристоффэрсон, “Би хайрладаг хүмүүсээ зэмлэдэг, сахилгажуулдаг юм,” 2011 оны 4-р сарын Ерөнхий чуулган)

Сургаал ба Гэрээ 101:2. Гэгээнтнүүд ямар ямар гэм нүгэл үйлдэж байсан бэ?

Гэгээнтнүүд Миссурийн Жаксон гүнлэгээс хөөгдөн гарахынхаа өмнө, хэрэв наманчлахгүй бол зовлон шаналал ирэх болно гэсэн хэд хэдэн сэрэмжлүүлгийг хүлээн авчээ. Тухайлбал: 1833 оны 1-р сард Иосеф Смит Виллям В.Фелпс, Сидней Гилберт хоёрыг тэдний бичсэн, шүүмжилсэн, сөрөг захидлаас болж зэмлэсэн. Орсон Хайд, Хайрум Смит нар Миссури дахь Сүмийн удирдагчдад бошиглогч Иосеф Смитийн талаарх “дорд, харанхуй ба сохор доромжлолуудын” талаар анхааруулга болгон захиа бичжээ. Орсон Хайд, Хайрум Смит нар эдгээр болон бусад гэм нүглийн улмаас Миссури дахь гэгээнтнүүд “нэгэн гамшиг болон шүүлттэй” нүүр тулах болно гэж анхааруулсан (The Joseph Smith Papers, Documents, Volume 2: July 1831–January 1833, ed. Matthew C. Godfrey and others [2013], 367, 373–74).

Нэмэлт суралцах үйл ажиллагаа

Жишээ

Хэрэв та Сургаал ба Гэрээ 101:3, 9-өөс тодорхойлсон үнэнээ ойлгоход нь суралцагчдад тусална гэж бодож байвал дараахтай адил жишээг ашиглаж болно. Үүнд:

Грэйс хэдэн жилийн турш Сүмд буюу сайн мэдээнд анхаарал хандуулаагүй залуу эмэгтэй юм. Энэ хугацаанд тэр Аврагчийн сургаалтай нийцэхгүй олон зүйлийг хийхээр сонгож байсан. Эдгээр сонголт түүнийг Сүмээс болон тойргийнх нь түүний насны өсвөр үеийнхнээс холдуулсан мэт санагдсан. Тэрээр Есүс Христийг сонголтуудыг нь хүлээн зөвшөөрөхгүй төгс төгөлдөр нэгэн гэж хардаг байв. Өөрийн амьдрал дахь шашны бодол, асуултуудыг хайхрахгүй байх нь түүнд илүү амар байлаа. Мөн тэр удаан хугацаанд хол байсны дараа өөрийгөө үеийнхээ бусад өсвөр насны хүүхэдтэй адил сурч, хөгжих боломжоо алдсан гэж боддог байв.

• Өнөөдөр таны сурсан эсвэл мэдэрсэн зүйлээс юуг ойлгох нь Грэйст тустай байж болох вэ?

• Есүс Христийн нинжин сэтгэл, нигүүлслийг ойлгох нь бидний наманчлах хүсэлд хэрхэн нөлөөлж болох вэ?

• Та Аврагчийн нинжин сэтгэл, нигүүлслийн талаарх ямар гэрчлэлээ эсвэл ямар амьдралын туршлагаа Грэйстэй хуваалцаж болох вэ?

Сургаал ба Гэрээ 101:27–35. Мянган жилийн турш дахь нөхцөл байдал

Мянган жилийн нөхцөл байдлын талаар суралцах нь суралцагчдад урам зориг өгч магадгүй юм.

