115-р хичээл: Сургаал ба Гэрээ 98–101

Сургаал ба Гэрээ 101:43–101

Сионы тухай сургаалт зүйрлэл

Бошиглогч Иосеф Смит Миссурийн гэгээнтнүүдийн амсаж буй хүнд хэцүү хавчлагыг сонсоод, тэдний өмнөөс Их Эзэнд хандав. Аврагч хариултынхаа нэг хэсэг болгон гэгээнтнүүдэд зөвлөгөө, тайтгарал өгөхдөө сургаалт зүйрлэл ашигласан. Энэ хичээл суралцагчдад сургаалт зүйрлэлийг судалж, үүний сүнслэг утгыг олж мэдэх боломжийг олгоно.

Боломжит суралцах үйл ажиллагаа

Есүс Христ ихэвчлэн сургаалт зүйрлэл ашиглан заадаг байв

Хичээлийн хэрэгсэл, хувцас эдлэл, цахилгаан хэрэгсэл гэх мэт нийтлэг байдаг эд зүйлс үзүүлэх талаар бодож үз. Эсвэл суралцагчдыг ангийн эргэн тойрондоо байгаа эсвэл өөрсдөдөө байгаа эд зүйлсийг олж харахад урь. Суралцагчдыг нэг эд зүйлийг сонгоод, үүнийг Тэнгэрлэг Эцэгийн төлөвлөгөө, Есүс Христ, Түүний сайн мэдээний аливаа нэг талтай харьцуулах бүтээлч арга замыг бодоход урь. Тухайлбал: Тэд гар утсыг залбиралтай харьцуулж болно, учир нь залбирал бол бидний Тэнгэрлэг Эцэгтэйгээ харилцах хэрэгсэл юм. Суралцагчдыг эд зүйлээ болон сүнслэг харьцуулалтыг хамтрагчдаа эсвэл ангийнхандаа хуваалцахад урь.

Есүс Христ ихэвчлэн сургаалт зүйрлэл гэгддэг энгийн түүхийг ашиглан заадаг байсан. Эдгээр сургаалт зүйрлэлд Есүс бидний сайн мэддэг эд зүйлийг эсвэл нөхцөл байдлыг сүнслэг үнэнтэй харьцуулсан байдаг (Судруудын удирдамж дахь “Сургаалт зүйрлэл”-ийг scriptures.ChurchofJesusChrist.org-оос үзнэ үү).

• Аврагчийн заасан сургаалт зүйрлэлийн ямар жишээ байдаг вэ?

• Тэдгээр сургаалт зүйрлэл дэх Аврагчийн сургаалаас бид ямар ямар сүнслэг үнэнийг сурч болох вэ?

Жишээ нь: Суралцагчид Аврагчтай адилаар бусдыг хайрлах, тэдэнд үйлчлэх талаар заадаг сайн санаат самари хүний сургаалт зүйрлэлийг (Лук 10:25–37-г үзнэ үү) хуваалцаж болох юм. Эсвэл тэд Аврагчийн Хоёр дахь ирэлтэд бэлтгэх тухай бидэнд заадаг арван охины сургаалт зүйрлэлийг (Матай 25:1–13-ыг үзнэ үү) хуваалцаж магад.

Суралцагчдыг Сионы гэтэлгэлийн тухай сургаалт зүйрлэлийг судлахад бэлтгэхийн тулд Миссури дахь гэгээнтнүүдэд тулгарсан сорилтуудын талаарх сүүлийн үеийн хичээлүүдээс санаж байгаа зүйлээ хуваалцахыг тэднээс хүс. Шаардлагатай бол та дараах тоймыг хуваалцаж болно.

