113-р хичээл: Сургаал ба Гэрээ 98–101

Сургаал ба Гэрээ 98

Бүх зүйл бидний сайн сайхны төлөө ажиллах болно

1833 оны зун миссуричууд, Жаксон гүнлэг дэх гэгээнтнүүдийн хооронд үүссэн хурцадмал байдал танхайрагч бүлэглэлүүдийг орон гэр лүү нь дайрч, бизнесүүдийг нь сүйтгэж, Сүмийн бүх гишүүнийг уг бүс нутгаас явахыг шаардахад хүргэжээ. Сургаал ба Гэрээ 98-д Аврагч зовж шаналж буй гэгээнтнүүдэд тайтгарал, зөвлөгөө өгч, Сүмийн удирдагчдад шударга бус байдлыг хэрхэн зохицуулах талаар заавар өгсөн. Энэ хичээл зовлон зүдгүүртэй үед Их Эзэнийг тэвчээртэй хүлээхэд суралцагчдад тусална.

Боломжит суралцах үйл ажиллагаа

Тэвчээр

Тэвчээрийн тухай эргэцүүлэн бодоход нь суралцагчдад тусалж хичээлээ эхлүүлэхийг бод. Энэ нь тэдэнд зовлон зүдгүүртэй үед Их Эзэнийг тэвчээртэй хүлээхэд суралцахад бэлтгэх болно. Та самбар дээр “тэвчээртэй” гэдэг үгийг бичээд, дараах асуултуудаас заримыг нь тавьж болно.

• Хэзээ тэвчээртэй байх хэцүү вэ?

• Тэвчээртэй байх ёстой ямар нөхцөл байдал танд тохиолдсон бэ?

• 1–10 гэсэн онооноос хамгийн их тэвчээртэйг 10 гэж үзвэл та өөрийгөө хэр тэвчээртэй гэж боддог вэ?

• Их Эзэн таныг ямар нөхцөл байдалд тэвчээртэй байгаасай хэмээн хүсдэг вэ? Яагаад?

Гэгээнтнүүд Миссурийн Жаксон гүнлэгээс хөөгдсөн нь

Суралцагчдад 98-р хэсгийн түүхэн агуулгыг ойлгоход нь туслахын тулд дараах догол мөрийг уншиж эсвэл өөрийн үгээр товч ярьж өгч болно.

Гэгээнтнүүдийг Сионыг байгуулахаар Миссурид ирэх үед Жаксон гүнлэгийн оршин суугчид, гэгээнтнүүдийн дунд зөрчилдөөн үүсэв. Улс төрийн зөрчилдөөн, шашны санал зөрөлдөөн, мэргэн бус шийдвэрүүд (Аврагчийн зарлигласан ёсоор ариун сүмийг барьж чадаагүй гэх мэт) нь асуудлыг улам бүр хүндрүүлжээ. 1833 оны зун эсэргүүцэгч бүлгийнхэн гэгээнтнүүдийг Жаксон гүнлэгээс хүчээр гаргахаар цуглараад байв. Бишоп Эдвард Партриж, Чарлез Аллен хоёрыг зодож, давирхай түрхэн, өд наажээ. В.В.Фелпсийн хэвлэлийн газрыг сүйтгэж, Зарлигуудын номын хуудаснуудыг тарааж хаясан байв. Мэри болон Кэролаин Роллинс гэдэг эгч дүүсийн хамт Виенна Жак илчлэлтийн хуудаснуудыг сүйдэж устгагдахаас өмнө чадах чинээгээрээ олныг зоригтойгоор шүүрэн авчээ. Тэд дээрэмчдээс зугтан, илчлэлтүүдийг аван нуугдав. Дайралтын үеэр олон гэгээнтэнд буу тулган, орон гэрээ орхиж явахыг шаардсан юм (Гэгээнтнүүд: Хожмын үе дэх Есүс Христийн Сүмийн түүхийн 1-р боть, Үнэний жишиг, 1815–1846 [2018] номын х. 172–181-ийг үзнэ үү).