Та Их Эзэн гэгээнтнүүдэд өгсөн тайтгарлынхаа нэгээхэн хэсэг болгон Сионы болон гэгээнтнүүдийн цугларалт, адислалуудын тухай өргөн ойлголтыг тэдэнтэй хуваалцсан гэдгийг тайлбарлаж болно (Сургаал ба Гэрээ 101:16–19-ийг үзнэ үү). Их Эзэн гэгээнтнүүдэд Сион байгуулагдаж, Хоёр дахь ирэлт тохиосны дараа ирэх Мянган жилийн тухай заахдаа энэ ойлголтыг улам бүр нэмж өгсөн (Сургаал ба Гэрээ 101:20–23-ыг үзнэ үү).

Суралцагчдыг Сургаал ба Гэрээ 101:27–35-ыг уншаад, Их Эзэн Мянган жилийн үеэр юу болно хэмээн илчилснийг олж мэдэхэд урь. Та суралцагчдаас тэдний сэтгэлийг хөдөлгөсөн ямар зүйл олж мэдсэнийг асууж болно. Суралцагчдыг уг шүлгүүдийн талаар ямар ч зүйлийг асуухад урьж болно. Суралцагчид эдгээр шүлэг Мянган жилийн тухай өгүүлж байгааг судар дээрээ тэмдэглэж болно. Эдгээр шүлгийн тайлбарыг Сургаал ба Гэрээ суралцагчийн гарын авлага (2025)-аас харна уу.

Дараа нь суралцагчдыг Сургаал ба Гэрээ 101:36–38-ыг уншаад, эдгээр шүлэг дараах асуултуудад хариулахад хэрхэн туслах тухай хуваалцахад урьж болно.

• Аврагч таныг ирэх зүйлийн талаар ямар мэдрэмжтэй байгаасай гэж хүссэн бэ?

• Ирэх зүйлийн талаар мэдэх нь одоогийн сорилт бэрхшээлийг харах бидний өнцгийг хэрхэн өөрчлөх вэ?

Сургаал ба Гэрээ 101:39–41. “Газрын давс”

Сургаал ба Гэрээ 101:39–41 (Матай 5:13-ыг мөн үзнэ үү)-ийг илүү сайн ойлгоход нь суралцагчдад туслахын тулд та давс юунд сайн болохыг тэднээс асууж болох юм. Давс хоолны амтыг сайжруулж, хоол хүнсийг хадгалахад хэрэгтэйгээс гадна эдгээх шинж чанартай гэдгийг ойлгоход тэдэнд тусал. Тэднийг 39–40-р шүлэг-ийг уншаад, хүмүүсийн тухай болон давсны талаар Аврагчийн заасан зүйлийг олж мэдэхэд урь.

Ахлагч Карлос Э.Асайгийн (1926–1999) дараах мэдэгдлийг хуваалц. “Давс удсанаас болж амтаа алддаггүй. Харин өөр зүйлтэй холилдсон болон бохирдсоноос болж амт нь алдагддаг гэж дэлхийд нэрд гарсан нэгэн химич надад ярьж билээ.” (Carlos E. Asay, “Salt of the Earth: Savor of Men and Saviors of Men,” Ensign, May 1980, 42). Та дараах асуултуудыг тавьж болно. Үүнд:

• Эрэгтэй, эмэгтэй хүмүүс хэрхэн дэлхийн хүмүүст давс шиг байж чадах вэ?

• Энэ зүйрлэлийг Миссури дахь гэгээнтнүүдтэй хэрхэн харьцуулж болох вэ?

• Өнөө үед Их Эзэний хүмүүс амтаа хэрхэн хадгалах боломжтой вэ?

Сургаал ба Гэрээ 101:41–42-ыг уншаад, Аврагч гэгээнтнүүдэд амтаа сэргээж эхлэхийн тулд юу тохиолдох шаардлагатай гэж заасныг олж мэд. Их Эзэн гэгээнтнүүдийг Түүний өмнө өөрсдийгөө даруу болгож, сахилгажуулснаар цэвэршүүлэгдээсэй гэж хүсдэгийг ойлгоход нь суралцагчдад тусалж, энэ тухай хуваалцах боломжийг тэдэнд олго.

• Их Эзэний хайрыг эдгээр шүлгээс хэрхэн харж болох вэ?