Хүнд хэцүү хавчлагын үед Аврагч Иосеф Смитэд болон гэгээнтнүүдэд Сионы гэтэлгэлийн тухай заахдаа сургаалт зүйрлэл ашигласан (Сургаал ба Гэрээ 101:43-ыг үзнэ үү). 1833 оны сүүлээр танхайрагчдын хүчирхийлэл 1000 гаруй гэгээнтнийг Миссурийн Жаксон гүнлэгээс хөөгдөхөд хүргэсэн ба 200 гаруй хүний орон гэр шатсан. Бошиглогч Иосеф Смит Их Эзэнээс гэгээнтнүүд яагаад Сионоос хөөгдсөнийг мөн тэд буцаж очихын тулд юу хийх ёстойг асуужээ. Их Эзэн сургаалт зүйрлэлээр хариулсан.

Сургаалт зүйрлэлийг судлах

Ахлагч Дэвид А.Бэднар Аврагчийн сургаалт зүйрлэлүүдээс суралцах тухай дараах зүйлсийг заасан. Үүнд:

Сургаалт зүйрлэлийн гол утга санаа болон захиас ерөнхийдөө тодорхой биш байдаг. Харин түүх нь хүлээн авах хүнд Бурханд итгэх итгэл, хувийн сүнслэг бэлтгэл, суралцах хүсэл зэргийнх нь дагуу бурханлаг үнэнийг дамжуулан хүргэдэг. Иймээс хувь хүн сургаалт зүйрлэл дэх үнэнүүдийг олж мэдэхийн тулд ёс суртахууны сонгох эрхээ ашиглан идэвхтэй “асууж, эрэлхийлж мөн тогших” [Матай 7:7–8; Лук 11:9–10-ыг үзнэ үү] учиртай. (Дэвид А.Бэднар, “Сион оо, хүч чадлаар хувцаслагтун,” Лиахона, 2022 оны 11-р сар, 92)

• Есүс Христэд итгэх бидний итгэл Түүний сургаалыг ойлгох чадварт хэрхэн нөлөөлөх вэ?

• Аврагчийн үгсийг судлах хичээл зүтгэл маань Түүний талаарх бидний мэдрэмжийг Түүнд ямар байдлаар хүргэдэг вэ?

Суралцагчдад энэ хичээлийн турш тэднийг чиглүүлэхэд туслахын тулд “Аврагчийн сургаалт зүйрлэлүүдийг хэрхэн судлах вэ?” гэсэн гарчигтай тараах материалыг өгөх талаар бодож үз.

Аврагчийн сургаалт зүйрлэлүүдийг хэрхэн судлах вэ?

1. Чухал мэдээллийг олж харах. Эдгээр мэдээлэлд хүмүүс, газар орон, эд зүйлс, үйлдэл эсвэл үйл явдлууд орж болно.

2. Харьцуулах. Сургаалт зүйрлэл дэх мэдээлэл бүр юуг төлөөлж эсвэл бэлгэдэж байгааг тодорхойл. Агуулгын сэжүүр, судраас судлах тусламж, тунгаан бодох зэрэг нь тустай байж болно.

3. Үнэ цэнтэй сургамж олж авах. Харьцуулалтын дараа уг сургаалт зүйрлэлд Аврагчийн зааж байгаа үнэ цэнтэй сургамжийг олж нээхийн тулд Ариун Сүнснээс тусламж эрэлхийл.

4. Хувийн амьдралдаа хэрхэн хэрэгжүүлэхээ тодорхойлох. Олж авсан сургамжаа хэрэгжүүлэхээр юу хийж болохоо мэдэхийн тулд Тэнгэрлэг Эцэгээс болон Ариун Сүнснээс тусламж эрэлхийл.

Язгууртны тухай сургаалт зүйрлэл

Дараах үйл ажиллагаа нь суралцагчдад сургаалт зүйрлэлийг судлахад зориулсан дөрвөн алхмаар дадлага хийхэд тусална. Дараах хүснэгтийг үзүүл эсвэл самбар дээр хуулж бич. Зургаан бүлэг үүсгэж, бүлэг бүрд хүснэгт дээрх өөр өөр дөрвөлжнийг бөглөхийг даалга. Эсвэл суралцагчдыг судлах тэмдэглэлдээ уг хүснэгтийг хуулж, бие даан бөглөхөд урь.