Суралцагчдыг тулгарч байгаа сорилт бэрхшээл, зовлон зүдгүүрийнхээ талаар бодоход урь. Тэднийг Сургаал ба Гэрээ 98-ыг судлахдаа, хувийн илчлэлт эрэлхийлж, Их Эзэний тэднээс юу хийхийг хүсэж байгааг сонсоход урамшуулан дэмж.

Сургаал ба Гэрээ 98:1–3-ыг уншаад, Аврагч Жаксон гүнлэг дэх гэгээнтнүүдийн залбиралд хэрхэн хариулсныг олж мэд.

• Энэ зөвлөгөө нь Миссурийн гэгээнтнүүдэд хэрхэн тусалсан байж болох вэ?

• Энэ нь танд эсвэл хэн нэгэнд хүнд хэцүү зүйлийг даван туулахад хэрхэн тусалж болох вэ?

• Эдгээр шүлгээс та ямар ямар зарчим тодорхойлж болох вэ?

Суралцагчид өөр өөр зарчмыг хуваалцаж болох юм. Зарчмуудыг тодорхойлоход нь суралцагчдад туслах нэг арга зам бол самбар дээр дараах гүйцэд биш мэдэгдлийг бичээд, гүйцээж бичихэд урих явдал юм.

Биднийг Их Эзэнийг тэвчээртэй хүлээх үед Тэрээр … гэсэн гэрээ байгуулдаг.

Суралцагчид дараахтай адил зарчмуудаар мэдэгдлийг гүйцээж бичиж болно. Үүнд:

• бидний залбирал хариулагдах болно

• бидний зовлон зүдгүүрээс сайн сайхан ирнэ

Их Эзэнийг тэвчээртэй хүлээх

Аль зарчим дээр анхаарлаа төвлөрүүлэхийг олж мэдэхийн тулд сүнслэг нөлөөг эрэлхийл. Суралцагчдынхаа хэрэгцээг бодож үзэн, хамгийн их тус болох материалыг сонгоорой. Дараах материалуудаас алиныг нь суралцагчидтайгаа хуваалцахаа шийд. Та бүгдийг нь ярилцах шаардлагагүй.

Өөр нэгэн сонголт бол суралцагчдыг бүлгүүдэд хуваарилаад, бүлэг бүрд нэг мэдэгдэл эсвэл Мормоны Номын нэг хэсгийг оноож өгөх явдал юм. Дараа нь суралцагчдыг олж мэдсэн зүйлээ ангийнхантай хуваалцахад урь.

Арван хоёр төлөөлөгчийн чуулгын ерөнхийлөгч M.Рассэлл Баллард Их Эзэнийг хүлээх талаар заасан. Уг мэдэгдлийг унших юм уу ChurchofJesusChrist.org дээрх “Христэд найдах” видеог цагийн код 9:13-аас 10:06 хүртэл үзнэ үү.

Их Эзэнийг хүлээх гэдэг нь Түүнд үргэлжлүүлэн дуулгавартай байж, сүнслэгээр өсөж хөгжихийг хэлнэ. Их Эзэнийг хүлээх гэдэг нь цаг хугацаагаа зарцуулах гэсэн утгыг агуулаагүй. Та хэзээ ч хүлээлгийн өрөөнд байгаа мэт байх ёсгүй.

Их Эзэнийг хүлээх гэдэг нь үйлдэх гэсэн утгатай. Бусдад үйлчлэхэд Христэд итгэх итгэл найдвар маань өсөн нэмэгддэгийг би амьдралынхаа явцад сурч мэдсэн. Христийн үйлчилж байсны адил үйлчлэх юм бол Түүнд итгэх итгэл найдвар маань аяндаа өсөн нэмэгдэж байдаг.