Чухал мэдээллийг олж харах

Сургаал ба Гэрээ 101:43–62-ыг унш. Шүлгийн бүлэг тус бүр дээр шүлгүүдийг дүрслэн энгийн зураг зурах юм уу хураангуйлж бич.

Сургаал ба Гэрээ 101:43–45. Язгууртны заавар	Сургаал ба Гэрээ 101:46–50. Зарц нарын үйлдэл
Сургаал ба Гэрээ 101:51. Зарц нарын үйлдлийн үр дагаврууд	Сургаал ба Гэрээ 101:52–54. Язгууртны хариу үйлдэл
Сургаал ба Гэрээ 101:55–58. Язгууртны дараагийн заавар	Сургаал ба Гэрээ 101:59–62. Зарцын хариу үйлдэл

Суралцагчдыг гүйцэтгэж дуусаад, олж мэдсэн зүйлээ хуваалцахад урь. Тэднийг сургаалт зүйрлэлийн мэдээллийг сайн ойлгосон эсэхэд анхаар.

Сургаалт зүйрлэлийг судлах эцсийн гурван алхмыг ангиараа гүйцэтгэ.

Харьцуулах

• Язгууртнаар Есүс Христийг төлөөлүүлж байгааг ойлгоход ямар сэжүүр бидэнд тусалж байна вэ?

• Цэцэрлэгээр эсвэл цамхгаар юуг төлөөлүүлж болох вэ?

• Зарим үед бидний үйл хөдлөл хэрхэн зарц нарынхтай адил байж болох вэ?

Төгс эзэмших сургаалын судрын хэсэг болох Езекиел 3:16–17-г уншаад, харуултай харьцуулж болох зүйлийг олоход суралцагчдыг урьж болно. Дараах агуулга нь суралцагчдад нэмэлт харьцуулалт хийхэд тусална.

Сургаалт зүйрлэл дэх зарц нар цамхаг барихаас татгалзсантай адил Миссурийн гэгээнтнүүд Их Эзэний зааварласны дагуу ариун сүм барихад хайхрамжгүй хандсан (Сургаал ба Гэрээ 57:3; 84:3–4; 97:10–12-ыг үзнэ үү).

Жаксон гүнлэг дэх гэгээнтнүүдийн хувьд 55-р шүлэг-т дурдсан зарцаар Иосеф Смитийг төлөөлүүлжээ (Сургаал ба Гэрээ 103:21-ийг үзнэ үү). Иосеф Смит Их Эзэний зарлигийг даган, Сионы газрыг гэтэлгэхийн тулд Сионы хуаран нэртэй бүлгийг зохион байгуулав. Сионы хуарангийн тухай Сургаал ба Гэрээ 103, 105-р хичээлүүд дээр ярилцах болно.

Үнэ цэнтэй сургамжийг олж нээх

• Их Эзэн энэ сургаалт зүйрлэлээр дамжуулан ямар үнэ цэнтэй сургамжийг зааж байна вэ?

• Есүс Христийн зан чанарын талаар энэ сургаалт зүйрлэл танд юу зааж байна вэ?

  Хэрэв суралцагчид үнэ цэнтэй сургамжийг тодорхойлж чадахгүй байвал дараах зарчмуудын нэг эсвэл түүнээс олныг хэлж өгч болно. Суралцагчдыг уг сургаалт зүйрлэл эдгээр үнэнийг хэрхэн харуулж байгааг хуваалцахад урь. Биднийг Их Эзэний зарлигуудыг дуулгавартай дагах үед Тэрээр сүнслэг болон бие махбодын дайснуудыг сөрөн зогсоход биднийг хүчирхэгжүүлдэг. Бошиглогчид цамхаг дээрх харуулаар үйлчилдэг бөгөөд бидэнд ирэх гэж буй аюулын талаар Их Эзэнээс ирсэн сэрэмжлүүлгийг өгдөг. Ариун сүмийн ажлаар дамжуулан Аврагч биднийг дайснаа сөрөн зогсоход бэлтгэдэг.

• Эдгээр хичээл 1833 оны гэгээнтнүүдэд хэрхэн тустай байж болох вэ?

• Та эдгээр үнэний нэг юм уу хэд хэдэн нотолгоог амьдралдаа хэрхэн харж байсан бэ?

Хувийн амьдралдаа хэрхэн ашиглахаа тодорхойлох

• Энэ сургаалт зүйрлэлийг өнөө үед хэрэгжүүлж болох ямар ямар арга зам байна вэ?

Энэ сургаалт зүйрлэлээс танд чухал санагдсан нэг үнэнийг хэрэгжүүлж болох нэг юм уу хоёр арга замыг тодорхойлохдоо Ариун Сүнснээс тусламж эрэлхийл. Төрсөн сэтгэгдлээ судлах тэмдэглэлдээ бич.

Хувиараа судар судлахдаа ашиглаж болох сургаалт зүйрлэлүүдийг судлах талаар олж мэдсэн зүйлээ хуваалцахад суралцагчдыг урь. Суралцагчдыг Есүс Христийн сургаалыг хувиараа судалж, тунгаан бодож, хэрэгжүүлэх үед Түүнд итгэх итгэлээ бодит болгох хичээл зүтгэлийг нь урамшуул.

Нэмэлт эх сурвалж

Сургаал ба Гэрээ 101:77–79. Бурхан ямар зорилгоор Америкийн Нэгдсэн Улсын Үндсэн хуулийг гаргасан бэ?

Тэргүүн зөвлөлийн ерөнхийлөгч Даллин Х.Өүкс ийн заасан.

Бурхан ямар зорилгоор Америкийн Нэгдсэн Улсын Үндсэн хуулийг бий болгосон бэ? Бид үүнийг ёс суртахууны сонгох эрхийн сургаалаас харж болно. Сэргээгдсэн Сүмийн эхний арван жилд баруун хязгаар дахь гишүүд ил далд хавчлага дарамтад зовсон. Энэ нь тэд Америкийн Нэгдсэн Улсад ноёрхоод байсан боолчлолыг эсэргүүцсэнтэй зарим талаараа холбоотой байв. Ийм хүнд нөхцөл байдалд Бурхан бошиглогч Иосеф Смитээр дамжуулан Өөрийн сургаалын мөнхийн үнэнүүдийг илчилсэн юм.

Бурхан Өөрийн хүүхдүүдэд ёс суртахууны сонгох эрхийг буюу шийдвэр гаргах, үйлдэх эрх мэдлийг өгчээ. Тэрхүү сонгох эрхийг хэрэгжүүлэх хамгийн тохиромжтой нөхцөл нь эрэгтэй, эмэгтэй хүмүүс өөрийн сонголтын дагуу шийдвэр гаргаж, үйлдэх дээд зэргийн эрх чөлөөтэй байх явдал юм. Тиймээс илчлэлтэд “шүүлтийн өдөрт хүн болгон нүглүүдийнхээ төлөө хариуцаж болохын тулд” (Сургаал ба Гэрээ 101:78) гэж тайлбарласан байдаг. “Тиймийн тул, аливаа хүмүүн бие биендээ боолчлолд байх ёстой гэдэг нь зөв биш юм” (Сургаал ба Гэрээ 101:79) хэмээн Их Эзэн илчилсэн. (Даллин Х.Өүкс, “Тэнгэрлэгээр нөлөөлөгдсөн Үндсэн хуулиа хамгаалах нь,” 2021 оны 4-р сарын Ерөнхий чуулган, 108–109)

Сургаал ба Гэрээ 101:76; 86–88. Гэгээнтнүүд засгийн газрын удирдагчдаас тусламж хүсэх үед юу болсон бэ?