Их Эзэнийг болон Түүний амлалтыг хүлээх явцдаа олж авч болох хувийн өсөлт хөгжил нь бидний хүн нэг бүрд зориулсан Түүний төлөвлөгөөний үнэлж баршгүй ариун нандин бүрэлдэхүүн хэсэг юм. (М.Рассэлл Баллард, “Христэд найдах нь,” 2021 оны 4-р сарын Ерөнхий чуулган, 54)

• Зовлон зүдгүүртэй үед Их Эзэнийг тэвчээртэй хүлээх ямар ямар арга зам байдаг вэ?

Ерөнхийлөгч Рассэлл М.Нэлсон Сургаал ба Гэрээ 98:1–3-ыг ашиглан бидний залбирлын хариултын талаар заасан.

Бид мөнхийн байдлаас нь харж залбирах юм бол, бидний хамгийн чин сэтгэлийн нулимс урсгасан залбирлуудыг сонссон болов уу гэж гайхширах шаардлагагүй. …

Бидэнд баталгаа өгөхөөр Их Эзэн хамгийн хүчирхэг үгсийг сонгожээ! Лац! Гэрээ! Андгайлсан! Тогтоосон! Өөрчлөгдөшгүй гэрээ! Ах, эгч нар аа, Түүнд итгэ! Та нарын чин сэтгэлийн мөн зүрхний залбирлыг Бурхан сонсох бөгөөд та нарын итгэл хүчирхэгжүүлэгдэх болно. (Рассэлл М.Нэлсон, “Ирээдүйгээ итгэлээр хар,” 2011 оны 4-р сарын Ерөнхий чуулган, 35)

• Энэ мэдэгдэл Их Эзэний талаар танд юу зааж байна вэ?

• Эдгээр сургаалыг ойлгох нь Их Эзэнийг тэвчээртэй хүлээхэд хэн нэгэнд хэрхэн тус болох вэ?

2 Нифай 2:1–2-ыг уншаад, бошиглогч Лихай хүү Иаковтоо түүний зовлонгийн талаар юу гэж заасныг олж мэд.

• Их Эзэн “[бидний] зовлонгуудыг [бидний] өсөлт хөгжлийн тул ариулан адислах” ямар ямар арга зам байдаг вэ?

Аврагчийн зөвлөгөө

Сургаал ба Гэрээ 98:11–22-ыг судлахдаа суралцагчид хамтрагчтайгаа эсвэл жижиг бүлгээр ажиллаж болно. Суралцагчид анхаарлаа төвлөрүүлэх нэг зарчим сонгоод, дараа нь уг зарчмыг хэрэгжүүлэхэд туслах Аврагчийн зөвлөгөөг хайж болно.

Тухайлбал: “тэрээр итгэлтнүүдэд шат шатаар … өгөх болно” (12-р шүлэг) хэмээх зарчим нь Их Эзэн тэдний залбирлуудад бага багаар хариулах үедээ Түүнийг тэвчээртэйгээр хүлээхэд тэдэнд тусалж болох юм. “Хилэнцэт бүхнийг орхиж, мөн сайн бүхэнтэй нэгдэн нийлэх” (11-р шүлэг) хэмээх хэллэг нь хэн нэгэнд Бурхан тэдний зовлонг “[тэдний] сайн сайхны төлөө ажиллах” (3-р шүлэг) боломжтой тэрхүү байдлаар амьдрахад туслах болно.

Сургаал ба Гэрээ 98:11–22-ыг уншаад, Их Эзэнийг тэвчээртэй хүлээхэд танд болон хэн нэгэнд тусалж болох Аврагчийн зөвлөгөөг олж мэд.

• Та эдгээр шүлгээс Их Эзэнийг тэвчээртэй хүлээхэд хэн нэгэнд туслах юуг олж мэдсэн бэ?

• Сорилт бэрхшээлийг даван туулж буй нэгэнд та ямар үг, хэллэгийг хуваалцах байсан бэ? Яагаад?