Миссурийн гэгээнтнүүд Их Эзэний зааврыг дагаж, “гомдлоо тайлахын тулд” (Сургаал ба Гэрээ 101:76) буюу алдсан эд хөрөнгөө нөхөн төлүүлэхийн тулд засгийн газрын удирдагчдад хүсэлт гаргажээ. Эдгээр удирдагчийн дунд орон нутгийн шүүгчид, Миссури мужийн захирагч Даниел Данклин болон Америкийн Нэгдсэн Улсын ерөнхийлөгчөөр үйлчилж байсан Айндрю Жаксон нар байв. Олон дахин хичээсэн ч Миссурийн гэгээнтнүүд туулсан шударга бус байдалдаа засгийн газрын эрх мэдэлтнүүдээс нөхөн төлбөр, хамгаалалт авч чадаагүй юм.

Илүү их мэдээллийг институтэд зориулсан Сургаал ба Гэрээний суралцагчийн гарын авлагын “39-р бүлэг: Сургаал ба Гэрээ 101”-ээс үзнэ үү.

Сургаал ба Гэрээ 101:53. Ариун сүм намайг хэрхэн хамгаалах боломжтой вэ?

Язгууртны тухай сургаалт зүйрлэлийн нэг утга нь гэвэл хэрэв гэгээнтнүүд Их Эзэний зааварласан ёсоор Миссурид ариун сүм барьсан бол хамгаалагдах байсанд оршино (Сургаал ба Гэрээ 101:53-ыг үзнэ үү).

Ариун сүмд байгуулдаг гэрээнүүдээ сахиснаар бид хамгаалалт хүлээн авдаг хэмээн Сүмийн удирдагчид заасан.

Халамжийн нийгэмлэгийн ерөнхий ерөнхийлөгч асан Жийн Б.Бингам эгч ийн заасан.

Бурхантай байгуулсан гэрээгээ сахих нь бидэнд Аврагчийн хүчин дээр тулгуурлах боломжийг олгодог гэдгийг надад удаа дараа баталсан. Энэ нь биднийг гарцаагүй тулгарах сорилтод хүчирхэгжүүлж, дайсны нөлөөллөөс хамгаалж, мөнхийн алдар сууд бэлддэг. (Жийн Б.Бингам, “Бурхантай байгуулсан гэрээ биднийг хүчирхэгжүүлж, хамгаалан, мөнхийн алдар сууд бэлддэг,” Лиахона, 2022 оны 5-р сар, 67)

Нэмэлт суралцах үйл ажиллагаа

Сургаал ба Гэрээ 101 дээрх бусад сургаалт зүйрлэл

Улаан буудай ба зэрлэг өвсний тухай сургаалт зүйрлэл

Сургаал ба Гэрээ 101:63–67-г ашиглан сургаалт зүйрлэлийг судлах дөрвөн алхмаар ангиараа дадлага хий.

Чухал мэдээллийг олж харах.

Суралцагчдыг Сургаал ба Гэрээ 101:63–67-г уншаад, чухал дэлгэрэнгүй мэдээллийг олж мэдэхэд урь.

Зэрлэг өвснүүдийг боож, шатааж байхад улаан буудайг аюулгүйгээр саравчинд цуглуулж байгааг суралцагчид анзаарсан байж магад. Саравч бол үр тариаг хурааж авсны дараа хадгалдаг газар гэдгийг тайлбарла.

Харьцуулах.

• Саравч ямар “ариун газрууд” (64-р шүлэг)-ыг төлөөлж болох вэ?

• Энэ нь улаан буудай, зэрлэг өвс юуг төлөөлж болох талаар ямар ойлголтыг өгч байна вэ?

Саравчны нэг боломжит бэлгэдэл нь ариун нандин ариун сүмүүд юм. (Дэвид A.Бэднарын “Нэр алдрыг хүндтэйгээр хадгалж мөн зогсох нь” хэмээх захиасыг 2009 оны 4-р сарын Ерөнхий чуулган,108-р хуудаснаас үзнэ үү.)

Үнэ цэнтэй сургамж олж авах.