Суралцагчдыг сорилт бэрхшээлийн үед ирэх боломжтой сайн сайхныг олж харахад нь Аврагч тэдэнд тусалсан үеийн тухай тунгаан бодоход урьж болно. Та ChurchofJesusChrist.org дээрх “God Will Lift Us Up” (4:59) эсвэл “Mountains to Climb” (5:05) гэсэн видеог үзүүлж болно.

Хүсэлтэй суралцагчдад сорилт бэрхшээлийн үед Аврагч тэдэнд хэрхэн Түүнийг тэвчээртэй хүлээхэд тусалсныг хуваалцах боломж гаргаж өг. Тохиромжтой бол суралцагчид сорилт бэрхшээлийн ачаар сайн сайхныг олж харсан туршлагаа хуваалцаж болно.

Аврагчийн сургаалыг хэрэгжүүлэх

Өнөөдөр сурсан зүйлсээ ашиглан, залбирч байгаад дараах асуултуудад судлах тэмдэглэлдээ хариулж бич.

• Та Их Эзэнийг тэвчээртэй хүлээх чадварыг тань өсгөж болох юу сурч мэдсэн бэ?

• Хүнд хэцүү сорилтуудтай тулгарах үед Аврагчийг тэвчээртэйгээр хүлээхэд тань туслах юу хийх сэдэл төрсөн бэ?

Хичээлээ дуусгахдаа та Их Эзэнийг тэвчээртэй хүлээсэн эсвэл Тэрээр сорилт бэрхшээлийг таны сайн сайхан болон Өөрийн алдар суугийн төлөө ажиллахаар болгож байсан туршлагаа хуваалцаж болох юм. Биднийг Тэнгэрлэг Эцэгийг хүлээх үед Тэрээр зовлон зүдгүүртэй цагт биднийг адислахад бэлэн байдгийг та гэрчилж болно.

Нэмэлт эх сурвалж

Залбиралд маань хариулахгүй байгаа юм шиг санагдвал би яах вэ?

Арван хоёр төлөөлөгчийн чуулгын ахлагч Жэффри Р.Холланд ийн гэрчилсэн:

Бид хамгийн сайнаараа сүнслэгээр хичээж чармайн, чин сэтгэлээсээ гуйн залбирсан ч дэлхийг хамарсан томоохон эсвэл хувь хүний багахан хэмжээний асуудлуудыг хүссэнээрээ шийдвэрлэж чадахгүй байх үе амьдралд маань тохиолдоно. Тиймээс бид зарим залбирлынхаа хариултыг авахаар хамтдаа хичээж, хүлээх явцдаа бидний хүссэн цагт хүссэн арга замаар биш ч гэсэн сонорт нь хүрч, хариулт нь ирсэн амлалтыг би та нарт төлөөлөгчийн хувьд санал болгомоор байна. Гэхдээ тэдгээр залбирлын хариу бүхнийг мэддэг, мөнхөд өрөвч нинжин сэтгэлээр дүүрэн байдаг эцэг эхийн цаг, арга замаар үргэлж ирдэг. Хайрт ах, эгч нар минь ээ, хэзээ ч үүрэглэдэггүй, унтдаггүй Тэрээр тэнгэрлэг хүмүүний хувьд хийх хэрэгтэй бүх зүйлээсээ илүү Өөрийн хүүхдүүдийн аз жаргал, эцсийн өргөмжлөлд анхаардаг гэдгийг ойлгоорой. Тэрээр цэвэр хайрын алдар суут амьд жишээ бөгөөд Түүний алдрыг Нигүүлсэнгүй Эцэг хэмээдэг. (Жэффри Р.Холланд, “Их Эзэнийг хүлээх,” 2020 оны 10-р сарын Ерөнхий чуулган, 128–129)

Хүнд хэцүү цаг үетэй тулгарах үедээ би юу хийж болох вэ?

Залуу эмэгтэйчүүдийн ерөнхий ерөнхийлөгчийн зөвлөлийн гишүүн Мишэлл Д.Крэг эгч ийн хэлсэн.

Хэцүү цаг ирэхэд би дэлхийд ирэхээсээ өмнө Христийг дагахаар сонгосон мөн итгэл, эрүүл мэнд, тэсвэр тэвчээрийг минь сорьсон сорилт бэрхшээл бол миний энд байгаа шалтгааны нэг хэсэг гэдгийг санахыг хичээдэг. Мөн өнөөдрийн сорилт Бурханы намайг хайрлах хайранд тээнэгэлзэхийг эсвэл Түүнд итгэх итгэлийг минь эргэлзээ болгон хувиргахыг би хэзээ ч зөвшөөрөх ёсгүй. Сорилтууд нь төлөвлөгөө бүтэлгүйтсэн гэсэн үг биш бөгөөд тэдгээр нь Бурханыг эрэлхийлэхэд надад туслах төлөвлөгөөний нэг хэсэг юм. Би шүд зуун тэвчих үедээ Түүнтэй илүү адилхан болж, зовж шаналж байхдаа бараг л Түүн шиг илүү чин сэтгэлээсээ залбирдаг. (Мишэлл Д.Крэг, “Бүхий л зүрхээрээ,” 2022 оны 10-р сарын Ерөнхий чуулган, 62)

Гэгээнтнүүдийг Жаксон гүнлэгээс хөөсөн талаар илүү ихийг би хаанаас мэдэж авч болох вэ?

• Гэгээнтнүүд, 1:172–193

• David W. Grua, “Waiting for the Word of the Lord,” in Revelations in Context [2016]

• Church History Topics, “Jackson County Violence,” ChurchofJesusChrist.org/study/history/topics

Нэмэлт суралцах үйл ажиллагаа

Бишоп Эдвард Партрижийн хүлцэнгүй байдал

Гэгээнтнүүд номын 1:179–180 дахь бишоп Партрижийн давирхай, өдөнд хучигдсан түүхийг эргэн хар. Суралцагчдыг уг явдлын талаарх бишоп Партрижийн бодлыг олж мэдэхэд урьж, тэрээр Сургаал ба Гэрээ 98:1–3 дахь Аврагчийн сургаалуудыг хэрхэн харуулсныг олж мэд. Суралцагчдыг хэрхэн ижил төстэй арга замаар хариулах байснаа бодоход урь.

Бишоп Эдвард Партриж дурсан ярив.

Надад давирхай, өд наахаас өмнө, ярих зөвшөөрөл өгөв. Гэгээнтнүүд дэлхийн бүх цаг үед хавчлагад өртөж байсан; би хэнийг ч гомдоохоор зүйл хийгээгүй; хэрэв тэд надад хүч хэрэглэвэл гэмгүй хүнийг хүчирхийлэх болно; би Христийн төлөө зовоход бэлэн; харин нутгаа орхихын хувьд би үүнийг зөвшөөрөхгүй гэдгийг тэдэнд хэлэв. …

… Би хүчирхийллийг маш их тэвчээр, хүлцэнгүй байдлаар тэвчсэн бөгөөд энэ нь олон хүнийг гайхшируулан намайг чимээгүйхэн явж одохыг зөвшөөрөхөд хүргэж, олон хүн маш их хүндэтгэсэн харцаар харж, миний бодсонтой адил тэдэнд өрөвдөх сэтгэл төрсөн байв; мөн миний хувьд, Бурханы Сүнсээр болон хайраар дүүрэн байсан тул хавчигчид болон өөр хэнийг ч үзэн ядах сэтгэл надад төрсөнгүй. (Edward Partridge, in History, 1838–1856 [Manuscript History of the Church], volume A-1, 327–328, josephsmithpapers.org; үг үсэг, том үсэг, цэг таслалыг шинэчилсэн)

Зарлигуудын номыг хамгаалсан нь

Суралцагчдад сорилт бэрхшээлийн үед хүч чадал, эр зоригоо харуулсан залуу эмэгтэйчүүдийн жишээг харахад туслахын тулд та Мэри, Каролаин Роллинс нарын түүхийг Гэгээнтнүүд номын 1:178–179-өөс хуваалцаж болно. Та нар эдгээр эгчийн жишээ өнөө үеийн өсвөр үеийнхэнд хэрхэн урам өгч болох тухай ярилцаж болно.