• Хэрэв бид саравч нь ариун сүм зэрэг ариун газрыг төлөөлж байгааг мэдвэл Аврагч биднийг энэ сургаалт зүйрлэлээс ямар сургамжийг ойлгож аваасай гэж хүсэж болох вэ?

Аврагч биднийг ариун сүмд цугларч, Өөрийнх нь хамгаалалтыг хүлээн авч, мөнх амьдралд өөрсдийгөө бэлтгэхэд урьдаг гэсэн сургамжийг суралцагчид олж мэдэж болно.

Хувийн амьдралдаа хэрхэн хэрэгжүүлэхээ тодорхойлох.

• Уг хичээлээс авсан сургамжийг та амьдралдаа хэрхэн хэрэгжүүлж болох вэ?

Шударга бус шүүгчийн тухай сургаалт зүйрлэл

Мөн суралцагчид Сургаал ба Гэрээ 101:81–84 дээрх шударга бус шүүгчийн тухай сургаалт зүйрлэлийг уншиж, уг алхмуудаар дадлага хийж болно. Суралцагчдыг олж мэдсэн зүйлээ хуваалцсаны дараа Сургаал ба Гэрээ 101-д Аврагч хавчлагад өртсөн гэгээнтнүүдэд засгийн газрын төлөөлөгчдөөс тусламж эрэлхийл хэмээн зааварлахдаа шударга бус шүүгчийн тухай сургаалт зүйрлэлийг ашигласан гэдгийг тайлбарла (85–92-р шүлэг-ийг үзнэ үү). Мөн Тэрээр мөнх бус амьдралынхаа үеэр шавь нартаа залбирлын тухай заахдаа энэ сургаалт зүйрлэлийг заасан (Лук 18:1–8; Сургаал ба Гэрээ 101:81-ийг үзнэ үү).

Сургаал ба Гэрээ 101:76–80. Америкийн Нэгдсэн Улсын Үндсэн хууль

Суралцагчдад Америкийн Нэгдсэн Улсын Үндсэн хуулийн талаар мөн үүний зарчмууд нь хэрхэн дэлхий даяар хэрэгжиж болох тухай илүү ихийг мэдэхэд нь туслахын тулд ерөнхийлөгч Даллин Х.Өүксийн 2021 оны 4-р сарын Ерөнхий чуулган дээр хэлсэн “Тэнгэрлэгээр нөлөөлөгдсөн Үндсэн хуулиа хамгаалах нь” хэмээх үгийг судалж болно. “Загвар: Сүмийн удирдагчдын сургаал” хэмээх хичээл дээрх санаануудаас нэгийг нь ашигла.

Ёс суртахууны сонгох эрх

Суралцагчдыг Аврагчийн сургаалыг дагахгүй байхыг сонгож, “Надад сонгох эрх байгаа. Би хүссэн бүхнээ хийх болно” гэж хэлдэг хүнд хэрхэн хариулах талаар ярилцахад урь.

Сургаал ба Гэрээ 101:78-ыг унш. Хариултдаа оруулж болох санааг энэ шүлгээс хайж ол.

• Бид Их Эзэний өмнө хариуцлага хүлээдэг гэдгээ мэдэх нь сонгох эрхээ харж, ашиглах байдалд маань хэрхэн нөлөөлж болох вэ?

Суралцагчдыг төгс эзэмших сургаалын судрын хэсэг болох 2 Нифай 2:27-г уншаад, сонгох эрхийн талаар нэмэлт ойлголт олж авахад урь. Тэд энэ шүлгийг Сургаал ба Гэрээ 101:78-тай холбож болно.

Ерөнхийлөгч Эзра Тафт Бэнсон (1899–1994) бидний сонгох эрхээ ашиглах тухай ийн хуваалцсан.

Бид сонгох эрх чөлөөтэй ч сонголтуудынхаа үр дагаврыг өөрчлөх эрхгүй. (Teachings of the Presidents of the Church: Ezra Taft Benson [2014], 63)