Сургаал ба Гэрээ 98:23–48. Өшөө авалт, дайн, өршөөлийн тухай Их Эзэний хуулиуд

Суралцагчдад Аврагчийн хавчлага мөрдлөгт хэрхэн хариу үйлдэл үзүүлэх талаар илүү ихийг мэдэх нь тустай гэж үзвэл хэн нэгэн тэднийг гомдоох эсвэл гэмтээх үед хүмүүсийн хариу үйлдэл үзүүлэх хэдэн арга замыг тайлбарлахад урь. Сургаал ба Гэрээ 98:23–48-д цэдэглэгдсэн энэ илчлэлтэд Их Эзэн бусад хүн биднийг гомдоож мөн өвтгөх үг, үйлдэл гаргасан үед бид хэрхэн хариулах талаарх зарчмуудыг заасан болохыг тайлбарла. Та ангийг хоёр хоёроор нь эсвэл жижиг бүлгүүд болгон зохион байгуулж болно. Бүлэг бүр дараах сэдвүүдийн аль нэгийг судлаад, олж мэдсэн зүйлээ ангийнхантайгаа хуваалцахаар бэлдэж болно.

1. Сургаал ба Гэрээ 98:23–32—Хавчлагад хариу үзүүлэх тухай Аврагчийн хууль

2. Сургаал ба Гэрээ 98:33–38—Дайны тухай Аврагчийн хууль

3. Сургаал ба Гэрээ 98:39–48—Өршөөлийн тухай Аврагчийн хууль

Та суралцагчдыг доорх жишээг ашиглан дараах асуултуудын талаар ярилцахад урьж болно эсвэл тэдэнд хамааралтай ижил төстэй нөхцөл байдлыг зохиож болно.

• Ийм зүйл тохиолдсон үед та юу хийхийг хүсэх байсан бэ?

• Сургаал ба Гэрээ 19:38-ын дагуу Аврагч биднийг хэрхэн хариу үзүүлэхийг хүсдэг вэ?

• Нифайн ах нар түүнийг хүлж, цөлд үлдээж, амлагдсан газар луу явж байсан хөлөг онгоцон дээр түүнийг үхэлд хүргэх шахсан бөгөөд Лихайг нас барсны дараа түүнийг алахаар хуйвалдсан.

• Таныг Аврагчийн болон ариун сүмийн зургийг цахим хуудсандаа нийтлэх үед танай сургуулийн нэг хүүхэд эелдэг бус сэтгэгдэл үлдээв.

• Танай тойргоос эсвэл салбараас үйлчилж буй номлогч ахлах сургуульд байхдаа чамайг дээрэлхэж байсандаа уучлалт гуйж захидал бичив.

ChurchofJesusChrist.org дээрээс “That We Might Be One: The Story of the Dutch Potato Project” (11:57) нэртэй видеог үзүүлж болно. Энэхүү видеонд Дэлхийн II дайны дараа Нидерландад дайснууд нь байсан хүмүүстэй ноогдол хоолоо хуваалцах золиослол гаргаж буй гэгээнтнүүдийн түүхийг харуулдаг. Та суралцагчдыг Аврагч нидерланд гэгээнтнүүдийг Христийнхтэй адил хичээл зүтгэл гаргасных нь төлөө хэрхэн адисалсныг олж харахад урьж болно.